班上黑白照!?為何會憤怒?

又係我至怕的英文堂了, 我悶到走左去玩facebook, 睇見我二隻pet真係好開心, 不旺我用好多錢買你哋返黎, 途中更同蔡蔡傾計, 佢問我新工返成點, 我都同佢傾得幾開心, 途中阿sir又問我關於英文文法的問題, 佢做咩成日問我識唔識架, 唔止呢個, 佢仲幫我改左個名叫ceci, 真係呀=_="

上堂時fantasy又唔專心, 周圍去影同學仔. sorry, 要更正返, 只係影左幾個同學, 分別係我, berry, 波特, 阿聯及阿銘, 我終於叫fantasy比哂d相我, 比大家睇下先~

今日電腦室上堂, 毎個位隔住partition, 咪影到我怪怪地....

我自己都好鍾意, 原來自己笑個樣係咁架, 自己一直都冇留意, 估唔到比佢捕捉到呢刻....

同上一張一樣, 都唔知佢點解鍾意影我笑果個樣!?

我比佢影得最多, 就連男同學都唔及我多, 不過好似冇咩關係吧!? 男同學都知道fantasy影佢哋, 但我一直比佢偷拍, 原來我咁易比人偷拍, 要小心點先得!! 再睇下佢影果d人的相先~

(上)波特正經動作~(下)呢個動作好襯佢個外表, 好過隱^^

連阿聯都難逃fantasy的魔掌, 又比佢偷拍左, 佢個樣好岸居!?

一睇都知阿銘知人影佢, 最下面果張真係好正, 成為左fantasy所影的相之中的至愛~

惟一一張berry的相~

放學時, 花輪突然在facebook上買左我隻pet-fantasy, 我都已經有點唔開心, 自己對佢仲留戀吧!? 可能自己之前同佢拍過拖, 雖然唔係太耐, 我自己覺得就算得唔到佢的愛, 有佢做自己個pet都仲好, 明知只係個遊戲....自己真係冇用, 連一個男人也忘記唔到嗎? 已經分左手啦, 唔好想太多.....本來我都冇咩野, 點知花輪仲要買埋我最後一隻aki, 唔知點解, 我在呢一刻開始憤怒, 交完功課比阿sir之後, 我就氣沖沖離開課室. 在電梯口見到花輪時, 我仲話好嬲, 唔想見到佢! 於是佢哋成班同學等lift, 我就走去行樓梯. 我到底係因為冇左自己辛苦儲錢所買的佢(琴日先買到佢), 定係自己因同佢傾計好開心而鍾意左佢呢?

但我落到二樓, 發覺自己的確衝動左, 於是坐lift見到成班同學仔, 我哋一齊去坐小巴, 途中我又周圍望望, 的確又見唔到fantasy, 於是我在車站度周圍望望, 後來見到佢拿住阿sir的筆記比我哋. 人哋係唔係度關你鬼事咩? 佢在車上唔知咩事突然約我傾功課(平時佢唔會主動), 平時佢總係叫埋波特及阿銘, 好少會只叫我一個, 我都覺得奇怪, 不過算啦, 自己想得太多, 自己會越失望!!

新工開始!!

今日除左係愚人節及張國榮逝世紀念之外, 也係小女子返新工的日子, 我如常地坐8:20分架村巴返工, 好在最後都冇遲到.

一返到公司, 有個員工誤會我搵人, 仲問我搵邊個添...我話今日係返新工, 佢就安排座位我坐, 仲拿埋張咭比我打. 我都係第一次打咭, 而且仲唔認識用打咭機, 真係好魚>_<"打完咭之後冇耐, 老闆及老闆娘終於返黎. 老闆娘吩咐我坐在個男老闆個位度, 佢個位呢...真係混亂得很, 我都仲未執好張枱, 老闆已經吩咐我工作, 大致上都係做shipping, 而且又講下會計點入數, 總之好多好多野, 學左成個鐘都未學完, 好在老闆比我消化下, 唔係點記得牙! 成個幾鐘佢都冇停過口...

下午驚新公司會同新人去食飯, 冇帶到飯, 老闆娘只介紹我去邊度食車仔麵平, 本來只有我一人去食, 跟住有另一名職員亞珍佢都唔知間抵食車仔麵去邊, 同埋我一齊食飯. 不過最後佢都冇食, 而我就買左碗麵返去食, 都幾好味的!!

老闆教野途中, 收到fantasy個sms, 佢知道我返左新工, 佢send個短訊講[今日返新工....加油呀! 我知你未必應到我的...我係同你打打氣], 多謝你對我好好, 特登鼓勵我, 可惜第一個鼓勵我的人唔係你, 係edwin先生用offline 留言比我的說話, 哈哈!!除此之外, 仲有在facebook上認識的gary及阿jack, 唔係只有佢一個囉, 唔好比佢得戚先~

今日係愚人節, 去facebook個friends for sale 之中得到左一萬元, 可以成功買埋aki, 得到左fantasy及aki兩隻靚仔pet, 好開心^^

最後一天工作日

時間過得真係快, 我在呢度返埋今日就要走, 其實我都係冇咩話捨唔捨得, 可能在度工作太耐, 加上又唔太開心, 所以冇感覺也算係正常吧!? 趁食午飯時大家行開左, 我同我姑姐一於玩轉呢度, 在公司周圍影下相先~

呢個就係我個臨時位, 一睇都知冇位坐啦, 個位亂到死!!!

我公司門口呀~成個雜物房....

最常用及去的地方, printer部(自稱)

我姑姐見我影得好開心, 佢自己都幫我影埋一份, 但佢唔知係咪太耐冇用相機, 唔係太認識用, 不過佢願意幫我影相, 佢影左好多次都手震, 好耐都影唔到好相, 我已經好開心啦!睇下佢d傑作先~

在個位度影返張先~不過blur左d....

幫公司賣廣告咩!? 冇錢收架!!

都係呢張比較正常d, 不過似開門招呼人客果d....!!!??

走入老闆toys room玩下先~我對佢模型及手辦一點興趣都冇, 只鍾意張按摩chair~!

影完相之後, 我又要工作啦, 最後臨走時, 老闆話[你迎接生命之中的倒數], 啋!!我仲未死得, 雖然我都想死....而且放左工之後, 個同事竟然祝我一路順風!? 我冇聽錯吧!?不過平淡及幸福的一天正是我一直想擁有!! 期待聽日新工中~

可以見到大家啦~好開心!

今日約左liz, 蔡蔡, 寶妮及嘉華黎我屋企閒坐及聚舊, 原先約好左兩點九, 點知我自己唔爭氣, 自己遲左扮靚(扮唔扮都差唔多=_="), 要坐兩點十果架村巴去荃灣搵佢地, 約左佢哋三點在荃灣地鐵站等. 蔡蔡已經不停打電話比我, 問我食d咩, 佢哋已經在百佳選購食物中.....好, 我好快黎, 等多一陣~

在車上同fantasy用sms傾幾句, 佢話自己琴晚去買燈, 買完之後上網睇過支燈, 知道自己買貴左成二百元, 好唔開心, 我都盡量去安慰佢, 同埋應承下次去買野時, 我會比意見及同佢夾價. 同埋佢都係唔好再因貪地點方便再去買貴野!!

去到地鐵站, 我即刻去到百佳搵佢地, 佢哋買左好多正野食, 只欠在我決定食咩ice-cream, 就係我至愛的石板街, 本來以為冇得買, 點知臨尾比我見到一盒~我哋買左勁多野食, 快d去比錢先~

睇黎我哋都買左幾多野食, 不過都係我食多, 因我完全未食午飯.....

去完百佳買完野食後, 我同佢哋四個去左東海堂買蛋糕比我個妹, 佢在美術一直幫左我好多, 我又冇買過咩比佢, 於是應承佢, 請佢食件藍莓芝士蛋糕, 而我自己又口痕, 自己都買左一杯tiramisu, 冇錯, 佢真係一杯黎架! 我見佢得意先買!我哋五個一齊坐村巴, 唔知係咪我哋太耐冇見, 我哋勁開心, 講野又大聲, 整到車上有個師奶望住我哋, 一於少理, 至緊要我哋五人開心就得~

返到屋企後, 我同妹妹都急不及待食左件蛋糕先, 不過食之前, 當然要影相~

食相至樣衰呢個咪係我, 都唔知食緊定笑緊....

件藍莓芝士蛋糕牙~仲好味過tiramisu, 早知買多件比自己食....

當中我哋在度傾計, 睇我facebook及過返liz及酸梅畢業的相, 見到好多開心片段, 真係好正~可能係太耐冇見大家, 所以特別開心, 當中酸梅打電話比liz, 話佢會在七點會黎到, 我哋成班終於齊人啦~不過我哋都係為食, 都係食左野先, 玩陣啤牌先出發囉~

豆腐及sushi, 仲有好耐冇見過的四方果o者o里!!不過我都係冇食到o者o里....

聚埋一齊食石板街先, 特別好味~

我哋坐六點半村巴搵埋酸梅, 太耐冇見佢啦! 佢又變返直短髮, 同返學時個樣一模一樣.....我哋決定去italian tomato食顛拿, 全部人齊哂仲唔開心到飛起咩!? 又發揮我哋嘈個半死的特色, 在間餐廳大大聲傾計, 我估連客人及侍應都頂我哋唔順!!我哋叫左d食物互相分享添! 排名不分先後, 因為全部都唔好食:

唔記得左呢碟係咩...不過話時話, 我都未食過呢碟野!!

果d 雞肉好鞋, 好難食>_<"
係咪咖哩豬排飯黎架!? 死啦, 唔記得左...

惟一呢個叫好食少少, 係蕃茄汁硯意粉, 竟然記得呢個!? 太神奇~

我哋叫的其中兩個係套餐, 加左錢多二件蛋糕, 但我都係呢句, 麻麻地好食~

最後不忘黎一張大合照啦^^而且仲約定左毎個月都會見面一次, 就叫月會啦! 下次見面時間係五月三日啊, 大家不見不散~

約會泡湯!? 傷感的回憶

我今日比平時更用心打扮, 因我之前同在facebook上一個班仔約好, 今日放學會見佢一面. 佢在早上特登在msn度上網問我拿電話, 我都比左佢, 都唔知點解我好似瘋了般, 竟然聽佢話, 可能我同佢在facebook及msn度都幾好傾之緣故....

上堂休息時, 佢真係打電話比我, 聽佢把聲少少低音, 有d磁性, 真係好正, 由於課室太嘈, 走左出去聽佢個電話, 但見fantasy間中望下我, 我心內有點驚佢唔開心, 可能係自己太多心, 佢點有可能緊張我呢? 況且我同佢已經冇任何關係....放左學之後, aki真係打電話比我, 我同佢傾在邊度食飯時, 我提議不如去旺角, 因佢而家在旺角, 佢咪唔使走黎走去, 點知佢竟然問我唔係食燒鵝咩? 吓!? 佢難道想食完燒鵝之後想食埋我, 那時在我身邊的文迪已經替我擔心, 佢不斷整我博頭, 叫我唔好去, 我也不至於隨便到亂同個男人咩咩架, 所以我以只得二個人食唔哂燒鵝為理由而拒絕佢, 而佢也話下次再約, 我唔想令佢失望, 所以send sms 同佢講對唔住.....

個約會就咁冇左, 好可惜呀!!以為可以同個型仔可以去行街食飯~~最後只好跟同學仔去買相機用品及食飯, 估唔到也係我唔太開心的開始

我哋班同學太鍾意影相, 連等車都唔放過....

在車上都係掛住影相, fantasy一見到我另個頭過黎就想影我, 我先唔會比佢影啊!!

途中見到fantasy及tracy講相機咁頭契, 什至話玩game都會保護佢, 我當時锢心好痛, 原來我一直都鍾意佢, 無論網上有幾多個型仔, 自己都唔想去理, 心目中想住的.....總之我見佢地二個一齊傾計, 好心痛, 我唔想望到佢地, 決定自己離開. 心一直想, 點解唔比我同aki去食飯, 個天要玩我玩到幾時!? 途中去買相機用品, 經過好多我哋曾經拍過拖的地方, 我個頭一直痛, 可能係自己太傷感而避免記起吧!? 最邪的係連我哋食飯的地方都係我哋在情人節食飯的餐廳, 勁唔想去到, 而且佢仲叫左我哋在情人節一齊食果個飯, 太多巧合太邪, 好想快d返屋企......

雖然坐在一齊, 但已經唔再好似以前咁開心及恩愛....

我特登叫個唔係果日食的飯, 冬姑時菜水較麵, 真係麻麻地好食啦~而且又廢時想埋d唔開心事....

互相關心...老闆的勉勵

今朝fantasy去見工, 我即刻send左個短訊比佢, 問佢帶齊野未, 眼唔眼訓, 佢一定眼訓啦, 平時成九點幾先起身, 今日八點幾已經要出門口, 我地在sms度傾左幾句之後, 我就要返工. 見佢十二點幾, 應該見完工吧, 但佢一直都冇聯絡我, 本來我可以唔理佢, 話哂佢見工跟本唔關我事, 我哋而家各行各路, 但我自己又唔爭氣, 最後都send短訊問佢見完工未, 佢都有覆我, 仲話見左個幾鐘, 但佢似乎唔太鍾意份工, 算啦, 唔鍾意就算, 唔好勉強接受


臨放工時, 比老闆捉左我去佢間房, 好在唔係訓話...而係佢以為我做設計, 佢鼓勵我努力在呢行發展, 唔好行返轉頭會計呢條路. 至於點解佢以為我做設計, 其實又係我姑姐同佢講, 因佢唔想比老闆知我因低人工而唔做, 所以先講左呢個美麗的大話. 老闆話我而家幫佢做果間大公司, 好多數都冇入錯, 而且仲可完成成盤數, 只係間中有點錯. 佢仲讚我比出面好多會計做得好, 如果我再在呢間公司做多1-2年, 在出面的人工一定會升得好快, 而且sure有五位數字(其實我已經係呢~)睇黎我做會計都唔錯, 佢講得我似乎好好, 如果我全副心思擺去會計, 一定會搵好多, 可惜我興趣不在此.....而且老闆也好好人, 佢話本來我走, 係冇花紅, 但見我在公司內有貢獻, 比左半個月花紅我, 你的勉勵及人工對我黎講有鼓舞作用, 多謝你~希望我第時有機會探下你地^^

今日放工, 悶左成日, 上去facebook玩下, 又玩[friends for sale], 見自己身價暴升至十幾萬, 於是身痕想買fantasy定aki, 因fantasy比較平, 但佢又好似冇咩人炒佢; 而aki又幾型, 我唔知買邊個, 於是突然send短訊比fantasy問佢, 最後佢講當然係買佢, 等我先行街, 再返屋企買佢, 順便打電話比佢傾英文功課. 點知行街途中, fantasy已經打電話比我, 我地傾左半個鐘到電話, 我先發覺原來佢仲記得佢要教我html, 估唔到佢仲記得, 因佢之前冇同我提及過教我, 只係我單方面向佢提出, 我那時雖然開心, 但對佢都係唔好有咩期望, 只係佢好記性及鍾意幫朋友先會幫我, 總之唔好想太多.....

為何放不低? 又係桃花命!?

今日上英文堂, 真係好耐冇上過, 教的係英文文法的tenses. 阿sir用左一個例子去解釋, 就係[he loves her]. 呢個例子對一般人黎講, 平平無奇, 但對於失戀的我黎講, 卻係一個刺激. 阿sir叫大家紙上寫哂所有時式出黎, 由於我已經認識就無寫到, 於是佢就叫我出黎寫哂所有答案. 雖然我答案完全正確, 但我半點開心的感覺也冇, 可能真係因為佢. 以為自己可以放底, 但原來自己從未放底, 可能真係愛一個人太深吧? 呢刻我又再次唔開心, 但我又要盡量忘記佢, 於是我只好扮聽書, 咩都唔再理會....

大半堂我都冇同佢講過一句說話, 直至去完toliet返課室, fantasy突然同我講話佢聽日有份新工要見, 在九點半面試, 佢一定會唔習慣早起身, 而且仲要同朋友傾野, 佢又點可早起身啊? 仲提佢見工注意事項, 面試前的準備....佢也比左佢聽日見工果度個網址我, 叫我睇下先, 之後佢會打電話比我; 我都唔明白做咩要擔心佢呢d事, 佢已經同你冇任何關係, 點解仲要我幫你手? 不過我總是不可丟下你唔理, 咁就一了百了, 可惜自己又唔夠狠. 結果晚上你真係打電話比我, 我問有咩報酬, 你話比我咬兩啖或切二塊肉我食, 我先唔要呢....

放學後, 先和berry, 波特, 阿駿, 阿光, 及因工作太忙冇返學的文迪, 一行六人一齊去間上海餐廳食飯, 我又可食豆沙窩餅~不過在上英文堂前, 設計個miss叫我地拿返作品返屋企, 我拿住塊勁中的storyboard回家, 當時又大風, 吹到連牌都差點爛, 但最後冇爛到, 放心^^

在屋企等fantasy途中, 之前開的facebook之中, 有兩個男仔在msn度add左我, 其中一個仲幾型仔, 可惜佢細過我, 佢剛讀完設計, 而家又做設計, 真係羨慕, 佢叫aki呀, 我在facebook度拿左佢張相, facebook果然方便^^

Aki係抱住跳跳虎果個, 呢張係佢上年畢業的相, 但我覺得佢在facebook上果張型好多~

跟住有其中一個男仔, 佢張相都幾變態, 係上身冇穿衫拿住部相機, 真係唔知佢做咩? 而且又唔係型仔....佢一見到我在facebook, msn上有上網就即刻hi我, 總之又係個大麻煩! 以上兩位人兄, 在msn度又比電話號碼, 叫我隨時打比佢哋, 約佢地出黎食飯, 佢哋當我係咩=_="不過唔知點解, 明明係有機會認識男仔, 可能佢哋仲會成為我男友? 但我而家暫時無法接受佢哋, 可能自己真係唔捨得fantasy, 定係自己已經怕左戀愛及比男仔煩? 因我以前也係咁, 一有男仔同我做朋友, 多數會追我, 總之一接觸男仔真係不得了....可能呢d真係桃花命吧?但我又唔係真係有男友先死!!

仲有一個男仔, 我覺得佢好型, 佢係攝影師及designer, 在佢個facebook上成日有佢作品, 佢可能以為我係卓韻芝朋友, 成日send mail叫我加入佢所成立的攝影及設計學會, 我都對佢好有興趣, 可惜佢已經有定婚對象....但佢都係太型, 我又在facebook上拿左佢其中一張相~

同Aki一樣, 佢在facebook上個張相型d, 但呢張已經唔錯, 佢成為我在facebook的遊戲之中(friends for sale)的終極目標, 要儲成三十絃萬先買到...而我而家只有六萬幾...睇黎我都要加油呢...