點解自己咁傻? (2)

今日佢話自己會返學, 不過要遲少少, 我先返到ive, 順便可以問埋我退學點樣可以拿成績呢件事. 其實係近呢幾日, ive已經出左上個sem既成績, 但我因為退學而清除左我網上既account, 令我唔可以睇成績呢....唔怪之得琴日蕃薯同我講英文只係得五十分, 唔怪之得佢話自己真係死得人, 要咩努力之類....不過你點講都好, 我只係決定幫埋你呢次, 自己先走去上堂聽書....

途中見到fred sir, 原來佢都唔知退左學點樣睇成績, 佢都要問下同事, 於是佢叫我留email比佢, 但我冇紙同筆呢....佢又冇筆, 於是佢叫我問其他同學仔佢既email, 到最後我都冇問, 自己果然懶呢.....再到校務處問, 佢哋都係叫我打電話去其他部門問, ive既效率果然係好差呢!! 錢就識收, 但做野效率真係不敢恭維呢~~

入到課室, 佢哋唔知我會黎, 有少少驚訝吧!? 蕃薯都比琴日早左放工, 八點幾已經返到學校, 仲問我係邊個課室上堂. 佢一入到課室, galen仲笑我係佢既伴讀書龍呢, 咁就做住一晚咁多啦!! 佢果然上堂都係冇聽書, 掛住上網同msn, 跟本就唔係比心機學英文, 又話自己好多野都唔識唔明白, 佢想我教佢嗎? 但我都冇理, 照聽書. 聽到內容後, 其實都唔係完全為佢既, 對於自己日後寫報告, 或者都有幫助既~

英文堂始終都係悶既, 好在有galen, 阿聯講下笑, 先至覺得開心d. 但我連呢個英文堂都話悶既話, 仲點可以上我之後既堂啊? law及account咪仲悶, 不過為左可以忘記蕃薯, 同埋可以取得個degree, 幾悶我都會忍受既!

自己點解咁傻?

明知佢都唔會當我係女友, 點解仲要咁幫佢?

一直係度諗住呢個問題, 我已經三番四次同佢講話會離開佢, 要佢英文之後好好靠自己; 同埋講明我會讀書, 之後會好少見面, 點解你仲要纏住我, 不斷同我講英文死得, 千方百計用佢自己唔識英文而留住我. 其實我係知道, 如果自己下定決心, 佢無論做咩也唔可以留住我, 但點解我仲要理佢? 佢都已經講明唔係情侶, 佢冇真心對過自己好, 只係見就手就去接觸我, 我係佢心目中到底係咩呢?

可能係我自己比較心軟及好人吧? 唔想佢之後比英文問題困擾, 佢既事已經唔關我事, 點解仲要理佢, 就係因為唔忍心嗎? 所以我最後都聽佢話, 決定放工之後就行住街, 等佢回覆我返唔返學....

等左一個鐘, 我自己一個人呆呆地行完街, 決定要返屋企, 點知佢一個電話黎問我去邊度行街, 佢知道我係葵芳之後, 佢話返到學都成九點, 叫我先返屋企, 聽日再同我返學吧....最後我都搭左小巴返屋企

睇黎我見佢既時間已經唔多啦, 希望係呢個星期內可以見到一次面. 或許之後大家忙都好既, 我可以真正忘記佢, 令我更快想返學....

好想離開呢間公司...

老闆娘始終都係要睇佢心情, 佢心情唔好我就受難. 就好似今日咁, 我只係錯少少野, 如冇哂出L/C比銀行既紙, 佢又鬧我一餐, 話之前都有一本擺係公司, 冇理由會冇, 又鬧左我一大餐; 我少少支出睇錯, 佢又借d已話支出都管唔到, 我哋公司倒閉啦, 唔好玩啦, 你有成幾百萬利潤, 點會執呀!! 總之佢成日都會搵野話我, 我已經好小心地做, 有時都會有錯, 但佢比都唔比我錯, 要我成部機器一樣做野....其他同事錯就最多只係話佢哋幾句, 佢既偏心簡直係明顯睇得出, 好唔想做佢出氣袋....

仲有佢屋企帶左正湯黎, 佢問其他同事飲唔飲, 都冇問到我, 當同事問我時, 我都話自己減肥唔飲囉. 飲左都真係背隻骨落

個衰同事candy仲踏多我幾腳. 我哋公司出貨時都會把資料入到一個ERP既軟件內, 我同另一位同事就成日都唔小心入錯, 要mooji執手尾, 當個c同事(我咁叫佢算啦)入資料時, mooji話佢冇入錯, 於是佢得戚起黎, 話自己冇入錯, 叫mooji唔好比我及另一位同事入, 擺明向我哋示威o者, 不過個天有眼既, 後來老闆娘見佢入錯左野, 我當然覺得好開心, 好心涼, 仲覺得佢抵死, 我係咪好衰呢?

但我始終都好嬲及唔開心, 覺得係度冇野學, 冇人工加, 加上仲要受老闆娘及同事氣, 自己更加想走. 即使而家經濟唔好, 我一於照搵工. 放左工之後即刻走到recruit, jobdb, jobs market之類開始搵工, 而且仲send左幾份resume, 希望我可以見到工, 同呢班女人講再見, 又或者再見都唔會講呢, 哈哈~

好唔想講公司d唔開心野~希望以後都唔會講啦~

一個無謂既占卜

星期日都係冇出街, 係屋企都係休息下, 上下網咁啦. 無意之中見到台灣有個占卜網站, 最大既特色係好多時占卜都係要收咩網上錢之類, 令人想占卜都即時卻步啦. 呢個情況香港yahoo會比較常見, 咩野紫微斗數, 塔羅.....都因為網上錢而同我哋無緣, 日本都有網上錢呢個占卜情況, 但比起香港少見d. 估唔到今日會比較幸運, 搵到台灣一個網站叫做[摘星工廠]既占卜網站, 網址如下:

http://tw.xingbar.com/cgi-bin/v5show_page?f=free&p=F314&pv=epaper

不過大家要先登入做會員先, 但唔使會費, 都幾好玩既. 有好多類型占卜, 主要既有愛情, 事業. 雖然佢有好多項目占卜都要錢, 但都有個部分叫做[經典兔費算], 入面全部占卜都唔使錢既~其中有個項目叫做[甜蜜愛戀指數], 可睇下同自己like既人, 男友, 甚至老公既sweet指數有幾多%, 我玩左個結果係....

我好無聊地玩左我同蕃薯....(果然係極之無聊呢=.="), 竟然有82%!!?? 唔係掛!? 我估只係個電腦弄錯...但我輸入其他男仔名字再占時, 毎個人都只係得60幾%, 唔係掛!?

於是我玩左另一個占卜, 就係[屬於你的幸福方程式], 見到入面既內容都o左咀...佢講到我同個男仔結婚之後既情況, 如生活習慣點唔一樣, 大家既社交圈子....都ok詳盡, 如果想再詳盡d呢, 當然要比錢. 不過唔比錢已經知得好詳細啦~

點解我會玩起占卜黎? 可能我對未來太唔sure, 又或者貪得意玩下吧!? 咩原因都好, 其實自己本身都幾鍾意占卜既^^

恭喜tracy及聯, 愛情幻像!?

我帶左個電話, 本來同tracy約好大家係IVE見面, 但個電話又唔爭氣, 偏係呢個時候冇電....好在我係最後一個sms同tracy約好集合地點, 希望最後可以見面啦....我等左成二十五分鐘都仲未見到佢哋, 心內開始焦急起黎, 開始擔心佢哋會唔會唔係搭地鐵黎呢, 自己越來越緊張. 突然有個男仔走到我身旁, 比左張紙及卡片我, 話有意搵我星期一去試鏡之類, 話要影全身及半身相之類啦, 其實我當時帶住耳筒聽歌, 其他事項唔係聽得太清楚, 接過佢卡片之後我仲驚, 求下你哋快d到啦~

其實我驚個什麼呢? 我係二年前都成日比呢d所謂既[星探]話影相啦, 多數係旺角, 甚至係中環都有, 又咩硬照, 甚至係飲食男女都有. 我都收左十幾張卡片, 一個星期試過有三次到, 我係度驚個什麼?

佢哋終於到左, 見到有蕃薯, tracy, 阿聯, 波特, 阿光, galan及壞人~我慌張地叫佢哋快d入閘, 蕃薯及tracy都好緊張問我咩事, 我把張紙及卡片比佢哋睇, 蕃薯話多數呃人既. 我都知啦, 可能係咁先至驚吧!? 成大班人去到旺角, 竟然見到tracy同阿聯拖手....!?!??我當時嚇到呆左, 原來佢哋兩個拍拖啊!? 當然我係開心到呆左果隻, 呢刻真係黎唔切反應......恭喜哂佢哋^^

之後蕃薯介紹左一間叫韓食家既韓國餐館, 有個好好食既豆腐窩呢~個窩可以打邊爐又得, 煮熟黎食又得~我當然選擇左打邊爐啦~

我同蕃薯同樣都叫呢個豆腐煲, 但我果個快滾好多, 佢果個煲好耐都冇反應. 最後我有我滾黎食, 佢要叫人再整返熟先食得~

食完野之後, 蕃薯見到阿聯同tracy咁恩愛(!?), 不停叫聯及tracy做親密動作, 佢竟然講左句係咪我做佢又跟住做, 之後竟然係佢哋三個人面前錫左我一啖!!!!???阿聯及tracy以為只係玩笑, 點知波特都見到佢真係錫左落去@@佢未試過係同學仔面前咁做, 點知係真既....我塊面當時紅左起黎, 估唔到佢真係會咁做, 佢見阿聯及tracy都冇做, 佢仲錫左我幾次, 果陣真係無奈囉, 唔知講咩好, 佢話我哋以前又唔係未做過...呀....我哋以前拍拖既野比人知道哂啦....呢次真係完全犧牲(又或者係好開心至岩, 好耐冇試過^^). 最後都換黎tracy及聯既合照~

睇下佢哋兩個幾咁sweet, 羨慕死我呢><

之後我哋五人一齊搭地鐵去上環睇蕃薯個朋友開既影展, 沿途見住tracy及阿聯拖住大家既手唔放, 自己不知幾羨慕, 於是我又望下蕃薯, 佢只係傻傻更更話佢今日發姣, 周圍去店人, 我叫佢同波特一對, 波特話佢只會對女仔有興趣呢, 哈哈~於是眼定定望返tracy及聯, 露出一副羨慕又落莫既樣子...那時蕃薯回頭望一望我, 及突然激我, 又話我遲鈍走得慢, 整到我係地鐵站追住佢黎打. 突然諗返起佢起初追我時, 係搭校車附近我追住佢黎打既場面, 點解今日又再重視呢d場面呢?

去到上環, 我哋幾個唔識路, 係上環街道兜左好耐, 好笑既係竟然問個阿差, 個阿差不但識路, 而且d中文講得好好, 勁呀~~幾經辛苦終於黎到蕃薯朋友影展, 起初去到只見到係間賣衫, 原來地牢先係影展, 好得意啊~見到只係七張相, 但毎一張相都好靚, 我見到有張相特別靚, 我偷偷地影左一張~

個女仔頭髮好飄逸, 好靚呢~

睇完影展後, 波特頭先冇食野, 一定好餓呢~不如大家先再去食野吧~五人係黑夜街道一齊行, 感覺好得意呢~

tracy及聯仍然恩愛地行路呢~蕃薯同波特隔咁遠架!!?

去到一間食魚蛋麵既店舖休息下, 可憐既波特以為有得食好野, 但點知竟然賣哂!? 只好叫左個雲吞麵, 但叫左之後先知自己唔食得蝦; 而tracy及聯叫左雞翼一齊食; 蕃薯叫左一碟油菜, 而我當然減肥至上, 咩都冇叫到. 點知蕃薯食完都未夠飽, 竟然捉住我隻右手黎咬!? 走果陣仲捉埋我隻左手黎咬, 我兩隻手都比佢咬哂啦@@

終於各自返屋企~tracy及聯一齊搭地鐵去拍拖啦~只有蕃薯, 波特及我. 我哋兩個早已經搵到巴士返屋企, 只剩下波特, 都好彩波特可搵到香港站既地鐵站搭返屋企, 咪即係只剩下我同蕃薯!!!??其實佢返tm話咁易, 除左我同佢有同一班巴士外, 佢仲有兩個號碼既巴士可以返屋企. 我叫佢先上車返屋企. 第一架只有佢號碼既車黎到, 佢話而家早仲可以等多陣唔坐; 第二架車黎左, 又話太多人唔坐=.="叫佢坐地鐵, 佢又唔制. 其實佢係想同我一架車呢, 自己正蠢材!!

終於上到車, 佢突然問我介唔介意佢kiss我, 我都唔介意既, 我挨住佢博頭時, 佢話我哋唔係情侶, 但又做d情侶既行為, 係咪唔係咁好? 於是我即刻彈開, 保持距離話唔敢店佢. 於是佢突然攬住我, 仲攬得我緊緊的, 起初我都唔知點做好, 但最後都攬左佢, 而且仲kiss@@及攬到實實一齊訓教, 一直都冇放過手, 反而仲攬得對方實一實外, 佢仲問我個pose累唔累呢, 我覺得好開心, 好sweet及舒服, 原來情侶係咁樣嗎? 即使我哋係真正既情侶, 但同真正既情侶冇分別. 我終於落車, 我好唔捨得, 想永遠都係咁. 究竟係真正既愛情, 定係錯覺呢? 當日我哋拍拖既毎一幕於今日一一重視, 而且感覺不但冇變, 應該話我比對佢既感情好似比以前更濃烈呢.....明明唔係真正拍拖, 自己應該清醒下, 唔好再走入呢個愛情幻像內啦!

多謝文迪, berry及阿光賞面^^

今日又走左去ive見同學仔, 上既係好似係咩computer animation. 講既內容唔關我事, 但見到好多得意既動畫, 有泥膠公仔, puppet, 剪影等等既動畫, 全部都好得意, 我都係做睇動畫果個算吧. 叫我做個動畫出黎就....都係交比各位同學仔好了^^

蕃薯終於返到黎, 佢即刻比左個電話我睇. 個電話真係幾細部幾得意既, 個mon既色都靚, 但問題係佢冇手寫版!? 對於唔識打中文既我簡直係大件事, 我就話[雖然個電話好得意(因我鍾意所有細細件既物品, 尤其係電器), 但因冇手寫版我未必會買]. 雖然係咁講, 但又拿左佢部電話亂按, 佢怕左我都收埋個電話囉=.="

終於放左學, 我已經餓到胃痛, 我都冇理到蕃薯佢哋, 先同文迪及berry搭小巴去葵芳食野. 後來係排隊時撞到阿光及阿駿, 加埋阿光去食飯, 四人終於成團去食飯呢~後來我send sms問蕃薯, 問佢哋係邊, , 佢只話唔見我及搵我唔到, 哈哈~都唔知佢係咪真係搵過我啦...

再次多謝文迪, berry及阿光, 你哋三個同我去食飯, 文迪仲問我食咩, 最後都決定左食米線~我自己抵死叫左個中小spicy既. 但已經好spicy啦><

影到blur左添!? 係我哋食米線既地方....

中小spicy既米線!? 本來唔叫飲品既我即刻叫左杯飲品><

食完飯之後俟各自回家, 我係上車途中先發覺....我唔記得左同佢哋三個影合照, 認真蝕啦@@

和同事食飯

今晚我屋企人冇煮晚飯, 爸爸send左短訊叫我哋自己食飯, 我本來決定買個炒麵食就算, 點知新同事kiki話想食香荢批, 於是我就同佢一齊去公司附近間麥當勞食飯~

可惜既係香荢批已經賣哂, 最後kiki都冇得食, 我用左mooji比我既贈券叫左個魚柳包餐食, 用左張券換三件免費麥樂雞. 好耐冇食過魚柳包, 覺得特別好味呢~冇理由叫個同事只係望住我食, 於是請佢食左暑條及一件麥樂雞. 哈哈~佢真係諗得過, 痴我少少食物, 其實同佢都唔係朋友, 因我覺得公司唔可以稱毎個人係朋友, 始終都有利益衝突, 同埋人言可畏, 佢哋毎個都係好人, 只係八掛及多口, 加上我同佢哋唔熟, 我唔會講太多自己野比佢哋知.

果然不出我所料, 始終女人都係愛講人是非, 佢話唔like阿珍咩都唔識做, 係公司唔知做咩; 唔like candy佢要人撞板, 應該係話佢知道公司曾經發生咩事, 但唔會話比新入職既同事知, 要佢哋慢慢領略. 其實我就唔會理呢d事, 因我對毎個人都唔係太好好感, 但始終都一齊工作, 多個朋友都好過多個敵人, 對自己都有利d. 之後佢竟然問我阿珍有幾多錢人工, 哇~咁深入既問題我點可以答你, 就算我知都唔講啦, 我只好話唔知就算....

果然係公司d人信唔過. 想係我身邊問公司資料, 我一定唔會講. 我相信佢人生經驗比我更豐富, 絕對係醒目果隻, 一定會搵冇咩經驗既女仔笨啦, 我先冇咁蠢呢. 總之佢哋任何一個人講既話, 真係要即刻過濾過, 用腦諗過先好講呢