又一次二人世界!?

今日係屋企無聊, 用左一個鐘頭化妝, 仲有用左d時間去襯衫~

話說琴晚蕃薯問我英文測驗唔知點算好, 我就答應佢幫佢溫書, 本來為去邊度溫書而煩惱, 最後都係決定去佢屋企, 之後佢問我地食咩, 佢話竟然想食左我!? 唔該你正經d啦, 我指係普通食飯牙><

今日放學前, 波特本來問蕃薯去tm邊度食飯, 佢都仲未決定好. 原本以為只有我地兩個一齊, 不過一齊溫英文, 都冇所謂既~放學時同文迪及berry行開左陣, 之後先去小巴站搵佢地, 點知蕃薯本來又話取消, 但之後大家除左呢日之外都唔得閒, 只好今晚又去溫書. 聽蕃薯講, 波特突然又話唔去, 我問點解, 點知話阿聯太夜唔去蕃薯屋企!? 但佢地之後又去左mk, 佢地搞咩牙? 全部答案都九唔答八, 波特去溫書關阿聯咩事牙? 佢地去mk又唔怕夜嗎? 唔係特登比我地二人獨處牙=.="

之後我地一齊去答巴士, 佢係車上用本雜誌捲埋打我呢, 佢又訓係我大脾上, 感覺好似拍拖一樣? 冇可能吧!? 雖然兩人冇咩點講野, 只係互相挨住大家, 但已經好開心, 覺得好平靜. 行左好遠去食佢話49元的打邊爐自助餐, 但去到又勁多人等位, 故只好去附近的上海菜度食飯. 最後我叫左個菜肉雲吞麵, 蕃薯叫左担担麵, 再叫多兩隻餃子及一個紅油抄手~

我既菜肉雲吞麵~味道比較淡d, 但真係好多送及麵, 都只係16元, 勁抵!

紅油抄手~勁好味! d汁少少spicy, 加上好酸, 好好味啊!!

可能係我break果陣食左個撈烏冬, 我覺得好飽, 冇咩點食野, 而蕃薯咁岩又肚餓, 結果佢幫我食左半碗麵, 同埋大半碟紅油抄手. 果碟抄手真係好好味, 自己竟然只係食得咁少, 可惡! 最衰都係自己食左野先啦! 個抄手有點spicy, 但一向怕食spicy野既佢竟然覺得好味, 而且仲有件得意事, 原來佢之前未食過紅抄手, 佢竟然以為係好spicy既豬手, 哈哈!! 睇黎你以後要食多d呢樣野食啦^^後來蕃薯媽提起果間野原來有豆莎窩餅!? 點解我係間餐廳個menu度見唔到架??總之叫呢個啦, 不過我可以食到嗎? 下次唔知有冇機會再食!

食完飯之後, 我地步行返屋企, 去佢屋企度溫書. 去到佢屋企, 佢竟然話[當自己屋企得啦, 唔使客氣]!? 吓, 幾時變左我自己屋企既? 雖然我都想....仲要坐你屋企張床度溫書添!? 我未完全備課, 有時教得你好差, 不過我會整好份notes比你溫書, 自己也可溫書之餘, 又可以比埋其他人溫. 我地有時溫書, 有時玩下, 都ok既. 最後好在你送我返屋企, 係lift口攬住我, 人地一出lift時我地即刻彈開, 勁好笑! 係去搭車途中真係凍左好多, 你比我橋你隻手行, 算你啦! 最後都我依依不捨搭車離開佢><

VF新相片

星期二果堂, 我地上左堂拍片, 阿sir比左唔同題目我地去拍, 包括拍移動物品, 從高處影某位同學, 由近景既花一直影上天空...不同既題目我地做. 我只係做個場記, 都冇咩楂機及比過意見, 自己真係失敗..當中有幾part比蕃薯影左相, 佢今日比左我, 好開心呢~多數組員都做過model, 拍片果然係最快樂的^^

其中一部分搵人望window外影佢左及右邊側面, tracy麻煩你啦~呢個係左邊面^^

呢個係右邊面~

阿聯及其他既攝影組員, 我呢個場記都係企係後面好d~

睇下阿聯拍完片個得戚樣=.="

第二段要拍既片, 係用handheld去拍移動緊既人, model係阿聯, 由tracy做攝影~

其中一段片, 係影tracy坐住, 鏡頭只係影我慢慢走去後面背住大家坐, 好在之前有訓練過, 一take就ok^^

同阿銘講解場記記錄內容, 因我做model時都可以搵佢幫我記底~

無聊既一張場記相!? 真係唔知蕃薯影咩...不過佢影我都係開心既...

其中一段bouns片啦, 係由講電話至到擺電話萵褲袋果段~

其實仲要一段係都係bonus片拍緊, 就係起初鏡頭影背住我地既阿銘, 之後遠處既波特會行過阿銘後, 鏡頭會影住波特, 我地一其影左幾次都未成功, 真係好難><而且影影下竟然斷左time, 所以我地影埋最後一段自由片之後就收工, 段片好好笑, 係影波特比阿聯追住, 最後波特半脆左地下, 阿聯出龜波氣功!? 真係笑到我地碌地, 由於蕃薯楂機, 我又冇帶相機冇影到, 只有阿銘用手機拍左短片, 真係可惜呢~

雨過天清

今日唔使返學, 冇得見到蕃薯, 加上唔知蕃薯有冇原諒我, 令我更加思念佢, 好想見到佢, 但一諗起星期二同我講過既說話好心痛, 自己唔可以忘記佢既說話. 但我唔可以同佢關係一直係咁, 所以我照平時一樣, 同佢sms講自己既野比佢聽, 但佢都冇覆我, 我又諗起佢話除左功課之外, 其他野佢唔會再理我, 但我都冇放棄, 鼓起勇氣問佢有冇嬲我. 佢最後話佢自己因為忙碌而冇同我傾, 佢已經話算啦, 我當時真係好開心, 佢終於原諒我, 我自己都要生性, 唔好再做d令佢傷心及憤怒既事, 期待同佢開開心心渡過毎一日^^

夜晚我即將會係十一點幾訓, 因為我最近係公司做多左好多錯野, 要改善一下自己既功課標準, 於是要早兩個鐘訓, 結果都ok牙, 第二日真係冇咩點做錯野, 而且仲好有精神; 加上我和各同事及老闆娘講, 如果佢地發現到我有做錯野話, 要請佢地食飯啊, 睇黎真係幾大壓力下, 不過唔緊要, 咁先可以改善自己呢個唔小心做野既弊病, 好在今日冇做錯野, 執返身彩, 嘻嘻~但蕃薯竟然話我好快又會夜返訓, 你竟敢睇少我, 激氣牙><

算係原諒嗎?

我哭到眼都腫埋咁返工, 呢日我失魂落拍, 成個早上都做錯野, 比老闆娘鬧到我飛起. 自己做錯野竟然錯到咁離譜! 連我自己都唔知自己做緊咩. 一直同蕃薯sms, 佢話自己仲嬲緊我, 令我更加唔開心, 真係好想哭, 但又唔可以哭, 唔可以比同事佢地知道, 呢種感覺好痛苦.

突然有唔想再讀既打算, 除左因想讀自己鍾意可以成日畫畫及本身鍾意衣著既時裝設計外, 及讀呢個電腦班咩都唔識, 自己成績差而覺得唔開心外, 仲有因為自己接受唔到同蕃薯只係同學既關係而想離開呢班唔會再讀, 於是放學之後, 去左問IVE唔再讀呢個課程既steps, 點知比video堂個阿sir聽到, 我入左班房時, 佢問我係咪唔讀, 果陣有同學係度當然唔會直接話我唔讀, 最後都否認左

我驚蕃薯仲嬲緊我, 我唔想令佢見到我覺得難受, 於是我冇幫佢留位, 但我又唔忍心見佢冇位坐, 於是直接同佢講驚佢嬲, 所以冇留比你, 估唔到佢同我講[留個位比我, 我返緊黎]. 咁樣即係原諒我嗎? 都係睇定d先. 佢終於返到學校, 見到個位太後, 於是想坐前面, 但只有一部電腦用得, 佢都堅持要同我坐, 而且放學後佢都有引我笑, 我自己覺得好內夠, 我又見到各同學開心的話我, 突然諗起我即將會走, 自己覺得好唔捨得, 於是衝去toliet哭....我發覺同學仔, 已經成為我生活之中不可缺少既一部分, 尤其係蕃薯, 我真係唔捨得離開佢, 想永遠係佢身邊

去到地鐵站時, 我比返哂成部notebook既錢比蕃薯, 佢話唔使要d錢住, 仲話我平時都唔係好夠錢用, 不如等我真係走時, 先至比返哂d錢佢, 但我都拒絕左佢, 自己傷心地離開. 我用sms多謝佢關心我, 但佢都冇覆我, 返到屋企都係講英文個test及比返琴日拍片d相我之後, 已經冇再傾過, 咁樣佢到底有冇原諒我呢?

對唔住, 我心底內愛慕的蕃薯....

心靈創傷

那個anthory好耐都冇搵過我, 我同蕃薯仍然好開心一齊過毎段日子. 本來係美好的, 直至放學時果個anthory突然打電話比我, 問我係邊度, 佢話而家係荃灣, 叫埋我一齊過去. 我唔知係咪太耐冇見佢, 咪當見下朋友, 於是我真係走去荃灣搵佢

約左大家係荃灣地鐵站荃豐中心附近等, 後來先知佢原來架車拍左係第二度, 要我陪佢去拿車!?唔係掛!? 咁都得? 佢要我請佢坐的士, 之後佢車返我返屋企. 係車上我問佢姓名, 佢都冇答我, 只係同我講係車上問佢咁多做咩!! 只係個名都唔話比人知, 真係好極有限! 因佢想去toliet, 所以去左佢屋企, 之後佢竟然叫我幫佢按摩背隻骨, 咩都冇做過. 佢話有個長途電話打比佢係英國既媽媽, 叫我唔好出聲, 走左去其他地方傾, 睇黎佢都好神秘.....我想趁佢行開時睇下佢咩名, 點知佢又出返去. 最無理既係佢係客廳同媽傾電話, 叫我先入房, 由於佢間房好細, 只好坐係床上等佢傾完, 點知佢傾完電話之後, 佢竟然話我做咩唔幫佢接被!? 吓, 係你叫我係房度等, 做咩要我幫你做家務?

仲有佢臨走時都車我返屋企, 佢唔見左出閘張卡, 我好心幫佢搵下, 我唔知佢車匙係車內, 想關車門同佢周圍搵下, 點知佢大聲鬧我, 話我要做既事又唔做, 唔做既又幫佢做, 佢搵返張出閘證, 之後先溫柔d同我講[唔好再要我鬧你, 好嗎?]我都比你鬧左咁多次啦, 早知就唔搵你!!

返到屋企, 我係msn度打左句[原來去拿私家車]. 估唔到蕃薯問我咩私家車, 問我係咪同果個anthory, 因一d原因蕃薯係勁憎佢. 我口快快講左話係, 佢即刻話我冇信用, 話唔見佢, 最後又見左. 佢嬲到話什麼[一次不忠, 百次不用], 我同你已經冇任何關係, 以後除左做功課及還錢買notebook之外, 其他都唔好再傾....之後佢好嬲咁off左, 我只好一直係房內哭, 因我自己又傷害我自己鍾意, 一直關心我既人, 我又再令佢唔開心. 自己覺得只係朋友聚舊冇咩事, 點知蕃薯竟然會咁嬲, 自己又因佢嬲自己而整晚在哭. 呢一刻, 我先知道蕃薯原來對我係幾咁重要...

老闆娘屋企附近景色~

一見到個標題, 以為我唔使返工呢, 當然唔係啦, 依然要返工, 除非自己中左六合彩幾千萬啦! 不過返工都有返工既樂趣既, 好似今日咁, 我要拿老闆娘樓宇按揭表格比佢老公填, 加上我又要親自去銀行交MPF, 咁咪可以又去下街, 唔使咁悶~

呢次係第二次去, 當然識路啦. 好快比完老闆娘個老公簽名後, 順便周圍去睇下先~果度風景真係幾靚, 最衰上次冇帶相機, 所以影唔到, 好鬼可惜. 所以今次我帶埋個相機去影, 加上老闆娘11月搬新屋, 自己都唔知有冇機會再去, 都係影定幾張相留念先~

老闆娘屋企樓下~其實係個水中公園, 可以比人行架, 不過我冇行到, 可惜=.="

我老闆娘屋企樓下, 真係勁靚~入面都好靚, 不過管理員係度, 冇得影><

佢屋企附近既lift, 就好似一個亭, 四周有水包圍住~

本來仲想影多d相及周圍睇下, 但自己都仲係返緊工, 唔好得意忘形啊!! 之後便交MPF. 最後返到公司, 點知返去勁多野要做, 會計方面要開始做成本會計, 計算毎件貨的profit或loss, 其實呢個係老闆娘叫我做, 但份文件點做就要自己諗辦法, 最後做完出黎之後老闆娘好滿意, 話係公司機密文件, 把呢d資料擺係佢間房, 又可以幫到跟單及見客果邊, 勁開心呢~仲有牙, 我由上星期開始用excel設計bra及收複褲, 開始接觸設計, 今日老闆娘仲叫我睇多d雜誌, 設計條收複褲比佢睇, 我自己真係可以做得到嗎? 自己又要做多d野, 都唔知開唔開心好?

自己的感情世界

聽日要交英文功課, 內容係回覆投訴信之內容, 我覺得真係幾難寫既, 而且我仲要做多一份. 因蕃薯佢接左pt, 佢要跟進客人事項, 我問佢接唔接我同事個網頁設計佢都接, 睇黎佢好努力搵錢, 加上佢一直係電腦方面都幫我手, 我一直都想幫返佢, 而家終於可以幫佢, 用左三小時完成兩份功課..

之後夜晚蕃薯sms問我同唔同佢及佢阿媽食飯, 以我既性格及想見佢, 我一定會去, 可惜我媽話已經煮左飯, 同埋話哂錢, 於是叫我係屋企食好了. 最後我都拒絕左佢, 但個心一直囉囉戀, 我好想見到佢, 即使只係兩三個鐘都好, 而家竟然開始掛住佢起黎...可能係因anthory, 先更加清楚自己心意, 佢一直冇離開我及接受我, 知道佢一直都好關心及愛護我, 從來冇一位男子真係對我咁好, 令我自己更加鍾意佢, 點算呢?

最衰自己打左句[想見你...], 佢之後問我係咪想見佢, 係都唔話你知啦, 總之我個心囉囉戀啦. 我一直帶佢遊花園, 叫佢自己估下啦. 之後佢整個視像比我睇, 終於可以見到佢, 勁開心~佢一直係度整緊燈光, 睇下自己靚唔靚仔, 我係度睇左場真人show囉!! 真係笑到死左. 整到我都想買部webcam, 如我都買左既話, 咁我咪可以毎日見到佢囉><

蕃薯用webcam, 可以成日見到佢啦~但收音似乎唔太好呢=.="

係fd for sale中近來有個男仔成日買我, 而且我覺得佢個樣有d似蕃薯, 我好想佢一直買我, 就好似蕃薯買我一樣, 但佢始終唔係蕃薯, 但我已經好開心呢~

我都有八過下, 原來佢細我成五年....唔知點解我覺得佢似蕃薯?

講真果句, 呢年真係多左d男仔搵我傾計, 係msn內話鍾意我, 做佢女友既已經有好幾個, 最後都係無疾而終, 愛情真係咁兒戲嗎? 做朋友既無咩所謂, 但講到做情侶既都有d避忌, 多數都係離唔開約出黎食飯及睇戲, 不過我總係唔會去; 一係就成日打電話比我, 問我係邊度, 有個後生過我既話即使你大過我都唔緊要, 因我覺得26歲既女仔有時成熟, 有時孩子氣好正, 仲話之前同佢拍拖果d都係同我一樣大.....一係就msn狂同我傾計. 點解我會遇上呢d事? 以前自己一個男仔都冇, 全部總係女仔, 點知呢年比我接觸各類似既男仔, 有花心, 賤格, 幽默, 細心...我唔敢話自己遇見所有類型既男仔, 但也遇唔少. 究竟我幾時先可找到個真命天子, 令我以後唔使再比男仔煩呢? 但也估唔到自己認識果d男仔都幾型仔既, 但靚仔真係冇本心, 果隻anthory已經係啦!! 而且我同事走黎八下我, 佢話我做咩認識d男仔全部都係好似去玩, 去蒲果d架? 我都好想知道點解, 仲要係壞男人居多, 可以搵人話我知嗎? 可能我既衣著打扮似掛=.="

唔好講男仔, 我上網發現左一隻好得意既野, 就係有隻game會係呢個月尾會出, 係秋葉縣竟然有人扮我至like果隻人企鵝宣傳, 勁得意啊~

隻企鵝好得意牙~真係好想攬下佢>3< 仔細睇下佢後面, 有隻惡魔翼仔, 卡娃伊><