馬灣@黑仔私影 with golfer

呢次係第二次去馬灣呢, 不過上次去既地方唔太多, 好在golfer比左個地圖我先至識去, 唔該哂~~!! 大家約左一點半係馬灣新碼頭等, golfer 千叮萬足叫我唔好去舊碼頭, 因要行大約十分鐘既路~

雖然我識路, 但架巴士唔爭氣, 竟然係另一邊既總站落車, 整到我要行路過去碼頭, 真係大整故!! 不過唔緊要啦, 我比預定時間早到左十五分鐘, 可以慢慢行~


到新馬頭既小徑, 兩旁種滿樹, 而且仲可近距離睇青馬大橋, 真係好靚^^



從小徑望落去既沙灘及挪亞方周~可以影哂全景呢!!



終於到左新碼頭, golfer已經叫我幾次我都聽唔到, 掛住聽MP3=.="



golfer原來未食飯, 咁先去一間上海店舖食飯吧!! 呢個係golfer叫既雞絲粉卷~



套餐內連埋既毎人一碟油菜, 都幾好味^^



兩個人叫左兩份套餐, 由左上面數起, 分別係雞絲粉卷, 擔擔麵, 陽春麵, 油菜及紅油抄手, 睇落去唔係太多, 不過都差d食唔哂=.="



呢個就係影師golfer啦~係一個好健談及好有經驗既影師, 而且仲好好人^^


先去沙灘影相~個theme以開朗少女為主題, 對我黎講有少少難度呢~呢張係暫時出到既其中一張相~




下一個目的地係馬灣, 真係唔知我係咪咁黑仔, 我只黎左兩次馬灣影相, 就見到第二次有人結婚, 我又冇得影啦><



最後只好換長裙, 呢度就係馬灣舊村, 好多建築物已被清拆了....



沿途既舊屋, 好多都被鐵絲網封左, 聽golfer講以前可以入去, 我果然係黑仔=.="



全條街都係舊屋呢~而且牆上仲會有嘖油寫字...



被封既舊樓樓梯, 真係好想入去睇下><



呢個舊村一共有兩個碼頭位, 一個係呢個, 係黃昏冇咩人時影過, 真係幾靚!!而且仲坐係落客既樓梯上影, 真係唔怕跌落水!? =.="



碼頭既旁邊好多呢類棚屋, 諗起上次去既大澳....



村內第二個碼頭, 比第一果個較細, 但都有好多人坐係度影相~



行過既舊餐廳, 到處都係白牌既政府告示, 整到人地冇得入去><



行到村既盡頭, 呢個鄉公所, 花園等等全部封哂, 本來開心既心情變到唔開心...



好在命不該絕, 比golfer及我發現呢個冇被污染既小石灘, 但係好危險...全部既靚相就係呢度開始



但影相途中竟然水漲及有大浪, 我隻拖鞋差D沖走, 我叫golfer幫我接住, 佢又要保護佢相機, 而我就全條裙濕哂, 呢次真係如golfer所講: [為藝術而犧牲]!!




全條裙已經濕哂, 惟有周圍行下影相~我見都好多攝影師周圍影~



我開始明白攝影師影咩, 可能就係屋內既破爛情景, 又覺得有另一返味道呢~



冇被鐵絲網封既屋, 但有木板呢....始終都係入唔到去...



破爛既玻璃窗. 唔知點解我都幾like爛既玻璃....???



呢張相影到好似係屋內!? 因為呢間屋係冇被木板及鐵絲網封住既屋, 我地係屋外都影左部分相~

唉...影得唔算太多相, 一係就好多靚及有趣既地方封左; 一係公園有人結婚, 霸佔左靚場地; 再唔係就全日都冇咩陽光, 希望可以見得人既相都有幾張啦, 我果然係好黑仔=.="



雖然好多地方冇得影, 但都幾開心, 尤其係一個浪琴埋自己身上時...xd, 最後當然唔少得合照^^

七點到返到屋企, 後來golfer 執左其中一張相比我, 就係上面深藍色衫果張, 而且仲有一本album~有埋屬於我album既歌, 勁正!!

golfer album內我既相: http://www.fotop.net/golfer/KumiShing100110

仲有好多相未有, 好期待呢~~

p.s. 返到屋企有影師calvin lor搵我影相, 係去錦田舊屋影, 以型及cool style 為主, 又係去舊屋嗎?? 希望唔好再封啦><

同joejoe 食點心 + 大細路kumi之旅~

其實係我見joejoe成日都話同佢屋企人飲茶, 又發覺自己好耐冇去飲茶, 於是問joejoe去唔去, 好在佢都好錫我, 願意同我去飲~最後決定去紅磡既酒樓度打, 即係上次我哋兩人去打邊爐果間, 見佢下午茶價錢唔係好貴, 於是即刻去飲茶, 而且我冇食野既關係, 我叫左好多野食!!



呢次飲茶既酒樓門口~



我同joejoe個位~不過係食左飯先記得影=.="



首先叫左個煎蛋牛肉飯~不過食食下都已經凍哂, 好難食...



煎羅白榚~太多粉呢, 而且又冇咩羅白味, 但都煎得ok既~



牛肉腸粉及叉燒包!! 牛肉腸粉個皮似乎厚左少少呢~叉燒包就ok!!

埋單又唔係太貴, 兩個人叫左五碟食物都只係八十元到!! 真係抵! 我哋成日去拍拖, 一定要慳d啊!!

之後我哋去黃埇新天地行下, 估唔到都幾多野行, 而且有好多咩歡樂天地之類既地方, 屋企有細路仔既話去呢度都唔錯既~



全個美國冒險樂園呢~見到佢好多野玩, 不過而家咁大個, 都唔會玩呢d遊戲囉...



隔離有間玩具反斗城~我叫joejoe同我去睇, 我果然係大細路黎呢~



見到玩具都忍唔住拎黎玩~joejoe幫我拎住隻兔仔puppet影相><



仲有可愛既羊咩咩^^



兩隻puppet太可愛啦~最後拎哂佢地兩隻一齊玩^^



去到玩具反斗城咁多玩具, 但都唔會買架麻!! 好似呢d小女孩既cosplay裙, 自己又著唔到, 屋企又冇細路女, 但又幾cute, 影底佢算啦><



連自己都想買既玩具: 一個小公仔加公主屋既部件!? 仲細嗎=.="



小公主化妝台連椅子~



細路仔黑板, 仲連埋腳架!! 諗起自己以前玩黑板真係只有塊板, 仲要搵位擺=.="



當我四歲時, 我好想屋企有呢個廚房仔比我玩煮飯仔, 但只有幼稚園先有, 而家可以買啦!



估唔到細路女都可以做fashion designer, 令我真係好想買!! 呢盒野內有三塊布, 及一d飾物如腰帶, 閃石, lace等等, 去設計自己既衫裙啦!! 一個公仔要100元, 兩個公仔要150元!!好在joejoe捉住我, 唔係話唔埋我真係買左^^



香港版既大富翁~但地方名全部都唔係香港地方名=.="


行完玩具反斗城後再到吉之島船周圍行下, 當然只係window shopping多, 但都冇所謂啦~可以係假日同joejoe一齊行街街就好^^



HOME WORLD 對出既小廣場~不過公仔就...XD



不愧係HOME WORLD呢~傢俱到食品都一應俱全^^



吉之島內既namco 遊戲中心, 有好多呢類夾公仔機, 呢個係其中一款~



連夾糖機都有呢~不過我對機內既糖冇咩興趣=.="



另一款夾公仔機~佢有招紙話[不準攝影], 但我都係照影...XD



夾公仔機一共分兩邊: 一邊係好cute既兔仔, 但我唔記得左佢叫咩名><



夾公仔機既另一邊係鬆弛熊, 係我暫時like既公仔^^

我既惡夢又黎啦....就係我個相機又冇電!? 已經係第二次啦!! 我果然唔可以信我只有一格電既相機><

之後去左一間日本裝修既店舖食烏冬, 由於d烏冬冇咩味精, 係冇味道既, 但佢個天婦羅真係幾好味, 有蝦, 冬菇, 日本蕃薯等等, 炸得好脆~不過有樣野美中不足, 就係果間店舖sell 烏冬, 竟然冇魚生, 同埋食物既選擇太少呢....

食完飯之後再周圍行陣便各自回家. 本來joejoe想去九龍灣, 但又驚我影相冇精神, 所以到最後冇去到...但唔緊要啦, 下次我哋最多一齊去渡假屋^^

有點壓力

我已經買左件背心, 同準備影對鞋比golfer睇, 但佢竟然冇on到, 自己總算得閒吧!?

聽講golfer 曾經幫過d出名既o靚模影相, 分別係rainbow woo, yumi wan, melody chan吸毒既monique影過相, 至於大家覺唔覺得佢地靚呢, 大家自己去睇下啦!!

yumi wan: http://www.fotop.net/golfer/YumiWan0001

melody Chan: http://www.fotop.net/golfer/Melody_Chan

monique chau: http://www.fotop.net/golfer/Monique_Chau

rainbow woo: http://www.fotop.net/golfer/Rainbow_Woo_02

其實我個人覺得yuni紫色衫果輯相都幾靚, 係影會相黎既, 而且毎個影師既入場費要成600元!? 佢自己大約有2000至3000!?出名既人果然利害呢...

見到除左呢幾位model外, 有d model都影得好靚, 令我開始有d壓力呢....不過唔緊要啦, 盡力做好自己就算><

襯衫影相

不愧係攝影大師, 連衣著也特別講究. 星期日影相, 今日要影相比佢睇下啦, 好辛苦先執好我房內既衣櫃(因為個衣櫃有時都會有d亂=.="), 先搵到幾件可以影相既衫, 襯好之後再影相, 係msn度send比佢睇><

影相一共要兩套衫, 其中一套係飄逸長裙, 對於只係著短裙既我, 竟然有條長裙!? 所以只係考慮上半身既衫就得~


我條長裙係唔同顏色, 由淺白到深紫, 行起路上黎真係飄飄下, 我都幾like既背心, 不過件衫reject左, 好在攝影師都幾like條裙><


呢件又太奇怪....件毛毛背心加長裙...


最後上身衫唔岩呢, 要去買件純白色既吊帶背心, 有D凍凍呢....為左影相冇計啦!! 條裙就OK, 一於決定用呢條裙啦!!

至於褲呢....就決定用鮮色衫加牛仔短褲, 短褲就冇問題啦, 只係衫方面, 好在自己都有d彩色衫...xd



最後決定用左呢件, 因馬灣比較多植物綠色, 藍色感覺會比較sharp!!



本來影師都鐘意呢隻鵝蛋黃, 但驚skin既顏色太黃會唔好睇, 最後都係放棄左...



呢隻粉紅太sharp啦!! 驚搶左我自己, 所以都係冇選...

仲未決定當日著咩鞋, 同埋要買背心呢~睇黎都要快d準備先得><

屋企雜記

近排天氣太凍, 我都好少出外了, 惟一係買左一對毛毛boot, 都只係80元,勁抵!! 估唔到同一款鞋, 係唔同既地方會貴成30元, 真係誇張到暈!! 真係去搶咩!!


就係呢一對啦~而家咁凍著左好暖, 而且仲有兩個波波, 勁cute><

好耐冇返過屋企食飯, 覺得好好味呢!! 加上又可見到我姪仔, 終於可以過返個正常人既生活啦! 自從做私影model之後冇咩點理屋企人, 而家可享受家庭樂了^^


姪仔食野個樣幾串!? 仲要橋起隻腳黎坐, 成個大少咁款><


zoom個近鏡睇佢食野先~阿爸都影得幾好喎!!

今日係阿ling佢地present佢地拍果段片, 組員有berry, winnie, susuki, 好想返去睇佢地段片!! 但因為個ex都係度, 我一定唔會返去, 我想忘記佢及唔想見到佢!! joejoe對我越好, 越覺得fantasy對我越差, 又成日對我講大話, 連兩個月前鐘意佢女友, 佢都竟然可以講出唔鍾意佢既大話, 講真真係恨透佢, 呢世唔希望再見到呢個大話精!!

不過算啦, 唔見佢及唔同佢接觸, 自己先可以再重新過開心既生活!! 最大既功勞係joejoe吧!? 係佢令我明白咩係真正既愛情及感受到愛情既喜悅^^...而家只係欠一個目標未完成,就係讀時裝設計及做時裝設計師^^

終於要返工=3="

放左四日假, 個心仍然掛住開心既假期, 可惜現實係殘酷.....一返到公司已經見到好多文件, 睇黎都有排做囉, 又要出月結單追客人找數, 又要入12月份既賬目, 之後又要埋數, 同事又比單我開....真係做到全個人都爆炸!!! 人都顛啦!! >3<

結果做到兩點幾先可以食飯, 唔係, 應該係下午茶啦!! 同事ben介紹左我食一個芝士撈公仔麵, 只係二十幾元, 仲有埋野飲, 勁抵!!


叫左個豬頸肉雞翼芝士公仔麵, 雞蛋係呢個麵既配料!!



全個餐呢~我太眼訓, 整返杯即磨咖啡先><


撈麵之中仲有切碎既生菜, 芝士汁, 生菜加麵撈埋一齊好好味, 不過d送就乾左d><

食完野之後再努力工作!! 好辛苦咁捱到六點, 終於可以放工啦!! 一於返屋企休息下, 同埋食媽媽煮既飯先, 太耐冇食過啦><

仲有菜菜終於有工做, 但似乎唔太開心呢.....始終都係唔捨得同自己bb分開既, 而且佢份工都好似幾多野做咁, 辛苦佢啦!!知道佢有新工, 都唔知恭唔恭喜佢, 矛盾中....