聽毎位同事說話我哋公司個老闆娘真係麻麻地, 雖然佢表面對人係幾好, 但其實佢係個斤斤計較, 只係做表面功夫既人, 口頭講好左件事, 之後可以唔算數; 而且又鍾意借用其他同事把口去講其他同事. 其實都只係同事突然講開先講, 有d情況我暫時未見過, 雖然唔知佢哋講既事可唔可信, 但都聽下做個參考. 其實我係公司度都唔係太信人, 都唔知佢哋邊句真, 邊句假....只要對自己冇害既就冇所謂, 聽下咪算. 係我心目中可信既人只有自己既好朋友及屋企人. 其他人既就視乎交情有幾深, 我好鍾意觀察人既行為, 言語及動作, 覺得可以信先會信

candy及mooji叫我哋而家fd就好, 係老闆娘面前就唔好, 其實佢哋係咪fd, 我真係唔知, 佢哋都係集中講老闆娘的不是, 冇計啦, 鬼叫職場上係大家互相鬥爭, 要大家團結只有一個方法, 就係搵一個共同既敵人, 得閒時咪講下是非. 我對呢家野真係冇咩興趣, 自己聽下就算及唔會去參與, 即使老闆娘點唔好, 都係冇辦法, 最多只有唔做, 但而家個市咁差, 咁難搵工, 加上我想填resume時個工作經驗好睇d, 上次果份都做左三年, 今次冇理由做得咁少掛!? 所以無論如何, 我都要忍, 等一個離開既機會. 係呢間公司內, 除左有時唔小心做錯野外, 其餘都ok. 最多係呢度學埋人際關係及溝通技巧先至走都未遲既....(如果我仲忍到既話)

我今日作病, 帶住左個口罩, 因我唔鍾意有病周圍傳比人. 跟住同事講開沙士, 我也對佢哋提起果年係考A-level, 也係我人生之中最痛苦既其中一段時間, 要帶住個口罩去考試. 加上果陣己知麻麻有糖尿, 要毎日洗腎, 原本開心, 毎日鍾意走去涼亭同人傾計既佢, 突然全個人都變哂, 因病情而終日困在家中, 從此不再走到涼亭和人傾計, 我毎日照顧佢, 幫佢買送等姑姐煮飯, 毎個星期有二天清潔屋企, 自己有好多書都唔夠時間溫, 而且又唔可以打機(果陣係我至愛). 見到麻麻咁樣, 自己讀書又辛苦, 真係好想哭, 想搵人傾但又驚阻住其他人溫書, 毎日都好唔開心, 但幾唔開心都好, 自己要生活落去, 惟有盡力去考好個試. 好在皇天不負有心人, 我全部都及格, 仲有d科目可能拿到grade D, 對於溫唔哂書既我已經對得住自己及屋企. 當然我冇和同事講我過去既事, 只話比佢哋知全部科目合格, 佢哋覺得我讀書及工作上都幾叻, 除左我最弱既一項人際關係, 如果我連呢樣都學識, 咁就真係perfect, 但願如此啦, 多謝你哋鼓勵^^

我都覺得佢哋毎個人都係用心教我, 想教好我先會話我, 其實我真係好多謝佢哋, 因為佢哋令我知道自己既缺點. 雖然佢哋愛講是非, 但佢哋都有好人既一面~睇黎我都要再細心觀察, 希望大家可以真正做到朋友, 期待呢一日~