同屋企人去拜山

今日請左半日假去拜我爺同三叔山, 一個在將軍澳, 一個和合石, 真係差得太遠(^_^;), 但都冇所謂, 最重要係有考心去拜

一早去麥當勞食早餐, 勁正! 之後就去買雞, 燒肉, 生果去拜我阿爺先, 即係將軍澳先, 之後去拜三叔(和合石), 在途中我弟同佢女友講關於NDS 同PSP, 整到我都想立即買.其實我一早想買, 但因為之前要讀書就冇買, 費時分心, 但而家終於可以買!!

拜到十二時已拜完, 便由黃大仙地鐵站(順便去附近商場睇髮夾)然後坐車返旺角, 都已經係lunch time, 但我哋冇食野, 竟走去行花園街, 但最後都係冇買野, 當然啦! 要買NDS 同PSP麻~~!!我今日好想放工買, 但我姑姐話一日只可取一萬元現金(因為今日已比九千元家用阿媽), 天啊, 惟有聽日去拿錢買...

無端端比人搭訕

唉~! 唔知為什麼我由細都大都吸引變態佬 (大多數係壞男人), 激死!! 今次也唔例外

今日如常坐地鐵返工, 我只顧睇地鐵報紙, 咪坐多左一個站, 但我因為想慳返少少錢, 所以咪返去我原本返工個站, 怎料有個西裝友企在我隔離對我吹口哨, 我心想都係下個站就到, 所以冇理佢. 原本以為可以放下心頭大石, 怎知佢突然出現係我面前, 仲比左張咭片我, 然後講 : 美女, 放工之後打電話比我. 天啊, 我都唔識你, 做咩要打比你?係都打比我的熟朋友, 你當我係咩, 之後我即刻扔掉張咭返工

好鬼多地方去的第二日

撞鬼喔? 今朝6:45 morning call, 要一早起身, 仲衰過返工, 不過唔緊要, 最緊要好玩. 今日去的地方好多, 先去寒山寺, 絲綢廠, 古運河, 砂茶壺專賣店..哇, 真係好鬼死多地方去, 想行死人咩!? (講笑) 第一個去的地方係寒山寺, 距離我哋所住的酒店不太遠, 只有幾個字車程, 那處全係寺廟同花草樹木, 都幾大自然feel, 當地導遊向我哋講解寒山寺由來和歷史, 但我哋三人都不感興趣, 所以到處影相算了 第二處去的係絲綢廠, 在這處除了可睇絲綿被的製作過程外, 也有各個時裝展, 各個model 穿上所有用絲綢造的衣服, 都幾好睇, 不過那裡的衣服就...都係睇下算數, 我只買了個小童版的枕頭.

第三處係古運河, 係當地新景觀, 主要係坐船遊覽二旁景色, 睇下古代富有特色房子及建築物, 船中間有道門, 可供人影相. 而且船內有人推銷當地景色的postcard及其他物件, 甚至連vcd 都有, 有d得人驚!?

最後一站係砂茶壺專賣店, 只有門外及一樓可以影相, 二樓係介紹砂的開採過程同製作方式, 及各個出名製作家之作品, 其中有個製作家叫楊連(係女人, 不, 應該係阿婆), 佢有好多成名作, 其中有個作品叫"一片清心" 更打破一般茶壺的定律, 係冇壺嘴, 不過最值得我欣賞的係 -她更把賣出自己作品的百分之70捐去幫助貧困兒童.
去完這四個地方, 又係晚飯時候, 食完飯又再休息, 準備第三日的行程

上海之旅首日

今日終於到旅行呢日, 非常開心同緊張, 好在我爸一早車我同二個fd 去機場, 唔駛同人坐公共交通工具. 先由我屋企深井出發, 再到白田join 番我二個fd, 到達機場後, 我爸還幫我們推行李同搵導遊, 搵到導遊之後我爸就走, 我哋三個去買早餐同雜誌, 再到登機場度等, 怎料班機遲延幾個字先起飛 (激死人,人哋好鬼心急), 加上上機後有好多班機排隊等起飛, 比原定時間足足遲左一個鐘先起飛.

大約坐了一個多鐘頭機後, 終於到上海的新天地, 那處的建築物雖較古色古鄉, 但其實差唔多全條街都係酒吧, 而且仲好美, 可惜只是逗留不足三十分鐘就要去食飯, 可能各個地方的飲食習慣不同, 那裡的食物較多油, 同香港所追求的健康食法 (少油多菜) 完全不同, 對於初次來上海的我一定唔慣那裡的食物, 但總比冇得食的好, 食完晚飯後, 便返酒店休息, 準備第二天的旅程.

加人工! 同時也要反省啊!

今日如常工作, 怎料老闆一回到公司後, 便逐個staff召見入佢房, 我心想 : “死啦, 係咪我平時入錯數, 召我入房罵個夠本!?”, 沒多久, 老闆終於召我入去, 我入房後, 老闆第一句就問 : “你在這裡做左幾耐? 你覺得自己有進步嗎?” 我心想 : “死啦, 竟然這樣問我, 難道我真的做得太差?” 我便小心地答佢都有少少進步, 之後佢都認為係, 而且同我講會計這個行業幾好, 希望我努力做好d工作, 同時也話我有好多進步空間和有個勁好的阿head (佢真係毫不保留去教人), 但我冇心學, 所以進步不太多.

之後佢就同我講, 會加我人工(都有幾百元). 吓!? 我做得這樣差都加我人工, 那時, 我都有d 慚愧, “為什麼我在這年內不努力工作, 只顧玩msn, 上網, 其實我要學的東西還有好多…” 我在出老闆房後不停地想, 同時我也要定下目標, 希望我老闆同阿head 都知我在進步!!

旅行好多野準備呀~!

今日終於出完job返, 可以同蔡蔡玩msn (^_^), 成二日冇同佢傾計好鬼悶, 所以拿拿聲做完d野返. 唔講d開場白.

我哋傾下旅行要拿咩野去, 例如洗頭水, 沐浴露, 護髮素等, 雖然酒店都有, 但因為我哋唔鐘意用酒店的物品 , so就要另外拿去上海, 仲有唱人民幣, 同蔡蔡決定送d手信比邊個, 冇理由我哋二個都認識的fd 分開送, 好似好怪, 仲有未來上海天氣等等, 原本旅行勁多野準備, 難怪同屋企人去旅行時, 阿爸阿媽忙到死, 而家終於知原因, 希望今次我同朋友去旅行都準備充足

放工返屋企時在信和行左一陣, 睇下大塚愛隻新cd – 愛 am best 幾多錢, 嘩~~!! 成三百蚊, 拿我條命咩, 仲唔即刻放底左隻cd走咩, 只係買左本 vivi, 臨返屋企時, 我姑姐call 我 (佢今日出job, 去左大陸), 叫我同佢行街. 吓!? 本野好鬼重, 仲要行街, my god~~!! 但佢好少去荃灣, 這就算啦!

無聊閒談

我發覺最近我同蔡蔡買d衫都差唔多款, 只係顏色唔同, 而且仲個個星期去行街, 當然呢個星期也不例外, 所以今日我同佢msn 時談論呢個星期不如穿得差唔多, 比我哋另一個朋友驚喜 (希望唔係驚嚇多過喜), 我哋有二套衫差唔多一樣, 包括工人裙同連身裙 (連身裙仲要佢黑我白), 都傾左好耐穿咩, 但未有決定, 真係唔知講泥做咩.

但後來講講下就講左第二樣野, 就係一個人在毫不知情下用左假鈔會唔會犯法, 這當然要睇係咪有動機啦, 但佢公司個客居然唔知, 不是吧!? 這個都唔知? 咪嚇我! 這是 common sense ~!! 唉, 算啦, 原諒人啦, 自己都會有野唔識, 唔可以這樣話人..