享受那種自由自在

距離我離開IVE既日子唔太遠, 自己會唔會有d唔捨得呢? 當然一定有, 我最唔捨得自己所愛蕃薯, 雖然只係短短一年, 但係佢身上我學習不少, 尤其係點樣去愛一個人. 我知我即使離開, 我都一定會想見佢, 好掛住佢. 只係今日冇見, 點解會咁想見? 之後一定會少左好多時間, 一定要習慣下啦~!

無聊起黎執下自己間房, 尤其係個衣櫃, 簡直係亂到飛起, 好似幾世冇執過咁既樣. d衫亂到死, 我用左成個鐘先至執返好, 可想然知我個櫃係幾亂....

登登~執完之後四正好多啦, 上面個膠櫃係擺褲褲, 下面果個係擺裙, 旁邊掛住d褸, 睇黎我都幾多褸, 可以唔使再買. 仲有褸果度掛左個袋, 個袋擺哂我d頸巾. 有成七條咁多, 多數都係人送比我=.='

有機會再怖置下我間房, 好難得有自己既一間房, 最好整到好似架妹咁既房就最好. 個會計degree成3月1 日先開學, 有兩個月放肆, 得閒自己休息下, 又或者搵下朋友及同學仔食飯都唔錯呢~

執完櫃之後, 我又寫下份英文劇本, 又download下nds既遊戲玩, 我終於成功upgrade到最新版本, 可以玩新game, 好耐冇打過機, 都係琴日玩完阿光果部nds後, 自己舖打機隱又返黎, 不過都好既, 可以唔使再諗煩人的愛情, 自己都幾enjoy那份自由自在的說^^

開心的一晚

好難得地,放左學都可以成大班同學去食飯,對上一次好似已經好耐,好開心.其實係自己覺得和同學相處既時間越來越少,於是今日無啦啦發溫問佢哋食唔食飯,好在有多位同學,排名不分先後既,分別有蕃薯,文迪,berry,阿聯,波特,阿光同阿駿都話去食飯,多謝你哋啊^^

阿sir曾經同我哋講過, 如有人中途唔讀既話要係二月拿返張cert, 波特以為冇人走時,我就講出我讀埋呢個sem就唔讀既消息, 佢竟然問我係咪講真, 我都有d意外, 我都冇同佢講過話走,點解佢會講呢句呢? 唔通係蕃薯有野會同佢講? 似乎佢都同意我唔讀呢科呢....我哋幾個等左好耐都冇巴士, 於是我哋又再次影起相黎~

是但影既一張相, 不過真係好樣衰, 我偷影架, 蕃薯擰個頭過黎做咩=.="

多得阿光既nds, 我可以玩返ff12, 好開心. 就連蕃薯見到我對絲襪花左, 再督下我隻腳, 我都冇咩理佢, 一於遊戲機大哂^^我哋去深水步睇電腦書, 也係我哋呢班同學仔既習慣, 不過冇所謂, 最緊要就係開心~似乎佢哋要搵maya既書用黎做project, 好在佢哋最後都可以買到^^

終於到左食飯環節, 係我最開心既時候, 又可以食餐正既~食飯途中講到大家既未來, 希望係佢哋畢業時, 我可以毎人都送樣野比佢哋, 不過只限你哋及比較熟既人, 但都已經大出血, 呵呵~佢哋最擔心既係係2010年係將軍澳上堂時唔知點算, 加上學費問題, 真係問題一大堆. 我雖然唔讀呢個course, 但都唔好得好多, 我仲要為我既學費而煩, 要交澳幣咪仲死....都係唔好太擔心住, 食左野先啦~

我叫既餐啊~有餃子煲, 烏冬及凍choco!! 其實我點解唔叫牛肉架!! 不過餃子都ok既...

去換新學生證~

對於我黎講, 換唔換新學生證都冇所謂, 因我都唔會再讀落去. 但我竟然擔心蕃薯有冇換新證, 於是我問蕃薯換左未, 果然不出我所料,佢真係冇換, 本來我唔想理佢, 點解我後來會關心佢架? 自己都就黎走囉, 況且蕃薯又唔係我男友, 我理佢咁多把鬼咩! 但我最後都應承左佢, 代替佢去拿學生證, 因佢話呢幾晚冇時間去啊=.="於是我決定換埋自己果張證算數...

阿駿都好好人, 知道我去換學生證時, 佢都話同我去換. 我哋約好左七點係學校等, 但之前我先要去搵蕃薯先, 因佢要寫授權書比我, 我連呢封野都幫你作埋, 仲有你sms度話自己冇帶比你個soft copy, 好在我有帶, 幫你印埋出黎, 加上拿埋去你公司樓下比你簽, 同埋要拿埋你個舊學生證及身份證影印本, 我真係唔話得, 哈哈~

我一放工即刻去搵你, 但又唔敢打擾你工作, 於是只好send sms比你, 但等左你半個鐘都未覆我, 於是我先同佢講話約左阿駿要早d返去, 佢就打電話比我, 仲話我傻瓜做咩唔打電話比佢><比左授權書佢簽名, 同埋拿左佢張分左體既學生證(前後分開左=.-")及身份證copy之後即刻去搵阿駿. 係sms同佢道歉先, 因為我遲到, 佢話唔緊要, 仲話係小巴站等我, 我叫佢唔好等, 先去校務處.

去到校務處時, 見到佢企係出面等我黎, 我突然諗起呢兩張舊學生證會收左, 於是幫佢哋影返張遺照先~

估唔到佢張學生證個樣都ok呀, 我果張就差左d=.="係時候同呢兩張證講再見....

去到counter有好多人, 等左咁耐終於到我~當我幫蕃薯換證時, 果個人竟然記得我係午飯時打過電話黎問野, 原來佢係同一個人黎架!?好快就換完證, 我同阿駿先搭小巴去地鐵站, 仲驚會同佢坐, 因我只係想, 又或者係習慣吧, 只係同蕃薯坐, 唔習慣同男仔坐吧! 唔知個天係咪故意安排, 全架車d雙人位全部full哂, 只剩下單人位, 我同佢分開坐, 好野! 落車後佢送我去到小巴站, 因我覺得搭小巴返屋企方便d...

終於換左新證啦~15日deaadline先去換, 次次我做野都係咁炆=.="

返到屋企黎個大教訓, 之後收到蕃薯個sms及msn上多謝我, 但佢有d代價既, 就係幫我做maya份功課, 當然我都會自己做. 我做左一部分之後, 佢就幫我完成埋其餘部分~佢自己仲貪得意幫個helmet整埋個身, 真係服左佢....我哋邊傾計, 佢就邊玩maya, 我就上網睇周慧敏同倪震分手單case, 果然女人係八掛既, 我仲買埋忽周黎睇, 同時也令我反思, 到底愛情係咩?

屋企大堂的靚裝飾

今日仍然都係唔使返學, 我一早返屋企休息一下仲好, 其實我都想有個男友, 我哋一齊去食飯. 都係唔好發夢啦....見到屋企大堂既裝飾好靚, 我自己都停住腳步去欣賞外, 仲走去影相. 有我最鍾意既聖誕樹添~

我都係覺得冇咩裝飾既聖誕樹比較靚d, 可清楚睇到毎塊樹葉, 咁當然有怖置既話我都鍾意啦!

等我都影返張先~不過我拿太多野, 加上我塊面真係好肥, 張相好核突啊=.="

件衫係我返學之前買, 近排真係好興民族服裝, 既可著得比較女仔d, 又可以型. 加埋件兔毛背心, 連angelababy都鍾意著, 加上流穌boot及裝飾物, 簡直係冬天必備item~

我而家又身痕想入貨, 去買多d先~不過要顧住我之後讀書d學費呀><

難得既斯文look

話說上星期老闆娘送左一條burberry既裙比我,佢話自己已經肥左好多著唔落,加上佢就黎要搬屋, 聽講佢間屋有成千呎,但想清左d舊野,於是佢除左比條裙我之外,仲比左一條頸巾及一頂帽比我~真係多謝佢,令我可以慳返d錢,又有靚野係身,我突然覺得自己好鬼cheap=.="

我最鍾意就係頂帽, 帶左落去好似有隻貓耳. 條裙都好靚, 講真我連條斯文裙都冇, 呢條就正啦!

老闆娘琴日問我, 做咩唔著條burberry裙返工, 可能佢好想睇下我點著及著得好唔好睇, 於是我琴晚努力搵下有冇上身衫襯, 一打開個衣櫃,見到全部都係去街衫, 真係連一件像樣子既衫都冇, 搵左好耐, 終於比我搵到一件, 終於可以著成套斯文衫去返工

出門口之前影下相先~講真我除左見工之外, 第一次著到咁斯文...

一返到公司都預左會起哄啦, mooji即刻拿個電話出黎幫我影返張相, candy就話我今日好索, 好似OL, 可以參加亞姐, 港姐就未到我=.="阿珍及老闆娘都讚我著得幾好睇. 不過我就好唔習慣, 成日覺得條裙好長, 好似做毎樣野都要斯文, 仲有對鞋成三吋高, 平時既話我會除左呢對鞋換返對拖鞋, 但今日呢個斯文look, 著住對拖鞋周圍走會好怪,於是我全日都著住呢對鞋, 真係痛死我! 睇黎都係今日著成咁就好, 之後著返causal就算^^

終於交video功課~

各同學最近都辛苦哂, 終於到左交功課日~大家都好比心機交左自己既心血, 由編劇, 搵角色, 排練, 真正拍攝, 剪片至後期製作, 大家都盡自己努力去做, 而且我仲有份幫人拍戲, 雖然辛苦, 但好開心. 我覺得呢科簡直係最好玩既一科~

唔知係咪好多人仲未完成, 到左七點幾都唔係太多人返到, 阿光, galen佢地組剪緊片, 文迪果組仲未見人既? 今日問佢哋剪左片未, 佢哋仲未覆呢....最後呢個首映禮係大約七點半到開始, 起初都冇人願意開始, 好在galen佢地自動請櫻, 首映正式開始~

阿sir整既今日首映禮既present~

galen及ryan佢哋果組既present, 個劇名叫做終極綁架, 講一個有錢人比人綁架, 三個警察去help人既故事, 全套都好好笑, 尤其個結局, 個差人竟然以為個炸彈冇野, 點知一扔在地下就即刻爆炸, 結果全部人都死哂, 最後係其他電影內拿哂死後既片段, 超正~完全冇咩缺點, 甚至我覺得套戲比蕃薯更好, 當然唔會係蕃薯面前講啦...

第二組終於到我哋, 主角果然係波特及tracy, 都預左啦, 其實全套戲都係集中影佢地, 我只係帶過個故事, 連阿sir都唔知我係劇中個角色係咩....連佢哋後期整個盒及片尾都係用tracy做封面, 不過算啦, 自己已經預左, 最後一次拍片, 冇所謂啦!

第三組係阿賢及阿昌果組, 佢哋部戲個名係友共情, 我好鍾意呢首歌, 覺得好有意思~故事講一個有才能既男仔, 佢身邊有個朋友, 佢朋友偷用左佢個idea, 得到老闆賞識, 不過最後個朋友都有同有天份既男仔講出真相, 仲介紹佢比老闆, 最後大家同埋一齊慶祝聖誕. 故事都ok既, 但唔夾咀型><

阿賢負責present, 佢叫我唔好只係影佢哋, 仲有另一邊既同學!

哈哈~阿賢又係度既? 真係冇左darren就真=.="

第四組係阿光及阿駿佢哋, 由於組員仍為呢段片而努力, 所以只有阿駿一個present. 由於我有幫手拍, 所以都知道劇情既. 係講有兩姐妹一齊入大學, 妹妹遇上自己所愛, 而且仲同佢拍拖, 可惜既係個男仔係花心, 佢一早有女友, 同妹妹只係玩玩下, 姐姐唔忍心見到妹妹咁, 於是聽左一個神秘人既話, 用學校流傳既傳說, 係廣場上圍一個圈, 再許下願望就得, 但當然有代價, 就係用姐姐自己既幸福同妹妹換轉....個故事本身都幾正, 拍攝手法都幾好, 我最like文迪及阿駿拍拖果段, 盡在不言中, 不知幾sweet, 如果我可以同自己所愛都係咁就好~

只有阿駿一個present又真係可憐d啊><

最後一組係文迪, 佢哋果組要過片, miss哂全部同學既present, 我見佢哋咁耐都未到, 蕃薯叫我打比文迪, 其實我都想打, 竟然比佢開口講左先, 哼! 之前其實已經見到berry係學校, 但佢叫我唔好講比人知佢返黎先, 於是我就話佢哋黎緊. 好在佢哋三個最後都到左, 可以present, 但段片未得, 仲未有得睇呢><唔知幾時可以睇返呢?

佢哋呢組終於present啦, 好在都趕得切~

文迪佢地果組既盒及choco, 仲有故事資料....相當之靚~

放肆的英文堂

可能係聽日毎人趕住交片, 好多人都冇返今堂英文, 到左七點, 都只有我, 阿聯及darren, 我同阿聯因太累及無聊訓左, 係darren返學我哋先至醒返. 之後都有其他同學返學, 阿光仲帶左陶源酒家既白兔仔棉花糖比我哋食, 個樣好得意架^^

得意到唔想食佢啊><

呢堂miss都唔知教咩好, 因預左呢堂比我哋練習oral, 但我個劇本仲未寫好, 唔可以拿出黎講住, 只係同tracy傾下個內容. 於是miss教返nites既野, 因佢原本冇諗過教書, 結果....d同學咪講哂爛gag, 笑到我哋死, 嘻嘻哈哈過半堂, 不知幾開心^^ 到左break時, tracy提議話影下相, 好在我有帶相機, 我驚自己影得核突, 於是叫左tracy楂機, 我哋玩左兩張自拍~

哈哈~估唔到第一次影, 都影得ok喎~

其實我鍾意呢張多d, 可惜over左啦....

之後我哋兩個, 阿聯, 波特, 阿銘及波特六人去左學校中間廣場果棵聖誕樹度影相~但我只影左棵樹, 佢哋用左波特部機影相, 希望佢遲d會send返比我哋啦><

梱樹就唔係好靚既, 不過都好過冇野影><

我哋影相已經影到忘左形, 唔記得左要上堂. miss突然叫我哋去上堂先至記得, 果然係離譜!! 但都好過上英文堂....最後我哋抽左籤決定幾時present, 我哋果組係最後一組present, lucky^^