終於到左返工呢日, 我驚死遲到咁成六點幾起身, 好鬼眼訓啊....紅磡都係好鬼遠, 平時又少去, 所以依照網上所指既巴士站, 但始終都唔知係邊度, 所以都要搵下, 原來個巴士站係地鐵站附近, 好快就搵到囉~而且仲可以拎份報紙睇下...XD
可能係太早既關係, 又冇咩點塞車, 一個鐘既時間都唔使到左紅磡, 搵到返工既工廠大廈後, 仲有差唔多成個鐘!? 我真係唔知去邊度好囉=.="....惟有周圍行下, 睇下有咩工廠大廈及餐廳之類啦, 呢度既食物價錢正常好多, 起碼係二十幾元個飯盒, 同荔枝角簡直完全唔同, 我也順道食個二元既波羅包, 又真係幾好食喎^^
呢間公司九點半先返工, 係十分鐘之前先至有人開門, 出面又冇冷氣, 熱死我囉....入到去只見到四個人, 包括同我一齊入黎既女會計irene, 主要教我入賬; 同埋男同事阿ben, 佢係負責採購部之類吧?; 仲有一男一女既老闆娘, 叫做甘生甘太, 佢地感覺比人好nice, 尤其係甘太成日都笑~
呢個就係我個位啦~有本藍色細簿仔係比我記底我係公司要做既野架!! irene就坐係我對面~
我個位既另一邊呢~係附近就係要用既會計文件, 但我冇影到=.="
irene教左我成三個鐘關於公司既會計入賬, 網上報關等等...我都一一用紙寫底, 而且太得閒到用頭先本藍色notesbook寫底毎個step, 好快終於到左食飯時間, 呢日我冇帶飯, 於是我哋三位同事叫外賣, 好在我問下佢地有邊間餐廳好食先知道樓下既餐廳食物唔太得, 唔係我就真係走左落去買...見到有個飯好正, 叫做[頭抽瑞士去骨雞飯], 但只限十五個!? 我同阿ben都想食, 快d去叫先得~
頭抽瑞士去骨雞飯~其實呢個飯有少少貴, 都要成二十八元, 但個樣都唔錯, 而且都幾好食. 當然仲要多謝阿ben請我食^^
阿ben一直冇收我錢, 佢話請新同事食飯, 於是也唔收irene果份錢, 可以食免費午餐, 好野!! 之後irene講起佢係新同事時, 阿ben冇同佢講野, 但ben又同我講好多野喎...xd
食完飯之後唔係太多野做, 只係不停睇返今朝所學既野及文件, 仲有成個鐘先放工, 於是同irene傾計, 先知道佢都係讀hku space既advanced diploma, 而且仲係我師姐!!!終於放工啦, 要搵巴士站返屋企, 睇黎巴士站唔太遠, 不過車程就好遠啦, 要成個鐘, 好在我拎左報紙, 係車上睇先唔太悶, 但諗起毎天都要搭咁耐車真係有d驚...但總括黎講係開心及輕鬆既^^
welcome to my world...
My model life since Nov 09~
My sweet life w/ bf joejoe since Dec 09^^
時間過得真快, 聽日要返工啦! 就好似幼稚園, 小學或中學般, 有種放完暑假既感覺.....不過又有d唔同既係, 返學可以再見朋友仔, 同佢地一齊唱k及睇漫畫, 而返新工就冇左呢種感覺, 即將遇到未知既事及認識新既唔知咩人, 有少少不安, 希望果度既老闆又好, 同事又好, 同埋工種又好啦~果間公司好似做得好舒服咁, 如果真係就好呢~
回想起呢兩個月所發生既事, 覺得好似過得好漫長, 過左好耐咁, 有接蕃薯媽出院, 同蕃薯及佢媽媽食飯, 同蕃薯吵架, 上fashion堂, 自己過生日(及同菜菜), 見菜菜bb, 聚舊, 搵工....真係經歷左好多, 有開心, 有唔開心, 辛苦到冇錢使既日子, 覺得好似經歷左好多, 自己有冇得著呢? 都有既~
1) 連續兩個月冇錢使, 只係比家用屋企人, 自己連件衫都冇好好咁買, 差d仲要賣股票度日, 係呢個時刻, 先知道錢既重要性! 人真係唔好同錢鬥氣呢, 冇錢真係好辛苦><
2) 兩個月不停地send cv搵工, 全個七月真係冇得in, 全部都冇下文; 到了八月, 好d啦, 起碼有工見下, 但請請唔請自己又係另一回事, 不停地哂車錢, 時間, 而且仲要比人串我成績, 真係好苦! 所以當自己有份工時, 除非個boss或同事好難頂, 唔係點都要珍惜份工啊!!
3) 不過見工都有樣好處, 就係可以去自己好少去/ 未去過既地方, 邊聽住歌邊行, 累了就休息, 食野, 都真係幾自由及寫意, 如果我有錢既話, 過呢d生活都唔錯, 係我一直嚮往既生活~
4) 因為蕃薯影婚紗相既事同蕃薯吵架, 覺得自己真係好唔成熟, 好幼稚, 佢只係工作性質, 又或者係因朋友委託先至幫手, 點解仲要嬲佢, 講唔好聽既說話激佢.....希望自己係感情上變得成熟, 可以企係蕃薯既角度諗下佢, 也用少少既佛家思想, 令到自己平靜, 同埋至緊要唔好胡思亂想, 同蕃薯一直開心落去啦^^
5) 蕃薯發脾氣話block左我, 我真係好驚再見唔到佢, 仲為驚見唔到佢而唔開心, 睇黎都係幾like佢呢...真係死得!!
6) 放假期間同我個姪仔及陽陽玩, 覺得bb好可愛, 不過只係玩好啦, 我真係唔敢生. 不過我連男友都冇, 放心, 呢樣野唔會係我身上發生~
聽日就要返工囉, 都係快d休息, 快d訓啦!! 要成六點幾起身, 之後仲要搵巴士站搭巴士返工, 真正的苦難開始囉=.="
今日又係咁多事發生, 有時覺得一日只有二十四小時跟本唔夠, 唔知上天有冇考慮要延長毎天既時間呢? 不過對打工仔黎講, 就千萬唔好了!!
*****見工*****
其實我而家已經有份工啦, 係呢個星期四返, 但因為呢間公司個阿head李小姐好好人咁, 即刻同我講2nd in既時間及日子, 所以都係決定去in吧! 但個心情好明顯有d唔同, 之前就因為見工都未必請我, 有d擔心見工情況唔好, 但而家不用太擔心, 可能係已經有左個後盾. 不過無論有冇工都好, 只要盡力去見工就得, 其餘唔使諗太多!!
上個星期四黎, 明明係個婚紗展, 但而家已經唔同哂, 係個青年文化展. 好在係上星期有為各套婚紗留倩影, 也令我明白到要把握機會的道理~好啦, 而家比大家睇下少少既文化氣息啦, 包括一個毛筆字展覽及其他物品~
小學生既毛筆書法~久違了的九宮格...我記得呢個係我最討厭做既功課之一...
中一至中五既作品~好似我果陣都冇佢地寫d字咁靚.....
公開組既冠軍~果然係唔同d!!
公開組既亞軍~d字都幾端正, 唔錯喎~
公開組既季軍~d字都幾得意(用黎形容d字)喎~
睇完書法比賽各個組別(小學, 中一至中五, 中七及公開組)既作品後, 去到商場既上層, 見到有好多小學生畫既畫, 之後貼左係枱及椅子上, 都幾得意架^^
本身d枱及椅子都幾七彩繽紛, 再加埋d畫, 覺得好sharp啊!!
呢個係八角形既枱子~
半月形既椅子~
*****半完成的theme board*****
見完工之後, 都冇咩特別野發生, 最多都係叫我等消息果隻, 不過我都習慣左~之後就去買我做theme board既材料, 好在要買既材料唔太多, 也唔太貴, 係途中見到一個心型既銀色盒, 唔知點解突然諗到好想送比蕃薯先生~
只係兩束假既rose, 一張黑色既硬卡紙, 一張雪點紗網, 一張紅既硬卡紙(細), 同埋兩張深淺綠色既紙~
個theme board既初形~其中一個粉紅rose會擺係角落頭, 之後整不同顏色既樹葉, 真係逐特樹葉慢慢整及剪架!! 仲有個主題名既紅色板及rose, 仲有d材料要聽日買, 整住先啦~至於d相唔係用呢d, 只係用黎度位用, 而係用下面呢幾張相~
就係呢六張相啦~究竟會擦出d咩火花呢??聽日一定要記得哂相先得, 唔係做唔到功課><
為左打破我同蕃薯既彊局, 我諗起今日見到個銀色盒及佢就黎生日, 於是我問佢, 送個銀色盒比你做生日禮物怪唔怪, 因我未送過生日禮物比男仔, 所以咪問下佢, 點知佢話唔奇怪, 而且仲好似好開心咁伸哂利話多謝我都黎唔切, 仲話自己差d唔記得左自己個生日, 睇黎佢真係好忙喎....
*****完成我的sketch*****
今日一於足不出戶, 起碼都要完成份sketch!! 今日畫左大半個早上, 終於完成了三幅婚紗既sketch, 計埋之前果一張, 阿sir要我哋畫既四件衫已經完成, 做左三分之一啦. 但我都仲未可以鬆一口氣, 仲有好多野未畫=.="
其實呢一套我個人都幾like, 除左袖口既半邊精靈翼之外, 仲有佢用羽毛做既短裙及簿紗做既一層層裙尾~
另一款婚紗, 全條裙用羽毛做, 感覺上比較輕d, 同樣都係用左粉紅rose~
最後一款婚紗, 同樣以簿紗為主, 也係帶出輕盈既感覺~
其實呢幾張sketch雖然叫畫好, 但大家唔知有冇發現, 點解佢地冇頭紗呢? 冇錯, 其實係未完全完成, 除左頭紗外, 綁係佢地腳上既精靈圈, 其他配件係不可欠缺既物品, 只係我仲未畫. 其實我想係完成個theme board之後先再加返上去~
*****同蕃薯吵架*****
另一邊存在住我同蕃薯既故事, 話說係我搵婚紗資料時, 我突然諗起蕃薯係呢個星期六同其他女仔影婚紗相, 自己覺得好心痛, 唔想佢影~
[你話pre-wedding一個人影會好怪, 我覺得要係真正既一對戀人影先至好睇, 如果只係為左影相, 始終感覺差d, d相只會變得徒具形式, 冇真正既內涵], 起初我覺得講呢幾句野表示我對結婚相既價值觀之外, 當然唔想佢地兩個影....
[我哋好pro架, 雖然唔係情人, 但都可以交到貨架...xd], 聽佢咁講, 都知道自己一定唔可以阻止佢, 而且見到佢又答得好開心, 於是我唔知點解就嬲起黎, 之後講話咩放長雙眼睇佢地影得有幾pro, 如果係我面前係示威, 表示我冇得影婚紗相既話, 你已經做得到之類, 真係唔知自己講咩, 蕃薯一句好無聊, 更把我既心情推至谷底, 佢也好嬲, 表示唔好傾, 之後大家越來越嬲, 我又話咩女既就發姣, 男既就貪人靚女, 佢嬲到話你真係好討厭, 我會封鎖你!! 之後再唔知係咪block左我, 我突然回首起來, 諗起唔想同佢斷絕關係, 我不停地哭, 哭著打電話比佢兩次, 但冇人聽, sms比佢同佢認錯, 佢先回返個sms比我話比佢靜下, 我只求佢唔好block我, 最多我唔再煩佢, 好在佢最後都冇block我, 但希望佢唔好聽我段電話錄音, 因我講左段自己都覺得有少少肉麻既說話....
佢on返之後, 我也say sorry, 但佢一句都冇回覆我, 只係講左句[我心情好差!!], 唔知我係咪又令佢心情差呢??
菜菜約左一d舊朋友去聚舊外, 順便可以見一下陽陽, 目的地呢....咁當然係比較近菜菜既樂富啦, 就佢帶bb黎麻....XD
大約三點約左係樂富地鐵站等, 原來不但約左菜菜, 而且仲約埋liz及嘉華^^而菜菜一早打左電話比我話佢會遲d先到, 不過冇所謂啦, 媽媽大哂~我哋三個以為佢會手推bb車黎, 仲係lift等, 點知原來佢抱住陽陽搭的士黎, 佢第一句話[搭的士唔使錢]. 吓!? 咁好? 原來係佢只有100元紙, 個司機竟然話冇得找, 也可能係見到菜菜抱住個bb, 費時要佢找吧!? 不過唔緊要啦, 只要你平安到黎聚舊就得^^
去到係吉之島附近既cafe, 見到我唔認識既兩位女仔, 好似叫shirley及carman吧!? 哈哈~好在都記得佢地個名~我哋一見到陽陽好開心, 大家都逗佢玩, 差點忘記了叫食物.....我唔記得帶相機, 好在菜菜借佢部相機比我影, 謝謝!
其中一個套餐, 叫做沙爹牛肉意粉, 少少spicy,都幾醒胃, 唔錯^^
嘉華叫既點心拚盆~個洋蔥圈及薯脆都幾好食, 不過排骨差少少, 淡而冇味=.="
我叫既什腸pizza, 好好食啊, 個pizza又脆, 仲有我至like既腸仔~而且我也負責切開一小塊比大家分享^^
唔知係咪cafe比較嘈呢? 陽陽訓左十五分鐘之後就醒左, 之後冇再訓啦....見佢都鍾意笑咁喎, 好鬼得意, 我同佢玩也覺得好開心, 我比自己手指佢捉住啊~後來寶妮趕過來見陽陽, 而且仲同佢玩~但佢又唔捉寶妮, 可能只係因為佢見過我一次o者. 我哋食完野之後, 到bb肚餓啦, 菜菜係袋裡拎支奶出黎, 陽陽都好[侯擒]咁飲, 飲到成日族親><放心啦, 支奶唔會走左去架~ 玩陽陽大約兩小時, 我哋都要返屋企囉, 大家先影返張合照先啦^^ 
唉啊~都話左唔想最前架啦!! 顯得我好肥及醜樣....XD
聚舊及見完BB後, 我要返屋企趕住做我份fashion功課啦, 仲有sketch, illustration及theme board都未做好, 今次真係好難囉!!><""
又係上fashion堂囉, 哈哈~本來要帶水彩, 但我比較窮困, 而且我哋屋企都冇人用, 所以係一盒水彩都冇, 似乎有d失敗呢.....阿sir即堂示範比我哋睇水彩技巧, 果然係專業級, 雖然佢話自己水彩唔係太叻, 但畫出黎真係好靚, 我冇影底果然係失敗呢....
水彩示範完後, 佢問有冇同學比返用木顏色筆上色既公仔, 即係之前話抄時裝雜誌畫果張, 我拿拿聲走出去比阿sir睇(使唔使咁急啊!?), 就係以下呢張~~
阿sir最後比我既評語係: 件衫可以表現到質地, 光暗位都ok, 只係頭髮唔夠黑及膚色太過黃啦, 不過都畫得幾好既~
哈哈~真係開心到暈左!! 估唔到比阿sir提點之後, 自己上色技巧進步左咁多~~於是我拎埋份project比佢睇, 因我要畫婚紗, 我要畫埋透明及喱士部分, 但我又唔識畫, 於是咪問埋阿sir點畫, 原來喱士只係用銀色筆輕力畫邊就可以, 至於透明布料就麻煩d, 要用水彩再係原稿上再上色, 可以學到好多上色技巧, 多謝你^^
今日都係去紅磡見工, 但距離紅磡地鐵站非常遠, 要係地鐵站附近既巴士總站就搭車去, 睇黎有好長路途要行, 本來都唔係咁想去, 但最後都係去左, 去到又唔係好識路, 好在有間時裝店既女人教我點行, 終於比我搵到呢間公司, 好在比預定時間早到左五分鐘, 真係差d遲到><
搭巴士到見工既公司, 好耐都冇坐過呢隻巴士啦, 好懷念~
一去都未坐好, 有職員已經比份resume我填, 本來都冇咩野, 但係.....份resume後面竟然要做entry既(會計入賬)!? 唔係掛!? 好似考試一樣, 我差d唔記得點做entry...只係放底左兩個月o者, 使唔使失哂憶咁啊? 好在都可以完成, 於是把表格比老闆. 點知...仲要我係十五分鐘內用excel做trial balance, profit & loss及balance sheet!? 唔係掛!? 我收到資料個職員已經計時間, help~~好在最後都可以完成哂所有野, 不過真係好隧, 遲少少真係唔可以完成=.="
考完一輪會計之後, 終於可以見經理, 睇黎佢係一個幾好既人黎呢~佢簡單介紹公司職責, 守則, 仲好好人教我係深井直接搭車黎呢度, 睇起黎佢好似請我喎, 因佢又話咩佢請假時, 叫我唔好黎住, 因佢要教我野, 又講咩呢個月27日或31日入職啦, 好似我真係黎呢度工作咁, 不過我就冇咩所謂, 因呢間公司只係返五日, 而家返五日, 星期六唔使輪班既公司已經買少見少啦, 而且只係做paper work既工作, 開票及財政問題交比老闆負責, 睇黎都好似幾輕鬆, 希望佢請我啦!
*****漁人碼頭*****
見完工之後, 我到附近既漁人碼頭睇下, 我首先係個商場既麥當當內食野先, 好肚餓~~之後係商場附近地方行下~
我最初到既商場名稱~
之後去到一個叫[威尼斯廣場]既地方, 原來係一個大型住宅既廣場黎, 我覺得都幾有特色既, 而且也係對住個海, 覺得係一個幾靚既地方~
[威尼斯廣場]之中既水池~
水池旁邊既小橋, 也係下面相中既橋~
全個住宅區本來好靚, 但後面果幢舊樓就....令到全個view失色好多=.="
再近影d, 個景就完全perfect啦!! 不過我行過呢條橋時, 比位管理員姐姐望住, 可能見我生面口, 又拎住部相機影相咁岸居吧??
中央廣場, 有好多建築物及石像, 不過我冇一個個去影囉, 因我覺得麻麻地靚....
廣場附近既海濱長廊~沿途望到對面海, 都幾靚架^^
海旁邊既一隻郵輪, 我都想去旅行, 等埋我!!
其實有件幾[魚皮]既事, 就係我以為漁人碼頭係一個碼頭, 點知原來係...個商場, 為左提醒呢個白痴既我, 我特登影底個牌既....XD
*****有工啦*****
去完漁人碼頭之後, 原本想去埋黃埔隻船仔度, 點知太熱及曬, 於是放棄左, 返屋企就算. 點知返去check email, 見到最初係觀塘見果份工話請我, 問我有冇興趣, 其實都有少少興趣既....不過下星期二要見工, 同埋今日見果份都OK滿意, 想再睇定D, 於是決定聽朝先打電話比佢.
點知冇耐, 今日見工果間公司打電話比我, 問我呢個月27日可唔可以返工, 而條件及人工都係幾好既, 但我想聽日問左email間公司既offer先做決定, 於是都係答星期一先至覆佢~一次過有兩份工, 好開心呢^^