無聊的工作天

首先要多謝mooji先, 佢因近排公司冇野做, 走左去玩摺紙, 佢摺左聖誕樹比毎個同事, 仲可以選擇埋顏色. 最後我選左銀及藍色, 可能係感覺上呢兩隻色會襯d掛! 至於紅色呢我又唔鍾意, 金色又覺得太俗, 於是咪選擇兩隻睇落去比較舒服既顏色~

哈哈~真係幾靚啊!! 總之學下點摺啦~

全日公司都冇野做, 真係悶到我死, 我不停地上網及玩facebook, 整到我對住個電腦都覺得好煩及悶, 成日去望下幾時放工, 時間過得好慢, 過一個鐘都覺得好慢....原來冇野做真係咁痛苦, 因我之前果四日都不停做野, 覺得時間過得好快. 唔怪之得多數人都話有野做仲好啦!

之後candy佢地計畫買布甸食, 由於我冇錢, 再加上我近排肥左要減肥, 所以都係唔食, 佢地最後買唔到布甸, 變左買芒果蛋糕, candy同mooji都好衰, 特登話個蛋糕勁好食, 仲係我面前食, 好衰><不過佢地都係玩o者, 你地引唔到我既, 我只好影左張蛋糕既相, 黎個[望榚止餓]^^

個樣都唔係咁好味o者~都係我媽生日果個好味d, 哈哈~

終於放工了, 可以返屋企~諗起聽日去拍片就開心哂, 期待聽日拍片中^^

第一次設計

終於唔使返學, 以為可以輕鬆一下,但一諗起老闆娘交帶我, 要我設計一條收腹褲及一套內衣套裝, 的確係個好大的考驗. 我只係跟老闆娘學過少少點畫收腹褲, 我都冇咩點練習, 點樣可以設計條收腹褲?而家仲要我學畫內衣套裝!? 簡直係越級考驗.....我都唔知點算好, 好在有我哋公司既經理阿珍, 我終於有人help啦! 點解佢叫經理呢? 因老闆娘幫佢整左張卡片, 有埋佢個職責, 所以我哋咪咁叫佢, 呵呵~

終於開始畫下, 經過阿珍既教導, 同埋佢一直幫我執下個圖, 我途中真係對住個excel發呆, 因我哋公司係用excel黎做各項設計, 我都摸左好耐先知可以控制到d線條, 而且覺得好似illustrater, 不過excel就比佢麻煩好多, 但原理相同. 最後係辛苦努力之下完成我畫既第一條收腹褲~

用既顏色唔太好, 本來用肉色, 但我又唔鍾意....加上個設計都係麻麻, 我同事candy仲話好核突><

比個同事話完之後, 我的起心肝, 再跟阿珍學習設計內衣套裝, 所謂既內衣套裝係一個bra及一條underwear, 兩者都比收腹褲難畫好多, 我單單畫個bra都用左成大半個鐘, 難畫既係bra既杯形狀, 最花心機都係果部分, 如果個杯型唔似就根本唔係bra, 冇左個承託作用. 仲有條短褲都係難畫, 好在有阿珍一早畫好既圖, 我只係改少少就ok~最後都可以完成, 感動><

阿珍都讚我個bra畫得似, 而且佢及candy都話我個bra都畫得幾靚~終於有人讚我啦, 好開心~

唔知點解我一諗起用黑色喱士, 可能係我真係太愛有喱士既內衣, 好想加好多喱士落去. 至於粉紅色係因我覺得佢同黑色襯之外, 因我覺得粉紅既內衣其實好靚^^而家只好等老闆娘睇下, 唔知可唔可以過到關呢?

唔理其他人點睇我既作品, 我係設計內衣既過程之中覺得好開心, 除左要識用excel畫圖之外, 仲要有設計既靈感, 點樣搵呢? 就係睇唔同巴既雜誌, 換句說話黎講係可以光明正大睇雜誌, 而且仲可以睇埋時裝, 因日本時裝雜誌之中, 內衣及時裝係不可分割, 可以做到自己鍾意既野的確係開心^^而且也諗唔到, 原來excel係可以畫畫, 簡直係難以置信...

媽媽生日快樂~

一到左呢日, 就會有雙層意義, 第一係tvb台慶, 不過呢個同我冇咩直接關係, 因呢日也係我媽生日. 可惜既係, 我今日仲要返學, 唔可以同佢一齊慶祝, 唔可以一齊切蛋糕, 同埋影相...好在我爸有影到相, 我先可以放學返去睇睇~

媽媽同姪仔係個生日蛋糕面前合照先~

阿媽個生日蛋糕~係芒果, 唔係, 應該係什果蛋糕^^

一齊切蛋糕囉~我估我係現場見到一定會好開心^^

返到屋企之後, 當然比面阿媽, 食埋佢地留返比我既件半蛋糕, 我都唔知點解係件半架! 總之點都會食埋佢啦~仲有一句: 媽媽, 生日快樂^^

拍片功課

黎緊份video功課係應用所有既拍攝技巧去拍攝一段片, 大家似乎都有哂idea, 連劇本都有埋, 真係要拍攝一段鬼片, 因人手不足, 只有兩名主角, 分別係女鬼及一個同女鬼通訊既女生, 最後一致通過, 應該話係tracy寫劇本時一早已經定左, 由tracy演女鬼, 我就做個女生. 當中有兩個配角, 分別係殺女鬼既男友及鬼看更, 蕃薯竟然自願做女鬼男友時, 我突然內心一酸, 雖然話我同佢都有對手戲, 因我會比女鬼上身, 但始終都係覺得唔開心.....至於鬼看更, 都係由阿銘做好了, 其實我對呢個角色都幾有興趣, 多過想做個女生.

至於故事係咩, 都係等星期六我哋拍攝時, 之後會有幕後花絮及拍攝過程post上黎呢度^^希望拍片時唔好有咩意外就好, 因會係tuen mun拍, 聽蕃薯講果度有好多鬼故, 而且我哋係鬼故, 仲要係夜晚, 似乎真係玩得大左d啊=.="

阿sir要我哋影底拍攝既地方, 蕃薯都已影左相, 睇起黎真係有d恐怖呢....

雖然馬路上有車, 但都已經好恐怖><

夜晚既遊樂場, 連我都唔知人同我哋段片有冇關係, 都係睇下我哋導演tracy及蕃薯決定吧!

蕃薯講過最恐怖既輕鐵站旁, 睇黎真係幾恐怖呢...

其實只係睇個場景已經好擔心, 我哋拍鬼片真係唔怕嗎? 都係之前所講, 希望冇事啦! 都係唔好諗咁多, 第時先算! 返到屋企之後, 爸媽煮左琴日阿爸同朋友係深圳釣返黎既龍等魚, 佢哋炆得好好味啊, 而且又我至愛既冬菇及豆卜, 勁正!! 哈哈, 睇黎我唔肥都唔得=.="

真係炆得好好味, 原本打算唔食晚飯既我都忍唔住食哂呢盤~

四朵金花又一齊食飯~

今晚我阿爸去左深圳釣魚,我細佬有兩日放假,媽又去左同佢及姪仔行街,比佢地父子團聚一下都係好既.所以今晚冇人煮飯,放學之後,我出左去同文迪,berry及雲妮去食飯,我哋四個好耐冇一齊去食飯呢~至於點解叫四朵金花呢?我真係唔知道@@

係葵涌廣場傾左一陣後,我哋最後決定去一間好耐都冇去過既上海菜館食飯,果間印象之中曾經和同學去過食一至兩次,有一次我記得我拿住creativity整個塊storyboard及份我哋果組份瘦身棋去食,睇黎真係好耐冇去過呢....我哋一坐底就叫野食,最後都係四個人叫左四碟野share一齊食,可能係太夜食飯,我哋叫既野食唔太多~

上海粗炒~睇黎雲妮好想食呢個, 於是我哋即刻就叫, 碟野好多油啊!!不過味道ok^^

豆沙窩餅~呢個係我繼紅油抄手之後第二至愛, 都ok好味既~

文迪叫既什姑炒年榚, 本來個送幾清淡, 可惜太多油呢....如果少d油就好^^

仲有叫左個小龍包, 唔知係咪太好食, 所以掛住食, 唔記得左影相=.="不過算啦, 小龍包都係咁既樣,唔使影吧, 但真係幾好食,而且食果陣有d汁流出, 超正~有機會既話下次記得影相先~

好耐冇飲茶, 多左心事

先同我細佬講句生日快樂先^^

我哋一家五口加姑姐及我姪仔一齊去長沙灣飲茶. 唔知係咪太耐都冇去飲茶, 一去到茶樓我特別開心, 雖然等左好耐先至有位, 但都係值得既^^

等位時無聊影既結婚蛋糕一個~我都好想有機會親自切個蛋糕, 但唔知我隔離個新郎係邊個呢?

我細佬遲左少少黎到, 佢未黎到時我哋已經叫左野食! 叫下叫下野食, 不知不覺叫多左, 食完一碟又黎第二碟, 睇黎我哋屋企毎個人既食量相當驚人呢....六個人只係叫左十八碟點心,都咪話唔誇張!!

皮蛋瘦肉粥, 咸魚肉片飯及鳳爪排骨飯~尤其係個肉片飯, 簡直係我至愛^^

馬拉千層榚, 都係我個肉片飯(因我食得太多, 所以變左係我既=.=")及糯米卷. 果個千層榚真係最正, 又軟, 而且味道仲岩岩好~

仲有好多好多野食....個灌湯餃我未食過既? 牛肉都幾好味啦, 至緊要唔好有果皮><

野食真係太多, 掛住食野都唔記得左影相, 自己又真係失敗左d既....之後我突然有個idea, 就係我細佬同姪仔影返張合照先~好在佢地兩個都幾合作, 順利影到相~
終於影到我細佬!! 平時真係好少見到佢. 仲要係兩父子一齊合照, 更加難得呢!!

飲完茶後, 我同全家去入定貨先. 其實係咁既, 我哋全家都會係星期日買定一個星期既送, 因我哋買送果度唔方便, 同埋有勁大個雪櫃, 可以擺哂d送入去. 順便再去麥當當度買d野食, 之後就返屋企.

返到屋企後, 我終於見到蕃薯上網, 於是我同佢傾計, 但佢竟然off左, 之後晚上又見到佢, 再次hi佢, 點知佢又off左, 我好唔開心, 於是打電話比佢, 點知佢飛左去留言. 後來我send sms比佢, 佢話自己忙緊, 話遲d打電話比我, 但直到十一點幾都冇打比我, 唔知佢係咪嬲左我, 其實都冇咩好嬲, 只係我係msn句msg度打我即將會走, 去讀時裝設計, 不過我去讀其他野, 都唔關佢事啦, 佢做咩嬲我呢?又或者有野隱瞞我呢? 不過係咩原因都好, 根本都唔關我事, 我根本唔係佢女友, 極其量只係好友, 跟本冇必要同我交待一切, 佢同邊個一齊已經唔關我事, 而且我也決定左讀時裝設計, 一定會讀讀下唔讀, 佢唔理我都好既, 起碼我離開時唔會太難過...

冇人同我傾計, 我惟有自己學下畫時裝設計草圖^^起初畫人物比例及對稱時, 真係幾難, 咩野13:8:5 黃金比例已經夠難, 個黃金比例即係人上半身及下半身共13cm, 上身佔5cm, 下身佔8cm. 仲有左右要對稱, 我單畫左個身連頭都要半個鐘>< 勉強叫畫好左個人先~

最初也係第一次畫既人物, 真係差到死><畫好哂比例之後, 加返d衫比佢先~起碼唔會太核突=.=" 都叫初稿完成啦, 其實仲有好多野未做, 如上色, 油光暗...但畫少少已經好辛苦呢@@

本來想一直畫, 但突然有個好耐冇見及傾計, 甚至我係fb上已經delete左既Aki突然hi我, 可能大家都唔知道或唔記得aki係邊個, 就係做室內設計既男仔, 之前同佢食左一次飯及睇戲既男仔, 後來見面之後成幾個月冇搵我, 所以佢搵我時我都有d驚嚇. 佢見到我想做設計, 特登同我傾計, 我哋既話題都係環繞住設計, 也多得佢同我傾計先冇咁悶. 佢今日係公司度工作, 跟兩個展覽攤位既設計, 直到十點幾先至係公司離開, 有人同我傾左成三至四個鐘已經好好啦, 多謝你!

其實我自己係一個怕寂寞既人, 一直好想有個男仔係我身邊支持及陪我, 好想同我鍾意既男仔就算唔見面, 也要保持聯絡. 所以就算我真心鍾意蕃薯, 但佢成日冷落我, 真係令我受不了, 不過佢都唔係我男友, 但又有親密接觸, 我真係覺得好難受, 與其係痛苦, 不如我真正搵返個男友, 就可以同佢斷絕瞹眛不清既關係, 真正同佢完結, 但幾時先可以比我搵到真命天子? 我嘗試同唔同既男仔傾計, 普通食飯, 都搵唔到愛情呢種感覺, 自己工作又唔知方向, 愛情上又搵唔到自己mr. right, 究竟自己係度做咩野, 不過呢一刻有兩樣野可以sure, 就係脫離同蕃薯呢段畸型關係, 同埋向住時裝設計進發吧?

無聊的一天

終於完成左隻飛船~如果我真係有隻飛船就好啦!講既係只係上堂教用maya畫既飛船,真係唔好睇少隻飛船,足足教左三堂,由架機本身框架,外型及質地,都要遂一去完成,真係返少一日學都死.今日只要幫隻飛船貼上質地就完成,我唔知點解對呢部分好有興趣,全程都有聽到阿sir講書,而且都幾明白,最後完成好啦~

睇落去好複雜的軟件呢~其實真係好複雜, 估唔到我都可以完成到, 嘻嘻~

放學之後大家同學一係就睇相機, 一係返屋企, 一係約左人, 我自己也覺得冇趣,於是返左屋企. 係屋企之前都影左張相. 返到屋企同屋企人睇TVB劇集的頒獎典禮, 平平淡淡的過了一天...

自己係屋企lift口度影, 自己果然係無聊=.="