老闆娘屋企附近景色~

一見到個標題, 以為我唔使返工呢, 當然唔係啦, 依然要返工, 除非自己中左六合彩幾千萬啦! 不過返工都有返工既樂趣既, 好似今日咁, 我要拿老闆娘樓宇按揭表格比佢老公填, 加上我又要親自去銀行交MPF, 咁咪可以又去下街, 唔使咁悶~

呢次係第二次去, 當然識路啦. 好快比完老闆娘個老公簽名後, 順便周圍去睇下先~果度風景真係幾靚, 最衰上次冇帶相機, 所以影唔到, 好鬼可惜. 所以今次我帶埋個相機去影, 加上老闆娘11月搬新屋, 自己都唔知有冇機會再去, 都係影定幾張相留念先~

老闆娘屋企樓下~其實係個水中公園, 可以比人行架, 不過我冇行到, 可惜=.="

我老闆娘屋企樓下, 真係勁靚~入面都好靚, 不過管理員係度, 冇得影><

佢屋企附近既lift, 就好似一個亭, 四周有水包圍住~

本來仲想影多d相及周圍睇下, 但自己都仲係返緊工, 唔好得意忘形啊!! 之後便交MPF. 最後返到公司, 點知返去勁多野要做, 會計方面要開始做成本會計, 計算毎件貨的profit或loss, 其實呢個係老闆娘叫我做, 但份文件點做就要自己諗辦法, 最後做完出黎之後老闆娘好滿意, 話係公司機密文件, 把呢d資料擺係佢間房, 又可以幫到跟單及見客果邊, 勁開心呢~仲有牙, 我由上星期開始用excel設計bra及收複褲, 開始接觸設計, 今日老闆娘仲叫我睇多d雜誌, 設計條收複褲比佢睇, 我自己真係可以做得到嗎? 自己又要做多d野, 都唔知開唔開心好?

自己的感情世界

聽日要交英文功課, 內容係回覆投訴信之內容, 我覺得真係幾難寫既, 而且我仲要做多一份. 因蕃薯佢接左pt, 佢要跟進客人事項, 我問佢接唔接我同事個網頁設計佢都接, 睇黎佢好努力搵錢, 加上佢一直係電腦方面都幫我手, 我一直都想幫返佢, 而家終於可以幫佢, 用左三小時完成兩份功課..

之後夜晚蕃薯sms問我同唔同佢及佢阿媽食飯, 以我既性格及想見佢, 我一定會去, 可惜我媽話已經煮左飯, 同埋話哂錢, 於是叫我係屋企食好了. 最後我都拒絕左佢, 但個心一直囉囉戀, 我好想見到佢, 即使只係兩三個鐘都好, 而家竟然開始掛住佢起黎...可能係因anthory, 先更加清楚自己心意, 佢一直冇離開我及接受我, 知道佢一直都好關心及愛護我, 從來冇一位男子真係對我咁好, 令我自己更加鍾意佢, 點算呢?

最衰自己打左句[想見你...], 佢之後問我係咪想見佢, 係都唔話你知啦, 總之我個心囉囉戀啦. 我一直帶佢遊花園, 叫佢自己估下啦. 之後佢整個視像比我睇, 終於可以見到佢, 勁開心~佢一直係度整緊燈光, 睇下自己靚唔靚仔, 我係度睇左場真人show囉!! 真係笑到死左. 整到我都想買部webcam, 如我都買左既話, 咁我咪可以毎日見到佢囉><

蕃薯用webcam, 可以成日見到佢啦~但收音似乎唔太好呢=.="

係fd for sale中近來有個男仔成日買我, 而且我覺得佢個樣有d似蕃薯, 我好想佢一直買我, 就好似蕃薯買我一樣, 但佢始終唔係蕃薯, 但我已經好開心呢~

我都有八過下, 原來佢細我成五年....唔知點解我覺得佢似蕃薯?

講真果句, 呢年真係多左d男仔搵我傾計, 係msn內話鍾意我, 做佢女友既已經有好幾個, 最後都係無疾而終, 愛情真係咁兒戲嗎? 做朋友既無咩所謂, 但講到做情侶既都有d避忌, 多數都係離唔開約出黎食飯及睇戲, 不過我總係唔會去; 一係就成日打電話比我, 問我係邊度, 有個後生過我既話即使你大過我都唔緊要, 因我覺得26歲既女仔有時成熟, 有時孩子氣好正, 仲話之前同佢拍拖果d都係同我一樣大.....一係就msn狂同我傾計. 點解我會遇上呢d事? 以前自己一個男仔都冇, 全部總係女仔, 點知呢年比我接觸各類似既男仔, 有花心, 賤格, 幽默, 細心...我唔敢話自己遇見所有類型既男仔, 但也遇唔少. 究竟我幾時先可找到個真命天子, 令我以後唔使再比男仔煩呢? 但也估唔到自己認識果d男仔都幾型仔既, 但靚仔真係冇本心, 果隻anthory已經係啦!! 而且我同事走黎八下我, 佢話我做咩認識d男仔全部都係好似去玩, 去蒲果d架? 我都好想知道點解, 仲要係壞男人居多, 可以搵人話我知嗎? 可能我既衣著打扮似掛=.="

唔好講男仔, 我上網發現左一隻好得意既野, 就係有隻game會係呢個月尾會出, 係秋葉縣竟然有人扮我至like果隻人企鵝宣傳, 勁得意啊~

隻企鵝好得意牙~真係好想攬下佢>3< 仔細睇下佢後面, 有隻惡魔翼仔, 卡娃伊><

和同學食飯, 有點失落

返學時見到蕃薯著新衫, 一件白衫, 隻袖好似我d格仔衫咁, 長袖可以整到變中袖, 你係咪抄我架? 加埋條黑色牛仔褲, 好型~整到我都想買返條黑色短裙襯返佢, 呵呵, 我到底亂諗d咩!? 仲有佢原來...都鍾意飲青提味既qoo, 仲係度引我, 真係激氣!!

放break時文迪把菜菜註冊時部分, 見到佢地宣誓, 簽字及交換介指時已經覺得好興奮. 聽文迪講話個宣誓官真係唔識做, 冇叫到佢地kiss!! 仲有睇左搶花球果部分, 個花球自動drop左落寶妮身上, 真係忍唔住笑左出黎, 睇落去好似糖唐比較想接個花球呢~我突然心想, 如果我有去到及接到個花球, 我會同邊個結婚呢? 我望望坐係隔離既蕃薯!? 痴線架咩, 今日我做咩?

放學之後同姑姐傾電話, 傾傾下跟同學仔一齊坐地鐵去食飯, 點知文迪先走. 去到旺角時, 我以為蕃薯都會同我地一齊食, 點知佢原來已經約左人, 我兩位好友都唔係度, 最後只好同阿光, 波特, 阿聯, ryan, mandy及另一個男仔食飯. 我同阿聯及波特都ok熟既, 好彩全程都有阿光陪住我. 我見同另外三個冇咁熟, 於是同文迪sms, 諗住搵佢地食飯, 後來因阿光應承同波特佢地食飯, 於是咪改食dessert, 文迪問係咪同ryan及另一位mandy食飯, 佢地係咪知道文迪佢地行蹤, 佢好似好嬲好唔開心, 而且仲話唔使我地兩個過去食desert便收左線. 我同阿光都一頭霧水, 我地估可能係....總之我覺得最衰都係另一個mandy掛!!(怒)

都係決定左去洗衣街間鐵板燒, 都係叫開果個排, 點知波特, 阿聯及阿光都叫同一個排, 甚至係同一隻汁, 又剛好四個係同一張枱, 不如我地四人一台好了~而且飲品都差唔多, 除左阿聯之外, 我, 阿光及波特都叫左choco milk, 哈哈, 即係三個人同一份餐, 好得意啊~又或者話, 做咩你地會和我同一份餐架, 哼! 我哋食完野之後, 一齊係餐廳睇埋電視, 見到d人扮鬼扮馬好得意, 仲講埋第時我地畢業扮咩角色, 我先唔要扮恐龍, 我要帶住魔女紫色頂帽, 穿住畢業件袍, 穿黑短裙及長黑socks, 好似魔法學院畢業一樣^^

睇黎今日的幻想症越來越serious, 都係早d返屋企休息吧! 文迪佢地係海旁傾計, 唔知傾到幾耐呢? 唔知佢有冇唔開心及嬲左我呢?

姑姐生日快樂 ．各位哈囉喂快樂^^

踏入十二點,終於到左哈囉喂,我係月頭買左頂魔女帽可以出動啦. 加埋我完全冇化妝, 保證大家一定會比我呢張相嚇個半死.大家仔細留意下啦,哈囉喂快樂^^

係度扮魔女~我估化左妝會好睇d掛!?

其實自己比較like呢張相個型態, 可惜見到我張床好鬼亂=.="

好想同人出去玩下, 可惜冇朋友去玩, 惟有自己一個玩自拍...真係無隱. 除左係哈囉喂外, 也係我姑姐生日, 一早已經約好左係屋企度打邊爐就算, 琴日已經買定哂d材料, 所以都唔係問題. 約好左放工之後同姑姐去百佳買刺身食, 買左好多刺身及手捲, 有排食啦~
全部都係三文魚, 勁正~但我哋打完邊爐之後仲可以再食嗎?

買完野食之準備坐村巴返屋企, 見到阿爸阿媽抱住姪仔上緊車, 之後見到我個妹及佢朋友, 我排係我個妹後面, 望住佢地兩個傾計, 唔知佢地係咪拍拖呢? 唉, 一男一女就係拍拖咩, 自己正一係蠢材! 姑姐仲未黎到, 我一直等佢黎, 直至見到佢, 我叫佢排係我隔離, 但後面又勁多人排隊, 佢唔好意思打尖吧? 太多人搭村巴啦, 佢差d上唔到車, 如佢真係上唔到車我會落返車陪佢. 好在最後佢都上到車, 但比我哋呢家人, 阻住架車行, 唔好意思....

返到屋企等多一陣就可以打邊爐, 係今年第一次打邊爐, 可能我掛住食及太開心, 竟然唔記得左影相. 好多我哋鍾意食既食品, 已經食左好多, 唔可以再食啦. 食完之後個傻佬anson又打電話比我, 同佢傾左冇耐又有另一個麻煩男仔係msn度add左我, 點解我成日都遇到d麻煩男仔架!! 同佢地傾左冇耐, 自己太累訓左, 再起身時已經見到姑姐差唔多訓, 自己點可以咁架!? 都叫自己唔好太夜訓啦!!

唔可以去菜之婚禮, 離異....

首先要恭喜我一位中學既好友菜菜結婚,都係祝福佢同佢老公kevin白頭到老都咁sweet,永結同心, 同埋生返個肥肥白白既細佬仔,但唔好叫我飲薑操,我好怕飲,連老闆娘叫我飲都唔飲><好想睇到你地結婚既相,同埋講句sorry,唔可以出席你個婚禮><

本來真係好想去,但我哋公司發生左一件唔係好開心既事,就係我哋其中一名職員,佢星期一因發燒請病假,本來係冇事,點知佢星期二及三都請病假,星期二都有個sms比老闆娘,老闆娘已經開始覺得唔開心,已經鬧左佢,話佢無尊重過呢個老闆,於是第三日個同事冇打電話黎比老闆娘,老闆娘已經勁嬲,加上個同事老公黎到公司同佢理論,話老闆娘唔信個同事真係因發燒而請假,結果兩人係老闆房內吵起上黎,個同事打電話比老闆娘,老闆娘都嬲到話你唔想返工就唔好返啦,之後好大力收左線.本來我想同老闆娘話請半日假去菜菜之婚禮,睇黎也冇咩可能...同事個老公走左之後,佢也冇出聲,所以我琴日冇話到請假...

今日個同事終於返工,老闆娘捉佢入房,問佢有關大陸廠支出之事,兩人又吵起上黎,最後老闆娘和個同事講其實係為左佢好.佢知道大陸工作毎個人都係懶散,佢唔想連個同事都係懶散,加上佢又係佢弟婦,於是叫佢黎香港工作,個同事起初工作方面都好好,後來個同事因夜晚追劇,所以精神差左,做野全部差哂,老闆娘話知道公司冇咩錢earn,都比花紅佢叫佢努力工作.個同事聽聽下都哭起黎.如果我仲話去婚禮,係咪唔太好呢?

不過好在最後佢地兩個都冇咩事,同事又再努力工作.琴日計算糧金時,知道另一位同事又再加人工,加到同我一樣,本來佢少我三千元,我覺得自己好失敗,點解毎人都可以獲得咁多收入,自己反而冇呢?加上自己做野又唔太開心,呢一刻真係好想走,於是我開始努力起黎,希望可以盡快學哂所有野離開,去搵過另一份更高人工的工,睇黎我有10k以上都唔係太知足,其實出黎打工真係為份糧,自己的待遇唔太好咪想走. 於是我努力做野,唔知係咪老闆娘睇穿我有d想走呢,佢教左我一樣幾複雜既野,就係睇出L/C的銀行條件,解釋各項既銀行收費,同埋拿O/D額,也係申請融資既方法及注意事項,原來真係咁煩,我都要時間消化一下先,果然真係好難呢><

第一次配音, 好得意~

今日都係返學, 學既係audio, 即係做音效部分, 今次玩既係配音, 係配金雞內吳君如及吳震宇既角色, 內容係講吳震宇同曾志偉佢地去夜總會, 比吳君如佢地知道, 於是帶住姐妹去搵佢地果段. 起初d同學都叫我去配吳君如, 因頭果段有類似恐龍腳步聲, 笑左我好耐, 我當然唔應承啦! 後來蕃薯覺得好似好好玩, 於是佢自動請纓配吳震宇. 至於ryan就配曾志偉, 阿銘及花倫就配另外兩名一齊去夜總會既朋友. 男既所有配音員已經安排哂.

唔知係咪女仔特別怕羞d呢? 當然包括我啦, 我把聲咁核突, 成把男仔聲咁, 無謂獻醜啦><所以我先唔想配, 都唔係因為佢地笑我, 我先冇咁小氣! 有男仔話佢地反串扮女仔聲, 但都比波特拒絕, 我四周望望所有女仔都冇個願意配音, 於是我只好應承佢地配音啦! 但吳君如身邊仲有其他姐妹, 都冇個人願意配音, 好在雲妮最後都應承, 但都仲欠人聲, susuki及阿ling一直唔願意, 文迪佢唔鍾意聽到自己把聲, 所以我都唔好意思叫佢配, 即使其他同學叫文迪幫我手時, 我都冇迫佢, 不過好在最後都應承左我, 多謝你地兩位^^

開始配音時, 各位人員要先試音, 睇黎我都好似幾大聲, 我要企係後面先可以講野. 全個錄音房都好寧靜, 聽唔到出面同學的說話, 只有帶耳筒既蕃薯先至聽到佢地講咩. 真係好緊張呢, 從來未配過音, 即使有字幕, 我都好驚下, 驚自己把聲核突, 同埋自己反應慢講唔切.

第一次錄音時, 可能大家都比較緊張吧, 綠得唔太理想, 周不時會聽到人笑聲, 蕃薯講到好似讀書咁, 我又接唔切字幕....於是我地錄多兩次音, 最後終於成功左, 結果幾令人滿意, 話ryan真係似曾志偉, 話我竟然似吳君如!? 而且仲話吳君如病左可搵我配音, 哈哈~原來錄音真係咁好玩既, 不過之後執返段聲就難囉, 而且仲要搵埋背景音樂, 都唔知好唔好玩, anyway, 配音都係開心及好玩既^^

開始學拍片, 好好玩~

終於返學啦, 今日又係video堂~而且也係我交我哋角色設定及故事大鋼呢份功課既時候, 好在琴晚冇同個傻佬anson去睇戲, 唔係一定交唔到呢份功課呢~

個角色返定係一個男及一個女, 部分係以地獄少女為藍本去作. 故事講述一個內向, 缺乏人關心既女主角成日比同學欺負, 比人搶去自己暗戀的人, 甚至冇左推薦入大學既機會, 受左好多委屈也冇人傾訴, 佢好憎恨所有既人, 加上自己又係單親, 媽媽係成功商人, 只會擔心自己名聲, 大家好少見面. 女主角偶然遇上車禍, 但佢竟然冇死, 原來係一個穿著和服的地獄少女help左佢, 自此佢擁有特別力量去進行報復, 但代價係佢的生命力一直會流失....後來遇上一個陽光男孩, 雖然同是單親家庭長大, 但卻一直開心堅強生活落去, 惟一遺憾既係佢想做個足球員, 但一直冇機會. 個男主角既好友雖比女主角殺死, 但佢仍然主動關心女主角, 究竟女主角會唔會比佢真誠打動唔再報復到呢? 定一直損害生命, 直至死亡?我特登唔講個ending出黎架, 哈哈~因之後好似阿sir話要寫埋個故事發展, 果陣咪知個結局囉^^ 我好似好衰咁, 其實我覺得結局係重要, 但故事發展也係重要, 如個故事好既話, 就會吸引人一直睇到尾, 一早估到及知道個結局有咩意思. 可能仲有其他故事發生呢, 就係咁先至好睇!

上堂教用部攝錄機, 真係好多制要識, 原理同相機差唔多, 不過多左好多功能, 睇黎要比心機學下先得. 而且要用佢黎拍攝多份功課. 首先要拍攝三十秒既七彩螢幕先, 即係明珠台冇電視節目時出現果個畫面, 之後再拍十秒黑畫面, 之後就可以開始拍啦. 我哋呢次要拍既係各組員既自我介紹, 波特及阿聯都介紹得好鬼馬, 我呢咪講自己係恐龍, 想食哂話我d人囉, 哈哈~

其中有部分係一個叫場記既人記底第幾個shot, take幾多次, good定ng, 拍攝時間, 內容, 人物, 用咩攝影方法, 如近鏡, 中身....呢個部分呢, 哈哈, 波特話我有秘書格, 佢地已經比左我做, 又真係幾好玩呢, 自己都樂在其中~佢地都話我寫得幾好時, 我都幾開心, 我會努力做好呢個場記! (吓!? 咁冇大志既?)

最後放學時, 蕃薯話我個假髮得意!? 竟然有人讚個假髮? 佢都係第一個讚我, 都唔知係咪開心, 佢叫我整散d個髮, 又或者買多一束會好睇d. 嗯, 我得閒先會買返啦^^