真係好耐都冇去過動漫節, 對上一次已經係九年前, 即係動漫節舉辦的第一年, 都仲係讀緊書, 本來係因鍾意漫畫而去, 但因為覺得冇咩睇, cosplay又扮得差, 所以自己之後就冇去過, 可能係唔想哂車錢. 呢次有幾個同學想去, 見呢次有人陪, 起碼都唔會太悶吧, 所以應承左同佢地去. 蕃薯原本都想去, 但佢因手術完後就冇去.
我哋今日六人, 包括我, 波特, 阿銘, 阿聯, 阿駿及galan約好十點半係天橋的麥當當集合, 好在我都早到, 不過要去7仔買飛先及食早餐, 好在galan幫我買左個包, 阿銘又請我食塊薯餅~ 我哋全部人齊後, 開始行去會展. 去到排隊真係好鬼熱, 而且又曬, 好在我又茶防曬, 帶太陽眼鏡及帽, 唔係我一定會曬溶! 終於入到會場啦, 好開心, 即刻走去睇game的攤位先~
Xbox360的攤位. 本來我對呢部機都冇咩興趣, 但佢最近有二隻game我幾like, 第一隻係呢隻tale of 系列的RPG, 第二隻係格鬥game, 兩隻都好想玩, 但我更唔想買Xbox360!!
係Square Enix 出的一隻online RPG, 本來見到d公仔都幾靚, 而且仲見到人玩. 但個名係....fantasy!? 你又出game嗎?
fantasy earth的畫面, 果然係保持住FF特有的風格, 左上角的方位顯示, 及右下角的HP顯示...
之後都走左去睇漫畫, 但已經冇以前咁喜好, 只係順便行下, 起初都唔係太多人. 我第一間去的漫畫係東立, 都唔係太多漫畫想睇, 而且又唔太迫, 就入去睇. 之後開始多人, 我都冇咩心機入去行, 只係到附近漫畫地方行行~
天下都係同往年一樣, 又係勁多人排隊, 自己一見到條人龍就唔想排, 而且我又唔係太好佢出的漫畫. 至於one piece, 真係好耐冇睇過, 只係見波特都有買, 第時可以問佢借黎睇^^
弊啦, 影左都唔知係邊間出版社....咁都唔影東立, 真係失敗左d, 不過更失敗的事接二連三發生. 當我影完以下呢張cosplay之後, 我相機竟然冇電!? 而且又冇後備電!唔係掛! 整到我之後冇得再影相....
影完呢張相後, 我部相機已經冇哂電...我覺得旁邊穿紅色衫果個都ok
之後仲有唔同的cosplay扮演大賽, 各參加者都好落力打扮同表演. 由於冇相機影相, 我係網度拿左d相出黎, 希望大家唔好介意^^
呢位人兄真係....好鬼核突, 仲要唱埋新世紀福音戰士的日文主題曲, 係勁難聽果隻, 認真想死!!
被佢誇張的用具吸引住.....聖魔之血的奧古斯都
最終兵器彼女的千瀨~件衫平平冇奇, 但後面果d weapon....可以背住咁大堆野, 重嗎?
可能係呢個女仔件衫靚吧!? 我覺得呢個反而好d
自己又冇得影相, 其他人又去唔同地方買野, 得自己一個人岸居居係會場行, 又要等佢地班男仔行完. 中途我見到幾間買lonita及cosplay服裝的舖, 自己手痕去左買個lonita頭飾, 而且仲帶住左...
後來先係屋企影返, 仲有隔離支綿花糖, 我就咁拿住支糖及頭帶住呢個lonita周圍行.
我一直行, 只係見到沿途有人望住我, 有d人都讚我靚, 但係真係假就唔知. 不過最記得我去toliet時, 有個細佬女望住我, 話我好可愛...吓!? 可愛!? 跟住佢阿媽都讚我都幾好睇, 我仲開心到話比人知係邊度買. 我太過得意忘形啦=_="後來比同學見到, 佢地講笑話我核突, 阿銘問我做咩唔買埋件nolita衫; galan都笑我, 話我索左好多; 至於波特, 佢話我女佣服唔係我style, 我應該穿d好似studio咁型的衫, 真的嗎? 我都想做型女多d; 至於蕃薯, 佢一見到我, 就拿住波特係會場買的一把刀, 同我講惡靈退散, 咩意思啊!?
開始覺得累了, 便坐係地上休息, 自己仲帶住個咁靚的頭飾....簡直係粗魯啊...之後收到蕃薯的sms, 問我地幾時去佢屋企, 事因阿駿, 阿聯及阿銘要蕃薯教佢地整份功課. 我把呢件事話左比佢地知, 我地去左許留山食完dessert之後再搵佢
今日我買得唔太多野, 除左個頭飾及糖外, 仲有呢幾件野...
士多啤梨髮捲, 捲到全個頭都係士多啤梨><"
買左惟一一本漫畫, 原來阿駿都買左呢本呢~呢個作者都係好睇漫畫信心的保證, 呢本都幾好睇. 仲係我等佢地班男仔時已經全本睇完....
開心的一日已經完結, 開始要忙下星期二要交的report, 真係有點掃興=_="
welcome to my world...
My model life since Nov 09~
My sweet life w/ bf joejoe since Dec 09^^
今日終於唔使擔心佢, 同時又可以見到佢, 好開心!
原本話早d去探佢, 點知又要搵食物買比佢食, 最後食物又買唔到, 而且又遲左去到, 自己真係冇用呢~去到蕃薯屋企, 波特剛同蕃薯洗完傷口, 聽蕃薯講, 洗個傷口時, 個傷口好痛, 而且仲會留血, 比我一定嚇到暈左, 睇黎我都係冇資格去照顧病人吧!?到最後我咩都冇幫到手, 只係坐埋一邊聽佢地講野, 而且只好望住佢, 再一次感到自己冇用...
之後講開個蕃薯做完手術個病假, 只有一日真係太少, 我同波特都覺得冇理由. 波特問蕃薯公司有冇病假, 其實我同蕃薯媽都知佢平時傷風感冒都唔會去睇醫生, 只係到附近藥房執藥食, 而且仲會照返工, 邊度會請病假. 所以佢都唔知公司個病假安排, 希望佢老闆見佢冇咩點請假的份上, 比佢請假休息一下養傷. 但係請病假又點可冇醫生紙呢? 從波特口中得知, 公立醫院只係會開一日假紙比人, 痴線架咩, 做手術只休息一日!!!!唔可以拿連續幾日的假紙, 可以點做呢? 於是波特打比佢朋友問下點延長病假, 原來係...大家都應該估到吧, 咪係比錢私家醫生寫醫生紙囉=_="但為左病情, 呢個係冇辦法的事吧! 蕃薯媽話會同佢聽日會去返做手術果間醫院檢查傷口, 希望你可以請到多幾日病假吧!
我哋終於開始做功課, 由於呢日係極之炎熱, 我穿左一件tube top加外套, 及, 條牛仔短裙, 而且仲坐埋一齊做功課, 唔知佢係咪持住自己係病人, 又摸我及kiss我. 喂! 雖然你的確係病人, 而且我唔會打你, 你不要太過分喔! 但除左佢有時唔正經外, 佢成日話我, 我有時係後面攬住佢, 我哋都幾開心既..
終於到左食飯時間^^因蕃薯剛做完手術, 我地唔可以落街食飯, 所以打電話叫外賣小菜, 蕃薯專係要同我作對, 叫左我至愛的土尤蒸肉餅, 仲叫我自己考慮食咩送, 激死我啦! 我咪自己選擇另一個送. 個間餐廳定左一個套餐, 內有一個49元送, 一個42元送及二個36元送, 蕃薯媽叫左個49元的菜膽雞, 蕃薯叫左我個42元的肉餅, 波特叫左個36元的紅燒豆腐, 而家只係剩下我一個未叫, 36元果d我又選擇唔到, 惟有選擇個42元的翠肉瓜炒豬頸肉. 之前去過果間餐廳食, 都只係補差價, 點知外賣時, 竟然要加十元!? 都只係貴左六元, 應該只係補返呢個價, 點知仲順左!? 我哋四個都考慮緊仲食唔食, 場面相當混亂, 而且仲係我負責叫外賣><"最後都係決定照食, 真係好~激氣!
不過最激氣的係四碗飯竟然裝埋兩盒, 而且裝湯的的碗蓋又爛埋, 整到d湯都有蓋碎!!而且d送的味道及外表好似走哂樣...不過都有一樣好, 就係個豬頸肉都炒得幾好味, 連唔食spicy的蕃薯都照食, 其實我係叫送之前, 蕃薯媽都覺得炒豬頸肉比較好味, 加上之前同蕃薯食飯時, 知佢好鍾意叫豬頸肉, 所以先叫呢樣, 不過佢地唔知我叫呢樣送的目的, 呵呵~
期待聽日同波特, 阿聯, 阿銘, 阿駿及galen一齊去的動漫節, let's go~
大家唔知有冇呢個習慣呢? 我一心情緊張, 唔開心, 總之係負面情緒的話, 我都會聽歌. 呢次聽歌的原因擔心蕃薯, 佢又唔比我探佢吧!? 而且佢又唔多同我sms, 唔太知佢近況而不安吧?雖然聽日會同波特探佢, 但我總是愛擔心...真係呀, 最近有d日文碟出左, 都係聽歌吧!
第一隻聽的係安室奈美惠, 佢最近又再復出呢! 有多電視及商品廣告都有佢份, vivi都有唔少佢的相, 而家都幾靚. 甚至仲出埋碟, 有幾首歌我個人都幾鍾意~
佢新碟的封面~入面有成17首歌, 但我只係比較鐘意兩首, 分別係[all for you]及[baby dont cry]. 尤其係[all for you], 佢係一首慢歌, 真係好正!
仲有其他歌都ok既, 都post下出黎先:
baby dont cry : http://hk.youtube.com/watch?v=n3eNY3bJ3Qs
sexy girl: http://hk.youtube.com/watch?v=wtdMGW8XCm0
new look:http://hk.youtube.com/watch?v=g_p2Qq0H-Ec
我費時post太多出黎, 似乎真係好難搵得齊呢!個人比較like [new look]個mv, 但首歌本身麻麻....而我最鍾意果首竟然冇, 真係可惜=_="
仲有呢首牙! 係假wii 的RPG game, 其實係一隻ps2 的RPG的續集, 有返第一代d人物, 好耐都冇玩, 真令人懷念, 第二集都唔差, 我指個玩法同埋首歌啊~
misono-二人三腳: http://hk.youtube.com/watch?v=nE2XvL0OR3M&feature=related
聽聽下歌又訓左呢~呢個正一係壞習慣!! 聽日有得見蕃薯啦~
蕃薯終於要去醫院做手術, 去切除佢生係身體上的一個良性種癗, 呢個癗係佢身體都好耐. 今日我仍然要返工, 但心內總係擔心佢, 因佢好少sms比我, 可能佢都覺得緊張吧! 自己難以集中精神工作, 但又唔可以做錯野, 只好一直地忍住自己緊張的心情...
直到五點幾, 佢用sms話我知已經做完手術, 我當時個心都比較定d, 不過傷口依然好痛. 鬼咩! 個傷口成兩吋幾深! 所以我仍然唔放心, 好想去探佢. 不過之前應承過佢, 今日要返學校問miss關於report的事, 要好好做份report, 令佢可以盡量拿高分, 呢個世上真係好多身不由己的事, 唔到自己話事. 後來得知, 原來個醫生開病假紙時, 只係開得一日比佢. 天啊! 做完手術點可以只開一日架? 傷風感冒咩? 政府醫院果然離譜!
好多謝佢做完手術竟比個sms我, 可能佢想我安心d掛^^仲有我會努力, 好好做好份report, 唔會令你失望!
返到學校, 波特佢都好擔心蕃薯, 問我關於佢去醫院做手術的事, 仲打電話問候佢. 仲有其他同學都問我蕃薯係邊.....睇黎佢入院件事真係唔係太多人知, 一如佢以往性格, 佢好少講自己野比其他人知, 可能佢覺得我比較熟吧!我也冇詳細講係咩事比其他同學知, 因唔知蕃薯鍾唔鍾意, 只係話佢呢日唔會返學. 就咁樣, 一日已經過去, 見唔到蕃薯有點失望, 於是波特比左一個好好的建議, 就係星期六我同佢做功課之餘, 可以去探下佢, 好野! 期待呢日^^
一個幸福家庭, 相信大多數人都可能擁有. 但擁有左, 又會識得珍惜嗎? 父母成日不斷提點我地, 又厭佢地麻煩, 一係就打機, 帶住耳筒聽歌, 甚至離開屋企, 總之唔好聽到佢地煩到自己. 不過好在, 我都冇咁做....只係嗯嗯應左佢地就算. 又或者父母毎日為自己煮的一餐飯, 我已經覺得好開心, 因最近成日都要返學及返工, 冇咩理到佢地, 自己真係有點罪惡感
點解突然有感而發? 因為我聽到一個同事佢自己的故事, 令我開始反省起黎...佢的媽媽係個極度自私的女人, 完全冇盡過作為個媽媽的責任, 成日只顧打麻雀, 好少照顧仔女, 我個同事細個時仲成日比佢勞役. 一有事只係打仔女, 本身仔女有錯而打佢地已經唔係太好, 仲要係冇咩事都會打佢地之餘, 仲要係全體一齊打, 所以我同事和幾兄弟姐妹, 一見到支[雞毛掃], 就即刻扔到街上. 成日都要過住驚恐的生活, 已經覺得難受, 但呢個惡夢仲未完...
我同事十幾歲時, 去左新加坡度採親人, 返到香港時已經冇左間房子, 連去收拾自己東西的機會都冇, 只係知道一個消息, 媽媽跟其他男人走左, 剩下的仔女已經送到唔同的地方居住, 惟獨我同事, 佢連居住的地方都冇, 加上當時正值冬天, 帶住到新加坡的夏天衫同一個手提箱, 自己係尖沙咀的椅子上訓覺...難過, 傷心等等千萬種負面情緒擁上心頭, 曾想過自殺, 但又覺得自殺又唔值. 於是佢選擇左個積極的方法過生活, 就係拿住個行李箱, 自己到尖沙咀碼頭附近搵工, 一直靠自己及朋友幫助生存落去, 我聽到呢度好敬佩佢, 起碼我自己一定唔可以好似佢咁堅強, 比我一定會選擇自殺, 係呢位同事, 令我有面對困難的勇氣, 唔去避開, 而係積極面對.....仲記得佢講過有次同朋友去完夜街返屋企, 見到兩個所謂的[老泥妹]搶劫, 而且仲打我個同事, 最令我震驚的係二個女仔扯我同事頭髮, 我同事除左用鞋打佢地個頭外, 仲除左佢地條連身裙....!!?? 可能真係叫做人在江湖, 身不由己吧!? 唔咁做跟本保護唔到自己....
仲有好多故事想聽, 可惜lunch已經完左, 大家都係返位工作吧!
呢堂係database,今日終於派上次測驗果份試卷及知道分數,我就冇咩感覺,因我估計自己唔會氧太高分數,只求合格就得.特別緊張的只有波特,佢係之前都已經成日問miss,佢有幾多分,可能佢同蕃薯一樣,都想拿credit吧=_="
終於派左卷,份野滿分係60分,我竟然....對於電腦白痴的我,實在太難以置信...我竟然差少少就50分!?我睇完又睇,睇左份野幾次,甚至自己仲計埋分,真係呢個分數.我都嚇到傻左,我呢次真係冇蕃薯教我,自己又冇睇咩書學,咩都冇準備就去測,都可以拿呢個分數,真係覺得好意外,而且仲有另一個意思,就係我即使唔使靠蕃薯,只係靠自己,都可以得到呢個成績,我突然有種自我認同的感覺,覺得自己電腦真係唔係太弱,可能之前係怕左電腦,唔願意去學習,原來自己只要花心機落去,都可做得到...
我開始明白之前蕃薯講過句話[我寫程式真係進步好多,由以前咩都唔識,到而家開始寫一半或以上的程式].其實我都係因為你,我先有勇氣去克服呢科,但你知道嗎? 而且仲可以感受我對你...但似乎都冇用,你跟本唔知,也唔知為一個自己釷鍾意我人努力,去克服自己的難處,有呢個推動力都唔錯!雖然佢未必支持你,但係呢種感覺可維持幾耐呢?自己始終都想有個男人係身邊支持自己..
放學後同蕃薯msn, 佢整左linux係佢部電腦度,d畫面都幾得意~
咩話!?可以把畫面放大!?放大黎做咩牙?
linux版的msn!?真係多麼的[漂亮]啊!
模仿mac機?我覺得個msn真係好核突囉=_="
其實我都好想屋企果部裝linux,但係自己又唔識, 都係等八月五之後先算吧!
今日放學如常msn,竟然比我見到eva又係網上,真係好耐冇見啦!對上一次係幾時見呢?真係唔記得左囉,我真係冇良心呢,對唔住啊><"
同你傾落計,先知道你係et走左之後到一間新公司做,但做得唔開心,所以又去左第二間度做. 點知第二間公司好多野做同埋好嚴,唔比人玩msn.唉~簡直同我間公司一樣啦,咩自由都冇,想休息一下, 難囉!我公司連午飯都要開工.其實咁先係正常既,邊個老闆願意請個人返黎唔係做野,而係玩msn?也因為辦公室文化,而且又冇人玩,都唔好意思玩,加上本身個職位又多野做,又要毎件事都要盡善盡美,咪令到毎人都有壓力.其實我成日都有個念頭,中六合彩唔使做, 係人都想,但我更想自己開間小型時裝店,可以賣衫,可以同人傾計及自己著返d衫外,最重要係唔使係辦公室內返工,我真係好怕呢種生活..
明明講eva麻,做咩又拉到咁遠!?之後同佢講開自己工作都好唔開心,公司d同事好壞一半啦, 好的係佢地願意教我, 唔好的係成日話我,雖然佢地一心想我好,但點講呢,我唔太like佢地的語氣,而且我一件衰野,佢地永遠都記得,仲要成日提住,整到我越來越唔想同佢地傾計,費時自己講多錯多; 而且公司太多野做,要求又嚴, 真係做得好辛苦,成日埋怨點解上手會計做錯野,又唔會話,但我連格式錯少少都唔得...我明白佢地係想我學好做野,但我受唔住呢種方式.咁耐冇見,要你聽埋呢d野,真係唔好意思,而且仲忘記左約下次見面時間=_="
仲左唔係好耐, 有點唔開心,因我換左新電腦的關係,我要問你拿多次blog個網址,又再唔好意思!佢都同我講好耐冇update過,果然真係...可能你最近真係好忙,又或者都放左工,唔想對住部電腦吧!期待你之後會update返佢,想知道你近況麻~