大家唔知有冇睇開劇集, 見到d兩男追一女的情況出現呢? 各人睇劇集, 當然覺得好睇啦, 但現實之中就真係唔好, 而且仲會令自己好麻煩....
琴日同左個男網友做個名義上的情侶, 大家以男女朋友稱呼, 本來應該開心先係, 有一個男仔對自己好, 重視自己. 但唔知點解我完全冇開心的感覺, 而且毎次望到蕃薯時, 有種內究的感覺, 尤其佢唔知點解放學時, 佢成日摸tracy個頭, 又好似對佢好好, 心內有種刺痛的感覺, 甚至有少少怒. 直至佢係巴士上, 叫我做恐龍過黎坐, 我先至唔太嬲, 但都有點唔開心.....雖然名義上同個andy(網上男仔)一齊, 但我始終愛的係蕃薯...
去到深水步, 佢地班男仔同tracy去睇電腦; 文迪, berry同我就去搵位食回轉壽司, 等左好耐, 因有成十個人去, 冇計啦, 都係要等! 途中andy一直同我sms, 因佢知道我唔鍾意用電話傾計, 所以用sms黎就我, 佢問我放左學未同埋係邊, 而且仲想約我去同佢朋友去銅鑼灣d酒吧飲酒, 唔係掛!? 我唔去酒吧的, 況且我冇車返屋企, 所以我拒絕左佢. 但佢一直都有同我傾計, 佢知我一直冇食野, 仲驚我胃痛, 佢又驚我悶, 好想見到我...我都唔知答佢咩好, 惟有希望我地第時可以見, 但最後應該唔會見面吧!? 呢d留返之後發展....
終於見到佢地睇完電腦返黎, 首先我見到蕃薯[一支箭]咁走到我身邊, 而且仲企在我隔離, 我見到佢都好開心, 默默企係佢隔離. 我哋做咩牙? 冇見一個鍾都冇, 就唔捨得大家嗎?(笑)途中andy都一直同我sms, 我偷偷...唔係, 係唔覺意望到蕃薯, 佢好似留意左我一直sms好耐, 佢突然對住及望住我唱起[頭條新聞], 今日成日冇聽佢唱歌, 做咩無啦啦唱起歌黎架!? 睇黎佢開始察覺到我有唔妥, 於是我都唔夠膽sms, 只有間中望下佢, 我做咩突然又有罪惡感架!?
其後唔知係咪天意安排, 由於我地太多人, 要拆開三台食飯, 分別係四人台, 有berry, tracy, 阿駿, 雲妮先入去; 之後黎個三人台及二人台, 只剩下文迪, 波特, 阿聯, 蕃薯同我,本其實我從來冇想過會同蕃薯一齊食, 原本我以為佢會同阿聯一齊食, 點知佢竟然叫我坐係佢隔離!? 可以同佢一齊食飯!? 實在太開心啦, 但另一方面, 唔知係咪自己多心, 佢係咪要睇下我有冇同個男仔sms....我哋極之肚餓, 一口氣先叫左六碟三文魚壽司, 同埋毎人都先係回轉帶拿三碟壽司食住先, 睇黎我地真係餓壞左. 我地先知對方原來都勁鍾意食三文魚壽司, 而且仲不停地叫, 毎人起碼食左六至七碟, 仲有其他款如曼魚, 包魚片等等壽司, 我估個侍應都比我地嚇呆左....兩個好似餓鬼投胎咁狂食, 有時仲二人食一碟, 剛好我又冇鼓油, 我係佢隻碟上點, 真係食得好開心呢~
之後我突然有個鬼主意, 就係回轉壽司上的鏡子上影相, 估唔到佢竟然答應, 仲自己拿住相機影相~
我又唔知望左去邊啦, 唔緊要. 下次再去影過!! 張相好得意牙, 好似擺係相框內^^係我今晚收到的一份好禮物~
食完飯之後, 我地各自己返屋企, 原本以為佢會同我一齊坐52x返屋企, 不過唔緊要啦~途中andy又同我sms, 佢問我返到屋企未, 仲叫我聽日打電話比佢, 迎仲話同朋友飲酒, 忽然掛住我, 我都叫佢要返工, 唔好太夜返屋企, 之後傾傾下我太累, 係車上訓左
返到屋企, 我返頭先影相合照比蕃薯, 後來我地傾傾下計, 講開我地有好多合照, 而且見到毎張合照, 一定會有開心的回憶, 我先知佢一直有keep起我地的合照, 佢一直都冇洗過, 我覺得好開心呀, 我地一直keep住大家合照就好. 此時, 我發覺佢個名附近的[心情極差!!]的字句消失左, 唔會係因為我吧? 我都係叫自己唔好太多心...
睇黎而家似乎係暴風雨前夕, 開始大家有所舉動, 而且又係我人生覺得最麻煩的一刻. 雖然同時有兩個男人對自己好, 覺得好開心, 但覺得自己好衰, 拖住兩個男人. 有一個一定會傷心, 我唔想見到任何人傷心, 我到底點做好? 我的壞習慣又黎, 一多野諗就會訓著=_="
welcome to my world...
My model life since Nov 09~
My sweet life w/ bf joejoe since Dec 09^^
星期二咪講開同開個男網友, 即係縱女友果個人傾計, 我地講開都為自己的舊情人而唔開心, 於是我講笑同佢講, 不如我地試下拍拖, 估唔到佢真係應承我, 而我也答應左佢, 我真係多左個網上男友, 同佢有傾有笑, 同佢同我講左件旅行的趣事, 話佢自己以前係長髮同係酒吧度做, 有個鬼佬飲醉左, 竟然問佢可唔可以做佢女友(佢係男仔的說), 佢都唔知比咩反應佢, 第二日個鬼佬黎搵佢, 先知道佢係個男仔. 我聽到呢度都忍唔笑, 仲想問佢比張相黎睇下, 點知佢話要搵返先有.....我真係好想睇, 佢話見我係佢女友先至比我睇, 但我最後都係冇得睇, 果然網上認識的人都係得個講字=_="
本來同佢傾計都好開心, 同佢分享左自己悲與喜的事, 傾到累差唔多想訓時, 蕃薯突然同我講話佢要去醫院!? 我當時真係嚇親, 但我又已經同左個男仔講再見, so 用offline mode 同佢傾, 點知佢以為我off左, 所以佢都off埋, 後來我真係好擔心佢, 用sms同佢講話只係假offline, 佢問我點解, 我只係答佢一句無可奉告, 之後我哋一直傾, 原來佢要去醫院做個小手術, 係割除一個良性種留, 呢個留我係見過的.....呢件事只有佢媽媽, 我及波特先生知, 佢話醫生講可能要留院, 令我更加擔心佢, 甚至自己仲想請幾個鐘假去夠佢. 仲想佢係做完手術之後即刻去搵佢, 睇下佢手術如何....
我自己發咩神經呀? 竟然擔心到佢呢個程度? 為左佢真係不惜一切...你都算有個網上男友, 點解仲去緊張第二個男仔? 睇黎無論有幾多男仔同我講佢鍾意我, 我都只係鍾意蕃薯, 以為自己可以忘記, 點知一直都唔可以忘記. 不過我冇後悔過一直鍾意蕃薯, 而且冇意外的話應該會鍾意佢, 忘記唔到同佢一齊開心及傷心的日子, 佢對我的好.... 睇黎我而家應該係想方法拒絕同網上個男仔, 我哋未見過面, 而且我又唔知佢個樣, 只係傾左一次電話, 應該唔怕掛!?
同場加插, 我個姪仔學行路~我見佢好得意, 於是忌唔住又影左落黎, 可惜的係我屋企好亂=_="
成日係屋企食晚飯, 自己都麻麻想食, 加上覺得等到星期六先去食飯, 又好似耐左少少, 於是走左去和同學仔食飯. 大家都拿不出主意食咩, 而且又唔知點解間間餐廳都多人, 有同學提議食潮州打冷, 本來我聽到個名, 都有點唔想食, 但我見到好多同學都想食, 而我都有點想食毫仔煎餅, 所以最後都有去食到飯~等左唔太耐就有位, 大家開始叫食物, 好肚餓呢~
先黎個腸仔拚豬大腸等等, 呢個都幾好食架~尤其我至愛的豬大腸~
呢個係老水鵝啦, d鵝好軟滑, 好好味囉!
[狗]菜豬紅(個字唔識打添=_="), 以前細細個好鍾意食, 而家就麻麻地, 不過都係好食^^
我至愛的蠔餅終於黎左啦, 好多蠔仔, 勁正!其實仲叫左個蠔仔粥, 但冇影到相...
淑炎九肚魚~d魚好滑好好味啊!
本來我唔太想食蠔仔粥, 想叫其他粥食, 因都係好平一碗, 比出面平好多~但係其他粥要朝早先有, 真係可惜呢. 個伙計見我唔要, 咪比得果六隻碗, 冇比我果份, 本來我地都唔知, 點知後來倒蠔仔粥時, 我都係想試一碗, 先知道呢件事, 結果咪臨急臨忙叫伙計比一隻我地. 你都係唔好太三心兩意啦!
原來潮州食物都可以好正, 而且仲好好味, 可惜份量太少, 老實講我仲未飽啊! 我果刻突然想起, 如果蕃薯都係我身邊食就好啦! 點解會突然咁諗架!? 後來我媽媽講, 原來潮州野要連飯同粥送先得, 加上我地又冇成八個人食, 同埋叫左好少菜, 所以唔夠吧! 不過唔緊要啦, 我都要減肥, 食少d都冇所謂, 最緊要全班同學開開心心食返餐飯就好, 下次如果齊人就更加好啦!
文迪知我係八月想讀art的短期課程, 但我又唔得閒拿章程睇, 所以佢就幫我拿左. 所以係個blog度首先係多謝文迪~其中有一本的章程好正, 比大家睇睇先~
呢本就係商業設計的章程, 成本食譜咁, 真係好鍾意. 其實佢用左一個即食麵的設計, 佢係個標題下面有個英文寫的[設計口味]字樣, 而且仲用[cooking time 2-3 yrs]黎表示個course時間~
呢個係背面~
呢個好似攝紙巾的物體, 入面果份係報名表格~
佢個表的確好正, 但仔細睇下內容, 發覺入面的作品, 自己覺得唔係太靚, 呢點係令我意外的. 大多數作品覺得水準麻麻, 而且仲係全職學生做, 我就覺得真係唔好讀呢科住. 不過除左呢個原因外, 仲有係我自己根本冇時間讀, 份工一定要返, 走都走唔甩; 而且而家呢個course我都想讀落去, 只係自己唔想寫program同電腦繪圖先至唔想讀, 就算我自己唔太想接觸電腦, 第二科都未必走得甩; 我真係好想做一些同人手畫畫的工作, 但又難搵, 同埋唔可以維持生計, 加上我又唔捨得離開同學及蕃薯, 究竟我應該點做呢? 應該選擇自己的興趣, 努力成為自己終身事業? 定係努力完成呢個course, 搵返相關的工作, 還是讀返會計, 再搵高d人工? 一連串問題我都唔知點做好, 自己也太累, 想想下就訓左覺囉=_="
可能蕃薯比較忙住佢份pt job, 好少同我傾計, 而我最近在msn上同個男仔傾計, 睇黎我同佢因為個ex而令自己唔開心, 所以成日都彼此分擔自己同個ex的不同經歷. 佢仲好愛自己個舊女友, 佢舊女友的現任男友成日問佢拿錢, 網上個男仔忍唔住幫個女仔手, 但個舊女友反而唔太理佢, 仲怪責個網上男, 令佢係酒吧內飲悶酒. 呢晚落大雨, 佢同我係msn上講自己的唔開心, 又話自己太過縱容自自己個舊女友, 令佢而家咁野蠻. 多次都照顧自己個舊女友, 即使分手仲對佢好好, 如果我一早認識佢, 我會比而家鍾意蕃薯仲開心嗎?
而我, 因為蕃薯對我的泠淡, 厭倦左呢種唔清唔楚的關係, 雖然當中都有sweet, 但一想到唔可以以後咁樣, 心內難免有些落莫, 呢d幸福只係短暫嗎? 加上我今日又同佢講我會可能會讀art, 佢於是突然嬲起黎, 話佢至討厭成日搖擺不定的人, 既然係咁的話, 就唔好讀呢個course!當時我真係哭了出黎, 邊哭邊打左msg比佢, 同佢講左我只係試下有冇機會讀, 同埋佢係我重要的人, 我先至會話佢知, 你唔鍾意我都唔緊要, 我只想把心內的說話講你知.....於是蕃薯先同我講[其實....我想同你好想一齊係呢度畢業], 聽到呢句話之後, 我心內突然有種好sweet及開心的感覺. 我開心黎做咩牙? 或者佢對其他同學都咁講呢, 唔好開心得太早住...都係平常心吧! 不過講真, 我都好想同你畢業, 仲有其他同學都係, 大家一齊穿起畢業衫, 一齊互相影相及重溫開心的片段, 以及同大家一齊去畢業旅行....想法都已經好開心呢! 不過我希望上天可以比多個願望我, 就係....我想永遠同蕃薯一齊, 唔知呢個願望係咪太奢侈呢?
其實到而家, 我都唔知點解毎次同蕃薯傾開我唔讀呢個course, 佢一定會發脾氣, 你話我成日同佢講, 特登想引佢注意, 緊張自己, 就話我唔對, 但我只係向佢提及過兩次, 而且我的目的只係決定我人生之路, 佢就已經發晦氣叫我唔好讀, 如果佢唔鍾意我, 就唔好留我係度, 比我發展自己的夢想算了. 但係我毎次一想到要離開佢, 我就成日哭起黎, 睇黎比起夢想, 我比較鍾意...唔係, 應該用愛上黎形容, 為左佢, 為左要完成想做插畫師, 又或者game designer的夢想, 我唔會再講放棄呢類說話, 我會加油, 克服怕寫program呢個困難^^
放學之後, 自己冇意去上網, 見到有一個地方好靚, 好想去, 佢就係馬來西亞的沙巴, 係一個陽光與海攤的地方, 位於婆羅洲東北部的沙巴，而波羅洲是一個多山及擁有無數茂盛熱帶雨林的地方，原始荒蕪，而沙巴則是前往洲內名勝 的中心樞紐。沙巴有著綿延不斷的海岸線，因而有許多潔白沙灘。在這裏，還可以欣賞到與別不同的珊瑚礁和海洋生物、世界上最大的花〈萊芙西亞花〉、舍比洛人 猿保護區、波令溫泉、冬岩洞等等。 如果喜愛大自然的你，必定會被當地的植物、鳥獸、森林、土著……吸引住；沙巴對任何人而言，都是一個度假天堂。
我第一眼見到呢個地方, 已經被佢吸引住.....果然係度假天堂~
我一直都好鍾意水上有條橋的地方, 估唔到現實真係有呢~
沙巴的其中一間酒店, 由於多數都係有海景, 同埋豪華的房間, 都要成幾千元一晚, 好貴呀>_<
酒店內的設施~即使唔識游水都冇問題吧!?
全個島的全貌~
真係好想休息牙~對我黎講, 或者係個冇咩可能實現的事, 工作方面又唔可以偷懶, 返去只有不停工作, 即使連食飯也要工作, 成日驚住比人炒.
返到學校, 又要忙住做lab, 希望可以即堂交到比先生, 尤其係programming個阿sir, 成日咩都唔教唔講, 就比張堂課紙人地做, 真係唔知點做, 好在一直都有蕃薯教我及幫我做, 我先至可以拿得高分點, 真係好驚呢科會唔合格. 好在另一科個database比較好少少, 起碼我知佢做咩, 仲可以自己寫到program出黎, 不過有時都係會錯, 要和同學對下, 先知道自己錯咩, 但對我黎講起碼係一大進步, 起碼唔會太驚寫program, 可能係因為佢掛!?以前我一見到program就會暈, 想都唔想下就會叫蕃薯或文迪幫我手, 總之避開就好, 也係令我想唔讀呢科, 想讀art的原因. 但我而家唔會避. 不過除左唔想對住program外, 也唔想對住呢段冇結果的戀情...... 其實我心內好想同佢一齊畢業, 所以我先努力.
除左返工返學之外, 我又接左份part time 工做, 咪又係做返老本行, 幫人地入數, 但薪金唔係太高, 都唔及蕃薯一份幫人整網頁的薪金高, 做咩我做pt, 你又有架!? 好激氣呀!! 仲要係同時間七月尾交, 世上唔會有太多呢d巧合!? 我地惟有一齊努力吧啦. 大家都係呢日做pt, 間中傾下計, 呢種感覺都唔錯~~當我唔做野時, 休息一下打機時, 我媽媽都話我做咩唔做野同努力搵錢, 比我休息下都得吧? 我都想放下個長假, 去邊度都得, 最緊要唔使做野, 如果可以同埋好友或情人去就好, 但我邊有咁好命, 都係做野吧啦=_="