返學時見到蕃薯著新衫, 一件白衫, 隻袖好似我d格仔衫咁, 長袖可以整到變中袖, 你係咪抄我架? 加埋條黑色牛仔褲, 好型~整到我都想買返條黑色短裙襯返佢, 呵呵, 我到底亂諗d咩!? 仲有佢原來...都鍾意飲青提味既qoo, 仲係度引我, 真係激氣!!
放break時文迪把菜菜註冊時部分, 見到佢地宣誓, 簽字及交換介指時已經覺得好興奮. 聽文迪講話個宣誓官真係唔識做, 冇叫到佢地kiss!! 仲有睇左搶花球果部分, 個花球自動drop左落寶妮身上, 真係忍唔住笑左出黎, 睇落去好似糖唐比較想接個花球呢~我突然心想, 如果我有去到及接到個花球, 我會同邊個結婚呢? 我望望坐係隔離既蕃薯!? 痴線架咩, 今日我做咩?
放學之後同姑姐傾電話, 傾傾下跟同學仔一齊坐地鐵去食飯, 點知文迪先走. 去到旺角時, 我以為蕃薯都會同我地一齊食, 點知佢原來已經約左人, 我兩位好友都唔係度, 最後只好同阿光, 波特, 阿聯, ryan, mandy及另一個男仔食飯. 我同阿聯及波特都ok熟既, 好彩全程都有阿光陪住我. 我見同另外三個冇咁熟, 於是同文迪sms, 諗住搵佢地食飯, 後來因阿光應承同波特佢地食飯, 於是咪改食dessert, 文迪問係咪同ryan及另一位mandy食飯, 佢地係咪知道文迪佢地行蹤, 佢好似好嬲好唔開心, 而且仲話唔使我地兩個過去食desert便收左線. 我同阿光都一頭霧水, 我地估可能係....總之我覺得最衰都係另一個mandy掛!!(怒)
都係決定左去洗衣街間鐵板燒, 都係叫開果個排, 點知波特, 阿聯及阿光都叫同一個排, 甚至係同一隻汁, 又剛好四個係同一張枱, 不如我地四人一台好了~而且飲品都差唔多, 除左阿聯之外, 我, 阿光及波特都叫左choco milk, 哈哈, 即係三個人同一份餐, 好得意啊~又或者話, 做咩你地會和我同一份餐架, 哼! 我哋食完野之後, 一齊係餐廳睇埋電視, 見到d人扮鬼扮馬好得意, 仲講埋第時我地畢業扮咩角色, 我先唔要扮恐龍, 我要帶住魔女紫色頂帽, 穿住畢業件袍, 穿黑短裙及長黑socks, 好似魔法學院畢業一樣^^
睇黎今日的幻想症越來越serious, 都係早d返屋企休息吧! 文迪佢地係海旁傾計, 唔知傾到幾耐呢? 唔知佢有冇唔開心及嬲左我呢?
welcome to my world...
My model life since Nov 09~
My sweet life w/ bf joejoe since Dec 09^^
踏入十二點,終於到左哈囉喂,我係月頭買左頂魔女帽可以出動啦. 加埋我完全冇化妝, 保證大家一定會比我呢張相嚇個半死.大家仔細留意下啦,哈囉喂快樂^^
係度扮魔女~我估化左妝會好睇d掛!?
其實自己比較like呢張相個型態, 可惜見到我張床好鬼亂=.="
好想同人出去玩下, 可惜冇朋友去玩, 惟有自己一個玩自拍...真係無隱. 除左係哈囉喂外, 也係我姑姐生日, 一早已經約好左係屋企度打邊爐就算, 琴日已經買定哂d材料, 所以都唔係問題. 約好左放工之後同姑姐去百佳買刺身食, 買左好多刺身及手捲, 有排食啦~
全部都係三文魚, 勁正~但我哋打完邊爐之後仲可以再食嗎?
買完野食之準備坐村巴返屋企, 見到阿爸阿媽抱住姪仔上緊車, 之後見到我個妹及佢朋友, 我排係我個妹後面, 望住佢地兩個傾計, 唔知佢地係咪拍拖呢? 唉, 一男一女就係拍拖咩, 自己正一係蠢材! 姑姐仲未黎到, 我一直等佢黎, 直至見到佢, 我叫佢排係我隔離, 但後面又勁多人排隊, 佢唔好意思打尖吧? 太多人搭村巴啦, 佢差d上唔到車, 如佢真係上唔到車我會落返車陪佢. 好在最後佢都上到車, 但比我哋呢家人, 阻住架車行, 唔好意思....
返到屋企等多一陣就可以打邊爐, 係今年第一次打邊爐, 可能我掛住食及太開心, 竟然唔記得左影相. 好多我哋鍾意食既食品, 已經食左好多, 唔可以再食啦. 食完之後個傻佬anson又打電話比我, 同佢傾左冇耐又有另一個麻煩男仔係msn度add左我, 點解我成日都遇到d麻煩男仔架!! 同佢地傾左冇耐, 自己太累訓左, 再起身時已經見到姑姐差唔多訓, 自己點可以咁架!? 都叫自己唔好太夜訓啦!!
首先要恭喜我一位中學既好友菜菜結婚,都係祝福佢同佢老公kevin白頭到老都咁sweet,永結同心, 同埋生返個肥肥白白既細佬仔,但唔好叫我飲薑操,我好怕飲,連老闆娘叫我飲都唔飲><好想睇到你地結婚既相,同埋講句sorry,唔可以出席你個婚禮><
本來真係好想去,但我哋公司發生左一件唔係好開心既事,就係我哋其中一名職員,佢星期一因發燒請病假,本來係冇事,點知佢星期二及三都請病假,星期二都有個sms比老闆娘,老闆娘已經開始覺得唔開心,已經鬧左佢,話佢無尊重過呢個老闆,於是第三日個同事冇打電話黎比老闆娘,老闆娘已經勁嬲,加上個同事老公黎到公司同佢理論,話老闆娘唔信個同事真係因發燒而請假,結果兩人係老闆房內吵起上黎,個同事打電話比老闆娘,老闆娘都嬲到話你唔想返工就唔好返啦,之後好大力收左線.本來我想同老闆娘話請半日假去菜菜之婚禮,睇黎也冇咩可能...同事個老公走左之後,佢也冇出聲,所以我琴日冇話到請假...
今日個同事終於返工,老闆娘捉佢入房,問佢有關大陸廠支出之事,兩人又吵起上黎,最後老闆娘和個同事講其實係為左佢好.佢知道大陸工作毎個人都係懶散,佢唔想連個同事都係懶散,加上佢又係佢弟婦,於是叫佢黎香港工作,個同事起初工作方面都好好,後來個同事因夜晚追劇,所以精神差左,做野全部差哂,老闆娘話知道公司冇咩錢earn,都比花紅佢叫佢努力工作.個同事聽聽下都哭起黎.如果我仲話去婚禮,係咪唔太好呢?
不過好在最後佢地兩個都冇咩事,同事又再努力工作.琴日計算糧金時,知道另一位同事又再加人工,加到同我一樣,本來佢少我三千元,我覺得自己好失敗,點解毎人都可以獲得咁多收入,自己反而冇呢?加上自己做野又唔太開心,呢一刻真係好想走,於是我開始努力起黎,希望可以盡快學哂所有野離開,去搵過另一份更高人工的工,睇黎我有10k以上都唔係太知足,其實出黎打工真係為份糧,自己的待遇唔太好咪想走. 於是我努力做野,唔知係咪老闆娘睇穿我有d想走呢,佢教左我一樣幾複雜既野,就係睇出L/C的銀行條件,解釋各項既銀行收費,同埋拿O/D額,也係申請融資既方法及注意事項,原來真係咁煩,我都要時間消化一下先,果然真係好難呢><
今日都係返學, 學既係audio, 即係做音效部分, 今次玩既係配音, 係配金雞內吳君如及吳震宇既角色, 內容係講吳震宇同曾志偉佢地去夜總會, 比吳君如佢地知道, 於是帶住姐妹去搵佢地果段. 起初d同學都叫我去配吳君如, 因頭果段有類似恐龍腳步聲, 笑左我好耐, 我當然唔應承啦! 後來蕃薯覺得好似好好玩, 於是佢自動請纓配吳震宇. 至於ryan就配曾志偉, 阿銘及花倫就配另外兩名一齊去夜總會既朋友. 男既所有配音員已經安排哂.
唔知係咪女仔特別怕羞d呢? 當然包括我啦, 我把聲咁核突, 成把男仔聲咁, 無謂獻醜啦><所以我先唔想配, 都唔係因為佢地笑我, 我先冇咁小氣! 有男仔話佢地反串扮女仔聲, 但都比波特拒絕, 我四周望望所有女仔都冇個願意配音, 於是我只好應承佢地配音啦! 但吳君如身邊仲有其他姐妹, 都冇個人願意配音, 好在雲妮最後都應承, 但都仲欠人聲, susuki及阿ling一直唔願意, 文迪佢唔鍾意聽到自己把聲, 所以我都唔好意思叫佢配, 即使其他同學叫文迪幫我手時, 我都冇迫佢, 不過好在最後都應承左我, 多謝你地兩位^^
開始配音時, 各位人員要先試音, 睇黎我都好似幾大聲, 我要企係後面先可以講野. 全個錄音房都好寧靜, 聽唔到出面同學的說話, 只有帶耳筒既蕃薯先至聽到佢地講咩. 真係好緊張呢, 從來未配過音, 即使有字幕, 我都好驚下, 驚自己把聲核突, 同埋自己反應慢講唔切.
第一次錄音時, 可能大家都比較緊張吧, 綠得唔太理想, 周不時會聽到人笑聲, 蕃薯講到好似讀書咁, 我又接唔切字幕....於是我地錄多兩次音, 最後終於成功左, 結果幾令人滿意, 話ryan真係似曾志偉, 話我竟然似吳君如!? 而且仲話吳君如病左可搵我配音, 哈哈~原來錄音真係咁好玩既, 不過之後執返段聲就難囉, 而且仲要搵埋背景音樂, 都唔知好唔好玩, anyway, 配音都係開心及好玩既^^
終於返學啦, 今日又係video堂~而且也係我交我哋角色設定及故事大鋼呢份功課既時候, 好在琴晚冇同個傻佬anson去睇戲, 唔係一定交唔到呢份功課呢~
個角色返定係一個男及一個女, 部分係以地獄少女為藍本去作. 故事講述一個內向, 缺乏人關心既女主角成日比同學欺負, 比人搶去自己暗戀的人, 甚至冇左推薦入大學既機會, 受左好多委屈也冇人傾訴, 佢好憎恨所有既人, 加上自己又係單親, 媽媽係成功商人, 只會擔心自己名聲, 大家好少見面. 女主角偶然遇上車禍, 但佢竟然冇死, 原來係一個穿著和服的地獄少女help左佢, 自此佢擁有特別力量去進行報復, 但代價係佢的生命力一直會流失....後來遇上一個陽光男孩, 雖然同是單親家庭長大, 但卻一直開心堅強生活落去, 惟一遺憾既係佢想做個足球員, 但一直冇機會. 個男主角既好友雖比女主角殺死, 但佢仍然主動關心女主角, 究竟女主角會唔會比佢真誠打動唔再報復到呢? 定一直損害生命, 直至死亡?我特登唔講個ending出黎架, 哈哈~因之後好似阿sir話要寫埋個故事發展, 果陣咪知個結局囉^^ 我好似好衰咁, 其實我覺得結局係重要, 但故事發展也係重要, 如個故事好既話, 就會吸引人一直睇到尾, 一早估到及知道個結局有咩意思. 可能仲有其他故事發生呢, 就係咁先至好睇!
上堂教用部攝錄機, 真係好多制要識, 原理同相機差唔多, 不過多左好多功能, 睇黎要比心機學下先得. 而且要用佢黎拍攝多份功課. 首先要拍攝三十秒既七彩螢幕先, 即係明珠台冇電視節目時出現果個畫面, 之後再拍十秒黑畫面, 之後就可以開始拍啦. 我哋呢次要拍既係各組員既自我介紹, 波特及阿聯都介紹得好鬼馬, 我呢咪講自己係恐龍, 想食哂話我d人囉, 哈哈~
其中有部分係一個叫場記既人記底第幾個shot, take幾多次, good定ng, 拍攝時間, 內容, 人物, 用咩攝影方法, 如近鏡, 中身....呢個部分呢, 哈哈, 波特話我有秘書格, 佢地已經比左我做, 又真係幾好玩呢, 自己都樂在其中~佢地都話我寫得幾好時, 我都幾開心, 我會努力做好呢個場記! (吓!? 咁冇大志既?)
最後放學時, 蕃薯話我個假髮得意!? 竟然有人讚個假髮? 佢都係第一個讚我, 都唔知係咪開心, 佢叫我整散d個髮, 又或者買多一束會好睇d. 嗯, 我得閒先會買返啦^^
其實琴日我係旺角買左一樣野, 係可以實現下我既夢想, 就係...幾執又長又捲既假髮. 自從剪左頭髮後, 我一直好想留返長, 但呢個月黎只係長得果少少, 幾時先可以留到以前咁長? 本來又想駁髮, 但我又驚損害而家既髮質. 本來以為自己冇希望再長髮, 但琴日竟然比我見到可以夾既長髮, 於是我今日試下夾住返工啦~
可能係自己夾得太落, 加上自己d髮質咁差, 真係好覺係假髮呢~
後面更加覺係假髮呢~
雖然係好假, 但我都帶住佢返公司, 因我真係好like佢既捲髮. candy一見到就話我都係短髮好睇d, 同埋我個捲髮真係好假. 睇黎我都要焗多d油, 打理一下頭髮先至得!!
琴晚我哋幾個女仔傾得好開心,尤其係可以見到菜菜及知佢結婚特別開心.今日同佢仲有多一次聚會,不過係同第二班朋友,包括veron,eva及蕉.佢地仲耐冇見,今日終於可以見到佢地啦!
由於我同屋企人食早餐既關係,我本來約左佢地兩點食飯都要改三點,sor呢...好在最後毎人都早左到cafe搵位,而菜菜都好準時,我哋有多d時間傾下計及玩下囉^^雖然我食左個早餐, 不過自己真係太肚餓啦, 都係食左野先~
我叫既忌廉煙三文魚天使麵. 又係三文魚? 又係天使麵? 冇計啦, 果間餐廳冇咩食...
我哋中途食飯都有傾下菜菜個婚禮d事多, 見到佢比我哋睇試婚紗及晚裝d相好靚牙~果然毎個女仔結婚時都係最靚, 好羨慕!! 唔知我有冇呢個機會囉...應該話我竟然迷失, 自己唔係一直好like蕃薯咩, 但點解又會諗返個衰人anthory架!?
大家都係覺得悶悶地, 就玩下遊戲先~有好多騎呢遊戲玩, 好鬼好玩^^
呢顆樹好得意, 首先我地要插d樹葉入顆樹度, 再擺d蜜蜂入樹內, 之後再拔走樹葉, 如果拿得越多蜜蜂就輸. 我呢隻果然係神手, 郁得都幾快下=.="
呢個係攏d圓片落個樽度, 我哋最後成功左, 所有買片都冇fall到, 真係勁牙!!
呢個遊戲我覺得比較悶d, 就係有粒骰子, 骰子上會有顏色, 要憑自己記憶去搵返和骰子相同顏色的公仔, 好怕玩d考記性既野>< 玩完之後, 我見到eva影完相, 部相機擺左係枱面, 我見到佢果部相機又係黑色既, 同我果部一樣? 原來只係果樣似, 但有d唔同既, 我哋開心到玩起互影黎~
哈哈~eva呢張影到佢幾開心^^
兩人部相機差唔多, 可惜背左光睇唔清楚, 不過唔緊要啦~好似人地賣相機廣告=.="
當然唔少得大家合照啦, 咁耐冇影, 一定要影返!!
大家玩完食完之後, 都已經成六點幾, 但似乎大家仲意猶未盡呢, 於是我哋行左陣旺角, 不過大家都好似冇咩心水野買. 最後各自返屋企. 我屋企仲有件蛋糕等埋我~
我既choco lover牙~全部都係choco, 入面仲係軟心choco, 出面果支係白choco, 超正~