又可見到大家啦~

今日我約好左舊同學出黎食晚飯, 分別係蔡蔡, 嘉華, 酸梅, 寶妮及liz. 其實係我哋所定的[月會]. 由於我太多野做, 所有食飯之事情要麻煩大家, 唔好意思~

放左學後, 蔡蔡即刻打電話比我, 話佢今日見完工, 剛去到旺角, 但未見所有朋友仔, 於是我即刻去到旺角搵你. 去到旺角後, 本來想同你行街, 但寶妮佢哋都已經到左, 最多下次再同你去補數~我哋惟有一齊去阿liz推薦間新加坡餐廳度食飯!

好在侍應安排左個角落位, 好讓我哋六個大聲傾計, 千萬唔好嘈到人先好....唔知係咪我哋太餓的關係, 叫左好多食物. 佢哋係時候亮相啦~

先飲左個湯先, 不過冇咩人食餐包, 最後我食左兩個~

肉骨茶~雖然有少少藥味, 但覺得好好飲!

黑椒牛排意粉~意粉竟然要加五元!? 簡直難以置信!!

黑椒牛排薯菜~味道就...可能薯條凍左, 唔太好食....

蒜蓉汁雞排飯~個飯又要加五元嗎? 我都未食過...

蒜蓉雞排意粉~都幾好味啦^^

肉醬意粉~但本人唔係太鍾意, 都係冇食到....

串燒雞及牛肉~兩樣都好好食, 可能係切開左, 份量少左, 特別好食!

我哋途中有好多不同的話題, 包括舊校之事, 知道某個老師佢突然在學校暈倒, 在醫院訓左一個月, 竟然咩都唔記得哂, 而且身體仲好弱, 唔可以再教書住...人真係好化學呢, 真係唔可以預知未來的事, 果然要珍惜身邊重要的好友, 親人及一直暗戀的你....即使你唔鍾意我也唔鍾意我唔緊要, 我希望可一直成為你的守護天使, 盡我的能力幫你~

仲有傾左申請九月免費宿營之事, 希望我哋可以去得成...毎人都要先填好申請表格, 指明我哋所申請的營舍及日期, 最後決定我哋毎人都會遞表, 我估實有人抽中掛...

我哋一直傾計, 已經傾到成十點幾, 我哋當然記得影張合照先~但合照之前, 蔡蔡見到佢至愛的星星及藍色, 我就幫佢影左一張相先~由於冇時間send比你, 你可係度拿住先~

個效果都幾特別, 自己都幾鍾意~

兩張相我都[呢埋]左.....下次要企前d先得!!

p.s. 阿光在我食飯時, 打電話話我知買乾粉彩, 我同佢約好聽日去cafe度完成埋張畫. 記住唔好放我放我飛機, 唔係我殺左你!!

探老闆娘個bb + storyboard新進展!?

先祝我個妹詠宜生日快樂先~唔好意思, 唔可以同你慶祝生日, 我之後會補返個蛋糕比你^^

一早返工, mooji已經問我會唔會去探老闆娘, 我今日又要返學及交功課, 但老闆娘又對我好好, 真係好想去睇下佢, 令我猶豫左一整天, 最後都係決定去探佢, 因我好怕同電腦有關的堂....而且學極都唔識, 如果真係可以做插畫師, 我就可以完全唔讀呢科....

我哋一行四人坐的士去法國醫院, 果度聽講係貴及位置比較偏僻, 去到之後仲要過馬路去到醫院, 途中又多車, 真係危險, 終於去到, 我又偷偷地影左佢哋, 哈哈~

呢個係咪正門黎架!? 唔理啦, 影左先算~

呢個先係正門嗎? 弄錯左, 唔好意思....

老闆娘bb的紀念本及出世的video~

bb紀念本內的相, 好卡哇伊呢~

探完之後, 由於醫院地方偏僻, 我同mooji行左好耐, 先搵到車返學! 返到學時都已經成八點幾, 好多同學都在flash上做緊令個公仔識郁. 我呢個電腦白痴, 睇黎排學呢.....途中又見到同學拿個storyboard出黎做, 見面佢哋都畫得好有心機, 而且先記得自己未做好, 於是上堂期間即刻做, 當阿sir話要交時, 我同阿sir求情, 終於可以在下星期五交, 太好了, 多謝你呀, 阿sir^^

雖然仲未做完, 比大家睇下其中一張先~

故事的第一頁, 只係得閒油左d人.....好多未完成, 死得><

仲有我同蕃薯佢另一份功課, 就係用flash做幾個表情出黎, 做咩表情, 人物外表唔限! 真係做得好好笑. 我也在蕃薯屋企順便做埋先走~

呢份係蕃薯做~個公仔唔使問一定係佢, 分別係笑, 淫笑及嬲樣. 佢當然似淫笑果個啦, 我就比較鐘意嬲果個樣^^

呢份係我(其實係蕃薯自願幫我做)的~分別係驚嚇, 奸笑及嘆氣. 我比較鍾意驚嚇果個樣~

第一次食蕃薯媽煮的飯^^

最衰份2d graph, 本來我同事倚安想搵我去澳門, 點知又要同蕃薯傾功課, 真係浪費呢日假....我真係寧願同人去玩仲好, 我都未去過澳門!

大約三點幾, 我就去到佢屋企, 我都好驚訝, 點解自己會識黎, 我成日同自己講, 只係同佢有功課上的合作, 唔會存在其他因素, 做完功課後, 大家會各散東西, 互不拖欠! 所以一去到佢屋企, 我哋開始討論功課, 之後大家終於想到個故事: 就係有個男攝影師, 老闆要佢影底企鵝幫d犯罪證據, 佢在無可奈何的情況下照老闆意思去做, 途中見到個類似異界的少女比企鵝幫追緊, 男主角飛身去help女主角, 之後同佢一齊走, 女主角身上有個公仔, 以為可以就咁走得甩, 點知隻公仔超重, 誤打誤撞搵到企鵝幫的犯罪證據及影底.....個故事係有點無聊, 但畫起黎都好開心~

埋頭苦幹度左storyboard格仔先~~喂!! 蕃薯唔好阻住我, 唔係殺左你!!!

食返佢阿媽煲的蕃薯糖水打打氣先~

後來畫到八點幾, 佢媽媽煮飯, 只有我同佢在個客廳度畫野, 佢突然走到我身邊錫我!!??跟住仲問我要唔要幫我打氣, 仲錫左我幾啖, 又在背後攬住我, 天啊!!??做咩又咁架??你又話怕拍拖, 但而家又做咩d情侶野做咩?自己越來越唔明白, 也唔敢去想, 只求毎天平淡幸福就好, 點解個天要咁玩我??

其實我都未做好個storyboard, 唔使食飯住, 因我可以為左趕job, 可以唔使食飯, 但蕃薯堅持要佢媽媽煮飯比我食. 我又唔好意思推搪, 而且又為食的大前提下終於應承左食飯....要你媽媽辛苦, 唔好意思就真....

雖然飯送唔多, 但真係好好味, 尤其係個節瓜甫, 真係味道剛好. 不過大多數比蕃薯食哂, 我只食得兩三舊, 而且仲有湯飲, 勁正!....係都比我食多d啦, 下次都唔知有冇機會食

食過飯後, 我先同佢阿媽追韓劇, 自己仲未做哂功課, 作死呀!!惟有不停在佢屋企不停畫, 經過兩個鐘後, 終於畫好左邊. 全個storyboard公仔大致完成. 真係畫到我想死....希望下次唔好有機會再畫, 比住部分大家睇下先:

其中三幕追逐戲, 可能用鉛筆畫, 唔太清楚, 因未用黑筆畫邊吧!

用左黑筆畫邊成張畫唔同哂, 起碼靚左d先~

本來想在自己屋企油埋顏色, 點知蕃薯佢sms同我講, 唔想我捱病, 及有點似命令我早點訓覺. 而我也覺得眼訓, 自己訓左覺. 死啦, 仲未畫好, 聽日點交呀? 都係聽日先算, 一於訓返個靚覺先~

和同學又食飯, 確立自己方向?

放左學後, 因爸去飲喜酒, 屋企又冇飯食. 又和同學仔食飯, 原本想去大家樂, 點知夜晚只有豬排的飯及鐵板等等, 咩都係豬排, 雖然我自己係, 都唔使成日食我架!! 最後去左一間地下舖食車仔麵, 總之係街頭雜食之類, 我叫左好耐冇食過的兩溝及炸餃子~

個兩溝都幾好味, 又唔太稀唔太結, 又多料. 但個餃子就....可能我唔鍾意食[久]菜...

全班同學一齊去食飯~文迪同berry呢? 又乘機唔比我影相? 激氣!!

正當我哋全部人食緊飯時, 見到教2D graph的阿sir一個人行過, 我哋叫阿sir同我哋一齊食飯, 佢叫我食物完全同我一樣, 嘻嘻~除左講呢個flash功課之外, 也講起未來的出路, 文迪佢想做燈光師, 確實自己的路. 但係我呢? 我的道路又係咩? 我問左阿sir有冇插畫師的工作, 總之係同畫畫有關的東西. 佢提議我把自己作品投稿到部分大的美術創作公司, 求一個面試的機會.

而且阿sir同我講大公司的結構, 佢話至緊要畫野靚, 仲要好睇人事網絡, 如果自己好命會得到高層賞識及客人欣賞自己, 自己的路會易行好多. 公司內部會細分好多部分, 自己可能只會負責畫好少. 但都比細公司好, 因細公司除要一腳踢, 而且多數主意由老闆決定, 自己只係跟佢意思做事, 同埋要自己摸索畫畫知識, 所以佢建議我在大公司做會比較好, 第時轉細公司都容易. 我打算會在五月後會畫多d自己作品去投稿, 希望公司會比我呢個機會.

如果我真係有呢個機會, 我估自己唔會再讀呢個course, 因我的目標已經達到, 讀呢個course就會變得冇意思, 加上人工一定會比而家少好多, 我估自己離開時, 一定唔捨得同學仔, 或者眼淺的我會哭起上黎. 但我堅信自己的未來的道路, 雖然唔知係開心或悲哀, 但只要比個機會我就得, 我一定會努力做好, 即使人工比而家低, 或要捱夜都唔怕^^

找個台灣男友???

話說我的普通話真係差到貼地, 加上有一名大陸職員阿珍及一名台灣職員依安, 所以成日都要用到普通話, 我認識的唔太多, 毎日同佢地學幾個生字. 其中依安突然同我講, 叫我不如在台灣找個男友, 毎日在skybe(網上視像會議軟件)同佢傾計. 我也抵死到叫佢介紹個比我認識.

如果真係有就好啦, 可能我會去台灣搵佢, 又可同佢去旅行呢~想起兩個人一齊去旅行, 佢又對我溫柔細心, 沿途一直照顧我, 又成日講笑話氹我開心, 而且佢個樣一係似小美或鄭元暢都唔錯, 好sweet過毎一日....喂喂, kumi, 個靈魂快d返黎啦=_="

真係好想搵個真正男友啊~唔想同蕃薯在個糾纏不清的關係上, 我用左boxing day唱k果張相做wallpaper, 老闆娘都問蕃薯係咪我男友, 我都唔知點答佢, 我哋跟本都唔係, 但又有情侶間的行為, 而家好似地下情一樣, 我都好混亂, 睇黎我真係要有個男友先得, 呢段糾纏不清的關係先會結束, 我同蕃薯難道緣份未盡嗎?

同學仔試相機

今日web tech考手寫html, 結果個腦空白一片, 咩都寫唔出, 真係死得! 仲要枉費蕃薯教我, 自己真係蠢到死, 睇黎電腦真係唔適合我....

考完試後同學可自行離開課室出去食野, 見到蕃薯同tracy一齊入課室好妒忌, 蕃薯之後問我識唔識, 我只係是但答左佢算數, 好討厭小氣的自己!

miss冇教書, 比我哋自由活動, 我竟然又打機, 比miss鬧我, 叫我收埋部機, 蕃薯都話埋我一份, miss就話o者, 關蕃薯咩事呢? 之後蕃薯問我有冇帶部相機, 好在我有帶, 於是比左佢玩. 佢為左證明個廣角鏡有幾wide, 佢搵左我, 波特及阿銘自拍合照~

哈哈~真係影到四個人, 好勁呀~

有部分人冇一倖免, 比懶玩的蕃薯影左相, 排名不分先後^^

第一個當然係我, 睇黎佢最近好鍾意偷拍我, 一影左我d相就用[protect]mode, 洗唔到我d相. 佢影我相有咩居心? 我呢個pose似在度叫佢唔好再影, 好正~

努力的文迪~睇黎佢唔知道比人影左, sure係蕃薯的好事?

哈哈~到佢比人偷影返轉頭, 抵死囉! 佢個樣好鬼好笑~

我相機有個I.A mode, 即係自己完全唔使教光圈, 焦距....全部由相機自己set好左比我影. 有部分懂攝影的同學都笑我用呢個mode, 我係用呀, 唔比呀! 鬼叫我係攝影白痴咩! 可能蕃薯見我唔識影相先介紹呢部相機比我知麻, 不過佢哋有句說話講得好對, 係[傻瓜人用傻瓜機], 哈哈~

補拜山, 同阿b影靚相~

話說我哋全家在清明時冇去拜山, 因為正日又多人, 又迫掛, 自己又怕迫, 所以今日先去拜山. 我晨早八點幾已經要起身, 好鬼眼訓呢!!同阿爸及妹去長沙灣度買燒肉和雞, 順便買個早餐食下先^^之後媽媽及細佬都黎到, 我哋在途中打返舖機先~

nds在4月24終於出左[太鼓之達人DS -七島之冒險]~我呢個機迷點會唔玩呀!?今集好得意, 故事mode有點似rpg玩法, 但要玩歌過關~

故事mode打boss時的畫面, 最緊要唔好按到炸彈及唔好有miss啊, 唔係會自己扣血....

好啦, 講返拜山先~我哋終於到左第一個拜山地方 -和合石. 我哋一去到已經勁多人排隊等坐巴士, 仲打哂蛇餅果隻, 我哋等左好耐, 終於有車啦! 阿爸一早已經泊好車, 行埋上去和合石添...如果唔係拿住衣紙, 我都行上去啦, 好怕等人或車....

呢次係拜爺爺, 好快已經拜完, 我哋去下一個地方旺角. 呢個係拜麻麻, 佢等左好耐都仲未等到靈位, 骨灰擺左在道堂, 我哋要去果度先. 自從唔在旺角返工之後, 我好耐都冇去過果度. 好耐冇探到你, 你而家和爺爺仲好嗎?

拜完山之後, 我要先返屋企做flash mv的功課, 要再想過全個故事及人物, 本來想做到五點幾先出門口, 但媽媽一個電話, 叫我盡早出門口返我爸公司食粥, 冇錯, 我爸公司有地方煮野食架^^我只好快快地出門. 可能係太耐冇去過, 已經人面全非, 世事變得真快...

新舊lift在埋一齊好得意, 好大對比啊~部新lift幾好坐的說^^

食完粥之後, 我哋去左細佬屋企度睇阿b及弟婦, 而且仲抱過阿b, 佢軟綿綿好鬼得意, 而且仲發現我係唔識抱bb....期中幫阿b影左唔少相, 也係我興趣之一, 我一見到佢就會影佢相啦!

媽媽及阿b, 阿b張開對眼大點啦~

阿b識望住鏡頭影相, 好叻仔呀><

佢訓在床上個樣好得意啊, 比姑媽.....唔係....係aunt kumi抱下你先~

呢張係我在麻麻屋企度影相, 影左弟婦及阿b, 好溫馨呀~唔知我有冇咁的一日.....