媽媽生日快樂~

一到左呢日, 就會有雙層意義, 第一係tvb台慶, 不過呢個同我冇咩直接關係, 因呢日也係我媽生日. 可惜既係, 我今日仲要返學, 唔可以同佢一齊慶祝, 唔可以一齊切蛋糕, 同埋影相...好在我爸有影到相, 我先可以放學返去睇睇~

媽媽同姪仔係個生日蛋糕面前合照先~

阿媽個生日蛋糕~係芒果, 唔係, 應該係什果蛋糕^^

一齊切蛋糕囉~我估我係現場見到一定會好開心^^

返到屋企之後, 當然比面阿媽, 食埋佢地留返比我既件半蛋糕, 我都唔知點解係件半架! 總之點都會食埋佢啦~仲有一句: 媽媽, 生日快樂^^

拍片功課

黎緊份video功課係應用所有既拍攝技巧去拍攝一段片, 大家似乎都有哂idea, 連劇本都有埋, 真係要拍攝一段鬼片, 因人手不足, 只有兩名主角, 分別係女鬼及一個同女鬼通訊既女生, 最後一致通過, 應該話係tracy寫劇本時一早已經定左, 由tracy演女鬼, 我就做個女生. 當中有兩個配角, 分別係殺女鬼既男友及鬼看更, 蕃薯竟然自願做女鬼男友時, 我突然內心一酸, 雖然話我同佢都有對手戲, 因我會比女鬼上身, 但始終都係覺得唔開心.....至於鬼看更, 都係由阿銘做好了, 其實我對呢個角色都幾有興趣, 多過想做個女生.

至於故事係咩, 都係等星期六我哋拍攝時, 之後會有幕後花絮及拍攝過程post上黎呢度^^希望拍片時唔好有咩意外就好, 因會係tuen mun拍, 聽蕃薯講果度有好多鬼故, 而且我哋係鬼故, 仲要係夜晚, 似乎真係玩得大左d啊=.="

阿sir要我哋影底拍攝既地方, 蕃薯都已影左相, 睇起黎真係有d恐怖呢....

雖然馬路上有車, 但都已經好恐怖><

夜晚既遊樂場, 連我都唔知人同我哋段片有冇關係, 都係睇下我哋導演tracy及蕃薯決定吧!

蕃薯講過最恐怖既輕鐵站旁, 睇黎真係幾恐怖呢...

其實只係睇個場景已經好擔心, 我哋拍鬼片真係唔怕嗎? 都係之前所講, 希望冇事啦! 都係唔好諗咁多, 第時先算! 返到屋企之後, 爸媽煮左琴日阿爸同朋友係深圳釣返黎既龍等魚, 佢哋炆得好好味啊, 而且又我至愛既冬菇及豆卜, 勁正!! 哈哈, 睇黎我唔肥都唔得=.="

真係炆得好好味, 原本打算唔食晚飯既我都忍唔住食哂呢盤~

四朵金花又一齊食飯~

今晚我阿爸去左深圳釣魚,我細佬有兩日放假,媽又去左同佢及姪仔行街,比佢地父子團聚一下都係好既.所以今晚冇人煮飯,放學之後,我出左去同文迪,berry及雲妮去食飯,我哋四個好耐冇一齊去食飯呢~至於點解叫四朵金花呢?我真係唔知道@@

係葵涌廣場傾左一陣後,我哋最後決定去一間好耐都冇去過既上海菜館食飯,果間印象之中曾經和同學去過食一至兩次,有一次我記得我拿住creativity整個塊storyboard及份我哋果組份瘦身棋去食,睇黎真係好耐冇去過呢....我哋一坐底就叫野食,最後都係四個人叫左四碟野share一齊食,可能係太夜食飯,我哋叫既野食唔太多~

上海粗炒~睇黎雲妮好想食呢個, 於是我哋即刻就叫, 碟野好多油啊!!不過味道ok^^

豆沙窩餅~呢個係我繼紅油抄手之後第二至愛, 都ok好味既~

文迪叫既什姑炒年榚, 本來個送幾清淡, 可惜太多油呢....如果少d油就好^^

仲有叫左個小龍包, 唔知係咪太好食, 所以掛住食, 唔記得左影相=.="不過算啦, 小龍包都係咁既樣,唔使影吧, 但真係幾好食,而且食果陣有d汁流出, 超正~有機會既話下次記得影相先~

好耐冇飲茶, 多左心事

先同我細佬講句生日快樂先^^

我哋一家五口加姑姐及我姪仔一齊去長沙灣飲茶. 唔知係咪太耐都冇去飲茶, 一去到茶樓我特別開心, 雖然等左好耐先至有位, 但都係值得既^^

等位時無聊影既結婚蛋糕一個~我都好想有機會親自切個蛋糕, 但唔知我隔離個新郎係邊個呢?

我細佬遲左少少黎到, 佢未黎到時我哋已經叫左野食! 叫下叫下野食, 不知不覺叫多左, 食完一碟又黎第二碟, 睇黎我哋屋企毎個人既食量相當驚人呢....六個人只係叫左十八碟點心,都咪話唔誇張!!

皮蛋瘦肉粥, 咸魚肉片飯及鳳爪排骨飯~尤其係個肉片飯, 簡直係我至愛^^

馬拉千層榚, 都係我個肉片飯(因我食得太多, 所以變左係我既=.=")及糯米卷. 果個千層榚真係最正, 又軟, 而且味道仲岩岩好~

仲有好多好多野食....個灌湯餃我未食過既? 牛肉都幾好味啦, 至緊要唔好有果皮><

野食真係太多, 掛住食野都唔記得左影相, 自己又真係失敗左d既....之後我突然有個idea, 就係我細佬同姪仔影返張合照先~好在佢地兩個都幾合作, 順利影到相~
終於影到我細佬!! 平時真係好少見到佢. 仲要係兩父子一齊合照, 更加難得呢!!

飲完茶後, 我同全家去入定貨先. 其實係咁既, 我哋全家都會係星期日買定一個星期既送, 因我哋買送果度唔方便, 同埋有勁大個雪櫃, 可以擺哂d送入去. 順便再去麥當當度買d野食, 之後就返屋企.

返到屋企後, 我終於見到蕃薯上網, 於是我同佢傾計, 但佢竟然off左, 之後晚上又見到佢, 再次hi佢, 點知佢又off左, 我好唔開心, 於是打電話比佢, 點知佢飛左去留言. 後來我send sms比佢, 佢話自己忙緊, 話遲d打電話比我, 但直到十一點幾都冇打比我, 唔知佢係咪嬲左我, 其實都冇咩好嬲, 只係我係msn句msg度打我即將會走, 去讀時裝設計, 不過我去讀其他野, 都唔關佢事啦, 佢做咩嬲我呢?又或者有野隱瞞我呢? 不過係咩原因都好, 根本都唔關我事, 我根本唔係佢女友, 極其量只係好友, 跟本冇必要同我交待一切, 佢同邊個一齊已經唔關我事, 而且我也決定左讀時裝設計, 一定會讀讀下唔讀, 佢唔理我都好既, 起碼我離開時唔會太難過...

冇人同我傾計, 我惟有自己學下畫時裝設計草圖^^起初畫人物比例及對稱時, 真係幾難, 咩野13:8:5 黃金比例已經夠難, 個黃金比例即係人上半身及下半身共13cm, 上身佔5cm, 下身佔8cm. 仲有左右要對稱, 我單畫左個身連頭都要半個鐘>< 勉強叫畫好左個人先~

最初也係第一次畫既人物, 真係差到死><畫好哂比例之後, 加返d衫比佢先~起碼唔會太核突=.=" 都叫初稿完成啦, 其實仲有好多野未做, 如上色, 油光暗...但畫少少已經好辛苦呢@@

本來想一直畫, 但突然有個好耐冇見及傾計, 甚至我係fb上已經delete左既Aki突然hi我, 可能大家都唔知道或唔記得aki係邊個, 就係做室內設計既男仔, 之前同佢食左一次飯及睇戲既男仔, 後來見面之後成幾個月冇搵我, 所以佢搵我時我都有d驚嚇. 佢見到我想做設計, 特登同我傾計, 我哋既話題都係環繞住設計, 也多得佢同我傾計先冇咁悶. 佢今日係公司度工作, 跟兩個展覽攤位既設計, 直到十點幾先至係公司離開, 有人同我傾左成三至四個鐘已經好好啦, 多謝你!

其實我自己係一個怕寂寞既人, 一直好想有個男仔係我身邊支持及陪我, 好想同我鍾意既男仔就算唔見面, 也要保持聯絡. 所以就算我真心鍾意蕃薯, 但佢成日冷落我, 真係令我受不了, 不過佢都唔係我男友, 但又有親密接觸, 我真係覺得好難受, 與其係痛苦, 不如我真正搵返個男友, 就可以同佢斷絕瞹眛不清既關係, 真正同佢完結, 但幾時先可以比我搵到真命天子? 我嘗試同唔同既男仔傾計, 普通食飯, 都搵唔到愛情呢種感覺, 自己工作又唔知方向, 愛情上又搵唔到自己mr. right, 究竟自己係度做咩野, 不過呢一刻有兩樣野可以sure, 就係脫離同蕃薯呢段畸型關係, 同埋向住時裝設計進發吧?

無聊的一天

終於完成左隻飛船~如果我真係有隻飛船就好啦!講既係只係上堂教用maya畫既飛船,真係唔好睇少隻飛船,足足教左三堂,由架機本身框架,外型及質地,都要遂一去完成,真係返少一日學都死.今日只要幫隻飛船貼上質地就完成,我唔知點解對呢部分好有興趣,全程都有聽到阿sir講書,而且都幾明白,最後完成好啦~

睇落去好複雜的軟件呢~其實真係好複雜, 估唔到我都可以完成到, 嘻嘻~

放學之後大家同學一係就睇相機, 一係返屋企, 一係約左人, 我自己也覺得冇趣,於是返左屋企. 係屋企之前都影左張相. 返到屋企同屋企人睇TVB劇集的頒獎典禮, 平平淡淡的過了一天...

自己係屋企lift口度影, 自己果然係無聊=.="

有點遺憾...

呢幾日有同菜菜係fb度傾計,見到佢用左婚紗相做封面（一早已經有啦,我正一傻人=.=)張相果然係影得你好靚呢~件婚紗同你好襯,個頭飾又唔太誇^^

我因為公司個老闆娘及同事係菜菜婚禮前一日吵大架,詳細情況我唔係可以係fb內講,因老闆娘及二位同事都係fb度add左我,所以我唔方便打出黎,佢地會睇下我個fb,唔可以比佢地知道><整到我唔好意思話請假,我冇得去我好友既婚禮,對我及佢黎講係個遺憾.但只要你結婚之後同老公仔過住幸福既生活,和朋友開開心心,我已經好開心.同埋新婚生活習慣嗎?我而家打blog先記得問呢句,自己真係白痴嗎?

當你同我講左句[你同我咁好朋友你都冇去, 真係有d遺憾, 不過唔緊要, 我一定會去返你果個補數, 不過我冇得做伴娘lu....],再次講聲對唔住.我果餐都唔知有冇啦,太多未知數啦,連真命天子係邊個都仲未知,搵到自己真命天子先算啦!而家我都係專心事業先啦,近排公司勁多野做,基本會計做都做到死,全部用excel黎行,d表要左夾右夾,老闆娘仲叫我搵個電腦軟件,真係死得!仲有佢又教我用excel設計收腹褲及bra套裝,以及要顧返個軟件內的所有數字資料,真係多野到我都唔想做, 好想快d搵過第二份工,起碼有個軟件用下吧! 我係你個fb度拿左兩張你結婚既相,希望你唔好介意吧!冇得去拿黎留念下都好^^

終於見到文迪伴娘個樣,都幾靚女牙! 菜菜你著婚紗都好靚, 兩個靚女都係度,唔使我去啦, 哈哈~

睇黎都幾多人去你個婚禮~呢日開心嗎?

都係冇得溫英文><

死啦,星期日溫過d野又唔記得哂,自己都係唔可以早d溫書果類人,溫左等如冇溫.琴晚同阿毆慶祝生日又冇溫過,今日就測驗,都唔知點算?

想lunch時間係公司溫書,但公司既'優良'傳統仲係度,即係食完飯要即刻做野,我又冇得溫書...放學時想係學校溫陣書,但自己個肚又唔爭氣,一直係度打鼓,只好搵野食食住先,係葵涌廣場見到間賣羅白榚十元三件咁抵,於是自己身痕想去食,本來話只係等五分鐘,點知等左十分鐘先食到,之後拿拿聲去小巴站,點知又勁多人,等左好耐先有車><

係車上爭取時間溫書,本來邊溫邊聽住歌返到學校,點知竟然比我撞見蕃薯,同佢一齊返學,真係唔知幾耐之前試過呢,結果我都係溫唔到書.返到學校上左陣堂就開始測驗,好在係測驗前有十分鐘溫書,只好用呢段時間盡量溫吧!好在份卷都算識做既,係果十分鐘內背既所有句子都可以寫得返落去,可能係以前讀中學時背慣書吧?可以係短時間內背哂所有野~個結果都算ok,我估唔會唔合格掛><

蕃薯測完之後都好似幾開心,佢除左知內容寫咩外,仲多謝我整份notes比佢溫,令佢知道書信內容,段落安排及格式,唔係佢一定會零分,點會咁誇張,都要你自己願意努力先得架!如你自己本身冇心去溫,有幾多份筆記比佢都冇用.仲有希望我份notes可以幫到毎個同學,可以取得比較好既分數啦!

考完之後鬆左一口氣,之後蕃薯,阿聯及我去葵芳地鐵站等人,原來蕃薯想買支鏡,有人以八百元讓左比佢,佢地去試支鏡,我都唔知係果度做咩架,但只要見到蕃薯開心,我就開心.加上我之前食左一串魚蛋及牛肉,睇黎我真係好肚餓呢><