去打邊及食甜品囉! 多謝liz送比我的生日禮物!?

唔知係咪近排好凍呢? 已經連續幾日係十一度到. 我今日又打邊爐, 不過唔係同屋企人, 係中學好友! 可惜的係蔡蔡因為月事而不能出席, 有點可惜呢~

我哋毎個都好準時去到集合地點, 酸梅仲帶埋自己男友黎添! 我哋一行人 : 酸梅, 酸梅男友, 寶妮, 嘉華, liz 及我六人在街度考慮去邊度打. 是但啦, 在條街度好凍呀~~最後決定去一間叫[譚魚頭]的地方打邊爐!

哇~果度好鬼貴呀, 仲百五元一個人任食, 裝修雖然ok, 但入面d服務就... 我哋入去搵位都冇人帶, 要自己去邊搵邊問人; 叫人開茶時叫左好耐先有人應. 不過都算啦, 至緊要大家開心就得! 我哋叫左個蕃茄湯底, 仲散叫左d小食, 有豆苗, 白菜, 魚頭....仲有我至愛的肥牛! 仲有一樣食物好得意, 叫做水晶奶皇包, 係人都知佢本身係sweet, 但放落個咸湯底度, 都ok好食 !

其實有d送未黎到, 所以好似好少....應該話毎人食得唔太多, 因份量少...

呢個湯底再加配料及送都幾好食!!

我哋好快食完野, 之後黎個壓軸節目, 就係....畫鬼腳抽獎. 結果我呢, 抽中左寶妮個份禮物, 寶妮又抽中我果份^^

拆左禮物先~ 我送比佢的係choco, 佢送比我係body shop 的hand cream!?似乎都幾適合我用^^

酸梅份禮物由liz 黎接收啦~

酸梅接收嘉華份禮物, 或者應該話係聖誕禮物....anyway, 冇所謂啦, 都係大家一份心意^^
唉~~個侍應唔知點影相, 總係手震...呢個係全體照!

之後我哋仲未覺飽, 埋左單之後, 我哋六人走左去一間叫[石磨坊]店舖食甜品. 酸梅男友帶左我哋去一間店舖食甜品後, 佢話住得太遠走左先. 最後只剩下我哋五個女仔.

見到個餐牌幾靚及得意, 貪得意影左落黎^^

我, 酸梅及寶妮叫的奶皇燉奶, 都算好味啦!

嘉華及liz叫的巧克力燉奶. 雖然個賣相就...但意外地, 比奶皇果個好食d!?

我哋食下甜品, 傾下計, 仲約埋初一去唱k, 以及初四去我屋企? 初四應該冇問題, 但初一就好似唔太得.....傾下傾下已經成十點幾, 我哋各自回家啦!

返到屋企, 我把liz在[譚魚頭]送比我的生日禮物其中一樣, 阿jack公仔同畢業果個影下相先 :

肥d果隻係liz及酸梅送比我的畢業公仔; 瘦d, 大眼果隻係今日liz 送比我的生日禮物^^

後來我打呢個blog先至知道.....我影漏左另外二份生日禮物, 阿jack 筆記簿及file, 遲d補影返, 哈哈~~

最後一日做測試 + 見到蔡蔡啦 + 夜半傾計 = 好開心^^

本來琴日應該係測試最後一天, 由於gigi要和屋企人食飯, 所以改左今日11:30進行. 今日我遲左到呀, 要向文迪及gigi講句對唔住先! 今日可以拿返果百五元車錢, 好鬼開心! 個測試只係做二部分, 就係普通讀四十八句句子, 以及在三個聲音的情況下以輕鬆方式讀哂四十八句句子, 成個過程約二十分鐘到, 之後gigi會跟據三次測試做個評核. 佢話我平時我都不用大聲講話便好, 減少對聲帶之損傷. 而且仲話我一直大聲講話聲帶都冇事, 所以有點驚訝! 同埋佢話我都幾聰明, 唔使佢教如何輕鬆發聲, 之前又冇進行過聲音練習, 但可以輕鬆發聲, 而且出黎個結果和曾經受drama訓練的阿聯差唔多!? 還有佢讚我係可以在呢個測試中學習到發聲的一個人! 吓!?難道我係天才嗎? <----喂! 唔好發夢啦!

跟住佢講阿光啦, 後來我哋發現一個重大秘密, 就係阿光竟然比我和gigi年紀仲大!!???我一直以為佢係細過我哋, 可能佢成日講埋d傻瓜野, 同埋佢個樣唔太大個掛.....gigi講起佢做測試時唔專心, 成日講埋什麼隨意門之類的無謂野, 令到一個鐘的測試變兩個鐘!? 浪費哂大家時間! 唔該你正經d做個測試=_="

我哋做完測試後去左間日本野食午飯. 我當然叫左差唔多全場至平的拉麵, 本來佢有二件壽司, 點知今日竟然冇, 改左煎較子....之後阿光都黎左, 佢當然係不忘串我啦!!!成日都話蕃薯在佢隔離(其實佢隔離跟本冇人), 總之成日都在我面前提蕃薯, 令本來想訓練講野細聲的我大聲返講野. 好啦, 你夠鍾就去做測試, 唔好煩我!

食完野之後, 我哋坐小巴去旺角樓上漫畫cafe搵蔡蔡, 見到佢一早坐在度玩psp. 真係可惜, 我竟然在重要時刻冇帶相機, 惟有用住蔡蔡部影住先, 希望佢下星期msn可以比返d相我! 我去果度當然睇漫畫, 但睇得唔多, 只係睇左7本...有時同佢哋傾下感情之事, 話d男仔真係冇心, 咩都係女仔做主動多, 其實呢d野唔係多數男仔做多嗎? 令到而家d女仔好似好cheap....不過至緊要男友對自己真心, 專一, 大家一齊開心的話, 佢哋被動係咪都可接受呢?

後來和文迪搵深藍色耳筒, 後來蔡蔡約左男友走先=_="只剩下我和文迪自己去搵, 我哋在旺角搵左好耐, 一係文迪冇心水, 一係就太貴. 但卻在零食物語內搵到我聽日交換禮物時份禮 :

之後文迪唔想食白果返屋企, 佢好想買左耳筒, 於是我同佢再去深水步黃金商場行下, 最後果然有發現, 文迪終於買到自己心水耳筒, 而且仲可以買到佢屋企床頭個喇叭. 好啦, 你終於買到自己心水物品, 我就可功成身退回家^^

蕃薯呢日做完part-time 之後同媽媽食晚飯, 成十一點幾先返屋企, 之後就開始工作. 我都明白男人應該以事業為重, 但好似成日被佢忽略, 成日都唔理我, 我當然會唔開心, 同時也令我懷疑 :[我在佢心目中有位置, 自己對佢黎講係重要嗎?], 佢在十一點幾send過短訊黎, 但我好嬲冇理到佢. 本來想訓教, 但又訓唔到, 直至點幾佢再send短訊黎問我訓左未, 其實果陣我唔知佢做緊野, 但我到最後都係有覆佢, 問佢做緊咩. 見佢又冇覆我就訓左.

直至三點幾, 我被一個惡夢整醒左, 之後就即刻收到佢個短訊, 先知道佢一直做緊工作, 句野話[終於完成d相...三點幾了], 原來佢做緊野一直都有掛住我, 而且佢明知我在呢段時間訓左, 佢都特登send句野話我知. 雖然簡單, 但卻令我感動! 於是我便回覆佢, 話我知惡夢而醒. 跟住佢問我仲唔訓, 我便答佢我希望可在佢身邊支持, 但我做唔到, 只可用sms表示. 佢之後就話左句野 [做咩唔乖唔訓教?], 好似細佬仔...不過都幾開心^^哈哈~我都知係怕羞啦, 你怕羞都鍾意轉移話題, 我答完佢之後便一覺訓天光..

和mandy及berry玩塔羅

今日放工和mandy又msn, 講開佢一陣會和berry去返尖沙咀間[神婆團]玩塔羅, 主要問mandy愛情之事, 佢都曾經有向我提及少少, 但唔太多. 本來我今日返屋企打邊爐, 但因為我對於mandy之感情事有點兒擔心, 同埋希望可盡量幫佢向占卜師問d問題, 所以先臨時決定同佢一齊去

我哋約左尖咀地鐵站等大家, 最後mandy都黎到. 我哋一齊出發!!首先係berry問關於佢事業之事, 占卜師話佢呢年內不宜轉工, 話就算轉到工也做唔長久, 只係做五個幾月, 至於而家佢呢間公司, 會有一個年紀比較細的老闆會阻礙佢在公司的發展. 令到不滿而家呢間公司的佢當然有點失望....但唔好灰心住, 呢個只係意見, 作黎參考都好!

之後berry問佢和現時男友會唔會結婚, 我在呢個時候先知佢原來年紀比我大!? 占卜師話佢哋都會結婚, 但唔係呢一年, 而係之後二至三年, 因為個男仔係單親家庭, 而佢要先過左佢媽媽果關...睇黎結果都唔太差, 你要令到男方媽媽開心, 加油~~!!

跟住到mandy問佢感情事, 占卜師話佢和佢而家的感情起初都ok, 但在五月時話文迪會一腳踏兩船, 但和另一名男仔只係普通行街食飯(另一個男仔係g先生嗎?), 只維持好友之關係; 後來會比現任男友發現左, 對佢信任少左, 最後個男仔會去移民...!? 睇黎文迪的感情路上太騎驅, 但你都唔好因為呢個占卜而唔開心, 珍惜而家同佢一齊的快樂時光, 唔好想太多!

文迪同時也有問事業, 占卜師話佢而家呢份係長工, 當中仲有一個女上司好鍚佢, 即使文迪想走, 個上司都會挽留佢, 令佢最後都唔會轉工. 而且呢個情況仲會維持八至十年!? 睇黎呢份工真係好長啊!而且中途仲有短期或出外進修機會. 這樣文迪咪有機會唔會再讀呢個課程, 連埋那個佢, 咪有二位唔讀囉!!??唔制呀, 我上堂唔可以見到你會好悶! 而且又唔可以一齊畢業, 會有少少遺憾! 不過前途始終係自己把握, 你認為選擇係正確便可以, 支持你的決定!

之後占卜師問我要不要占卜, 可能我對自己冇信心, 驚占我和蕃薯最後唔可以結婚而令我自己傷心, 驚自己接受唔到呢個事實, 會影響我和佢現時之感情. 既然而家我和佢係開心, 應該珍惜呢段時刻, 唔好比其他外來因素影響. 至於事業, 我相信自己的工作能力及經驗, 應該可以搵到一份人工比現時高少少及同事會比較好的新工. 除左愛情之事外, 我對於其他方面都有d信心, 認為不用占卜去預測未來, 而且我相信人可以改變命運! 係有一次我感情迷失, 唔確定和蕃薯之關係時先占過一次....可能係我對愛情認知唔太深, 或者冇咩經驗先至係這樣吧....

占卜完之後, 我返屋企打邊爐, 而且已經有各種美食等住我, 食得好飽, 之後仲有阿媽燉蛋, 真係好鬼正!!食飽之後沖左涼, 邊聽歌邊設計我送比蕃薯之情人節禮物 -由相識到相戀之故事的繪本的公仔, 最後我都係決定畫Q版, 呢個係初犒 :

哈哈~雖然唔太似(自己D畫功太差添....), 所以先在佢哋件衫上寫個[F]及[K]字..., 希望可在情人節之前完成,以及毎一年都可以送比佢啦!

突如其來之睇戲

今日下午四點幾到, mandy突然在msn度問我同唔同佢及berry睇戲, 本來我屋企人比左幾張[愛鬥大]的贈券我, 但我覺得冇興趣, 於是用我全個星期差唔多約哂人為藉口推左, 點知今日我竟然答應左mandy會去睇, 唔知我會唔會比人鬧呢?

我哋去睇27宜嫁[27 dresses], 故事都有少少普通, 但睇落去又幾好睇, 我自己印象比較深的一幕係女主角以為男記者主角把佢穿哂27條伴娘裙, 刊登在報紙上果部分最好睇...

以及欣賞人物及製作人員時用睇報紙之方式去介紹, 好得意! 總之全套戲都好好睇, 好想再買vcd再睇多幾睇, 或者自己真係好耐冇睇過呢類愛情小品掛, 雖然主角唔係自己, 但已經感受到佢哋的幸福...不過當然希望我和佢, 應該係好多我身邊朋友的情侶, 都可以這樣幸福便好^^

仲有一套係2月14日上映的[p.s. i love u], 唔知佢會唔會同我去睇呢? 不過果日佢出黎同我過先算啦...都係平常心去睇, 我都過左好耐單身情人節, 但我其實希望同佢一齊過! 講左出黎個心舒服d!!!

睇完戲之後, mandy及berry去味千食野, 我因為要慳錢而返屋企食飯, 今日蕃薯好少和我sms, 我毎次打sms比佢, 佢都唔係成日應我, 因為佢之前唔會麻! 我差d嬲左佢, 而且仲好唔開心. 想住佢唔會覆我, 我又開又關電話, 唔知係咪這樣而miss左佢個訊息. 佢個訊息晚上十一點幾send黎, 點知我竟然在十二點先收到, 真係離奇!? 我同佢傾左幾句之後便訓左, 心想[好在冇嬲到佢...]

回復平靜的一天...

mandy突然在我工作時間打電話比我, 通知我原定在星期五做測試的改左星期六, 變左同阿光同一日, 唉~~而且仲和阿光一齊去食午飯, 惟一希望佢唔好再窒我啦....當然係講笑果隻....

今日終於冇街去, 而且都去到窮哂啦, 仲話原本想整樹脂甲的說....所以呢, 都係做返乖乖女, 早d返屋企食飯吧!好耐(只係四日!?)都冇返去食飯, 好掛住媽媽煮的飯! 仍然以多菜少肉為主, 自己都好鍾意, 而且仲好好味!原來可以在家食飯感覺好好...

自從和veron佢哋玩左mario party及奧運會之後, 自己覺得幾得意, 而且自己又冇呢二隻game, 自己download左黎玩, 玩左一陣蕃薯和我sms左幾句, 自己便訓左啦, 對唔住, 唔可以同你傾太耐...

berry相機死而復生!? 浪漫之約會?

呢件事講起上黎都幾長篇...話說berry某天唔小心爛左相機個塊鏡, 之後令到部相機影唔到相, 於是佢星期六在msn上搵蕃薯幫手整返, 但蕃薯似冇答覆佢, 於是我叫我幫佢問. 我問蕃薯可唔可以幫我整, 順便可以見多我一面, 佢就即刻應承左...態度未免差得太遠吧!??最後我哋決定左在星期二去蕃薯屋企幫佢整相機!

今日去整相機啦, 我和berry原定想一齊食完飯先去蕃薯屋企, 可惜我媽媽在今朝話我成日出去食飯又哂車及食飯錢, 語氣開始有d唔鍾意, 所以我應承媽媽今晚無論幾時返都會返屋企食飯, 所以最後都係唔同你食飯, 要你捱餓! 對唔住><

後來得知波特今日又黎蕃薯屋企, 佢話我哋睇女仔野, 所以自己先去睇相機用品, 一陣再和我哋集合. 我和berry去左西九龍中心睇野先, 點知係冇咩野行, 悶鬼死, 我哋一早行完便去搵波特, 佢話佢今日原來請左半日假, 先和朋友去樓上cafe食下午茶, 之後周圍行下及八到我哋整機之事, 所以佢都跟埋黎. 冇所謂啦, 點都冇得同蕃薯二人世界, 多d人黎仲開心...我哋三個企在地鐵站後等蕃薯, 佢終於黎到啦! 我哋可以去佢屋企度整相機^^

終於去到佢屋企, 要為berry整相機啦, 唔知點解連我都緊張, 可能驚玻璃整到佢隻手掛!?我當然唔好放過呢個機會影相, 等我影下相先 , 但佢唔鍾意比人影, 所以我冇開閃光燈影, 黑黑地....

大家聚精滙神睇住蕃薯整機....

berry仲笑話蕃薯幫部相機做手術, 問佢要唔要抺汗, 哈哈~係都佢媽媽幫佢做啦...最後終於整完部機, 部機最後都冇事, 太好了! 連我開心到彈起左^^

手術之後的殘骸....

berry試下機先啦, 佢話自己終於影到相啦!

跟住蕃薯仲有第二個小手術, 就係幫波特部相機抺鏡頭, 佢哋講到個過程好似幾複雜, 我都唔太明, 總之我負責影相便是啦!
先研究下部相機先?

連berry部機都可整返, 抺鏡頭當然難唔到佢. 做完相機手術之後佢哋又打機啦, 我和berry從旁睇住. 直至十一點幾我哋開始各自返屋企...

在呢一刻, 我終於可以和蕃薯二人世界, 勁開心! 我見冇人即刻橋住佢隻手, 佢感覺到我好凍, 全身震哂, 於是佢攬住我, 仲問我肚唔肚餓添, 跟住佢突然kiss左我!? 我連kiss的力氣都冇囉, 只係一直挨住佢. 之後佢叫我去seven買食物頂住肚先, 我堅持不用....

本來真係幾浪漫, 點知我哋講開去阿駿個camp時就出事, 講話個camp好似冇熱水爐, 只有熱水沖涼, 點知佢突然講左句[我哋一齊沖涼咪得, 可以慳返d火及水...]我被佢呢句嚇呆左, 跟住大聲講句[唔係掛!?], 我當然叫佢同男仔沖涼, 點知佢話同我熟d, 比d路人聽到就唔好啦....講講下就講左我和佢同房咪死, 我要加床位同女仔訓, 佢竟然用之前某次同佢講過的sms, 話在佢身邊就好呢句希望我可以和佢度過一晚(唔係衰野, 大家唔好亂估)....遲d先算啦, 我咩都唔知...

之後有車黎到, 我和佢也要分開啦. 佢用sms話自己係大壞蛋, 我於是答佢, 我除左其他(壞)男人唔鍾意, 只係鍾意你呢個壞蛋囉, 其餘佢自己想像啦!

多謝靜靜餐晚飯^^

今日放工之後終於可以見到靜靜, 以及佢會為我煮餐飯, 我卻只係[兩蔬蕉], 唔好意思先! 我惟有帶個人去食飯=_="

放工之後本來想坐小巴黎你度, 因為佢價錢平d, 可惜當時係放工時間, 最後都係坐返地鐵, 在石硤尾落車, 再走上那充滿中學回憶之斜路, 邊行邊想住大家之事, 如果可以回到過去, 究竟好唔好呢? 如果回到過去, mandy, 蕃薯藤及全班IVE同學仔或者會在我腦海消失, 生存在各自的時空, 係咪而家其實好d呢? sweet的愛情, 同學及好友之關心, 一切感覺難以忘記...

終於去到靜屋企, 我竟然忘記佢住幾多樓及門戶號碼, 惟有打電話去確認...幾經辛苦終於黎到, 見佢準備緊晚飯材料, 我邊睇住佢煮飯, 又講起佢過去之回憶, 既傷感, 不過都有部分好笑...佢和階級男之事, 都係順其自然...

最後佢終於煮好, 比大家睇下先~

豬肉煮豆腐~~ 個人認為係最好食果樣, 尤其係豆腐^^

白炒白菜~~本來靜話想買娃娃菜, 買唔到, 不過咩菜我都食, 放心^^

豬肉釀豆卜~~味道淡左少少, 但都好好味!

香怱蒸小石斑 ~~雖然少肉, 但好滑..

靜媽親自打的魚肉釀燈籠椒 ~~好好味呀!!

見到靜屋企有我至愛之花其中一類, 蝴蝶花. 等我影底佢先!

靜拿佢朋友在澳門買比佢的肉鬆鳳凰卷及買左士多啤梨我及一陣黎的蔡蔡食, 真係唔話得. 點解我話蔡蔡一陣黎呢? 因為佢份工放九點麻, 好耐都冇見過佢, 而且佢之前又打電話比我, 問我剪咩髮型, 所以好想見到佢! 最後佢終於黎左, 見到個髮型改變唔多, 不過知佢剪左髮囉! 都幾好睇呀^^但係你要食返多d野啦, 真係瘦左好多!

我哋都係傾埋大家之感情生活, 睇黎我和蔡蔡都幾好, 仲有蔡一定受佢男友影響啦, 問我psp有什麼遊戲玩, 其實我都冇咩玩, 因為掛住見朋友及拍拖麻!

至於靜呢~佢在蔡未黎之前比左二件衫我睇, 一件深粉紅, 一件黑色, 問我穿邊件去見階級好, 本人就覺得黑色好睇, 唔知佢最後點認為呢? 仲有階級男在泰國買比佢果三本簿??雖然靜鍾意寫作, 但冇理由送埋呢d野比女仔??仲有果支難聞都飛起的香水, 在杜拜買. 其實靜係咪真正鍾意呢?佢冇講到...

在臨走之前睇左電視, 話牛拍葉點樣由黑轉白, 原來落左哥士的...之類化學物料, 在過程之中牛柏葉會起泡, 總之係漂白佢. 過程好得核突, 好在自己唔多食佢, 唔係一定嚇死....

最後都係自己行返去地鐵站坐車回家, 又同蕃薯sms, 佢話自己屋企好凍, 仲問我凍唔凍添! 我自己唔怕凍, 冇咩所謂, 你要小心d啦~期待明天我哋又見~