岸居居, 撞玻璃!

今日終於要測驗啦.....係我至弱的web tech, 我都係臨急抱佛腳型, 唔急唔溫, 結果咪.....一定溫唔哂囉!我約好文迪在葵芳地鐵站等, 本來我哋兩個可以一齊溫書. 點知自己又多事, 竟然叫埋fantasy一齊返學, 而佢又約左波特, 於是四人一齊返學. 但佢地兩個掛住傾相機, 嘈住我哋兩個溫, 我就溫唔入腦....

終於測驗, 大家都好緊張, 但有同學話冇溫書, 加上唔識解題目, 所以miss用中文解釋比佢哋聽, 而且仲容許同學用中文答問題.吓!? 這樣都得!? 我都係第一次見....而且同學仲可以傾計, 究竟係咪考試黎架? 我一於少理, 專心一致去測驗, 結果都...有點題目也認識答, 希望可以及格啦, 又或者唔好太低分已經可以!

測完驗後, berry送我及文迪手信, 佢去完美國返黎, 買左手信比我地, 佢知我鍾意阿jack, 就送左隻可愛版阿jack比我, 正啊~已經係第三隻阿jack^^

之後和同學仔去食飯, 途中見到body shop有好多淺purple的物品, 我掛住去睇, 想靠近佢哋, 點知[彭]一聲撞左去塊玻璃度, 而且仲勁大聲. 我個頭呀~~好鬼痛!! 當時同學見到都嚇呆左, 包括berry, fantasy及winnie, 文迪, 阿光及阿聯, 尤其係阿聯, 仲見到哂全個過程....至於文迪, 佢見到入面個sales都望住我.....結果大家大笑起黎, fantasy仲狂話我, 其他人都叫我小心玻璃, 好慘.....

直至食飯時間, 大家都仲話緊我, 叫有相機的同學小心塊filter, 又話叫人企在用purple物件企在玻璃門外引誘我過去, 又話見到我全個撞玻璃過程要睇心理醫生, 睇黎睇醫生果個係我囉! 眾目睽睽之下撞親....當中fantasy仲笑到話自己好似生得, 一直在度笑, 真係激氣呀~~唔係見你在大家各散東西時, send左個短訊比我, 同我講對唔住, 我一定會殺左你!! 但我見到你開心就已經足夠, 唔期望及想得太多了....

得閒無聊假期....

今日都係冇得出街, 又在屋企打機, 果隻係舊game. 但都玩左我好耐. 如果可以選擇, 我寧願同朋友出街, 傾下計好過......

之後我竟然打掃自己屋企!? 其實一直都係我媽做, 因為我媽佢在我細佬屋企度照顧佢個仔(弊! 比人知道我平時冇做家務添!!??), 結果屋企亂左都冇人理. 我爸及妹妹呢, 佢哋都唔鍾意及冇去做家務, 試問點可以冇人打掃? 最後咪惟有我去做!! 在打掃期間, fantasy又send短訊比我, 叫我上網比resume個樣本佢睇, 我比左自己果個佢, 咪即係佢睇到哂我全部資料!!??佢唔好比其他人睇到, 唔係佢實死硬!!

之後阿聯佢話執相簿, 佢見到有張相就send左比我....

阿駿比呢張我時, 本來我都覺得我哋都冇任何關係, 做咩比呢張相我? 不過都唔可以怪佢, 因佢都未知道我同佢已經唔再在一齊的事. 呢d相咪當做回憶囉~始終都係自己生活一部分, 唔可以抺殺麻. 我惟有樂觀去面對....

聽日終於返工及返學, 自己唔使再覺得悶! 但係.....聽日返學有個測驗, 我咩都未溫過. 真係死得! 希望聽日夠時間溫習....

有點失落.....開心消息!

今日見唔到佢, 於是我在下午send個短訊比佢, 但佢冇覆. 唔知點解, 個心成日囉囉攣, 而且好唔開心, 做起事都提唔起勁.....我點可以比一個唔鍾意我的男人影響到, 我真係失敗! 只係過返同以前一樣的單身生活, 冇咩大不了!!

直至我妹妹唔玩網上遊戲, 我終於可以用電腦. 我在msn度見到fantasy, 我hi左佢, 問佢係咪因我做錯咩事唔理我, 後來佢同我講話幫朋友影相, 而且仲send左相我睇 :


佢之前話想買個bob頭假髮, 我終於知道佢要做咩, 原來又係影相. 我本人唔太喜愛呢隻髮型, 而且本身個頭都好蝦人剪, 所以上年夏天個髮型師叫我剪, 我極力反對, 自己又唔係靚女! 都係留長髮再電捲仲好.....

仲有在英國個表姐在msn度hi我, 話比我知佢會在五月八日會同男友黎香港, 仲問要d咩野, 在英國度買比我, 太好了~其實佢上车先黎過次香港, 今次又再黎, 可能係掛住香港的親戚, 佢仲讚我媽媽好好人, 好掛住佢. 佢會返大陸見男友個親人.....加上佢話二表姐在英國生左個bb女, 比左相我睇~

好得意呀~~個bb女仲未改名. (好似我姪仔張相仲未post, 問下媽媽先, 個相機在佢度=_=")

同表姐傾下我的近況, 佢也見過我在visual art 的poster果幅作品, 佢都覺得幾靚, 叫我比心機去做. 多謝你鼓勵, 由我細個時比自己份玩具比我, 直至我大個, 你都關心我的未來, 對我非常之好, 好多謝你, 可惜的係我哋好少見面....

仲有文迪也有在msn度同我傾計, 終於知道佢和同學之間的交易, sorry, 講得唔好, 係網上買起朋友之遊戲, 估唔到我比佢哋多位同學炒起, 不知不覺已經成二萬幾元, 同fantasy個價差唔多, 文迪都好貴, 成八萬幾....其他同學都好貴.....不過個人冇咩興趣玩, 都係睇下就算....

落雨賞花日

琴日文迪打電話比我, 問我呢日去唔去花展, 而且仲話有六個人去, 包括fantasy, 我便答應佢去. 之後我打電話比fantasy, 佢之前話去影佢個朋友受洗, 佢點樣去啊? 佢話自己約左人六點, 而花展係十二點開始, 所以佢可以去. 後來佢話有電話入, 遲d打返電話比我, 我惟有等佢電話......到最後, 只收到佢sms問我去唔去, 我便答佢去, 傾左幾句, 我又訓左覺....

我都算準時去到約定地點銅鑼灣sogo集合, 去到sogo時fantasy已經打電話比我問我在邊度, 我加快腳步去搵佢哋, 費時自己遲太多. 去到集合地點, 見唔到文迪, 波特話佢遲d黎, 我都有點失望.....因我呢次黎花展都係文迪問我先黎. 見到fantasy, 我唔敢面對佢, 而且仲不其然緊張, 於是我只好一直聽歌, 令我個心感到舒服點. 途中佢哋只講相機, 我真係悶透了

終於去到花展, fantasy, 波特, 佢同事名及阿聯一齊拿起相機影相, 我仍然未感到開心, 可能係同佢發生好多唔愉快的事, 於是自己走到其他地方睇花, 唔知係巧合定故意, 我去不同地方睇花, 佢總會在我附近出現, 而且仲笑我[控]到好埋去睇花, 係咪想食左朵花=_="唔知佢係咪見我唔開心而引我笑呢? 算啦, 自己唔好想太多......

影相途中落雨, 大家走去避雨的地方, 等左好耐, 個天仍然落雨, 而且一直等文迪及winnie到來. 大家見悶便周圍影下人, 當然我同佢都係被影對象, 唔知幾時比阿聯影左張我同佢的合照....之後佢地兩個都黎左, 大家一齊去影相囉!!...sorry, 應該係大家影相就真, 我部相機壞左, 要企埋一邊睇佢哋影, 多謝fantasy, 文迪, 阿聯及波特提供的相片先~

我同佢太少合照啦....有時不驚意比人影下都唔錯^^

在避雨地方附近的三色堇, 真係幾靚呢~ (上: 阿聯, 中: fantasy, 下: 波特)

呢張一睇都知, 當然係阿聯幫我影啦, 好少有佢影相時認真個樣, 做得好啊, good job^^

話明係花卉展, 當然係以影花為主啦~再次多謝各位同學用心去影花, 大會實在太多花, 唔知影咩好, 雖然只係部分, 但已經好靚啦~

小菊花, 黃色都幾靚~好過拜山果d好多....(上: 阿聯; 下:波特)

呢兩隻唔知係咩花黎呢? 加上雨水在花上, 真係好靚呀~ (上:fantasy, 下:波特)

紅色的太陽花, 估唔到都幾靚~(by 波特)

靚到好似假的鬱金香. 我哋起初以為係假, 點知見到有蜜蜂飛過, 先知係真架~! (by :文迪)

除左花之外, 今年也係北京奧運, 花展點可少得果五隻奧運吉祥物. 唔知係咪大陸設計唔係太合我地香港人品味, 我覺得除左隻panda晶晶之外, 其他都好鬼核突....

晶晶實在太得意啦~我, 文迪及winnie都去佢附近影相^^


其他角色呢~我都唔記得佢個名, 雖然佢係purple, 但個樣就.....我覺得唔得意囉(純粹個人意見, 若得罪佢fans就唔好介意..)

當中仲有好多有奧運特色的物品, 包括五彩環.....所以我覺得成個花展都好有朝氣, 而且多數都好靚, 可惜個天成日落雨, 都冇機會影太多, 只係影左部分比大家睇啦~

本來想影團體照, 但真係太大雨, 我哋只好快快離去. fantasy見我仲在遮雨地方就等埋我, 佢邊行邊唱歌添, 都係佢至愛果幾首情歌, 可惜我哋唔係二人一把遮, 唔係一定好浪漫. 但我已經好開心~之後我哋去左hmv度避雨及試聽歌曲, 文迪及波特都各自買左cd, 跟住去食飯, 大家仍然有講有笑, 而且fantasy比以前話得我仲勁, 成日激到我打佢!!

食完野之後, 各同學陪文迪去睇鋼琴, fantasy就要去幫人影受洗, 在旺角搵返朋友;至於我呢, 我對音樂真係冇興趣, 一早返去打機算數. 結果我同fantasy一齊坐地鐵走

半夜三更傾心事

唔知點降呢二日我在十一點幾已經訓左, 可能係因我同fantasy已經唔再係一對, 不用毎晚等佢sms的緣故, 定係其他原因呢? 不過這已經同我無關, 應該話愛情已經同我無關, 我只享受同佢之後在功課上合作愉快, 及只顧我的設計及我身邊的好友及親人.

差唔多在同一時間, 一個寂靜的晚上, 你又再sms比我, 問我訓左未, 既然我哋已經毫無關係, 仲以8可擺脫你, 你仲搵我做咩? 我又開始懷疑, 點解你而家先搵我, 你話自己電話舊電壞左, 自己要去買過, 但我總不相信及一直質疑你, 你終於嬲啦, 話搵我又這樣講野(因我對佢的語氣都幾差下)....都唔知你想點, 真係好難同我相處..... 我又令佢傷心啦, 我同佢講對唔住, 而且仲問佢係咪有心事講我知, 我同佢講, 一個男人無論在他人面前幾強都好, 始終都想搵個人傾下內心感受, 佢突然講左一句[五分鐘之後我打電話比你好嗎?] 我支支吾吾應承左佢.

估唔到佢真係打電話黎, 已經兩點幾, 我即刻走入房傾電話. 佢同我講左好多以前的感情事, 毎次經歷都不如意, 當中有兩次認真, 其中一次就係佢相簿內的miyako, 而且也係我一直想知的事, 佢都好老實答我: 原來佢哋住得好近, 毎日都見面, 但一見面佢哋就吵架, fantasy佢多數忌讓佢, 但miyaho隔左冇耐, 又會搵返前吵架件事黎講, 其實佢一直都唔開心, 但因雙方捨不得而冇法分手......仲有佢過往複雜的情史, 而所有經歷令佢對愛情冇信心, 唔想再真心愛一個人, 不過我相信你一定可搵到個女仔可令你改變呢個想法, 想同佢結婚的女仔^^

之後我哋傾到佢理想中的女仔, 睇黎我都未必付合佢, 最低限度, 我唔識去影相, 對影相冇興趣, 而且我也唔係靚女.....上次和同學去食dessert見到個女仔, 對攝影有興趣, 我竟然叫佢去馬, 佢話極其量都只可做普通朋友; 佢在電話內有個女仔, fantasy話佢思想同佢相近, 個女仔好似都對佢有意思, 但佢有男友, fantasy都話唔想同佢有咩感情瓜葛....你到底想點架, 難道你一世都唔拍拖咩? 你身邊總有機會, 但我一個機會都冇, 好好珍惜吧!

傾下傾下, 我望一望個鐘. 唔係掛!!??我哋竟然傾到成四點!!咪玩啦, 點會這樣架? 但我哋都照傾, 傾到成四點半先訓. 我點會同男仔傾這麼耐電話架!?而且仲要係深夜.... 自己做咩事呀?可能自己真係鍾意佢吧! 佢鍾唔鍾意我都唔緊要, 見到自己鍾意依賴自己已經好開心~

p.s. 如果大家認識fantasy, 請求你哋千萬唔好把今日呢篇內容講出, 因我應承過佢唔可以打在blog上.....一切只係我想紀錄同佢傾的事....

違忘了的夢想

其實我點解要讀呢個課程呢? 就係因為我想擺脫會計, 唔想未來都做呢行, 所以先至想轉行. 而設計係我一直想做的行業, 至於係邊類型設計, 我比較鍾意遊戲及廣告設計, 尤其係前者, 更係我多年黎的夢想...

返學之後, 令我見到身邊有多同學, 逐漸令我笑顏大開, 知道自己原來仲有感情, 不但只識傷心, 仲變回以前的自己, 變得好愛笑, 睇野開始樂觀, 不再係自己一個. 而且仲比我預見了佢, 我生命中覺得一個重要的男人, 我開始把全副心機放在佢身上, 只顧住拍拖, 已經忘記了之前的夢想.

幾個月後, 佢話仍然鍾意我, 但覺得我哋未適合做情侶住, 傷透我心, 覺得自己一直做的事係白費. 而且仲係我的初戀, 點解會落得如此下場, 好不金心, 我唔想再見到你. 於是決定離去, 你極力挽留我, 話我好重要. 但對我黎講, 已經毫無意義, 我的離去對你應該影響不大吧? 你最多只係失去其中一個朋友而已.

呢個晚上, 我又失眠, 又在被窩內哭泣......唔知道幾晚點解會這樣, 我半夜醒來, 聽住歌想住自己個flash mv的idea, 突然收到你的sms, 問我訓左覺未, 我同佢傾左幾句, 佢可能已經訓左, 冇再覆我短訊....我一直想住mv, 即使呢晚一點idea都想唔到, 但我沉醉當中, 覺得好開心, 可以忘記同佢發生之事, 我終於記返起自己的夢想, 對我黎講, 設計先係我的生命....估唔到令我忘記情傷的不是任何人, 就係你-設計, 我終於清醒, 同埋多謝身邊一直支持我的好友, 佢哋見我呢兩日唔開心, 不停在msn度安慰我^^

混亂...對唔住....

今日見到佢上網, 見佢冇hi我, 於是我就用冷酷的語氣問佢, 叫佢搵日做project, 你可叫埋波特黎. 傾完之後我就走. 佢同我講, 叫我唔好咩都打哂出黎, 令佢比同學講, 有同學叫佢對我好d, 仲講左成十幾次, 令佢好大壓力, 叫我用大人的方法處理呢d事. 我也話佢你唔鍾意我又唔一早同我講, 令我哋兩個陷入彊局....終於感受到二人(我唔敢講係情侶)吵架, 原來係好恐怖的....

在電話度, 我知道自己唔夠成熟, 處理事情唔夠好, 於是我在電話上同你講對唔住.....以下又係我哋對話, 自己唔知點講好...

k: 對唔住牙, 都係自己唔夠成熟而傷害左你, 令你比人話及唔開心, 對唔住!
f: 其實我只係唔想你同我講毎句說話都好似方死我以為你有咩目的....好似今朝這樣....你唔使講明只傾project
k: 總之除左對唔住之外, 我都唔知同你講咩好....
f: 你唔洗講對唔住架...都唔係你錯哂....
k: 但我的確...連我都唔知自己想點....
f: 其實我好想一直對你好....但我想好似當初自自然然就好了:-)
(我自己都忘記左我當初係點樣啦.....)
k: 總之都係我一直令你唔開心, 對唔住
f: 唉...其實我知最大問題係我最近同你相處感覺到好大壓力
k: 點解你會這樣覺得? 原來你承受左好多壓力架...多謝你同我講出黎
f: 所以都係個句...好多人知唔係好事....感情係兩個人的事架ma
(感情!? 你唔係叫我搵過第二個好男友嗎? 甚麼又講我哋二人之事....我哋之間仲有呢樣野嗎?)
k: 既然如此, 只要我離開便可以(自己又去避....)
f: 唔得...你走左我咪見唔到你
k: 點解你想我唔走?
k: 而且你知感情二個字的意思嗎? 唔可以亂用...
f: 我認我經歷好多次感情之後好難好快代入感情....但我真係有嘗試過的...但唔知點解好多野我失敗
k: 原來如此, 我知你曾投入過我哋感情內, 其實你冇錯架, 唔好怪自己. 都係我錯, 自己唔識處理感情事. 同埋在msn呢, 你用左鍾意二個字, 係唔可以亂用架...
f: 我唔係唔鍾意...只係...我要一個自然既空間等佢成長
k: 唔明係咩意思?
f: 我都話我想一直對我好
f: 有一件我想講你知...但你可以答應我聽完就算....唔可以同任何人講嗎?
(由於呢個係秘密, 我唔想大家唔開心, 我哋兩個心內知道算, 其餘的我唔想講太多)

k: 你哋都係我重要的人, 我唔想你哋唔開心^^
f: 多謝你....你都好重要架....唔好走...(指我唔讀果件事嗎....?)
k: 什麼?
f: 我意思係你對我都好重要架
k: 點解覺得我係重要? 我自己係有原因
f: 有事d野冇原因架
k: 我係有原因架, 就係你係我鍾意的人....
f: 自然d啦:-D放鬆
k: 知道啦, 總之我會自然及站在你角度想, 唔會令你唔開心及有壓力
f: 乖
k: 雖然同你唔知咩關係, 總之對你好d便是
f: 這樣你要乖d啦:-)
k: 講到我好似細佬添....好耐未試過有呢種感覺. 我應該叫你做咩?
f: 你鍾意:-D
k: 就叫爸爸啦, 記得買kinder 出奇蛋比我囉, 哈哈~
f: 好呀
k: 我明白啦, 你指的鍾意係指朋友的鍾意嗎?
f: 唔止架 :-D

講到呢度, 其實我都有好多野唔明白, 例如係我哋的關係, 自己對愛情的定義....總之一涉及愛情, 我個心就亂, 究竟你對我係友情定愛情? 於是我走去問文迪, 又麻煩你啦!

文迪見到我哋的對話內容, 佢話我哋大家開始了解對方. 至於我哋的關係, 我哋講左好多, 文迪話我哋之前拍拖已經係事實, 佢而家唔係唔鍾意我, 只鍾意呢, 係指親密朋友果隻, 由於之前做情侶時已經有左默契, 所以做起朋友黎, 會可接受對方缺點, 唔排除有發展的可能. 總之類似意思啦. 多謝你, 文迪, 我比以前更了解^^ 睇黎我同佢真係要努力維繫, 不過講真, 我真係想做佢女友, 但都係冇可能, 都係順其自然算吧啦!