值得開心~

果隻anthory再冇電話搵我, 呢件友唔好再煩我就好, 我好討厭佢少爺仔性格, 大男人及隨便, 以後唔好再同佢有關係及見面就好好~佢唔再煩我係第二件開心事~

以為個死人anthory走左之後會唔使煩, 點知又有另一個鍾意打電話黎引人笑既anson突然係msn度講話佢單身, 我也講事實自己又係單身, 於是anson話我哋不如拍拖. 吓!? 我呢d都聽得多, 成日都只係講下已經覺得好悶, 唔好再有人咁講好嗎? 之後佢提議下星期一去睇戲, 我竟然岸居居又應承佢, 自己究竟做咩? 幾時變得咁隨便? 唔通冇男友就可以咁做嗎? 自己以前都唔係咁, 點解會變成咁...只係填補自己心靈上的空虛, 定係自己想搵個男友. 網上及現實大多數男仔都係賤格既多, 成日都係騙色, 自己又唔係唔知. 雖然佢約既時間地點都係就我, 我話去旺角, 佢答應我由大埔放工即刻黎到食飯, 但只係扮好人吧? 自己唔好再上當....

蕃薯無端端問我聽日屋企有冇人, 話黎我屋企度整notebook上網既事, 以及係我部desktop度set野. 你當我傻咩, 整電腦使唔使要冇人牙, 你唔係又想....睇下你聽日知唔知醒, 可以一早黎我度啦, 都係咩唔好諗, 早d訓仲好啦~

又再見到佢!?

係公司無所事事, 成日返工都係玩fb, 甚至訓覺, 其他朋友又返左工冇得傾計, 如果可以msn就好, 可惜都係冇啦, 等放工既日子真係辛苦. 個男仔anthory (終於叫左佢個名啦!?) 突然打電話比我, 話佢唔見左本銀行簿仔, 佢冇取消個戶口, 博下冇人盜用, 自己又去申請本新既簿仔, 因佢多數會用呢個戶口做轉賬, 以及覺得手續費太貴而唔轉戶或取消號碼!? 吓!? 咁都得, 我覺得都係安全d好, 寧願轉戶口, 唔使日夜提心吊膽; 又話佢boss問佢借唔借錢, 借成五十萬咁多? 我就叫佢唔好借會好d, 不過佢咁大男人, 應該唔會聽我講吧? 同我傾完呢d事之後, 只不過係五分鐘就收左線, 都唔知佢打黎同我講佢呢d私人野做咩? 而且佢又冇約我食飯, 應該冇問題吧?

直至五點幾, 佢又打電話黎, 問我放左工之後得唔得閒, 想約我去食飯, 六點半係葵芳neway等. 但佢公司多野做, 佢叫我行陣街先, 結果要成七點幾先見人, 真係離譜!! 要個女仔等佢咁耐!

anthory又楂架車黎接我, 最後決定係深井度食飯, 就大家屋企地點, 我講得衰, 應該係各自返屋企既地點. 佢唔想哂錢泊車, 竟係路邊泊車, 但又驚抄牌, 於是佢搵附近一間茶餐廳食野, 方便睇住架車~本來我想睇下食咩, 點知佢竟然叫我唔使選擇, 由佢幫我決定哂, 竟然唔比女仔選擇架, 真係牙!! 好在呢餐飯唔使我出錢, 哈哈~

以男仔黎講, 佢都食得幾清啖下~銀色果煲仲有鮑片, 毎人一個飯, 真係好好味~

其實佢都對我幾好既, 同佢傾計之中, 佢得知我食物方面根本唔夠健康, 話我成日食埋d肥膩野, 於是佢叫我食雞時, 食d冇咁肥又滑既部分, 佢自己食d肥既部分, 睇黎佢都算唔錯. 之後佢話我咩都貪, 惟獨係唔貪靚, so 佢叫我先打理好自己皮膚先至學化妝, 我都努力緊,; 同埋話我大食, 當然冇人要啦. 點解個個男仔都咁話我? 睇黎我真係好唔店=.="

食完飯之後, 我地再去附近食糖水. 之後佢車我返屋企, 但返屋企之前, 佢話去銀行拿錢, 佢又同人傾電話, 其實我頭先食飯時我都有見佢成日講電話, 我見佢架車入面都幾靚, 自己又悶, 於是又手痕痕走左去影相...

佢個司機位~ 我就坐係佢隔離

佢架車後面位置~果個位好迫, 根本坐唔到人, 可能係佢特登要人坐前面呢!?

食拿完錢, 傾完電話之後, 佢即刻上車車我返屋企樓下, 自己佢就返屋企, 係車上佢話自己一個人住, 平時冇咩湯水飲及生果食, 叫我得閒比佢食下, 都係睇表現先啦, 我唔係對毎個男仔都咁好既, 哈哈~

惡夢的含意

今日放左學冇同文迪佢地食飯, 又開始冇咩錢用, 自己返屋企睇各朋友既blog, 大多數朋友可能係太忙呢, 冇時間update 個blog, 只見candy毎日都update左佢個blog, 見到佢同佢個男友毎天都過住開心生活, 值得慶賀既. 但也見到佢就黎結婚, 心情好緊張, 成日都發惡夢, 可能係佢自己都唔想, 但又唔知點解又會發夢見到d咁既野. 唔好太緊張, 放鬆d迎接呢個一世難忘既開心日子吧~!

講起夢, 我都曾經發夢見過蕃薯突然係隻遊輪上跳海, 應該話唔止佢一個人跳, 仲有其他人都跳海, 我見到有潛水人員把屍體撈返上地面, 但都係唔見蕃薯(我咒佢死左!?), 我個心越來越緊張, 不停去搵人help佢, 但都冇人幫我手, 我真係好驚, 脆左係地上哭住, 我發覺自己唔可以冇左佢. 至於之後結局係點? 我真係唔知, 因我已經醒左. 其實個夢真係同現實冇咩關係, 我也唔會估呢個夢既意思, 但卻帶比我一個重要既信息, 就係自己覺得蕃薯原來係我心目中的位置係咁重要, 甚至害怕會失去佢, 都唔知係咪值得開心, 雖然搵到個自己真心愛既人, 但又驚佢第時唔會同自己一齊會唔開心. 但無論之後會點都好, 自己鍾意佢既心應該唔會變掛? 自己正在找尋自己幸福既道路中~

高興與失落之間

同埋因和同事討論自然死及病死既問題, 由此我既無知, 毫無理據同mooji吵起上黎, 我同佢吵得唔開心, 我已經同佢道歉左兩次, 佢都仲嬲緊我, 一直冇再同我傾計, 呢日我要出job, 想搵佢至鍾意食既臭豆腐比佢, 可惜都係搵唔到, 要去到深水步先有得買, 我公司係荔枝角, 又點可以去買呢? 冇得同佢道歉, 即使我另一位好同事candy勸導, 個同事仍然唔彩我, 睇黎佢真係好嬲呢....mooji, 對唔住, 我唔應該用咁惡既語氣話你, 你一直好心教我, 教左我好多野, 我自己實在唔岩, 只求你原諒我一次...

可能係和同事突然吵架, 總係唔開心, 但也有令我開心既事, 首先係今日果個男仔終於冇打電話搵我, 的確係件好事, 唔想再同佢有任何來往, 但自己真係咁諗嗎? 明知佢係衰人, 佢唔黎煩我咪仲好...第二係放學後, 佢琴日和同學講開水電用黎第時拍video功課時用, 佢一直都督我個肚, 話我係水電, 其後話我係大肚腩, 計我話你先係大肚腩, 於是我督返佢個肚腩; 仲有各同學已經走哂, 波特等阿ling同佢一齊放學, 只剩下我同蕃薯, 佢突然叫我走近佢身邊, 之後鍚左我一啖, 我當時個腦一片空白, 咩都諗唔到, 其後終於回神, 我追住佢黎打, 我哋一直走, 直至我打到佢為止, 呢段畫面似曾相識, 就係係佢一開始好似追我時所發生既情景, 我哋兩個好耐都未試過笑得咁開心, 估唔到我哋之間發生左咁多事, 我哋仲可以咁開心, 但呢個情況到底可以維持幾耐呢? 好享受呢刻開心既時間, 但願可一直停留係呢段時間就好了^^

第三件開心既事係今日又可以和文迪, 雲妮及berry去食飯, 我哋都仲苦惱緊食咩好, 最後都係決定左食泡飯, 雖然都知係冇咩益, 但試下又無妨呢~

我叫既沙爹牛肉及酸菜泡飯, 都幾好味既~

大家談論緊佢店舖內其中一個裝飾, 就係掛在天花板上既玻璃杯, 即係酒吧度d玻璃杯倒吊住果d, 從雲妮口中得知原來酒吧d人成日抺杯係有原因, 就係令到d杯乾淨d, 睇落去會比較ling身, 但果度d杯既裝飾, 果d杯不但唔ling身, 而且仲好似有塵係上面, 講完之後真係有d唔係好想食, 但見d食物ok就算, 而且又平, 都係唔好太高要求吧!

惡夢第一日....

今日收到蕃薯個sms, 佢同我講佢琴晚的確好嬲, 但佢已經原諒我, 同埋話以後有咩事都同佢講, 但我已經冇覆佢, 同時也冇再同佢sms, 應該話自己已經唔想吧?

果個男仔係放學之後都有打電話比我, 問我今日去唔去食飯, 我又用星期一至三都要返學黎推左佢, 希望佢自此之後都唔好再打電話比我黎煩我! 雖然講係咁講, 但我唔知點解都係想見佢, 自己有d心掛掛, 如果可以用佢黎忘記蕃薯都不知幾好呢, 但知道只係治標唔冶本, 差唔多毎日返學都見到佢, 點忘牙? 雖然都知個男仔動機係唔好, 但自己做咩鐘個頭埋去, 你係咪恨拍拖恨到發燒, 成個迷糊, 兩個男人比你既唔係真正既愛, 而係佢地都係自私, 同埋兩個都係幾大男人既人, 自己一定受不了...好想擺脫佢地

呢堂英文已經冇同佢坐, 只係幫佢霸左個位, 同埋把上堂既note擺係佢枱上, 最後佢返到黎只係同女仔msn, 及係fb度傾計, 完全哂我既心機, 可能對自己黎講係幫佢, 但係佢角度係害佢掛!?

呢兩位仁兄帶比我既惡夢, 究竟幾時會完結? 惡夢的第一日....

但也唔係全部惡夢既, 最開心日既係放學之後同文迪, 雲妮及berry去食晚飯, 都係上成日食開間上海菜館, 而且仲大家share食物黎食~

我哋食既年榚及餃子~仲有小龍包及煎餅冇影到=.="

矛盾!?

話說今日全班男仔去城門水塘影相, 當然唔會搵埋我啦, 佢地又同埋佢地個model朋友去. 好在琴日同文迪講好左今日去唱k, 先懶得你地!!

由於我冇開手提, 文迪一早已經約定我唱k既時間及地點, 係一點前係佐敦等, 但我差唔多一點先開機, 結果遲左成個鐘先至去. 好在之後都可以搵到地方唱k~間k房好細間,好的式, 我哋立即去點歌, 而且我仲即時叫左下午荼, 係雞翼薯條, 雞翼味道都ok既, 但d薯條凍哂, 而且又冇味, 完全難食, 我覺得間neway唔係收我份下午茶錢15元, 而係要比返我多d囉=.="

唱完k之後, 我同文迪去左以鮮奶最出名既澳洲牛奶公司, 果度d快餐出名快及好食, 佢最出名係炒到好滑既蛋外, 仲有佢既牛肉通粉, 但呢個通粉係餐度係冇寫, 點解我會知可以叫牛肉通粉呢? 因有次我同姑姐讀緊會計時, 毎次放學都會走去食, 本來照住佢餐牌黎叫, 點知餐牌果樣已經賣哂, 於是個侍應就叫我哋叫牛肉通粉, 食過之後又覺得幾好味, 於是我哋毎次就叫呢個餐食. 食完之後, 同文迪再行陣街, 直到十點到先離開....途中果個男仔又再打電話比我,已經冇見佢二日, 或者咁先係好

返到屋企msn, 見到蕃薯online, 都係唔同佢傾好, 我哋不但因之前件事吵架, 而且仲因佢一張model相及我見之前話個video欠兩個男主角, so 我想叫果個男仔黎, 佢立即問我果個男仔係邊個, 做咩一定要叫佢黎, 因此我哋又再吵架, 話佢[之前一早都同你講過我最討厭人有野扮無野架啦], [我發覺我同你真係溝通唔到], [無論大事小事..我發覺我講咩你都會錯意]. 我已經受夠啦! 點解我毎次都係比你話我, 我就唯唯諾諾, 我覺得成日屈就自己好痛苦, 我哋既距離越來越遠...

搖擺的心!?

之前同蕃薯及自己近來發生左d事, 呢日唔係咁開心, 成日都冇笑過, 只有呆呆地坐及企著, 蕃薯見到我好似唔係咁開心, 於是特登講野黎引我笑, 但自己根本都笑唔出, 可能係今次呢件事太對佢唔住吧!? 佢雖然似乎冇嬲到, 但係佢同我減少左身體接觸, 佢以前都會拍住同我坐, 而家好明顯有d距離, 咁又難怪佢既....

到了葵芳地鐵站, 本來想同文迪二人去食飯及傾心事, 點知蕃薯突然話想打波, 於是對住文迪問佢去唔去, 文迪望一望我, 蕃薯見我猶豫不決, 佢都望住我叫我去, 最後我哋兩個女仔一齊跟埋佢地, 目的地係阿聯屋企及附近球場, 阿聯屋企就係蕃薯佢地成班攝影發燒友研究下攝影野掛, 至於球場咪係比蕃薯打波囉~原來阿聯屋企係石峽尾, 係我以前返學既地方, 係果度有好多回憶, 本來失落既心情突然開心起黎, 覺得全個人都好輕鬆, 原來返去以前既地方係幾咁開心~跟佢地黎果然冇錯!

可惜既係球場已經滿哂人, 蕃薯連打波既機會都冇, 只好去阿聯屋企, 本來我哋想全班同學都殺上去, 但覺得太多人去佢度又唔好意思, 最後只有蕃薯及波特, 佢地三人上去. 剩下我, 文迪, 雲尼, 阿光及阿駿五人係佢屋企樓下等.

等左幾個字到, 終於可以去食飯, 好野~可惜阿駿及雲尼都係走左, 我哋六人步行到深水步食日本野, 就係有一次去過果間日本料理度食, 宵夜都係35元, 有一個烏冬, 一個窩及二件壽司, 真係好抵~途中果個男仔又再打電話黎問我係邊, 剛好蕃薯對住我, 我只好行開一陣講電話. 點解我會咁做架? 好似有種悔疚既感覺, 但另一方面, 知佢打電話比我又覺得好開心, 同埋自己竟然有d想見佢, 但我唔係鍾意蕃薯咩? 唔通係呢件事改變左全個故事?