今日派卷 + 得意電腦畫面!?

呢堂係database,今日終於派上次測驗果份試卷及知道分數,我就冇咩感覺,因我估計自己唔會氧太高分數,只求合格就得.特別緊張的只有波特,佢係之前都已經成日問miss,佢有幾多分,可能佢同蕃薯一樣,都想拿credit吧=_="

終於派左卷,份野滿分係60分,我竟然....對於電腦白痴的我,實在太難以置信...我竟然差少少就50分!?我睇完又睇,睇左份野幾次,甚至自己仲計埋分,真係呢個分數.我都嚇到傻左,我呢次真係冇蕃薯教我,自己又冇睇咩書學,咩都冇準備就去測,都可以拿呢個分數,真係覺得好意外,而且仲有另一個意思,就係我即使唔使靠蕃薯,只係靠自己,都可以得到呢個成績,我突然有種自我認同的感覺,覺得自己電腦真係唔係太弱,可能之前係怕左電腦,唔願意去學習,原來自己只要花心機落去,都可做得到...

我開始明白之前蕃薯講過句話[我寫程式真係進步好多,由以前咩都唔識,到而家開始寫一半或以上的程式].其實我都係因為你,我先有勇氣去克服呢科,但你知道嗎? 而且仲可以感受我對你...但似乎都冇用,你跟本唔知,也唔知為一個自己釷鍾意我人努力,去克服自己的難處,有呢個推動力都唔錯!雖然佢未必支持你,但係呢種感覺可維持幾耐呢?自己始終都想有個男人係身邊支持自己..

放學後同蕃薯msn, 佢整左linux係佢部電腦度,d畫面都幾得意~

咩話!?可以把畫面放大!?放大黎做咩牙?

linux版的msn!?真係多麼的[漂亮]啊!

模仿mac機?我覺得個msn真係好核突囉=_="

其實我都好想屋企果部裝linux,但係自己又唔識, 都係等八月五之後先算吧!

見到稀客

今日放學如常msn,竟然比我見到eva又係網上,真係好耐冇見啦!對上一次係幾時見呢?真係唔記得左囉,我真係冇良心呢,對唔住啊><"

同你傾落計,先知道你係et走左之後到一間新公司做,但做得唔開心,所以又去左第二間度做. 點知第二間公司好多野做同埋好嚴,唔比人玩msn.唉~簡直同我間公司一樣啦,咩自由都冇,想休息一下, 難囉!我公司連午飯都要開工.其實咁先係正常既,邊個老闆願意請個人返黎唔係做野,而係玩msn?也因為辦公室文化,而且又冇人玩,都唔好意思玩,加上本身個職位又多野做,又要毎件事都要盡善盡美,咪令到毎人都有壓力.其實我成日都有個念頭,中六合彩唔使做, 係人都想,但我更想自己開間小型時裝店,可以賣衫,可以同人傾計及自己著返d衫外,最重要係唔使係辦公室內返工,我真係好怕呢種生活..

明明講eva麻,做咩又拉到咁遠!?之後同佢講開自己工作都好唔開心,公司d同事好壞一半啦, 好的係佢地願意教我, 唔好的係成日話我,雖然佢地一心想我好,但點講呢,我唔太like佢地的語氣,而且我一件衰野,佢地永遠都記得,仲要成日提住,整到我越來越唔想同佢地傾計,費時自己講多錯多; 而且公司太多野做,要求又嚴, 真係做得好辛苦,成日埋怨點解上手會計做錯野,又唔會話,但我連格式錯少少都唔得...我明白佢地係想我學好做野,但我受唔住呢種方式.咁耐冇見,要你聽埋呢d野,真係唔好意思,而且仲忘記左約下次見面時間=_="

仲左唔係好耐, 有點唔開心,因我換左新電腦的關係,我要問你拿多次blog個網址,又再唔好意思!佢都同我講好耐冇update過,果然真係...可能你最近真係好忙,又或者都放左工,唔想對住部電腦吧!期待你之後會update返佢,想知道你近況麻~

真正的關心, 努力java

呢日又要做功課, 仲要我我最弱的java, 我足足做左成日, 仲要係未做完果隻, 做到我幾乎發顛. 我都有問蕃薯點做, 佢似乎忙緊, 但都教左我少少, 我又費時麻煩佢, 所以都係自己做返, 做左好耐都係唔識... 正當我煩惱時(其實只係有一題的code明明正確, 但行唔到)蕃薯問我識唔識, 而且仲不停叫我send program個code比佢睇, 佢幫我睇下有咩錯, 甚至仲send佢自己份功課我睇, 但都係搵唔到錯處, 於是佢叫我熄左機再開, 點知....個code終於行到啦!

我份功課都已經完成, 真係好開心^^全靠你幫我做好同細心教我, 所以我話送返個kiss比佢, 佢竟然好開心. 我地係對傻瓜嗎?

呢份功課我知道自己根本完全唔明, 也唔想再成日麻煩人, 於是我用琴日係蕃薯屋企度, 用我自己部相機影左阿駿本java書d野黎溫, 真係幾有用啊, 可能係部相機清, 加上又可以放大, 全部字都睇得好清楚啊! 唔信大家睇下:

千萬唔好學我! 咁好似係犯法的....因我最近真係窮到書都冇錢買, 所以先咁樣. 其實係我自己唔捨得買, 好心自己買少幾件衫買呢本書吧=_="

希望呢次溫完書之後, 真係可以完全明白, 準備好星期三個test!!

開心, 突然, 心跳加速!?

今朝先同屋企人飲茶先, 又可以同姑姐一齊飲, 真開心! 不過呢次的主角都係一樣, 又係浩鏗, 即係阿b, 我終於記得佢個名囉~我呢個姑媽真係...=_="

浩鏗個沉思樣, 好老織呀~噢!

隔離枱仲有另一個bb, 同浩鏗差唔多大, 好少見到兩個bb一齊的情景, 而且都好難影相, 因為人地唔會就佢個bb比你影麻, 好辛苦先影到呢兩張相....

全家都好like玩自己同埋...人地個阿b!!??

人地個阿b哭啦, 浩鏗一於少理, 只係[木]埋個咀=_="

飲完茶之後, 先係交完學費及在屋企hea一陣...終於去蕃薯屋企做功課, 同行的有波特, 阿駿及阿聯. 後果兩個耐d先黎, 我同波特先去佢屋企. 呢次做的係我最唔擅長的java, 所以份功課我都冇份做, 等佢地做完, 自己真係冇用呢!我又再hea過, 周圍影下相:

又離奇多左兩條裙!? 唉~一定係同女仔影相啦, 又冇我份! 嗚嗚...

惟有自己對住塊鏡影相啦....佢地忙緊份功課, 冇理由叫佢地幫我影麻...

唔知點解佢屋企塊鏡照得人特別靚, 即使我唔靚, 照佢塊鏡都靚好多, 我玩左自拍都幾耐下囉...

阿駿新買部mac book, 真係好靚牙, 佢有個透明殼, 好似部大版的nds^^

做完功課之後去食飯, 途中蕃薯成日話我暴龍, 阿聯又有份話我, 唔制牙!! 激到我死左, 可能因為見我咁大反應先鍾意激我吧! 食飯仲要坐係佢隔離, 呢次真係冇運行...由出門口至到食飯都不停話我, 不...應該係食完飯都話我, 剛好食飯夾錢, 我又冇散銀, 佢就比哂d散銀我...

返到佢屋企, 同佢媽媽傾整野食, 傾得好開心, 蕃薯佢地成班男仔就傾電腦, 可能呢d叫做男女有別啦! 開心的時間終於過去, 蕃薯送我去坐車, 途中佢同我講見到我同佢媽媽傾得好開心?吓!?你唔係傾電腦架咩? 你又知? 仲叫我去佢屋企整野食!?

除左呢個驚喜外, 估唔到佢仲記得個camp, 而且仲落實左星期日入營, 星期一請假?吓!? 咁快plan定啦? 雖然都好想同你去(呀!? 我係度諗咩!?), 而且仲問我住豪華房定普通房, 仲要傾埋價錢? 睇黎呢次去camp的機會都幾大...由你話事啦! 我多數都會應承....最後臨走時, 佢話如果坐唔到車去佢屋企訓, 不過唔知點說服佢媽媽; 又叫我隔住佢件衫摸下佢下星期四做手術要割的瘤...整到我突然心跳得咁快, 嚇死我囉, 都係快d返屋企休息下吧!?

祝蔡蔡生日快樂!!

先祝我其中一位好友生日先, 蔡蔡, 生日快樂!!

同埋知你近日病左, 你要快d好返, 最近冇同你傾, 唔知你好返未呢? 得閒sms或者msn吧!仲有同kevin點牙? 係咪sweet呢? 都祝你白頭到老, 永遠都咁sweet及開心^^

過去呢年發生左好多事, 我地竟然吵架起黎, 起初以為連朋友都冇得做, 好在最後都雨過天青, 好似咩事都冇發生過咁, 大家仍然都係好朋友, 睇黎我地呢六年感情唔係假的!! 真係友誼永固啊! 可惜的係我地工作上各有各忙, 唔可以成日同對方傾計, 而且圠我又冇時間睇你個blog, 唔知你最近發生緊咩事, 直至你上星期六同我msn, 先略知一二. 而你又有睇我個blog, 有時仲留埋言, 我真係好開心^^應承你, 我八月得閒時, 我一定會睇返同留言, 唔好厭我太遲就好~

知你工作上唔太開心, 因工作壓力而令自己唔開心, 千萬唔好放棄, 要好好加油! 有咩唔開心就用offline msg同我傾下, 唔好自己收收埋埋, 第時有機會一定要搵地方傾下, 仲要預埋文迪, 佢都有問我你最近點樣, 你坐底都有你屋企人, kevin, 文同我關心你, 起碼有個依靠~雖然我都知道自己唔可扉呢=_="

你得閒就搵我地一齊出黎食下飯, 傾下計啦, 我隨時都ready好~仲有送呢個比你, 係fb度搵, 我見佢 幾得意就save左係自己部腦度~祝永遠開心快樂!! 你要好似隻公仔一樣咁佻皮! 應該話你原本已經係, 只係工作上令你唔開心吧!?

最重要的...!?

終於冇見佢四日, 心內突然諗起佢, 見唔到佢時好想見到佢, 但見到佢我又突然靜起黎, 冇咩同佢講, 只係一尾望住佢, 究竟我係咪鍾意佢呢? 我同自己講過, 佢已經傷害過自己一次, 拍左三個月拖就分手, 就傷足一個月, 唔可以再比佢傷多自己一次, 但自己而家都仲鍾意佢做咩牙? 再同佢一齊驚自己再受傷害, 我驚佢再同我講多次傷我心的說話, 我一定再受唔住......

近呢幾日佢多左主動係msn及sms hi我, 我一見到佢hi我, 同我傾計, 我就覺得好開心, 應該話傾完之後成個人都好有心機及開心, 為平時工作之中惟一令我開心的地方, 我覺得即使佢唔鍾意我, 自己有個內心支柱也唔壞.....但另一方面擔心的係, 佢係我心目中的地位越來越重, 第時想離開佢, 一定係傷心欲絕, 叫自己唔好太投入總係唔得, 即使有其他男仔同我傾計, 甚至話鍾意我, 我都冇咩感覺, 惟一希望的只係蕃薯佢鐘意我...

下午六點幾, 果陣我行緊街,蕃薯突然sms同我講話佢唔知點解佢肚痛, 令到我好擔心佢, 本來想打埋電話比佢, 但佢仲返緊工, 驚阻住佢, 所以最後只係立即回覆佢. 到左八點幾, 佢應該都放左工, 於是我再問佢有冇事, 佢都一直冇覆我, 而且果晚也冇係msn度online, 令我更擔心. 直接五點幾, 我見到佢都冇覆我, 我再send一次sms比佢....我開始覺得唔開心, 點解我咁緊張佢, 佢都完全唔理我, 我於是開始嬲起黎, 甚至話唔理佢, 連我都唔知點解會咁嬲?直至第二日, 佢都冇同我傾, 我總係放心唔落, 再一次sms比佢, 但我發覺自己冇開電話, 可能係琴晚太嬲熄左機吧!? 佢話朝早已經send左兩個短訊比我, 話佢琴晚幫公司買野買到成十二點幾, 返到屋企開msn, 發覺我已經off左!? 吓!? 原來佢有留意到我嗎?我真係唔知牙.....而且話自己做到散哂咁...如果我一早知你咁辛苦, 我一定唔會嬲你, 精神上仲會支持佢, 好彩的係冇向你發脾氣或話你, 你都係多點休息吧, 仲有....對唔住呢...

好掛住毎個好友...新鞋...

最近又要忙住功課, 一份份功課隔冇幾耐又要交一份, 整到成個人都要為功課而奔波. 工作上, 老闆娘過分的要求令我喘不過氣, 點解之前果d員工做野都好胡亂啦, 又唔見佢捉得佢地咁緊, 而我只係錯好少, 如全部文字的字形及大小唔係相同, 佢都已經話我. 不過唔緊要, 我知佢都係想訓練我, 想我跟好d野, 佢好有心機睇我做的所有野, 仲用黃色hi light我錯我地方, 成日都要麻煩佢, 我自己到底可唔可以幫到佢? 就算可以幫, 要幾時先可以幫呢?人生總係多考驗, 或者呢d就係人生其中可愛的地方呢!

至於朋友, 真係好耐都冇見, 連傾計都冇咩, blog又冇睇, 都唔知朋友發生咩事? 係時候要關心一下朋友啦(講到自己好似唔關心=_=")唔係啦, 只係我自己可能近排太累, 又或者只係訓得五個鐘, 所以一返到屋企成日訓, 有時甚至連係車上都訓得著....我只知道少少朋友的近況, 自己係時候update一下:

文迪: 今日先睇你個blog, 都隔左好耐冇睇到....最近你好似成日都因為佢而唔開心, 唔好成日胡思亂想啦, 你身邊有berry, darren, 阿光....好多人關心你, 咁都唔錯啦! 仲有我地的生日就黎到, 到時候一定要一齊慶祝下先得囉~

蔡蔡: 好耐冇同你傾, 對上一次已經係上星期六吧! 最近你做左份工, 只係做左一個月又轉份人工叔高的工, 希望你前程似錦! 惟一覺得唔開心的係, 唔可以同你慶祝到生日及送禮物比你. 唔知你會唔會去liz佢地個月會呢?

berry: 都係今日先睇你個blog, 冇update到, 唔係好知你近況. 不過唔緊要啦, 之後八月都可以傾返, 但係又少左見面

仲有好多fd包括liz, 酸梅, 竇妮, 嘉華, eva, veron, 蕉.....好多好多, 希望可以係八月可以見到佢地, 仲有唔知係咪大家都忙呢? 即使msn都少左見到大家, 如果見到同大家唔忙的話, 可以一齊傾下計, 起碼知道下近況, 我仲要問返你地拿返個blog, 我呢部新電腦咩都冇哂, 又或者你地可以係message度留或, 隨你地喜歡~

仲有今日幫同事阿珍買呢對鞋, 佢話我毎次買鞋都好靚, 而佢同老闆娘真係好勁架, 可以穿成三以上.... 所以要我幫佢買. 可惜佢like個款冇佢個size, 唔敢幫佢買其他款, 我又冇佢電話, 惟有聽日再問佢要咩...

犧牲下我隻醜樣的腳先~今次我又作死, 琴日見對涼鞋爛左, 買左呢對高跟鬆糕涼鞋, 成兩吋高, 今日返工都忍唔住換返對拖鞋, 拖鞋係公司提供....但個look真係好靚~

對鞋原本個look~我的影相技術太差吧!? 本來都幾靚, 係啡色鞋黎~

如果大家真係要買呢對鞋, 建議穿返公司的話真係要有多對拖鞋先得, 如果要行太多路的話千萬唔好穿, 唔係隻腳, 尤其係腳趾會痛到死! 但穿起上黎真係好靚, 而且日本都興, 至於香港就....可能唔係太多人可以穿得咁高, 所以冇咩人穿吧!如果穿的話, 我有個建議, 我覺得咁樣都幾好, 我成日都係咁樣返工: 先穿本年度興的深藍, 桃紅或黃色衫(只係衫好啦, 唔係會太花), 一條短牛仔褲或短裙, 加個藤藍, 穿埋呢對鞋就perfect啦! 又簡單而襯, 而且好似把所有興的野擺係身上, 即使唔係興, 個人都會顯得靚d^^大家不妨可以試下~