沉醉[黃金時裳]^^

你個蕃薯都係唔想我飲酒, 因佢知我之前從未飲過酒, 所以話[我地係生日前或後出黎食飯!], 我都仲未答應, 佢已經幫我決定好了><...算啦, 佢都係想我好, 驚我唔識飲酒唔知會做咩及你話唔想教壞我, 咁就算啦~不過佢要過幾日先可以覆我幾時先得, 我一定會提你架!! 一定要去得成啊, 有你至期待既魔鬼蛋糕, 唔係就唔比你食架啦!!

講返我今日既活動先, 其實只有我自己去既時裝展, 即係星期四提及過既[黃金時裳]果個時裝展, 本來問菜菜去唔去, 但佢老公及奶奶要返工冇人睇住阿b呢, 一定要佢照顧阿b, 所以同唔到我去啦! 我搭地鐵至九龍塘之後, 再轉巴士80M去到香港文化博物館, 好在冇盪失路, 順利到目的地!!

香港文化博物館既外面~太多樹!! 只係影到少少時裝展既橫額>< 終於黎到啦, 出面好多旅行團, 不過我估唔係睇時裝既, 應該似係黎睇另一個肥肥既展覽館吧!? 而我一於唔理咁多, 快D去買票入去睇先. 買票時發生左段小插曲, 就係售票處以為我買學生票, 仲問左我幾次=.="

於是我答佢 : [我係買一張成人票架, 唔該!!]

展覽場地既門口, 有呢個主題[couture]呢個字啦!!

展覽場地既入場票及宣傳本~

一上到電梯到會場, 見到兩旁都係著金色衫既公仔~

會場內既入口, 當然要係度影返張相先啦~麻煩哂果度既工作人員!

雖然果個場館唔比人影相, 但我都冒住比人捉去影相, 千萬不要學我喔~呢個係其中兩套日裝(即係配套便裝)~

貴族既禮服, 比日裝隆重, 但又冇婚紗及晚禮服隆重, 屬於半隆重的吧!?

貴族既內衣, 其實都有好大關係, 可以令到佢地著衫更有線條美, 不過佢地應該都會好辛苦吧??

貴族既其中兩套晚禮服~

之後會有一連串既日服, 也就係貴族會搵時裝設計師或時裝工場為佢地親身度造既衫, 也係英文所講既"tailor made"

其實全個tailor made既系列係用全個樓梯show出黎, 而且係樓梯旁會有毎件衫既解釋, 聽講以前一件tailor made既衫都要成十幾萬英磅, 都咪話唔貴>< 係個呢兩個會場離開之前既一個螢光幕, 也即係藍色呢個啦, 佢會展示部分既貴族生活及衣著架>< 呢張平面圖就係頭先所參觀既所有地方, 主要有內衣, 日服, 時裝攝影, 女裝飾物...

出左呢個會場之後仲有另一個會場, 呢條係去第二個會場既走廊~我暫時唔使偷偷地影相啦><" 第二個會場既展示版~中間隔左個唔知咩展覽館, 好似係咩中國文學之類, 我當然唔會入去, 直至見到呢個版我先開心返D...XD

呢個場地全場都係展示晚禮服~呢套係至GRAND既一套晚禮服~

最多我至愛既喱士~用黎做晚禮服簡直一流!!

呢個場館既平面圖~全部都係清一色晚禮服, 而且係圓形既設計比我地睇得一清二楚架!!

其實全部禮服都好靚, 如果可以影相既話, 我一定會逐件影, 但可惜個管理員成日行黎行去, 整到我冇得影相, 不過同時都比我係門口附近見到一本勁厚既場刊, 但要成三百二十元本...我揭黎睇下, 果然係好想買既, 於是我就到附近既售賣部去買, 但發覺佢唔收eps, 我惟有去附近既沙田市中心拎左錢先, 之後再返轉頭買啦>< 終於買到啦~勁開心!! 既然咁貴買左本野, 咁當然要搵人同我係正門度影相啦^^

哈哈~影得我遠D都幾好, 唔使見到我個核突樣啦^^

買左本咁貴既書, 我冇即刻柝黎睇, 反而係屋企度慢慢去睇~~費時出去睇時會整污糟及整爛本靚書麻!! 當中有D相係展示一頭先場館內既衫及有D幾靚既相, 比大家睇睇吧!!

個介紹開頭張相已經好靚啦>< 其中一位已故既設計師既作品介紹, 呢張相係貴族女子生活既相片

時裝的遺產~也係後期出名既設計師作品^^

其中一條我至like既裙, 係用刺繡及天鵝羽毛製成既衫...

唔使問呢套也係我至愛啦, 係喱士啊~

都算幾like既, 可能係被佢個領位及在旁的蝴蝶吸引住吧!?

又係黑喱士~愛死你啦!! 聽講有個設計師係好鍾意用喱士設計衫, 但我唔記得左佢個名=.="

貴族女子既日服~睇黎偏向平民化...

本書既底頁~係DIOR設計既suit為主, 表現女性身體既線條美~

整木糠布甸^^

今日下午去同姑姐一齊行荃灣, 我都買左一件返工衫, 之後就約左jovy去買整dessert既材料, 就係連我都未食過既木糠布甸~

返到屋企之後即刻開工, 唔係今晚都冇得食啦!! 大家唔知食過木糠布甸未呢? 其實係用一些壓碎左既餅乾及cream整成既, 唔係太難整, 也不用焗, 只要屋企有個雪櫃就得啦!!(吓!? 唔係毎個屋企都有既咩=.=")多謝姑姐比我影相, 但佢話千萬唔好影到個樣...XD

首先係落哂cream, 練奶及雲呢拿油落去. 其實練奶及雲呢拿油係隨意, 睇下自己口味囉~一直發到結身先得!

而家開始結身啦! 其實咁有咩用呢? 就係令到個布甸既形狀比較堅挺, 唔會變成水狀! 完成後可倒入模中~

之後把預先整好既餅乾碎倒入模中~餅乾只要用馬利餅就可以啦, 之後用盡方法壓碎佢啦, 越碎越好味架!!

最後終於完成啦, 要毎人一杯~記住cream及餅乾碎要一層層梅花間足咁舖, 仲有整時要小心d鄧啊!

哈哈~可以食得啦, 都幾好味既, cream及有餅乾碎又唔太sweet, 而且又唔難整, 比蛋糕易整好多, 大家都可以試下架^^

p.s. 今日見到fashion個阿sir 係fb度add左我, 好鬼開心呢~我差唔多毎天都走去睇架!!! 仲偷偷地拎左佢其中一張相...佢又冇寫自己既婚姻狀況, 唔知佢結左婚未呢?? <---我想點啊!? 關我咩事呢??唔通我鍾意佢咩?? 哈哈~唔知呢><"

佢話自己係上海度工作, 忙中先嘆個tea...時裝設計師果然好輕鬆, 而且佢都好型啊>o<

IRENE 提早farewell飯 x 見ive朋友仔^^

本來我如常地帶飯盒返公司食, 點知老闆娘突然一句話[今日出去食飯, 就當係提早同irene farewell啦!!]其實irene佢都好怕呢d場合, 唔好話係佢, 連我都怕呢d野, 但anyway, 有餐free lunch, 邊個唔想!最後由老闆娘決定食日本野, 好野!! 而且果條街真係好鬼靚, 我鍾意條街多過野食囉^^

條街有個名架, 好似叫做[加太賀]~個張係街尾~

[加太賀]既街頭, 我起初黎都比呢度既景色吸引住~

其實呢條街係由幾間店舖組成, 第一間係推銷呢條街係可以擺謝師宴既, 係呢度擺都應該唔錯吧!?

第一間店舖既全貌~

第二間店舖係賣日本野, 包括日本酒及呢類日本娃娃~

第三間店舖, 掛滿好多呢d許願紙, 等我都許願先~不過我好似真係有好多願望><

第三間店舖既全貌~個劍道既認真型!!

個相樸手幾可愛喎^^

第四間店舖~終於到左啦, 就係我地食飯果間啦!!

到左門口啦, 快d入去啦!!

我哋果然係坐房既, 鬼叫老闆有錢咩, 仲要三個咁多~間房竟然要除鞋, 而且出去時要著拖鞋, 我見佢咁靚, 仲想帶埋d朋友黎, 點知我發現左個壞消息, 就係...竟然要消費至少二千五百元!!?唔係掛! 我哋邊度咁有錢食啊??睇黎都冇咩機會入房食, 係出面食就得既...

最後老闆娘叫左好多野食, 又魚生, sushi, 豪華沙律, 炒飯, 炒烏冬....真係好鬼多野食, 本來想影底佢, 點知冇相機, 不過就算有都未必影啦, d老闆係度, 自己影相咁肉酸=.="...惟有下次同人去食啦...d食物麻麻地好味啦, 似乎魚生不太新鮮, 肉身比較硬及冇咩魚味. 終於埋單, 我地先返公司吧! 不過未返公司之前, 影埋其他店舖先~自己咁大膽!? 唔驚過唔到probation咩? 過左多成千元喎!!

我哋食飯對面既店舖其中一間, 仲有埋個街名, so cool!!

日本酒協會!? 唔怪之得出面店舖有酒買啦><

真係好多店舖, 我都唔知邊間打邊間!? 呢間又係飲酒嗎??

呢盆花呢, 其實係街尾既, 我見佢靚咪影下相囉~

返到公司之後又要開始工作, 放左工之後又有另一個節目, 就係去IVE探朋友仔, 好在紅磡有小巴去葵芳, 仲要係葵涌廣場落! 之後排隊等小巴, 果陣剛好落雨, 我遇到冇遮既berry, 我哋邊傾邊搭車返學, 後面仲有阿光~

之後同學陸續返學, 終於見到蕃薯, 起初我真係有d唔知點面對佢架, 但我同佢笑住打招呼, 好在佢都比面我, 坐係我隔離, 但我哋全堂冇咩講野, 大家各有各講...直至放學, teddy, 聯及阿ling一齊搭巴士, 只係剩下我哋兩個!!? 我一直睇下有冇其他同學黎, 結果都係只有我哋兩個=.="....始終唔可以冇野傾咁悶架, 於是係車上講佢生日既事, 我話送個蛋糕比佢, 佢竟然問我去唔去佢生日會!? 大家睇過我個blog既人都知佢本來係唔比我去架麻, 本來我都仲猶豫緊, 點知佢話有其中兩名阿sir都會去, 又話咩酒冇咁易醉等等, 整到我都變左想去, 於是應承佢. 點知返到屋企之後, 佢係msn度話怕我唔識飲酒, 又浪費(因女仔都要成250元!!??), 佢知我從來未飲過酒, 驚醉左唔知點送我返屋企...唉..佢一時一樣架, 但我暫時未改變會去party既主意...

黃金時裳：巴黎與倫敦1947至1957年

一向所謂好動及鍾意時裝既我, 呢次又要出動啦!! 係lunch食飯時, 竟然比我見到香港文化博物館原來搞左個叫做[黃金時裳：巴黎與倫敦1947至1957年], 而且由五月已經開始左....死囉, 足足四個月先至知道, 真係後知後覺既, 所以我決定呢個星期日自己又去下時裝展先至得!!首先介紹下呢個時裝展係咩黎既先~

戰後十年 (1947至1957年) 的高級時裝發展，被時裝大師Christian Dior形容為服裝的「黃金歲月」。是次展覽的展品主要來自英國國立維多利亞阿伯特博物院的珍藏，以法、英兩國的服裝和攝影作品，展示高級時裝這一門華美 工藝所蘊含的創意和社會商業特質，並讓大家感受其流風餘韻。

1947年被德國佔據的巴黎正受「新面貌」（New Look）潮流影響，遇到極大的衝擊。展覽將以巴黎為起點，探討「黃金歲月」的時裝國度及歷史，內容涵蓋設計師、時裝設計室、模特兒、顧客，及時裝成為普 及消費的經過，重點介紹時裝界經典大師包括法國的Christian Dior、Cristobal Balenciaga、Pierre Balmain及Hubert de Givenchy，以及代表英倫時裝的Norman Hartnell和Hardy Amies等的傑作，讓時裝史上最光芒四射的十年重現眼前。展出的華衣美服超過100件，包括為上流社會及皇室設計的日裝、酒會禮服及晚禮服，配合著名時 裝攝影師Cecil Beaton及Richard Avedon的攝影作品，以及其他紀錄片、紡織品及檔案資料以相互參照。

哇~真係正wor, 好想去睇下, 有d人話可以影相, 只要唔落閃光燈就得, 有d人就話唔可以影相, 不過無論係點, 我都會帶住部相機既~而家惟有睇住網上既相先啦><Christian Dior 模特兒展示1957年時裝系列

1957年其中一套晚禮服~

為dior設計既晚裝鞋~

采米爾晚禮服~

越睇相越想即刻去睇啊, 控制唔到自己啦, 都係快d食埋個飯, 乖乖地去工作吧~(雖然工作唔係太多..)

150元銀紙

苜先係渣打為左紀念成立150周年, 所以出左150元既銀紙, 有[單張自選號碼], [幸運號碼], [4連張], [35連張]及最普通既[單張], 咁我當然想買[單張]啦, 好想可以keep住佢, 毎張只係280元, 不過要10月1日才公開發售,我實唔夠d人排隊啦, 都係預冇既多; 一係就申請買[單張自選號碼], 盛惠888元啦><

其實只係未見過150元紙, 自己先咁想去買o者...個樣唔太特別...

拎左香港商報既其中一段內容, 原來呢張銀紙都幾巴閉下, 可能呢次出左之後, 到死都未必見到囉..

賀成立150年 限量百萬張

渣打全球首發150元慈善鈔

【商報專訊】記者劉欣欣報道：渣打銀行昨日宣布，為慶祝該行在港成立150周年，將於下月1日發行全球首張面值150元鈔票，限量100萬 張；并以3種不同包裝發售，分別為單張、4連張及35連張，單張部分更設自選號碼及幸運號碼兩款特別版，供市民申請及競投。渣打香港執行董事及行政總裁洪 丕正表示，是次發鈔所得，於扣除成本后將捐贈本地慈善團體，以回饋社會。

百張幸運號碼公開競投

渣打香港是次推出的150元慈善紀念鈔票，「單張」發售價為每張280元、「4連張」每套售價為1888元，「35連張」每套售價則為 18888元。另外，為使慈善紀念鈔票的發行更具特色及收藏價值，渣打香港挑選了100張具備幸運號碼的慈善紀念鈔票作公開競投，又預留1萬張讓公眾人士 自行挑選心儀號碼。「單張幸運號碼」慈善紀念鈔票將分別以1萬元、6000元及3000元為公開競投的底價，價高者得，而「單張自選號碼」慈善紀念鈔票每 張售價則為港幣888元。

洪丕正表示，除了100個渣打香港選定的幸運號碼以及編號「SC000001」外，市民可自行選擇任何6個位的號碼組合，最多可選擇5張「單張自選號碼」慈善紀念鈔票，號碼組合如有重复，渣打香港會以抽籤形式決定。

希望自己可以買到啦, 佢咁鬼難先買到, 真係講真果句[有錢都未必買到!!]我實會當佢係老公咁錫>3<

大家一齊食lunch^^

我今日竟然好[希奇]咁冇帶到午飯, 用得呢個字就岩架啦, 因為我毎天都有帶午飯既習慣, 因為我真係好怕成日諗食咩, 仲有出面食又勁多油及味精, 真係受不了, 但琴晚媽媽冇煮飯, 結果咪冇飯帶囉, 好傷心啊>< 諗左食咩好耐囉, 成日都會有好多選擇, 唔知食邊個好, 我最後叫左一間茶餐廳既豬頸肉撈檬, 聽老闆娘講話好好味麻, 仲有見過佢食, 個碗野個樣都好正, 於是我決定一試~~

個樣真係幾得下架~豬頸肉真係好好味, 加埋凍凍地既檬粉及伴菜, 夏天食呢個簡直係極品!!不過我要左個白湯, 好似格格不入咁, 但兩樣野都好好味~

至於irene(會計同事)及另一位男同事阿ben就決定食麥當當, irene仲叫左個開心樂園餐, 得咁少份量, 夠飽嗎?? 不過又真係幾得意既, 唔知係咪我身邊冇人食呢個餐, 我覺得好奇, 於是忍唔住又拎個相機出黎影底佢....XD

包小豆奶好可愛啊~個包比一般我地食既包又細D, 總之就係得意啊~

見到QOO呢, 原來irene都鍾意Qoo架, 我就突然諗起係觀塘APM見到呢部機, 但竟然唔係全部都係賣Qoo既飲品....奇怪=3=""

開心樂園餐入面既小玩具....我哋邊個岩玩啊, 阿ben個女應該岩掛!?

哈哈~到而家我好似未介紹過d同事, 其實間公司只有兩個同事, 而irene係舊會計, 專係教我野及傾計既. 同佢一齊傾計, d時間過得好快架, 可惜佢只係做埋呢個月既十八號, 真係可惜呢, 我覺得同佢都幾好傾, 大家都傾得好開心, 佢仲覺得我開朗添^^

至於阿ben係做跟單或sales之類啦, 我負責幫佢開單及做計算既工作, 佢原來只係大我兩年, 都幾好人及幾斯文下, 本身以為佢單身, 仲以為自己有機會, 可惜佢已經名草有主, 已經結左婚, 仲有幾歲既女, 唉....都話個天鍾意玩我架啦, 係都唔比我認識個男友, 再係咁真係要買姑婆屋都似,不過自己唔係已經一早已經決定好嗎??