差d比人鬧呢...仲有應該冇問題吧?

我和fantasy 毎日都在msn傾計就唔使講, 不過唔知係咪我哋傾得唔夠喉, 竟然仲學人玩起sms黎. 由於我個電話冇教消音, 佢又成日用sms同我傾計, 所以個電話成日都響. 整到我姑姐下午問我 [今朝係咪我個電話成日響呀? 唔好比我知你在返工時間玩sms!] 如果叫我完全唔玩, 似乎又冇咩可能, 惟有用消音玩吧~!!(真係衰!!)

我同佢一直玩sms 玩到放工都仲未收手, 玩到9:00到時, 我終於忍唔成日用英文打sms, 我打左電話比佢, 如同佢由旺角傾到返去荃灣, 途中因收得唔清而cut線, 但我哋有理冇理, 一於照傾! 後來得知佢原來又填左表抽中國鐵路, 而且仲係第一次抽股! 加油及祝你好運^^

成日講佢, 我的朋友又唔太like, 就講下蔡蔡先, 佢琴日收到個壞消息, 小生比鄭生突然終止合約, 話佢只可做到12月31日, 但小生選擇取代通知金走人, 另外, 一直在呢間公司做的阿麗也因為要幫佢姐老公手而打算唔做, 之後全公司只有佢和阿lim...於是佢好擔心自己會好多野做, 不能handle, 佢琴日好唔開心, 而且因為小生一事令大家人心惶惶. 雖然我唔知詳細事件, 但我都覺得鄭生唔應該這樣做, 除非小生真係做得好差....

呢個時候, 我都講唔到野去安慰佢, 也令我感受到蔡蔡見佢bf唔開心時唔知點去安慰佢的無奈. 而家只可做的, 只可做個聽眾, 同埋我相信佢一定又可以再企返起身, 應付小生留下的工作, 以及可習慣少左二個同事的感覺...總之佢應該冇問題的!

無聊星期日．．．

今日原定同蔡蔡去街, 點知佢琴日send左短訊比我, 話呢日去街取消, 我惟有自己食自己. 好在我妹在琴日和今日唔在屋企, 我先可以用msn, 一早見到個大陸佬, 見到我用琴日fantasy幫我影果張相做msn相, 就即刻問我拿一張...唉...我都有自己鍾意的人啦, 咪煩我!

至於mandy今日有得上船玩, 星期一先至返. 呢次或者係佢整親腳之後第一次出去玩, 希望佢玩得開心d啦!同埋小心d呀!

fantasy就同朋友去canon相機展, 但聽講另一位同學berry琴日已經去過, 佢話果度只係sell野, 冇咩睇. 但以f先生這樣愛攝影的仌黎講, 或者佢又會朋友或者美女朋友去呢~不過是但啦, 至緊要佢開心咪得!

仲有多謝另一位男同學阿銘, 即係琴日幫我整nds咭果個, 佢已經幫我upgrade張R4咭, 仲話可以玩到cooking mama 2之外, 也幫我搵個wall paper, 除左唔該之外, 都唔知講d咩! 好野, 原來唔係張咭壞, 不用買過另一張, 唔係就蝕哂^^

而我就...哈哈~~一於就做功課, 溫書, 打blog 及聽歌啦....應該呢日都唔係太難過掛!?

去fantasy 屋企之旅

今日下午就係準備去fantasy屋企, 在12:00幾我已經打電話比fantasy, 問佢點去屋企, 佢又話唔使太早, 於是在12:20又打電話比佢, 佢話幫我上網搵巴士資料, 叫我行住車站等佢電話. 講完電話之後, 就即刻去巴士車站.

當我去到車站時, fantasy 又打電話比我, 叫我坐一架號碼53號巴士去三聖村, 我等左成四個字先至有車, 上左車之後我即刻問司機在去到三聖村時通知我. 沿途見到好多自己冇咩去過的地方, 如黃金海岸, 咖啡灣, 小覽...!?原來好多地方冇去過, 可能d朋友又不太活躍, 好少出外活動. 相比起呢班同學仔, 佢哋比較活躍d, 如果得罪所有我d好友, 就先講聲sorry! 至於屋企人就...佢哋都係釣魚多, 我自己又冇咩興趣, 都係在屋企.

終於去到三聖村, fantasy 又打電話比我, 又話要坐輕鐵添! 我從未坐過輕鐵, 玩咩? 所以就發生左一件笑話, 就係在坐輕鐵時, 我冇用八達通入閘, 在友愛村站時, 見到有職員用八達通讀咭機檢查車客出閘. 好在我見到勢色不對, 加上自己唔識路, 於是下一個站落車. 後來去返上一個站見到fantasy, 佢話我真係好彩, 因為平時職員會上車檢查, 同埋在各站檢查, 我同時避過呢二件事, 唔係我坐霸王車會比人罰200元, 好彩~!!

幾經辛苦, 終於去到佢屋企樓下, 我先影左張相作為留念先, 因為我驚呢次係第一次, 也係最後一次去佢屋企~~ 好傳統的公屋, 自從我麻麻過身後, 好耐都冇去過呢~好似有另一種感覺, 有d熟悉, 但又有d陌生. 總之唔知點解...跟住我就去左佢屋企, 而佢也講左比佢媽媽知, 連佢媽媽都笑呀(=_=), 自己好失敗....跟住佢比左自己少少作品, 及佢幫波特先生影的好笑相. 睇完相之後同佢玩bio hazard, 不過係佢控制角色, 我負責從旁幫佢想辦法過關及睇住佢玩. 佢一唔識玩就借d已挨去我博頭, 而我也挨返去佢個頭度(面紅), 都唔知點解架, 但就好幸福^^

玩完機之後, 佢突然話幫我化妝, 我仲以為佢會唔記得添! 結果佢足足用左九個字, 畫眼影, 眼線, 痴假眼捷毛.....其中痴眼捷毛有d怪怪地, d眼捷毛好長及有d重...哈!!不過我恨左長眼捷毛好耐啦, 即使係假的都好. 本來只係化妝就算, 點知佢話幫我影相, 仲用photoshop執左好少野, 最後作品終於完成了, 登登(我係白痴嗎?) ~~

真係影得好美, 而唔係本人美(汗), 連fantasy媽都話美. 估唔到自己化妝係可以好美, 因為自己仲未化過濃妝, 多謝你為我完成願望^^fantasy媽同我講, 應該結婚會化妝掛?我同佢媽媽講, 我都未有伴侶....之後就省略冇再講...希望第時有得結婚先至算! 最後走之前當然同fantasy影左張相先. 各位老友記, 大家終於可睇到fantasy個樣啦! (哈~哈~佢真係好型仔>_<)

影完相之後, 我哋坐好多程車返學, 首先我哋坐的士出返去三聖村, 之後再轉的小巴, 途中除左見到我屋企大廈外, 佢也成日話眼訓, 成日挨在我博頭訓覺, 仲有佢竟然訓在我[大比]度訓教!? 我仲好抵死摸佢個頭. 喂喂, 在我哋後面仲有人架, 當人無到咩!?

坐完小巴都仲未完, 到左青衣城仲要坐巴士, 真係坐車坐到夠囉(>_<) 在途中佢成日撞我個頭, 我就冇所謂, 至緊要大家開心咪得, 都比佢撞慣啦! 我哋落左車之後去7-11買野食, 當中佢買左一支藍莓檸檬汁, 我就冇買到, 但又想飲, 於是佢飲完之後到我飲, 這樣咪....即係間接kiss!!???起初我都有少少不願意, 但佢又唔介意, 最後都飲左囉!

d同學仔見到我哋一齊返, 加上化個濃妝, 於是特登問我哋咩事, 起初都冇答, 後來佢哋追問下, 終於講左我和fantasy一齊去影相, 而fantasy 也一早把相儲存在psp, 佢即刻比大家睇, 大家都話好美, 而我應該開心吧? 最後阿光話以後搵我做全班的model, 睇黎都不用啦, 唔該!

放左學之後, 全班同學又一齊去食飯, 講開學費問題, 阿光話要在2月要一次交過二期總共成萬元學費, 我當堂嚇左一嚇, 唔係掛?如果係真咪死, 唔好話抽新股, 連賣股都唔夠錢交學費!!?跟住有同學仔叫我做part-time 模特兒. 咪玩啦, 我呢個樣點做呀, 又唔識化妝及做pose! 雖然以前在旺角街頭及中環比唔知係咪星探發掘, 大約有成8次啦, 但我驚係騙局而拒絕左, 唔係而家又返回頭路掛? 我估同學仔都係講笑, 自己唔好放在心內!

呢次同大家一齊食飯好開心, 而且我請另一位同學幫我整返張R4玩cooking mama 2, 希望你可幫我整返, 小女子感激不盡^^仲有在大家走之前買左件聖誕飾物, 可以怖置屋企啦!!總之今日勁開心.多謝大家同學仔及....fantasy^^

見家長?

琴日講開和fantasy會在星期六一齊行街, 點知佢話琴日打波隻腳整親, 改左去佢屋企同佢返學??唔係掛? 你玩咪呀? 雖然都知一定不會太巧合, 但在自己鍾意的人面前, 扮蠢d又有咩所謂! 最後我應允左佢, 在1:00到佢屋企樓下等...真係激死! 不過算啦, 見佢整親隻腳, 而且又幫我化妝影相, 而且都從未見過自己化濃妝個樣. 呀! 咪住先, 如果佢阿媽又在屋企, 算係見家長嗎? 好似我都唔係佢正式女友, 應該唔會掛? 都係唔好想太多, 應該只係純粹影相及打機!

其實自己起初一聽到話去佢屋企, 我都有d驚嚇, 不過佢話成日帶朋友上屋企, 這樣都好d. 因為自己也係第一次去男仔屋企, 尤其係自己鍾意的男仔, 所以特別緊張. 但都唔驚得太多, 既然都應允左, 都冇辦法啦! 惟有頂硬上!

在下午4:00幾到, fantasy 突然在msn個offline 模式同我傾計, 問我有冇睇到佢個sms. 吓!? 我以為係廣告sms, 所以冇理到佢, 所以我立即睇個短訊, 佢問我[係咪一齊返學?]我開心到差d大叫起黎!於是在msn度覆佢可以啦, 我哋約好左放工之後即刻打電話比對方. 呢一刻覺得自己好幸福及浪漫

放左工之後, 我即刻打左電話比佢, 約在深水步地鐵站車尾等佢. 由於佢腳傷而遲左, 但都唔緊要啦! 不過自己都有少少話佢遲到, 自己都係唔夠體貼, 睇黎要學下先~直至一齊坐小巴返學, 佢都係鍾意改我花名, 又話自己係火星人, 要帶我返火星.....真係笑到臉到痛埋, 真係誇張!而且佢又鍾意撞我個頭, 佢個頭好硬, 撞得我好痛, 但痛得黎又好sweet, 痴線!

返到學校之後, 似乎引起好大騷動. 我哋班同學仔叫我哋坐埋一齊, 仲要係第一行, 比佢哋睇住! 唔係掛? 呢個情況係人都唔應承啦, 於是我坐在mandy隔離, d同學仔在度話[做咩唔坐埋一齊?], [做咩丟下fantasy唔班呀?], 總之比佢哋煩死啦(>_<). 最後fantasy坐在我前面, 大家上堂啦, 唔好嘈呀! 仲有一件事開心, 就係上次冇溫到的數學竟然及格, 而且仲高fantasy四分, 好野!

最後放學時, 阿光買左彩虹糖, 又話我鍾意食! (因為之前fantasy買左彩虹糖一事, 唔鬼多講!), 整到d同學仔成日買彩虹糖! 點知fantasy 又把包糖放在我衫後頂帽度, 跟住我嬲到即刻拿出黎, d糖fall 哂落地下, 之後丟去垃圾箱. sorry 呀, 阿光, 要怪就怪佢啦~~(哭)

這算係約會嗎?

今朝問fantasy, 星期六果堂CS堂係咪取消, 連佢都唔知道, 後來佢問同學仔先知真係唔使返, 佢仲話不如行街吧!於是我問佢, 係咪和同學仔一齊行街, 佢竟然話唔係, 只係我哋二個行街.吓~!!!呢個咪即係約會? 但我在msn又唔可以表示驚訝出黎, 不過我最後都應允左佢. 而去街的時間大約三個鐘, 時間應該唔短掛? 但自己已經好開心, 因為呢次係第一次正式被男仔約^^


至於行街行程, 地點仲未定, 佢話等佢考慮一下先, 之後就趕住返工. 但係任何一個女仔聽到有男仔約自己, 尤其係自己鍾意的人, 一定開心死啦! 結果我真係開心左成日^^

在放工之後, 有一個在msn度認識的大陸男子突然問我係咪有戀事發生, 雖然我和f先生未正式一齊, 但我又想拒絕其他男仔之追求, 於是用左f先生過橋, 話我同佢已經在一齊. 個男仔最後話好可惜, 指我已經有個男友, 因為佢之前問我可不可以接受有個大陸男友麻~不過佢好似仲死心不息, 要求我要同佢視象通話, 我都拒絕左佢. 於是佢就冇再上網.....不過事後我都覺得自己好似太絕, 所以比左個offline 訊息比佢, 希望佢唔好嬲!

其實我覺得搵到一個自己鍾意, 個男仔又鍾意自己的人已經好難, 所以都唔可以這樣貪心, 仲想有男仔追求自己. 雖然佢未正式和我告白, 而且仲未拖過手, 但我都會一直等....

這年聖誕會浪漫嗎?

琴日話說見到fantasy在下午5:00幾竟然在msn上左網, 我走過去hi 佢. 點知佢冇回覆我, 於是我今日向佢提及呢件事. 我都仲未問佢原因, 佢已經好詳細去解釋全件事, 而且仲話驚我及唔想我唔開心, 多謝你!

同埋我終於知道佢返工時間係十一點至八點, 唔怪之得佢在九點尾先至hi我, 我哋毎日都傾半個鐘, 可能已經成為左習慣啦, 不過同佢傾計自己真係好開心及安心....不過佢放左工仲要在佢屋企做part-time攝影, 睇黎佢好辛苦呢~

再講佢會悶親大家, 不如講下一直支持我呢段戀情?的蔡蔡及mandy, 佢哋都好全力支持我, 今日同佢哋講起f先生呢件事, mandy 就建議我在聖誕節之前織一條頸巾比佢, 其實我都想織比佢, 但問題係我哋跟本唔係正式在埋一齊, 如果送比佢自己會唔會好cheap? 仲有我跟本唔認識織頸巾, 連自己都未織過比自己, 第一條竟然織比佢, 會唔會難左d呢? 我驚佢等到我下年都未織完, 這樣就核突死!

最後先至原來我哋三個都有同對方傾計, 總之開個三人會議啦! 在傾計之中, 蔡蔡提出佢一早已經想好的意見, 交換chocolate, 佢在又一城買, 我哋二個都同意, 希望我哋唔會買同一款chocolate吧! 估唔到我哋三個都鍾意食, 太好了! 我好期待呢一日^^

多謝各位好友支援小女子之戀情

首先我好多謝大家一直睇我個blog, 尤其係留意我和fantasy之故事, 無論真係關心又好, 當做電視連續劇又好, 都多謝支持先^^

講真果句, 這樣大個女雖然都有比男仔追過, 但一係我唔鍾意佢, 就算鍾意, 自己又驚受到感情傷害, 最後都係無疾而終. 所以到而家一直都未拍過拖, 雖然係寂寞, 但自己覺得總好過其實一腳踏幾船及隨便的女仔. 也因為係這樣, 也冇咩戀愛經驗....

唔知個天係咪可憐我, 比左一個好關心我, 顧及我感受, 直率, 喜愛講笑的男仔, 令我再次有種戀愛的感覺, 原來拍拖可以好sweet及開心, 令我忘記過去之傷痛. 雖然情緒常比佢牽引, 成日在屋企等佢電話, 但自己覺得真係好幸福. 可惜只係欠一個名份, 有呢樣野就最好....

也因為呢件事, 好多朋友有不同睇法, 有d人認為佢已經一步步追我, 而且仲話我好sweet, 自己男友也未必係這樣; 有d就話個男仔仍未算追求我, 因為仲未發展去約去街之地步. 但無論佢係咪追我, 我已經覺得好sweet, 最重要係相信自己的感覺!