去買禮物囉~

都話我哋老闆wilson勁好人啦, 收到二份勁正聖誕禮物之後, 佢仲比我哋放早, 放3:30!!正到暈啦, 今年勁好彩. 其實我都幾欣賞及尊敬呢位老闆, 佢教左我好多會計知識, 尤其係入賬方式, 佢從來唔會直接教我, 而係比d提示我, 要我自己思考下先去做, 或者呢個方法適合我, 而且可更容易學習; 加上佢會教姑姐炒窩輪, 仲驚姑姐到老唔夠錢用, 佢幫我姑姐炒股搵錢, 而且仲搵左好多錢.

我講個秘密你知, 在我未遇到f先生時, 我都有考慮過我第時個老公才能及性格似我老闆就好, 外表冷酷, 但其實好好人, 對惡勢力絕不低頭, 堅持自己理據撐落去; 又有會計才能及應變能力, 識理財及搵錢. 其實真係和f先生性格完全相反呢, 或許愛情就係這樣, 即使個男仔未必係你心目中要求, 甚至相反. 但係竟然都愛上佢, 真係奇妙!而家對我老闆的感覺呢~只係一個值得我尊敬的長背!

放左工之後, 我和mandy, eva, veron, 靜及f先生傾計, 而且我睇緊蔡之blog, 其他人的blog我一有時間一定會睇. 大約6:00到, 我開始去荃灣買禮物. 我走到街上先至後悔, 因為太多人啦, 下年我買禮物一定唔會選平安夜囉! 呢次我會送零食為主, 因為大家都係愛食物多, 好過買d[唔等駛]的物品!我先去零食物語選擇食物先 : 呢盒係我妹妹, 佢都幾like雞蛋布甸, 佢應該like呢盒吧!?

呢三盒choco係三位勁愛藍色之美女 : 蔡蔡, mandy及eva, 我特登搵藍色盒的零食比你哋架! 有d仲要係新出, 連我都未食過, 唔知好唔好食架!? 唔好食唔好怪我呀...(汗)

之後去左千色店, 買左盒瑞士choco比f先生, 如果f先生仲咳的話係會收返(笑), 但冇理由把以上所有禮物冇包裝過就送出去, 於是我去埋千色店買埋花紙...我去到一個包裝專櫃去選購花紙, 個女sales勁好人, 佢介紹不同花紙比我, 仲問我係咪送比男仔, 我咪答係囉!最後選擇左一張漸變藍色花紙及啡色帶. 當中個女sales問我個男友玩唔玩得時, 我都考慮左一陣, 其實佢係玩得, 但我最後答左唔係. 你哋可能會覺得奇, 點解個sales問埋呢d野, 因為個男仔玩得的話會用d鮮色的花紙, 如鮮橙及綠, 我自己都唔係好受得呢二隻色, 所以先至話f先生唔玩得之麻. 最後完成品如下 :真係激氣!?點解佢果份這樣美架!?但mandy你哋三個都唔輸蝕, 我都為你哋在包裝專櫃度搵左d藍色紙袋仔比你哋, 仲要毎個都唔同架!

我唔知d紙袋會比邊個架, 一於由我決定吧~哈哈~原來藍色野真係好鬼易搵, 但purple真係難左d, 所以我仲未搵到veron禮物而煩惱, 不過我哋遲d先見面, 但仲有機會搵下, 最後我一袋二袋拿住返屋企. 惟有先買住三個人份禮物先, 之後後補啦, 至於後補人士包括 : veron, 蕉, 靜...睇黎我都要大出血囉, 不過送比好友冇法啦, 只要佢哋收到禮物時開心及真係鍾意就已經足夠^^

呢個聖誕不太悶掛!?

除左聖誕節同f先生去拍拖外, 我平日會做d咩野呢?當然打機啦! 近排成日玩nds, 因為nds出左好多RPG遊戲, 而家玩緊[Tales of Innocence] :呢隻game真係幾好玩, 尤其係打交畫面值得一讚, 佢沿用走黎走去打交呢種方式之外, 在hp上面有一行bar, 就係越駁得hit多, 行bar會越來越滿, 最後就可三個角色用合作技, 可以駁到80 hit以上. 換言之即係駁hit先可以win, 即使我呢d懶升level的人, 總之level低到爆炸,都可以戰勝嘍囉及大佬

仲有毎次tales必有screen shot畫面, 即係毎個角色的對話, 但呢集冇太多好笑野. 而且呢個係增加角色好感度, 好感度越高, 電腦角色幫玩家回復機會越大.

至於我近排期待玩的game仲包括nds的ff4, 我都係而家先知, 真係失敗, 我都仲未玩完tales, 都係遲d先玩啦, 不過d畫面真係好美, 見到真係好想玩, 但好唔好玩要玩過先知...

至於psp都有一隻大作RPG出, 就係在12月27日出的[star ocean 1], 係我其中至愛的RPG之一, 故事以科幻為主. 呢隻之前已出, 現移植到psp, 都係期待作品之一 d畫面當然冇ff這樣好, 但都ok, 始終係同一間廠出品, 而且二部機的解像度差唔多,算係這樣吧!

個戰鬥畫面都保持住一貫特色, 有左下角攻擊距離及右上角角色位置, 不過我就唔liked人名在上面囉!都係在下面好d. 但有四個人用就好野~

畫面係唔美, 始終係移植吧!? 但只要好玩咪得囉!!

有呢三隻新game玩, 我估聖誕節不會太悶吧? ....哈哈~好耐冇講過打機啦!正呀!可惜f先生佢唔玩RPG, 真係哂呀! 不過我好多類型的遊戲都識玩, 都可以同佢玩其他..

各人節目...突然見面!?

今晚我要做冬, 本來我要去幫手, 原來我姑姐已經叫左我妹在星期五返佢屋企幫手, 所以我就可以免疫. 但其實可能返去幫手會更加好....因為呢一日成個下午我都冇咩好做, 最多幫手做好阿爸公司盤數, 聽下歌, 同人哋msn,又差唔多一日.

今日見到edwin, 由於出job, 加上佢平日忙碌的關係, 同佢少左傾計, 今日難得一見, 當然同佢傾計啦! 原來佢屋企一早做冬, 今日同女友去行街...你真係醒目啦, 一早做左冬, 唔使同人迫車麻~但我哋傾得唔太多, 傾左冇耐佢就出街

msn :除此之外, 我又同左幾個熟朋友傾計, 靜就今日約左在msn度認識一個27歲男仔一齊去工展會, 之後返去做冬; 而蔡蔡在放工之後去買菜, 在屋企整返幾尾, 唉...身為女仔的我唔識煮飯, 認真慚愧呢~仲有佢話公司網路問題會在12月27-1月8(暫定)冇得上網!?我少左個好友同我傾計...我有股衝動想殺左幫蔡辦公室安裝寬貧的和記!!!!!仲有f先生, 例牌遲起身, 我見佢又冇sms及msn, 於是整個sms比佢, 即使佢在msn度上左網, 都仲要訓教, 真係啊...

差唔多時間去我姑姐屋企食飯, 我爸突然返黎屋企同我講話去食飯, 我衫都未換, 好在我爸話先接我媽先, 之後再搵返我及阿恬(我弟婦), 我哋四人一齊去食飯. 點知黃大仙撞左車, 塞左車好耐, 都有半個鐘到, 好在f先生一直都有同我sms, 唔係真係會悶死~

返到去姑姐屋企, 姑姐比返代我取的老闆的禮物, 原來係一侖勁美的choco及.....1000元現金!?其實呢個現金用利是封入住, 我起初以為係100元, 點知覺得唔對路, 點解張銀紙後面多左個零, 先知道係1000元, 對於冇錢的我, 呢個簡直係好消息啦!最後我比左八百元比姑姐袋住先, 作為儲錢交學費, 而我又多二百元

好消息一浪接一浪, f先生佢在sms內突然講話我在食飯之後出黎見下面!?我勁開心呀, 當然願意啦!於是我在九點幾出門口, 再坐小巴去旺角搵佢. 其實我哋的約會地點都講左好耐, 起初深井, 呢個好啊, 近大家屋企; 後來f先生話同朋友去深水步買野, 呢個地點都唔錯, 我可以在爸送弟及弟婦返屋企時, 可以在附近落車; 但最後約實的地點係...咩話!?又係旺角!唔係掛!?原來佢突然買左部ps2, 點解你唔買wii呀!?我可以去佢屋企玩麻~算啦, 無論你話去邊度都會搵你. 但今日最大問題係我冇化妝, 因我本來想食完飯就返屋企!

最後我去銀行中心間大家樂度搵返佢, 佢同緊個朋友傾計. 佢呢位朋友都幾有錢, 除左有我一直都想買的ps3外, 全部遊戲都買正版, 而且仲有一部幾萬元的相機. 而且走時仲講左句 :[我驚部ps3會玩殘, 想買多一部]吓!?唔係掛?你買多部不如買部比我啦(笑)

後來同佢個朋友講再見後, 終於到我哋二個人行街啦^^佢今日同我去旺角中心睇衫, 我最後買左一件閃粉黑色衫, 呢件會在聖誕節同佢約會時所穿的衫, 等我返去襯下先. 本來想食dessert, 最後驚d店舖關門而坐小巴回家. 唔知點解我哋坐小巴個位特別邪, 毎次都係穿雙人位最後果行, 佢突然整個咀埋黎想鍚我, 我哋呢下算kiss嗎? 真係勁緊張呢(>_<)自己唔識kiss會唔會冇用左d呢? 我哋最後只見一個鐘, 真係好唔夠呢...惟有在聖誕節再見吧!!

終於脫苦海~

我拿拿聲做完果邊的工作, 唔知係咪咀咒呢? 我毎次都係五點幾先至做完, 都唔使再返去旺角啦~返左去咪又係放工!? 姑姐在電話中提及到個好老闆毎人送左一盒禮物, 好似係choco, 以及毎人一封利是, 雖然唔知幾多錢, 但對於冇錢的我黎講, 就極之重要呢~多謝哂老闆先^^姑姐話聽日做冬時拿返去麻麻屋企比我, 又一次唔該哂!!

今日見到隻死人八兩金又跟我穿差唔多衫, 仲要自己覺得懶美, 真係囉我命. 自己外表唔美都唔緊要, 有d自知之明比較好d囉! 我最後走時都有同其他人講再見, 除左佢之外, 係我特登的! 哈哈~我都就黎走, 見你都唔多過六日啦! 話鬼知佢!

仲有f先生今日只返半日, 大約在三時走, 佢落實左今日去買布及剪頭髮. 大約四點幾, 佢已經買完布, 仲同我sms添! 大佬呀!?我果陣就黎做完哂d野, 趁早離開地獄好過啦~不過我都係有同佢傾, 因為果度真係好鬼悶...期間問佢去左邊度剪頭髮, 佢原先有個朋友開的銅鑼灣髮型屋在聖誕前已經滿哂啦, 邊個叫你而家先即興話剪頭髮, 佢話想好型仔的過聖誕....咩理由黎架!? 之後佢話自己有d心郁, 想買部華錫手提電腦比自己做聖誕禮物!? 唔係掛?係都送份禮物比我啦~又或者買件情人飾物都好.....不過佢既然真係鍾意, 我都冇計啦, 因佢一直都話自己想要一部手提電腦, 可惜太貴, 而家有一部平平地仲唔買咩? 我就同佢講, 不如我哋考慮下聖誕時食d咩啦, 佢竟然話.....我哋食杯麵!?再唔係就煮個即食麵!? 吓!?這樣我哋聖誕節在邊度慶祝呀? 佢之後冇講到...我有d擔心添!

佢在六點幾send左個sms比我, 佢話已經剪完頭髮, 而且仲好短!?我好想即刻去睇佢個新look啊...好惜我個頭痛, 返左屋企休息, 佢知我頭痛都冇問候我. 我都有d失望囉, 訓下覺先好過...

爆忙碌!? 究竟係開心定不開心的多?

相信各位好友有留意我msn果句留言 : [星期四五又要去這個地獄, 放過我吧!], 又或者在msn度提及過, 都知道我又要出job啦! 唉~又要先果隻[恐怖教主]八兩金! 勁無奈囉....不過我都係以工作為主, 都係做野至上啦!

好在返工時都有f先生同我sms, 但佢真係好忙, 連午飯都冇食到, 不停地工作; 我也不可以輸蝕比佢!? 自己快d做完野走仲好. 直至大家放工, 我和f先生先玩sms, 當我打緊sms, 問佢工作有冇食野時, 佢突然打電話比我!? 第一句話因為想聽我把聲先打比我, 當然勁開心囉^^佢話明天放早, 可能會去剪頭髮及買布!? 原來佢最後一份攝影功課想自己設計一件公主衫, 之後比阿媽車衫, 但係....果個公主唔係我, 而係佢其中一個模特兒朋友掛!? 其實我都有d唔開心, 自己一定唔係美女, 但也唔好比我知道搵佢d美女朋友麻....唉~!!真係好失望....雖然後來我問佢放假邊日得閒, 佢話聖誕節果日同我一齊, 但自己總有點唔開心, 點解個公主唔係我呢?

後來f先生同f媽提早做冬, 一齊去食飯. 於是我打電話比蔡蔡, 問佢原先預定的星期日有冇約左小慧, 都最後佢話冇, 我就可以練習整曲奇餅比f先生, 當做聖誕節禮物吧!? 你睇我幾有佢心呀, 但佢只顧住搵佢個模特兒朋友影相交功課, 真激氣! 如果我都可搵到似小美的男仔影相交功課就好!

我同蔡蔡傾左一陣, 跟住佢話個壞消息我知 : 在平安夜至到一月八日到(if 我冇記錯), 佢公司要因網路問題而唔可以上網, 我咪少左個重要的朋友同我傾計? 我一定會悶死到似! 講下講下, 先知蔡蔡約左男友見面, 好啦, 唔阻你哋啦, 盡量去拍拖吧!

好啦, 我以為有機會打blog, 點知靜又打電話比我. 佢話在某一日撞返我哋以前其中一位老人廖嘉輝kaphy小姐! 這樣好運? 我都想見下佢呀! 靜仲請佢上去自己屋企坐下, 你個kaphy呀, 這樣耐都冇見你, 原來佢而家搬左出去同男友住, 又冇打電話比我哋, 真係激氣!? 後來聽靜講, 佢有問我呢個傻妹而家點樣, 仲鍾意打機嗎? 算啦, 見你仲記得我就唔嬲你這樣耐都冇搵我哋. 不過你要記住, 你有靜個電話, 記得打比我哋, 約我哋出黎食飯, 如果唔係, 我學蔡蔡果招, 擰luck你個頭架^^

同靜講完電話之後, 我終於有時間打blog啦,點知....我姑姐又打電話比我, 佢問我出job做成點, 以及提我記得拿抽不中新股的退票囉! 其實我之前發左個毒誓, 話有男仔鍾意我會抽不到新股!?天啊! 唔係這麼準吧? 我真係估唔到真係有人會鍾意我囉! 個毒誓可以收返嗎?

冇需用錢換黎的開心

今日放工, 約左berry同佢一齊買護膚品. 因為賣護膚品間店舖有我至like用的牌子[rvb], 自己都想睇下果度賣幾多錢, 加上berry要在12月30要做個美的姐妹團, 所以我哋二個我在7:00, 又係琴日約f先生個地點, 唔係掛?

後來mandy打電話比我, 原來佢今日都約左人在旺角食飯, 而我也有帶蔡叮囑我比mandy之choco, 可以約berry之餘又可比埋mandy. 原本我哋三個未集合, 鬼知大家係邊咩?後來佢哋二個已經搵到對方, 太好了! 我哋三個作一個短暫的見面後, mandy要去搵朋友啦, 我和berry就去果間店舖!

去到之後有一個叫miki的女仔專門負責我哋賣買護膚品, 我即刻問我用開個二隻產品幾多錢, 點知毎件平一百元~!!??果間美容院果然係謀人寺, 好在佢因為服務差, johnny已經幫我轉左另一間美容院先至好d...返黎呢度先, 個miki都有叫我買野架, 但態度起碼好好多先, 即使我唔買都仲對住我笑, 而且仲好有禮貌講解毎件產品之功用, 呢d先係優質服務麻~~即使我冇買佢任何產品, 只有berry買個眼霜, 但佢由頭到尾同我哋傾計, 太好啦~!服務又好, 產品又平, 實會幫襯你哋^^

買完護膚品之後, 我哋坐返地鐵返屋企, berry在葵芳站走左. 又只有我一個人啦! 我見到剛錯過一班村巴, 於是去荃灣周圍行下, 去到一間專賣日本時裝的小店舖睇衫, 當問個女sales某件衫有冇其他顏色時, 我哋唔知點解特別好傾, 可能係我哋都對服裝有d研究掛? 事緣自己想買連身裙, 於是同sales一齊講話日本好鬼興, 但香港好少女仔穿, 就算係都只有尖沙咀及銅鑼灣...傾傾下計個女仔仲拿左一本日本之時裝雜誌的日文版一齊睇, 個女sales仲同我講話, 佢有個朋友在台灣做時裝零售, 個女sales可以直接向佢果位好友拿貨, 同埋可幫我訂貨. 其實我都想架, 可惜我冇錢呢~佢賣個d衫款有d仲要同vivi一樣, 勁正囉!可惜我冇份呢~~跟住佢見到我個髮型, 仲話我都幾似日本妹, 好開心呀!!我至like比人哋讚我似日本妹, 因為自己而家真係扮緊, 哈哈~最後我哋傾左半個鐘, 我最後一件衫都冇買到, 但真係好開心, 唔係因為比人讚, 而係可搵到一個志趣相投的人傾計, 因為我好似好少朋友鍾意睇日本時裝雜誌....

精彩的約會(好騎呢?)

終於到左六點啦~!!今日特別興高采烈, 因為呢日係我和f先生之第一次約會, 地點係旺角! 其實我哋講個地點都講左好耐, 因為f先生特登扼公司話返學, 可以早二個鐘黎見我, 所以咪驚行到半路比同事見到囉, 呢次的行程差唔多全部由佢計畫. 不過冇所謂啦, 我咩野都去睇!

我哋約左六點半在地鐵站銀行出口E, 銀行中心附近間body shop 度等. 但f先生因為工作問題, 足足要本小姐等左佢成半個鐘...不過最後都算啦, 原諒佢啦, 因為佢份工作又真係幾煩! 不過我其實都等到佢好煩, 難得第一次約會, 我就準時等左佢好耐, 而且仲見到街上成雙成對情侶一早等到人走, 自己仲要呆等, 一d都唔好受!

我哋先周圍去睇電器影音店舖, 因佢話有一部電腦, 好鬼細部及有好多顏色, 個部野直頭係大部版nds, 價錢大約三千元到, 可惜只有英文版, 冇得打中文字呢~好可惜! 在睇電腦途中, 佢仲講笑話佢係我姐妹, 我哋表現得close d添, 於是佢用手搭在我博頭上, 不過呢d只係開場白...

行行下叫佢同我影貼紙相, 佢又唔願意, 因為佢話唔知點解驚影貼紙相個相機!?咩理由黎架? 那麼你在sms 度應承我做咩呢? 後來佢自己話其實個ex都叫左佢好耐先影一張, 真係激死我啦! 其實佢遲到同我補影返都應該啦! 可惜我冇這樣講...但後來佢話不如去佢屋企度合照, 由佢黎執相好過啦! 算啦, 你話架! 我實記得!!

之後我哋開始去睇化妝品, 去左新開間沙沙, 見到佢裝修的確好美, 但入面原來好細, 最後我哋去左恒生隔離間卓越去買野! 講真果句, 我冇咩朋友化妝, 一係認識親係男仔, 鬼識化妝咩!?好在有f先生在度先買到架. 首先買眼線筆, 一定要買液體狀, 因為筆會比較難畫...之後買左其他野, 但而家買呢d只係基本用物品, 已經要二百幾元, 你話, 女人錢幾搵!

之後我哋去食飯, 我哋去左花園金閣度食打邊爐自助餐, 都咪話唔平,要成百幾元架~本來f先生想去卡位, 但這樣耐先黎鬼有咩!?個侍應即刻帶左我哋去坐角落位. 我和f先生一開始叫左個湯先, 原來佢好少食辣野, 而我呢~~當然勁愛食啦, 最後我哋叫左個清湯及花生沙爹湯底, 再狂叫食物及刺身, 勁正, 仲叫到成張枱都係, 都唔知食唔食得哂~

跟住我哋開始食野, 點知f先生彈左一句出黎 :[我要你餵!], 我就話 : [餵咩呀?這麼大個人仲要餵!], 佢講左呢句野我都嚇左一陣, 佢叫我用口黎餵佢!?哈哈~~估唔到我要在酒樓內獻出我的第一次?最後我都應承左佢, 首先我哋開始一齊食同一塊三文魚刺身, 但f先生點得太少wasabi啦(>_<), 加上d刺身唔太新鮮, 都係算啦, 我哋冇再叫啦, 要成八元一碟架! 點知都佢仲未夠, 食蟹柳時又要同我食埋同一條, 我先食左先, 點知佢話我食得唔夠多, 要我食到條蟹柳好短先至食, 仲店到佢....個咀添!

我哋頭先咪買左化妝品, 佢想試友眼線筆, 於是在酒樓到即刻幫我畫, 點知佢話支筆唔夠上色, 畫左幾次, 條眼線不太深色, 話去卓越換返支筆!?正傻佬黎架! 你已經用左, 人哋點會換比你呀~!!?最多我朝早化妝時, 我自己再試下啦!

那時, 蔡蔡原來已經一早打左電話比我, 仲打左三次這麼多? 對唔住呀(>_<) 我和f先生打邊爐, 叫多左食物食唔哂, 我咪講笑叫蔡蔡上黎食囉, 佢話費時做電燈膽, 阻住我哋, 佢自己一個人行街. 到埋單時, 我哋仲望住枱上食剩東西, 在度笑住講話佢會不會拿食剩的食物去磅架, 因為毎食剩一磅要五元架!!果度好似剩返幾多下.....最後當然唔會計啦, 間酒樓計左咪等如同自己趕客!

食完野我哋周圍去行下, 跟住蔡蔡就打電話黎, 佢問我在邊, 想我幫佢比野mandy. 最後我約左地鐵朗豪坊出口度等. 佢原來比盒choco比mandy, 但我點解冇份架? 於是我一直追問佢, 扮呷操~不過在f先生面前做埋呢d野真係有d失禮(笑)....蔡走之前竟然同我哋講左一句說話 : [你哋而家都拍緊拖啦, 都不用choco啦!] 我當時掛住話驚, 聽唔到佢講. 呢句說話我都係之後在msn同蔡蔡講先知, 後來蔡仲話f先生聽左之後都冇否認, 這樣....咪即係承認左?(怕羞中....xd)

蔡走左之後, 我哋二人行多一陣就一齊坐小巴返屋企, 我哋坐在最後果排, 然後把頭挨在後面扮訓教, 我哋互相望住對方, 感覺好得意...哈哈....不過佢突然又講想趁我訓教時咬我個nose, 我當然唔制啦, 佢話我避佢個樣好得意! 之後佢話咬我條舌!? 我哋互相咬大家條舌, 條舌有d軟軟地, 又濕又暖,好鬼得意, 最後我比佢早d落車, 都唔捨得講再見....

原來約會真係可以好開心架...哈哈(>_<)