圍住成績在度轉...無盡的驚喜^^

唔知之前係咪同文迪傾得計, 在佢身上學習關於愛情的事唔少, 同時我也唔想蕃薯唔開心, 於是我改變對佢的方法, 我唔會再迫佢同我要見面, 想佢在復活節果幾日去影相, 因佢影相個樣好開心, 而且平時要返學, 冇咩機會影相, 所以叫佢珍惜呢幾日. 可能如文迪所講, 未必成日要同個男友一齊, 只要見到佢開心, 自己就開心, 不過佢仲以為我要影相, 其實只係希望你開心, 傻瓜! 我這樣做唔知自己係對定錯....

之後佢同我講有間公司知佢想搵工而同佢傾下, 而家仲商討緊返學時間. 放左工之後佢即刻打電話比我, 同我詳細講今日有人見佢呢件事. 呢間公司的人工也幾好, 都過12k架, 不過實際數字就唔講啦! 希望最後會請佢啦. 其實想見佢間公司, 個老闆係認識蕃薯, 間公司主要係做game及賣遊戲機, 而且返工時間同佢呢間差唔多, 所以先要商討返學時間之麻. 不過最邪的係間公司在佢而家間公司斜對面, 唔知新果間公司請佢, 返工唔知會點樣呢? 佢叫我唔好把呢件事講比人知知住, 就連波特及阿銘都未知, 因仲未落實, 而且佢哋兩名先生又搵緊工, 費時煩佢哋. 那麼即係....我係第一個知道嗎? 難道我在你心目中的位置也好重要嗎? 同埋多謝你願意相信我, 好開心^^

好啦, 講下第二樣先~就係我終於知道自己成績等級, 設計及攝影都只有六十幾分, 英文都未過六十, 我的英文真係差左好多....不過數學就竟然七十分!? 我呢個數學白痴都拿到呢個分數!!唔係掛!? 我平時測驗都只係四十幾, 點解會這樣高分架? 世事真離奇....我今日偷開msn, 見到文迪, berry, 阿光,以及返到屋企同蕃薯, tracy, 阿駿及波特圍住成績呢個話題轉, 大家成績似乎都唔錯, 總之如波特所講, 至緊要大家合格就得, 我就加多一句, 大家唔使再比錢及時間再讀, 一齊升班及畢業就好^^

我姑姐都帶黎一個好消息, 就係佢一直驚緊的會計科合格, 實在太好啦! 佢呢個course係交澳元, 佢合格左就得啦, 估唔到佢合格比我自己的成績仲開心, 戥人開心果種感覺原來好好~之後佢同我講, 我幫佢在新年做的audit report都可以拿到72分, 太好啦^^我一直都驚自己會害到你唔及格, 但最後可以幫你拿高分, 太好了~不過你叫我比心機, 寫下一篇report就....我唔知講咩好, 開心和唔開心之間...

今日姑姐個好友lydia上黎公司, 佢在麻麻個葬禮度出現過, 佢仲叫我努力讀書, 好耐冇見過lydia啦! 佢仲買左puff上黎食, 當我話唔食栗子好cheap時, 佢話我真係好cheap, 貴野都唔食~不過冇所謂啦, 我就係cheap cheap 的, 冇咩所謂, 我反而欣賞佢直腸直肚! 我最後食左兩個, 勁好味, 星期日見到文迪及蔡蔡時, 買比佢哋食先, 分別係:

奶油味puff~呢個係最好食^^

奶黃味puff~呢個都幾好味, 不過我發覺咬左啖影相出黎靚d! 其實係自己咬左啖先至記得影相, 真係失敗...

蕃薯西裝look

今日一返工, 姑姐比左一盒choco我睇, 係佢最好朋友civil 幫佢買, 事由civil去左維也納旅行, 返到香港之後比左盒野姑姐, 話係咩音樂家, 總之好出名......之後姑姐比左盒野我睇, 原來係莫澤特, 唔怪之得毎人去完維也納啦都會買呢盒野返黎, 都幾靚架, 而家比大家睇下先~

因我媽媽而家開始返去我弟屋企, 照顧弟婦啦~希望我弟婦可生個肥肥白白的bb, 第時我真係比人叫做姑媽, 唔係, 應該係aunt, 唔好叫我姑媽, 叫到老哂! 我媽媽佢冇煮飯 所以我今日冇飯帶, 變左同姑姐出去食飯, 有時出去食一餐半餐都唔錯^^

我叫的豬頸肉蛋包飯~但蛋唔係包哂全部, 只係包左個飯面, 但個飯連飲品都只係25元, 味道都仲算唔錯的~

今日又上web tech的lecture, miss要我地交做website的組員名單(即係把名寫在miss預先整定的白紙上), 我同蕃薯一早已經講好左一組, 所以寫左我哋個名先~至於個題目名, 都係由蕃薯佢自己填返! 大約八點幾, 蕃薯終於返學. 哇!? 我哋全場人大叫, 佢....佢今日著左西裝返學, 我覺得佢好型, 唔係, 係好少有. 我叫佢先填左我哋website個題目先! 之後佢話因要見客先會穿西裝, 而且仲問我好唔好睇, 我咪話都幾好睇, 冇所謂啦! 結果又比同學聽到, 就話新郎哥穿咩都唔緊要, 而且仲叫我哋一齊影相....我當時都怕羞起黎, 大大步離開現場為妙!

好辛苦先問到阿聯拿一張佢著西裝的相, 其實佢唔比人影架, 係阿聯用手機影. if 可以影哂佢全身仲好添!

當中同學不停話我, 我自己個人又比較激動, 而且又怕羞, 於是我用支鉛筆作狀拮佢哋. 同學仔見我唔夠膽拮佢哋就開玩笑笑我, 於是蕃薯竟然....幫我拮佢哋!? 估唔到蕃薯都係個狠角色, 其實係唔關佢事, 但佢竟然....比拮大的波特都話做咩拮佢呀? 睇黎蕃薯應該想保護我吧....

放左學之後, 我sms問蕃薯可否在四月頭同我買電腦. 其實我想買好耐, 因在屋企輪住用真係好麻煩, 成日要等我屋企人用完, 自己先可做功課, 打blog及msn. 我哋返屋企途中傾緊買咩電腦, 最後商討左買部大約五千元電腦, 我都只係靠bonus, 希望真係有啦! 因我公司bonus有成個月糧.....而且佢仲話自己原來都好鍾意著西裝, 不過卻話自己好似賣樓果d....你都傻架, 你好型仔, 這樣話自己, 我都費時理你, 一早訓覺吧!

p.s. berry病左好耐, 睇左四次醫生, 都仲未好返, 佢睇醫生真係睇到佢窮, 真係可憐! 希望佢可以在去美國探男友之前好返! 仲有tracy都係, 佢最近都病左, 琴日仲因發燒冇返學, 佢今日終於返學, 佢話自己發燒, 我摸摸佢額頭, 應該冇燒啦, 唔好擔心! 也係呢句, 希望你哋兩個快d好返^^

保護及被保護

以前我覺得只要自己盡左力, 即使件東西, 或者叫一個task, 自己都可以完成, 完全唔使靠外人. 呢個性格都唔知好唔好. 但自從上左呢個課程之後, 開始明白到唔係所有事物都可一個人完成, 當中要靠朋友, 甚至係情人幫手, 呢次也唔例外....

我明知自己寫程式方面比較弱, 於是我加倍精神, 上堂留心聽講miss的講解, 努力記住其他人的教導, 自己都算叫做識, 本來以為可以唔使靠人, 點知到最後都要蕃薯幫手. 因我有部分都係唔認識, 佢便幫我睇下自己有冇寫錯, 明明係冇寫錯, 點解又出唔到白版上miss要求我哋做的圖案? 最後蕃薯佢把自己的程式比左我, 我只係改左個名, 佢仲幫我改埋內裡的內容, 以免同佢一樣...我又要再要人保護...佢就一直保護住我, 其實我自己唔係想被人保護, 而係去保護人, 但到頭來點解要相反架?我好恨自己, 點解連呢d小事也做唔好?

我問佢, 如果你一直這樣幫我, 我咪一直唔認識囉? 佢話唔緊要, 因可用dreamwaver去寫. 我突然想起佢之前講有佢在度, 我唔使怕呢句話, 難道我成世都係這樣, 要佢幫我寫嗎? 我自己都係想得太多, 有時候做個小女人, 比男人保護其實唔錯, 男的可展示自己實力, 女的又可以唔使做, 等佢黎保護. 如果真係這樣的話, 呢個世界上d女人咪懶鬼哂?

自己真的開心嗎?

呢二日仲為蕃薯在星期五的說話而心傷, 唔知佢係咪驚我唔開心呢? 成日同我用sms傾計, 而且仲好似對我好左少少, 但換來的係我唔可以再對佢表示親熱. 其實我都唔明白, 情侶只係表示自己情感, 也都唔可以嗎? 我哋好少只有我哋二人見面, 點解連呢一伯短暫時刻親熱都唔允許? 我覺得我哋越來越唔似情人.....

佢突然一個sms, 問我係咪交web tech的website功課草犒, 連我自己都未聽講過, 自己都話要去問人, 佢就講左句[哈哈....但你放心, 有我係度]. 哇哈~咩你突然這樣肉麻架!? 真係有d驚嚇, 不過呢句已經有sweet啦><"但我都仲有點唔放心, 話驚自己同你一組幫唔上忙, 於是你就打電話黎同我講, 叫我唔使擔心, 而且仲一齊商討做website的過程及工種, 同你傾計好開心, 希望再有機會同你合作. 總之呢次你就負責寫程式, 我就負責美術及英文部分, 毎人擅長不同技能真係好^^

呢晚你同媽媽去左食飯, 返黎就話比我知剪左頭髮, 仲在msn度上網比你個新look我睇添, 等我睇過~

其實我冇經佢同意擅自擺左佢張相在度添! 比佢知道實嬲死佢....呢次我冇主動問佢拿相, 係佢自己比我架, 真係好開心^^

我就覺得佢個髮型似乎短左少少, 覺得佢長髮比較好睇, 但佢竟然話長髮難打理, 而且比風吹吹就散, 費時打理便剪呢個頭啊, 你真係懶呀=_="不過不嬲知你係, 而且仲不停問我呢個頭好唔好睇, 係啦, 好睇啦! 讚完佢之後佢都開心起黎, 真係....

之後佢仲比左星期六的作品比我睇, 我真係好鍾意你個作品架, 唔係因為係你整, 而係我欣賞整體的設計, 尤其係四方形果部分最吸引我, 又靚又易於收埋~如果我都整到好似你個作品一樣靚就好....可惜整呢d係我弱項....

睇黎我哋關係似乎又好左少少, 希望之後都係啦! 而且也希望我可以有文迪呢個思想: 不停為心愛的人付出, 即使那個男人唔愛自己, 但只要你見到佢幸福及開心, 自己也會好開心....即使見到佢未必同自己最後在埋一齊, 也願意去愛佢及陪伴佢!

提唔起勁的美術堂!?

我為左交份素描功課, 我由早上十點幾開始畫, 畫到成兩點先至畫完, 真係死得!!我妹又去左見工, 惟有我親力親為自己完成幅畫佢. 估唔到我妹畫素描真係好得, 我就真係畫我麻麻地, 但即管比大家睇下自己的劣作...
真係唔知自己畫左d咩出黎!? 不過個外型似就算啦, 哈哈~(唔記得左用字體mode去影, 好核突)

之後即刻走去返學, 我一返到學校, 已經唔敢再同佢坐及同佢講野, 我唔想佢唔鐘意我, 令佢唔開心, 於是我都係同文迪坐, 唔知點解我同文迪坐會有安全感一點. 跟住蕃薯就同我講, 問我知唔知呢堂做咩, 佢就一直同我講要做咩, 原來今日係做一個用瓦通紙做一個固定圖案, 之後只可用呢個圖案黎做一個雕塑品. 我唔太擅長做呢d勞作, 只係快快完成交左就算數...

其實我真係唔知咩黎, 因阿sir要求唔可比人知係咩黎麻, 總之是但啦! 交左先算

放左學之後, 我, 波特及阿銘要傾英文功課而去蕃薯屋企, 所以一行人便坐巴士出發. 途中我食左一件格仔餅及一個炸羅白, 好耐冇食過, 好好味~!!在車上蕃薯同佢地二個講相機, 影相技巧, 我都太累而訓左覺, 落車時蕃薯先叫醒我, 可能係藥力太勁而成日令我想訓覺吧!

去到佢屋企樓下, 大家先至去附近茶餐廳買飯, 總之我就唔食太多....去到蕃薯屋企, 大家開餐囉! 蕃薯媽見帶住口罩, 問我係咪病; 見我食好少, 又問我係咪因病而冇胃口, 真係多謝佢關心^^食飯時, 我見到佢屋企掛住左兩件衫, 我又好奇影底左:

紅色果件好細佬女...可能又係佢model女仔朋友影相掛!?不過點都唔關我事, 我都冇份穿...

大家食完飯之後, 大家都冇咩頭緒做英文功課, 於是大家先打下機先, 果三個男仔在電腦玩孖寶賽車先, 我都係玩孖寶賽車, 不過係nds版, 呢日我冇帶機, 好在阿銘借佢部比我玩....玩到大家終於有頭緒, 開始又再做功課囉! 我哋討論好問卷題目, 用中文寫底後, 再交比我譯返做英文, 之後再交比蕃薯打字, 最後終於完成, 仲用我呢個哎呀隊長的名義email左比阿sir, 應該冇問題吧!?

做完功課後, 大家又各自返屋企. 本來今晚太遲走, 要捱貴小巴, 但我又唔想, 於是同蕃薯睇下有冇機會坐巴士返屋企, 最後搵到架53號巴士, 但咪....咪住先, 經蕃薯計算, 最後一架係11:45, 即係11:15在元朗開出, 可能在而家呢段時間可以坐吧, 於是佢就打住機同我一齊等. 當中佢只係打機, 我望住佢玩, 期間都冇任何親密動作....皇天不負有心人, 最後終於等到, 我睇睇手提電話個時間, 係11:45到達!!!我開心到即刻上車, 我以為佢已經走左, 原來佢默默望住我上車, 我上到車, 大家先講再見...

是喜還是悲? 蕃薯之真心話...仲有終於有新工!!

今日忙住整鹿仔功課, 由於都未整得切, 今日又要交, 所以我用病假為理由而請左一假, 努力完成我的鹿仔! 但我預到最大問題, 就係不知道如何上色, 好在都有好多朋友教我: 分別有berry佢在msn的悉心教導, 佢仔細講解我注意的事項; 仲有就係好少上網的tracy, 佢在msn度都教左我好多, 後來我比左個鹿仔佢睇, 佢指出我錯處, 話我d線勾得唔靚, 所以油唔到顏色呢個毛病. tracy, 雖然我差唔多要再整過, 但好多謝你關心及指導~~不過最多謝呢, 一定係蕃薯啦, 因為佢比左自己張畫, 叫我改layer名及顏色就可以, 我最後因太忙碌, 所以用左佢張畫, 自己再上色^^

就係呢隻傻鹿啦!!整左我好耐!!(雖然個公仔係蕃薯勾).....我用的淺粉加黑漸變

最難勾的係呢四隻腳, 又要勾啼, 仲要逐隻慢慢勾, 真係少d心機都唔得~~!!

終於完成鹿仔, 我突然收到一個電話, 原來係星期二請病假去到長沙灣廣場見工果份, 佢竟然請左我!!!!原來文迪講的係真, 佢話間公司見工見左成個鐘, 多數會請我, 點知原來係真的~我當時開心到飛起!!!估唔到好快有公司已經請左我, 我即刻在msn度打句msg, 話比所有好友知呢個消息, 佢哋好多人都恭喜我, 一見到呢句說話分分hi我, 排名不分先後, 分別有eva, veron, edwin, 蔡蔡, 文迪及靜靜....總之多謝你哋, 尤其係veron, 佢都搵到新工, 可脫離佢而家呢間福利及人工勁差的公司, 恭喜哂! 仲有預祝eva 見工順利!

呢份工對我黎講係非常重要, 因呢份係我第一份唔使靠我姑姐幫忙, 由搵工到見工, 而家請左我, 全部都由我一手包辦, 佢完全冇插手. 原本間公司話呢個星期打電話通知我, 見佢二日都冇打黎, 以為自己冇希望, 點知佢就打黎啦, 所以果種開心程度好難形容! 而且人工也比我而家呢份多左, 毎個月都有多千零二千元用, 好開心呢~最後決定左四月一日返工, 剛好係愚人節返工, 哈哈, 希望我唔會比人玩啦, 我也要開始打定辭職信!

收到好消息的同時, 蕃薯突然在msn度同我講左以下呢番說話, 我估都係原汁原味比返大家睇下先會比較好d:

蕃薯: [其實...kumi...係o的同學面前唔好做得太出面, 我唔太鐘意...]

我: [你指我地之間的表現嗎?]

蕃薯: [係]

我: [sorry, 我以後唔會la, 同埋份功課我會自己做](其實我當時仲未完全做好功課)

蕃薯: [幫你功課唔係問題...就算普通同學仔都會幫. 但....最近我感覺到好唔自然...同埋唔知點同你相處, 可能....我根本係怕拍拖.., 好似以前咁我可能會對你仲好..仲自然吧..]

聽到呢度, 我個心像撕裂一樣, 話咩我做得太出面, 又話佢自己怕拍拖!? 這樣我哋呢二個幾月到底係咩? 唔怪之得你成日對我冷冷淡淡, 成日唔同我去街, 即使同人影相都唔同我, 其實我都好寂寞, 我都想男友氹自己開心, 製造浪漫比我架! 可惜你從未為我這樣做.....雖然你好細心及對我好, 難道你對毎個朋友也係這樣嗎? 我到底在你心目中算係咩呢? 點解我的初戀係如此痛苦??我開始哭起黎, 覺得好心痛, 最後我都話自己知我都有錯, 一直冇理佢感受, 只掛住追求自己所謂覺得的浪漫......最後佢話同我電話聯絡, 但傾的只係我搵到新工及我做完鹿仔呢份功課的傷心事... 同埋佢一直同我sms, 問我鹿仔做成點, 那時, 我個心已經完全冇哂感覺....

跟住我去左長沙灣, 也即係我以前屋企附近睇醫生, 但佢成四點先開, 我兩點幾就到左, 我去以前最喜歡的米線店舖食至愛的酸菜鮮菇米線, 好鬼大碗, 不過我全日冇食野, 應該食得哂吧! 終於可以影左佢出黎, 不過比以前貴左三元, 但一樣好食!!

食完米線之後, 見仲有時間, 我到周圍行下, 見到好多物件都已經唔同哂, 發覺人及事不停在變呢個道理, 而且周圍行行, 又聽住歌, 個心已經平伏左少少, 呢個復活假真係好想出外行下, 想忘記同佢唔開心的事.....即使係一個短線旅行, 已經心滿意足, 總之係關於愛情的事通通忘掉, 最好以後都唔好再去想, 我想得到解放....

等左好耐, 終於可以睇醫生, 又係那食極都唔好, 又苦的感冒藥....不過都唔及內心的苦, 之後坐地鐵返我爸公司. 在地鐵途中, 我竟然流淚起黎, 平時我都唔會, 真係好鬼核突! 返到我爸公司, 終於有機會比我大哭起黎, 哭左差唔多成個鐘, 原來我發覺自己真係好愛蕃薯, 從未哭過的我而家哭到眼都腫埋就去返學

返到學校, 我即刻同文迪坐, 同tracy講開我新工之事, tracy竟然話在長沙灣廣場返工好, 因有時裝批發中心, 放左工我可以去行下? 跟住我就答真係好咩!? 我都希望有時間行啦, 之後大家大笑起黎, 而且我仲買左小食比全班同學食, 本來大家都好開心, 點知蕃薯返黎後, 佢同我講的那番說話再湧現在我腦海度, 我唔知點樣面對佢, 佢又突然坐在我隔離, 我只係冷冷同佢講做咩唔坐在阿銘佢地隔離, 佢堅持要坐在我身旁, 而且仲買左我之前至愛食的糙米芝士包, 我話唔食, 因我真係好耐食飯, 佢以為我嬲佢, 仲話之前我可以成條包食哂, 叫我食d, 估唔到佢仲記得我喜愛食的包及一切!? 我終於食左佢二塊包.....同埋多謝佢教我上堂用的軟件, 我那時真係好感動, 可能佢知佢今朝果番說話, 驚我嬲左佢及令我唔開心而安慰我吧? 如果我又再次同佢談戀愛, 我又驚佢遲早有一日又好似今朝這樣, 而且佢根本唔like拍拖, 我驚自己又好再痛苦多一次.....

後來放左學之後, 我在sms度多謝佢今朝同我講真心話, 因我始終第一次聽佢講出自己心底內的說話, 佢也覆返我佢想簡單開心相處, 同埋話唔知點解一聽到拍拖兩個字就好似唔知點, 反而自然相處就想對我好d]. 其實你一直已經對我好好, 只係我自己唔知足.....而且自己已經對戀愛有點害怕, 暫時唔想再去面對呢樣野, 都係交比時間去證明一切吧!

盡責的隊長!?

又要上英文堂, 我星期二睇醫生的藥物一早已經食完, 在公司度咳個半死, 而且仲唔知點解二邊博頭都痛...好唔想返學, 但都冇辦法, 咪因我哋份英文功課囉, 今日要為我哋做survey果份問卷題目做個介紹囉!!原本要為全組寫篇講犒, 但我今日同我姑姐及妹妹出街食飯, 所以冇寫到, 原本想早半個鐘走, 公司又太多野做, 所以最後都係拿拿聲趕去學校幫其他組員.

返學後, 見到組員波特及阿銘都冇咩動靜, 原來都仲未開始present, 而波特也好流暢講一次survey目的及內容, 我再用筆去記底, 後來蕃薯黎到(我哋又唔係一齊返學), 佢哋三個負責討論, 我在旁聽住, 而且分配好工作, 由三位男士去present, 而我因唔舒服的關係做住文書先~希望呢d資料可幫助我哋設計問卷. 我做完書記後, 因咳得太辛苦而訓左....

在休息途中, 蕃薯突然話想轉工, 覺得佢而家在呢間公司度比唔到足夠人工比佢, 但佢一直覺得自己有份創業, 係老闆朋友及只有佢一個識得用由佢自己設計的電腦程式, 所以一直唔願意走.....各同學都叫佢搵另一份人工高的工, 但蕃薯佢學歷唔太高, 又難在出面搵工, 不過佢覺得有經驗應該問題唔大, 我都有同佢傾過呢個問題, 我覺得佢放工時間太夜, 冇機會進修, 即使有機會都好, 以佢而家讀緊呢個課程, 都冇機會考取及讀其他相關電腦證書等等. 而且佢之前已浪費七年時間冇進修.... 雖然有這樣多局限, 但佢相信自己在三十歲內可以毎個月有二萬到, 我相信佢願意學及捱就得, 加油呀! 因你講過希望可以比我見到你有毎月二萬的一日, 唔好令我失望啊!

不過我真係唔明白, 點解佢突然有好想搵多錢的動機呢? 不過男人有野心係好, 我預左佢太專注工作而忽略我, 但我又可以等到佢有出頭之一日嗎? 呢一切交比時間做決定.....