恭喜哂你, veron, stella!!

琴日上堂之前, veron突然打電話黎, 佢問我聽日會唔會去浸大同佢影畢業相, 我當然會去啦! 於是我打電話問蔡蔡去唔去得, 佢因為工作而唔去得. 而eva及蕉一早已經同veron影左相, 所以最後只有我一個人去...

我準時去到集合地點 -九龍塘地鐵站, 但veron話會遲4-5個字到, 唔緊要, 我點都會等埋你~之後stella, fanny及elaine 都到左, 佢哋都有化妝去, 只有我冇化, 鬼咩! 自己d皮膚差到貼地, 冇計! 去到浸大當然要大影特影, 首先係飯堂出面先 :漏左一提, 由於果日只有我自己一個去, 冇送任何東西比veron, 真係sorry, 好對唔住, 最多請你食返餐飯(>_<)

左邊花 : 係veron 男友送比佢, 中間隻布甸狗係elaine, fanny及stella 三人夾份送比veron. 而最右邊花係stella

只係因為個回收筒得意先至影, 自己真係好鬼無聊!

在veron 行畢業典禮個禮堂之前度影, 後面勁多人排隊等位呢~

呢度係行禮禮堂附近個石雕度影, 估唔到呢塊石雕都幾鬼多人影,毎個人都爭取時間黎呢度影, 我哋幾經辛苦先至去影到

之後去左石雕隔離個草地影, 幾驚走光啊!不過應該d人掛住影相, 冇人睇到掛? 放心~~

呢二張係上到浸大天台, 第一張在獅子山下影, 第二張在有浸大新校舍影, 我自己比較鍾意第二果張多d^^

由於我要趕住返去做filp book, 所以我哋要盡快去另一個校舍 -城大度影, 本來原定坐的士去, 但最後都係行路, 由又一城入口入去, 果陣管運雨都黎埋, 佢係因為學普通話先至遲. 在門口影完相之後我也返屋企做功課..

最後一句 : veron, stella, 祝你哋畢業快樂^^

原來影相, 食飯都可以好開心

首先要多謝二位仁兄, terry 及 fantasy 努力教我用半專業機影相, 尤其係terry, 佢仲借埋佢部機比我影相, 真係非常多謝你!!

點解會無端端學影相? 其實係這樣的....話說呢堂攝影教影景深淺, 即係有d物件影得好清, 有d影得好模糊個隻之類啦! 我用學校部相機影極都影唔到呢個效果, 仲驚自己冇得交堂課添, 好在呢個時候見到terry又影相, 佢唔知係咪見我影得差, 跟住借佢部機比我同埋教我. 在呢個時候, fantasy 及edwin都黎左, 於是開始我個攝影堂, 首先係terry 教我點樣對焦, 之後fantasy見我連機都唔識揸, 仲揸住我隻手教我添. 唉~!!學左二個月都唔認識揸機, 真係羞家(>_<), 跟住就用terry部手提做訓練...

哇~~!!呢張係我第一張影的相, 真係唔知係咪撞手神, 真係影得好到難以置信!? terry話我第一次影竟然影得仲美過佢成日影, 難道我係天才嗎?(笑)我都係講笑, 自己點會係天才, 只係撞彩影得好, 同埋二位教導及terry 部機, 多謝哂你哋^^

之後要影多三張交堂課, terry 仲自動請櫻做我的模特兒, 又出錢又出力, 除左多謝之外都唔知講咩, 不過呢次真係影得麻麻地...

呢個係影阿光頂帽子, terry 在後面做人肉怖景板?

呢次倒返轉, 係影terry, sorry, 你個花名係波特先生, 哈哈~~

sorry, 我成日唔認識把張相打直!? 呢次主角係建築物, 之後係波特先生, 最後係頂帽, 呢張好似又影得唔錯, 真係我影的嗎? 而波特先生也影左我, 作為影人的一張相 :
terry都話呢張相係佢當日影得最好的一張, 連我也覺得好美呀(>_<)相中的自己跟本美到唔似真正的自己, 因為自己在果日跟本冇化妝, 張相也冇執過, 一切只係部相機及自然環境的利害

上完攝影堂又一齊去食飯, 因為阿駿, 青衣人生日, 我哋去左葵芳的葵清廣場三樓間餐廳度食野, 我哋差唔多全部人叫左晚餐, 因為只係四十幾元, 除左壞人及阿光冇叫, 我哋十個人都叫晚餐, 而晚餐之中有分牛柳及雞排, 我和fantasy 食牛排, 其他人就食雞排.

應該話我哋二個好彩, 原來雞排d汁係勁sweet, 勁難食, 好在自己叫左個板燒牛柳, 呢個真係幾正, 好好味!!但自己都係食唔哂, 好在冇叫件雜莓芝士蛋糕, 唔係一定食唔哂!

最後食飽飽, 女仔當然係行街, 我, berry 及winnie 三個女仔行街. 途中撞到阿花(fanny), 佢仲叫左我個名~好啦, 我哋聽日去浸大和veron 影畢業相見!

恐怖與開心??

最近呢二日去左葵興果邊工作, 當然勁唔想啦! 除左果度冇人傾計(msn?)之外, 仲有見到一件史前未有的大[豬排], 認真難頂!!!之唔係又係個件姣kitty囉! 佢個樣之前已經大約形容過, 係帶粗框眼鏡, 粗眉, 個樣仲有d似八兩金, 呢樣不特止, 佢仲要剪楊丕琳而家個頭!!哇~~唔係掛?佢真係名符其實的[豬排教主]囉! 佢仲要化埋妝個隻, 仲以為自己好美女, 令我明白即使係化左妝都未必係美女呢個道理.



我覺得女仔唔美女都唔係問題, 因為樣係天生, 但有自知之明先至重要! 自己唔係美女, 唔該唔好學明星打扮, 髮型...唔係真係適得其反! 好似楊丕琳這樣美就話, 剪呢個頭絕對唔係問題, 但自問自己唔太美的人真係唔好剪呢個頭

sorry, 我想拿楊丕琳最近呢個頭比大家睇下, 不過拿埋蔡依琳就冇計, 其實我想講明係件kitty剪左就係類似呢個頭, 不過佢唔係齊陰, 而係斜陰, 見到堂粗粗的眉, 運用下大家的想像力, 想像下呢個頭加八兩金個樣, 就知幾難頂!

好啦, 講返返學先, 今日黑仔度八達通冇哂錢, 仲想去買野食, 好在fantasy佢扮哂唔知(自己覺得)零食機在邊度, 捉埋我一齊去買野食, 唔知呢d係咪叫心靈相通, 大家都想買熊仔餅, 最後佢買左比左我, 我算欠佢錢嗎?仲有我又冇錢坐車, 阿光又比左散銀我坐車, 睇黎我即將係呢班最大的債仔. 朋友這樣熱心幫我已經好開心,

不過在winnie人中得知mandy隻腳趾尾骨斷左, 要打石膏, 希望佢快d好返, 一齊返學!!仲有tracy佢頸根傷左, 佢話係長期工作所引致, 又係呢句, 希望佢快d好返. 同埋tracy叫我盡量唔好用斜咩袋, 會整傷頭根, 多謝你, 你都係呀, 工作時要小心d^^近排太多人唔係病, 就係整親手腳, 身體部份, 希望各位同學仔小心d, 唔好再有同學仔整傷及病啦!!

美容院絕密公開

今日又去做facial 啦, 勁正! 因為我去開果間美容院搬左去成千呎地方, 即係毎人有一間房做facial, 唔使驚比其他客仔行過時望下自己, 尤其係倒膜時個樣最核突, 直頭唔想人見到啦(>_<)

我一去到美容院, 阿pat 即刻叫我入房換衫, 我換衫其間我唔放過一分一秒, 用左個相機影左二張相比大家睇睇~

呢度係毎一間美容院之設備, 除左有床, 化妝台之外, 在牆上仲有掛架及衣架比客人掛衫, 勁方便呢~不過三個衣架應該夠用掛?

呢部就係我毎次去美容院做facial用的蒸面機, 真係勁正, 尤其係呢d乾燥天氣的良品, 我都好想要返一部呢~~總之真係好想要(>_<)

換好衫之後, 又開始做facial啦, 今次佢向我推銷某牌子的精華液, 而且話有咩維他命C, 可助均勻色斑及抗衰老, 但個價錢就襟計, 要成700幾蚊一支, 點買呀? 不過佢都比左支試用裝我, 等我得閒先至試下. 另外仲推銷左保濕及維他命B的精華液, 三支加加埋埋要成千幾元, 不過呢d野都係咪預我, 我寧願同朋友去食飯, 買多幾件衫好過, 足足成個月冇買衫啦!做完facial之後, 我去左美容院樓下商場睇衫, 但都冇收穫, 都係儲定錢, 第時同蔡蔡行街仲好啦!

p.s. (1)蔡蔡 : 呢二日要出job, 唔知佢工作及同bf開唔開心呢? 等佢忙完選舉, 我又忙完工作及設計功課, 一定要在msn及出黎好好傾下! 同埋sorry, 近排太忙冇去你個blog度留言, 第時一定有排留...

(2) eva :知你在呢個星期六和蕉去台灣玩啦, 希望你玩得開心d, 同埋我要手信(!!?講笑)

fantasy 及奶凍?

今日如常由旺角返學, 一去到葵芳地鐵站等小巴返學時, 見到排隊勁長龍, 而且在排隊其中仲見到fantasy, 原來佢在我前二個位. 其實我之前見到佢, 但唔太sure, 所以咪冇叫佢, 後來佢打我手提, 問我在邊度, 先知自己冇睇錯, 而且佢仲特登走後二個位同我一齊等車返學!

返到學校已經差唔多7:00, 今日在語言室上堂, 果課室仲可以毎人一部電腦, 我和fantasy因為遲返而一齊坐, 佢仲開左電腦比我睇佢自己的網上相簿, 佢本相簿以影人為主, d女仔真係好美呀, 如果我都有佢哋這樣美就好, 當中我見到有我至鍾意的日本仔look的男仔打扮的相, 呢個係fantasy個朋友, 佢係17歲, 仲成日發呆, 問我要唔要介紹我認識. 我當然想, 但要保持少女矜持(??)而講左是但, 費時比人知我有d發仔瘟(殊...!!唔好話人知)! 而且我哋二個傾計距離真係好近, 真係令我有d緊張, 我哋傾計仲多過聽書, 好孩子千萬唔好學!

返左學之後, fantasy原本要坐校巴, 但我口快快講左句 :[自從有d同學仔坐左校巴之後, 我哋冇得再包架小巴], 呢度先講d說明先, 其實我哋成班同學仔在未知有校巴坐時, 全部人走哂去坐小巴, 我哋全行最多有成13人, 所以見到成架小巴可坐哂全部人先至上車, 如冇位會讓比其他人上車. 但呢個局面如今已經不在. 我都估唔到自己講左呢句話之後, fantasy竟答應我去坐小巴, 太感動了!!!我哋成班(其實只有8人)又再次坐小巴, 途中fantasy仲唱起歌黎, 原來佢都聽日日文歌, 仲唱側田添, 佢唱歌在男仔之中都幾好聽架^^

小巴到左目7後, 大家又各散東西. 我又坐那架亡命小巴返屋企, 當我在返屋企途中, fantasy打電話比我, 問我去到邊度, 原來佢坐巴士在團門公路上塞車, 而我...哈哈~~我已經差唔多返到屋企, 佢話早知和我一齊坐車, 不過你返屋企的路途豈不是仲長嗎? 而家我只可為你做的係希望快d塞完車返到屋企休息吧!

返到屋企之後, 我都可以唔使食飯, 咪食埋d零食, 最近迷上[旺旺咖啡凍], 個咖啡jelly塗上奶粉又幾好食, 真係可sweet, 不過究竟係個奶凍sweet, 定係fantasy對自己好而sweet(我在度亂講咩!!??), 就真係唔知道....而家只知道快d食左個奶凍先^^

影得勁差添(汗), 大家唔好介意, 至緊要知係咩就得啦!!

個咖啡奶凍係獨立包裝, 總共有六個, 倒埋d奶粉就可食得, 邊食邊點奶粉簡直係至高享受, 多數自己會點到d奶粉冇哂..!

雜記 ~ 唔開心的一天

飛仔篇 : 今日又見到那個飛仔啦! 今次佢又同另一個朋友一齊坐車, 除左同佢果位朋友用手機睇唔知咩短片之外, 傾電話時仲要話去機舖, 又叫個fd在十二點返工唔好遲到, 佢究竟係咩人黎? 返咩工架, 聽到呢度真係好少少驚, 惟一知的係佢一定唔係個好人, 都係少接近為妙, 同埋....點解我會留意佢?

出job篇 : 老闆終於埋完葵興間公司的數, 仲要出埋核數報告, 我又要去果邊工作, 真係勁唔想! 難得我十月完全冇過去, 真係勁開心. 但一聽到之後要過去, 就即刻唔開心. 而我毎次去佢哋果邊工作, 一定要知會果邊會計, 點知佢全日唔在公司, 搵唔到佢, 原定聽日出job變左後日, 總之都係要去果邊工作啦, 真係唔制呀(>_<)

阿里巴巴篇 :呢隻真係勁股, 剛上市已經可以earn成倍, 鬼咩! 抽一手得個6%中籤率, 抽中左就真係發達啦! 成日可earn 成萬三元, 足足多過我一個月人工!!!!可惜我係....我和姑姐都抽唔中, 比個同事抽中左, 呢d咪係自己的命, 自己不嬲係個苦命人, 預左自己一定冇份!

感冒就有得中, 仲中得幾應添(哭), 結果我琴晚十點幾已經瞓左添. 本來都想去睇醫生, 但ive又要人補交返九百幾元學費, 即使公司可以claim醫療津貼, 但自己都要倒蝕50元, 所以咪唔睇醫生, 用返最古老及有效的方法 -用完藥之後在個被窩度局住, 出返身汗

又係艷遇?天啊! 玩夠啦, 唔好玩我!

蔡蔡果然冇講錯, [你唔恨個樣個天就比你!], 自問冇咩男仔緣及男仔運的我, 都已經對於愛情心如止水, 咩都唔再去想, 而且仲有買姑婆屋之打算, 點知在上星期開始, 狂比我在街上, 地鐵內見到日本打扮的男仔!!但你又唔比我認識!!!!天啊!你係咪玩我啊?

最近我返工有一個男仔, 佢黑髮, 灰色hi-light, 外表又係有d飛仔feel, 總之唔係普通打扮的男仔....我毎次坐8:20村巴, 之後坐地鐵時, 一定會見到佢. 除左同一個車卡之外, 而且仲成日在我身旁. 總之我邊度, 佢就在邊度. 聰明的大家都相信冇理由這樣巧合, 在同一時間, 地點, 仲要日日見, 都知一定冇可能架啦! 唉!!自己只係平時返工, 點解會覺得好似成日比人睇住架, 唔得! 一定要叫地鐵分男女車卡先至得!我已經受夠最近比類似飛仔的人[聊]!!

佢今日一上車, 即刻坐左在我隔離, 聽到個男人大聲講電話, 我咪望去個男人度, 跟住已經見到佢望住我個樣, 仲要望住我對大比, 先知今日衰左啦!竟然穿左牛仔短裙及長boot, 睇黎聽日要穿返條7分褲先得! 我仲見到佢幾次望下我個樣及大比, 好驚呀!我本來好想瞓, 但呢個情況又點可以瞓呀, 結果我緊張足全程, 直至佢落車時, 我個心先至定d.

之後返工msn, fantasy 又hi我啦! 我問佢琴日影相開唔開心, 佢哋都幾開心, 而且仲send 左張相比我, 都幾鬼美架, 而家show比大家睇下先~
果然係大師級, 真係影得好美!!比我就手腳都震, 佢話都唔介意同我去影相, 仲借埋部機比我, 我真係驚整壞佢d[愛機], 但佢話唔緊要, 有佢...唔係, 係大家在度, 唔使驚! anyway, 我都係驚架, 因為我一定冇錢賠! 同佢傾計都幾開心, 可惜佢因工作而唔係成日上網. 佢offline 之後, edwin 又再搵我傾, 唉!!d男仔真係源源不絕, 可惜自己又冇機會, 因為一個二個都有女友, 算啦!咪當認識多個朋友(哭)

又有少少勾起返想搵男友的願望添, 不過佢哋三個都冇機會架啦, 因為自己一定唔會做第三者!!!唉, 天啊, 當我請求你, 唔好再比呢d永遠都唔會實現的願望我! 我只係想平淡的生活, 又或者你真係比個真正男友我, 唔好令我再絕望吧!