同埋因和同事討論自然死及病死既問題, 由此我既無知, 毫無理據同mooji吵起上黎, 我同佢吵得唔開心, 我已經同佢道歉左兩次, 佢都仲嬲緊我, 一直冇再同我傾計, 呢日我要出job, 想搵佢至鍾意食既臭豆腐比佢, 可惜都係搵唔到, 要去到深水步先有得買, 我公司係荔枝角, 又點可以去買呢? 冇得同佢道歉, 即使我另一位好同事candy勸導, 個同事仍然唔彩我, 睇黎佢真係好嬲呢....mooji, 對唔住, 我唔應該用咁惡既語氣話你, 你一直好心教我, 教左我好多野, 我自己實在唔岩, 只求你原諒我一次...
可能係和同事突然吵架, 總係唔開心, 但也有令我開心既事, 首先係今日果個男仔終於冇打電話搵我, 的確係件好事, 唔想再同佢有任何來往, 但自己真係咁諗嗎? 明知佢係衰人, 佢唔黎煩我咪仲好...第二係放學後, 佢琴日和同學講開水電用黎第時拍video功課時用, 佢一直都督我個肚, 話我係水電, 其後話我係大肚腩, 計我話你先係大肚腩, 於是我督返佢個肚腩; 仲有各同學已經走哂, 波特等阿ling同佢一齊放學, 只剩下我同蕃薯, 佢突然叫我走近佢身邊, 之後鍚左我一啖, 我當時個腦一片空白, 咩都諗唔到, 其後終於回神, 我追住佢黎打, 我哋一直走, 直至我打到佢為止, 呢段畫面似曾相識, 就係係佢一開始好似追我時所發生既情景, 我哋兩個好耐都未試過笑得咁開心, 估唔到我哋之間發生左咁多事, 我哋仲可以咁開心, 但呢個情況到底可以維持幾耐呢? 好享受呢刻開心既時間, 但願可一直停留係呢段時間就好了^^
第三件開心既事係今日又可以和文迪, 雲妮及berry去食飯, 我哋都仲苦惱緊食咩好, 最後都係決定左食泡飯, 雖然都知係冇咩益, 但試下又無妨呢~
我叫既沙爹牛肉及酸菜泡飯, 都幾好味既~
大家談論緊佢店舖內其中一個裝飾, 就係掛在天花板上既玻璃杯, 即係酒吧度d玻璃杯倒吊住果d, 從雲妮口中得知原來酒吧d人成日抺杯係有原因, 就係令到d杯乾淨d, 睇落去會比較ling身, 但果度d杯既裝飾, 果d杯不但唔ling身, 而且仲好似有塵係上面, 講完之後真係有d唔係好想食, 但見d食物ok就算, 而且又平, 都係唔好太高要求吧!
welcome to my world...
My model life since Nov 09~
My sweet life w/ bf joejoe since Dec 09^^
今日收到蕃薯個sms, 佢同我講佢琴晚的確好嬲, 但佢已經原諒我, 同埋話以後有咩事都同佢講, 但我已經冇覆佢, 同時也冇再同佢sms, 應該話自己已經唔想吧?
果個男仔係放學之後都有打電話比我, 問我今日去唔去食飯, 我又用星期一至三都要返學黎推左佢, 希望佢自此之後都唔好再打電話比我黎煩我! 雖然講係咁講, 但我唔知點解都係想見佢, 自己有d心掛掛, 如果可以用佢黎忘記蕃薯都不知幾好呢, 但知道只係治標唔冶本, 差唔多毎日返學都見到佢, 點忘牙? 雖然都知個男仔動機係唔好, 但自己做咩鐘個頭埋去, 你係咪恨拍拖恨到發燒, 成個迷糊, 兩個男人比你既唔係真正既愛, 而係佢地都係自私, 同埋兩個都係幾大男人既人, 自己一定受不了...好想擺脫佢地
呢堂英文已經冇同佢坐, 只係幫佢霸左個位, 同埋把上堂既note擺係佢枱上, 最後佢返到黎只係同女仔msn, 及係fb度傾計, 完全哂我既心機, 可能對自己黎講係幫佢, 但係佢角度係害佢掛!?
呢兩位仁兄帶比我既惡夢, 究竟幾時會完結? 惡夢的第一日....
但也唔係全部惡夢既, 最開心日既係放學之後同文迪, 雲妮及berry去食晚飯, 都係上成日食開間上海菜館, 而且仲大家share食物黎食~
我哋食既年榚及餃子~仲有小龍包及煎餅冇影到=.="
話說今日全班男仔去城門水塘影相, 當然唔會搵埋我啦, 佢地又同埋佢地個model朋友去. 好在琴日同文迪講好左今日去唱k, 先懶得你地!!
由於我冇開手提, 文迪一早已經約定我唱k既時間及地點, 係一點前係佐敦等, 但我差唔多一點先開機, 結果遲左成個鐘先至去. 好在之後都可以搵到地方唱k~間k房好細間,好的式, 我哋立即去點歌, 而且我仲即時叫左下午荼, 係雞翼薯條, 雞翼味道都ok既, 但d薯條凍哂, 而且又冇味, 完全難食, 我覺得間neway唔係收我份下午茶錢15元, 而係要比返我多d囉=.="
唱完k之後, 我同文迪去左以鮮奶最出名既澳洲牛奶公司, 果度d快餐出名快及好食, 佢最出名係炒到好滑既蛋外, 仲有佢既牛肉通粉, 但呢個通粉係餐度係冇寫, 點解我會知可以叫牛肉通粉呢? 因有次我同姑姐讀緊會計時, 毎次放學都會走去食, 本來照住佢餐牌黎叫, 點知餐牌果樣已經賣哂, 於是個侍應就叫我哋叫牛肉通粉, 食過之後又覺得幾好味, 於是我哋毎次就叫呢個餐食. 食完之後, 同文迪再行陣街, 直到十點到先離開....途中果個男仔又再打電話比我,已經冇見佢二日, 或者咁先係好
返到屋企msn, 見到蕃薯online, 都係唔同佢傾好, 我哋不但因之前件事吵架, 而且仲因佢一張model相及我見之前話個video欠兩個男主角, so 我想叫果個男仔黎, 佢立即問我果個男仔係邊個, 做咩一定要叫佢黎, 因此我哋又再吵架, 話佢[之前一早都同你講過我最討厭人有野扮無野架啦], [我發覺我同你真係溝通唔到], [無論大事小事..我發覺我講咩你都會錯意]. 我已經受夠啦! 點解我毎次都係比你話我, 我就唯唯諾諾, 我覺得成日屈就自己好痛苦, 我哋既距離越來越遠...
之前同蕃薯及自己近來發生左d事, 呢日唔係咁開心, 成日都冇笑過, 只有呆呆地坐及企著, 蕃薯見到我好似唔係咁開心, 於是特登講野黎引我笑, 但自己根本都笑唔出, 可能係今次呢件事太對佢唔住吧!? 佢雖然似乎冇嬲到, 但係佢同我減少左身體接觸, 佢以前都會拍住同我坐, 而家好明顯有d距離, 咁又難怪佢既....
到了葵芳地鐵站, 本來想同文迪二人去食飯及傾心事, 點知蕃薯突然話想打波, 於是對住文迪問佢去唔去, 文迪望一望我, 蕃薯見我猶豫不決, 佢都望住我叫我去, 最後我哋兩個女仔一齊跟埋佢地, 目的地係阿聯屋企及附近球場, 阿聯屋企就係蕃薯佢地成班攝影發燒友研究下攝影野掛, 至於球場咪係比蕃薯打波囉~原來阿聯屋企係石峽尾, 係我以前返學既地方, 係果度有好多回憶, 本來失落既心情突然開心起黎, 覺得全個人都好輕鬆, 原來返去以前既地方係幾咁開心~跟佢地黎果然冇錯!
可惜既係球場已經滿哂人, 蕃薯連打波既機會都冇, 只好去阿聯屋企, 本來我哋想全班同學都殺上去, 但覺得太多人去佢度又唔好意思, 最後只有蕃薯及波特, 佢地三人上去. 剩下我, 文迪, 雲尼, 阿光及阿駿五人係佢屋企樓下等.
等左幾個字到, 終於可以去食飯, 好野~可惜阿駿及雲尼都係走左, 我哋六人步行到深水步食日本野, 就係有一次去過果間日本料理度食, 宵夜都係35元, 有一個烏冬, 一個窩及二件壽司, 真係好抵~途中果個男仔又再打電話黎問我係邊, 剛好蕃薯對住我, 我只好行開一陣講電話. 點解我會咁做架? 好似有種悔疚既感覺, 但另一方面, 知佢打電話比我又覺得好開心, 同埋自己竟然有d想見佢, 但我唔係鍾意蕃薯咩? 唔通係呢件事改變左全個故事?
個男仔終於約左我今日同佢食晚飯, 而且仲話自己特登楂埋車黎接我放工, 唔係掛!? 原來佢有車架? 仲要接埋我放工, 都係第一次, 起初一聽到佢話有車, 我都有d驚, 但最後竟然答應佢, 六點四十五分係我返工既長沙灣廣場後街等, 我放工後都立即打扮下先去見佢....
期間姑姐已經叫我唔好去, 但我總係唔聽話要去, 仲叫文迪同我夾定口供, 希望可以同個男仔去食飯, 我幾時變得咁唔聽話? 係我做左乖乖女咁耐以黎第一次唔聽我姑姐話. 文迪都支持我呢段感情, 係個新既開始, 叫我小心d, 千萬唔好上佢屋企..
終於見到佢, 佢真係楂架車黎接我, 全架車都充滿哈囉喂裝飾, 全部都係阿jack公仔, 真係好靚, 而且佢仲話自己特登用成萬元裝飾, 有好多古古怪怪既公仔.
佢架車本身出面係藍色, 入面佈置黑白色, 營造哈囉喂氣氛~
係車上佢突然同我講, 話星期三見面果次佢已經鍾意我, 只係驚講左出黎會嚇親我, 所以佢果陣冇講到. 之後捉住我隻手及想錫我, 輕聲問我係咪去黃金海岸食飯, 我哋最後決定係果度. 係車上講左佢好多經歷我知, 原來佢做過好多種職業, 包括抄股....炫耀自己身家豐厚, 佢自己只係二十九歲, 就可以一次過付款比哂佢自己住緊既浪翠園買樓費, 而且佢屋企本身住簿扶林(唔係木屋, 真係萬幾元尺的住宅), 話佢自己唔靠屋企而自己搵錢, 買左佢而家呢架十五萬既車, 而且以前仲係楂寶馬, 同埋之前抄股, 而家蝕左六十幾萬....見到佢一直靠近我楂車, 自己比佢既外表及身家吸引, 原來自己只係個普通女仔...
終於到左黃金海岸, 本來想去酒店食buffet, 竟然要成三百幾元, 實在太貴呢!!於是去左附近餐廳食飯, 最後去左一間露天餐廳食飯, 原來佢本身都好鍾意好多外國人既地方, 可能佢本身都係外國留學返香港吧? 但估唔到佢叫中式食品呢...
佢竟然叫左肉餅飯!? 有d驚奇添? 竟然掛住影佢個飯唔記得左影自己果個飯添=.="
我哋食飯既露天餐廳~
餐廳外既風景~
我哋邊食飯邊傾計, 途中見到風景咁靚, 於是我同佢影張合照, 總之叫人幫我地影啦! 佢影得咁鬼核突=.-"
我做咩鬼咁近佢牙? 影到我塊面肥到死>< 
死啦, 做咩張張都影得我咁核突架!? 定自己本身核突?
食完飯之後, 佢先去附近油站入油, 途中佢教我點樣去睇名車, 唔好比d舊款名牌車呃到, 原來果d車只係值幾萬元; 我自己身邊都冇d咁有錢既朋友, 點識呢d野? 佢係車上叫我可以隨時去佢屋企住, 仲叫我同屋企人講話去男友屋企附近住下. 吓!? 點可以咁架? 最後我都去左佢屋企坐左一陣就走. 佢屋企雖然細細地, 但設備都幾齊全, 只係個廚房唔知要黎做咩? 只係擺鞋....仲有設備都冇咩點清潔, 果然係咩都唔識做既二世祖=.=??
我發覺同佢的價值觀跟本唔同, 而且性格, 身家都差一大載, 睇黎我都冇咩機會可以同佢一齊, 唔好話一齊, 甚至連見面都未必會見啦. 你估佢真係當自己係佢女友咩? 自己當發一場夢算吧!
佢今朝同我講, 話佢頭暈唔想返學. 係啊! 今日係英文堂, 又係一個悶科, 佢就醒啦, 唔使返呢堂悶野. 我本來都唔想返, 因琴日果個男仔約我食糖水, 我因為要返學而冇得去, 改左去聽日. 而且仲要我幫你拿notes, 真係激氣! 佢叫阿聯都得啦, 做咩會叫我架!!?
返到學校本來以為自己悶既話可以玩下fb, 正當我想去個fb網頁時, 突然轉左做word既? 原來miss控制哂所有電腦, 要我哋睇住個mon抄notes. 唔係掛!? 咁悶, 呢次真係死啦. 加上仲要聽到11月13要測英文, 更加冇心情=.="點解要好似以前咁既悶版方法上堂? 我同文迪就係因為唔鍾意咁樣先唔讀工商管理或會計, 估唔到而家又再重覆以前道路....
於是我哋兩個無聊起黎sms, 大家用sms傾計, 甚至仲約埋一齊去toliet及去傾計. 我哋終於呼到啖新鮮空氣啦~文迪仲講開星期六阿銘會係球場附近打波, 問我去唔去. 睇人打波成三個鐘咁悶, 不如去睇行下街, 傾下計, 涼下冷氣仲好啦~都係等星期六先算啦, hehe!!
蕃薯就好啦, 唔使返學, 除左佢之外, 仲有八個同學都冇返學, 包括波特及阿銘, 仲有d我同佢唔太熟既同學, 總之你地都好, 唔使返學聽悶書, 好羨慕><
今日如常坐小巴返學, 身邊突然有個日本打扮既男仔坐係我隔離, 起初我都冇咩留意佢, 只係望左佢兩眼, 見佢有時都會望下過黎, 但我都不以為意, 自己落車後返學校....
正當我返學校時, 個男仔突然走黎, 問我係咪係新都會廣場工作, 我話唔係, 點會有d白撞既人架? 真係厚面皮!! 本來想走開唔理佢走, 點知佢一直同我傾計, 問我係邊度讀書及住邊, 以及講埋自己既生活背景我聽, 原來佢之前係香港讀過poly u 兩年, 之後去左英國留學, 而家返黎香港工作, 佢全部親人都係英國住, 而家住係深井浪翠園....佢一五一十同我講起佢既事, 呢次黎ive係, 因為佢英文好, 幫同學做功課. 到左課室門口, 我咪入去囉, 點知佢仲捉住我同佢傾計, 佢其實真係幾型, 於是吸引左d同學黎睇, tracy見到我同個男仔傾計時都走左過黎睇我地講咩.
最後傾完返到課室, 果然同學全部見到哂=.="即刻問我果個係邊個黎, 我話我其實都唔識, 只係係車上遇見, 佢話好似見過我先同我傾計, 令同學諗返起琴日上video睇過有段日本男性追求女性的短片, 其中有一部分話男想追個女時, 會偷偷跟蹤佢, 見個女仔drop野時會幫佢執返, d同學咪用呢段黎笑我呢段奇遇. 文迪見到我同個男仔好好傾, 話佢咁主動, 而且外型都幾襯, 真的嗎!? 令我真係好開心呢. 可惜既係我呢日竟然唔記得左帶電話, 冇得拿佢個電話號碼, 但我比左自己個號碼佢, 希望佢會搵我啦! 其實我都係第一次比人搭訕, 而且仲係個型仔, 係讀時裝設計, 佢識打扮之餘, 又好似好有錢咁? 難道我真係行運嗎? 都係睇定d先啦~
返到屋企終於可以拿返個手提, 見到佢有個sms問我食唔食糖水? 唔係我既桃花終於黎嗎?