因為要準時送貨比日本客, 費時d日本客嘈我哋公司, 佢哋真係好煩架! 聽速遞講今日塞車, d貨又係佢哋公司度都仲未黎, 而且又唔願出貨比我哋, 但我哋公司堅持要佢比貨我哋, 於是就好遲d先收到貨. 收到貨後, 都已經成六點九, 又要做埋出貨文件, 整到成七點幾先走得, 仲要去DHL的收件中心度, 我今日要返學, 遲哂大到啦>_<"好在我呢班好同事及老闆娘, 知道我趕時間, 佢叫我拿住一箱貸品落DHL, 佢哋會幫我出電郵比日本客, 打卡放工, 及星期二先比返個底單佢哋, 多謝你哋啊~
終於完成送貨任務, 蕃薯打電話比我, 問我係邊度, 原來佢都係剛去到葵芳地鐵站, 我原本想叫佢返學先, 點知佢竟然話等埋我, 我都覺得好意外, 對上一次佢同我返學, 已經係幾個月前拍拖的事, 呢種感覺既熟悉, 但又覺得陌生, 點解毎件事都在重演中?
返到學校, 阿sir話programming冇只有一份功課交, 多數用平時的堂上課計分, 唔使我哋做project. 即係只有database要做功課嗎? 於是講開組隊問題, 要三個人一組, 蕃薯問波特有冇人同佢組, 波特話我同佢一定係一組, 最後二人都同意, 我哋三個人就一組啦! 但係....我全件事上冇出過聲, 就已經決定左一組麼? 佢哋二人先問我係咪反對, 我當然唔反對啦, 有二個勁人伴住我, 我開心都黎唔切. 之後靜靜打電話比我, 可能又叫佢honey之類, 又話係屋企整蛋糕佢食, 蕃薯以為我同男仔傾電話, 佢一直在電話旁邊大聲講[kumi牌蛋糕真係好味~], 哈哈~估唔到佢會誤會, 後來我同佢講, 我對我女仔朋友先會咁講. 仲有又話我係男仔就好, 一定會做運動型氹女仔都似, 即使我話似同性戀男性打扮, 佢只係講左句, 你始終都係女仔....
由於遲左上堂, 阿sit要求我哋做的堂課仲未完成, 我先開工, 蕃薯仲氣定神閒整佢琴日影個女仔張wallpaper, 好心你心快d做野啦!! 最後我地終於做完份功課, 但我竟然黑仔到部電腦冇javascript, 冇得交功課, 最後只好返屋企交. 但所有同學都已經走哂, 只剩下我, 蕃薯及青衣人. 好多謝蕃薯你, 全部人走哂, 你都幫我執執個java先交功課, 而且仲等埋我^^
距離仲有一個多月, 好好享受埋同佢呢段開心時刻....
welcome to my world...
My model life since Nov 09~
My sweet life w/ bf joejoe since Dec 09^^
難得在屋企得閒, 都係玩下fb多, 尤其係買賣朋友中英文版, 簡直係我至愛~甚至連同學都笑我, 我一定係最熟玩fb果個, 因某次波特去工聯會度拿左本章程, 其中有個課程係學fb!? 於是蕃薯話我, 我成日玩fb, 不如叫我去教好過. 傻架咩!? 係都唔教fb, 而且我又唔係樣樣都識...
至於蕃薯, 佢又同佢個靚女朋友阿grace在屋企影左一輯有動態的相. 唉....又係同人去影, 個主角永遠都唔會係我...
佢話係第一次嘗試影動態的相, 佢果然係靚女...
佢影完相之後, 即刻在msn上hi左我, 但我見到幅相, 除左覺得靚之外, 也冇咩感覺. 只係鼓勵佢影多d呢類作品, 唔係我仲可以講d咩? 即使佢同媽媽出街食飯, 佢也叫我同佢sms聯絡, 我只好裝到若冇其事, 一直同佢傾計....但只要見到佢開心就好了, 起碼可以在我走之前, 留比佢一個開心的回憶, 咁都唔錯吧!?
我真係可以咁大方嗎? 我都唔係佢女友, 只最多只係佢所謂的[友達以上, 戀人未滿]的朋友, 我仲可以干涉什麼? 明知係呢種關係, 就唔好再想啦~都係快d決定係咪讀art的hi dip仲好!!
今日都係上悶悶的programing, 阿sir教書真係好悶, 蕃薯突然有個提議, 就係偷偷地拿部psp黎玩, 同佢玩只有一個遊戲, 之唔係太鼓. 但我又洗左呢隻game, 於是蕃薯用佢部手提電腦比我整返隻game落去, 大家開始一齊玩. 成日都係佢win, 不過冇所謂啦, 我哋真係玩到傻左, 落左堂都仲打緊機, 結果比班同學影左相....
我哋真係專心打機~睇黎我哋兩個都玩得好投入呢^^
放左學之後, 又到左全班同學的周會, 即係大家一齊去食飯, 以為可以齊人去食, 點知蕃薯約左左人, 去唔到食飯, 我做咩有點失望? 算啦, 今次食飯的, 連埋我有八個人, 分別係berry, 文迪, 波特, 阿聯, 阿駿及壞人. 我哋女仔及波特會先去左黃金商場買電腦書先, 之後會去旺角同另外五名集合~
買完書之後, 我哋到旺角, 中途撞到蕃薯, 本來我都見唔到佢, 都係同學仔突然大叫我先知, 你同朋友食飯開心點吧! 我哋全部人一致同意食去pizza hut, 但等左好耐先至食得. 經過波特的研究, 最後決定叫兩個pizza 餐, 仲計埋幾多錢, 果然有效率!
個意粉真係幾好食, 個汁都幾好, 而且個樣仲幾好睇~
我至like的葡汁焗什菜~葡汁好香!
芝士焗縲絲粉~呢個真係好好味!
我哋全家都鍾意食的意式肉丸, 但真係縮左水, 以前有六粒, 而家只有三粒...
忘記左叫咩批, 總之係芝心批, 我覺得好似冇以前咁好食!?
萬眾期待的樓樓腸仔批, 但係....食落去都係麻麻地好食, 尤其係腸仔有些[縮]味, 唔知同學仔覺唔覺得呢?
食完野後, 大家在pizza hut 講左好多笑話, 有傾有笑地渡過, 傾到夜晚成十一點幾先走. 總之係開心的一日, 多謝各位同學^^
大家有玩開fb的老友, 應該知道fb上有janice man及angela baby的fans club, 其實呢兩隻fans club都幾耐下, 今日正值我又唔想做野, 於是無聊地加入左呢d組織....佢哋有d相都影得幾靚, 等我擺d係度先~
其實二人之中, 我比較鍾意janice man多d, 因我覺得佢真係比較似model, 而且佢真係好靚(在化妝影相之後)
janice man 的fans club的頭像, 我至like佢靚及高傲的形象. 也係我最鍾意的一張~
呢張比較優雅, 但我覺得唔太襯佢....不過都ok靚
以我角度黎講, 佢唔係毎張相都影得靚, 呢兩張只係令我印象深刻的相, 其他都係普通...呢個只係我個人意見, 如果閣下佢佢的fans, 真係唔好意思. 可能只係影相, 我都已經覺得佢幾靚.
至於angelababy, 我都覺得佢麻麻地靚, 唔知係咪攝影師問題, 覺得佢個人照冇咩特色....但佢同jancie man 一齊影相時, 我覺得佢哋兩個都靚^^
我睇過二人fans club內的相, 我至鍾意呢幅, 不但顏色對比強烈, 而且從相中面部表情及動作, 仲可表達二人不同的性格^^
呢張我都少少鍾意, 大家留意下佢哋件衫, 果二個公仔係一對, 好得意~
仲有一個model我個人都like, 係日本的lena fuji. 如果你地有留意日本雜誌, 就知佢係邊個, 佢就係vivi中的主要model, 佢打扮以sweet架妹為主, 我好like佢的形象及打扮; 而且係2%中, 也有搵佢做model賣廣告, 大家唔知有冇留意到呢? 我見佢有個fans club, 一於join埋先~
日本8月號的其中一張相, 真係好靚呢~可能我都係like日本style的女仔吧^^
如果我都有佢哋咁靚就好啦, 佢一定會影我多d. 又或者應該講, 我會比d知名的攝影師影我囉. 不過都係冇咩可能, 發下夢好了~
過去的事會再發生嗎? 相信大家, 連包括我在內, 都知道多數都唔會, 但真係唔會發生嗎? 今日呢件事令我更相信, 原來呢個世界上有一樣野叫巧合, 原來會真係發生....
突然蕃薯同我講, 今日同我一齊坐深井的小巴!? 我有冇聽錯牙? 好似好耐冇聽過....我仲問佢做咩咁做, 佢話有好多時間, 同我一齊坐車唔緊要啦~呢件事好熟, 好似好耐冇發生, 究竟係幾耐呢? 忘記了....估唔到佢真係同我一齊坐小巴, 我以為佢只係講笑. 在車上, 佢又講埋d唔正經的事, 都唔知好嬲定好笑, 佢太訓累左(唔知係咪真), 我竟然想錫佢一啖, 但我又唔敢錫, 我到底係度究竟做咩? 佢突然叫我鍚佢, 唔係掛!? 佢點會知架? 於是我只係鍚佢面, 之後佢叫我錫咀!? 我終於記起, 原來係我同佢拍時的情景, 點解會再出現返? 上天究竟係咪要折磨我? 佢已經不再係我的男友, 而且也有男仔開始追我, 我想重新開始過另一段新愛情時, 點解又要比呢D事再出現?
事情仲未完, 佢仲同我一齊落車, 佢做咩牙? 又浪費金錢囉.....我同佢一齊等車, 佢竟然攬住及摸我, 呢度係街上牙?? 而且周圍仲有人等車, 我也唔好意思攬住佢, 直到有車時, 我哋先至同對方道別...我返屋企途中時, 個心jump得好利害, 成個人都好緊張, 到底發生咩事?
返到屋企時, 突然有個土耳其的男仔在fb上hi我, 而且我同佢互不認識. 佢突然同我講左句, 佢覺得我好靚, 問我有冇男友? 吓!!? 又有同我講呢d野? 近排fb都聽左幾次, 究竟近排做咩事牙? 其實都有少少開心, 有邊個女仔吅唔鍾意聽男仔話鍾意佢, 不過我都相信有些人例外....我都猶豫左一陣, 之後答佢冇, 但有表明我有個鍾意的男仔(蕃薯), 可惜佢似唔鍾意我, 可能只係自己覺得, 也唔敢多想. 因蕃薯都冇正式同我講鍾意我, 想同我一齊, 做佢女友之類....所以都唔算係吧!?其實心內暗自希望可以同佢一齊, 不過我都相信上天的安排 : 如果同佢真係好緣份, 無論經歷幾多事都會同佢在埋一齊, 如果無緣的話, 無論做幾多事, 都係徙勞. 至於我同蕃薯有冇緣, 以我角度黎講似係有緣, 因我毎次都想忘記佢, 又或者開始過男一段戀情, 佢總係我身邊出現, 我想避開佢, 點都避唔到, 而家仲要毎天都返學, 佢叫我留位比佢, 令我少左好多機會認識其他男仔及同佢哋開始.....睇黎我的感情路上真係多災多難....
其實我之前都幾鍾意運動型的男仔, 覺得佢哋好開朗, 一定冇悶場. 也都係我的選擇伴侶的其中一個條件, 但當自己想起, 自己又不擅長運動, 又唔想迫自己做自己唔鍾意做的事, 其實我本身唔太鍾意做運動的, 同佢哋一齊應該唔會太夾. 而且也開始搵到自己需要的條件, 就係一個可補足我弱點, 同佢一齊會開心, 使我忘記一切煩惱的人; 愛講笑; 事業有野心及好有才能, 即係好叻果類....點解d條件好似咁熟, 好似指緊某人, 係咩???
大家知唔知咩叫做 [友違以上, 戀人未滿]呢? 同埋唔知大家有冇呢d經歷呢? 或者你哋睇左以下呢d解釋你就知, 我都係用左 fb上吹水論壇上某人的說話:
[你是不是也有這樣的朋友??
對彼此存在著好感，但你知道那不是愛情，只知道必須守護著他，陪著他變成你的責任，漸漸他變成你生活的一部份。這種關係很微妙，卻始終達不到愛情，終於，你了解什麼叫「友達以上、戀人未滿」。
你們不是戀人，在一起卻是開心快樂的，感覺很溫暖、很扎實，他會給你滿滿的勇氣和感動，跟他在一起就是一種幸福，只需要自然的呈現自己就行了，沒有刻意營造的氣氛，也不需偽裝自己的缺點。總之在他面前，你的表現永遠是最真實的。但你明白你喜歡他，卻不能擁有他。
你是否因為「友達以上、戀人未滿」為他感到進退兩難呢??
就是因為友達以上，所以你明瞭前面無路可走；又因為戀人未滿，你不甘心就此乖乖退下。甜蜜心煩、愉悅混亂。不到戀愛的甜蜜愉悅，又沒有正式被拒絕的痛苦感 傷，卡在兩者之間的灰色地帶，往朋友那方望去，你顯然已超越；往戀人方向去努力，可能永遠沒有結果。明明很靠近，卻不能牽他的手。
你說怎麼辦，感覺甜又酸??
似乎也只能繼續等待下去了！再不然，企盼一個奇蹟出現，帶著你飛躍深谷，降落在戀人的心房。可是，這還是一個不確定時間，也是一樣無助的等待呀！
總之「友達以上、戀人未滿」是給人最甜蜜的無奈。
不知道你是否和我一樣在希望與失望之間徘徊呢?
無論和他距離多遠，我只盼他永遠是開心的。 ]
我都唔知覺得好唔好, 如佢所講, 係希望與失望之間徘徊, 我覺得係一件痛苦的事, 明知鍾意佢, 但又唔可以同佢一齊. 呢段關係就如我同蕃薯, 上文所講的野完全正確, 我好討厭呢種感覺, 但蕃薯似乎好享受, 可惜我都唔覺係享受, 到底係開心定痛苦, 我又答唔出. 不過我同自己講, 我一定要脫離呢種關係, 而且我一直想做插畫師, 或者我也係應該要離開佢, 除左去追尋自己的夢想, 搵個值得我愛佢, 而佢又愛我的人, 這才是真正的幸福, 如果個男人真係鍾意你, 佢絕對唔會要個女仔無止境等佢, 同埋會盡一切去保護及唔會令佢傷心. 毎個人都在尋找疼愛自己的另一半, 大家唔知已經找到未?
話說琴日蕃薯仲未食個芝士蛋糕, 今日佢放左學之後食. 不過佢似乎好忙, 之前都未得閒食我芝士蛋糕, 過左兩至三個鍾之後, 佢先開始同佢媽媽食. 雖然蕃薯曾經講過好唔好味都鍾意, 只要係我整的就得, 但始終係第一次整, 對自己的廚藝唔係太大信心, 所以都好緊張....
佢終於食完哂, 佢話[藍莓好sweet, 味道都剛剛好, 係d芝士唔均....但整體...好好!!90分!]比成佢讚自己真係好開心, 其實都唔止係佢, 我妹都讚我呢個蛋糕都幾好味, 連蕃薯呢個奄尖人都話好食, 我估真係唔太差掛!? 其實我整蛋糕時, 都有少少想住佢整呢個蛋糕, 真係唔知點解, 但整體上我都係因為自己鍾意食蛋糕先至整. 得到大家的讚賞, 令我更想整蛋糕, 希望之後會整到唔同款比更多的人試下.
但我覺得自己先要買整蛋糕材料囉, 我屋企除左個焗爐外, 咩野用具及材料都冇.整蛋糕已經成為我的興趣, 鬼叫係自己興趣咩, 惟有等自己有錢d先至整過, 但呢個興趣都幾好, 自己又開心, 又可以益到其他人, 當然係個蛋糕好味先至係啦, 自己會盡力去整, 好唔好味就....就真係撞手神...睇黎我要努力於改善廚藝及儲錢~
我問過仲少, 係咪女仔整野食比個男仔食, 個男仔實開心, 佢話要睇係咩人送, 對佢黎講, 係自己鍾意的女仔整比自己食先至開心, 就算係比毒藥佢食都冇所謂. 哇!? 有冇咁誇張? 難道蕃薯佢對我...唔係, 絕對唔係啦, 我問過佢有冇女仔整野食比佢, 佢都話有啦, 況且我問佢做咩咁開心, 佢只係話開心咪開心, 相信一定唔會係咁 <---大家自己估下 仲有文迪呢次都好努力, 自己整個生日蛋糕比ryan, 而且個樣仲好靚~ 
真係好靚, 靚到以為係出面買, 唔知蕃薯生日時, 我會唔會整比蕃薯呢?都係考慮下先~
見到佢整得咁靚, 令到自自己更想去整蛋糕. 其實我鍾意本整蛋糕, 除左因為自己為食外, 也比蛋糕的外表吸引. 可能係餅舖毎個蛋糕都整得好靚, 擺哂在個玻璃櫃度好靚, 因此而鍾意掛~
琴日整好個蛋糕, 其中兩名白老鼠係蕃薯及蕃薯媽. 唔係, 應該咁講, 我其實係想比佢哋兩個食, 一個係我鍾意的人, 一個係對我好好的人, 想把整蛋糕的喜悅分比佢哋.
同事見到我拿住個蛋糕盒入住, 佢哋好好奇睇下入面係咩, 佢哋見到都讚個蛋糕樣都幾好, 但點解冇佢哋份? 我都係第一次整, 都係之後整得好味先比你哋試下, 而家唔敢在大家面前獻醜. 其實我同佢哋唔係太熟, 驚整得唔好味, 而且佢哋講野又直, 比佢哋話就唔好啦~
返到學校, 我細聲在蕃薯耳邊講話有蛋糕比佢, , 不過要等放學先, 費時比太多同學見到, 雖然同學仔都會多口話下幾句, 都只係玩下, 但我都係想唔好做到出面. 放學時, 我見佢同其他同學講電腦d野, 我送唔到蛋糕, 想走先, 蕃薯見到我走, 在課室話[kumi, 你唔等埋我啦!?], 其他同學聽到仲唔走咩, 只剩下我哋兩個人....我立即把蛋糕分比佢, 佢打開左個短黎睇, 佢勁開心, 而且見周圍冇人, 佢kiss左我一啖!? 而且仲係個咀, 同我講多謝. oh..., 估唔到佢即刻kiss我, 我嚇到呆左, 冇左野講...不過果種感覺呢, 真係覺得好sweet及開心, 只要佢鍾意個蛋糕就好^^
返到屋企, 佢話個蛋糕融左, 聽日先食, 唔知個蛋糕佢覺得好唔好味呢? 佢鐘唔鐘意個蛋糕呢? 聽日待續...
話說琴日同文迪傾好左, 約定左今日點半去佢屋企度整蛋糕. 先約定係佐敦某商場等 (我唔記得個商場名), 但等到兩點幾, 文迪仲未黎到, 我玩住nds先, 唔經唔覺待左已經半個鐘, 原來文迪係度執自己房, 算你啦!
當我等文迪時行左陣商場, 見到個首飾箱好靚, 如果我真係可以擁有就好>w< 我哋水匯合之後, 先去佢屋企附近買整基本的整蛋糕材料先, 呢次我哋整的係芝士蛋糕, 材料分別係cream, 砂糖, 牛油....全部都可以係超級市場買到, 好方便呢~
我哋仲見到藍莓好平, 不過仲猶豫緊整咩蛋糕, 但都係仔細考慮一下先至再買...跟住就去文迪屋企, 好開心呢~我都係第一次去, 聽講berry仲去左幾次, 唔得, 我妒忌呀>_<" 終於去到佢屋企, 佢屋企都幾大下, 全屋以綠色做主色, 文迪話因佢父母都鍾意呢隻色, 而且個廳幾大的說, hehe~
未開燈影相, 似乎好暗呢~佢屋企真係好靚, 可惜唔可以影得靚....
文迪間房~果然係佢至愛的藍色, 我都想有間自己的房間, 係purple就好~
我哋發覺仲欠蛋糕餅底, 同埋部分蛋糕材料. 而文迪屋企附近又冇, 於是我哋要坐巴士, 去到黃埔度買用品先~
手指餅及魚膠粉~
蛋糕盆, 發蛋器及整cream花用品~ 只有個蛋糕盆係我, 其餘都係文迪, 睇黎的之後整蛋糕的話都要買....
新鮮的藍莓~最後都係決定整藍莓蛋糕好了!!我同文迪毎人兩盒
買完材料之後即刻開工, 因為已經六點幾啦, 都係第一次整, 真係好緊張呢, 希望自己唔好整得太難食就好....而家毎個step講清楚~
製造餅身:
先準備兩條牛油, 其實唔係用哂d牛油, 只係用部分, 但又好難切, 惟有一齊用. 之後再隔水整返熱
經過半個鐘到, 頭先果兩條牛油變成咁....
而家開始整左蛋及砂糖先~ 起初要好大力發, 之後當蛋及糖整成為cream狀, 就可以細力d去整...
初步整完個蛋及砂糖, 就類似係呢個樣, 但已經整到我想死@@
用機整雲d芝士, 果然係唔同, 真係快靚正, 唔怪之得人地話整蛋糕要呢部機....
整完出黎好靚好滑呢~
把頭先的蛋及糖, 同埋cream 撈埋一齊先~
蛋糕暫時完成, 跟住整餅底先~
首先整碎個消化餅, 整到好似木康一樣~
整完餅底, 之後把一半芝士倒到盆內, 而家在蛋糕中間落左藍莓, 之後再倒埋另一半芝士, 之後放左雪櫃內雪硬~
預先整好的藍莓醬, 放在蛋糕面~係鮮藍莓 + 黑加倫子o者哩
把醬淋在蛋糕面上, 再雪硬, 蛋糕終於完成呢~
切返幾件比人先~分別比我父母, 蕃薯及蕃薯媽, 希望仍 哋覺得好味及食得開心^^仲有一件係比我及文迪食, 大家先試下味道, 估唔到ok呢!!
同場特別bonus, 係文迪為我煮的米線, 佢好少為人煮食, 我真係幸運~雖然d汁結左少少, 不過好好味^^
整完蛋糕, 已經成點十二幾, 我立即衝返去屋企, 最多比媽媽話左一二句, 但真係好開心, 期待下次再整~
今日要返足兩科, 尤其係教寫program個阿sir, 我哋全部人都冇聽書, 因佢教左等如冇教, 即係佢一味照住筆記講, 同學有同學的玩, 總之我都唔知點形容, 毎個同學都頂唔順, 一係就大家傾計, 一係去廁所及買飲品, 就連班上最勤力果兩名同學 -阿ling及susuki聽書都聽到心皺哂眉頭, 可想然之呢堂我悶及同學之無奈....
文迪比左我玩個心理測驗, 係把有十八種自然現象, 如落雨, 落雪你想到的朋友名字, 原來毎個現象有不同的意思, 最後我個結果係: 蕃薯係我知己, berry係我好友, 至於文迪仲勁, 佢係我未來老公!!!可惜佢唔係男仔, 又或者我唔係男仔, 唔係我哋就可以做情侶, 唔使再為戀愛而煩惱.....不過都只係自尋煩惱, 只要唔好太執著咪得, 但現今階段, 我可以做到嗎?
放左學之後, 對各同學係一個解脫, 唔使再忍受個阿sir講書, 我, 文迪, 蕃薯, 波特, 阿駿及阿聯六人決定去旺角食晚飯. 但食晚飯前, 我哋全部人先去各機舖搵波特想買的鏡頭先~當我哋睇鏡頭時, 仲得知原來壞人讓左部350d比文迪, 佢都成為左個半專業相機的人, 佢一直都好想有部相機, 真係恭喜哂佢, 但佢冇鏡頭, 於是去睇下, 就咁比同學仔知道啦!! 睇完鏡頭, 各人決定食飯, 我因冇錢同文迪要去銀行atm拿錢, 途中同佢傾到一齊去整蛋糕, 大家都傾得好開心, 仲約定聽日整蛋糕, 但地點未定, 希望可以整得成!
最後都係去左味千食拉麵, 本來想去朗豪坊間味千食, 但我又費時比太多人知我細佬係味千做, 於是順應佢哋意思, 去另一間食拉麵. 由於上次叫左碗普通份量仲未夠飽, 所以我呢次決定要個加底, 仲叫我其中至愛的日本咖哩~
我的日本咖哩豬排麵~咖哩雖然好香, 豬排也好脆, 但d麵太少...
講開d麵, 其實呢個份量已經係加左底, 但我又唔覺佢比之前多左, 仲要貴多十元!? 勁唔抵, 所以我下次一定唔會加底, 真係蝕哂!!
已經同文迪約好, 聽日十二點去佢屋企整蛋糕, 期待中~~
終於唔使返學, 可以休息一下吧! 姑姐在兩點幾突然打電話比我, 佢想今日放工之後黎我屋企, 除左去街之外, 仲可以見到阿B,.本來想行葵涌廣場, 因佢比較多野睇及平d, 但姑姐又驚會太遲返去食飯, 於是約左佢放工之後六點半, 在荃灣地鐵站度等. 我哋行得唔太耐, 一個鐘都冇, 冇咩衫好買. 爸媽已經催我同姑姐返去食飯啦, 我哋只好坐村巴返屋企~
我姑姐同我姪仔~我姑姐叫我執走佢個樣先好比佢, 我估佢估唔到我會po係度, 比佢知會打死我都似啦, hehe...
我姪仔的大頭相, 好精靈呢~
一返到屋企, 姑姐即刻同阿b玩, 我又照常玩下msn, 因為姑姐在我間房訓覺的關係, 我唔可以太夜訓, 對於夜鬼的我實在係冇法忍受, 我唔習慣太早訓. 雖然仲少叫我打電話或send sms比佢, 同佢傾下計冇咁悶, 都係費時啦, 驚嘈醒全家人. 惟有中盡量早點訓, 不過冇計啦, 姑姐好少黎屋企訓, 而且都就下佢, 聽日早d同佢飲早荼, 都係早點訓吧!
[老實講, 我對你都有好感, 只要比我擺底以前個女友, 我一定會同你一齊!]我都想係蕃薯同我講, 可惜唔係, 首先係蕃薯已經擺底左佢個ex好耐啦, 雖然佢都有同我講過對我有好感, 唔止係好友咁簡單, 但佢都冇話同我一齊. 但佢近排對我的關心, 說話內容及行為又似情人, 唉~我好怕d唔知咩關係的野, 唔鍾意太複雜及混亂的事, 心內唔知開心或唔開心, 唔開心的係唔可以同心愛的佢做情侶, 而有點開心的係, 好似文迪所講, 有一個人對自己好, 佢一直響我身邊, 冇離開過我, 但遲早我地會各自結婚, 離開大家吧? 我唔想第時離開太傷心,. 不過文迪有一句令我印象心刻, 就係: [其實依家你地的行為都比朋友更加親密.咁樣會好過情侶的,無左o個種壓力.嘗試享受一下這種親密關係的幸福吧.佢無離開你,仲對你好好o.], 在呢句之中, 都唔知我地係咩關係, 究竟值得開心嗎?
講呢句說話的人係一個在msn上的男仔, 佢就係之前有時在呢個blog上提起的仲少, 我竹欣賞佢老實, 思想夠成熟, 毎次有心事都會同佢傾, 而且佢也會毎件事仔細同我分析, 仲比我知道男人的想法, 如果有機會, 我都想見下呢個人. 佢突然同我講呢句, 我都有點呆, 佢話鍾意我夠正直. 如果佢都可欣賞我呢樣, 又或者我其他優點而鍾意我就好~
我都唔知我究竟係開心, 幸福, 定係傷心悲哀, 可能呢d就係人地所講的灰色地帶, 冇確實的答案, 毎個答案睇落去又似正確, 但唔可以百分之百sure. 究竟我的真命天子幾時先出現? 我估佢真係出現, 我一定會比而家更開心及幸福, 但.....呢日真係會出現嗎? 算啦, 都係順其自然吧, 都係預左冇會好d, 第時唔會太失望!!
突然同蕃薯關係差左, 我哋極少同大家sms, 而且今日上堂竟然分開左坐, 雖然我唔知發生咩事, 不過我唔想咁樣, 總要有一個打破呢個悶局吧? 於是我問佢係咪最近工作忙, 我哋少左傾計, 感覺好生外呢類說話, 佢都冇咩理我.....直至我問佢[你有冇去過旅行, 佢話自己冇, 我哋先開始傾計啦, 講開我想去沙攤的地方旅行及穿泳衣, 佢竟然話你咁開放既....我唔著泳衣, 你鍾意玩天體? 我呢次唔會再玩天體啦, 你真係咸濕呀!!我地一直嬈住泳衣呢個話題再轉, 講到好鬼好笑, 終於同以前一樣有傾有笑, 太好啦~我覺得即使同佢做唔到情人, 做對開心的親密好友都唔錯~
點知佢突然爆左一句話 [不如我地租渡假屋渡假...哈哈]. 吓!? 我地講講下旅行, 做咩租渡假屋屋牙? 如果和同學一齊就冇問題, 但睇真d句野, 佢用[我地]??係...佢在情人節時用過的生字, 即係指只有我哋兩個人去嗎? 唔係掛!? 於是我再問清楚佢[我地]的意思, 佢只係講左句[兩個人去都好似好好玩], 咁真係只有我哋兩個去嗎? 佢都只係謂講話好好玩, 未必指我同佢架!! 但我哋講下講下, 又真係講埋時間及地點, 仲有講到錢果部分, 佢突然話錢真係咁重要嗎? 我咪答左佢我對於錢的睇法, 仲話佢九唔答八, 我哋講開渡假屋, 無端端講咩錢牙? 原來我誤會左佢, 佢一直講緊渡假屋租金. 吓!? 原來我誤會左, 真係好白痴牙!!
最後講到約定時間原定係八月, 但呢個月份又冇假, 佢話紅日去一定貴, 金錢及時間都唔夾, 講左一大輪野, 先只係得個講字??講左一大輪廢話? 都係早點訓吧!! 不過我都有點想, 可惜呢個願望, 我覺得一定唔會實現呢......
兩個星期的休息終於都完, 到左返學的日子, 第一科係學習編寫database. 對於電腦白痴的我, 無論係咩程式, 總之係關於電腦的, 我都仍然害怕. 但既然已經交左學費, 冇理由唔讀麻, 點都要讀埋佢, 只大希望盡快過左呢堂...
學的係access, 係寫database的其中一種, 係有不同的功能, 把不同的表格連埋一齊, 起初我都唔太認識, 但唔知點解我突然識用呢個程式, 而且仲好似學得好快, 究竟係因為蕃薯細心教我, 睇住我做一毎個step, 而令我明白.雖然佢近來對我好左, 但可能只係維持兩個月到吧? 既然係決定唔再讀呢個course, 就唔好再想住返轉頭, 開心地享受呢二個月仲好, 當比大家一個好的回憶吧....心內即使係千萬個唔捨得, 但總比永遠唔可以同自己鍾意的人一齊好....
終於完成左個lab exercise. 竟然可以即堂交, 太好了!! 因我平時電腦功課拖得就拖, 拖左好耐先捨得交, 多數仲要搵蕃薯及文迪幫手做功課, 係讀電腦呢段時間辛苦哂你哋~而我自己一直都話要好好克服呢個電腦, 自己好比心機學, 聽書會抄notes及寫解釋, 詳細記底step, 結果自己真係做得到!!做完果刻有成功感, 而且仲可克服到自己的困難, 真係好感動~我希望唔止只有呢次成功, 之後都會成功做好毎份電腦功課, kumi shing, 加油~~
終於到左夏天, 雖然仲落住雨, 但也有非常炎熱之感覺....我寧願要可見到藍又白雲, 唔係太曬的天氣, 總比成日天陰, 狂風暴雨的一天仲好. 因為落雨而少左去街, 如果放工後立即在屋企又悶死人, 加上我又好耐安冇買過衫, 於是今日去左購物, 睇下有咩買都好~
冇行成個月, 好多店舖已經唔再賣tee, 小背心隨處可見, 有部分tee更係二十元件, 真係勁抵! 至於顏色方面興好sahrp的顏色, 即係深藍, 深粉及黃色, 可能係夏天比人的感覺係好開心吧! 我覺得呢幾隻色又真係幾難襯, 不過唔緊要啦, 可以襯返牛仔裙褲, 及其他黑白色的衣物, 如果真係怕熱, 咪穿白色好了! 可能有些人不愛太誇張, 我建議佢地穿藍色好了, 呢隻色令自己及人地比較易接受, 唔穿藍色衫, 拿返個藍色袋都唔錯吧!
對我黎講, 咩色都冇咩所謂, 總之一定要興, 不過最重要都係襯自己, 合自己style, 始終係人去carry件衫, 唔係比件衫carry返轉頭. 我買左呢兩件物品.....
第一件新寶貝係呢個粉紅漆皮袋~~我都有同一隻色的背心褸, 買埋呢個袋就perfect啦!!
仲有一件藍色外套~其實之前冇考慮過買, 因同事講話公司上有個男經理, 叫我唔好穿得太性感, 即使冇勾引佢呢個意思, 也會易比人誤會. 加上又興呢隻藍, 所以買左呢件, 其實除左返工之外, 去街穿背心時, 穿起佢都唔錯~
至於黃色呢～我冇考慮要買, 因自己唔鍾意黃色, 而且穿黃色上身一定好怪吧!? 買完呢兩樣野之後, 即刻返左屋企. 返到屋企時, 我去左vivi個網站睇, 因呢個月太窮, 冇錢買vivi黎睇. 大家有興趣可以睇睇下面網頁:
http://www.netvivi.cc/coordinate_list.php?&PAGEIDX=0
又係要大出血買衫, 化妝品及護膚品的季節, 好鬼窮牙~比我中下六合彩就好>_<"
今日雖然係一年一度的父親節, 但公司似乎太忙呢~爸爸一早返左工, 連見佢一面的時間都冇, 而媽媽又返左去大陸, 阿b浩鏗又同自己父母去街街, 屋企只有我及妹妹, 但我妹只顧玩網上遊戲多, 於是我只好msn搵人傾計及玩fb~
不過今日都唔算差, 竟然見到阿ling hi我, 平時好少同佢傾計架, 估唔到佢會主動hi我, 都不知幾開心, 佢起初只係問我, 波特有冇比琴日唱k的相我, 之後我同佢傾計先知佢唔會慶祝父親節, 而且一家仲好少出街食飯, 多數都係自己父母煮, 就算去食飯也係會比較近的地方, 原來佢係同我一樣的~~而且仲有一個同通點, 就係我地本身唔識煮飯的, 嘻嘻~~
之後同佢傾開理想, 睇黎阿ling都有點想做船務, 我聽我公司個同事講, 呢行都搵得幾多錢下, 佢問我知唔知道邊度有得讀呢類course, 我話好多大學都有辦, 佢擔人心要讀好耐, 不過佢咁後生, 唔怕啦, 係都竹我擔心自己多d. 仲有佢都同我一樣, 自己都好like design, 但又要搵多錢返屋企, 連我都唔知應該點樣去選擇, 而家只好暫時講, 邊讀邊想吧, 我自己覺得上天一定會為我安排一條更好的路給我吧!!
突然整我部電腦內的資料, 發現到波特比左呢樣野我....
內容真係好正, 大家不妨去睇下, 我仲問波特有冇溫仔呢個term, 當然有啦, 不過我唔係~~
唔知佢仲有冇其他好笑字解釋呢? 得閒問佢拿多d黎睇下先~
今日係全班幫五位同學仔慶祝生日的日子, 有一名同學susuki係五月生日, 但撥左去同六月生日的同學仔一同慶祝生日, 同埋安有正日生日的berry, 同埋呢個月生日的阿光, 阿聯及ryan. 在呢個blog度先祝呢五位生日快樂先, 我只得二蔬蕉, sorry>_<" 本來想同波特一齊去唱k果度, 點知佢地已經出發左, 我惟有自己一個行去. 原本以為好易去, 點知自己弄錯方向, 就咁盪失路.....直至文迪sms比我, 及蕃薯打電話比我, 我先話比佢地知我迷路, 最後問左好幾位途人先黎到...一去到k房, 我已經好肚餓, 於是叫左個壽司及沙律項下肚先~ 
$8 兩件都幾抵, 而且仲幾好味~~
tuna 蟹子沙律, 都ok好味啦, 始終沙律唔太難整, 也唔會難食得去邊, 加上只係八元, 又係抵!
又有得食, 又有冷氣涼下, 我終於覺得咩叫幸福, 同我在街上成個傻婆咁行黎行去, 呢度真係一流!! 我熱到束起邊子, 坐埋一二邊, 就咁樣就比佢哋影左相, 佢哋真係無聊啊=_="
張相好紅, 而且我個樣都好岸居居....但我好like張相呢隻紅紅的感覺~
連蕃薯整相機個樣都比人影.....呢d野當然係阿聯的傑作, 不過做得好, 十卜你!!
大家呢日都玩得好開心, 我也展示我一下難聽的歌喉, 最令我深刻的除左係蕃薯唱側田的歌之外, 仲有susuki唱謝安琪的歌都幾好聽, 把聲好似佢; 而我就點左首日文歌唱, 但都要伴唱, 因自己冇唱呢首好耐!! 當中蕃薯見我訓在中間幾張黑色椅子合我的床時, 佢竟然成個人責左落黎!!!?? 佢真係好重牙, 而且仲責左幾次我度, 唔該佢快d讓開啦>_<" 呢日大家玩得好開心, 仲影底左d相~
翻版大塚愛, 等我高歌一曲先(講笑)!! 呢張個角度好正!!
大家悠閒的感覺令我好開心~
其實我哋今晚有個餘興節目, 就係和五位同學慶祝生日. 首先當然要切生日蛋糕及許個願~
吓!? 女仔都吹熄左個蛋糕啦, 男仔都仲未, 真係冇用!!!
之後就到左送禮環節, 先係為五位主角送上生日卡先~
都係女仔細心, 仔細睇下張卡, 係文迪心機黎架^^
之後由文迪, 波特及雲妮送上生日禮物: 所以話男仔心急呢, 你睇ryan, 幾快拆開份禮物! 其實係波特同佢講, 話我送唔到真野比佢, 因為太貴, 所以佢先拆~
原來係個小小提琴黎, 好得意^^
呢兩個就係我地今日的生日蛋糕, 仲有我都幾愛的什果黑森林~~
臨走時見到的purple裙, 佢真係太靚了, 如果可以把佢穿上身, 之後再化妝及影靚相就好^^
大家各自離去, 蕃薯在地鐵站前問我係咪坐地鐵, 可能佢想同我一齊搭去荃灣掛, 不過點會有可能呢! 最初同berry, 阿ling, 波特及阿聯一齊坐地鐵, 後來佢哋走左, 真係只有我同佢兩個!?
途中我地仍然有傾有笑, 其中講到我媽媽之前在我面前讚佢個樣比我細!? 我話左呢件事比佢知, 佢仲話自己可愛....吓!? 佢又黎啦, 又話自己係女仔及可愛, 係都我可愛啦!!(講笑)