多麼精彩的一日!?

今日終於頂唔順, 又咳又喉嚨痛, 請左一日病假去睇醫生, 而且仲可以去埋見工,一舉兩得! 但我又冇衫去見工, 所以約左姑姐在旺角地鐵站比衫我, 點知佢遲左成幾個字先到, 我就等足佢幾個字, 又叫人哋準時九點前....不過算啦, 最緊要有呢套衫!!

拿完衫之後去睇醫生, 都只係普通感冒, 但大頭蝦的我竟然冇拿現金, 佢又唔收EPS, 惟有到附近匯豐去取錢, 見到自己個戶口d錢少冇可少, 真係可憐....之後返屋企, 途中去買腸粉食, 個老闆勁好人, 見到腸粉痴住左個袋, 佢再比多一條我, 八元七條腸粉暖苙苙, 好抵及好好味, 我分左部分比我妹妹食^^

又要食藥, 好慘呀, 仲要有我至怕的咳藥水.....

休息左一陣, 終於去見工, 我一早到左見工地點, 我在街上逗留左一陣先上去.一入到門口, 比那公司貨物嚇到呆左, 原來佢係賣買女性內衣, 見工時仲要係個男人, 都有少少驚...填完resume之後, 個男人竟然叫我用普通話介紹自己!? 老實講, 我普通話最弱, 平時又少用, 只係講左幾個單字佢就算, 之後仲要玩埋excel, 最好笑仲要比埋分數, 有成七十分, 好得意=.="

考完excel之後, 輪到個女人見我, 佢仲比埋咭片我, 原來佢係呢間公司的老闆, 同頭先in我個男人係兩公婆, 佢仲講左佢自己的事我聽, 原來佢十八歲在日本留學, 後來先返黎香港創業, 所以佢間公司經營手法似日本. 當中有d好得意的野比大家知道下, 如公司可比員工穿毛毛拖鞋, 有個休息室可比員工休息.....仲有一件好好笑的事, 就係講到員工福利時, 話說呢間公司會比佢地claim 180元醫療, 但我睇醫生只係比百五, 於是個老闆就我講, 叫醫生比靚藥我就得!!??吓! 我都係第一次聽到呢個理由, 我除左驚嚇之外, 都唔知比咩反應囉.....

其實呢間公司福利都唔錯, 除左醫療外, 保險方面都唔錯, 除左勞工保外, 呢間公司也有在第二間公司買保險. 至於制度, 返工衣著唔太緊; 仲有工種除左會計之外, 仲要負責其他銀行文件, 起碼可嘗試不同物件; 不過呢間公司衰左放勞工假, 即係只有七日假期, 要小心請假先得, 老闆娘建議八, 十二及一月放假, 因我哋公司好多日本客, 佢哋會在呢三個月放假囉!

最後見左個幾鐘, 五點幾先走人, 惟有返去我爸公司一陣休息先, 之後再返學....今日又冇得同蕃薯一齊返學, 已經第二日了, 我哋今日上visual art的 lecture, 冇錯, 又係悶蛋堂, 所以蕃薯差唔多八點幾先返, 那時我哋已經放break, 佢就跟左我哋班同學仔出去買野食. 返入課室時, 由於我哋睇影片, 全間房都黑哂, 蕃薯唔小心差錯第一級樓梯, 差點戟親; 我同文迪, berry去廁所後入課室, 點知我竟然同蕃薯一樣, 在同一個位差點又戟親....呢個世界會唔會太多巧合呢?

悲喜交集的一日

起身時開始覺得喉嚨有少少痕, 但都冇咩大礙, 仲走去穿碎花裙, 照常地返工......早上工作都冇咩問題, 但耐左開始有幾聲咳, 而且仲咳到好想嘔, 腹部仲有d痛, 開始覺得頂唔順, 只有半條人命, 但果陣已經成五點幾, 冇理由去請假及睇醫生, 於是只好一直死撐.

途中同左好多朋友msn, 分別有文迪, 靜, eva, edwin, 後來就有蔡蔡, 由於係edwin在五點半放工之後開始病起黎, 所以edwin唔知我病況外, 其他朋友知道我病重時, 都叫我多d休息, 問我今晚有冇藥食, 聽日請病假等等....多謝大家的心意, 放心啦, 我會的啦, 大家有心! 仲有我聽日一定會請病假, 除左因為個病勁辛苦外, 仲有我在五點幾時收到個電話, 又叫我去見工!又有病, 又要見工, 我應唔應該開心呢?

係個男人打電話比我, 唔知係咪老闆定咩啦, 佢都冇講底公司名就問我有冇興趣見工, 我當然有啦, 於是佢問我聽日可唔可以去見工, 當然好啦, 可以扣少d有薪假, 而且佢仲比我自己決定時間! 最後決定左在四點鐘, 去長沙灣廣場第一期見工, 我估應該唔太難搵, 因屋企人去過飲茶, 我知個位置在邊度, 希望聽日可以見工順利^^

我放工時sms比蕃薯, 話比佢知我病左, 聽日請病假去見工, 佢起初以為我為左見工而扮病, 後來我同佢講我病時, 佢都幾緊張, 問我邊度唔舒服, 我已經答左佢我咳及想嘔; 估唔到佢放左工之後, 佢再問我有冇事, 我好開心呀, 第一次見佢好緊張我!!多謝佢關心我, 仲抵死到加左啜啜[>3<], 佢都好鬼開心, 呢一刻我覺得我哋終於有返情侶對話, 及佢主動關心我, 真係好感動, 之前有咩唔開心都突然忘記哂.....

仲有琴日我漏左post一件物品上黎, 就係我一直好想買的wii, 但我最近又交學費, 又要買電腦去寫program及繪圖, 所以被迫擱置. 惟有用住迷你玩具wii頂住先....(哭)

抽中左手制. 原本我唔想要手制, 但個天要比我, 真係冇哂計=.="原本想要wii 主機的說....

聚舊同唱K

好耐都冇見過veron, eva及蕉, 終於可見到你哋三位, 太開心啦! 我, veron及蕉約左十一點半在尖沙咀地鐵站先, eva就自己坐巴士. 我哋兵分兩路去到CEO neway集合.

結果我哋三人先到CEO, 本來想去食lunch buffet, 但果度buffet地方整緊, 最後只好食個$55套餐吧!我同veron叫的食物及飲品都一樣, 就係雜果賓治, 什錦刺身及手打烏冬~

個烏冬好滑, d刺身就麻麻新鮮....個雜果賓治都好好飲^^

蕉蕉呢個又幾正, 一於影底佢先~

後來eva都黎到, 但因veron 在sms度比錯房間號碼, 所以搵左一陣, 最後終於搵到我哋房間, 我哋可以一齊食野及唱歌. 呢間neway隔音似乎唔係太好, 成日聽到隔離房d女仔唱高音, 不過唔係唱得好, 而係好難聽果隻, 佢哋d假音太假了....我哋都係比原定時間唱多左半個鐘, 我哋就冇得再唱, 只好離去吧!

之後我哋去左附近睇衫, 邊行街邊傾計, 結果只係window shopping多. 由於唱k時食得太少, 大家似乎好肚餓, 於是去左city super食野. eva話有樣食物叫薯層的食物, 佢話都幾好食, 於是叫左三條, 分別係原味, 蕃茄及蜜糖味, 四個人分黎食啦!

阿蕉又唔同我哋及食物影, 真激氣! 我哋發覺只有蕃茄味最好食, 而原味及蜜糖味有咩分別呢? 我真係唔知啦, 只不過都係有個蜜糖點下....但原味都可點蜜糖啦!

食完野之後, 我先發覺大家難得一見, 竟然冇影過全體相, 於是我哋決定去補影, 本來見到日落, 加埋隻遊輪, 本來想四人企埋一齊去影相, 點知....我逝[老爺]相機竟然影到d野爆哂光, 不但影唔到日落, 而且仲影到我哋好核突, 但都即管post出黎, 唉牙, 冇眼睇啦>_<"

真係唔影好過影囉....最後veron夜晚同屋企人食飯, 大家都累了, 便各自回家食飯. 希望大家有機會之後再見啦! 仲有記得玩nds, 呢次冇玩到....

矛盾之心情...

今日上2D gragh 講義堂, 一心以為又可以見到蕃薯, 點知蕃薯佢因屋企部電腦壞左, 要在屋企整返而唔返學. 佢本來話今日放學之後去佢屋企傾英文小組功課, 但因波特要同屋企人食飯, 阿銘約左人, 所以最後都取消左....

放學後跟左幾位朋友仔, 分別berry, 文迪, 阿駿及壞人, 一行五人去食晚飯. 由於時間仲好早, 未到食晚飯時間, 於是一行人先到九龍公園行行, 見到好多唔同藝術品. 那時我好掛住蕃薯, 好想見到佢, 於是我再send短訊比佢, 我會親自拿今堂筆記比佢, 但佢話唔使, 最後只好唔開心地跟住文迪佢地一直行.....之後大家去[玩具反斗城]. 唔係我哋有童真, 而係文迪想買左電子琴去練習, 因佢近排去學琴呢, 總之你要加油吧!

我哋邊行邊搵餐廳食晚飯, 最後決定去霸王山莊. 之前同姑姐食過, 覺得小龍包最好食, 至於其他食物味道已經忘記...我哋等左唔係好耐, 好快已經有位, 我相機又冇帶sd 咭. 好在阿駿佢接左IVE 帶團工作有拿相機, 多謝佢比的相^^

出面門口個牌. 本來有個位可見住d人整小龍包, 但驚比人話冇影到, 惟有影住個牌先~

前菜~我都唔知咩黎, 又酸又苦, 好難食>_<"

香蒜油墨菜~真係好好味牙, 好清甜, ok!

小龍包~呢間店的鎮店之寶, 但似乎呢間分店整得麻麻地....

素菜荀尖炒年糕~年糕煙煙銀銀, 而且個汁都幾好食^^

吓!? 其實仲我哋仲叫左個沙窩雲吞雞, 但由於係個店員即刻倒比我哋享用, 所以冇影到相.....總共叫左四碟食物, 但似乎大家都仲未夠飽, 於是大家自叫左甜品及食物....

酒釀小丸子~係本人叫的, 以為佢好重酒味, 點知味道淡, 唔好食...

peach味桂花糕~ 阿駿叫的, 自己冇食過, 但阿駿話好味就好味(吓!? 這樣都得!?)

木瓜燉說耳~ berry叫, 由於佢呢日係唔舒服, 又咳又發燒, 但都同我哋食飯, 好感動^^

賽磅蟹炒麵~係文迪及壞人叫, 本來係全碟上, 但阿駿唔記得影相, 後來先補影....

雖然食物唔太好食, 但見到眾多美食都好開心吧!? 不過最重要的係可以同一班朋友去食飯, 所以係好開心, 而且忘記左冇得見蕃薯呢件事. 大家食完晚飯後, 又各自返屋企, 離開了各朋友後, 自己又再次傷感起黎, 我先發覺自己原來真係好掛住蕃薯, 但又冇得見, 於是我就訓, 仲幻想同第二個男仔拍拖, 那個男仔對我好溫柔及體貼, 而且自己仲好似離開蕃薯!?....我都唔想離開蕃薯....點解突然會有呢個想法!?? 突然蕃薯sms比我, 大約環繞住佢剪頭髮一事, 大約傾左個幾鐘, 當然都係sms啦, 最後大家累了便訓左.....

極有意義的一天:第一日見工

其實呢日本身好有意思, 除左係因為二月有二十九呢日外, 也係我第一次見工的日子, 所以呢日對我黎講, 有雙重意義!!

我本身在呢間公司返工, 首先要講下歷史先, 希望大家唔會悶! 仲記得當年係沙士, 我又剛剛考完a-level, 本來成績足令我可以入大學, 但因我選擇左比較難入的會計科, 所以到最後都入唔到. 期間試過派傳單及做左一個星期sales賣書包, 搵得果少少錢用住先, 於是我姑姐向佢老闆介紹我, 比我黎呢間公司工作, 因我姑姐及老闆係多年好朋友, 我可以在呢間公司工作, 即使面試表現如何, 都一定會請我, 但我人工只有五千元, 期間我仲半工讀; 期間冇任何朋友, 也有聯絡返咩舊朋友; 親人離世等等, 係我人生之中最苦難的時刻.....經過四年黎的努力, 我的人工終於多左幾千元, 而且又完成港大校外課程呢個會計高級文憑

點解我會無端端講史呢? 因之前所有路都由我姑姐安排, 由讀及做會計呢行開始, 而且老闆仲好我姑姐講好睇好我, 希望我可以做個執業會計師, 在佢公司掛牌! 可惜我對會計呢行興趣唔大, 冇再讀上去及考取牌照, 令到佢哋二人失望. 本來一直想在呢間公司工作落去, 但我見到報章, 上網都有好多會計工, 而且人工比我現在呢份高好多, 加上我又極度討厭個扮後生同事及唔想同姑姐因工作上磨擦而令大家關係差落去, 所以我自己決定在上星期日send resume, 估唔到今日已經有公司見我, 真係好開心呢^^

好少有地穿得好斯文, 後面就係我而家工作緊間公司...

我十一點幾請左假去見工, 我早上其實已經好心急, 不停地check有冇帶漏野, 而且仲要一早返黎公司影印成績表, 而且我又貪靚, 返到公司先換衫, 結果比個同事見到我今日執好野去見工, 就算比佢知及估到又點樣, 我都未同你講, 你都未sure啦, 而且今日見到你又扮後生, 穿牛仔裙加七分褲, 真係勁難頂!!!不過話之你, 之後有人真係請我, 唔使再對住你呢件[阿嬋], 其實佢個名真係有個嬋字, 仲叫美嬋, 好一個[好靚的阿嬋]!!

我姑姐勁好地幫我打電話問去見工果度的巴士路線, 我跟住姑姐問之結果, 再在尖沙咀再問路, 最後終於去到, 而且仲早到左十分鐘, 去到那間公司之後, 接待處個職員叫我寫resume, 我仲緊張到漏左寫一頁資料! 呢樣不特止, 當面試職員叫我比身份證佢睇時, 我竟然冇帶.....果然我一貫大頭蝦的作風....

面試職員帶我去一間房度面試, 我在房內等左一陣後, 終於開始面試, 佢一開始就針對我工作表現問我職責, 我向佢講出自己負責公司整盤賬目, 造資產負債表, 損益表, 及幫核數師整整各項worksheet等等, 佢對我工作表現似乎幾滿意, 後來我在姑姐口中先知好多公司好鐘意係會計師樓出身的人, 可能係因佢哋在入賬方面比較有經驗, 而且又唔係好使教, 係咪我都係這樣, 大家就自己估下啦^^

之後那職員同我講, 我在呢度工作職責同我以往唔同, 及向我講解我在佢公司的職責, 佢公司會計部一共有四人, 一個會計師, 一個會計師助手, 及二個文員, 而我就係其中一個文員, 負責公司的付款入賬, 當中包括採購及應付款(accounts payable), 要同另一名應收賬(accounts receivable)同事及各門市部夾數. 此外, 我定期要到呢間公司及四個門市部點存貨, 佢所有貨都係手錶, 應該唔太難點吧!? 最後一樣最致命, 就係毎日做個sales report比老闆睇!!??哈哈~~睇黎我做唔完都冇得返學及屋企....

佢問我工作上有冇咩問題, 其實佢都講得好詳細, 我都冇咩好問, 於是我轉問員工福利及返工時間, 呢間公司都係返九放五, 在四月一日開始, 星期六要返長短周, 吓!? 星期六要返工!? 其實之前仲未有考慮過......仲有以下terms, 我先發覺原來出面工作都幾苛刻, 如頭二年只有七日假期, 第三年只有九日, 最多有十一日假; 冇醫療allowance. 同埋有d唔知係好定唔好的terms, 如食飯時間由12:45 - 2:00到, 但會計部要輪住食; 及probation視乎員工表現, 由一個月至三個月不等, 如果表現唔好會廷長

經歷左半個鐘到的面試, 職員問我二至三次係咪真係要在四月一日先可以返工, 而且又問我對呢份工作有冇興趣, 其實我對呢份工真係好少少興趣, 但我唔太喜歡佢的terms, 都係慢慢考慮下先, 呢次只在乎拿見工經驗. 最後個職員叫我等second in, 仲叫我記得帶身份證=_="我會的啦, 這樣又代表我有機會嗎?

後來同我姑姐, 朋友講起, 發覺有d野我冇問到, 最重要的人工竟然冇問??放假係勞工定公眾假??以及如廷長個probation, 自己唔想做, 要幾時通知先唔使扣糧......不過算啦, 成日安慰自己, 只係第一次面試, 就算差都係理所當然吧!

黑仔 vs 幸運的一天

今朝蕃薯突然在msn度講[大件事]!? 我以為佢真係有事, 原來佢只係唔記得左屋企冇水沖涼!!??因佢毎天朝早及晚上會沖一次涼!佢唔知點做好, 於是我只好叫佢用開水刷住牙先, 至於沖涼呢, 我就幫唔到佢啦, 即使一早儲定水, 但現在天氣那麼凍, 咪又容易凍親, 故佢講只有臭臭的出去....

聽到電台話屯門公路近深井交匯處在九點幾有一單八車連環相撞的交通意外, 蕃薯剛好在差唔多時間出門口, 點知佢就塞車啦, 好在佢都有位坐, 期間我哋兩個一直用sms傾計, 大約都係環墝住呢件事傾, 原來係因一個貨車司機為左閃避狗隻突然減速，導致尾隨多部重型車輛及小巴收掣不及互撼, 造成三十一人受傷....我哋兩個都被呢件事嚇親, 估唔到只係因一件小事而發生呢宗通意外. 最後即使清理左現場, 蕃薯都仲塞緊車, 最後我哋竟然用sms傾左一個鐘頭計!? 本來想同佢用電話傾, 但我又要返工, 呢次用sms我成日都要去廁所啦, 費時比人見到!

蕃薯返到公司後, 公司個server竟然壞左!? 佢足足花左整個工作天去修理個server, 但也未能整好 於是我在sms度話買點食物比佢, 可能佢太忙冇應我, 而且仲同我講今晚冇十點都整唔好, 又話整到頭暈!?真係這樣大件事嗎?我一直好擔心, 但我連日黎又返工返學, 真係太累了, 所以一早訓左. 直至二點幾, 我又半夜起身, 見到蕃薯差唔多時間的sms話佢而家先走!? 唔係掛!!佢在公司整到成兩點幾! 真係可憐....點知原來佢返屋企仲要整, 直至四點幾先至整完, 五點到先訓教, 佢都好有心, 呢二個時間佢都特登send個sms比我, 可能佢知我一直擔心佢, 又或者我在sms中不停鼓勵佢吧!? 咩都好啦, 最重要佢可整返個server就得^^

至於我呢, 我就同佢相反, 好好彩地今日收到個電話, 叫我聽日十二點去見工, 地點係尖沙咀東. 收到消息後, 我一早話左比我msn好友及用sms話比佢知, 我朋友都戥我高興, 至於蕃薯呢, 我明白佢今日特別辛苦, 所以佢連一句說話都冇講, 不過我反而擔心你多點. 所以我破天荒, 在十一點半就訓左..

悲喜交集的一日!? 和同學仔食飯^^

我之前一直怪蕃薯, 話佢唔體諒及緊張我, 只係掛住影相及幫朋友影相, 毎次都只係影佢女model朋友, 又唔見佢影下我. 佢琴晚放學之後又比佢model相比同學睇, 連花輪同學都話做咩唔影我, 佢就話上堂咪影左囉!? 吓!? 起初我覺得自己雖然算唔上美女, 但你都冇理由這樣講野, 於是我有d嬲左佢, 在sms度講左句[我肥唔肥都唔係美女啦, 肥都冇咩所謂],好想訓教....但我又訓唔到, 於是send左sms同佢講晚安, 佢又冇理, 於是又訓左..

今朝msn, 佢竟然冇主動hi我, 我以為佢嬲我, 於是我在msn度主動問佢係咪嬲我, 話我驚你以為我只因為想比你影相先至同你一齊, 其實唔係! 之後佢答我, 都係原本記底佢呢句野好d, 佢話[我無咁諗bor..其實個人只係想自自然然咁生活, 就係咁簡單...所以..咪諗太多]!???哈哈~呢刻先發覺原來自己真係想多左, 自尋煩惱, 其實講左自己內心說話的感覺好好, 知道佢原來價值觀同我一樣, 簡單生活便可.

今日得知我六叔個女友家姐同老公移民左美國居住, 原本以為好好, 點知因夫妻吵架而比老公殺害, 仲登左在報紙上. 我負責幫姑姐譯左篇報紙, 後來我姑姐先話比我知呢件事....算啦, 又係身邊有人過身, 自己都見唔少, 已經麻木哂....除左起飛有點唔開心之外, 都冇咩感覺...

又係上web tech, 但呢次係lecture, 又要聽書, 想起都真係悶=_="當中miss比我哋睇呢年同學整的網頁, 教點樣為之個好及差的網頁設計, 同學作品大多數都幾[好], 除左個背景公仔可以郁之外, 仲有一連串的閃字, 網內d link亂哂.....總之真係好多[正]野, 真係一見難忘....

之後miss就講final project之內容, 係整一個網頁出黎, 蕃薯佢話會整佢d相的網頁出黎, 佢就好啦, 可以唔使煩! 但我就慘啦, 都唔知整咩, 於是蕃薯就叫我同佢一組咪得! 佢話佢負責寫program, 我負責中譯英, 因佢要寫英文網頁....吓!?其實我原本想整個類似網上遊戲的網頁, 遊戲角色全部由我設計, 但既然佢自己主動叫我同佢一組, 我寫program又係最弱, 冇所謂啦, 又可以見佢多d啦^^同埋原來你一直都關心我, 對我不離不棄, 係我自己唔知足, 成日埋怨你, 又再慚愧....

其實今日返學之前, 我媽媽sms比我(我到而家先知佢識用!?), 叫我今晚餐飯自己出去食, 我同左六位同學去食飯, 壞人原本帶我地去一間叫韓食家的韓國餐廳度食石頭飯, 點知間野要關門, 最後去左一間叫做[潮]的潮州食品度食野, 七個人共叫左六樣食品, 我手痕痕又影底左 :

未食野之前影下個碗, 杯等等先(真係無聊). 個碗痴左d飯, 洗唔乾淨, 好在文迪幫我洗, 麻煩哂你^^

春菜排骨~~自己未食過春菜, 食過之後都覺得幾好食

鼓油拚盤~d鼓油太淡啦, 同好多人爭食豆腐....

唔記得左呢個係咩粥, 都幾好味, 但潮州粥係好稀嗎?

潮州炒飯~極度唔好味!!!

各位~大家久等啦, 係包魚[姑]介菜~我都想食包魚...

哈哈~我至愛: 潮州毫餅~d毫好新鮮^^