男女關係

唉~!!愛情呢家野同我冇緣左九世耐, 出黎工作, 返夜校更加冇啦! 同時也唔係話任何人, 千萬唔好誤會, 只係今日在msn度無聊講埋呢d野 -就係點樣知個男仔真正鍾意自己? 同點keep 住大家關係?

始終毎個人都總有自己愛情經歷, 最最單純的咪係個男仔成日望住自己, 成日同個女仔傾計, 千方百計引個女仔注意. 唉~~!!呢d都聽到好悶, 鬼唔知咩. 問題係即使真係成為情侶, 又點樣努力維持雙方的關係? 哈~~其實我都唔係太知, 不過以我自己少少經歷去估大約係大家要坦誠相對, 無論咩事都可一齊傾同商議, 呢樣講就易, 做就難, 因為毎個人性格唔同掛, 有d喜歡把東西收收埋埋, 唔願意同人講; 有d大家好火爆同堅持, 點都唔讓步....當然朋友都係一樣; 如果大家冇溝通, 唔明白對方想法, 性格, 咪易有誤會, 這樣做朋友都會唔開心

第二係信任, 呢樣野無論係情人/朋友都有用, 有人曾經在msn問過我, 點解我會相信佢, 同佢傾好多野同做好朋友? 其實我的原因好單純, 就係如果自己唔願意踏出第一步相信人, 點叫其他人相信你? 個理由好似好白痴, 但當然唔係盲目去相信全部, 而係自己分析

唉~~!!可能我講d野好白痴, 係人都知, 我只係把心內的說話用blog打出黎, 希望第時有更多成熟的朋友可比多d意見我. 總之人際關係真係好難學!!

大家輕鬆下, 睇下cosplay~~

好多人一提起cosplay, 一定會想起好d扮得勁核突的男女, 穿住一件唔適合自己的衫走黎走去, 總之得淡笑. 本來我都係這樣想, 但今日上網見到有d人玩cosplay真係好似個角色, 仲幾美下, 我post左d相比大家睇下~~



呢個係《死亡筆記》彌海沙, 雖然有少少sm feel (=_=), 但真係幾似幾美, 我姑姐仲話我打扮都似佢!? 唔係掛? 咪玩啦, 我驚嚇死d人~~

kingdom heart 個男主角, 唔鬼記得叫咩名啦, 都算幾似....

呢二個實認識啦! 咪係FF7二名男主角cloud & 錫菲士(我都係睇人哋譯音), 真係勁似, 真正的型仔, love(>_<)

其實仲有好多都ok架, 不過冇時間搵, 都係在u-wants 度睇, 各位得閒無聊去睇下. 核突的咪得啖笑, 美的咪望多幾眼. 其實無論個人扮得似唔似, 美唔美都好, 都係個人興趣, 又或者應該這樣講, 佢哋有膽色穿比其他人睇已好勇敢, 起碼唔係毎個人都夠膽試, 都應該鼓勵一下~~

好消息接二連三?

其實琴日同埋今日都要出job, 去葵興工作, 冇得msn的日子真係想死! 但放左工之後就有好野跟住自己

首先係放左工後, 行過一條天橋先會到地鐵站, 在天橋途中見到一班阿婆拿住個捐款箱, 叫人買把扇, 起初個阿婆講唔清楚, 以為只係捐錢, 咪想只比佢五元, 後來我先知佢要我用$20 買一把, 係贊助獨居老人的日常支出, 以我一見到老人家就心軟的性格, 我就買左, 但我無後悔過, 可能因為[助人為快樂之本]掛, 句野娘就娘d, 但幾貼切 (之後post把扇張相上黎)

跟住返到屋企, 我姑姐打電話比我, 話我個畢業典禮在10月21日舉行, 但件怉的費用要 350元????唔係掛? 要這樣貴, 寧願唔穿!(講笑)不過又命不該絕, 之前做part-time 幫公司入數有二千元, 同我姑姐一人一半, 自己都有一千, 加上阿媽比五百我作為畢業禮物, 和之前買化妝品對數仲有得earn~!哈~

再之後蔡蔡都打過黎, 加上之前在msn提及, 9月節目如下 :
9月2日 : 同eva, veron 同我慶祝阿蕉生日
9月8日 : 同liz, 寶妮, 嘉華, 蔡同我在tst食晚飯, 約左6:00在地鐵恒生等, 不見不散!!
9月9日 : 蔡蔡, 小慧食飯
9月15日: 暫定去靜屋企傾計 with 蔡同我
9月16日:同eva, veron, 蔡蔡, (or 蕉)去海洋公園
9月19日:當然係最最最重要的日子 -我弟結婚!!果日會請假, 各位老友記之後先同我msn, sorry~!!不過而家仲煩緊果日穿咩衫, 我弟個gf只係穿晚裝, 我冇理由又穿晚裝去搶鏡掛? 最多驚阿爸話堅持晚裝, 係就pk啦!

總之9月節目勁多, 好似只有月尾先至有得休息, sorry, 計漏左在9月10日之後ive 會開學, 可能又會忙返, 不過無論如何, 都會去毎一個約會, 希望第時天公造美, 唔好再落雨, 同埋星期六節目唔好撞期, 就萬分感激!!

口水論壇!?

最近睇過我個blog的各位朋友, 都知我呢個blog太悶, 冇相, 冇畫, 悶到飛起! 老實講, 我都有d頂唔順自己個blog, 太悶啦~~但最近又真係冇咩相post, 冇計, 可能d人見到我個blog太多字都走鬼左去

不過最近又講多左有關人情的事, 可能部分內容令我d朋友有共鳴 (因為我從blog留言, msn對話之中, 知道佢哋毎個人在返工時唔開心, 所以咪幫佢哋講下, 順便抒發自己感受, 令到我其中三位好友 -蔡蔡, eva & veron在百忙之中抽時間留言, 先多謝你哋, 好開心你哋一直支持我, no, 應該話一直以黎大家都互相扶持, 呢份友情好難得, 大家要好好珍惜!

最後, 歡迎各位朋友留言, 我會比呢個blog網址比其多朋友, 老實講, 我好少比網址人, 希望大家可吹吹水, 互相呻下, 我覺得這樣都幾有意義^^

有感而發 + 洗眼同洗腦?

今次要分二部份講 , 有d部份可能會好好笑, 在得閒時先至睇:

洗眼 :今日如常地返工, 點知一返工就見到個老同事舊病復發 -又扮後生!!之前三塊餅的事難得對佢改觀左, 以為佢改邪歸正, 點知又再走火入魔, 今日穿鮮橙色吊帶背心再加短牛仔裙, 好難頂呀~~!!仲要對住佢成日,幾支眼藥水都唔掂!

仲要洗眼的事一浪接一浪, 隔離果件肥姣婆又有新野笑, 佢本身已好肥, 但今日見到佢仲肥, 手臂粗到我加蔡蔡的size!!!跟住仲要塗埋個橙色眼影, 同埋做花手 &腳趾甲, 真係姣到出汁, 再加埋個豬排樣,唉~~!!我隻眼刺激到盲左, 好心搵人即刻送我入醫院, 仲要急診室, pls~~!!

有感而發 : 首先好高興veron留言比我哋知你近況, 可以同我哋傾下都好.下次出黎時再講詳細d, 至於eva蔡蔡都係, 好樂意聽你哋訴苦?

而家d男仔真係cheap都不再話下, 又花心. 唔好成日話我哋女仔貪錢, 其實你哋男仔何嘗唔係, 好似veron間公司度個男仔, 咪又係貪錢先至痴去女老闆身邊度. 個老闆比個男仔拿哂d錢之後咪又搵另一目標! 唔知個男仔正職係咪做"duck"? 在公司度根本唔係工作, 係搵目標

至於中年女人都唔好得好多, 成日扮後生都已經夠討厭, 只對男仔好, 對我哋d後生女勁差, 最慘後生女係冇得罪過佢, 真係唔知死左咩事! 不過最離譜的係發仔瘟果d, 好似veron單case, 果男仔只係比紙佢, 就已經要打內線警告. 大佬呀, 一睇都知你同個男仔有野啦, 要做到出面嗎?

唉~!!總之而家對愛情非常失望, 點解男女拍拖這樣兒戲? 有gf/bf仲要搵其他, 雖然我都相信有真正的愛情, 但世間上仲有幾多? (唔係話veron, tiff 唔係真正愛情, 唔好誤會!) 希望有情人的會長久下去, 冇情人的都唔好放棄, 努力去搵, 但要小心賤男!!

間美容院幾好呀

琴日去左間美容院修眉, 佢都修得幾自然, 同埋都幾好睇. 佢在修眉之前會幫我落哂個妝先(真係好鬼核突>_<;), 幫我修眉個女仔叫阿楠, 佢一邊同我傾計, 我哋傾開屋企管自己緊唔緊, 即係家人比唔比唱k, 夜返屋企果d, 好在我哋二個的屋企人都好開通.

之後當然傾下美容的事, 原來呢間美容中心在同一所大廈的六樓有一間美容所, 專門做各項皮膚護理, 甚至有埋紋眉, 洗眉...呢類騎呢服務, 而且仲非常之貴, 要成千幾元. 不過阿楠佢話去果d地方度做fancal, 不如自己在屋企做仲好, 又平又好. 仲有唔記得話比大家知, 其實佢係美容院full-time 美容師, 既然佢都這樣講, 當然唔幫襯貴野, 佢都真係勁老實, 哈哈~~

最後修完眉之後, 佢都會幫我化返個妝, 用隻cream不但唔乾, 而且仲有去暗倉印的功效, 我就買左一枝, 同埋預先book左個五次修眉, 加埋上次在H2O度買左化妝品, 我呢個月真係窮到爆. 唉~!!鬼叫呢d係女人天性, 要美唔要命咩~~惟有在食野, 買少d 衫, 漫畫度慳d!!

好鬼驚, 唔開心

今日msn都唔錯, 有好多好友都有online, 同埋我都有睇佢哋個blog, 有幾句話同疑問比佢哋 :

蔡蔡 : 今日先至知道你在小學五年級因為先生發現你右眼有近視, 你個老師話比爸爸聽先至知. 你都好慘~!年紀細細已有近視. 仲要在你生日帶眼鏡, 不過有冇帶眼鏡都冇所謂啦, 有冇帶眼鏡都好, 呢d只係外觀, 最重要你性格樂觀, 好人, 同埋主動了解朋友已經非常好, 相反地, 我就冇呢d優點呢~~

eva : 你應該今日去整過張身分証, 要影過相, 希望你影得美啦! 仲有下次你喉嚨痛要睇醫生, 唔好慳埋果少少錢, 令自己辛苦. 你公司都好似有得claim八成啦, 間公司這樣衰, 應該claim盡佢啦. 最多你去我介紹比你果間診所, 可叫佢寫張請全日假的醫生紙比你

veron : 而家d人真係痴線同妄想証架? 竟誤會你同佢爭仔. 唉~~d人這樣無聊同白痴, 不如佢check下個腦啦. 如果你得閒都可以講成件事比我哋知

靜靜 : 我唔係富婆呀~!!距離富婆仲有距離. 況且我弟婚禮支出我都有比少少, 應該話貧窮之神跟住我就真

p.s. 我屋企部電腦無端端燒左底版, 不但冇得追劇,仲要冇得幫姑姐做 accounting, 真係黑仔. 仲有今日去修眉, 希望佢修得美d啦, 令我開心返

多謝同事三塊餅

三塊餅睇黎好普通, 微不足道. 但當你肚餓時就好珍貴!

平時我都有幫姑姐買早餐, 所以當然冇問題, 一定唔會肚餓. 但今日又要去拜我麻麻, 所以我姑姐去買d點心拜麻麻, 我以為佢會買d點心比我做早餐, 我咪冇買早餐食, 一心想等佢返黎食早餐. 點知佢冇買我果份, 肚餓死我啦~~想整個麵食, 又已經食哂; 落街買又唔係太好, 而家返緊工麻. 個同事見我肚餓, 於是比左三塊餅我食, 好感動呀, 而且仲好好味. 同時也發覺佢為人原來唔太差, 我之前真係怪錯好人~~多謝你果三塊餅!!

學人追劇

近排唔知係咪打得機多, 開始討厭打機啦, 於是想搵其他野玩下, 或者娛樂下自己. 其實之前見eva, 蔡蔡打blog時, 見到佢哋講緊一套台劇 -換換愛, 講到好似幾好睇, 好奇的我問左eva 點樣睇, 之後用youtube 去睇

在lunch 時, 已開始用youtube 睇, 毎一集都剪開左九節度去睇, 一集大約一個鐘到啦, 但由於公司個寬貧太"快", 同lunch太多人睇的關係, 睇果陣時, 講幾句又窒下窒下, 結果咪只睇到一半都冇, 真係無隱~~

之後放左工, 返屋企用電腦睇, 不但冇窒到, 仲要load得勁快, 在個幾鐘已睇左一集半, 太好啦, 好開心^^, 呢套劇果然又好睇, 又好笑. 小美個樣都幾型, d性格又似布甸, 真係勁正!!至於丞琳都幾演得ok, 不過就唔係太like佢有時有d白痴, 但呢d可能[可愛教主]的特質掛? 就整套劇黎講都幾正, 香港就好似好少呢一類劇

雨過天清, 值得一賀

我指的當然唔係天氣啦, 個天成日落雨, 都唔使旨意佢有天啦! 我講的係在星期六開始擔心的蔡蔡. 佢之前成日因為個同個男仔的關係而唔開心, 成日被男仔牽住情緒, 身為好友的我都有d為佢而擔心.

而佢也決定同個男仔講清楚, 可能會在星期六打比我, 但最後都冇打到黎, 究竟係同個男仔已成為情侶, 定係要為呢段關係畫上句號? 越想越緊張.

今日在msn度問起蔡蔡, 佢話仲未同個男仔講, 直至佢話我講左一句 :[ 個男仔冇覆你毎日比佢的sms, msn 都已知道答案], 佢就停止左同個男仔講清楚的想頭. 這樣都好, 我覺得如果真係同個男仔講, 佢鐘意你就好, 唔鐘意你可能會破壞大家的友情, 第時連惟一的友情都冇埋, 咪仲唔抵!而蔡蔡也睇開左, 同個男仔維持返朋友的關係.

呢件事仲有下文, 個男仔主動hi左蔡蔡, 我估蔡蔡都有周圍問人覆唔覆佢, 我就比左自己個想法佢, 如果你真係只當個男仔係普通朋友, 冇任何愛情感覺, 你咪自然d, 好似以前這樣同佢傾. 如果你一見到個男仔會令你想起以前的唔心野, 唔係以後都唔同佢傾, 而係暫時唔接觸佢, 以工作忙為理由而推佢. 總之留返比蔡蔡選擇, 因為只有佢自己先知真正答案, 作為朋友的我只可幫到呢度, 其餘的靠蔡蔡自己

最後蔡蔡選擇左同佢傾, 而且仲比左cmt同琴日溜冰d相個男仔睇, 見佢好似以前這樣, 連自己都開心返. 仲同我講起笑話黎, 林峰會係自己bf, 我叫佢死心啦, 你就想, 似林峰咪算~講得笑話, 即係好返啦! 而且佢話睇到我個blog之後話我好重義氣, 有我呢個朋友真好! 好多謝你, 我都好感動~~因為之前冇人同我這樣講過.....有d想哭添, 在公司唔可以哭架

蔡蔡, 正如你在個blog度所講 : [一切回復原狀就好!] 呢次真係如你所願, 你不但令自己唔會再次煩惱, 同時又冇破壞呢段友情, 真係"win" "win" 雙贏. 而家仲唔係值得慶賀一番?

自己的穿衣品味

近排成日被工作, 自己同朋友的唔開心事而困擾同唔開心, 所以無聊上網睇睇, 見到有個日本網站都幾正, 佢係一個時裝搜尋器, 入面全部都係講最近日本流行的時裝穿衣法.

其實我都見多左少少香港女仔穿衣打扮都有d似日本, 但總是差少少, 可能係香港女仔在髮型, 髮色方面仲好普通, 可能係受制於返學唔準染髮, 至於大人就可能因為公司唔可穿得太誇張所引致, 所以即使係星期六, 日放假時的衣服也不太美.

其實我都係個打工仔, 穿衣時都會有煩惱 , 想學日本打扮, 但因款式太誇而禁止, 但又唔想好似普通女仔打扮 : tee + 短牛仔裙/褲 + 波鞋, 老實講, 我覺得這樣穿係極之唔美, 希望唔好得罪到其他人, 我就覺得佢哋有好多衫都穿得幾好, 不過太多, 費時該張post上黎, 有興趣可見以下網站 :

http://ar-um.jp/street/searchIndexDate/0/20070817/0

所謂人靠衣裝麻, 加上自己個人興趣, 我毎個月都會花錢買時裝雜誌同衣服, 不過唔知大家係咪這樣 :毎次買衫都會比d sales 煩住, 又話呢件新款, 果件新款...總之在你身邊不停煩住你, 我就成日都係這樣, 害到我冇興趣買衫. 但我有時也遇到d真係識穿衣的sales, 我不但同佢傾左幾個字, 而且我買衫仲有平, 試過最平平$10-20, 哈哈~~呢d只係極少數, 好難再遇到呢d正sales, 有點兒可惜呢~~

大家應該開心吧?

最近都冇見大家, 唔知大家點呢? 有d朋友好似liz, 酸梅, 嘉華....可能係太忙, 冇時間寫blog, 加上我又可能比較被動同驚打擾佢哋, 都甚少打電腦比佢哋, 所以連佢哋近況都唔知. 即使係約佢哋出黎, 佢哋都係太忙, 又或者天不造美, 在約實見面當日落雨, 令我哋最後冇得見面, 雖然如此, 但我總相信人生在世一定會見面. 唔知佢哋毎日過得開唔開心呢?

有d朋友在hku space 度讀書先至認識的同學仔, 如 amy, coco, jovy, mandy.....同佢哋也不算太熟, 但都算係朋友, 對上一次見面已經係neway 唱k. 佢哋好多人都讀完hi-dip, 而家讀緊澳洲大學的會計學位, 我只知佢哋而家返學好辛苦, 成日要test, 做assginment, exam..所以我唔敢打擾大家, 至於coco 要更加努力, 因為我哋成班朋友中只有佢一個未完成個hi-dip, 仲要係最難頂個二科: financial management & auditing, 一定要捱過, 唔好放棄!!

不過我最擔心的係有二個fd : 第一個係蔡蔡, 佢睇演唱會固然好, 但蔡蔡也要同佢解決現時的煩惱, 唔知解決成點呢? 我琴日在msn同佢講過如果唔開心就叫佢打我手電, 但佢琴日一直都冇打比我, 係咪即係冇事呢?我知蔡成日為佢而苦惱同傷心, 希望佢有個完滿的結局

第二個係eva, 佢自從在我生日果日發生d唔開心的事而一直唔開心, 唔知佢而家好返未呢?琴日佢話整好一切之後會同我哋呢班fd去漫畫cafe, 哈, 無論係咪落雨都一定會去得成, 只要你快d儲錢同恢復返精神就得, 我隨時準備好去啦!

p.s. 唔知edwin 琴日個九女一男BBQ會開心嗎? 唉!只有你一個男仔, 實會比女仔點啦, 你鍾意同美女一齊, 你都算有jack-so 啦. 星期一等你在msn同我講~!!

死人變態佬

唔好比個title驚嚇到, 唔係我被人非禮, 況且我都唔想. 而呢件事係在我去銀行入票時發生....

我去恒生排隊入票時, 見到其中二個男仔拿住個手提, 起初真係唔知發生咩事, 後來我見到佢哋個螢光幕內有個女仔, 於是咪周圍望一望, 點知佢哋係影個女仔, 個女仔只係穿背心, 長牛仔褲, 不太sexy, 都唔知d男仔影咩, 太過嘔心啦~~!!佢哋係咪變態架, 我即刻冷眼望住佢哋, 佢哋都望我, 之後就不屑望完佢哋之後就令轉頭. 最後個女仔走就望住佢

我唔係唔比你對人一見鍾情, 但呢d行為真係好變態, 受不了, 可能人哋會覺得我做咩理人, 人哋點關我鬼事咩? 但可能我較正直, 忍受唔到呢d行為掛; 至於我係咪妒忌男仔影個女仔唔影我, 啋~!!大吉利是, 呢d我先至唔希罕啦, 比d變態佬影, 比我知道仲唔拆佢菲林.....oh, sorry, 係SD 咭, 我會把佢扔去litter bin 啦, 使比面, 哈哈~~不過都係唔希望有呢d事發生

唔係掛~~這樣正

今日上網睇FF 官網, 見到FF7在9月13日在PSP出 game, 勁開心~~呢隻game一出我就即刻玩, 仲要玩左幾次, 簡直係我哋三兄弟姐妹必玩的game,我仲為左玩黃金陸行鳥而煩惱! 不過最後都養到黃金陸行鳥, 拿左13群眾, 勁開心~~

估唔到十年之後, 竟在psp度見到....好開心, 總之第時一定會玩, 好掛住d型仔(部分啦....)總之玩過呢隻game都知邊個型仔, 好在呢集全部都係型仔, 好彩好彩~~哈哈

近排多人煩惱

琴日咪講左自己因為果d所謂愛情的東東而煩惱, 其實都唔算係, 但總係煩. 點知睇左蔡蔡個blog, 話佢因為工作同可以話係愛情而煩惱, 在工作上, 佢成日聽d客無理取鬧的電話, 佢個同事肥仔生又唔聽電話同做野, 差唔多全部比哂蔡蔡做, 又要成日打case, 真係打到顛哂.

在愛情上, 佢好似鍾意左在第二間office的男同事, 而且仲明示過幾次話鍾意佢, 但個男仔除左冇比個明確答案外, 仲對蔡蔡忽冷忽熱, 呢種滋味絕不好受呢~蔡蔡都開始想放棄呢段唔清唔楚的關係. 老實講, 我不太睇好呢後關係, 希望蔡蔡唔好嬲, 不過最衰係個男仔, 鍾意與否都比個答案人, 唔好拖拖拉拉, 更冇理由要個女仔成日為你修心, 但個男仔又完全唔知道外, 更加冇理由要個女仔等你鍾意, 你呢d男仔好自私, 我憎死呢類男仔, 成日害到我最好朋友唔開心, 真係想拉你出黎打~~(哈, 講笑)

至於另一好友eva, 佢在公司都好慘, 成日比個衰同事點來點去工作不特止, 公司上星期要佢成日搬野去showroom, 不停ot外, 仲整到手腳損哂, 腰骨又痛, 好慘呀~!!而且佢有二個好友都離開公司(比公司炒), 整到eva毎日擔驚受怕, 無論在精神同肉體上受到傷害, 佢的第一份工很慘, 但無論如何, 你都要堅持住, 等到出左雙糧就走, 希望苦盡金來, 之後會搵到一份人工&一間好公司的工.

同時唔好再因為自己人工比其他人的人工而唔開心, 呢個係毎人必經的階段, 我以前在中環工作都係人工最低, 仲要晚晚ot到8點幾, 但最後都得到老闆賞識, 調到去mk做會計, 開始我的奮鬥故事. 有時做人係要唔怕蝕底, 只要相信最後一定會有好回報就得

另另一個好友veron, 我太耐冇同你傾計, 都係睇你在blog度打比蔡蔡的comment先知你近況, 知你工作緊間公司度, 個老闆成日帶你最怕的狗返公司, 掛8號風球又公司唔比走, 要你黑住面對住個boss先至走得, 仲要公司一個月多d已有三個同事走? 哇~!!而家d公司對員工這麼差的嗎?如果你真係頂唔順, 你可考慮下走, 而且仲可以後唔使對住間公司, 但只係得個零月經驗, 第時見工時驚其他公司個老闆會問你why呢份工做唔長, 到時你會點答呢? 最最唔可以數之前公司的不是, 又冇理由話自己冇能力, 啋低自己, 所以我覺得你應該捱左一年到先至走, 最多唔開心時搵朋友仔傾下, 又或者一齊出黎玩下. 況且去第二間公司又未必能擔保你一定開心or not. 呢d只係我意見, 無論你選擇去或留, 我哋呢班朋友me,eva, 蔡蔡,蕉...都會支持你

解決左煩惱

唔知大家單身的美女有冇因為而家冇男友而煩惱, 同時呢個也係致命傷, 所以一有男仔對自己好就會比較而動情, 而且有時仲會想得太多, 例如"我有冇得同呢個男仔一齊?"又或者" 佢會唔會都鍾意自己?". 女仔通常的毛病就係想得太多, 其實身為女仔的我都有d討厭, 呢d只係幻想, 又唔會實現, 比我不如儲多d錢, 買下股仲好

最近我在msn同個男仔都幾好傾, 我哋認識左二個月, 但已經咩都傾, 包括sex..等d敏感題材. 而且仲毎日都傾計, 好開心. 而且佢也對我幾好, 佢話我哋出黎見面, 驚會發生關係, 最後會傷害到我, 所以一直都冇叫我出黎; 仲有在上星期打風時, 佢不停向我報告天氣, 又叫我小心出入.....可能呢d野對大家可能微不足道, 呢d只係朋友間的關懷, 但對於我黎講就好珍貴, 因為好少男仔會對我這樣好, 而且自己都渴望比人關心, 於是對佢有d好感.

我於是把呢件事話比蔡蔡知, 佢鼓勵我, 叫個男仔出黎見面. 但我就唔係太想, 因為我連佢個樣同把聲都未見& 聽過, 突然叫佢出黎見面會好d怪. 我一直煩惱住, 唔知見唔見好.

直至夜晚十一時到, 靜打電話比我, 問我去唔去九月個手相班, 可惜我九月要上堂, 都唔去得啦. 之後同佢講左msn男仔件事比佢聽, 佢立即叫我唔好見, 仲話應該同佢講電話開始朋友關係, 同埋唔好花時間在有gf的男仔身上...總之傾左好耐, 我突然完清楚哂一切, 仲傾到深夜一時....好好開心...多謝你, 靜!

我弟同gf註冊

在我生日之後, 跟住就到我弟同佢女友註冊結婚, 可惜呢日要返工, 唔可以去, 惟有靠我爸影左d相post在呢度

在呢日我哋屋企有我爸媽, 同妹妹去; 而外家果邊就有佢後母(應該係), 同埋我弟gf個家姐同細妹去, 人就唔算太多, 不過一個正常家庭的人應該不太多吧? 我覺得太多家人, 仲要係唔太熟會好煩, 大家見面都唔知點, 好似怪怪地
佢哋去完註冊之後, 我弟同gf就行街, 我媽佢哋各自回家. 等埋我姑姐同我放工之後就去食飯, 至於餐飯邊個出?哈哈, 咪最遲黎果二個人, 大家都應該知係邊啦!睇黎我呢個月都要大慳特慳....不過慳錢呢家野都憤啦....

食完飯之後, 就去左我麻麻屋企度, 原因係我六叔應允借件西裝比我弟去試, 果件仲要係貴野~~!!在試西裝後, 先知我弟原來都幾肥下!!在佢試西裝期間,我問佢gf第時穿咩衫, 佢話只穿二件晚裝! 不過我估都應該幾美. 其實佢有少少肥(可能係大肚會肥d掛), 而婚紗好似有條束腰帶, 所以會好辛苦. 但我都明白, 因為我都有d肥, 全日束住點頂呀? 最後我弟都拿左件貴西裝走, 其實果件西裝係六叔預左第時結婚穿, 希望我弟唔好整污糟件衫吧!?

難過的生日

其實今日已經預左去唔到長州玩, 講真, 真係有d唔開心, 話哂始終都未去過, 本來想去玩下的說~~不過佢哋後期改左出街食晚飯慶祝都好!

今朝同屋企人去飲早茶, 四個人叫左十一碟點心, 有d誇張吧? 我哋叫左[馬拉千層榚]時, 果間酒樓比左第二樣(奶黃包??個樣又唔太似, 唔知係咩?)我哋於是叫佢換過, 最後等左好耐先至有....

飲完茶之後, 我爸媽去左我弟間屋度執屋, 我同妹行左一陣街, 想去漫畫舖, 點知附近只有一間, 而且仲係租書多. 之後去左睇文具, 當正在睇文具時, 突然有唔方便的日子, 痛到我半死, 於是要打電話比蔡蔡取消呢日的晚飯, 真係好心傷, 連最後一餐飯都冇埋!!!!????

之後返到屋企就痛到訓左教, 起身後坐在沙發上打機, 睇電視.... 真係同之前的生活冇分別. 唉~我的生日就這樣過去, 真係勁勁勁唔開心! 難得的生日, 點解個天要這樣戲弄我? 連這樣重要的日子也"搶去"......

今日有得休息一下

今朝姑姐一早打黎, 話我今日唔使返工, 勁開心~~!!我一起身當然係打機, 之後食早餐同睇電視, 我在11:45睇到套韓劇[白公主]雖然個名就"娘"左少少, 但呢個唔係重點, 而係有個型仔男主角(>_<) 仲要係有d日本look~~!!勁愛你......啊......好型仔!!!不過個女主角就....個男仔真人叫李莞(本 名：金亨洙 ), 雖然佢身高有178, 但佢細我二年....有d可惜呢....(有咩可惜, 又唔係選bf!) 哈!!有d得意忘形同發緊夢添^^

今日好唔開心

有時會懷疑個天係咪玩我? 我同蔡蔡毎次計劃定去沙灘, 長州(部份為左慶祝生日), 都因為落大雨而被迫取消. 好在佢改左話去我屋企或出街食"補數". 我屋企就唔得, 因我父母星期日會在度, 我哋惟有出街食啦!

今日原定姑姐同我屋企人去我屋企深井果頭食意大利餐, 點知一個八號風球而被迫取消! 都係慶祝我同我爸生日, 個風做咩要返黎香港?

不過有多半日假都未必開心, 我都迫左好耐地鐵, 同等左半個鐘村巴, 終於返到屋企. 點知我妹同爸食完野都唔洗碗, 本來我都冇所謂, 但佢哋這樣己好幾次, 佢哋又唔係忙碌, 只係唔鍾意洗碗~~!!其實我都唔鍾意洗碗, 點解次次都係我"執手尾"?我有份食都冇所謂, 最慘我係冇食!!!!!!於是我忍唔住大聲鬧佢哋, 佢哋一個冇反應, 一個掛住傾電話, 之後我憤怒到關左房門, 又冇人可以傾訴,果刻真係好想哭!

不幸幾時先至會離開我? 同埋我究竟有幾多日真正開心過? 希望一切都盡快有答案, 同埋會係一個好的答案....

個風球....

琴日多得edwin左天文台, 成日在msn滙報天氣消息比我聽, 佢真係成個天文台, 幾pro架! 不過佢成日都話會love 我就免啦!

佢講到在琴晚深夜會打八號風球, 但我一早醒來就真係好風平浪靜, 咩事都好似冇發生過, 跟住再開電視, 都只係三號風球

其實都已經慣左, 以前返學時打風, 成日都希望個風打得成, 但次次都總係悄悄的走, 所以就開始唔去期待. 或者掉返轉, 你唔期待佢又打得成.所以都係順其自然吧! 加上八號風球都唔會打成日, 最多得幾個鐘頭假, 但換黎的可能係巨大的人命同財物損失, 值得嗎? 結果由返學開始, 已唔期待台風...

其中一個生日願望實現左

今日係會考放磅, 本來同在幾年前考左會考的我毫無關係, 但今年就有關, 因為今年係我堂妹派成績表..

我同姑姐勁緊張, 在上午九時幾, 我姑姐已打電話比堂妹同二嬸, 但佢哋都話未派成績表, 於是只好在公司等待. 在半個鐘後, 二嬸再打黎比姑姐, 話冇預到我堂妹有十四分可讀到中六, 佢起初只估計堂妹只有十分! 不過的係..原校都已經收哂中六生. 吓? 這樣即係應唔應該"鄧"堂妹開心呢? 希望佢可以在今日搵到中六學位.

再隔左1-2個鐘, 我二嬸又再打電話黎, 話原校又收左堂妹讀中六~~!!好開心呀, 就好似自己讀到中六一樣, 而且呢個也都係我的生日願望之一, 真係開心到唔知點形容~!!(^_^) 但只可讀二科a-level科 -pure maths & physics, 會唔會危險左d呢? 無論係點, 都希望碧珊(我堂妹個名) 會努力d啦~~!!

今晚會慶祝佢讀到中六出街食飯, 我一定會去架, 哈哈~!!

想留長頭髮

自從剪左個短髮之後, 見到人哋有一把長髮, 就好想留返長, 可能女仔始終覺得頭髮長會美d掛! 於是上左去日本網站, 見到有幾個頭都幾好, 咪拿左黎呢度post一下 :

呢個都幾美, 而且的頭髮顏色同佢差唔多, 但要留到勁長, 同埋我唔敢自己用電髮捲黎捲, 但去髮型屋電又唔抵......都係望梅止喝多..

呢二個頭呢就斯文同比較女仔d, 會唔會唔係太襯我? 因為我都算有少少男仔頭. 但佢個公主捲髮又真係好美, 可以考慮一下

我的目標暫時只有呢三個頭, 所以要努力留長~!! 同埋要努力儲錢去電. 不過而家先做好頭髮護理, 要買同用局油. 上次去問一支局油要幾多錢, 竟然要二百五十, 最多比個八折我, 我都唔要啦, 這樣貴, 食我隻"車"咩?

對朋友的感覺

經過成個月的忙碌, 星期六又要返工(我只返五日), 平時又要加班, 甚至連晚飯都要在公司食....真係身不如死! 其實人工唔高, 都唔使太"博", 鬼叫d核數報告要上稅局咩, 真係麻煩~!!!!!而家都算做完好多手頭上的工作, 可以同朋友在msn傾下計啦(^_^)以下想同呢d朋友傾計

蔡蔡 : 見佢又on9, 又off9, 咪問佢咩事, 佢話要避個男同事, 又話大家要冷靜一下, 總之在msn好難講到, 仲話等之後出黎先至同我講. sorry, 我之前太忙, 唔知你唔開心, 但我一定會聽你講, 只要你唔好怪我太遲知就得

Eva : 上個星期同佢傾計都知公司點佢做"苦力", 呢個星期仲要做, 而且仲做到手損腳損, 公司又冇"補水", 呢間咩公司黎架? eva, 你要加油牙~~

Veron :雖然在msn少同你傾計, 但你在我之前唔開心時都有在blog度留言, 同幫我翻譯果篇葡萄牙文字, 好感動, 多謝你

Edwin : 男仔之中的最好朋友, 冇野唔傾得, 成日同你傾sex 同愛情多, 令我更了解男仔的想法, 但係..應該討厭你定多謝你...??

Mandy :雖同你傾唔多, 但見你都幾好傾, 仲一齊講笑, 希望有時間再傾

Coco : 你上次同bf影果張相, 放在msn度, 你哋二個真係好正, 果然係型男索女, 有d妒忌添!!

Amy : 最多謝你在hku space 時成日代我姑姐睇住我? & 照顧我, 仲有有咩考試tips必話我知, 你有d似我家姐(^_^) 同埋希望你快d整返個msn傾計

Jovy : 係我公司客其中一個會計. 次次考試都可好彩"過關",但我相信你都有實力, 加油~!!(上次唱k張飲酒相好正)

仲有好多好友講唔哂, 但費時打太多, 我會手軟...(懶就懶), 仲有d賤男就唔好提啦~!!就算留唔留言都好, 我都只想講下對佢哋感情, 突然覺得有寫blog真係好

原來今日係我舊曆生日?

終於有得去飲茶啦! 真係成個月都冇去過, 我媽仲叫我叫多d我like野食. 食完野之後同我妹去剪頭髮

同妹剪完頭髮後, 去百佳毎人買左二個包, 見村巴未到, 再去睇漫畫, 最近買左一本漫畫, 之後撞到我妹個fd, 我妹同個男仔fd在街上"打"起上黎.....其後村巴到左, 我二個一齊坐村巴返屋企, 我媽已煮好菜炒飯同烏冬等我哋返

本來一切的生活好平淡, 點知我媽突然同我講左句 : [今日係我舊曆生日]吓!!??? 今日係我舊曆生日咩??其實我一直都唔知, 平時都係我麻麻同我講,但佢過身之後好少提起.今日有人提返我,好開心!我媽之後比左三封利是(二封係父母，一封係阿婆)，更加開心~~~!!

突如其來的驚嚇

我放左工之後返到屋企, 由於工作的關係一直冇食野, 所以返去煮即食麵, 點知一開電視睇"dadadede"????跟住仲要有胡杏兒 + 廖碧兒唱一首兒歌, 歌名叫做咩 : "雲呢拿與朱古力"?耐冇聽兒歌的我都嚇呆左, 講真, 我唔討厭佢哋二人, 但真係唔知佢哋唱咩? 之後......當然係立即熄電視同訓覺啦!

訓醒覺後, 就開始玩[太鼓之達人ds], 點知玩左20首(難版=松版)之後, 竟有隱藏版的(隱藏難版 = 鬼版)唔係掛!!!!我連松版都未玩完, 仲要黎多個最難的鬼版, 真係想死啦! 一日有二個驚嚇, 都咪話唔驚!

同場加映

我姑姐在放工比左d正野我睇, 係....阿笨與阿占的地震演習,超級好笑...尤其係阿笨與阿占的人工呼吸, 必睇!!至於仲有d咩好笑野, 自己睇下(建議最好在lunch & 放工睇會好d)....去片!!!!!!!

http://www.youtube.com/watch?v=lrkIDGPc0cs

下定決心!!!

"我在呢年一定要在公司學到野, 之後一定要出去搵另一份高人工的工!"呢個一直都係我的願望, 可惜我始終都冇心機在度工作, 所以遲遲都未走, 其實係有三個原因, 唔怕我"發牢騷", 就睇埋落去~~

第一個原因 :當然係而家人工太低, 又要做核數, 又要做會計工作, 但人工比出面仲要低, 而且出面工作量實比呢度少

第二個原因 :就係我同姑姐關係差左. 在入左黎工作之後, 成日都因返工衣著問題而嗌交, 可能係因公司身份問題, 佢要控制住毎個人的衣著, 唔可以太過潮, 而我多數都會穿得都幾潮, 所以好易有衝突...例如唔比我穿短牛仔褲, 但個老餅同事又穿得? 真唔公平! 也因呢件事而嗌過交

最後原因就係我至至至討厭個老餅同事,我唔鍾意佢自大, 妒忌心比一般人重幾倍, 又冇禮貌, 唔識尊重人, 成日扮後生, 總之衰野數之不盡.....好彩唔係對住佢一世, 唔係真係死左佢好過

希望我的願望可在出年達成, 第時一定會同親人, 朋友大事慶祝, 除左個衰事外.....

又多一個人去長州

我一直都唔記得左在個blog度提起, 在我生日果日(8月12日)會同朋友去長州玩同過生日, 首先要多謝蔡蔡同eva, 係佢哋二個提起話去玩, 跟住就選左我生日果日去, 好開心~~

上星期用電話問左veron同靜靜, 但二人都未sure去唔去, 而且之後都冇答覆, 直至今日見到veron上網, 於是便問佢去唔去? 佢最初問果日幾時集合, 我答左佢之後, 再問佢果日黎唔黎, 佢都話ok, 哈, 又多一個人去啦!多謝你, veron. 而且從對話得知阿蕉好似都有nds???if 有就好, 我哋又可以一齊玩...不過蔡蔡又點樣? 唔緊要, 最多我借自己果部比你玩

換言之, 而家只欠靜, 我之後都會再打電話比佢, 希望佢也可以黎(^_^)