今日終於見到蔡蔡啦, 因之前約佢時成日約唔到, 應該話佢可能貴人事忙, 約左之後唔黎得, 所以今日可以見到佢好開心. 佢前幾日都好唔開心, 而家見到佢開心返太好了~我哋去左一間樓上cafe度食野及玩大富翁. 叫食物之前mandy送左毎人一隻復活蛋, 多謝哂!
蔡蔡係瓜子臉, 我係包包臉.....唔係牙, 呢個唔係重點, 多謝mandy送比我哋二個隻蛋~我哋分別叫左食物, 我同文迪都冇食野黎, 叫左碗麵或粉. 蔡蔡一早食左野, 叫左飛碟三文治. 記得我哋返學時成日都食, 你食牛肉, 我食沙律磨姑, 真係好想再去食過~影左唔係太多野食=_="下次影多d~
蔡蔡的薄何choco, 仲有佢隻復活蛋~
我的津子choco, 仲有我隻復活蛋~
我的餐肉米粉, 仲要係福字米, 正牙~食飽飽之後開始玩大富翁, 我真係好耐都冇玩過, 完全唔知點玩, 真失敗...要重新學過遊戲玩法, 咩野兩粒骰子投到相同可投多次, 三次就要坐牢; 買到全條街的租金雙倍等等...可能真係傻人有傻福, 比我買左三條街, 其中仲有一條係地皇, 租金雙倍已經要二千元, 做左大地主, 但冇公共事業及交通....比大家睇下我哋個戰果先~
枱面太多地契, 手上只有唔太多現金....交稅冇錢比都唔知點算!?
公共事業就蔡蔡買哂, 而且仲有貴地....可惜佢掛住同男友傾電話, 影唔到你啦=_="本來玩得幾開心, 我一直在搵錢啊. 因在途中蕃薯已經問我同唔同佢買鏡, 我又應承左佢. 而家佢到左旺角, 在電話度叫我落去搵佢. 因佢呢個電話, 可以幫到二個人, 唔係我d地都真係貴到死架!!同佢哋道別後再搵蕃薯.
我去到約定的地點, 終於見到佢啦! 仲只有我哋兩個人!?講真佢好耐都冇約我, 所以佢特登邀請我同佢買鏡時, 真係好開心架. 雖然我對攝影, 鏡頭..唔認識, 但你都同我去^^不過我驚佢唔鐘意有情侶表現, 所以我都冇橋及拖佢隻手. 仲有原來佢也有叫波特先生同佢一齊買鏡, 但波特要後來先至黎得, 所以叫左我先, 我係比佢攝時間嗎? 咩原因都好, 只要我哋可見到大家就開心...我同佢周圍去夾價買鏡, 最後佢都買左一支長鏡及一塊filter.
波特終於都黎到, 佢哋兩個一味傾攝影, 好似已經冇我的事啦...本來想去花卉展, 但佢哋二人覺得冇咩好影, 最後取消左, 改左去食晚飯. 我見不是味兒, 所以建議左不如分頭行事, 女仔去睇衫, 男仔去睇相機, 之後再一齊食飯. 大家都同意後便一陣再見啦!
我哋三個女仔去花園街睇衫, 今次係文迪及蔡蔡買衫. 文迪想買長衫及短褲, 而且仲發覺佢原來睇[with], 即係同我以前個朋友coco一樣啦~至於蔡蔡想買tee, 我記得上年都同佢去買過, 上次係黑色, 今次係白色. 但睇左冇耐, 蕃薯佢哋就打電話黎, 問去邊度食野. 好在文迪之前睇中左一件長衫短褲, 完成左任務, 但蔡蔡仲未買到, sorry, 呢次唔可以同你去買, 要你自己一個去旺中買衫....下次有機會一定再同你去!
蔡蔡走左後, 我哋四人一齊去朗豪坊味千食拉麵. 途中蕃薯問我, 之前比choco我果個係咪蔡蔡, 估唔到佢仲記得, 話哂蔡蔡都係靚女, 佢唔記得又要用蔡蔡果招 -擰佢個頭!!!最後毎人叫左碗拉麵, 我同文迪都叫左咖哩豬排拉麵~
果然係文迪好介紹, 真係好好味~豬排又脆, 咖哩又香又唔spicy!
食完個麵之後, 我竟然仲未夠飽!!!??蕃薯都問我做咩唔叫加大, 總之就叫啦!只好去deli france叫左個藍莓穌....比佢哋見到我大家個樣添!?連蕃薯都嚇左一嚇, 佢話佢女仔朋友多數食唔哂野, 我竟然食得哂, 仲未夠飽. 呢次真係失禮哂>_<"
又係食飽飽後, 蕃薯及波特都回家了, 我同文迪再去花園街行街. 呢次佢買左兩對鞋, 而我都終於買野啦, 都係買左對鞋, 而且仲同文迪某對一樣, 下次我哋齊穿返學先~哈哈...呢次講價都唔係太叻, 三對鞋平得果十五元, 可能要多d同sales傾計先得!!同sales傾計, 百幾元都可平二十元啦, 激氣~
最後我哋兩個帶住我哋的戰利品返屋企啦, 好累呢~不過只要開心就得^^
仲有一個勁好消息, 就係我弟婦生左個肥肥白白的男嬰, 可惜我仲有少少感冒, 唔可以去睇佢及弟婦, 我改日再去探佢哋. 我爸比張bb相我睇, 佢好得意架~好想親自去見下佢哋^^其實當我媽話比我知做左姑媽之後真係好開心, 覺得自己要成熟, 同埋有個重任要教好佢!
唔知我第時有冇機會結婚, 好似我弟婦這樣為自己所愛生個嬰兒呢? 係仔係女都好. 不過都係第時先算啦~而家十畫都未有一撇!