話說琴日整個電腦, 當整到連線部分時, 發覺隻router冇左條lan線, 而我又心急, 想快d可以上網, 於是再短訊問下蕃薯. 睇佢邊日得閒上去我屋企度整, 點知佢竟然答應我今日放工之後幫我整, 太好了!! 如果今日可以整到電腦, 我以後就可以毎天都上網打blog, 玩fb及msn, 想起都開心^^
蕃薯八點幾先放工, 即刻去黃金買左條lan線, 再黎我屋企度整. 但我驚佢肚餓, 特登打電話比佢, 叫佢食埋飯先整. 佢一早已經到左我屋企樓下, 仲打電話叫我快d落黎接佢, 因我屋企有道閘, 只係住客有住戶證先可進入, 麻煩你要在屋企等多一陣~我地終於會合, 先到附近深井村搵野食, 但佢睇黎睇去都唔適合, 只係去左椰林閣買食物, 我見佢幫我整電腦, 咪請佢食呢餐, 盛惠五十幾元, 連我自己都唔捨得食咁貴, 呢位先生果然係唔客氣!!!
終於要整電腦, 大家都好緊張, 因要同時兩部電腦連線, 所以要確保裝左router之後要做到呢個目的! 但問題終於出現, 就係要拿電訊盈科上網同密碼!? 呢d野我同我個妹真係唔知, 平時我哋只會普通上網, 點會知道呢d事, 只知密碼要用身份證號碼頭五個字, 但妹只記得個號碼,唔記得個字頭, 於是我即刻打電話比爸爸, 佢電話又唔通, 我哋三個只好撞下密碼, 但一直撞唔中. 後來我妹聽到樓下爸爸同人傾計, 因佢把聲好大聲, 連十九樓都聽到, 於是我即刻走到樓下搵佢....
搵到爸爸後, 爸爸先知道自己電話冇電....於是把我果部電話比住爸先, 自己返上樓. 佢哋撞密碼都仲未撞到, 後來阿爸都返黎屋企, 連佢都唔知密碼, 爸爸, 妹妹及我三人一齊搵記錄密碼的文件, 可惜都冇, 後來蕃薯叫爸去個唔知咩mail內打個密碼, 總之係同電訊盈科個密碼一樣, 終於搵到啦, 好開心~經蕃薯努力駁好各線後, 終於可以上網啦^^佢仲幫我去到fb內的[fd for sale], 連佢都知道我鍾意玩, 嘻嘻~
今日真係辛苦哂你, 原本你想早d返屋企訓覺, 點知哂你咁多時間, 除左同你講句對唔住外, 仲有多謝你今日幫我整上網^^
welcome to my world...
My model life since Nov 09~
My sweet life w/ bf joejoe since Dec 09^^
以為今日成日都無聊在屋企休息, 蕃薯突然一個電話, 問我去唔去同佢睇電腦, 既然有人主動問我及同我去買 電腦, 當然應承啦!! 順便同佢傾下幾時砌埋電腦, 佢話今晚黎我屋企整埋!!??吓! 我都係第一次比男仔黎我屋企, 可惜的係佢唔係我男友, 應該話如果真係我帶個男友返屋企, 唔知會係點? 我估一定會好好笑, 好得意, 可惜我永遠都冇呢日....
我哋約好左在深水步地鐵站等, 佢一早已經去到, 我哋行左好多間電腦中心, 好辛苦先至買到合心水的電腦外箱, 但我睇中的款全部都賣哂, 當蕃薯已經幫我選擇好處理器, 底板等設備, 在我唔願意的情況下, 我要被迫選擇第二款外箱, 那時蕃薯已經好唔耐煩, 叫我是但選擇一款, 仲話我已經麻煩左成四個sales, 但我第一次買電腦, 唔想是但買, 最後抵受唔住壓力都買左. 在途中, 蕃薯話呢間店佢成日幫襯, 冇理由最後唔買, 一直話我. 我一直低頭不停勸自己鍾意個外箱, 蕃薯話我唔好自言自語. 由黃金到地鐵內, 我哋冇咩傾過計, 自己仲差點哭出黎, 佢明顯冇在我角度想過? 佢又唔細心, 唔顧我感受, 只係顧自己, 我呢一刻心淡....
我買的電腦mon~在個mon仲要係purple邊^^
我唔like的電腦箱>_<"但佢都幾快, 就好似好d好男人一樣, 外表或不太討好, 但內心好!?
之後同佢去到銅鑼灣剪頭髮, 大家先互相傾下及互相say sorry, 大家又開始有說有笑, 到左蕃薯朋友間髮型屋, 我一直等佢剪髮. 佢驚我悶, 成日同我sms及叫我拿佢部psp黎玩, 等下等下已經兩個鐘, 本來我已經問佢日影個新look我睇, 但佢又唔願意, 真係...總之佢頭髮又短又金.
去到我屋企, 我地兩都未食飯, 於是媽媽準備我地兩個人飯, 蕃薯都係第一次在我屋企食飯, 佢仲食左好多, 仲學人添飯=_="食完飯之後開始裝電腦, 由於我屋企太熱, 所以在我間房度裝電腦. 間房只有我同佢兩個人, 睇黎我都危險, 而且佢仲叫自己做咸濕維修員(嚇)但美中不足的係....當我地買左router時, 竟然冇lan線!!? 即係上唔到網嗎? 原本想今日上網的, 結果惟有早d訓吧!!
今日係端午節, 都要同大家講句端午節快樂先~(吓!? 有咩咁快樂!?)其實本人覺得端午節假都幾悶下, 成日都係睇龍舟, 見到d人鬥快都唔知做咩, 鼓聲又嘈. 而且糉又唔好食, 講真果句, 平時飲茶都有啦, 使咩要在正日食!?不過第二日有多日假都好, 可以休息一下^^
話雖如此, 我屋企人話都要應下節, 在早上食下糉先~阿媽買到, 點可以唔食!? 一共有五隻糉, 三隻係我糉中至愛的綠豆咸肉糉, 真係好好味, 其餘果兩隻我都冇食, 分別係紅豆及簡水糉.
好耐都冇食糉, 食一下又何妨^^
食完糉之後都冇野做, 咪又係訓下教, 打下機. 終於等到夜晚msn, 我又同蕃薯傾計, 我作出一個要求, 就係我預定八月會走, 想在臨走時叫我幫我影一輯相, 以及比我同佢及蕃薯媽合照, 因佢地兩個對我實在太好, 之後又唔知有冇機會見, 於是咪影低留念. 點知佢竟然話, 你在ive讀先幫你影, 你走左就唔影了, 我咪窒鬼佢, 話我在ive都唔影啦~於是佢又同我講, 如果我走就以後都唔理我. 睇黎佢都幾情緒化, 上次吵架時, 又話我唔好為佢讀呢個course, 現在我想走, 佢又成日留住我, 都唔知佢想法, 到底佢想點牙? 不過我都唔想理, 一有親麻煩野. 我平時就會一覺訓天光, 咩都唔去想!!!
上回講到我今日會同蕃薯去ive度影相, 但今日黑色暴雨, 我一早已經sms問左蕃薯, 係咪今日唔使去, 佢竟然冇留意到黑色暴雨呢個字, 佢叫我照出門口, 於是我照佢的意思出左門口. 點知坐係村巴上, 差唔多到荃灣. 蕃薯先同我講話阿sir取消影相. 我只好同佢講話我去荃灣買完早餐返屋企算, 之後佢竟然叫我去佢屋企.....吓!? 呢次真係唔係掛!? 佢竟然唔係功課原因, 主動叫我去佢屋企? 不過算啦, 既然都離開左屋企, 即使返到屋企都冇野做, 惟有去佢屋企!
呢個朝早好大雨, 我立刻到荃豐中心搵60x, 幾經辛苦終於比我搵到...去到佢屋企前, 先買個早餐先. 食完早餐我同佢玩[fd for sale], 同佢爭波特隻pet及擔波特, 最後當然我兩隻pet都買哂, 因佢蝦我有成七十幾萬, 最後我冇左二十幾萬, 但都唔緊要, 我再用五十萬買下野, 好快又搵返幾十萬, 已經有九十幾萬, 我都要努力[搵錢]先~除左fb外, 同佢睇左佢個朋友整龍船的相, 而且仲冇聲, 的確好悶; 而且佢又成日話我及整電腦 我都冇佢咁好氣, 一於去佢張床度訓下覺, 冇所謂啦, 佢都比我訓, 佢唔係訓在我隔離咪得!
我食的豐富, 但又難食的晚餐, 不過係蕃薯請, 唔可以比佢知我咁想....
夜晚同佢及佢媽媽食飯, 睇黎我哋三個都係三心兩意的人, 搵左好耐餐廳都唔知食咩, 本來想打邊爐, 點知蕃薯話佢減肥, 算啦, 佢....我哋一行三人去左吉之島食飯, 我同蕃薯媽叫同一個餐, 係一個上海菜, 有好多野食, 包括一個豬排麵, 但我因唔鍾意食花生, 食食下同蕃薯換左, 我變左食佢果個拉麵; 仲有一杯都幾好飲的豆漿; 一碗好難食又spicy的酸辣湯; 同埋五隻小龍包, 但全部都唔好食....而蕃薯就叫左一個二人份的拉麵
食飽之後, 我就去買dessert比我個妹, 蕃薯兩母子送到我去巴士站, 蕃薯又成日話我, 於是我忍唔住問佢媽媽, 佢係咪係在屋企時, 在人地面前咁痴線, 佢媽媽話只有男仔去佢屋企, 但蕃薯話都有女仔朋友去影相, 只有我一個人唔係影相為目的去佢屋企, 可能只係做功課, 雖然今日唔係....佢在人地面前唔會玩到咁顛. 佢媽媽做咩要呃我只有男仔去佢屋企? 係咪真係只有我一個女仔唔係因影相而去佢屋企? 無論咩答案都好, 我只知自己一定要離開佢, 唔好想太多吧!!
今日返到公司, 仍然提唔起勁工作, 成日心不在然, 有種錯失落及傷心之感. 而且仲躲在公司獨立廁所內哭, 已經同自己講左好多次, 蕃薯根本一直只係拖你, 冇心同你一齊, 不如忘記佢吧, 人始終要灑脫, 唔好拖泥帶水, 但眼淚不聽自己話, 一直在流...
返到屋企, 同蕃薯都吵哂架, 又驚佢話我阻住佢而討厭我, 於是我搵朋友幫我把art果份功課由ai轉做jpeg格式, 問左好多人都唔認識, 最後終於搵到阿聯幫我, 最後終於整左出黎. 正想交功課之時, 蕃薯突然同我講, 問我做咩唔搵佢, 咁我驚阻住你麻. 於是佢叫我比呢兩份功課的ai 檔案比我, 幫我手再整過. 佢做咩突然熱心幫我呢? 係咪因為同學在佢面前話佢唔幫我, 佢先會幫我? 佢咁討厭我, 應該冇理由主動幫我, 不過點都好, 我要同自己講, 少接觸佢為妙. 最後佢都幫我整好左, 交左功課出去, 個心都靜返好多.
已經決定想讀的兩個course, 分別係中大的commercial design及港大同英國大學hull舉辦的會計學位課程, 我唔知讀邊個好, 兩個course學費都好貴, 要成二萬幾元, 但design係自己興趣, 也係而家想讀的科; 另一個係為生活而讀, 希望自己即使冇婚姻, 也可以有些錢傍身, 呢個選擇對我好重要, 因會決定我將來意向, 好多朋友建議我讀design, 因係我個人興趣, 最重要的係唔使驚因冇興趣讀而放棄及辛苦, 我也覺得係. 就算兩個讀邊個都好, 起碼我可以離開佢, 唔使毎日見到佢及同佢有咩關係, 自己已經冇能力去愛佢, 可做的事我已經做好, 也冇做對佢唔住的事, 只恨自己生不重逢時, 唔可以同佢一齊, 唔可以埋怨任何人, 我都明白, 惟有讓時間慢慢沖淡一切...
正當我想忘記佢之時, 佢突然同我傾計, 提及佢聽日會去ive幫人整影展, 佢負責影相, 我講笑同佢講我又去, 點知佢竟然應承我. 我都只係講笑, 估唔到係真, 因佢平時唔會同我去影相, 佢也講到好實在, 話我知幾多點及地點等, 我根本推不掉, 惟有應承佢吧....嗚嗚...
影完相之後約左靜靜屋企, 好耐冇見佢, 好期待聽日. 大家似乎有好多野想同大家講^^
我們的愛 詞:F.I.R、謝宥慧 曲:F.I.R.
回憶裡想起模糊的小時候
雲朵漂浮在藍藍的天空那時的你說
要和我手牽手 一起走到時間的盡頭
從此以後我都不敢抬頭看
彷彿我的天空失去了顏色從那一天起
我忘記了呼吸 眼淚啊永遠不再不再哭泣
我們的愛 過了就不再回來
直到現在我還默默的等待
我們的愛 我明白 已變成你的負擔
只是永遠 我都放不開 最後的溫暖
你給的溫暖不要再問你是否愛我
現在我想要自由的天空遠離開這被捆綁的世界 不再寂寞 喔
我仍然為冇得交功課的事而煩. 功課已經做完, 但唔知點交好, 因個功課係用illustater做, 要令佢變返個圖先可以交, 但我呢個電腦白痴鬼識咩, 於是搵左好多人幫, 第一個當然搵蕃薯, 因佢已經交左麻. 我叫佢幫我交, 其實佢想幫我交, 但因冇我卡片張相而交唔到, 我以為佢冇幫我, 於是我發脾氣話討厭佢, 話人地唔認識我, 都盡力幫我搵資料. 而佢又忙緊, 突然比我咁話也開始嬲. 於是我哋兩個吵架上黎. 以下係我地對話及自己感受...
China 幻想P 說: 好
China 幻想P 說: 咁你以後唔好再sms我....
China 幻想P 說: 係咁!!!
百花繚亂@kumi 說: 我都只係講笑(指佢唔幫我交功課
百花繚亂@kumi 說: 對唔住呀
(其實我係希望佢唔好再嬲, 唔想再同佢嘈, 但佢似乎真係好嬲, 冇聽到我意思...)
China 幻想P 說: 第一....我一早同你send 左logo
百花繚亂@kumi 說: 我自己整返 (指交功課一事)
China 幻想P 說: 第二......
百花繚亂@kumi 說: 係咩? 你有send到我份功課嗎?
China 幻想P 說: 你張card無插張相比我....link唔到....
China 幻想P說: ai 拉相入去....只係條link....你唔留返張相比我....我係睇唔到的....
China 幻想P說: 你話我做少少野都唔得? 我做咩叫你呢我度做,....貪你阻住我個電腦位嗎?
百花繚亂@kumi 說: 好對唔住呀, 我仲怪錯左你....我以為只係二file, 你就可以比我send到份功課
百花繚亂@kumi 說: 令你咁嬲, 好對唔住....
China 幻想P 說: 如果你覺得我真係唔願意幫你....你就當我係咁
百花繚亂@kumi 說: 我會慢慢研究, 唔阻住你做野
China 幻想P 說: 我諗你都係轉科吧啦....
China 幻想P 說: 我唔想你為我...留下....
China 幻想P 說: 無意思....
百花繚亂@kumi 說: 點解連你都咁講ga...
點解連你都咁講ga....
China 幻想P 說: 我咩都唔想知.....唔想理....
China 幻想P 說: 係咁....
百花繚亂@kumi 說: 我唔只為左你, 仲有我的夢想, 我只係電腦真係好弱
百花繚亂@kumi 說: 我一直以為你幫到我, 令我唔再驚電腦, 原來你已經討厭我
百花繚亂@kumi 說: 我真係真心學電腦, 但學極都唔識
百花繚亂@kumi 說: 不但係理想, 也係因為我鍾意的人
China 幻想P 說: 係....我真係好討厭你 (你知唔知道一個女仔比自己鍾意的人說討厭, 會有咩感覺?)
百花繚亂@kumi 說: 唔係, 但我鍾意你
China 幻想P 說: 討厭你既說話...
百花繚亂@kumi 說: 我想拉近我同你電腦上的距離
百花繚亂@kumi 說: 但原來一直做的野都係白費
百花繚亂@kumi 說: 我明白啦, 我會改善自己習慣
百花繚亂@kumi 說: 終於明白那心傷之感覺...
China 幻想P 說: 我本來打算早d訓....但估唔到為左同你吵...而又咁夜訓....都唔知為咩....
China 幻想P 說: 唔傾了....係咁啦...
結果我真係哭起上黎, 心被撕裂一樣, 覺得好痛苦, 好難受, 我第一次有呢種感覺...到底點解呢? 佢唔鍾意我都唔緊要, 因我一直都會愛佢, 點解佢要講出一連串傷心之說話? 佢呢段說話令我決定一定要走. 我在msn句msg度留下句[一切只能回憶, 你已經討厭我也決定要走, 即使比你傷害一次又一次, 但我仍然愛你], 再一直同文迪傾計, 估唔到蕃薯又再上網, 我已經唔再同佢傾, 佢同我講有些說話講左已經收唔返, 你同我講呢段心傷的說話何嘗不是? 我地大家互相say sorry, 佢在msn及用sms, 叫我唔好再胡思亂想, 好好訓覺. 但我心仍然好傷, 那晚下傾盆大雨, 我獨自在房內一個人哭...
約好左放工去蕃薯屋企, 又比同事誤會我去男友屋企, 佢邊忽似我男友呀!!!本來想放工之後, 直接去佢屋企, 但由於自己太眼訓想返去訓, 而且又在屋企食埋飯可以慳錢, 所以都係返左屋企先~
終於完成第一份功課啦~先介紹一下我的作品concept, 如上文提過, 背景及文字用黑色, 其中白危行字係我作的公司名, 係一間設計公司的名稱. 但全張黑色的話會冇咩吸引力, 於是蕃薯教我整條慚變色的線, 唉呀, 唔知叫咩, 是但啦!!同我至愛的pirple做我個名 ,可令人即刻望到條線及我個名先, 之後會再睇埋卡片內之內容麻^^
蕃薯做的卡片, 果然比我專業好多呢~我比較like佢有相片果部分. 話說佢本來已經交左, 但都係唔滿意, 於是自己又做過及重新再交~
我都唔特理佢, 自己做個logo先. 呢次係幫一間電腦維修公司做logo, 特色係唔可以太有美術feel, 因同這公司性質不付, 但又唔可以太悶及平凡, 唔係人地會記唔起公司名, 於是我就幫佢重新設計過另一款. 先比之前個設計大家睇先~
之前個舊logo設計: 太過普通啦>_<, 於是再設計過一個新的~ 
個logo都係平實d好~主要用左黑色, 因我特別鍾意黑色. 公司名[circle]用左深藍色, 因間公司係圈圈, 所以用返兩個圓圈去表示返, 連idea都費時想, 真係懶到出汁(....汗)
勉強都叫完成兩份功課, 終於可以用email交比阿sir, 但...估唔到呢次的行動會引起我同蕃薯的第一次吵架....