奧運開幕~

candy拿拿聲執好東西放工, 原來佢想係七點之前返到屋企睇電視, 因今日係奧運開幕呢! 本來我對呢樣野都冇咩興趣, 但因為月事而準時放工

返到屋企後, 我見到爸媽都睇住個電視, 又係睇奧運開幕!? 真係咁好睇咩, 於是我好奇就走去睇睇, 只係見到佢狂放煙花, 同埋d人dancing, 都冇咩野睇, 於是我又想暴係部電腦度時, 見到其中一個好靚的畫面, 令我停底腳步去睇:

我覺得呢個情景好利害啊, 如果再仔細睇下, 係有好多人係個地球上走動. 而且站在地球上, 有兩個世界知名的歌手唱歌, 而觀眾席上面有各世界的人的笑容~呢幕已經係差唔多最後啦~

上空影下的煙花表演. 我開始明白點解咁多人返屋企睇電視啦~

最後到左呢一個重要儀式, 就係傳聖火, 中國搵左多個出名的運動員去傳火把, 最後一個火把手係體操王子李寧飛越半空點聖火, 真係型爆, 可惜的係, 佢已經唔係王子, 而係伯伯一個, 鬼咩? 我係之前都有睇奧運, 都咁耐啦, 仲唔老咩?

我本身真係好like支火把, 尤其佢紅色果部分, 真係好型. 李寧繞場一周時, 會有世界各地人傳火把的片段^^

奧運正式開始~有好多項目都想睇, 但又要返工, 可能會錄起掛!?不過呢個月都唔使返學, 都冇咩所謂啦~中國運動員浩浩蕩蕩出場~希望佢地可以拿多d金牌啊, 話哂都係主辦國麻!

二人世界!? 文迪整網頁~

放工後, 由於要等蕃薯八點放工的關係, 我先到葵涌廣場行下先. 原本的目的係買衫, 禮物比文迪及蔡蔡, 以及買野食比蕃薯, 可惜的係我三樣都買唔到, 只係買左二本漫畫, 真係估我自己唔到...

其實我係見到第二期個封面靚, 同埋個故事都ok先買. 加上好多間都冇第一期買, 令到我更想買

之後去匯合蕃薯, 途中阿銘打左兩次電話黎, 問我鍾意食蛋撻定鮮奶撻, 仲問佢係咪拿黎比我食, 佢都未答我就收左線, 做咩牙? 騎騎呢呢...仲有都要同佢講句對唔住先, 我係電話度以為佢玩野, 講電話的語氣唔係太好>< 終於見到佢, 自己唔知點解開心起黎, 開心黎做咩? 我地原本想坐巴士, 但因大排長龍, 等左好耐都冇車, 蕃薯話大排長龍同咁耐冇車, 巴士一定勁多人, 佢傷口仲未好返, 點可以迫架? 不過點解等左幾個字先講啊!? 之後我地坐西鐵返去, 途中佢又去左地鐵及西鐵內的seven搵angelababy的寫真集及睇電腦雜誌, angelababy寫真集就冇啦, 只有一本電腦雜誌

途中坐架地鐵到車, 地上有攤人地嘔完的產物, 我覺得好核突, 成日避開唔敢直望, 於是蕃薯叫我企在旁邊, 佢企在我前面幫我遮住, 唔比我見到, 但我也唔想佢踏上這東西上, 於是叫佢企我旁邊, 雖然我都仲見到果pet野, 我真係完全諗唔到佢會咁做, 果陣真係好開心^^在列車中雖然冇咩點傾, 佢多數只講電腦野比我聽, 但我已經覺得可以同佢一齊, 聽佢講野都已經足夠,惟一有點唔開心的係, 我以為佢會同我講我地二人去camp之事, 但佢一句都冇講, 可能係佢傷口仲未好返, 唔想周圍去的緣故吧? 算啦, 唔期待就唔會失望, 對吧?

終於到左tm, 我打電話比文迪, 佢原來係tm市中心, 我地坐免費輕鐵去同佢地會合, 後來先知道阿銘都係度, 唔怪之得問我食咩啦=_="呢件事似連蕃薯都唔太知, 不過唔緊要啦, 多謝你地三個同我去搵地方買我的顛拿, 最後行左咁耐, 都係食返麥當當, 鬼叫佢平咩! 最開心的係我叫左九件麥樂雞的餐, 佢比多一件我, 嘻嘻~ 去到蕃薯屋企, 我食個顛拿啦, 蕃薯及文迪當然係整網頁, 而我食完野之後, 就係睇溏心2啦, 陳豪真係好好笑, 而且佢又幾高, 覺得佢好正, 之後蕃薯話可惜佢樣衰呢....喂! 我比較like的男明星都比你咁話法啊! 而且仲有時間影底佢地做咩:

阿銘玩nds的三國志, 仲叫我唔好影佢, 你睇佢個樣都知啦, 但我都冇理佢, 照影^^

文迪及蕃薯努力研究文迪個網頁中~請勿打擾囉! 仲有文迪個網頁好靚, 我點會冇影架!真stupid!

做完功課後, 我地都要返屋企, 已經係十一點幾, 如果唔係文迪媽唔比的話, 我一定會收留佢係屋企住. 點知個天落起大雨黎, 同阿銘分別後, 我同文迪冒雨去坐小巴, 途中我地講起A-Z的男仔英文名, 真係好鬼好笑, 又搵d比較型的英文名, 都唔怕佢落大雨, 總之一直講, 好在都可平安地坐到小巴返屋企. 今晚玩得非常開心啊, 有你地三個, 加埋同蕃薯媽傾計~

難得的一日假, 驚喜?

好好彩地, 今日竟然掛起八號風球, 本來都冇咩好驚喜, 掛咪掛囉, 因多數會係冇幾耐就會除下, 兩個鐘頭內咪又係要返工. 但呢次有點唔同, 因呢個風球真係掛左成日, 雖然有時我提心吊膽, 驚個八號仔成日會落左, 所以成日留意個天氣報告, 我唔想返工麻~!點知都仲係八號, 好多同學仔也一樣唔使返工, 所以都一齊係msn度onlie, 好耐都冇見過咁多人傾計啦^^

嘩~使唔使咁多人牙? 撞鬼!

但都唔係維持太耐, 因有同學仔未完成份網頁功課, 最遲可係8月8日交(奧運開幕!?), 所以佢地都仲努力緊, 據我所知仲有文迪陳berry組仲未得, 加油啊! 文迪唔係太識做, 搵左蕃薯幫手, 點知佢同我講, 蕃薯都想搵埋我去. 吓!? 我都係果陣先知, 因佢冇同我提過, 我識電腦就話o者, 我唔識去黎做咩囉? 之後我問蕃薯, 佢話只有佢同文迪一個女仔唔方便, 呢個係咩答案黎架? 文迪仲笑我, 話又唔見佢對其他女仔咁講, 比佢講下講下, 又係喔, 我平時做功課都唔見佢咁講, 只係得我一個女仔, 又或者其他男同學做功課添, 唔通佢唔當我係女仔? 我唔係差到咁牙?雖然我真係有點男仔頭.....冇陰公囉><"

在對話之中, 先知文迪以前曾經住過tm, 所以都識路去. 之後我問蕃薯及文迪點樣集合, 原本文迪話我地先去tm等蕃薯, 而蕃薯叫我地係深水步等埋佢放工, 我就十五十六, 我唔想丟下文迪, 得佢自己一個人;另一方面, 我又好想見蕃薯多d. 文迪話佢自己冇問題, 會搵到人陪佢, 佢叫我同蕃薯一齊黎搵佢, 又話咩珍惜二人一齊的時間!? 雖然都唔太明白, 我同佢唔係情人果隻, 一直以黎只有我單戀佢吧? 是但啦, 總之有得見佢就好, 期待聽日~

交功課 + 食飯

返學時竟然有緣地撞到蕃薯, 同佢一齊返學. 似曾相識, 好似以前都有? 已經唔太記得....定係自己唔想去記起?

今日交webiste功課, 仲有好多同學似乎未準備好呢, 佢地都仲未返到學校. 當miss問大家有冇準備power point演講時, 我地班上任何一組都冇準備, 令到miss好嬲. 見到佢咁嬲, 冇人夠膽演講, 最後由阿駿, 阿銘及阿聯組先講. 佢地係演講過程中, 對網絡好似唔太熟, 於是蕃薯好心幫佢地解釋, 於是miss就問佢地, 點解一個非組員仲清楚, 蕃薯於是幫佢地再解釋, 話佢地可能只係太緊張. 雖然我都係同你一組, 你夠膽幫佢地, 呢種勇氣好令我敬佩!之後到galan一組, 因galan的態度令到miss更嬲

第三組到我地, 起初我出去講野都幾驚, 後來見到miss有少少滿意地笑, 加上波特及蕃薯的趣事, 開始都輕鬆起黎, 唔會成日口窒窒. 不過我都覺得有少少驚訝, 就係雖然我成日口窒, 但又可以好有條理咁演講, 所以都唔知我自己係冷靜, 定係緊張. 整體黎講, 個演講除左冇powerpoint外, 對我黎講也尚算滿意, 只係我地演講個時間太長, 連miss都叫我地講得快少少...

大多數同學都把自己組的網頁show出黎後, 大家一行人去食飯. 好耐都未見過成大班人去食飯, 計埋missk有13人, 你估係耶穌及十二門徒咩!? 最後決定去樹林食晚飯, 好多餐都好貴, 不過都冇所謂啦, 最緊要大家開心~

大家唔好傾計住啦, 叫左野食先啦~

我的三成熟西冷牛排配蕃菜, 塊牛排外面熟, 中間仲係紅色, 好容易切, 簡直係至高享受啊~

食野過程之中, 個侍應黎錯左碗湯, 我要白湯, 佢比左碗紅湯我, 蕃薯叫我照要, 但我堅持唔飲, 佢都有點不耐煩同我講, 都就黎收舖, 你覺得人地會同我換咩? 就算換左都會吐幾啖口水落去. 我聽完之後, 我真係好想哭, 你唔幫我換都唔緊要, 你都唔好話我吧!? 而且你成日都講tracy, 都好少笑我, 我都唔知點解咁嬲及唔開心, 係呢刻, 我突然想起我網上男友, 唔知佢見到呢個情況, 佢會點做呢? 我覺得佢比蕃薯對我更好, 或者佢真係會幫我換. 不過佢都唔會對我好啦, 佢又唔係我男友, 我冇資格要求佢一定要對我好, 我反而應該珍惜網上男友對我的好就真...

大家食完野後, 傾到成十一點幾先走. 當中知道阿駿今年再考中文會考, 而且成績仲幾好, 整體分數係[3], 即係以前的C級, 尤其係中文會話, 拿左5＊, 真係恭喜哂佢! 冇考試咁耐, 考試形式變到同a-level差唔多, 但我都唔會再去考, 放心, 我唔想去送死=_="

努力做report!!最後之戰

只要忙埋今日, 做好個report, 就可以休息啦! 加上除左幫曲蕃薯拿高分外, 我一直堅持住呢個信念, 一直做好個report. 上次要交的assignment, 我畫的圖只作少少改動, 再幫蕃薯整返個state diagram,最後終於完成好, 全份report有成三十頁, 做到我死死下, 終於完成哂!! 覺得特別開心, 因呢份野已經做左我幾日時間, 如果聽日present埋, 真係一種解脫囉~

全份報告之目錄, 包括製作網頁介紹, 目的, 功能, 結構圖及例子

網頁介紹及功能介紹~

網絡結構圖~仲要係唔知正唔正確!?

幫蕃薯做的state diagram, 同樣都係唔知正唔正確, 總之做左成五版><"

仲有呢個重要部分, 叫做ER diagram, 係表明全個網頁用左幾多個表去記載資料, 同埋佢地之間的關係, 內外系統計埋都成三頁

到測試網頁功能, 呢個係外部~即係購物功能及會員登入部分, 大約六頁

測試公司內部的網頁功能, 仲有係修改職員資料, 網頁功能, 管理貨品等等~似乎都幾順利^^

係完成呢個報告後, 我先要多謝兩位好好組員, 或叫朋友都戈得, 是但啦, 咩都好! 首先係波特, 佢係提供所有網頁測試的相及中文內容, 再由我譯返英文. 冇左佢製作精美的相, 我都唔知點整好~

仲有係蕃薯, 雖然呢份係佢pt, 但佢都捱左好多晚, 用左好多心機去完成個網頁. 即使佢做完手術, 也好努力做個網頁. 而且仲幫阿銘佢地整好個網頁, 覺得你好好人啊!

聽日終於到左交功課的一天, 對於present, 我有d緊張, 因我真係唔太習慣係好多人面前講野, 我會口窒窒, 食螺絲架><"

精彩動漫節~

真係好耐都冇去過動漫節, 對上一次已經係九年前, 即係動漫節舉辦的第一年, 都仲係讀緊書, 本來係因鍾意漫畫而去, 但因為覺得冇咩睇, cosplay又扮得差, 所以自己之後就冇去過, 可能係唔想哂車錢. 呢次有幾個同學想去, 見呢次有人陪, 起碼都唔會太悶吧, 所以應承左同佢地去. 蕃薯原本都想去, 但佢因手術完後就冇去.

我哋今日六人, 包括我, 波特, 阿銘, 阿聯, 阿駿及galan約好十點半係天橋的麥當當集合, 好在我都早到, 不過要去7仔買飛先及食早餐, 好在galan幫我買左個包, 阿銘又請我食塊薯餅~ 我哋全部人齊後, 開始行去會展. 去到排隊真係好鬼熱, 而且又曬, 好在我又茶防曬, 帶太陽眼鏡及帽, 唔係我一定會曬溶! 終於入到會場啦, 好開心, 即刻走去睇game的攤位先~

Xbox360的攤位. 本來我對呢部機都冇咩興趣, 但佢最近有二隻game我幾like, 第一隻係呢隻tale of 系列的RPG, 第二隻係格鬥game, 兩隻都好想玩, 但我更唔想買Xbox360!!

係Square Enix 出的一隻online RPG, 本來見到d公仔都幾靚, 而且仲見到人玩. 但個名係....fantasy!? 你又出game嗎?

fantasy earth的畫面, 果然係保持住FF特有的風格, 左上角的方位顯示, 及右下角的HP顯示...

之後都走左去睇漫畫, 但已經冇以前咁喜好, 只係順便行下, 起初都唔係太多人. 我第一間去的漫畫係東立, 都唔係太多漫畫想睇, 而且又唔太迫, 就入去睇. 之後開始多人, 我都冇咩心機入去行, 只係到附近漫畫地方行行~

天下都係同往年一樣, 又係勁多人排隊, 自己一見到條人龍就唔想排, 而且我又唔係太好佢出的漫畫. 至於one piece, 真係好耐冇睇過, 只係見波特都有買, 第時可以問佢借黎睇^^

弊啦, 影左都唔知係邊間出版社....咁都唔影東立, 真係失敗左d, 不過更失敗的事接二連三發生. 當我影完以下呢張cosplay之後, 我相機竟然冇電!? 而且又冇後備電!唔係掛! 整到我之後冇得再影相....

影完呢張相後, 我部相機已經冇哂電...我覺得旁邊穿紅色衫果個都ok

之後仲有唔同的cosplay扮演大賽, 各參加者都好落力打扮同表演. 由於冇相機影相, 我係網度拿左d相出黎, 希望大家唔好介意^^


呢位人兄真係....好鬼核突, 仲要唱埋新世紀福音戰士的日文主題曲, 係勁難聽果隻, 認真想死!!

被佢誇張的用具吸引住.....聖魔之血的奧古斯都

最終兵器彼女的千瀨~件衫平平冇奇, 但後面果d weapon....可以背住咁大堆野, 重嗎?

可能係呢個女仔件衫靚吧!? 我覺得呢個反而好d

自己又冇得影相, 其他人又去唔同地方買野, 得自己一個人岸居居係會場行, 又要等佢地班男仔行完. 中途我見到幾間買lonita及cosplay服裝的舖, 自己手痕去左買個lonita頭飾, 而且仲帶住左...


後來先係屋企影返, 仲有隔離支綿花糖, 我就咁拿住支糖及頭帶住呢個lonita周圍行.

我一直行, 只係見到沿途有人望住我, 有d人都讚我靚, 但係真係假就唔知. 不過最記得我去toliet時, 有個細佬女望住我, 話我好可愛...吓!? 可愛!? 跟住佢阿媽都讚我都幾好睇, 我仲開心到話比人知係邊度買. 我太過得意忘形啦=_="後來比同學見到, 佢地講笑話我核突, 阿銘問我做咩唔買埋件nolita衫; galan都笑我, 話我索左好多; 至於波特, 佢話我女佣服唔係我style, 我應該穿d好似studio咁型的衫, 真的嗎? 我都想做型女多d; 至於蕃薯, 佢一見到我, 就拿住波特係會場買的一把刀, 同我講惡靈退散, 咩意思啊!?

開始覺得累了, 便坐係地上休息, 自己仲帶住個咁靚的頭飾....簡直係粗魯啊...之後收到蕃薯的sms, 問我地幾時去佢屋企, 事因阿駿, 阿聯及阿銘要蕃薯教佢地整份功課. 我把呢件事話左比佢地知, 我地去左許留山食完dessert之後再搵佢

今日我買得唔太多野, 除左個頭飾及糖外, 仲有呢幾件野...

士多啤梨髮捲, 捲到全個頭都係士多啤梨><"

買左惟一一本漫畫, 原來阿駿都買左呢本呢~呢個作者都係好睇漫畫信心的保證, 呢本都幾好睇. 仲係我等佢地班男仔時已經全本睇完....

開心的一日已經完結, 開始要忙下星期二要交的report, 真係有點掃興=_="

終於可以去探蕃薯~

今日終於唔使擔心佢, 同時又可以見到佢, 好開心!

原本話早d去探佢, 點知又要搵食物買比佢食, 最後食物又買唔到, 而且又遲左去到, 自己真係冇用呢~去到蕃薯屋企, 波特剛同蕃薯洗完傷口, 聽蕃薯講, 洗個傷口時, 個傷口好痛, 而且仲會留血, 比我一定嚇到暈左, 睇黎我都係冇資格去照顧病人吧!?到最後我咩都冇幫到手, 只係坐埋一邊聽佢地講野, 而且只好望住佢, 再一次感到自己冇用...

之後講開個蕃薯做完手術個病假, 只有一日真係太少, 我同波特都覺得冇理由. 波特問蕃薯公司有冇病假, 其實我同蕃薯媽都知佢平時傷風感冒都唔會去睇醫生, 只係到附近藥房執藥食, 而且仲會照返工, 邊度會請病假. 所以佢都唔知公司個病假安排, 希望佢老闆見佢冇咩點請假的份上, 比佢請假休息一下養傷. 但係請病假又點可冇醫生紙呢? 從波特口中得知, 公立醫院只係會開一日假紙比人, 痴線架咩, 做手術只休息一日!!!!唔可以拿連續幾日的假紙, 可以點做呢? 於是波特打比佢朋友問下點延長病假, 原來係...大家都應該估到吧, 咪係比錢私家醫生寫醫生紙囉=_="但為左病情, 呢個係冇辦法的事吧! 蕃薯媽話會同佢聽日會去返做手術果間醫院檢查傷口, 希望你可以請到多幾日病假吧!

我哋終於開始做功課, 由於呢日係極之炎熱, 我穿左一件tube top加外套, 及, 條牛仔短裙, 而且仲坐埋一齊做功課, 唔知佢係咪持住自己係病人, 又摸我及kiss我. 喂! 雖然你的確係病人, 而且我唔會打你, 你不要太過分喔! 但除左佢有時唔正經外, 佢成日話我, 我有時係後面攬住佢, 我哋都幾開心既..

終於到左食飯時間^^因蕃薯剛做完手術, 我地唔可以落街食飯, 所以打電話叫外賣小菜, 蕃薯專係要同我作對, 叫左我至愛的土尤蒸肉餅, 仲叫我自己考慮食咩送, 激死我啦! 我咪自己選擇另一個送. 個間餐廳定左一個套餐, 內有一個49元送, 一個42元送及二個36元送, 蕃薯媽叫左個49元的菜膽雞, 蕃薯叫左我個42元的肉餅, 波特叫左個36元的紅燒豆腐, 而家只係剩下我一個未叫, 36元果d我又選擇唔到, 惟有選擇個42元的翠肉瓜炒豬頸肉. 之前去過果間餐廳食, 都只係補差價, 點知外賣時, 竟然要加十元!? 都只係貴左六元, 應該只係補返呢個價, 點知仲順左!? 我哋四個都考慮緊仲食唔食, 場面相當混亂, 而且仲係我負責叫外賣><"最後都係決定照食, 真係好~激氣!

不過最激氣的係四碗飯竟然裝埋兩盒, 而且裝湯的的碗蓋又爛埋, 整到d湯都有蓋碎!!而且d送的味道及外表好似走哂樣...不過都有一樣好, 就係個豬頸肉都炒得幾好味, 連唔食spicy的蕃薯都照食, 其實我係叫送之前, 蕃薯媽都覺得炒豬頸肉比較好味, 加上之前同蕃薯食飯時, 知佢好鍾意叫豬頸肉, 所以先叫呢樣, 不過佢地唔知我叫呢樣送的目的, 呵呵~

期待聽日同波特, 阿聯, 阿銘, 阿駿及galen一齊去的動漫節, let's go~