今日係新年之前最後一日返學, 原本我想同蕃薯一齊行花市, 於是問佢會唔會行, 佢話自己唔會, 其實我有點失望, 呢個算係情人之間的其中一個節目, 但你竟然唔去....
放學之後berry話行葵芳花市, 而我自己見返屋企冇野做, 身痕痕又想行下, 於是應承berry去, 後來加入mandy及波特, 我哋一行四人再去行! 我哋見到好多吉, 各種賀年花, 仲有我至愛的花之一蝴蝶花, 我都好想去買, 但價錢太貴, 最後同berry一齊買左桃花.....但係...我買黎做咩呢? 有蕃薯呢個男友, 當然唔會搵過另一個, 而係希望旺一旺人緣, 希望有公司可以請我, 及和新公司同事相處得好點
其實呢日自己唔記得帶相機, 咪叫左波特先生影相, 本來想問佢拿相, 但在msn又見唔到佢上網, 好想快d拿返呀~!!!
welcome to my world...
My beautiful life
My model life since Nov 09~
My sweet life w/ bf joejoe since Dec 09^^
My model life since Nov 09~
My sweet life w/ bf joejoe since Dec 09^^
我同蕃薯一如以往, 成日在工作時間sms, 我開始覺得自己跟本唔係返工, 返工唔係玩sms, 就係msn! 可能而家在工作淡季冇野做掛! 加上近排成日都因蕃薯冷落自己而唔開心, 成日懷疑我在蕃薯心中地位重要與否, 尤其係情人節快到, 我想同佢一齊過, 於是我毎次同佢提起果日點過, 佢總係唔答, 又或者轉移話題, 令我覺得更加難受.....好討厭這樣的自己, 我姑姐曾經同我講過唔好把太多心機放在佢身上, 但我總係做唔到, 佢在我心中位置越來越重要, 好難話唔理就唔理佢.....
好奇怪地, 我竟然哭不出, 甚至仲懷疑自己唔係個好女友, 係咪自己做得唔夠好? 只係成日想見佢, 又唔知佢點解唔開心....直至佢一個短訊, 話自己工作時收少左客人二百元, 個老闆要求只扣佢一百元人工, 佢好唔開心, 因為佢不停搵錢, 而且把錢睇得幾重要. 我惟有叫佢下次小心, 甚至仲話請返佢食飯, 叫佢笑返下先, 好在佢最後都有笑. 雖然我唔知佢係咪真係開心, 但只要見到佢開心便好^^
今日佢要7點返學, 我幫佢留定位, 之後學校突然黎個火警演習, 我即刻打電話比蕃薯, 話比佢知我哋全班在停車場及我哋上堂個班房. 最後在火警演習之後, 佢終於黎到. 我都話自己寫程式比較弱, 成日唔知佢做咩, 好在多得berry教我, 而蕃薯都特登睇下我及教下我, 多謝你^^最後我都叫做完成, 真係辛苦哂大家及自己. 我又覺得寫程式唔太難, 只係麻煩, 但都幾好玩!(突然忽發其想, 我可以叫蕃薯教我寫程式為由見佢多d, 睇黎自己真係衰呢~)
放學之後, 我返屋企休息. 點知半夜蕃薯sms 比我, 話佢竟然出左旺角, 同個朋友傾左好耐, 成點幾先至返屋企, 途中成日話自己係衰人. 而且一返到屋企話自己心情麻麻就訓左教....自己竟然唔知佢為咩唔開心而唔可以安慰佢, 甚至為左佢呢件事而成晚訓唔到, 聽日仲要返工, 真係唔知點死?
今日在姑姐家食完團年飯之後, 我哋見得閒就去左充滿我以前回憶的地方 -石硤尾工廠大廈, 我在呢個地方長大, 由小學補習, 到上左中學讀書及補習, 全部都在呢個地方進行. 當中認識唔少好友, 我哋一齊周圍去玩, 去士多買食物; 去附近商場租漫畫, 一齊坐在公園傾計...
而且工廠更係我父母一直工作, 養活我哋一家五口的地方, 佢哋成日工作到深夜, 我哋全家仲要在工廠訓覺, 洗澡....生活雖然艱苦, 但卻好快樂, 間中我哋一家幫下手工作, 而且黎工作的員工也好好人, 我哋間中傾下計, 都不知幾開心...和工廠附近的人沒有爭名逐利, 互相幫助及真誠對待對方. 同一層也有其他小朋友, 有d仲係我幼稚園同學, 但佢哋只同我玩, 蝦我弟妹, 我憤怒之下同佢哋 絕交, 總之傷害我屋企人我實唔會對佢哋好!!應該我只有呢個傷心回憶, 但總算黎講都係好!
可惜事與願違, 突然傳黎一個工廠大廈要拆的消息, 呢個夢想地方之後會消失, 呢刻對我黎講有點震撼, 沒有什麼比離開身邊朋友更壞....我也有點後悔冇為當時朋友及舊工廠影過相, 所有只可成為腦海之回憶, 而且也令我有一定會為我身邊的人及物影相之習慣.
今日重遊舊地, 已經人面全非, 所有舊公屋大廈已被拆除, 換上又高又大的樓宇, 而且工廠已經成為個創意工業之集中地, 燈光整晚在照耀.....但又冇人用, 唔怕哂電費, 浪費全納稅人的錢嗎!? 而家終於影返相 :
靈異照嗎? 其實唔係, 只係有個死佬, 明知我哋影緊相, 仲要望住我哋行過黎, 而我對photoshop又認識唔太多, 唔知點執走隻死佬, 所以咪這樣囉!希望之後有機會去返石硤尾再影返而家新面貌, 又或者得閒可在自屋企附近影下, 當比自己一個紀念吧!
之前蕃薯應承我, 在新年之前同我去買衫, 於是希望今日可以同佢行下街....
今日放學時, 我原本打算返姑姐家幫手, 準備聽日屋企做節時之食品, 為要等姑姐電話, 我同蕃薯, 波特佢哋到旺角買相機用品....講真果句, 我自己真係唔係太鍾意相機, 但為左見到佢冇辦法啦! 途中阿聯貪玩地用蕃薯條頸巾把我及蕃薯綁住在一齊, 其實果刻我好開心呢~但係我條頭比野綁住好辛苦, 而蕃薯佢冇點出聲, 我一直叫住好辛苦, 佢先至講左句[整咩呀?], 難道佢都唔介意我哋綁埋一齊嗎?
去到旺角時, mandy及ryan去銅鑼灣行街, 佢哋就好啦! 我都想同蕃薯拍拖行街, 但睇黎好難呢~呢日落大雨, 地面濕滑, 我又抵死穿左對高跟boot, 蕃薯在我身旁睇住我; 而且阿聯話我時, 蕃薯即刻講句[你知唔知這樣對同學仔講野, 好傷佢心架!], 多謝你, 原來你對我那麼細心, 但我總係埋怨你見得我唔太多, 又掛住理朋友而忽略我, 我自己係咪太自私?
直至大家買完野, 各散東西, 我又唔捨得同你分開, 望住你個背影離去有些失落感.....雖然我知你好重視朋友, 成日同佢哋去玩, 但我始終都唔開心, 因為本想同你行街買衫的說, 星期日你又要去影相, 又只剩下我一個人.....難免會唔開心, 我想你陪我多少少時間, 也係遙不可及嗎? 我只好無奈地回家, 送比你的繪本也有心情去整, 一直埋頭在打機....
今日終於見到Edwin先生上網啦, 成個月冇見到佢, 見返佢勁開心, 又講自己好鍾意睇靚女, 話覺得近排香港多左靚女, 仲穿得好性感添! 係咩? 我反而覺得女仔穿得密實左, 而且都冇咩靚女, 請問你去邊度行呀? 先生! 我代你女友擰你個頭呀! 仲有話佢改變左穿衣style, 我都想睇下囉~仲有仲有, 唔該你唔好講笑這樣激我, 好嗎?
放工之後同姑姐行花園街睇衫, 放心啦, 蔡蔡, 我星期日同你再行! 其實我主要買boot, 因我對boot已經爛得好核突, 而家d boot勁平, 只係一百元對, 仲唔掃貨咩? 我最後買左一對比較特別的boot :
仲有呢個春天興碎花裙, 我琴日已經一早入貨, 其實呢條裙一早睇中左, 只係果陣未買, 而家買返先~但係碎花真係好難買, 因多數款比人好[娘]感覺, 所以我選擇左呢件~
在春季會興的碎花裙, 無論係迷你裙, 連身裙都係碎花....至於可唔可以接受, 就睇閣下自己啦! 如果大家都想穿, 但又驚而家穿唔到呢, 其實都可以穿架, 只要上身穿長袖及厚衫, 下身穿黑褲及厚絲襪加對boot便可以. 不過穿絲襪時要小心, 因住走光呀!
至於春天興的鞋, 總括黎講有兩款, 一款係日本叫做[春boot], 顧名思義, 係春天穿的boot, 以短boot為主, 仲有特別款式, 如露腳跟之類 :
其實自己比較鍾意以下呢款d鞋多d, 可能係個款比較特別, 佢類似涼鞋及boot的混合體, 我就鐘意長d果款, 用黎穿碎花裙一流呢!
今日又再終於返學啦, 勁開心呀~又可見到所有同學仔, 尤其係文迪及berry, 仲有蕃薯. 我一如以往約左蕃薯在深水步地鐵站等對方, 之後再坐小巴一齊返學! 我哋兩人一齊等車時見到mandy, 之後上車便見到花輪同學! 好少一次過見到這樣多人一齊返學^^
去到課室時, 見到大家在填一類似問卷的物體, 原來係填寫個人資料及自己英文程度, 強項及弱項之類, 之後仲有二分鐘短講!? 咪玩啦, 阿sir, 我擺底左英文九世耐啦! 其中有一項係填寫在會考及a-level英文成績, 其實我兩科只係剛好合格, 又唔想寫個grade出黎, 所以寫[pass]算; 之後仲有一項寫自己英文程度, 我圈左[below average], 跟住我就比同學話我係咪玩野呀? 尤其係阿聯, 佢原來a-level都唔合格, 佢話[鄙視我哋a-level合格的人! 仲有話會考幾多人, a-level有幾多人啊!? 竟然話自己圈呢個英文程度], 當然我知佢講笑... 於是我只好圈返[average]啦! 唔係比人話死...仲有知道蕃薯原來兩個考試都未考過...不過唔緊要啦, 我鍾意係你個人, 唔係你個學歷, 而且我覺得呢兩個考試都冇咩用!
跟住到演講時間, 見到好多同學仔都盡力去講, 有d仲寫埋講稿添! 佢哋真係認真, 好過我咩都唔做! 到mandy講時, 佢緊張到全塊面都紅哂, 阿光仲笑佢添!? 你自己講得好好咩? 仲笑人=_="之後到蕃薯先生講, 我見佢好認真寫好篇講稿講, 都算幾好啦^^
終於到我啦, 我差d嚇到唔知自己講咩, 因我完全冇講稿, 全部用英文字連埋一齊講....但我有d內容和蕃薯一樣, 即刻比同學笑我囉! 我叫左佢哋靜d. 我話自己在寫作及會話較弱, 希望可藉呢個課程改善自己弱點. 其實我之所以話自己英文差, 可能係我身邊朋友英文太勁吧!? 所以我先會話自己英文[below average]. 但阿sir話我英文唔太差, 嗯, 我都希望係!
各人演講之後到分組, 要2-3人一組, 由去設計問卷題目, 訪問, 寫報告及演講, 都由全組去做. 本來我想和mandy及berry一組, 點知蕃薯突然講左句[你丟下我一個, 唔理我啦!], 點會呀?我一定會理你, 最後我都同左佢一組. 後來文迪同我講, 原來呢句有同佢一組的意思.
我哋上堂時, winnie 傳左包糖比我哋, 好好笑啦. 我指唔係包糖本身, 而係佢包糖上面的句子, 果時我真係笑左出黎 :
上堂期間, 我突然覺得頭暈, 可能係我太肚餓啦~阿光及berry把在break時買的零食比我食, 但我唔好意思食哂呢....估唔到呢件事會帶黎之後的感動....
放學之後, 蕃薯同我一齊坐小巴返屋企, 途中經過葵涌廣場, 底下有食物買, 蕃薯建議我去買野食, 原本我認為返到屋企便不用買食物, 費時用錢; 跟住蕃薯佢話佢好口痕想食d野, 之後入左去買, 買左之後佢話原來係買比我食, 呢一刻我好感動, 而且仲好暖, 不但係食物的溫暖, 而且係內心的溫暖, 多謝你! 我應承你以後我肚餓會去買野食, 唔會餓親自己要你擔心^^最後到左碧堤, 我陪你一齊等巴士, 途中我哋互擁, 即使係寒冷的冬天也溫暖起黎, 我望住你上車, 自己便回家.
回到屋企時, 我妹準備左一件士多啤梨蛋糕比我, 佢及媽媽三人分, 件蛋糕個樣又靚, 又好味^^
大家仲記得我星期一提及過本繪本呀? 粉紅色果本啊! 唔記得左麻煩大家去返1月28果篇睇返佢個look先~
我已經畫好左開頭果頁公仔, 其實之前我為左畫q版定正版, 但跟好友文迪, 我個妹及其他人意見, 我都係決定畫q版, 可能真係會畫得開心, 以及可以畫得誇張去突出大家的性格特點. 事不宜遲, 比大家睇下我在介紹果頁的公仔:
唉呀, 我影相果然唔太得, 又暗左添! 因為我開始已經鍾意佢, 結果變左呢個姣...唔係, 係好似見到自己王子一樣的表情.... 但仲未上色, 好樣衰>_<"
之後我就想左個比佢的說話, 類似指呢本繪會之內容係講述我和佢由相知, 都相戀的故事. 以及提起二月十四之意義, 除左在情人節外, 而且仲係我哋拍拖兩個月紀念. 我哋的確冇sure日期在埋一齊, 但12月14係一個轉捩點, 至於點解呢, 我在呢本繪本會詳細去講, 以及會把原因打上黎blog, 放心~希望大家可以觀賞啦^^
全本類似呢個模式去做, 希望可以在情人節整得完....
由聽日起開始要返學囉, 好野! 又可以見到同學仔, 好耐冇見啦! 但係成日都驚自己做唔完呢本野, 有d擔心. 心情好複雜呢~