唔好做電燈謄!?

難得一年一度既平安夜, 已經冇拖拍既我今日冇節目, 同事阿珍都冇節目, 同事佢哋提議我哋兩個今日去行下, 我都應承左個同事, 聽完老闆娘及其他同事講, 阿珍好似識路, 加上自己內心有d唔想去, 但又冇理由咁衰仔推人哋架. 於是只好唔出聲.

直到食飯時, 阿珍同佢老公傾電話, 先知道佢老公原來毎逄星期三放假, 但阿珍都冇離棄我, 仲叫埋我去. 不過我就覺得怪怪地, 好似阻住人哋兩公婆去拍拖, 自己見住佢哋行, 而且又同佢哋兩個人唔熟, 感覺好奇怪及岸居居, 同埋覺得好似做左人哋電燈膽, 不如搵個藉口唔好去吧! 我搵到文迪幫我手做左場戲, 就係我用sms叫佢send個短訊黎叫我去唱k, 我另一邊和同事講話d同學仔係玩即興, 係正日先會約人, 最後文迪都幫左我, 叫我六點去尖東唱k, 如果係真既就好呢~最後都成功推左阿珍, 佢同老公去玩得開心d吧!

放左工之後返屋企休息下, 姑姐都黎左屋企, 仲帶左盒咕咕力黎, 果盒野真係好鬼靚, 而且仲好貴><一於影左相先至算^^ 個盒面都幾靚既, 冇節目有盒咕咕力都唔錯既~

只係得八粒. 我哋全家要慢慢品嚐下先囉~

我仲係度期待, 蕃薯唔知會唔會約我呢? 好懷念上年聖誕節同佢一齊開心過既日子, 雖然冇去咩名貴餐廳, 也冇咩貴重禮物, 但只要可以同佢一齊過便可以....係呢日, 蕃薯都只係同佢媽媽食飯, 之後返左屋企, 我哋各自係屋企, 佢都冇約到我, 睇黎呢個聖誕佢都唔會約我, 我哋只係msn度傾左一整晚, 但也係一件不幸既事....

公司食大餐~

早上去左間運輸公司交支票及拿回收據, 見到人哋商業大廈既佈置勁靚, 於是我手痕痕拿部相機出黎影下相先, 我估人哋都以為我痴線既=.="

真係好靚既我先影架! 我公司樓下d裝飾又俗又唔靚, 我先冇影呢!

老闆娘琴日叫我哋今日唔好帶飯, 佢話想同我哋食返餐好既. 老闆娘咁講得, 一定有好野食啦! 好期待呢餐飯^^最後決定去附近間百佳度買刺身及壽司, 老闆娘, candy及我三人去百佳, 剩下mooji及阿珍兩人係公司. 我既責任比較大d囉, 我要拿住個壽司拚盆, 好重啊, 又唔可以整爛@@仲有我至愛之一既海謄及大量既三文魚壽司^^

返到公司開餐囉~!!唔知d野食係咪太吸引, 我一直食呀食, 竟然唔記得左影相, 好哂啊!! 食左好多海謄, 出奇地又唔太腥, 認真好味! 加埋個肥美既三文魚, 簡直係一流! 食完之後仲有老闆娘個爸爸拿黎既紅豆榚及沙拉, 我仲可以食到沙拉, 認真好好味~最後食剩既我哋全部人猜拳, 竟然係猜輸左唔使食, 我就次次猜輸, 都唔知話我係勁定係弱, 呵呵~

不過之後聽到一個唔好既消息, 就係26日果日要返工!!? 因為要就返日本人放假時間, 佢哋二十九號放假, 我哋係呢日先有個補假....嗚嗚....

心如鹿撞!?

今日同事講開琴日做冬,我先知道琴日竟然係做冬!?唔係掛!唔係星期六咩?我突然覺得好慚愧,星期六做冬,我冇返到屋企食飯,去左陪蕃薯之餘,星期日竟然同蕃薯一齊做冬.我覺得自己好不孝!!自己點可以咁架,蕃薯佢地極其量只係好朋友,親人當然比好友重要得多,唔係話好友唔重要,但兩者比較既話係親人重要d麻!!同埋蕃薯都唔鍾意我,我又要離開佢,自己都係放手吧!

再加上d同事話做冬大過年,蕃薯都同你過,即係當你屋企人啦,可能當埋你係老婆囉~等住做蕃薯太.吓!?唔係掛,一齊食飯o者,點會做左蕃薯太!?自己唔太討厭呢個稱呼,但我竟然覺得越來越驚,點解呢?自己都唔知道.我第時仲要自己一個人周圍旅行,點可以結婚架? 結婚咁多野要顧慮,又冇哂自由,自己先唔要.放工之後,我同蕃薯傾過, 我同佢講話琴日係冬至,我冇同屋企人過, 所以咪問你冬至係咪同屋企人食囉, 點知佢同我講話叫我當佢哋係屋企人,仲要整個笑logo...哇~講笑都有個限度呀,咁好易令人誤會,死啦,我知佢會同媽媽做冬,呢次應該只係意外吧?咁岩做完功課去食飯o者,平時都有架啦,只係今次時間係巧合左d.相信只有呢次,之後都見唔到佢,應該唔會掛!?

我自己無聊睇左冬至既解釋, 睇到自己都O左咀....
冬至: 作為一年之結，必須一家團聚吃晚飯，飯前或飯後吃湯圓，代表一家團圓。
聽網上d人講, 話個媳婦多數會去奶奶屋企做冬. <---吓!? 唔係掛, 唔怪之得d同事咁話我啦, 佢地真係冇呃我?

drama之前發生左件小事, 話說我要印返我份英文劇本, 蕃薯及tracy冇同我去影. 去到library, 我唔知點樣印, 好耐都冇去搵返佢哋, 我最後都冇印到就落返去搵佢地, 剛見到蕃薯想打比我, 甚至走出去搵我, 但我因佢地唔陪我去影印而發脾氣, 蕃薯捉住我隻手, 叫我出去同佢傾計, 我見到佢同tracy都問我咩事, 我唔想見到佢地唔開心, 於是就唔再發脾氣, 兩手攬住佢地兩個, 準備一陣既drama. 途中我好緊張, 捉住蕃薯隻手, 原本行黎行去既佢都企定定比我捉住....自己覺得安心好多^^

好在個英文drama都ok,我哋冇口窒窒,可以順利完成,都講左七分鐘囉!!由於我哋係最後果組,我哋講完drama之後,有d同學留左係度同miss影相,d影完之後再到聖誕樹度影,相仲係波特度,希望佢快d比返d相我啦!!

又打邊爐!?

今日仍然去蕃薯屋企練drama, 睇黎我哋今日比較認真, 不但準備埋道具, 而且仲計埋時間, 希望唔好超時. 我哋反覆練左幾次, 間中睇下西片咁啦~!我哋都可以背到對白, 仲講得好流暢, 你哋兩個做得好啊, good job!!

練完drama之後, 蕃薯要還野比個朋友, 佢個朋友住係觀塘, 而tracy咁岩架巴士又係觀塘落, 竟然叫tracy幫佢還野!? 聽佢講好似可以係深水步還比佢朋友麻, 做咩要tracy去架? 佢叫我先送佢去車站, 佢一陣會打電話搵返我? 我呆了一呆, 覺得好似有d騎呢, 於是同tracy出門口, 但tracy發覺佢唔記得拿件外套, 於是要中途返去蕃薯屋企. 最後呢, 就係我哋全部人一齊去同tracy等巴士....tracy走左後, 時間仲早, 原本以為返屋企休息下, 點知蕃薯問我同佢媽媽去邊度食飯, 最後我哋一齊去左大家樂度食飯. 見到蕃薯選擇果個牛肉火鍋都好似幾正, 於是叫左個同佢一樣, 甚至連飲品都係同佢一樣, 因為十元兩杯, 勁抵~我照以往咁, 先由蕃薯出左錢先, 我之後會比返佢, 而佢又會收返錢. 但今日佢竟然一反常態, 竟然唔使我比錢? 咁好?

叫完食物後, 佢媽媽叫左個鐵板燒, 入面有個湯或沙拉, 佢媽媽叫左個湯, 都想要個沙拉, 於是蕃薯即刻拿埋張單, 叫職員加多個沙拉. 我一直望住佢, 覺得佢為左個沙拉而周圍走既樣, 唔知點解覺得吸引呢? 可能係佢真係好孝順, 同埋我鍾意佢努力做一件事個樣>3<

蕃薯媽叫既燒春雞鐵板燒~個沙拉真係好好味啊!!蛋黃醬萬歲!!(吓)

我同蕃薯叫既牛肉火鍋~唔好誤會, 我同佢係一人一個既! 我起初以為只係咁少送....點知仲欠一個送未黎...

個送終於黎啦, 仔細睇下個煲隔離多左碟送. 我呢個全沙爹湯底都幾正~蕃薯果個係半沙爹, 半清湯

食完野之後, 我本來係返屋企, 但蕃薯話不如上去佢屋企, 幫我save套西片落SD卡度, 於是又係佢屋企坐左陣. 點知佢趁佢媽媽沖涼時話佢講英文咁叻, 有咩獎勵, 之後又kiss左我, 果然我哋係唔可以二人單獨共處><休息左一陣之後, 十點幾就搭車走, 佢竟然唔送我到車站, 激氣!!

失而復得?

今朝早唔知做咩, 竟然倒瀉左成碗麵, 我只係食左好少.....我當時真係好嬲, 發哂脾氣. 咁當然屋企冇人先會發顛啦. 我好唔開心, 好想哭, 自己煮得咁辛苦比自己食, 點知不但冇得食, 而且仲要抺地, 洗碗(呢個係必需吧!?), 於是我就冇食野, 去左蕃薯屋企同tracy及蕃薯練drama.

我早過tracy去到蕃薯屋企, 蕃薯媽剛準備煮麵, 佢問我食唔食, 我冇理由把頭先倒瀉碗麵件事同佢哋講, 加上我又唔可以咁唔客氣既, 於是我就話唔使, 點知佢媽媽叫我唔好客氣, 煮一碗麵比左我食, 好感動啊~估唔到麵都有失而復得!!?哈哈~蕃薯媽仲問我食唔食鴨胸, 真係多謝你啊, 無論係咩我都會食架><

係鴨胸伊麵啊~都幾好味架, 至於隔離杯choco呢, 當然唔係我, 只係覺得佢哋好襯先至一齊影埋^^

我食緊麵時, tracy已經黎到, 蕃薯執緊佢琴日同波特, 阿聯及其他跳舞既女仔去影既相, 我哋都拖左好耐, 終於都開始啦~但係...我哋似乎都冇咩心情去練, 於是決定返學校溫, 不過都係先黎個tea set先, 我哋的確係學校係比心機溫書既, 但只係溫左半個鐘就要上堂.

放左學之後, 原定我係返屋企做冬, 本來已經跟埋文迪佢哋上小巴去地鐵站, 點知原本同阿聯及波特一齊既蕃薯突然打電話比我, 問我係邊度, 叫我唔好上車住. 佢今日係等到十點去佢有個姣婆朋友的xmas party, 但而家仲未夠鐘, 於是我咪決定陪佢, 之後先趕住返去做冬, 點知佢哋話會十點走!? 我咪即係趕唔到返去, 結果我最後同蕃薯行左陣街先返屋企, 途中蕃薯話要毎人帶件xmas既物件去party, 蕃薯佢冇, 於是見到條聖誕老人咁既短裙, 手套及帽, 佢見我著住佢去party?講笑都有個譜啦, 穿果件咁sexy引人犯罪咩!?覺得自己好衰啊, 自己竟然為左陪佢而放棄左屋企人!? 不過我同蕃薯相聚既時間越來越少, 就讓自己任性一次吧....

會計課程

今日姑姐比左份野我,係我黎緊呢個三月會讀既degree章程,我終於知道自己讀咩科啦~唔該哂姑姐啊>3<

睇下有咩科讀先~都係有三年既科要讀!我讀果個係[Bachelor of Commerce (Accounting and Accounting Technologies],其實我仲未sure讀呢個,因我又想讀finance,因我唔想讀太多電腦,但finance又有好多試要考,所以都係要考慮下,不過我都係呢兩個course考慮,唔會返去讀返IVE轉頭,放心~Fianace未有資料,只係有technology果邊既科:

year 1 :Accounting (Finanacial)
Accounting (Technology)
Law (Corporation)
Accounting System
year 2: Accounting (external reporting)
Accounting (statement analysis)
Accounting (Computer package)
Accounting (Managerial control)
year 3: Accounting (Decision making)
Accounting (auditing)
Business capstone
Taxation
Accounting (financial modeling)

睇黎有d科目都幾難頂, 尤其係law及audit,我讀hi dip果陣都係剛好合格,呢兩科簡直係惡夢.不過為左自己既理想,點都要項硬上!!睇黎做女強人都幾辛苦呢, 為左未來可以自由去旅行及養屋企, 加油~

點解會咁樣~~~???

話說蕃薯琴日約左我, 今日去佢屋企度練英文drama, 我見佢英文唔係太叻, 驚有d英文字唔識讀或唔識解, 於是我就應承佢今日去佢屋企度同佢溫書. 好開心呀~終於可以見到你^^

放左工之後, 我即刻走到去巴士站搭車去佢屋企, 點知佢打電話比我, 叫我唔使咁趕, 仲話我哋今晚會打邊爐, 仲要話自己係黃大仙!!?吓? 搞咩呀? 唔係溫書咩?你去到咁遠把鬼呀? 快d返屋企溫書啦唔該!仲話唔趕, 星期一就考drama啦, 仲唔溫!!(怒)

結果我又真係聽佢點都有, 坐住架巴士左兜右兜, 差唔多成粒鐘先到tm. 我上到你屋企, 點知你屋企冇人既???唔係掛!? 我再打電話比你, 你竟然話自己仲係黃大仙, 話你媽媽係度, 點知上去一個人影都冇.....!!??覺得有d比人玩囉, 不過都知你冇心, 加上你即刻打電話比你媽媽叫佢返屋企都好d, 不過就要本小姐係你屋企等你咁耐食西北風, 我有股衝動想殺左佢^^點解要個客人係出面等架>< 你媽媽終於黎到, 佢竟然唔知我會黎既? 你哋有冇溝通架><之後你終於返黎, 我同你媽媽都餓死, 點知你仲同我哋講話買左隻咩火牛, 仲要睇你砌機!?我夠啦, 真係好餓囉, 信唔信我呅埋你!!

其實呢部係蕃薯部電腦黎架, 唔知點解張相會變成咁樣...

可能係我未見過電腦入面啦, 覺得都幾得意, 不過見到佢d線太多覺得好亂, 同埋我真係好餓, 我睇睇下都冇咩心機睇. 我同佢講溫書, 佢話呢個時候都冇咩心機溫書, 咁我今日到底黎做咩呢? 終於可以去食野, 如佢之前所講, 我哋兩個同蕃薯媽一齊去打邊爐~估唔到我呢年第一次打邊爐係同佢哋食, 竟然唔係同自己屋企人食添!!

呢間打邊爐好鬼平, 自助形式食野都係四十九元, 勁抵. 呢間野平時好難搵位, 但好彩地今日終於有位, 呢間野既裝修都幾靚, 唔似係食平打邊爐既地方~

一開始已經比呢個地方吸引住我, 真係好靚啊~

你再唔叫野食就真係咬你囉~你個樣呆呆地, 好得意, 等我影下你先^^

呢度自助打邊爐既食品種類唔太多, 而且都唔係太好味, 食物質素都ok既, 加上同自己鍾意既蕃薯及蕃薯媽食, 真係幾開心架! 途中蕃薯媽夾野我食, 我同蕃薯爭住食肥牛, 一齊等住個煲等食物熟, 都真係幾開心^^我以為我哋可以食好多野, 點知只係食左三大碟野咁大把, 而且仲唔係叫咩有咩, 有d野食都冇既><

毎碟都好似呢碟野咁多到啦, 估唔到我哋, 唔係, 係蕃薯先岩, 佢真係擦得!

食完野之後都只係十點幾, 佢同佢媽媽送埋我去搭巴士, 估唔到呢餐都食到咁飽, 蕃薯食飽哂, 個肚好似人哋有BB咁, 我都係叫佢快d返屋企休息下啦, 操身大細, 哈哈~佢仲話有間日本任食sushi, 五元一碟, 希望係聖誕之前開, 做咩o者, 又唔係同我去食, 講黎都哂氣囉~