好想要那個袋>w<"

本來我今日想周圍去睇下租屋, 但只有一個人去又唔放心. 其實我可能都係因為同媽媽吵架而離開, 起初我都係咁諗, 後來同姑姐傾電話, 先至發現自己係因為近排係工作上, 家庭及愛情上唔開心, 先想搵個地方靜下, 但發覺金錢上既負擔真係大好多, 就算唔比家用, 也只係勉強生活, 都係之後搵到先再諗啦...

不如都係諗d實際少少既野啦, 今日同蕃薯傾左冇幾耐, 我見到佢有張廣告係賣佢公司其中一款相機袋既~我覺得都幾靚架~

就係呢個粉紅色啦~話佢係相機袋, 我就覺得佢似行街袋多d啦^^

最想想要那個紫色的~真係好想要>< 快d走去蕃薯店舖買個啦(喂=.=")...但買黎做咩呢? 唔係擺相機既相機袋!!?? 又係阿rain啦^3^唔計佢個樣, 但影相果個pose好型><

同佢傾左冇耐, 佢要出去影相囉, 去影兩個鬼妹吧? 佢識講英文咩!? ...XD
而我呢, 都係屋企打成日機, 都係覺得好悶呢...=.="

和大家去食飯~

屋企唔係咁開心, 加上公司工作又表現麻麻, 於是搵左tracy及文迪去食飯. 好彩最後佢地兩個人都ok, 連berry都去埋食飯, 好開心呢~今日即興都約到朋友, 自己運氣果然唔太差呢^^

放左工先同tracy約好係深水步地鐵站約好, 因文迪想買冷, 但佢同berry似乎有d神秘野要做, 唔可以黎深水步, 仲要遲d先同我哋集合. 既然已經黎到深水步, 冇理由就咁走人架, 於是我哋先行西九龍中心, 加上我又想搵屋租黎住, 於是到附近地產搵下, 見到租係平, 但地方就.......我哋之後去左旺角睇下租屋, 比我同tracy搵到個地方, 真係旺中帶靜, 都幾好既~可惜既係, 我都係唔夠錢租, 自己唔使比家用咩, 都係得個睇字, 不過都,要多謝tracy一直同我周圍去睇屋^^

終於同文迪及berry集合, 大家先去花園街買冷及織針, 之後去新世紀food court食野, 我同tracy一去到似乎有共同目標, 就係拉麵 + 壽司, 係搵到位之後即時去買先~

都ok好味既拉麵~本來想叫壽司, 但又好似好唔抵, 於是轉叫左餃子. 我同tracy叫左個完全一樣既餐, 只係得杯飲品唔同

大家食飽飽之後, 竟然一齊織野!? 我見到佢哋左織右織覺得好眼訓, 佢哋似乎樂在其中, 越縮越開心, 唔得啦, 我都係訓一陣先. 我果然同以前一樣, 唔識及唔鍾意織野, 成個男仔一樣=.="

越睇越眼訓.....佢地話遲d搵到個心愛既男仔既話, 就唔會覺得麻煩啦, 希望啦....

我訓醒左都仲未織完既!??? 我又覺得苦悶啦, 於是一時拿部psp出黎玩下, 一係就周圍影下相. 果度既環境其實都幾好, 而且有埋電視, 我想像到有一幕係我租屋之後, 夏天又熱, 冷氣又貴, 於是係度食飯及溫書, 應該都ok正^^

偷影到三個一齊織頸巾大家既樣啦, yeah~~!!

其中一部分既地方, 有埋個電視~坐得都ok舒服, 不過有埋捱背既更好^^

都係其中一部分~其實個螢光幕都ok襯個場地, 可惜我影得差=.="

佢哋終於織完頸巾開頭, 加上餐廳又就黎關門, 我哋都係要離開. 途中經過電梯, 見到d桃花燈都幾靚下, 自己又手痕影相....(又係影相嗎?=.=")

桃花燈既遠景 : d燈有時會著架, 幾靚下~

桃花燈既近鏡~

大家唔好誤會, 我唔係波兒迷(汗), 只係見到佢後面果座山覺得佢靚先至影下, hehe~

幽靈學生 + 屋企傷心事

偷偷返學呢件事只話左比四個人知, 分別係文迪, 蕃薯, tracy及berry. 想比個驚喜其他同學^^終於返到學校, 感覺有少少唔同, 以前自己真係係果度讀書, 歸屬感比較大, 而家係有種似探朋友既感覺, 覺得一切都好陌生, 似係自己完全冇黎過果種感覺....

一返到學校見到波特, 佢話已經知道我會返學, 仲話係[佢]講比佢知, 起初我以為係蕃薯講, 原來係tracy講既, 整到冇左神秘感, 不過唔緊要啦, 阿銘及galan都驚訝點解我會係度, 大家仍然有講有笑, 始終係度返學都係開心日子^^

蕃薯終於返到學校, 佢見到我及galan旁邊都有位, 我都叫佢是但選擇個位子坐, 佢都坐係我身旁...本來我想上到一半堂就走, 因佢坐左隔離唔走得添=.=學校多左部拍卡機, 係比日校學生點名用, 但夜校都可以玩下既, 可惜我既學生證係辦退學手續時已經收左, 好在蕃薯借佢張卡比我玩, 我拍完之後開開心心返埋位, 果然係個細佬女呢><

到左點名時間, 驚訝既係竟然仲有我個名, 本來我都想舉手, 但我已經退左學啦, 仲舉黎做咩, 所以我最後都冇舉手, 同學都哈哈大笑起黎, 佢哋都叫我做幽靈學生, 呵呵~我都幾鍾意呢個名^^

可惜返到屋企, 我媽媽見我好夜先返黎, 叫我做早訓覺, 本來我都係差唔多呢段時間訓, 訓覺都冇所謂, 點知佢話我返去無聊, 有家務都唔做, 真係令我好嬲, 我唔覺得同佢哋返學係無聊, 而且係我而家既開心日子, 只係想陪佢地, 於是同佢嘈左幾句, 佢話我可以搬走, 唔好返屋企, 其實我都想, 於是我夜晚不斷搵屋租, 邊計算我毎個月既用費. 我奇怪既係我完全冇哭泣, 心一直想住離開呢度...

好想返學~

見到同學仔聽日開始返學, 突然諗返起我哋以前返學既開心日子, 和同學仔一齊上堂, 比同學仔笑我個花名恐龍, 同蕃薯一齊做功課, 星期六一齊去食飯....的確有好多開心回憶, 也可以話人生之中既一個開心及重要既日子, 即使自己退左學, 都好想同佢哋一齊返學~對比較熟同學心中有不同的感覺:

文迪 : 好認真及成熟既人, 有時遇上感情煩惱都會搵佢傾, 佢可以比到好既意見我, 可以話係知道我感情事上最多既人, 成日要係聽我發up風及唔開心><多謝你~好懷念同埋佢及candy一齊係海旁傾心事及係佢屋企住既時間^^

tracy : 係AF 及 VF之後同佢熟左, 也係位成熟既朋友, 有好多唔開心既感情經歷, 但佢也好堅強地面對, 覺得佢好叻啊~之後仲要去台灣讀書, 比心機啊, 一定考到一定得! 最近我哋多左約出黎見面, 如果你去台灣真係少左其中一位好友呢><

蕃薯 : 唔知d人知唔知我曾經同過佢拍拖, 不過唔係太耐, 分開左之後我哋都係好朋友, 而且似係互相鍾意!? (我唔知啦, 佢自己親口講過及知我鍾意佢啦, 佢本人話驚好似之前d女友因佢太有女仔緣而唔同我拍拖, 但又話對佢呢個男友都幾好, 有d想殺左佢). 大家仍然有講有笑, 有時都會同佢及佢媽媽一齊食飯, 去下佢屋企度打機...同佢一齊係第二個最開心既日子. 不過我哋有時都有吵架, 但毎次都好快就好返, 佢對我都幾好既~

berry : 平時雖比較少同佢傾計, 但知佢係個好好既人之一^^

阿聯 : 成日都講笑話我, 同佢都ok好傾, 而且佢係波特, 蕃薯同佢三人之中比較成熟既一個人. 覺得佢好似我細佬一樣, 自己都唔知點解, 總之就係有似細佬呢種感覺=.="

波特 : 同蕃薯一樣, 都係好難玩既人, 同阿聯成日組織隊iphone一齊改歌詞, 令到大家笑到碌地~

阿銘 : 好好人又幾大隻下既人, 呵呵~最難忘有次係msn度打左句咩女仔學化妝之類, 佢話覺得我性格幾得意!? 只要做返自己就得....到而家我都仲諗緊我咩性格得意? 唔通係平時傻傻地嗎?

阿光 : 也係大好人, 其實全班毎個人都係好人, 好似係度講緊廢話=.="有事時一定會幫我手, 有次公司唔識整電腦野, 佢打電話黎教我哋, 老闆娘都想識佢, 但我點會比老闆娘識佢, 比佢知道我公司d衰野咪弊!!

仲有其他人都想見下既, 一於決定聽日偷偷地入到ive上堂及見下佢哋先~

得意情侶公仔~

今日老闆娘會同珍同trip 三日, 我今早要到太子銀行幫老闆娘交卡數, 不過我驚遲到, 所以一早去左太子, 但又唔想食早餐, 於是到附近行行, 途中經過OK, 見到對鬆弛熊好得意, 買滿二十元再加六十八元換購, 我唔理咁多, 一於換左先算^^

男既著住女仔整既公仔衫, 最得意都係隻女仔, 著住件兔仔衫, 本身我都鍾意兔仔, 加上隻得意既企鵝公仔, 仲可以拆出黎, 勁cute~

隨公仔送埋張卡, 連我之前唔鍾意鬆弛熊既我都覺得得意呢~尤其係後面個男熊仔, 拿住本兔仔書, 望住女熊仔話兔仔時, 好鬼得意啊>w<

本來仲有個紙盒摺埋, 但我屋企地方唔太大, 個盒冇位擺, 而且個盒size都幾大下, 於是冇摺到個盒出黎.....都唔緊要啦, 我都只係鍾意果兩隻熊仔^^

多謝同事利是 + 好大封開工利是^^

終於要返工囉~真係唔捨得個假期, 毎日都好開心, 係屋企有寧靜既好, 有時同下朋友出街, 去下拜年都唔錯~可惜開心既時間係特別快過~

一返到公司收到candy, mooji及珍既利是, 多謝哂你地. 我都祝你地身體健康, 財源廣進先~呢年黎多謝你地教導, 尤其係做人既道理, 成日令到你地唔開心及嬲都唔好意思, 黎緊呢年我會工作上努力外, 也會好好做返個人!?改善我性格上既弱點, 同埋和人相處既技巧>< 你地話封利是只係有恭喜發財及身體健康, 唔係錢黎既. 鬼信你地咩!? 返到屋企拆開利是, 毎人都係二十元黎架, 真係好多謝你地, 我都唔知講咩好(感動)除左你地既利是外, 仲收到船公司ivan既利是一封~開心開心^^

吉字果兩封係camdy, 米奇二封係mooji, 福字果二封係珍既~永亨係ivan既~

除此之外, 我地老闆娘都比左開工利是我哋, 返屋企拆開一睇, 竟然係五百元!!!??我唔信再擺返張五百元入利是封內, 再拿出黎都係五百元, 我果然冇睇錯, 於是我影底~

真係貨真價實既五百元~~~!!??我都係第一次收, 唔怪之得老闆娘叫我努力啦><

果然真係財源廣進呢~我要比心機d工作, 唔好再做錯野先得, 費時比佢鬧, 自己又難堪啦! 而家要比心機同佢埋好公司盤數先, 佢估計到營業額比往年高, 佢仲開心啊~

真係唔爭氣!!

原定約左tracy, 聯及波特去行山, 點知我一早起身就頭痛, 結果都係冇去到, 真係可惜呢, 好恨自己點解係重要關頭總係會有事發生!!! 係屋企休息左一陣, 下午已經好返好多, 結果只係屋企打左全日機><

大約夜晚八點幾到, 蕃薯突然打電話比我, 叫我去同tracy, 波特及聯打邊爐. 我真係好想行開下及打邊爐, 本來都好開心既~點知我媽媽話已經煮左我飯, 我最後都係冇得去=.="好傷心啊, 好想同大家一齊食飯, 唔知下次食飯要幾時囉><

佢地食完完野之後, 蕃薯仲send sms比我話好好味, 整到我鬼死咁恨去食><而且仲食肥牛, 下次要同大家去食先得囉><