終於有新電腦枱~

本來我應承左父母同姑姐一早八點幾起身, 去我姑姐公司拿電腦及mon, 因我姑姐公司樓下只可係朝早九點前落貨, 所以要咁早起身. 我因唔習慣12點幾訓, 5點幾醒左, 到接近七點先訓返, 所以可以括免左呢次唔去, 好野!! 而且返黎仲有一張屬於我的電腦枱!

爸一返到屋企即刻幫我磡張電腦枱, 最後終於整好啦~

全張枱的全貌~係我至愛的木色^^

而且size仲岩岩好, 度門可以開到~真係張枱再wide多點都擺唔落^^

但個箱太大個, 唔可以完全擺入電腦枱內, 整到好似好核突=.="

準備d咩去裝飾你好呢? 仲有我全間房都係, 因我好想整到好日本女仔feel, 配在考慮中. 但電腦枱位置已經決定好, 上面狹窄的位置擺相機, psp及nds; 最上面擺printer啦^^

family day~

哈哈~講真都好似好耐冇試過啦, 因大家都各有各忙, 唔係忙工作, 就係學業, 好少大家聚埋一齊. 以前的我唔太重視家庭日, 有少少覺得係例行公事吧, 但自從同蕃薯分手, 以及倚安離開之後, 令我明白到人生無常, 應該珍惜身邊所有的人, 所以今日大家可以一齊坐底飲下午茶, 真係好開心^^

由於我要打扮,錯過左一班村巴, 下班村巴又相隔數十分鐘, 所以遲左成半個鐘去酒樓, 真係對唔住呢! 到左酒樓, 搵姑姐提及的313號枱, 我搵左好耐先至搵到呢...原來係間房度, 佢地又冇提我...不過唔緊要啦, 姑姐, 爸媽及姪仔已經到左, 而我妹就要加班, 唔知黎唔黎到, 所以我哋先叫食物. 我好耐都冇飲過茶, 加上下午茶大中小點都係特價十五元, 我哋叫哂所有大點, 蝦餃, 燒賣, 溫室豆苗餃, 蝦腸....好多好野食, 真係食極都唔完, 睇黎我體重又增多點點吧....食到真係唔停得口><

之後我妹打電話比爸, 話佢終於加班完, 正在坐地鐵搵我哋, 我哋幫佢叫左點心, 知佢一定肚餓, 佢一黎到就可以食, 最後佢一個人可以食哂四樣點心, 利害! 途中講左好多工作上的事, 如妹係工作上有個人成日留佢係公司度, 但又冇野比佢做, 令佢遲放工; 姑姐果邊個同事出job時, 做野又一塌糊塗, 連個邊我之前同佢合作開的同事也投訴個新同事....哈哈~工作果然係辛苦呢, 可能的心態已經改變左, 我工作過程之中搵到少少興趣, 又得到老闆娘信任, 和同事工作又開心, 原來我果然係幸福, 只係我以前冇用心去感受, 我一定會好好珍惜份工及同事^^

食完下午茶後, 姑姐, 我姑及我到附近商場行行, 我姑姐買野比我哋兩個, 我只係要一件三十元的tee, 我妹收獲最多啦, 鞋及衫都好, 鼓勵佢比心機做野~我哋都行得開心, 之後連同係公司做完野的父母一齊坐地鐵返屋企~~我買的tee, 真係好底, 但入面要穿背心, 唔係會見到個胸><

原來同屋企人一齊渡過係咁開心架~之後一定會有多D呢類的家庭日, 開心^^

開心及精彩的一日

(1) 倚安farewell

今日發生左好多事, 不過全部都係開心及充實, 總共有兩件開心事及一件特別的事^^先講開心的事~

本來倚安今日要走, 大家都係唔開心, 但又唔想哭哭啼啼咁送別, 所以我地決定開心d比佢返台灣. 一早老闆娘叫我入房, 原來問我一陣倚安果餐送行飯去邊度食, 我都覺得好奇怪, 點解會問我呢? 之後我話都係由倚安自己決定吧! 最後老闆娘叫我用佢個名卜枱, 最後決定去飲茶~

一去到酒樓, 實在太多人食飯啦, 好不容易先有個位坐下, 老闆娘叫我地隨意叫點心食, 睇黎我哋真係好肚餓呢, 叫到成枱都係, 結果當然食唔哂, 阿珍及mooji都要猜玫決定邊個食邊件...

最初叫的燒乳豬~而且經部長介紹, 佢話肉要有少肥膏, 皮簿及脆先叫好味^^

全枱都係點心, 好飽啊~

食完飯之後, 老闆娘要去睇中醫, 我哋先返公司. 後來有同事主張夾錢食頭先果餐, 盛惠一百三十元, 貴就貴d, 不過唔緊要啦, 最緊要大家開心. 返到公司後, 我哋作哂反, 係公司影團體照, 當係留下一個開心回憶吧!

比較正經的團體照, 先介紹下d同事, 由下面左數起: mooji, 另一個黑衫短紅髮就係倚安~上面左數起, candy, 阿珍及我^^

大家都好開心, 笑得好燦爛^^

係我個位隔離塊[金玉滿堂]牌度影相~

我哋公司個名底下影返張相先~

之後我地開始影埋d古靈精怪相, 大家睇完之後都笑左出黎, 尤其係平時冇咩點笑的我, 我都忍唔住大笑起黎, 好耐都冇見過自己笑到四萬咁既口~行匯(我地公司)靈異照~本來阿珍認真影相, 突然後面出現女鬼mooji!?

扮可愛的mooji, 其實又真係幾可愛既~整兩條邊幾可愛^^我就唔夠膽咁整啦, 費時嚇親人=_="

強烈對比~我的怕熱穿短袖, 阿珍怕凍穿羽擁, 成為強烈對比

全場高潮所在啦~我哋全體人穿公司內衣!!! 我覺得自己果個bra幾靚架! 只有阿珍穿內褲...

正當我地影得好開心時, 老闆娘突然返到公司, 我哋拿住內衣呆左望住老闆娘, 之後有個同事話幫公司宣傳麻, 老闆娘話係都出面唔穿衫去試套bra啦, 之後同事講笑叫我試!? 咪玩啦, 我的身材有[幾好], 你地都知道啦! 我哋今日開開心心傾計, 玩左成日, 最後倚安推住個細唸離開

再見啦~倚安, 一路順風啦~~

(2) 剪頭髮

大家有睇開我個blog, 都知我呢個星期二先電左髮, 但電得唔好睇之餘, 也把頭髮電到傷哂, 老闆娘見到我個頭咁傷, 佢提議我剪個短髮, 如果唔剪髮就唔會生返d新的頭髮. 最後只好迫於無奈去髮型屋剪髮吧!

去到髮型屋, 本來想剪one length加bob, 點知我的頭髮太散, 唔可以整bob, 個髮型師又唔想我太失望(自己覺得), 只好盡量幫我剪個類似bob頭, one length都剪到, 好好彩~但剪完出黎, 可能係我唔可以接受自己短髮, 所以覺得好核突, 都係唔影相比大家睇住, 再遲少少先影返比你地睇

大家唔知有冇聽講過, 剪髮, 尤其係剪短髮, 係失戀的象徵, 代表斷絕對一個人的思念, 有重新開始的意思....而我終於明白呢個道理, 我都有種輕鬆的感覺, 我以為一切完結, 點知上天總喜歡戲弄我....

(3)再見蕃薯

正當我剪完頭髮想返屋企時, 竟然冇左其中一班村巴, 我惟有到商場附近行下, 點知突然收到蕃薯個sms, 佢話自己同阿媽去旺角食飯, 仲問我黎唔黎!!? 吓!? 個天係咪特登玩我架??我要重頭黎過,即係打機之中的[new game], 點知無端端要我[continue]!? 我見咁耐冇見, 起初我都驚佢地等, 叫佢地自己去食, 但蕃薯又冇答我, 之後我應承佢, 佢即刻覆我, 即係要我去嗎? 最後我都出左去搵佢地食飯..途中蕃薯問我係邊, 又叫我到左打比佢, 佢做咩催住哂架, 真係....

去到旺角, 我同蕃薯及蕃薯媽三人一齊去睇相機, 因蕃薯又想買相機, 其實佢知我唔認識相機, 加上 佢同佢媽去食飯, 其實真係同我無關, 點解會叫埋我去呢? 我哋行左差唔多一個鐘先有得食野牙...最後去左沙爹王食飯, 本來我叫上次果個芝士茄汁焗餃子咪好, 做咩無端端叫個沙爹牛肉粉絲呢? 蕃薯媽又叫左個同我一樣, 點知我唔記得左唔可以一個人食哂碗野, 最後佢媽媽話好味, 但係漏, 比左蕃薯食, 對唔住牙, 兩位~下次我會小心毎樣送菜=.=" (不過仲有下次嗎?)

食完人完飯後, 本來蕃薯驚我悶, 及佢自己買左一部相機同一大堆野, 所以想同我一齊坐小巴, 但佢媽媽唔知係咪覺得車費太貴, 叫蕃薯同佢坐巴士, 我於是叫蕃薯同佢媽媽, 不用陪我啦, 佢叫我小心d, 仲互相說再見時觸到我隻手, 嚇死我啦...個心都有點緊張, 緊張個咩鬼牙?

返到屋企, 媽媽及姪仔係我間房度等我返屋企及姪仔要食奶, 姪仔食完奶, 同我玩左一陣後, 我地各自訓覺囉~

吓!? 倚安要走嗎?

今日係公司無端端聽到老闆娘問我地, 今晚去唔去食buffet?做咩無端端食得咁正呢? 原來我地個台灣女同事倚安做咩聽日就要走, 真係好突然呀, 我哋公司少左把笑聲啦, 鳴鳴...

佢地講笑話會去disco, 仲會有e仔, k仔....任我選擇, 我講笑話咁多謝, 點知mooji叫我自己出返錢啦! 哼!唔係你幫我出埋錢咩? 真係牙!!唔知點解, 最後改左聽日食lunch, 好好彩, 因我今日冇帶到相機, 因我一定會影埋d無聊野, 如野食, 餐廳, 又或者係毎個人的騎呢動作....因我冇相機用的話, 要用公司果部影, 第時就咩都比人見到哂啦=_="呢d野唔好亂比其他人知麻, 朋友及屋企人就冇所謂, 但外人見到唔知點諗, 費時又比人亂估....

倚安返埋聽日就要走, 雖然平時我好少同佢傾計, 知佢好鍾意引人笑, 而且又好好人, 成日外出工作會買埋野比我地食, 起初佢話冇所謂, 冇問我地拿返錢, 而且仲不斷地請, 我哋覺得唔好意思, 先至比返錢佢, 佢先至收下來. 係我心目中, 佢係一個好陽光, 外表似男仔的女仔, 而且佢好好人, 好開朗及樂觀, 即使佢工作上成日做錯野比老闆娘鬧, 佢總係笑哈哈~我好羨慕佢咁開朗樂觀, 總係令人開心, 係毎個人的開心果, 如果換轉係我比人鬧, 我一定會駁咀, 真唔要得!

仲有佢唔咸唔淡的廣東話好好笑, 第一句識講的係[麻鬼煩], 因為個日本客成日改訂單, 要佢做好多野. 之後都講得幾多下, 因d架佬真係好煩, 成日改野!

我先影左佢張枱先~聽日果篇blog就可以見到佢真人^^

學懂放棄, 才是開心

我要恭喜自己先!! 我終於可以丟下呢八個月黎對蕃薯的愛, 原來要忘記一個人係咁困難, 雖然而家都仲有點唔捨得, 但也冇辦法, 人哋都唔鍾意你, 又有咩辦法? 唔通迫人鍾意自己咩! 原來自己放開左佢, 自己覺得開心及成個人輕鬆左, 好似擺底左一舊背負左好耐的包伏咁輕鬆. 係公司度同人講笑, 咩煩惱都冇^^不過我同佢都有開心的回憶, 即使我下年離開, 我也唔會忘記~

而家睇返之前, 其實都覺得自己幾蠢下, 我為左佢克服最困難的電腦, 冇條件關心佢, 佢唔開心時我一直安慰及陪伴佢, 仲為佢第一次整蛋糕, 但換黎的係同五個月前的答案一樣, 都係[唔係唔鍾意, 而係而家好多野都未夾住, 同埋而家未想有女友住], 咁我到底係咩? 我一直以黎做咁多野, 一直等, 都係等呢個答案嗎? 唔係, 我想做佢女友, 希望有一日會感動到佢, 但原來只係自己一箱情願....而家我唔會再等佢, 而係等過第二樣, 就係下年離開IVE, 去讀埋hull果個account的學位

雖然咁耐的付出, 到最後結果都係咩都冇, 但我冇後悔, 因佢係第一個比我戀愛感覺的人, 令我明白到戀愛之中的開心幸福, 掛住一個人的感覺, 緊張及關心一個人, 甚至比自己更緊要; 同時也令我知道失戀, 分手, 鍾意佢但又唔可以一齊的果種悲哀的感覺. 無論係好還是差, 都係自己回憶的一部分, 而且也係成長之中的學習. 而家呢講, 剛失戀一定係傷心, 但可能放開左佢, 之後或者會有個更好的男仔愛自己及對自己好, 又或者同個自己或同朋友環遊世界....一切的事冇可能預料, 但珍惜身邊對你好的朋友及親人就可以做到, 好慶幸一直以黎有佢地的支持^^

但唔知點解, 我一想到會同蕃薯分開, 眼淚會不其然留出黎?

比人呃左錢><"

今日無所事事, 加上我的駁髮也甩得七七八八, 只剩下一把長直髮, 可能我比日本文化荼毒勁深, 冇辦法接受長直髮, 覺得咁樣唔靚, 而且仲好娘, 見到街上毎個女仔都係長黑直髮, 我真係接受唔到自己同佢地一樣, 惟一唔同的係我染橙色. 不過呢個只係我自己的睇法, 希望大家靚女唔好嬲~

仲有一個原因我唔鍾意長直髮, 就係因為蕃薯個ex, 雖然我已經放底左蕃薯, 但我始終唔like佢個ex, 可能係妒忌蕃薯以前同佢成日影相, 蕃薯本相簿最多的係佢我相!! 仲有佢可以同蕃薯雖然成日吵架, 但都可以女友的身份一齊左一年, 點解我同佢冇咩吵架, 只係三個月就散, 而且佢結婚又令蕃薯心痛, 係fb上show佢以前比蕃薯影我相, 即係示威嗎? 我係佢fb上拿左佢一張相, 原來佢都係靠化妝之麻, 真人真係好豬排!!!!!!! 哇~我唔敢相信自己對眼, 佢邊日一忽靚牙? 平時都只係靠化妝!!成個阿姑咁=_="見到佢把長直髮, 而且我d髮色又同佢差唔多, 好似佢咁核突就死!

我因想即刻做決定, 我做左個決定, 就係放左工之後即刻去電捲, 由於我又心急想換新髮型, 而且又比較近屋企, 所以我去左是但一間度捲髮. 男仔果然係信唔過, 起初講到自己可以幫人捲到幾捲都得, 但捲完之後, d頭髮根本唔捲既!!? 同未捲之前冇分別, 只係頭殼附近的頭髮比較捲外, 髮尾全部唔捲!!! 佢電完先同我講電過負里子及陶辭而落藥水捲髮時, 頭髮係冇咁直!!!??吓!?我未捲之前已經同你講左做過呢兩樣野, 而家你先同我講冇用? 你擺明呃我錢!! 之前講到自己幾勁幾勁, 電完出黎之後馬後炮!!! 整到我冇左500元之餘, 而且仲要我之後再一次整返靚我個頭!!仲比卡片我叫我下次幫襯佢!!佢真係唔使旨意! 我出左門口冇幾遠就丟左佢張卡片!

雖然如此, 但我竟然唔係太嬲, 也唔係太唔開心! 有咩事比失戀更加慘, 咪當比錢買個教訓, 叫自己千萬唔好衝動行事~

開心可以好簡單^^

雖然呢幾日都因為愛情而唔開心, 但只要自己願意放學, 把目光放遠d, 都可以好開心. 感覺開始做返以前的自己, 毎日都咁開心, 冇煩惱, 從唔會考慮愛情的事, 自己鍾意做咩就做咩^^至於係咩原因, 自己都唔知道, 不過算吧, 最緊要係開心吧!?

和同事一齊傾計好開心, 佢地好好人, 常常都會互相幫忙, 而且仲好鍾意講笑. 台灣人的依安黎左香港工作幾個月, 學埋我哋講[麻鬼煩]...唔咸唔淡的廣東話好得意, 而且佢又好陽光氣息, 金短髮, 佢衣著打扮又似男仔, 如果佢真係男仔黎就幾好呢, 係我喜歡的陽光男孩^^

另外mooji及candy, 感覺似我家姐, 成日提點我的錯處, 而且知我鍾意食野, 一定會比我食, 係佢地身上, 除左學識工作知識外, 仲學到好多做人道理, 感受到人間有情吧! 如果人地唔係真心對自己好, 都唔會提點及話我啦. 雖然candy比較直及serious, 我仲駁左佢幾次咀, 但佢都仲有好多心機教我, 多謝你~

仲有mooji, 佢成日都會講笑話, 我同佢一齊鬥講, 就今日之麻, 講開個同事claim車錢, 佢講笑問我由香港去日本有冇車, 傻既咩? 有本事你坐比我睇, 比埋張單我claim車錢囉~

仲有仲有, 阿珍佢好細食, 成日食唔哂d野就會就會望住我, 之後叫[kumi], 佢會用自己手上的餐具夾比我食, 我就好自然地拿個飯盒比佢, 我自己真係好厚面皮><

最後要講的係羅小姐, 佢明知我懶, 比左好多野我做, 改善我呢個缺點, 最後我都算改到. 而且佢都和其他同事一樣對我好好, 成日會準備食物比我, 又教我野工作及做人道理外, 也教左我扮靚, 保養身體, 呢d野平時我屋企人好少教我, 當佢問我一句[你係屋企長女, 應該唔係咁多人教你呢d(身體保養及扮靚?], 佢好似係補我的不足^^

屋企又有一直支持我的父母, 姑姐, 妹妹, 一個完整及好的屋企; 出外又有文迪, 蔡蔡, liz...一班知心的好友, 可以互相大家傾心事, 分享開心及悲哀, 已經覺得好足夠, 開心及幸福. 只係欠缺愛情, 從未遇過一段開心幸福的愛情, 但都唔緊要, 上天比我的已經好多, 如果自己再去要求的話, 自己豈不是成了一個貪得無厭的人? 世上的事, 有得必有失, 當你獲得一樣東西時, 另一樣東西可能會失去, 點解仲要諗太多, 只要把握自己現有的幸福, 珍惜身邊愛自己的人, 見到佢地也開心快樂, 就已經足夠~

為左獎勵係痛苦的愛情之中走返出黎, 獎包糖比自己食先~係自己鍾意食的奶樽及磨姑糖, 咁都開心一餐!?

希望我之後都可以開開心心, 無憂無慮生活落去^^只要唔比我遇到愛情的話...