應該堅持定放棄?

今日無聊上左f先生個相簿到睇, 除左見到佢封面有個女仔個樣, 我記得佢之前同我講過呢個係佢前女友, 跟住再仔細睇下, 見到有好多個女仔的相. 跟住再想起佢屋企部電腦及手機wallpaper, 全部都係那個女仔, 聰明的大家都知道f先生仍然鍾意個女仔啦, 唔係點會毎樣物件都有佢個樣. 呢一刻我清醒起黎, 原來佢心入面一直有個女仔, 佢仲對我這樣好做咩呢? 如果佢唔鍾意我, 令我誤會做咩呢? 突然我覺得自己之前無論點關心佢都係多餘

呢一刻, 我覺得好灰暗, 心內好痛苦, 我把呢件事話比蔡蔡, mandy, edwin知, 佢哋都叫我唔好放棄, 而且睇得出f先生都好d鍾意我, 唔想我做佢前女友替身, 先至冇叫我做女友. 但有咩用呢? 佢心入面一直有呢個女人, 我點可做佢女友呀? 如果要等, 我都唔知等幾耐啦...我覺得佢忘記前女友好辛苦, 但我都好辛苦, 下個星期開始不用上堂, 大家應該用呢段時間冷靜下, 而家咩都唔想再去想, 我唔想再接觸愛情呢樣野, 話唔埋自由自在的生活更加適合我....

而家我唔再期待佢在msn度hi我, 唔再期待和佢sms....而家只係好想快d忘記佢, 希望佢唔好再搵我, 但事與願違, 本來想行街避開佢, 於是同姑姐行街, 點解佢仲要send短訊比我呀? 仲問我買左d咩, 話我穿高跟鞋好睇, 但我都唔再開心啦, 只想時間快d過去, 慢慢學會忘記....

最後一堂英文堂

今晚英文要考試啦, 我, mandy及f先生一d都未溫過, 原本我想在上堂時溫書, 點知miss已經同我哋溫返考試內容, 這樣都好, 起碼我哋對內容有d認識先去考試都好!

呢次考大家寫letter of reply及enquiry, 好在在復習時已經記得哂個格式和生字, 大約都算認識做呢份試卷, 而且仲有二個字時間剩下,仲有我堅持係唔加紙, 因為我唔加紙的成績比加紙好?認真騎呢~!?而且我呢日仲要冇帶文具, 要問mandy借添! 不如我連個腦都冇帶, 好嗎?

放學之前十分鐘, 先知今日係英文最後一堂, 本來所有同學都差唔多走哂, 而波特先生話影相, 於是我叫返d同學仔返黎影相. 我哋呢班的同學仔真多事, 竟叫大家留返個位比f先生企在我附近. 你哋痴咩線呀, 影相就影相啦! 我左擁mandy, 又抱tracy, 冇位比f先生企啦, 早d影相啦!影完之後惟有叫f先生在msn比返d相我先^^

但d同學好似話我話上隱, 最後放學時仲抵死話我應該同f先生一齊坐校巴返屋企, 話咩嫁夫從夫, 撞鬼你地咩, 邊個話我嫁左架!?d人想像力真係豐富!其實我覺得自己係嫁富豪囉~!!唔好再話我和f先生啦, 我就冇咩所謂, 但人哋唔鍾意囉!

白痴的我!?

今日f先生又唔同我msn, 可能佢個老闆在公司唔可以msn的關係吧? 於是佢又同之前一樣同我sms. 本來我哋毎日都用sms傾計不足為奇, 無端端見到有個短訊, 話因為個電腦壞左而唔可以msn, 起初我以為係f先生冇得用msn傾計而send短訊比我, 於是我一直照覆, 但後來佢又send左短訊講佢冇食藥之事. 吓~!!?點解d內容完全不同? 後來結果終於揭曉, 原來電腦壞果個係蔡蔡, 睇醫生係f先生, 好在打之內容完全冇錯, 唔係真係鑼死啦! 弄清楚之後, 大家再各自各傾..但由於同蔡佢用電話台唔同,毎一段訊息都要收錢, 我哋只好傾少d啦~

大約六點幾, 見到蔡蔡終於上網啦, 原來佢而家用緊部電腦(之前係janice用)的電腦中左病毒, 要mandy特登返屋企send個防毒軟件幫電腦掃毒, 佢用住小生部電腦同我傾計. 佢的心情好差, 除左我之外,唔想同其他人傾計, 本來我都想同佢傾耐d, 可惜今日我要同屋企人食飯, 補祝我媽及姑姐生日...我, 媽, 爸, 妹, 姑姐, 弟及弟婦今日去食泰國餐, 可惜我哋全家掛住食, 即使自己帶左相機都唔記得影相..(汗)..今日果然係多白痴野...點解今日會這樣架!?最後只記得影底門口個像....

個像真好鬼核突, 點解我會影埋架....? 自己真係白痴嗎?

好羨慕呀(>_<)

今日約左靜出黎, 原本係去用塔羅占卜一下f先生係咪我真命天子及之後戀愛的情形, 但我自己後來縮沙, 唔敢去占卜, 驚f先生唔會係我真命天子, 以及佢係我而家最重視的異性朋友, 我驚自己會受唔住呢個刺激. 所以最後只好約靜去仙蹤林飲杯野傾下計.

靜佢在msn認識個階級男而家追緊佢, 毎日在電話講sweet的說話, 例如:[放工時即刻想到你, 如果放工時在你身邊抱住你就好], [好掛住你]...仲叫老婆, 女友等等...其實佢哋一次都未見過, 點解可以好似情人般親密? 最重要係個男仔承認靜之地位. 而我呢? 佢一直都冇叫我做佢女友和講過呢類說話, 有時心在想佢究竟當我係什麼? 令我覺得好不安及辛苦, 又唔知對呢段算係戀情放唔放手? 惟有自我安慰地想f先生和我都唔太習慣對自己like的人講肉麻說話...講到呢度, 我真係好羨慕靜及毎位拍拖的朋友, 起碼佢哋有個名份...原來名份係非常重要....

食完野之後同靜周圍行下, 最後決定去到花虛行下, 點知呢個時候, f先生狂send短訊黎, 問我在邊度及可不可以msn, 我以為佢有咩重要事, 於是離開靜趕住去公司度msn. sorry呀!靜(>_<)點知佢原來只比我睇佢份攝影功課d相!!??唔係掛? 佢call得我這樣急做咩呀? 之後佢比左d相我睇, 為左表示尊重, 我先得佢同意把相放在呢度 :

f先生又教攝影技巧啦, 其實個背景本身係一張純色咭紙, 係因為光去做個漸變出黎, 加上玻璃係透明物體, 本身已經好難影, 總之就係利害!跟住仲有一張倒紅酒落玻璃杯的相...d紅酒係f媽倒架, 好正!!

唉~!!佢就終於做完攝影功課, 但我仲未完成呢~於是佢send左二張比我, 都係同我功課係同一主題..

真係影得幾美, 我拿左佢d相交功課真係唔會穿幫嗎? 我妹話咪當問人借部相機加撞手神影囉~!!難得佢比左二張美相我, 我點會唔用啊? 於是我問佢真係唔介意嗎? 佢話完全唔介意, 仲叫我拿去用添, 哈哈~多謝你~

之後佢補返我哋全部同學仔在星期六睇燈飾之大合照, 大家睇睇吧~不過影得我好鬼核突(>_<)

最後趕住睇top model而拿拿聲在公司返去, 點知只重播上幾星期之內容, 總之我就唔趕啦~不過睇返電視及和f先生sms就算數啦, 而且我仲知道一件事, 原來f先生和我一樣都覺得自己唔太型仔及美女, 所以唔係太鍾意自己d相公開. 連呢個想法都一樣, 真係呀....!!??

感動(個blog終於唔係只有字)>__<

由於漏左拿手提電話的關係, 我要特登返公司拿返, 竟見到個電話未接電話紀錄之中, 居然有成7個未接來電, 而且全部都係f先生打黎, 仲要在半個鍾之內打左7個電話!?跟住再睇sms之內容, 見到佢真係好擔心我, 大致講係: [我打電話比你又唔聽!], 又或者[你唔係發生咩事, 唔好嚇我..], 我見到之後都非常感動, 因為而家已經好少有人真係好關心我, 多謝你, fantasy~!!

之後無聊便msn, 同左靜及edwin傾計之後就見到f先生, 之前唔知同佢講開咩野, 叫佢用msn比佢之前自己做model的相我睇, 真係好鬼死型呀(>_<), 我仲用左呢張相做電腦壁紙添! (其實f先生唔like我把佢張相放在呢個blog度, 因佢覺得自己唔型仔, 但我和我d朋友一d都唔覺!) 佢呢樣野都好似我, 明明自己唔係樣衰, 總係話自己樣衰, 而家連我都覺得自己怪怪地....

估唔到佢化左妝真係好型, 而且仲好有日本仔feel, 原來搵左好耐, 有一個已經在我附近. 不過原來佢自己本身唔鍾意呢個打扮. 真係可惜呢~佢本身好型仔的說, 最重要佢自己鍾意就得啦!

原本約定同蔡, eva及蕉今晚去食飯, 點知蔡最後唔可以出席而取消左, 我也跟同學去尖沙咀影相. 後來f先生在sms入面同我講, 話佢知道我今晚有我去, 佢覺得好開心, 當然啦! 我又可以比佢玩麻~!講返正題先, 我跟住mandy, f先生, berry, winnie, 阿ling, 波特先生, edwin, 阿銘及model王先去旺角先, 因有二位仁兄同f先生先去國美買機, 我哋便去沙爹王搵定位先. 呢班同學仔真抵死, 特登留返個位比f先生坐我隔離, 作死你哋呀~!!!??

食完飯之後, 我哋一行人坐巴士去尖東, 在途中f先生成日整我背心外套頂帽, 我之後又追打佢, 其他同學仔都睇唔過眼, 都紛紛走開左, 我都唔想架, 你哋返黎呀~!!

坐左一陣車, 終於到左尖東啦, 第一處所見的地方係海運大廈, 當中佢聖誕怖置好美呀!一於大家氧個相機出黎影下相先啦^^

哈哈~~真係好美, 而且果度又好多聖誕樹及雪人, 好鬼正呀! 於是觸發我有第二份攝影功課的靈感, 就係影聖誕樹之飾物. 單憑一個普通相機又點可以影得美呢? 於是f先生突然放塊星鏡在我相機鏡頭底, 影出黎的相真係美到不得了!!!似乎搵八個不同的聖誕樹又真係難左d, 而家show住二張先~

頭先咪講左果度除左有聖誕樹外, 仲有雪人, 其中有個雪人好得意, 係真人扮架! 而且仲係鬼佬, 佢見到人就會唱聖誕歌, 又會同細佬仔握手及講再見, 真係好正~

入到去海運大廈時, 我對boot隻跟食左, 即係隻跟成45度角斜, 行得我勁辛苦, 隻腳非常痛, 好在有mandy全程附住我, 當f先生知道我隻腳痛時, 佢即刻走去附我, 也即刻比同學仔影相, 而f先生驚我比其他人笑而冇去附我, 但唔緊要啦, 你在途中不停問我有冇事, 我已經好開心^^

雖然我整到隻腳, 但我也唔想破壞大家開心的情緒, 惟有頂硬上啦! 我哋先去到海旁, 由於我隻腳痛, 坐在欄杆度, 我也無端端做左大家同學仔之模特兒?但好在有winnie及model王合影storyboard之內容, 真係好鬼抵死! 我都影返張笑下先

見到大家同學仔影得好落力, 好開心, 於是我影底左大家影相的情形 : 全部人放哂d腳架在地上, 個場面真係好壯觀~
去到星光大道時, 大家建議一齊影張合照, 其實呢個建議暗藏住一個陰謀, 就係叫f先生較左時間影相時, 佢哋即刻走開, 只剩下f先生和我影合照, 最後當然係...失敗啦, 我哋見到你哋走仲唔走咩! 結果影到一張我, f先生及走不切的model王, 張張真係勁好笑, 一於問返f先生影返張先~其後我和mandy一齊在星光大道個聖誕樹度影相..

去完星光大道影相之後, 去最後目的地, 海旁燈飾一帶影相先, 我哋終於影到主角啦, 大家比心機, 落力d去影相~!!

大家影完時已經十一時幾, 我哋都要返屋企啦, 呢日天氣好寒冷, 我見到有個阿婆在天橋度賣個心型的鎖匙扣, 我見佢可憐, 咪想幫襯佢, 點知要成二十元, 我仲唔走咩? 其後佢講十元, 我都因為佢誇大價錢走左. 其後winnie叫我不用可憐那婆婆, 因佢跟本唔係靠自己努力去自力更生, 仲話以前在街度見到有一個阿婆, 無論天氣幾寒冷都好, 都會努力表演, 結果winnie比左50元個婆婆. 無錯, winnie令我明白到好人係重要, 但不可不分青紅做白去幫人, 否則傷害的只有自己...

當大家集合時, 發覺berry及mandy唔見左, 於是winnie叫我打電話比佢, 後來終於見到mandy, 而且佢仲比左頭先婆婆個鎖匙扣我..好感動呀, 估唔到你會買比我, 要你破費好唔好意思! 但真係好開心, 呢份係我第一次收到佢禮物, 而且仲係心型[love], 難道係定情信物嗎? (笑) 我會全程都拿住佢, 唔緊要啦~!!最後大家各散東西, mandy因為媽媽打電話之監督而要盡快返屋企, 但佢屋企在佐敦, 唔緊要啦! 同埋希望佢可忘記呢日傷痛之日子! 以及你送呢份禮物比我, 一直都聽我講心事, 真係好開心, 多謝你! 至於我, f先生, berry, 波特及edwin就一齊坐地鐵. 當中講到edwin佢哋坐小巴, f先生建議佢哋在油麻地坐會好d, 最後佢哋全部在油麻地落, berry去到葵芳落車, 咪即係只有我..和f先生?

到左旺角之後, 我和f先生行去坐小巴, 途中經過7-11, f先生想買食物及飲品, 當佢想飲野時, 我叫佢唔準買冷飲品, 於是佢冇買到, 變左買豆沙及花生餅. 買完飲品食物之後, 大家再行去坐小巴, 途中見到一間街邊有間類似茶樓物體有點心賣, f先生話不如我哋二個都坐在果度食, 我心內厭貴及不喜街邊食野, 好似好污穢, 所以不太願意; 但如果佢鍾意都冇計, 最後我哋一件點心都冇食就上車

在車上, f先生把紅豆沙餅比我, 我都覺得唔意思, 後來佢話mandy都有買野比我, 於是佢又請返我食野, 我也搣左d比佢食, f先生又食返自己個件, 佢話我那件不太乾, 於是我再搣比佢食之外, 仲要餵埋佢添! 佢當然話好味啦, 我從未試過餵男仔食野....跟住佢見到mandy比我個心, 佢成日都想食左佢, 我當然唔比啦, 於是佢話咬我隻手, 唔係...佢想咬我個nose, 唔得呀!你好鬼大力咬落去(>_<)最後佢見到我隻腳痛, 問我要佢附我返屋企, 當然不用啦!我唔想你因為我而哂錢, 跟住佢話在我屋企住一晚, 但我屋企太亂, 唔適會招呼你, 而且我哋的關係也不明顯, 所以我拒絕佢, 佢叫我返到屋企打電話比佢.

一返到屋企, 我全家人都未訓教, 好在f先生冇黎到, 唔係比全家見到就..真係水洗都唔清啦! 我到左屋企之後即刻打比f先生, 傾左一陣f先生話唔阻我去沖涼, 仲叫我沖完涼sms比佢, 結果我哋sms至2時先至訓教, 好累呢~

對唔住呀, 麻煩到你(>_<)

話說我今日趕住返學, 個手提電話留在公司, 當我發現冇拿到電話時已經係6:15, 我當然去撞下運氣, 去返我哋約定的老地方深水步地鐵站睇下撞唔撞到對方, 結果等左十五分鐘都係等唔到, 我只好自己返學. 由於我哋成日一齊返學, 又講又笑, 唔習慣只有自己一個返學的日子, 果陣覺得好寂寞, 我成日到處望都見唔到佢...不過卻撞到雲尼及花輪同學, 最後同佢哋一齊返課室~

去到課室後, 都仲未見到f先生, 我驚佢仲等緊我, 於是我問mandy借左個電話問佢在邊, 佢話自己在學校樓下. 我就幫佢留定位等佢返黎, 那時已經係7點啦...佢其後話比我知一直在等我, 而且仲打左好多次電話及send短訊比我,但我都未覆, 佢一直好擔心我! 對唔住呀! 下次我一定會記得拿電話, 不用你白等啦!

放左學之後, 佢突然自己一個走到我身邊, 叫我用紙寫底佢手提電話號碼, 仲叫我返到屋企打比佢, 一定會啦! 多謝你這樣關心我^^結果返到屋企打電話比佢, 佢剛睇緊電視, 話亞視有個節目會搵不同女仔做主持, 見到有二個女仔, 一個扮日本妹, 但扮得不完全似, 仲要穿低胸, 都唔知博咩! 另一個就普通女仔, 即係在角街度見到大把果d...唉, 我同佢咪評論埋呢d無聊野, 後來先得知f先生原來又問佢d女仔朋友借vivi睇, 今次真係遇到同道中人嗎? 睇黎我哋又有一樣共同之處!

仲有今日在msn入面, 好耐冇提及的edwin居然無端端問我覺唔覺得佢追緊我, 我當時真係嚇左一嚇, 點解佢無端端話鍾意我, 又問我哋認識左幾耐, 我竟然唔記得左, 佢就記得係三月開始. 弊啦! 我的記憶力差左好多...之後我問佢點解鍾意我, 佢話覺得我心地好, 份人單純...吓!?原來我自己係這樣嗎? 這樣即係好嗎? 仲有一件事令我不知點解, 當edwin話鍾意我時, 我竟然有d疑惑, 到底係點解呢?難道係因為f先生仲未比女友的名份及仲未拖手, 令我懷疑佢係咪真正鍾意我之緣故嗎?

波濤洶湧的一天

今朝如常坐地鐵返工, 見到個鬼佬及個女仔上車, 個女仔指左鬼佬所去的地點方式之後, 個女仔就走左. 後來個鬼佬走到我身邊問我路時, 我都覺得好詫異, 其後我都答左佢. 估唔到佢就問我而家去邊度, 又問我姓名, 我咪一五一十講比佢知, 後來我先知佢叫william, 係美國人及周圍去教英文, 呢次只黎香港旅行, 而家去中環申請visa. 但時間過得好快, 我要落車先, 佢同我握左幾次手, 仲話我好好人, 想問我拿個e-mail地址, 但我冇筆而唔可以比佢, 佢又講個e-mail地址, 但我冇記性, 又唔記得左, 呢件事就完左...其實個鬼佬好型, 而且又熱情及好人, 冇同聯絡方式又可惜左d...呢次都係第一次比鬼佬問路, 仲要讚我stylish~!!

由於f先生公司的老闆出去工幹未返, 所以可以同我在msn傾足成日, 當中講到佢話要在返學(上堂cs掉左呢個星期上堂)之前幫同學去鴨記買野, 問我去唔去, 我有得話唔去咩, 同樣係同一個理由 -因為鍾意佢! 最後我咪應允佢. 當中f先生仲話買完野之後, 要我拿住東西, 佢抱起我. 當時我在公司度差d開心到笑左出黎, 但要忍住, 因為係返工時間..佢突然彈左呢句野出黎, sweet死人啦!(>_<)

放左工之後, 我即刻去到地鐵站度搵佢, 我在鴨記睇聖誕燈飾, 佢原來去幫同學買攝影用品...這咪不算約會!?不過算啦, 由始至終我都未想過, 我哋又唔係真正情人. 大約買左二十分鐘, 我哋開始去返學, 在車上我太累, 挨在佢博頭, 佢又挨住我頭訓教...

結果我哋遲左成半個小時到返去, 呢堂係教畫人及動作, 完全蝕哂啦!我哋呢堂要在[伊沙貝拉]呢套戲之中抽取其中二幕, 畫出人物動作, 寫出鏡頭角度, 對白等資料, 呢個就叫storyboard. miss原本話要呢堂交, 但見到大家仲未做完, 惟有改在星期六交.

而且miss仲偷偷地把下一個seminar的時間拿出黎比我哋睇...真係痴線架! 我哋在星期一至五要返三日, 星期六5:00之後唔使返~~點得架, 如果我仲在呢間公司做, 在五月之後要幫客人出桃數報告及報稅, 點可以因為上堂而遲架? 不過好在我會在四月離開呢間公司, 所以對我問題不太大, 至慘係f先生, 佢為左呢次上堂而要公司就佢早走二日及星期六唔返工, 如果呢次時間表又落實, 佢一定好難再向公司交代呢~~佢一直為呢件事唔開心, 仲send sms及打電話比我, 我也向佢提出二個建議 : 一係再和老闆商討返工時間, 改為星期六補時, 一係要公司出信向IVE申請唔讀其中一科. 希望你最後可以同我...及同學仔一齊讀書及畢業啦!點解我會因為佢唔開心而唔開心呢?真係唔明白...