唔真實的自己

話說佢琴日本來話返屋企, 點知佢去左幫朋友影相, 主題係關於公仔及公仔持有者. 我覺得個女仔唔太靚, 只係d公仔吸我, 比大家睇下先~好靚呀~sorry, 我唔係講個人, 係講d公仔, 尤其係粉紅色果隻puppet!

公仔全家大集合呀, 好得意, 好想拿哂佢哋返屋企!同個人一樣大的公仔!? 總之個公仔真係勁得意, 不過自己屋企有隻這樣大都幾係野....我實比媽媽鬧死我, 話我仲低b咩...

之後蕃薯話佢今日又影女仔!?真係激氣呀!!!佢唔影我, 講真, 自己真係好唔開心, 係咪我自己太過醜樣, 唔見得人呢? 我影左相, 佢又唔放在相簿度. 但我知道蕃薯佢好想做攝影師, 所以我咪想佢影女仔只係練習下影相, 令自己好過點.....以下呢張係佢今日影我相 :

呢個大家認得出嗎? 其實呢個女仔係幸福傷風素廣告果個女仔, 即係同好多個男仔, 話某個男仔同佢至夾, 食藥至緊要夾果個女仔黎架! 估唔到佢影相都幾靚....聽講地上的藍色rose係個女仔情人節收到的花, 佢自己唔要, 咪拿去影相囉!

睇完呢張相, 我都開始了解佢點解唔擺自己d相落去, 咪就係因我唔似人哋這樣靚囉!邊個話攝影師個女友成日比佢影架??? 計我話呢~男仔話咩女仔外表唔重要, 至重要睇內涵, 我就真係唔信啦!佢哋只係睇女仔個樣及身材!總之呢, 靚女相就keep, 醜樣的相好似我果d, 可能拿左去人道毀滅!

唔知點解, 我越睇越心痛, 我已經唔想再睇....於是我問佢有冇d型仔相比我睇下, 佢又話冇, 我真係好失望囉, 點解佢睇得靚女, 我又唔可以睇靚仔呢? 照計我唔靚女, 應該冇人鍾意我, 也唔會有人搶走我, 我只係想認識多d型仔. 當然我唔會直接同佢講我想認識靚仔呢番話啦....

不過又講真, 我真係唔想佢接觸太多女仔, 尤其係有好多靚女在佢身邊, 我又對自己冇信心, 真係驚佢比人搶走架!!但我又要支持佢夢想, 同唔想令佢唔開心, 所以成日都要扮好人, 問佢有冇相睇, 叫佢影多d女仔model朋友我說話, 其實我係唔想講架!毎次我都要講違背良心的說話, 自已覺得好辛苦, 而且仲好討厭唔真實的自己......結果果晚, 我在房內靜靜細聲哭, 唔可以比屋企人知我傷心, 哭累了, 自己便訓左覺....唔知呢種生活仲要過幾耐呢?

素描師父及彭太!?

終於要交素描功課(又係功課!?無奈....), 其實係上星期六阿sir吩咐要在今日交, 但連續返學, 又做英文mind map, 又寫program, 邊有時間做素描啊! 於是我在早上開始做份功課, 差唔多大功告成, 這樣, 呢份作品終於完成了 :
為免整皺呢份功課, 以及今晚同我婆婆慶祝生日而出街出飯, 我特登問我妹妹借左個畫袋, 之後又約蕃薯一齊返學.

返到學校, 阿sir講解素描理論之後, 大家開始起筆畫另一份素描, 呢次份素描以幾何物件為主, 簡單黎講即係畫水樽, 紙盒飲品及罐裝飲品, 應該比上次更易畫. 加上蕃薯坐在我隔離畫, 唔知點解覺得好安心.....加上要交埋份功課比阿sir比分, 我都話之份野, 一於畫左今日呢份先.

呢個係我素描堂所畫的對象~個壓扁左的鋁罐點畫呢?

在畫畫途中, 阿sir已經改好上一份功課, 話有d同學做得比較好, 見我哋全班同學出黎睇下. 我見到枱面有六幅畫, 其中有一幅係我的, 阿光話我畫個火龍果似花瓣, 又話佢畫得好圓, 總之就係話我, 跟住佢仲叫我師父, 而且仲話有個同學係我徙弟, 我徙弟畫得比我更靚!? 我點解比人叫做師父!?我何來有徙弟!!!???真係激死我, 但最令我激氣的連蕃薯都話我, 叫我做[成詠詩父], 好衰架你!!佢哋成日話我, 我一於少理, 邊聽歌邊畫.....

之後波特先生拿個psp黎聽歌, 係一些鋼琴彈奏之樂曲, 其實都幾悠閒, 跟住我就講話去巴黎就好, 同學話去維也納仲好, 而且仲要我穿件婚紗? 都知你哋話我同蕃薯去之麻! 跟住阿聯及其他同學叫大家唔好再話我哋, 又講話彭太唔鐘意, 蕃薯話彭太在屋企, 總之一定唔係話我, 雖然我都幾想做彭太(真係唔知羞>_<"), 但我同佢未結婚都係事實, 所以佢唔承認也理所當然, 而且佢未必鍾意呢~計我話最衰都係同學成日話我同佢又咩結婚, 兩公婆, 整到我又成日胡思亂想, 但只要同學開心就得, 其實我都幾like比你哋這樣話我^^ 放學之前, 文迪送左個銀包比我, 係我至愛的pruple銀包, 因我之前話鍾意, 佢又換左個藍色新銀包, 所以送左比我. 但我見到銀包個盒好貴, 唔好意思收, 於是我好娘講左句[無功不受綠], 話比返錢我, 但文迪話唔使, 這樣我多謝佢先, 好開心呀^^比大家睇下先 :

個purple真係好靚呀, 我會好好使用~

放學之後即刻去西九龍中心間pizza hut去食阿婆餐生日飯, 食物及人一早已經到哂, 我哋大家食完野之後, 全家一齊坐巴士回家, 又係坐返我同蕃薯在情人節果日去黃金海岸之巴士, 不過都唔出奇, 我哋居住地方這樣近, 黃金海岸又係我哋居住地方中間, 實坐呢架車啦!

返到屋企時, 我妹比左個好笑的卡通部分比我睇, 係講二個人打架, 有個爆炸頭的男人阻止二人的好笑場面, 比大家睇下先~

其實係出自一套叫[破天荒遊戲]的卡通的畫面, 見完之後我大笑起黎, 我屋企人仲睇下我笑咩.....

我在食飯時sms比蕃薯, 以為佢返左屋企, 見佢一直冇覆我咪冇理佢, 點知十一點幾先話自己影完相,究竟佢做咩架? 原來佢係同朋友去影相, 至於佢影成點呢? 希望見到佢的作品!

又係電腦繪圖, 有d驚驚!!

估唔到自己除左唔認識寫program之外, 電腦繪圖也考起我....今日教用flash去勾線, 其實係在電腦度用點同線去勾出一個公仔出黎, 但已經令我頭痕! 起初我真係咩都唔認識, 對住個電腦發呆, 甚至連把公仔拉去flash度都唔認識, 要蕃薯及身邊同學教我. 而蕃薯佢又冇幫我, 掛住和其他同學傾相機, 只有我自己一個去畫, 我畫左好耐, 甚至連break都一直畫.

蕃薯呢陣先留意到我, 教我點樣勾線, 最後我終於叫做學識左, 太好了! 同時也覺得好神奇, 點解蕃薯一教我就識, 其他人教我時, 我都好似仲遊緊魂, 唔知做咩, 難度呢d係愛情的力量嗎? 講笑, 哈哈~

返去又要做一張鹿仔勾線畫, 仲要上埋色, 蕃薯一早做哂, 仲問人隻鹿仔油咩色顏色眼影, 得戚得佢呀, 我都一定要做好自己作品, 之後post上黎個blog比大家睇!!

p.s. 今日原定放左學之後食飯傾project, 蕃薯本來話唔去, 我最後都叫左佢去, 佢都有去呀! 好開心. 而且中途仲講開去大陸影婚紗相比台灣仲靚, 在台灣影好娘, 而且又講咩男家女家結婚d野, 又唔係真係結婚, 講黎做咩牙? 不過我都希望可以同佢結婚.......唉呀, 自己在度講咩呀!? 又痴線啦!

到了穩定期嗎?

今日本來約左蕃薯在六點二十分在葵芳地鐵站等大家, 然後一齊返學, 但我等左幾分鐘都仲未見到佢, 於是我sms比佢, 點知佢先話我知仲未放工, 我只好無奈地上車返學. 其實佢已經在sms度同我講對唔住, 也知佢公司好多野做, 我不應該嬲佢, 但佢又唔一早通知我, 令我有點唔開心....隔左一陣之後, 佢即刻打電話比我, 問我在邊度, 可能我哋冇緣啦, 所以最後都係返學見....

一返到學校, 除左幫蕃薯留位及拿notes之外, 波特話已經比左mind map 阿sir睇, 阿sir都話冇咩問題, 太好了! 後來都幾多口的阿銘話同我一組, 睇黎以後從此多事.....都係順其自然吧!?

唔知點解, 近排覺得蕃薯對我唔係太熱情, 除左佢冇同我講肉麻說話外, 我哋之間冇咩親密我情侶動作, 就好似琴晚這樣, 佢在巴士車站, 又冇攬攬錫錫...我開始又胡思亂想, 係咪佢唔再鍾意我, 又或者有第二個女友呢? 雖然佢有同我過情人節, 但總係覺得冇左情侶的感覺, 唉....點講呢, 可能係自己想多左吧!? 自從拍拖之後, 覺得自己成日胡思亂想, 而且情緒又成日比佢左右, 覺得自己好冇用.....明明自己之前想做個女強人, 但而且家卻成為個小女人, 成日左擔心右擔心, 不過始終都覺得開心及幸福, 如果比我再選擇, 我都會選擇而家呢種生活, 總算有多個人錫自己麻^^

呢個煩惱一直纏繞住我, 一直唔可以訓教, 直至半夜點幾到, berry及mandy突然打電話比我, 我同佢哋講左呢件事, 佢哋一致都話蕃薯唔係唔鍾意我, 只係可能佢覺得呢段關係已經穩定左, 唔需要擔心太多, 而家佢努力搵錢養媽媽及我. 可能我可能對自己唔太大信心, 驚自己唔會再鍾意佢, 覺得關係仲未完全穩, 希望自己可一直努力經營落去, 也希望如塔羅所講, 我哋二個有機會結婚就好! 嗯, 多謝你哋兩位, 我已經多返少少信心!!

又見蕃薯!? 又做英文功課?

讀左呢個courses 之後, 我成日都要做功課, 今日又要煩英文個mind map. 首先講下係咩黎先, 阿sir要我哋設計一份問卷, 之後做訪問, 做報告及演講. 呢次我哋先做mind map, 類似係設計題目之類, 但我哋仲未做, 蕃薯問我點算好. 唔知我哋係咪返學毎日都見, 今日唔使返學, 冇得見面, 好想見佢呢, 於是我提議我哋及波特搵個地方傾, 最後決定去蕃薯屋企. 不過就要九點, 冇所謂啦, 最緊要可見到你^^

放工之後, 我先返屋企食飯, 之後即刻去搵佢, 我先到蕃薯屋企附近, 波特仲未黎, 本來可同蕃薯二人世界, 點知靜打電話黎, 最後傾到波特黎左, 不過算啦! 我哋三人一齊去佢屋企傾mind map, 一開始我已經比佢哋二個迫我做呢組隊長!? 由我決定題目, 我都費時去想, 最後比左佢哋二個男仔去傾, 最後決定做相機. 先用中文整好設問範圍,內容, 返問卷目的, 之後留返比我及蕃薯媽比呢d野譯成英文. 蕃薯寫個問卷目的實在太正, 如咩[留下生活點滴], [攝影之門檻]等等, 可惜.....勁難翻譯英文, 最後我同蕃薯媽合作, 互相研究英文生字, 甚至仲要上網查埋字典, 勉強都叫完成, 睇黎我同蕃薯媽合作得都唔錯~

當中做功課時發生左件小事: 就係我突然發覺自己唔見左其中一隻耳環, 於是我在蕃薯屋企周圍去搵, 佢媽媽見到我也幫我搵埋一份, 後來蕃薯見到我哋搵野, 佢又搵埋一份, 三個勞師動眾搵埋一份, 我又唔係佢哋d咩人, 唔好意思叫佢哋一齊搵, 於是我以做英文功課為理由, 叫佢哋唔好搵. 但多謝你哋兩個幫我去搵, 即使搵唔到, 但我已經好開心^^

網上稀客!? 背後之真相...

而家公司冇咩做, 我都唔知想左幾耐啦! 今朝又係msn, 點知竟然比我見到.....tracy!? 我一直冇見到佢上網, 今次都係第一次, 而且仲係佢主動hi我!? 佢同我講左好多電腦知識, 原來我地而家學個html 唔係太重要, 只係比我有個基本概念, 而且仲有dreamweaver可以做到, 學左呢樣只係有時方便自己改寫部分程式; 仲解釋左好多電腦terms及知識, 令我學到好多, 真係多謝你^^

仲知道佢原來係某間學校電腦部的職員, 平時在學校做得好辛苦, 聽佢講話上層已經有好多人走左, 仲有教職員有咩漏左帶都由佢黎提醒, 佢真係好叻呢~但佢同我哋後生仔女一樣, 都係比人點去做野果隻, 總之大家努力啦! 後來佢要幫教師手, 去整電腦設備, 我哋就冇傾....

背後之真相(1):

之後同左靜傾計, 講返佢成個情人節約會之經過, 而且仲得到佢同意, 比左佢d相我在呢度post, 而家比大家睇下先~

靜就係穿呢件衫去見佢啦, 不但衫靚, 連人都好靚呀~!!!真係幾高貴啊!!

靜同埋佢個化妝師~

雖然靜悉心打扮, 自己以最佳狀態去見階級, 但最後個結果令佢好失望, 而且仲令佢好唔開心, 隻死人階級在果日食完飯之後, 返到屋企冇打電話比佢, 而且之後仲冇搵過靜.....我都係唔可以講太多, 總之一切令人太傷感....點解好似靜呢類好女仔, 都冇男仔懂得欣賞? 我都知道你不斷為佢附出, 但換黎呢個結果, 一定好唔開心, 而且你仲係深愛佢, 無時無刻想起佢, 影響日常生活, 但你都要重新振作, 無論你為個賤人付出幾多, 佢也見唔到, 感受唔到, 不如盡量忘記佢, 積極搵工啦! 記住牙, 你要活得比佢更精彩!!!

背後之真相 (2):

除左tracy及靜外, 我都有同文迪傾計, 原來文迪一直都好唔開心, 事緣話那人在情人節之後, 對佢態度完全唔同哂, 似乎係同那人做朋友果隻, 其實呢個情況已經持續左五日, 佢話見到我而家好幸福及開心, 所以冇同我講到.....你唔講自己唔開心野我聽, 我都真係唔開心啦!!!

見到你可以重新振作, 你唔想令佢唔開心而在佢面前開心起黎, 顧人感受係好, 但你自己感受呢? 在你blog上見到你曾為佢傷心, 哭過冇數次, 冇可能一下子忘掉, 唔開心就講出黎, 唔好再收埋在個心度..... 不過我覺得你已經比之前更進步, 多左對人表達內心感受, 尤其係對berry講得好多, 好妒忌berry呀~~

似有傳染病!?好在有你幫忙^^

今日又係我最討厭的web technology堂!? 想起琴日做果份功課真係想死, 我都係第一次有一種挫敗感, 面對住呢科, 我簡直係茫然, 成日唔知自己做緊咩, 對住個電腦可以一直發呆....

一入到課室, miss 叫我哋全班同學唔好坐太後, 於是我咪搵左個兩人坐位囉, 點知就出事啦....呢日我自己一個返學, 某d多口的同學仔(我唔講邊個, 果d人心照)話做咩唔係二個人一齊返學, 之後返學的朋友仔, 好友mandy及berry都唔同我坐, 跟住有人話我係咪有傳染病, 冇人同我坐!? 據我話呢, 話我果個先至有病, 你哋只係想留個位比我同蕃薯坐之麻!! 最後蕃薯終於返到學校, 見到蕃薯四周望望, 連miss都笑我, 話蕃薯再唔同我坐就好無奈.....不過冇所謂, 大家開心就得^^

又要交堂課比miss, 要用返上一次功課的program內容, 不過我冇帶, 好在mandy佢把自己份soft copy我, 真係唔該哂你~

但係, 我都係呢句, 對住部腦咩都唔認識, 蕃薯見到我好迷網, 於是問我係咪唔認識, 佢就開始教我, 而且仲捉住我隻手果隻!? 雖然唔係太耐, 但已經好開心^^唉呀~呢個唔係重點, 而係佢最後幫左我好快完成呢份堂課, 仲可以即堂交, 好野!! 而且我自己仲冇[手指]. 佢仲幫我save左自己習作....不過真係唔知save黎做咩!? 自己份功課都交左啦, 真係痴線!不過同時心想, 如果我係咪一直都唔識, 蕃薯可以這樣教我呢? 其實自己唔應該這樣想, 要努力學習呀!!!