今晚雖然天文台話落雨, 但我一於少理, 約左文迪七點食飯, 點都要去!! 文迪約左個舊朋友食飯, 我只好在我地的食飯地方, 尖沙咀附近周圍行下, 不過都唔緊要啦, 話咁快就七點, 見到文迪穿住西褲恤衫黎到, 原來佢約朋友之前去左見工, 佢似乎好鍾意呢份工, 呢份工係做管理之類, 係訓練管理果類, 有三個星期訓練, 訓練之後派到中國其中地方實習二個月到, 睇黎都好吸引, 我都好想試下, 不過唔係做管理, 而係可以周圍去學design就好^^

我地二人先去搵地方食飯, 文迪問我食咩, 我都係來來去去果樣, 食日本野先, 我地去金太朗食野, 見到佢回轉壽司好得意(天啊, 你未見過咩!?)


有各式各樣的壽司轉黎轉去係好得意, 但只有好少款選擇....塊鏡仲反射, 見到我拿部相機影相=_="

我見到佢款式不多, 只係拿左碟三文魚壽司食, 但味道都係麻麻. 經過我細心計算, 食三碟的價錢等如一個餐, 加上我又想食曼魚, 見到個曼魚飯連三文及tuna刺身餐都係四十二元, 我一於唔理, 叫左呢個餐先算~~果d燒汁好好味, 可惜份量太少, 唔夠食!!!

食飽飽後, 文迪話尖沙咀海旁果度有個香港原創的漫畫展睇, 好多似乎相識的作品, 不過我都係鐘意百分百感覺多d, 可以睇到原畫, 真幸運^^先見到呢個先~係享應四川災民的心意咭, 好有意思^^

漫畫節個正門~~

其中呢支柱都幾鍾意, 我好鍾意佢個構圖, 簡單又可表達意思~

在呢個畫展內, 個會場唔係太大, 可能係香港始終唔係個漫畫盛行的地方, 作品少之有少, 究竟我地對本地作品, 有幾多係認識呢? 如果呢個係日本漫畫展, 一定會勁多人去睇, 而且地方也好大. 加上當時又落雨, 黎睇的人真係少之有少, 有兩幅畫我都幾鍾意, 仲走左去幅畫隔離影相~

呢幅係個叫kai的漫畫家, 我只睇過佢其中一部作品, 內容麻麻, 畫法少少似日本, 加上佢色調柔和, 勁正!!

第二幅係好似係一套叫首都高速的漫畫, 我冇睇過, 只係欣賞呢張畫, 又真實, 又畫得靚^^

同文迪合影一張先, 但我遮住左張畫, 都係比下面張正本你地睇~~

我都好鍾意呢張, 除左個人樣之外, 整體配搭又完美, 又有氣勢!!

睇完漫畫展後, 本來在海旁傾心事, 點知中途落大雨, 我同文迪好狼狽地走, 最後只好在附近搵個地方食dessert及傾計, 最後去左許留山, 仲叫左我地好鍾意的食物~~

文迪的dessert, 好多什果啊!!!

我的芒果小丸子, 真係好好味~~

食完dessert之後都差唔多返屋企, 文迪冇帶遮, 我就遮埋佢到屋企附近. 之後我冒住大雨返屋企, 終於去到地鐵站, 全個人已經濕哂, 在地鐵途中收到蕃薯個sms, 話佢自己肚痛, 好在最後佢都冇, 下次食野小心d吧!! 後來返到屋企先知原來我返屋企途中係紅色暴雨警告, 唔怪之得啦, 同時我都好佩服自己, 可以克服落大雨呢個困難返到屋企^^