最近迷上追劇

琴日係蕃薯屋企同蕃薯及蕃薯媽講開電視劇集, 突然講起果套[絕對彼氏](絕對男友), 自己又睇過畫, 覺得真係超正, 於是我上網搵搵, 結果真係有呢^^於是我一直狂睇, 要tracy及蕃薯忙住maya功課, 自己就係度睇劇, 始終唔係太好呢.....><

速水直道真係好靚仔啊>O< 即係後面冇著衫果個, 同埋女主角及另一位男主角~

毎集開首既畫面~我比較鍾意呢張, 充分表現到人及機械既戀愛關係~

故事 : 這天，梨衣子收到了一份速遞，打開一看入面居然是一具人體，她大驚，再看之下原來就是她的機械人男友奈特。機械人男友完全按照她的要求打造，可謂十全十美的理想男友！梨衣子感覺超怪，她無法和一台機械談戀愛，但是她的機械男友卻把她當成唯一的珍寶寵愛着。

　　果品公司的二少爺創志偶然間發現梨衣子有獨特的糕點品味能力，不由對她另眼相看，之後仲會愛上女主角梨衣子, 和機械男友產生一段三角戀情...最後梨衣子愛上奈特, 但奈特最後面臨報廢的命運....

電視戲同漫畫內容有點唔同, 雖然都係漫畫好睇d, 但呢套都唔差, 而且中間有好多笑位, 所以我都係比較鍾意愛情喜劇, 又可以睇到愛情感覺, 而且又開心~可能係蕃薯知道我鐘意睇愛情喜劇而介紹比我睇吧! 睇完呢套劇, 我都好想要個奈特咁既男友啊, 一定勁正~

我最鍾意佢既笑容~好cute及有型啊>o<

真係好有型啊~普通樣都咁型^^

究竟我係睇奈特定係劇情多d架!? 冇計啦, 奈特咁型, 當然係睇佢先囉, 呵呵~今日一口氣睇左三集, 聽日及之後再努力睇劇先^^

又再去做陪襯!?

今日蕃薯同我講話做maya功課, 我心諗你做咪做囉, 我問佢tracy會唔會黎, 佢話會. 咁我叫佢哋兩人做功課, 我唔知去到佢屋企做咩, 佢就同我講話黎hea下!? 吓!? 我點解要黎你屋企度hea呢? 我都唔明, 我幫唔到手, 我去黎做咩? 真係一點意思都冇, 除非.....不過都冇咩可能吧!?

父母返左大陸, 我妹又未放工, 只有我一個人好悶, 加上我又唔想成日係屋企, 於是答應左去搵佢, 結果要成兩點幾先至到. 我又好似去旅行咁, 輕鬆去佢屋企, 似乎我好鍾意自己一人周圍去果種感覺~

今次終於影到架輕鐵, 不過只係得果少少, 下次有機會再去既話要影得清楚d先!!

上到佢屋企, 都係睇住佢做maya多, 講真果句真係唔知去黎做咩架, 好似陪襯一樣, 完全冇用處. 點解我近呢兩次去都只有我同佢, 佢媽媽後來買完野先返屋企. 但我哋兩個人都冇咩親密行為, 只係傾下計, 我間中睇下漫畫, 打下機, 係屋企做都得啦, 都唔知咁遠黎到做咩? 可能係想對方係身邊陪住自己及見到對方就開心掛!? 不過都只係我自己胡思亂想, 唔係咁遠黎到把鬼咩!

後來tracy黎到, 佢哋一齊做maya囉, 睇見佢哋合力做份功課, 自己咩都做唔到, 自己好似好冇用呢! 只好打下機, 同蕃薯媽傾計及睇下電影啦, 其實自己好鍾意呢種自由自在及輕鬆既感覺^^

蕃薯做緊maya功課啦, 佢平時做野係咁個樣, 好得意(!!??)

tracy都努力做緊功課啊!! 佢哋真係好專心!

大家一齊傾下份功課點做囉~唔知點解近排好like影佢哋二人既相^^後來蕃薯見到我影佢哋, 佢自己成日行開左, 影唔到添=.="

我同tracy見到佢做得咁靚, 真係好想打佢, 覺得佢根本係變態啊! 整左架法拉利出黎咁鬼靚, 仲要同真既一樣. 其實架車都整左好耐, 我係1月1 都見過佢架車, 見佢整得咁靚, 我改左蕃薯個名叫車王, 唔係佢有好多車, 而係佢可以用maya整好多車, 仲問我哋一陣食飯楂咩車出街, 不過佢都係只同我及佢媽媽講, 呵呵~

未rendering前既樣, 都係未完成既, 其實琴日已經完成左少少短片, 不過先賣個關子, 遲d就知係咩黎架啦^^

終於食飯囉, 我出左雙糧, 本來想請大家食下飯, 但大家都話話唔使呢, 結果都係各自比返自己果份.本來想打電話叫外賣, 我自己去拿, 但都係好凍, 都係叫人送外賣上黎吧!


spicy腸仔豬排炒烏冬~估唔到個樣都幾靚既, 而且仲幾好味, 好少外賣飯個樣咁正!!

食完飯之後tracy要走, 佢問我走唔走, 我見冇咩做本來想走, 但我竟然又睇亞視套劇集結局, 本來我都唔睇, 無啦啦走去睇都有, 但我都未講話想睇劇集, 蕃薯話都係好早o者, 唔使咁早走之類, 於是tracy走先, 我可以繼續睇埋套劇集, 結果睇到成十一點先走, 好在仲有巴士搭, 真係好彩^^

和同事剪頭髮^^

話說阿珍個老公, 即係老闆娘個細佬係做髮型師, 今朝講起剪頭髮, 於是阿珍問佢老公染髮幾多錢, 佢老公話只係百幾元, 平時我哋出去染髮最少都要二百幾元啦! 而家咁抵當然去啦, 最後我, candy及mooji決定放工之後去剪髮, 由阿珍帶路.

間髮型屋係太子, 同珍屋企好近, 我哋四人一齊搭的士, 冇幾耐就到. 見到有個女仔及珍既老公已經企係樓下等我哋. 我也好奇地影左個門口, 差d比珍個老公鬧, 都係快d影左先~

終於影到個門口啦~係一間樓上舖黎既

原本珍老公話我最易整好個頭, 見我整先, 但以我咁麻煩既性格都係唔好啦, 因我只係選隻染髮顏色都勁耐, 於是比左candy及mooji先, candy決定黎個大變身, 本來想染到我咁淺色, 但第一次染都係唔好啦, 遲d先啦, 最後佢紫紅色; mooji就染啡色, 我就染一隻叫青金色既顏色. 除左染髮外, 仲有焗油及剪髮, 都只係百五元, 真係抵到爛!!

candy染緊頭髮啊~你哋可以見到佢有部分頭髮係紫紅色嗎?

等我都影返張自己先~我而家染緊髮呢!! 見到我又袋又頸巾, 真係混亂><

我哋三人整左成二個鐘, 終於完成左囉~最早係mooji整完, 之後到我, 最後係candy. 睇黎珍個老公好有心機同我哋剪髮, 而且話下次焗油只係收一百元, 下次同我candy去先至得^^

終於整好個頭啦^^d頭髮只係暫時整直左, 同埋個頭染金左少少~candy仲係度剪緊頭髮~

後面睇d頭髮好靚呢, 好令, 同埋我覺得個頭好輕! 鏡內見到mooji幫我影緊相~

珍要返大陸, 佢老公又唔同我哋食飯. 我哋三個人去附近地方食就算, 最後我哋選擇左間食魚湯米線既舖食野就算, 佢哋叫左白切雞飯, 而我當然食魚湯米線啦!!

肥牛魚湯米線 + 熱咕咕力~都幾好味既!!

食完飯後, 我哋三人都搭地鐵返屋企, candy要搭觀塘線返將軍澳, mooji同我都搭到去荃灣. 終於有人同我搭到去荃灣呢! 沿途傾下去旅行, 我都覺得唔錯, 真係好想去, 不過都係等我有錢及時間, 唔使再返學先去啦!!

新年快樂!?

新既一年終於黎臨, 先同各位好友講聲新年快樂, 一年靚過一年, 快d搵到錢外, 仲有如意郎君. 有男友及老公既話就長長久久啦^^

以為一切會有新既開始, 想自己去行下街, 點知蕃薯同我講話做功課, 我問佢tracy會唔會黎做功課, 佢話tracy要做第二份功課, 未必會黎到, 於是我講笑話黎啦, 不過我唔識電腦, 都唔知去佢度做咩, 佢竟然叫我陪下佢, 見佢最近工作及做功課都忙, 就去探下佢啦!

可能係我唔使再做功課, 覺得好悠閒, 所以我係去tm時, 覺得真係好開心, 好輕鬆, 好似周圍去旅行一樣, 同埋唔知自己之後有冇機會黎, 所以都係先影相先吧!

從輕鐵車箱內望到既外景, 我好like呢張相, 同埋望出去街上果份感覺~

出閘時拍八達通既咪錶~唔知點解覺得好得意呢^^

買輕鐵車票既票機~我覺得好似玩具, 好得意^^


蕃薯屋企樓下, 睇黎我之後會越來越少機會會去到呢....

上到佢屋企先睇佢打機, 再之後睇佢做maya功課, 在旁既我對於電腦真係咩都唔識, 只係一直睇住佢畫, 又再覺得自己好冇用呢....我好討厭呢份自己冇能為力既感覺, 好想幫到蕃薯, 但又幫唔到佢. 睇睇下我竟然訓左, 直至蕃薯叫我個名先起身, 見到佢畫得咁靚, 只係睇住電腦畫都可以畫得咁靚, 覺得佢真係個電腦天才呢!

本來佢未做好maya, 心情麻麻, 對我語氣都係差左d, 但做完maya之後, 佢心情開始靚返d, 又同我開玩笑及話我, 都係快d食飯吧啦! 本來想去大家樂食飯, 但似乎我同蕃薯媽唔太like, 最後都係去返四十九元任食打邊爐果間, 我哋等左好耐先至有位, 今次等我坐在你旁邊. 都唔知拿景定贈興, 店內成日播住鍾嘉欣既[其實我不快樂], 雖然我對於同佢既戀情係咁o者, 但都唔使成日播架!? 其實你都唔係唔快樂, 蕃薯除左夾送比佢媽媽外, 也知你鍾意食果樣野夾比你食, 都係唔好胡思亂想, 開心d啦! 最後掛住趕住搭巴士, 唔記得左同你及你媽媽講再見, 真係唔好意思, 係sms內補返><

估唔到09年既第一日會同蕃薯過, 我仲可以有個新開始嗎?

提早放工!?

終於到08年最後一日啦, 也係大除夕, 大家顯然都冇咩心機工作, 只係一直等放工. 都到左三點, 老闆娘都仲未叫走既!? 睇黎今日都係冇咩希望早走, 都係繼續工作吧!! 真係好想快d返屋企啊~

直至四點, mooji係食飯時間前同老闆娘買個成三千幾元既手提, 我都好想出雙糧, 好想買其他野~只怪自己之前唔爭氣! 不過原來candy係上年剛入職時同我一樣, 都係按比例去出雙糧, 睇黎我真係不用灰心, 但都要努力. 講返正題先, 點解會講到mooji買電話呢? 因為佢四點要去拿返個手提, 老闆娘也係呢段時間放工, 我哋三人仍然呆呆係公司, 直至到mooji拿個電話上黎, 都已經成四點幾, 佢先同我哋講話老闆娘比我哋五點半放工!? 吓!? 咪即係只提早半個鐘頭走.....真係有d掃興呢....

老闆娘之前買既吸塵機會係今日送到公司, 結果成五點半都未送黎, 我哋要一直等, 直到五點五十分先送到黎!最後我哋只可以提早兩個字走人, 真係可憐呢....

夜晚十二點前係fb同哂所有好友講新年快樂, 估唔到要同好多人講, 包括所有同學仔, 好友, fb度認識既朋友及係英國居住既親人, 成三十人到, 本來想寫埋老闆娘及同事落去, 最後都係覺得唔好呢. 大家都係早d訓, 迎接呢日既黎臨吧!

不是雙糧的雙糧

終於要返工呢, 好唔捨得果幾日假期, 又要返去作戰! 一開始返到公司先開左人工票. 我哋係開人工支票前, 會先開左張紙比老闆娘睇先, 老闆娘同我講要改野, 唔通我計錯數!? 原來係今個月出人工, 見到毎個人都真係有雙糧, 點知睇到我自己時, 自己竟然得九個月糧!? 點會咁架, 差咁多都有. 差唔多同一時間入職既mooji都有雙糧, 只有我冇, 好鬼傷心, 但又唔可以表現出黎, 只好一直低頭工作.

好在今日有好多地方要去, 先去美孚永亨銀行, 之後又去旺角及尖沙咀, 都可以去成個幾兩個鐘既, 真係唔想留係公司度....都叫可以輕鬆一下, 真係唔想返公司, 就咁樣周圍行下, 唔知之後有冇呢個機會呢?

我心內都不停安慰自己, 鬼叫自己之前唔比心機做野, 成日比老闆娘和同事鬧, 甚至老闆娘話炒我, 和同事講話佢哋有花紅, 自己就從來冇聽過, 到而家有九個月花紅, 都係一大進步吧!? 唔係佢哋比機會自己, 我都唔會有花紅, 加上又可以解決到學費問題, 自己應該開心先係. 但我拿住張票, 一點開心既感覺也冇, 唔足一個月既糧, 固然係唔開心. 仲有另一件唔開心既事係, 聽candy講, 個同事mooji竟然同老闆娘講話我之前成日做錯野都有雙糧!? 有冇搞錯呀, 我都係對你d野你先冇錯, 平時你打單都有錯啦, 竟然咁樣話我!! 呢個人都係口是心非, candy同我講話以後唔好同呢個人講太多野, 除左呢件事外; candy同左個幾月糧, mooji係一日之內問左佢三次幾個月糧, 自己得到份雙糧咪算, 做咩走去八人哋出左幾多, 跟本都唔關佢事, 呢兩件事令我越來越對mooji冇咩好感外, 自己也怕左佢. 睇黎以後都有排煩, 我覺得唔理佢好似係最好的.....

candy也同 我講, 老闆娘都同佢講過話如果我比心機做同埋少d出錯既話, 會補返之前既錢比我, 到底係加人工, 定係補返雙糧比我, 我就唔知道. 不過我都聽左老闆娘話加人工比我, 而我都比心機做野, 咪又係冇加, 都係得個聽字就算. 自己等個市一好就即刻走人, 即使未讀完個會計學位, 只要有機會我一定會走, 而家等既係一個機會, 希望呢日快d黎臨~

再去shopping~

琴日同完tracy去shopping之後, 今日同姑姐去, 都係去旺角啦.....點解最近成日都去架!? 同完蕃薯又同tracy, 之後又同姑姐, 短短呢五日之中有三日去旺角, 會唔會密左少少呢? 不過同自己朋友及親戚去, 都好過和同事去, 呵呵~

去到先食左個lunch先, 姑姐問食咩, 當然係日本野, 而日本野唔少得既當然係~三文魚炒烏冬^^諗起都漏口水呢, 仲有今日送三文魚壽司, 全部都係三文魚, 簡直一流~

有點可惜既係....d烏冬唔夠多, 同埋我唔記得左影壽司....><

食完野之後當然去運動下, 當然係shopping啦!! 首先行左旺中先, 見到好多舖頭, 都冇咩岩心水既款式, 睇黎姑姐都係冇咩心水, 行左全個中心都冇野買....於是走左去花園街行下先~果然冇去錯地方, 果度d野都係平靚正, 姑姐買左兩件連身裙, 我就買左一條灰色既緊身褲, 睇黎我著上身都係肥啦, 但見到個公仔著出黎咁靚, 自己都係買左=.="

行完街之後就去報名, 當然係報我之後讀果個會計啦~目的地係HKU space係美孚既學校, 自己竟然唔記得帶筆都有=.="好在學校有筆, 又要拿拿聲拿張身分證出黎影印, 不知幾狼狽, 好在最後都可順利報到名, 唔知幾時先知收唔收我呢? 聽我姑姐佢哋讀過hku既hi dip, 果間學校一定會收, 因個hi dip係可以直升既, 咁都好d^^

報完名之後都係返屋企休息一下, 好累呢.....

返去又玩下fb既pet先~今次有埋個lolita頭飾, 好貴啊!!要成二千元><

睇你都係同我一樣咁懶啦!! 買張床比你訓夠佢><