今日係文迪生日, 先祝佢生日快樂, 永遠都咁開心~~

老闆娘見到我條頸的皮膚有事, 話我有濕疹, 但唔太serious果隻, 於是同我講不如去睇中醫. 其實我以前我媽媽帶我去睇過一次, 我因為怕藥苦而唔去, 估唔到隔左幾年, 我比第二個人叫我去睇, 既然老闆娘叫到, 自己仲唔去咩, 於是我就去公司樓下間中醫睇下吧!

登記左後, 有個女中醫師幫我診證, 佢只係幫我把下脈, 周圍望望及伸條舌比佢睇下, 就見佢執筆幫我寫藥方, 好似好勁咁既樣, 寫左幾筆之後就叫人幫我執藥, 一日食兩劑, 要食二日, 總共四劑, 分別係十二點及四點, 而且仲有個免費送藥服務, 可以送到公司, 不過只限毎日的首劑, 第二劑唔會送, 要自己親自去拿, 都好過無啦, 而且仲相當平, 四劑連埋診金只係百五元, 毫無意外的話, 保險好似有得claim返全數, 當然去睇啦, 最多我只係出支藥膏的錢, 要成四十五元>< 終於到食第一劑藥的時間, 佢係用紙杯裝的藥, 一聞到陣味就覺得好臭, 飲左一啖, 真係苦到入心, 自己都唔係好想飲, 但冇理由倒左佢, 人地都有心機煲, 加上自己又比左錢, 惟有用老闆娘的方式, 邊食餅乾邊飲藥, 雖然係冇咁苦, 但都係苦><"仲要飲多三劑, 不如殺左我好過!!

真係要自己去拿第二劑, 可能呢劑凍左少少, 又冇咁苦, 我可以唔使食餅的情況下飲哂, 但之後問題出現, 我開始覺得頭暈, 而且冇咩胃口. 阿珍買左西餅返公司同叫我食, 我都冇食到. candy都話我轉左死性, 竟然唔食野, 總之我咩都唔想食, 只想快d放工返屋企....

返到屋企覺得無聊, 睇返fb上的人留言, d人都係因為見到我張相, 佢地話覺得我靚先會hi我. 我突然有個想法, 靚真係咁重要嗎? 加上老闆娘又成日同我講, 如果想靚d的話就飲中藥去改善皮膚, 於是我係msn上打句msg, 話索女改造計劃之類, 之後阿銘就hi我, 佢問我點解咁講, 我就話因為聽到男仔讚我靚而開心, 同埋為自己like的男仔(蕃薯), 佢話個男仔因個樣而鍾意我都係冇用, 但我自己覺得如果唔靚的話, 都唔會有男仔鍾意啦! 阿銘都睇得出我的出發點係為左男仔, 本來女仔貪靚係天經地義, 但最重要的係個出發點, 同佢傾計真係得益不少, 而且佢仲讚我性格可愛, 不過都冇用啦, 都唔會有男仔識得欣賞. anyway, 多謝佢讚賞^^