努力完成繪本

距離情人節唔太遠, 只剩下四天吧!? 我那繪本仲未完成, 有點苦惱吧! 可能因為近排天氣比較凍的關係, 連續幾日都只係九至十一二度, 畫左一陣又返去床上訓一陣, 或多或少會影響進度. 所以完成得唔太多, 而且比大家睇下自己部分完成作品先......

11月14 : 第一日返數學堂, 果日你係遲到, 可能因為如此先開始留意到你......

11月7 : 開始習慣一齊返學, 有日我哋冇約到一齊返學, 我企在蕃薯後面, 佢就打電話問我在邊度, 我哋先可以一齊返學^^

11月13 : 呢日蕃薯買左彩虹糖, 仲倒左好多在我手上, 我驚住彩虹糖融在手上, 於是全部倒在口內, 所以呢張畫我咪講[so sweet]囉....

11月17 (i) : 其實我呢日又冇約蕃薯一齊返學, 我同自己做個打賭, 話在小巴站撞到佢的話, 會問佢有冇女友, 結果...咪比我撞到佢, 但佢一直傾電話, 直至落左車之後先至問佢, 嚇到我呀.....

11月17 (ii) : 又係講同一日, 我哋成班同學約埋一齊食飯, 蕃薯成日蝦我, 要我一直追打佢, 於是我決定影佢張相打小人, 但我點會真係打佢, 其實我只係想要佢一張獨照^^

11月22 : 呢日係星期四, 話說星期六唔使返cs堂(2:00 - 5:00), 呢次係佢第一次主動約我去街, 而且冇其他同學仔, 咪即係約.....約會!?

11月23 : 最後你話自己隻腳整親, 叫我去你屋企度!? 我都係第一次去男仔屋企度, 當然有d驚嚇啦, 不過你話好多朋友都去過, 這樣都好點....

11月24(i) : 呢日第一次去你屋企, 多得你幫我上網搵資料及你悉心在電話教我黎, 最後終於黎到. 你仲要在車站接我一齊去你屋企, 感動>_<

11月24(ii) : 續同一日, 多謝你幫我化妝及影第一張影樓相, 真係好開心呢~而且仲叫左你媽媽幫我哋二個影左張合照^^

11月24 (iii) : 果日我哋一齊坐車返學, 你訓左我大脾....個袋上, 雖然唔係太耐, 但也令我難忘...

11月26 : 我哋開始sms通訊, 多數在早上10:45 - 11:20到, 而且已經成為毎日習慣, 直至而家都係!

其實仲有少少我覺得唔係太靚, 想再修下先post上黎.....我只係完成左十三張到, 距離目標七十張仲差好遠, 睇黎我只好盡量努力!!我覺得一定唔會在情人節之前完成囉, 或者會在佢生日時, 連埋一本新繪本比佢. 至於情人節送咩??我都仲未知, 仲苦惱中.....

和同學仔唱k! 可惜...

今日同berry, winnie, 阿駿, 阿光及阿聯去銅鑼灣CEO neway去唱k. 我, 阿聯及阿駿在十點幾到達銅鑼灣, 於是一早去搵位. 好在有k lunch自助餐食, 太好了! 而且仲唔係太貴, 毎人只係70元, 這因為阿駿有會員咭之優惠吧!?

k房內的座位, 好大張梳化, 好舒服^^

好like佢個大電視! 如果我屋企個電視好似佢這樣大就好.....

我哋入到k房之後, 當然即刻唱歌, 其後winnie及berry黎埋, 我哋邊唱歌, 邊出去搵野食, 都幾開心架! 可惜果度唔係太多野食及食野時間仲好短, 我哋食得唔係太多. 雖然佢比我哋由十一點唱到四點, 但只有一杯飲品, 未免有點過份吧!? 不過算啦, 呢個價錢就係這樣, 我哋可唱好多歌咪得! 其後k lunch過左, 阿光先至黎到, 我哋一於照唱, 當中winnie點左好多好笑的歌, 有春田花花幼稚園好多歌, 如[一二三四五六多勞多得], [豬腩肉]......其中有首好好笑的[斎老味], 好似粗口添!? 但足以令我哋笑到碌地.

不過最抵死都係阿光及阿聯唱首歌叫[my melody], 佢哋把佢改左[my fantasy], 仲要話係我唱=_="簡直離譜....仲有我見佢哋點左首有林嘉欣的歌, 跟住我又唔知痴咩線, 竟然點左[二月十四的約會], 實比人話到飛起啦, 聽阿聯講唔知係咪真係錄左音, 如果真係, 加上比蕃薯聽埋就死啦!!??睇黎自己呢次真係大意左!睇黎真係要小心d.

我哋臨走時影左個全照, 比大家睇睇先^^

本來以為蕃薯會黎, 但佢在約兩點幾先至同我sms, 話佢琴晚整好佢屋企部電腦整到成五點幾, 而且我仲同佢一直用sms傾計, 自己也五點幾訓覺; 而佢在六點先至訓, 點知比佢媽媽叫佢八點幾拿野去比佢在旺角居住的阿婆度, 呢個時候佢先至返屋企訓覺. 你果然今日都唔黎嗎? 不過我其實已經知道, 佢一定會為左訓覺而唔出街....我又冇得見佢啦, 唔知係咪真係要下星期五返學先可見到你? 想到呢度不期然灰心起黎....

點知我返到屋企時, 見到佢msn有上網, 仲主動hi我. 我問左佢拿返琴日同波特, 佢朋友在廢工場影的相我睇, 蕃薯話佢個似阿rain的朋友, 但睇相完全唔似的!? 於是我就話[阿rain型d, 但小美更加型!], 仲比左小美張相佢睇, 佢竟然話一點都唔型......嘩!!!???竟然話我偶像!? 不過我最後話佢型d, 尤其係佢有信心時個樣, 佢只係哈哈大笑之後便冇野講....係我講得太直嗎?

去逗利是囉!

琴晚二叔打電話比所有屋企人, 約好今日一齊去飲茶. 我哋大約十點幾先去酒樓飲茶及拜年, 首先各位親戚如二叔, 弟婦先派利是比我先^^

我弟婦第一年派的利是, 值得紀念的說~唔知我有冇派利是比人之機會呢?

我覺得呢d利是封靚d, 係舅母佢哋比, 最衰唔齊十二生肖....我果兩封係狗及雞. 其實我見雞係我至愛的purple先至拿, 之後先去拿狗果封. 蕃薯大我一年, 佢係屬雞, 我屬狗, 連利是封都係一對嗎?

今日蕃薯同波特, 以及佢哋朋友去影一個外表及身型好似阿rain的人, 係去廢工場影的, 最衰要爬黎爬去, 女仔走去果度影相好唔方便, 我都想去呢~只好期待睇佢新相吧!?

新年快樂!? 仲有對唔住呀, 蕃薯!

今日係年初一, 先同大家講句恭喜發財, 新年快樂!! 同埋我想摘錄winnie一句說話先: 有老襯的年生貴子, 三年抱兩, 白頭到老; 未有老襯的希望在呢一年搵到另一半. 但係...有情人但未做老襯果d呢? 惟有希望佢哋和情人sweet及快d拉埋吧! 應該包括埋我自己吧!?

好啦, 講返我哋屋企怖置先, 其實老實講係冇咩怖置, 最多只有個糖果盆 :

仲有在星期二放學之後行左花市, 買左圖花, 而家開左少少花 + 媽媽買的康乃興:
今日早上先同父母拜年, 之後要去我姑姐屋企幫佢寫一篇audit report, 所以再冇去其他地方拜年. 我去到姑姐屋企時, 佢準備左好多食物我食, 午飯食佢出名煮的烏冬, 晚飯食煲仔飯及洋怱雞肉, 仲有個蒸得滑滑的燉蛋做甜品~我覺得呢日似食野多過似寫報告.所以最後咪唔可以寫哂成篇報告....

當中我都有同蕃薯sms, 佢只知我去人哋屋企寫報告, 仲問我做成點, 而家做緊咩野, 本來一切都好正常; 點知我自己無聊定貪玩, 便惹左個禍黎, 我本來開玩笑同蕃薯講話在某人屋企, 其實佢唔知我係幫姑姐手, 佢好似好擔心, 佢成日問我在邊度, 又問我好夜都未走及我係咪在人哋度過夜....對唔住呀, 要你為我白擔心, 而且我知你應該唔開心吧!? 因你在sms內毎句說話的語氣都好認真, 平時你總會有個哈哈笑圖及成日[哈哈哈..]的, 但你幾句說話都冇....除左對唔住外, 我唔知道講咩野...

我已經立即同你解釋左真係去姑姐屋企幫佢做功課, 講笑話氹你, 你又冇覆我; 你唔覆我係應該的, 我唔應該講呢d野出黎令你唔開心, 我好擔心你, 期待你的短訊, 加上自己又咳, 令我成晚訓唔到, 滿腦子都係你, 而家先發覺你對我的重要......但其實sms呢件事仲有下文, 就係其實佢有覆我sms, 只你因為我個電話冇電, 又開又關, 所以到聽日下午先收返哂佢比我短訊, 原來佢冇嬲到我, 太好了^^我以後唔會再開玩笑來激你, 我都係呢句 :[ 對唔住呀, 蕃薯!]

終於放假!

我哋公司個老闆都幾好, 今日終於開始放假, 我在屋企除左打blog之外, 就同其他朋友msn. 其實我本來冇打算msn, 因之前同學仔講開白初三去白泥影相, 後來又冇左聲氣, 蕃薯佢想在新年接part-time而想確定個日期, 但佢又要返工, 所以我代佢問同學仔, 於是就上左網啦!

平時好少同阿駿傾計, 今日主動hi佢, 問清楚情況, 佢最後都話去, 加埋winnie, berry, 以及我和蕃薯, 總共有五個人去, 都應該ok吧!? 之後同阿駿講開自己工作, 原來佢同我都係同是天涯淪落人, 我哋都係人工唔高, 但做到要死果隻, 而佢更會考慮會轉工, 人工雖然低過而家呢份, 但時間上比較靈活, 而且仲可接ive外判工作做添; 加上佢屋企生活都急需錢用(我唔講點解啦, 始終係人哋私隱), 其實佢同我情況差唔多呢~可能因為如此先會特別好傾... 惟有希望大家一齊努力, 解決自己及屋企人經濟上的問題. 而我自己也受蕃薯成日做part-time之影響, 我而家靠姑姐比外判工作我做, 加上積極搵份超過13k的工作, 應該問題不太大吧!?

除此之外, 我都有同阿光傾計, 佢開始估到mandy及ryan拍拖, 身為mandy的朋友, 我當然叫佢唔好亂講及亂估吧. 同時我都在msn上叫mandy小心點, 唔好比人識穿. 而且近排佢好似心事重重, 希望我可以做佢旁聽者, 在佢身邊聽佢講心事....

仲有努力籌備繪本, 總共有70頁, 內容已經在blog內搵好, 但由於頁數太少, 只好把精彩之內容畫下來, 當中包括最令同學記得的彩虹糖, 尖東海旁影相......我邊搵內容時, 總係回味笑住, 可能回憶實在太好吧~

今晚雖然見唔到蕃薯, 但佢在十一黠幾打電話黎, 話佢同完媽媽食飯之後, 再同媽媽去買新衫, 佢買左件春裝衫, 一條長牛仔褲, 皮褸及一條頸錬, 買左八百幾元! 我好想睇你個新look啊, 可惜你話在年初唔會穿出黎, 唔知幾時先可見到呢? 好心急想睇>_<. 我哋說說笑笑, 傾左半個鐘到, 大家便各自做自己野, 我打機打到成點先訓覺^^

和同學行花市

今日係新年之前最後一日返學, 原本我想同蕃薯一齊行花市, 於是問佢會唔會行, 佢話自己唔會, 其實我有點失望, 呢個算係情人之間的其中一個節目, 但你竟然唔去....

放學之後berry話行葵芳花市, 而我自己見返屋企冇野做, 身痕痕又想行下, 於是應承berry去, 後來加入mandy及波特, 我哋一行四人再去行! 我哋見到好多吉, 各種賀年花, 仲有我至愛的花之一蝴蝶花, 我都好想去買, 但價錢太貴, 最後同berry一齊買左桃花.....但係...我買黎做咩呢? 有蕃薯呢個男友, 當然唔會搵過另一個, 而係希望旺一旺人緣, 希望有公司可以請我, 及和新公司同事相處得好點

其實呢日自己唔記得帶相機, 咪叫左波特先生影相, 本來想問佢拿相, 但在msn又見唔到佢上網, 好想快d拿返呀~!!!

我真的可以幫到佢吧?

我同蕃薯一如以往, 成日在工作時間sms, 我開始覺得自己跟本唔係返工, 返工唔係玩sms, 就係msn! 可能而家在工作淡季冇野做掛! 加上近排成日都因蕃薯冷落自己而唔開心, 成日懷疑我在蕃薯心中地位重要與否, 尤其係情人節快到, 我想同佢一齊過, 於是我毎次同佢提起果日點過, 佢總係唔答, 又或者轉移話題, 令我覺得更加難受.....好討厭這樣的自己, 我姑姐曾經同我講過唔好把太多心機放在佢身上, 但我總係做唔到, 佢在我心中位置越來越重要, 好難話唔理就唔理佢.....

好奇怪地, 我竟然哭不出, 甚至仲懷疑自己唔係個好女友, 係咪自己做得唔夠好? 只係成日想見佢, 又唔知佢點解唔開心....直至佢一個短訊, 話自己工作時收少左客人二百元, 個老闆要求只扣佢一百元人工, 佢好唔開心, 因為佢不停搵錢, 而且把錢睇得幾重要. 我惟有叫佢下次小心, 甚至仲話請返佢食飯, 叫佢笑返下先, 好在佢最後都有笑. 雖然我唔知佢係咪真係開心, 但只要見到佢開心便好^^

今日佢要7點返學, 我幫佢留定位, 之後學校突然黎個火警演習, 我即刻打電話比蕃薯, 話比佢知我哋全班在停車場及我哋上堂個班房. 最後在火警演習之後, 佢終於黎到. 我都話自己寫程式比較弱, 成日唔知佢做咩, 好在多得berry教我, 而蕃薯都特登睇下我及教下我, 多謝你^^最後我都叫做完成, 真係辛苦哂大家及自己. 我又覺得寫程式唔太難, 只係麻煩, 但都幾好玩!(突然忽發其想, 我可以叫蕃薯教我寫程式為由見佢多d, 睇黎自己真係衰呢~)

放學之後, 我返屋企休息. 點知半夜蕃薯sms 比我, 話佢竟然出左旺角, 同個朋友傾左好耐, 成點幾先至返屋企, 途中成日話自己係衰人. 而且一返到屋企話自己心情麻麻就訓左教....自己竟然唔知佢為咩唔開心而唔可以安慰佢, 甚至為左佢呢件事而成晚訓唔到, 聽日仲要返工, 真係唔知點死?