fantasy 及奶凍?

今日如常由旺角返學, 一去到葵芳地鐵站等小巴返學時, 見到排隊勁長龍, 而且在排隊其中仲見到fantasy, 原來佢在我前二個位. 其實我之前見到佢, 但唔太sure, 所以咪冇叫佢, 後來佢打我手提, 問我在邊度, 先知自己冇睇錯, 而且佢仲特登走後二個位同我一齊等車返學!

返到學校已經差唔多7:00, 今日在語言室上堂, 果課室仲可以毎人一部電腦, 我和fantasy因為遲返而一齊坐, 佢仲開左電腦比我睇佢自己的網上相簿, 佢本相簿以影人為主, d女仔真係好美呀, 如果我都有佢哋這樣美就好, 當中我見到有我至鍾意的日本仔look的男仔打扮的相, 呢個係fantasy個朋友, 佢係17歲, 仲成日發呆, 問我要唔要介紹我認識. 我當然想, 但要保持少女矜持(??)而講左是但, 費時比人知我有d發仔瘟(殊...!!唔好話人知)! 而且我哋二個傾計距離真係好近, 真係令我有d緊張, 我哋傾計仲多過聽書, 好孩子千萬唔好學!

返左學之後, fantasy原本要坐校巴, 但我口快快講左句 :[自從有d同學仔坐左校巴之後, 我哋冇得再包架小巴], 呢度先講d說明先, 其實我哋成班同學仔在未知有校巴坐時, 全部人走哂去坐小巴, 我哋全行最多有成13人, 所以見到成架小巴可坐哂全部人先至上車, 如冇位會讓比其他人上車. 但呢個局面如今已經不在. 我都估唔到自己講左呢句話之後, fantasy竟答應我去坐小巴, 太感動了!!!我哋成班(其實只有8人)又再次坐小巴, 途中fantasy仲唱起歌黎, 原來佢都聽日日文歌, 仲唱側田添, 佢唱歌在男仔之中都幾好聽架^^

小巴到左目7後, 大家又各散東西. 我又坐那架亡命小巴返屋企, 當我在返屋企途中, fantasy打電話比我, 問我去到邊度, 原來佢坐巴士在團門公路上塞車, 而我...哈哈~~我已經差唔多返到屋企, 佢話早知和我一齊坐車, 不過你返屋企的路途豈不是仲長嗎? 而家我只可為你做的係希望快d塞完車返到屋企休息吧!

返到屋企之後, 我都可以唔使食飯, 咪食埋d零食, 最近迷上[旺旺咖啡凍], 個咖啡jelly塗上奶粉又幾好食, 真係可sweet, 不過究竟係個奶凍sweet, 定係fantasy對自己好而sweet(我在度亂講咩!!??), 就真係唔知道....而家只知道快d食左個奶凍先^^

影得勁差添(汗), 大家唔好介意, 至緊要知係咩就得啦!!

個咖啡奶凍係獨立包裝, 總共有六個, 倒埋d奶粉就可食得, 邊食邊點奶粉簡直係至高享受, 多數自己會點到d奶粉冇哂..!

雜記 ~ 唔開心的一天

飛仔篇 : 今日又見到那個飛仔啦! 今次佢又同另一個朋友一齊坐車, 除左同佢果位朋友用手機睇唔知咩短片之外, 傾電話時仲要話去機舖, 又叫個fd在十二點返工唔好遲到, 佢究竟係咩人黎? 返咩工架, 聽到呢度真係好少少驚, 惟一知的係佢一定唔係個好人, 都係少接近為妙, 同埋....點解我會留意佢?

出job篇 : 老闆終於埋完葵興間公司的數, 仲要出埋核數報告, 我又要去果邊工作, 真係勁唔想! 難得我十月完全冇過去, 真係勁開心. 但一聽到之後要過去, 就即刻唔開心. 而我毎次去佢哋果邊工作, 一定要知會果邊會計, 點知佢全日唔在公司, 搵唔到佢, 原定聽日出job變左後日, 總之都係要去果邊工作啦, 真係唔制呀(>_<)

阿里巴巴篇 :呢隻真係勁股, 剛上市已經可以earn成倍, 鬼咩! 抽一手得個6%中籤率, 抽中左就真係發達啦! 成日可earn 成萬三元, 足足多過我一個月人工!!!!可惜我係....我和姑姐都抽唔中, 比個同事抽中左, 呢d咪係自己的命, 自己不嬲係個苦命人, 預左自己一定冇份!

感冒就有得中, 仲中得幾應添(哭), 結果我琴晚十點幾已經瞓左添. 本來都想去睇醫生, 但ive又要人補交返九百幾元學費, 即使公司可以claim醫療津貼, 但自己都要倒蝕50元, 所以咪唔睇醫生, 用返最古老及有效的方法 -用完藥之後在個被窩度局住, 出返身汗

又係艷遇?天啊! 玩夠啦, 唔好玩我!

蔡蔡果然冇講錯, [你唔恨個樣個天就比你!], 自問冇咩男仔緣及男仔運的我, 都已經對於愛情心如止水, 咩都唔再去想, 而且仲有買姑婆屋之打算, 點知在上星期開始, 狂比我在街上, 地鐵內見到日本打扮的男仔!!但你又唔比我認識!!!!天啊!你係咪玩我啊?

最近我返工有一個男仔, 佢黑髮, 灰色hi-light, 外表又係有d飛仔feel, 總之唔係普通打扮的男仔....我毎次坐8:20村巴, 之後坐地鐵時, 一定會見到佢. 除左同一個車卡之外, 而且仲成日在我身旁. 總之我邊度, 佢就在邊度. 聰明的大家都相信冇理由這樣巧合, 在同一時間, 地點, 仲要日日見, 都知一定冇可能架啦! 唉!!自己只係平時返工, 點解會覺得好似成日比人睇住架, 唔得! 一定要叫地鐵分男女車卡先至得!我已經受夠最近比類似飛仔的人[聊]!!

佢今日一上車, 即刻坐左在我隔離, 聽到個男人大聲講電話, 我咪望去個男人度, 跟住已經見到佢望住我個樣, 仲要望住我對大比, 先知今日衰左啦!竟然穿左牛仔短裙及長boot, 睇黎聽日要穿返條7分褲先得! 我仲見到佢幾次望下我個樣及大比, 好驚呀!我本來好想瞓, 但呢個情況又點可以瞓呀, 結果我緊張足全程, 直至佢落車時, 我個心先至定d.

之後返工msn, fantasy 又hi我啦! 我問佢琴日影相開唔開心, 佢哋都幾開心, 而且仲send 左張相比我, 都幾鬼美架, 而家show比大家睇下先~
果然係大師級, 真係影得好美!!比我就手腳都震, 佢話都唔介意同我去影相, 仲借埋部機比我, 我真係驚整壞佢d[愛機], 但佢話唔緊要, 有佢...唔係, 係大家在度, 唔使驚! anyway, 我都係驚架, 因為我一定冇錢賠! 同佢傾計都幾開心, 可惜佢因工作而唔係成日上網. 佢offline 之後, edwin 又再搵我傾, 唉!!d男仔真係源源不絕, 可惜自己又冇機會, 因為一個二個都有女友, 算啦!咪當認識多個朋友(哭)

又有少少勾起返想搵男友的願望添, 不過佢哋三個都冇機會架啦, 因為自己一定唔會做第三者!!!唉, 天啊, 當我請求你, 唔好再比呢d永遠都唔會實現的願望我! 我只係想平淡的生活, 又或者你真係比個真正男友我, 唔好令我再絕望吧!

又有大陸親人黎? 唔係掛?

話說我琴日放左學返屋企, 有三個大陸親人黎左, 今次好左好多, 終於有得沖涼啦~(因為之前有5-6人黎, 最後冇得沖). 不過講真果句, 我真係好怕有大陸親戚黎住, 因為我一直都冇返大陸, 就醫見過都係幾年之前啦, 鬼記得佢哋邊個打邊個咩!!而且仲在我屋企好鬼死嘈, 自己又悶! 希望呢d日子唔好持續太耐, 我會死的!

加上今次仲有一個男仔親戚, 佢無論言語, 行為, 外表都似20幾歲, 但佢同我個妹講自己只有18歲!!??唔係掛?或者有d人睇起上黎和實際年齡唔同, 但難免差別太大掛? 不過佢仲有一樣致命點, 就係連我個妹都比佢高?唔係掛? 我至討厭男仔唔高, 起碼都過170cm啦. 不過如果佢真係發育未完成, 佢應該仲有得高, 或者下次見到佢時會高過我呢~~!!??

努力做好filp book!!!!

今日又到我至鍾意的設計堂了, 我在呢日返學特別準時! 我在返學之前仲買左個壽包食添, 真係好耐冇食過, 好正!

我今朝買左簿做filp book, 但我買左二本都唔符合miss要求, 好在mandy買左好多本, 佢賣左一本比我先至有得用, 多謝哂佢! 因為呢本簿的尺碼係好細, 所以一本細的拍紙簿仲要裁剪. 在剪裁完之後, 我就開始動手畫. 其實我一早有左意念, 但因為filp book的尺碼有改變而要再思考過, 最後我用左一隻game入面好可愛的公仔作為主題, 畫佢玩呼拉圈時個圈跌來跌去動作及由開心到唔開心的表情

好在在呢個課室設備算完善, 我有一個類似燈箱的物體上畫野, 呢種感覺真係好正, 好似真正的designer, 因返到屋企一定冇呢ｄ設備, 所以在果度狂做呢個習作. 可能我當時太認真, 而且係第一個在燈箱上畫野的同學, 有好多同學影左我相, 而且比佢哋睇住我畫. 不過算啦, 比佢哋影下相又唔會死, 只要佢哋唔好阻住自己工作便可以!(講笑)

時間過得好快, 畫下畫下已經到左4:50, 差唔多落堂, miss 叫我哋開始收拾東西, 最後我都係畫得九張畫, 好慘! 跟住miss同我哋講, 原來上次做果隻迷你遊戲之中, 我哋班毎組都好有心機做, 相反隔離班做得有ｄ求其, 照計我哋班習作分數應該高好多. 可能我對設計比較固執, 覺得一定要好有心機做好佢先得, 絕對唔可以求其! 所以我覺得隔離班就算真係低分也唔怪得人, 要怪就怪佢哋自己唔比心機做. 不過無論作品係高分或低分, 只要自己係用心及努力完成就得, 就算自己失敗都問心無愧!

p.s. 今日多謝蔡蔡介紹唐糖比我認識, 我哋在msn度都幾好傾. 仲有唐糖, 好高興認識你^^

又係數學堂

上星期五先至測完驗, 好快又一個星期, 又要上數學堂. 我又遲到了! 鬼叫近排多野做咩! 而且車上又被男仔話佢今日又見到美女, 應該唔係指我掛? 但我身邊又好似冇咩女仔, 就算有都背住佢哋, 又好似只有我真係對住佢哋......不過係咩都好啦, 我覺得地鐵真係要分男女車卡!

好在呢一堂係做tuturial, 即係又係做練習, 唔係又miss左d內容冇聽都幾弊! 由於我在公司即刻趕過黎上堂, 連食物都冇食, 真係餓死人(>_<) 於是我問附近mandy幾時先放break, 佢話要在8:00做完其中一個堂課後先至有得食, 唔係掛!! 8:00之前我以極快的速度做完堂課, 同mandy, 阿光一齊去7記買野食, 7記d食物都係唔好食, 而且又貴!我哋三個邊行邊食住返學校.

返到學校之後,fantasy 比佢琴日在msn度以拍賣買得的相機比我睇, 果部機係二手機, 只係二千幾, 平過ｄ新機好多, 所以我先至睇下, 對於不太熟悉相機的我睇完之後即刻比返佢! 因為近排真係冇錢, 而且自己對攝影興趣不大, 都係留返部相機比真正有興趣的人吧^^, 而我呢.....而家應該盡量儲錢努力抽新股及儲錢買姑婆屋.....!!??

悲喜交集

毎日同edwin傾計已經成習慣, 老實講, 我連佢個樣, 把聲都未聽過, 但竟然對住佢咩都講, 而且仲日日傾, 確實有d怪! 連我都唔知點解自己會同佢熟, 可能呢d就係所謂的人夾人

今日無聊講開佢性別呢個問題, 佢無端端話自己係女仔, edwin只係花名, 真名係jenny, 仲係個雙性戀者!!!唔係掛?原來我認識的係一個女仔, 點解佢講野語氣成個男仔, 而且佢自己又話自己係男仔??我都一頭霧水啦! 可能我未見過佢個樣, 而且又講到似曾曾, 當我知道佢係女仔時, 點解我會為佢而哭, 冇哂胃口食飯, 我唔會對佢.....啋!我唔係同性戀!

後來我一直冇覆佢, 佢都有問我係咪哭緊, 又整個哭的公仔我睇, 仲有一句說話 : [頭先困個只係個故仔, 唔係真架, 唔好真係相信!]!!!!!??咩話? 原來佢頭先一直玩我??我都唔知好嬲定好笑. 點解佢最近鍾意玩我架? 可能佢覺得我情緒起伏太大, 覺得我好玩掛? 最後自己知道佢係真正男仔都開心返, 一直同佢傾計至佢放工.

==================================================

之後去左美容院做facial, 有成個星期冇去過啦! 我見到有個見習美容師-finoa開門, 佢都ok美的, 由於平時幫我做facial 的阿pat仲未返, 有另一位美容師幫我洗面, 佢好似日本妹, 都幾美架, 但我唔記得左佢叫咩名. 我哋二個仲講起琴日哈囉喂有冇節目, 結果.....咪又係在屋企, 佢話佢有d朋友都想去玩, 但見到下午已經勁多人, 於是最後都冇去, 都係留在屋企!

後來講起去迪士尼, 海洋公園d哈囉喂節目, finoa 又走過黎一齊傾計, 我哋三個傾左十多分鐘, 阿pat 終於返黎啦!

唔知我哋係咪二個星期冇見呢, 我哋今日好多野講, 在做facial 的過程之中, 同佢傾左好多話題, 其中一件事係買衫, 佢話想買工人長褲, 問我係咪興, 其實我都唔係太知, 所以都答左係, 原來佢打扮都幾簡單, 又係tee及牛仔褲, 不過穿咩都好, 至重要舒服便可以......跟住佢話葵涌廣場有d女仔, 穿條褲及裙好短, 見埋pat少少添, 佢仲同個男友估佢穿咩色內褲, 結果係....紅色!!佢哋二個仲笑住走!!哈哈!!

仲有仲有而家d女仔真係open, 有個客講話有個21歲的女仔竟落左四次胎, 個醫生仲叫個女仔唔可以再落, 呢個係咩世界黎架? 仲要最近果次同個20歲的鬼仔做左, 有埋bb, 但男方媽媽唔認個仔. 唉!!真係世風日下, 而家d人覺得sex好正常, 呢d真係冇計!

p.s. (1)美容院在呢個星期六搬, 第時毎人一個房做facial, 勁正!
(2)我呢個星期皮膚又好左, 可喜可賀!!