突如其來之睇戲

今日下午四點幾到, mandy突然在msn度問我同唔同佢及berry睇戲, 本來我屋企人比左幾張[愛鬥大]的贈券我, 但我覺得冇興趣, 於是用我全個星期差唔多約哂人為藉口推左, 點知今日我竟然答應左mandy會去睇, 唔知我會唔會比人鬧呢?

我哋去睇27宜嫁[27 dresses], 故事都有少少普通, 但睇落去又幾好睇, 我自己印象比較深的一幕係女主角以為男記者主角把佢穿哂27條伴娘裙, 刊登在報紙上果部分最好睇...

以及欣賞人物及製作人員時用睇報紙之方式去介紹, 好得意! 總之全套戲都好好睇, 好想再買vcd再睇多幾睇, 或者自己真係好耐冇睇過呢類愛情小品掛, 雖然主角唔係自己, 但已經感受到佢哋的幸福...不過當然希望我和佢, 應該係好多我身邊朋友的情侶, 都可以這樣幸福便好^^

仲有一套係2月14日上映的[p.s. i love u], 唔知佢會唔會同我去睇呢? 不過果日佢出黎同我過先算啦...都係平常心去睇, 我都過左好耐單身情人節, 但我其實希望同佢一齊過! 講左出黎個心舒服d!!!

睇完戲之後, mandy及berry去味千食野, 我因為要慳錢而返屋企食飯, 今日蕃薯好少和我sms, 我毎次打sms比佢, 佢都唔係成日應我, 因為佢之前唔會麻! 我差d嬲左佢, 而且仲好唔開心. 想住佢唔會覆我, 我又開又關電話, 唔知係咪這樣而miss左佢個訊息. 佢個訊息晚上十一點幾send黎, 點知我竟然在十二點先收到, 真係離奇!? 我同佢傾左幾句之後便訓左, 心想[好在冇嬲到佢...]

回復平靜的一天...

mandy突然在我工作時間打電話比我, 通知我原定在星期五做測試的改左星期六, 變左同阿光同一日, 唉~~而且仲和阿光一齊去食午飯, 惟一希望佢唔好再窒我啦....當然係講笑果隻....

今日終於冇街去, 而且都去到窮哂啦, 仲話原本想整樹脂甲的說....所以呢, 都係做返乖乖女, 早d返屋企食飯吧!好耐(只係四日!?)都冇返去食飯, 好掛住媽媽煮的飯! 仍然以多菜少肉為主, 自己都好鍾意, 而且仲好好味!原來可以在家食飯感覺好好...

自從和veron佢哋玩左mario party及奧運會之後, 自己覺得幾得意, 而且自己又冇呢二隻game, 自己download左黎玩, 玩左一陣蕃薯和我sms左幾句, 自己便訓左啦, 對唔住, 唔可以同你傾太耐...

berry相機死而復生!? 浪漫之約會?

呢件事講起上黎都幾長篇...話說berry某天唔小心爛左相機個塊鏡, 之後令到部相機影唔到相, 於是佢星期六在msn上搵蕃薯幫手整返, 但蕃薯似冇答覆佢, 於是我叫我幫佢問. 我問蕃薯可唔可以幫我整, 順便可以見多我一面, 佢就即刻應承左...態度未免差得太遠吧!??最後我哋決定左在星期二去蕃薯屋企幫佢整相機!

今日去整相機啦, 我和berry原定想一齊食完飯先去蕃薯屋企, 可惜我媽媽在今朝話我成日出去食飯又哂車及食飯錢, 語氣開始有d唔鍾意, 所以我應承媽媽今晚無論幾時返都會返屋企食飯, 所以最後都係唔同你食飯, 要你捱餓! 對唔住><

後來得知波特今日又黎蕃薯屋企, 佢話我哋睇女仔野, 所以自己先去睇相機用品, 一陣再和我哋集合. 我和berry去左西九龍中心睇野先, 點知係冇咩野行, 悶鬼死, 我哋一早行完便去搵波特, 佢話佢今日原來請左半日假, 先和朋友去樓上cafe食下午茶, 之後周圍行下及八到我哋整機之事, 所以佢都跟埋黎. 冇所謂啦, 點都冇得同蕃薯二人世界, 多d人黎仲開心...我哋三個企在地鐵站後等蕃薯, 佢終於黎到啦! 我哋可以去佢屋企度整相機^^

終於去到佢屋企, 要為berry整相機啦, 唔知點解連我都緊張, 可能驚玻璃整到佢隻手掛!?我當然唔好放過呢個機會影相, 等我影下相先 , 但佢唔鍾意比人影, 所以我冇開閃光燈影, 黑黑地....

大家聚精滙神睇住蕃薯整機....

berry仲笑話蕃薯幫部相機做手術, 問佢要唔要抺汗, 哈哈~係都佢媽媽幫佢做啦...最後終於整完部機, 部機最後都冇事, 太好了! 連我開心到彈起左^^

手術之後的殘骸....

berry試下機先啦, 佢話自己終於影到相啦!

跟住蕃薯仲有第二個小手術, 就係幫波特部相機抺鏡頭, 佢哋講到個過程好似幾複雜, 我都唔太明, 總之我負責影相便是啦!
先研究下部相機先?

連berry部機都可整返, 抺鏡頭當然難唔到佢. 做完相機手術之後佢哋又打機啦, 我和berry從旁睇住. 直至十一點幾我哋開始各自返屋企...

在呢一刻, 我終於可以和蕃薯二人世界, 勁開心! 我見冇人即刻橋住佢隻手, 佢感覺到我好凍, 全身震哂, 於是佢攬住我, 仲問我肚唔肚餓添, 跟住佢突然kiss左我!? 我連kiss的力氣都冇囉, 只係一直挨住佢. 之後佢叫我去seven買食物頂住肚先, 我堅持不用....

本來真係幾浪漫, 點知我哋講開去阿駿個camp時就出事, 講話個camp好似冇熱水爐, 只有熱水沖涼, 點知佢突然講左句[我哋一齊沖涼咪得, 可以慳返d火及水...]我被佢呢句嚇呆左, 跟住大聲講句[唔係掛!?], 我當然叫佢同男仔沖涼, 點知佢話同我熟d, 比d路人聽到就唔好啦....講講下就講左我和佢同房咪死, 我要加床位同女仔訓, 佢竟然用之前某次同佢講過的sms, 話在佢身邊就好呢句希望我可以和佢度過一晚(唔係衰野, 大家唔好亂估)....遲d先算啦, 我咩都唔知...

之後有車黎到, 我和佢也要分開啦. 佢用sms話自己係大壞蛋, 我於是答佢, 我除左其他(壞)男人唔鍾意, 只係鍾意你呢個壞蛋囉, 其餘佢自己想像啦!

多謝靜靜餐晚飯^^

今日放工之後終於可以見到靜靜, 以及佢會為我煮餐飯, 我卻只係[兩蔬蕉], 唔好意思先! 我惟有帶個人去食飯=_="

放工之後本來想坐小巴黎你度, 因為佢價錢平d, 可惜當時係放工時間, 最後都係坐返地鐵, 在石硤尾落車, 再走上那充滿中學回憶之斜路, 邊行邊想住大家之事, 如果可以回到過去, 究竟好唔好呢? 如果回到過去, mandy, 蕃薯藤及全班IVE同學仔或者會在我腦海消失, 生存在各自的時空, 係咪而家其實好d呢? sweet的愛情, 同學及好友之關心, 一切感覺難以忘記...

終於去到靜屋企, 我竟然忘記佢住幾多樓及門戶號碼, 惟有打電話去確認...幾經辛苦終於黎到, 見佢準備緊晚飯材料, 我邊睇住佢煮飯, 又講起佢過去之回憶, 既傷感, 不過都有部分好笑...佢和階級男之事, 都係順其自然...

最後佢終於煮好, 比大家睇下先~

豬肉煮豆腐~~ 個人認為係最好食果樣, 尤其係豆腐^^

白炒白菜~~本來靜話想買娃娃菜, 買唔到, 不過咩菜我都食, 放心^^

豬肉釀豆卜~~味道淡左少少, 但都好好味!

香怱蒸小石斑 ~~雖然少肉, 但好滑..

靜媽親自打的魚肉釀燈籠椒 ~~好好味呀!!

見到靜屋企有我至愛之花其中一類, 蝴蝶花. 等我影底佢先!

靜拿佢朋友在澳門買比佢的肉鬆鳳凰卷及買左士多啤梨我及一陣黎的蔡蔡食, 真係唔話得. 點解我話蔡蔡一陣黎呢? 因為佢份工放九點麻, 好耐都冇見過佢, 而且佢之前又打電話比我, 問我剪咩髮型, 所以好想見到佢! 最後佢終於黎左, 見到個髮型改變唔多, 不過知佢剪左髮囉! 都幾好睇呀^^但係你要食返多d野啦, 真係瘦左好多!

我哋都係傾埋大家之感情生活, 睇黎我和蔡蔡都幾好, 仲有蔡一定受佢男友影響啦, 問我psp有什麼遊戲玩, 其實我都冇咩玩, 因為掛住見朋友及拍拖麻!

至於靜呢~佢在蔡未黎之前比左二件衫我睇, 一件深粉紅, 一件黑色, 問我穿邊件去見階級好, 本人就覺得黑色好睇, 唔知佢最後點認為呢? 仲有階級男在泰國買比佢果三本簿??雖然靜鍾意寫作, 但冇理由送埋呢d野比女仔??仲有果支難聞都飛起的香水, 在杜拜買. 其實靜係咪真正鍾意呢?佢冇講到...

在臨走之前睇左電視, 話牛拍葉點樣由黑轉白, 原來落左哥士的...之類化學物料, 在過程之中牛柏葉會起泡, 總之係漂白佢. 過程好得核突, 好在自己唔多食佢, 唔係一定嚇死....

最後都係自己行返去地鐵站坐車回家, 又同蕃薯sms, 佢話自己屋企好凍, 仲問我凍唔凍添! 我自己唔怕凍, 冇咩所謂, 你要小心d啦~期待明天我哋又見~

好友聚集之時, 打機之日 + 突如其來之蕃薯

今日約左veron,eva,蕉及管運雨食晚飯. 我一早到左集合地點等大家時,蕃薯藤在sms度話佢想在我食完飯之後見到我,但我唔知食到幾多點,我唔想佢特登黎旺角搵我哂車錢,不過我其實好開心,因佢竟然主動在夜晚出黎搵我.而且我有早走之打算,於是我一向各位好友說明,唔好意思呢~

由於蕉冇我blog網址, 所以佢聽到我有男友時鄧我開心,而且仲問佢做咩職業等等,又問我近況,多謝你關心及鄧我開心^^不過由於佢卜左在九代果間日本料理食,所以佢先行去果度,我只好在原處等eva,veron及管運雨.eva及veron黎到時,我比左星期六在城門水塘影的相比佢哋二個睇,齊人之後便去九代!途中管運雨問我,可不可以比個blog的網址佢,我覺得我和佢根本唔太熟,而且blog係自己私人野,最後我都冇比到佢,sorry!

終於去到九代,見到阿蕉已經坐定定等我哋,我哋開始叫食物.其實我哋都叫左幾多食物,但唔知大家係咪太肚餓呢?好少食物可以比我影到相,只係剩下二位[幸運食物]比我影到,分別係:

什錦壽司, 可惜冇三文魚及海膽...

鰻魚及八爪魚壽司, 可惜全部比那位人兄食哂, 都係因為我哋四個掛住打機之過....我哋打咩機? 之唔係又係nds囉! 今次我哋四個都帶左自己果部黎^^

我果部(有個啡色公仔)其實係粉紅, 只係我呢位懶惰及輸主人未得閒買返個套比佢, 真係對佢唔住, 好快會買返...

好, 多謝四位幫我拿起部機比我影相, 四部主角都好靚仔靚女(汗). 我今日先知道, 原來我冇下載的遊戲, 只要拔開張R4咭便可玩到, 自己真係大鄉里=_="我哋玩左mario party, mario北京奧運會及cooking mama2. 講下我對毎隻遊戲之感受 :

mario party: 遊戲勁好笑, 又抵死, 我哋仲成日玩到大叫及大笑起黎...真失禮. 連玩得最多的veron有d遊戲都唔知點玩. 令我最難忘的係二人合作駕車, 我和veron一隊, eva和管運雨, 二人一個要另左太盤, 一個另右太盤先至玩到, 我哋二隊玩到雞手鴨腳, 玩左成四分幾鐘, 我哋仲擔心我哋會唔會冇人玩到呢一部分. 好在最後都會倒數, 我和veron鬼祟地在旁邊去到終點^^果陣有一個想法:[玩game從未如此艱難過!!!]

mario 北京奧運會 :我覺得呢隻麻麻地, 而且又load得好慢....我發覺自己原來係射箭高手!!??好多次都中紅心, 和我真正玩弓箭結果有d出入, 可能真正的弓太重了....

cooking mama2 :我成日玩的遊戲, 四人對戰幾抵死, 我都係險勝拿個第一, 估唔到eva都幾勁, veron都唔弱, 不過蕉就要努力d!!

唔知係咪我哋五個玩得太嘈, 定係日本餐廳多人食飯, 我哋要轉移陣地, 去到一間spoopy cafe再玩過, 果度d蛋糕好美, 但係好貴, 最後我都係選擇...影底佢算吧!

好在呢度唔使限住毎人一定要消費, 即係我一元都冇用過. 我哋玩機時, 蕃薯藤佢send短訊及打電話比我, 佢話自己在上水出黎, 我問佢點解, 佢都支吾以對, 佢話總之一定會搵我. 我好開心及感動呀~~!!你竟然為左我而在好遠地方黎, 你係咪因為掛住我而黎呢? 好耐冇人對我這樣好...多謝你^^

最後我和veron佢哋分別後, 蕃薯都到左mk, 佢話費時在銀中等, 叫我沿住條路和佢相遇, 最後都見到佢, 好開心! 就好似我哋忙忙人海之中相遇一樣, 真係有緣! 我哋先去旺中隔離商場行陣, 途中佢成日用日文話我哋係日本人, 黎香港旅行, 叫我講埋日文, 夠了! 蕃薯先生><我係唔會講架!! 我哋之後去左機舖玩太鼓第十代, 應該係最新果代吧, 起初我唔敢玩, 只係睇住佢玩, 所以先可以影底佢一張相^^ 佢玩太鼓都好型~!!!好啦, 講返呢度先, 見佢玩得好開心, 我後來先至去玩, 原來只係五元, 便可以二個人玩, 勁抵. 至於第八及九代都係一及二元. 蕃薯, 我哋不如得閒黎訓練下, 而且我哋之間又多樣共同興趣...sorry, 好似打機不嬲都係我哋共同興趣之一, 仲有睇時裝雜誌, 行街及化妝, 只係攝影唔係囉!

我哋玩完之後再坐車返屋企, 原來已經十二點!!!!!!!快d返屋企先, 唔係會比媽媽鬧....在車上我哋都係互相挨住對方訓教, 我知你鐘意我頂帽個白色波波啦, 唔好再用佢黎託住你隻耳仔呀, 唔該!

最後返去只係比媽媽話左幾句, 不過唔緊要啦, 可以單獨見面已經好開心^^

城門水塘影相之旅^^

首先我要多謝二位, 好在佢哋比相我, 我先打到呢篇blog, 就係蕃薯藤及阿駿!你哋d相影得好好, 我估自己一定冇呢個好水準.

可能你哋會問, 我都有個相機啦, 點解要人哋比返d相我, 其實講起黎真係好長篇, 我要由開頭講起...

我今日約左蕃薯, 阿駿, 聯, 波特及蕃薯個朋友一行六人去影相, 我哋都好準時到達, 除左蕃薯個朋友之外, 我哋等左佢好耐, 甚至毎個人都去哂toliet, 佢都未到. 最後佢終於到左, 我哋坐小巴去水塘. 去到水塘時, 我本來想即刻影低風景, 因為我係第一次黎!點知我一影相, 全部畫面白哂!!?好鬼核突呀! 跟住我即刻求各位攝影高手幫手, 佢哋影出黎都係白色, 勁無奈....我全程冇得影相(難得的風和日麗及美景!!), 好悲哀(哭), 但最後都跟住佢哋一齊走, 當下自己去郊遊囉!

呢度係門口, 也係我開始知自己部機影外景有事之時...

一齊研究我個相機點解影出黎所有野都係白色. 蕃薯估個快門唔夠快, 或者感光器壞左掛? 真係唔知道, 成為不解之謎..???

大家開始出發, let's go~~!!點解我哋二個又企埋一齊!? 得我一個女仔, 一睇都知我係邊個!

我哋一直沿住山路行, 見到好多樹及草呢d自然景物, 真係好美! 而且空氣真係好清新, 放假我可以黎呢d地方都好^^不過如果有埋相機就好啦...

城門水塘全景, 個日真係海天一色, 令我難忘的其中一個景^^

之後我哋一直再行, 去到另一個好美的景點, 果度有連續三棵橱楓樹, 而且滿地楓葉. 在冬天的一刻, 原來樹林可以好美...我上網睇得多啦, 估唔到可以真實見到..

楓樹全景. 根據阿駿講, 佢d樹葉係楓樹, 但應該唔係純正楓樹. 但係都好美, 係我最喜愛之樹^^

楓樹中距離之照, 真係迷死人囉>_<

好like蕃薯藤呢張用長鏡近距離影的楓樹葉, 尤其係第二果張^^

楓樹剪影, 大家感覺如何呢?

之後波特先生突發奇想, 想我坐在枯葉上影幾張相, 我又見自己冇相機影相, 我就同佢玩下啦^^總比冇野做仲好...

其中二張坐在枯葉上影的相, 估不到枯葉影相出黎個效果幾好. 我只係講d葉, 唔係講我!!

在楓葉之間的近正面照....

枯葉之中的正面遠照. 在呢度想解釋下先, 其實果陣應該有四至五部相機影我, 我都唔知望去邊度, 所以有時見到我對眼唔係望焦點. 在影完呢d相之後, 除左波特幫我改左個[枯葉公主]呢個稱號外(其實我都唔想=_=")外, 我突然想起一個pose, 就係用我身上條絲巾整一些動作, 我拿起條絲巾隨風飄揚, 個結果係點? 大家睇下...

呢個pose係蕃薯個朋友教我架, 唔記得左介紹下佢, 聽講佢係做會計, 只係得閒玩下攝影, 但我見到佢攝影器材都幾pro, 而且呢個pose影出黎真係好過我第一張好多, thx^^

我哋在呢個地方影完相之後, 再轉移陣地影水, 其實我都幾鍾意少少動態的水, 同埋我知道好難影, 所以呢方面交比蕃薯吧啦, 我自己在一旁邊睇佢哋影相, 邊唱住歌算. 我就係趁佢哋影相先至唱, 冇人留意我麻!!類似瀑布之類, 加埋附近枯樹等, 另有一番風味...

小溪流之相, 唔知點解我都係鍾意冬天景物蕭條之氣分, 覺得咩景物都比較美, 甚至連枯樹在陽光之下都好美....

我哋影相睇黎大殃上已經和一後落啦! 我哋起程去搵mandy及berry去唱k, 但去唱k之前, 波特話去買返個相機防潮箱, 於是返出小巴站坐車去深水步先!

本來我都以為阿駿只係影我哋上落車個車站, 點知...請大家留意左下角, 見個個白色帽就係我, 仲有蕃薯藤在我隔離, 連我都唔記得傾緊d咩....算啦, 我哋一行人等左二班車, 第三班車先到我哋上車. 阿駿由於要去今晚中文金曲頒獎禮而同我哋分別啦. 其後我又貪美, 到左荃灣度去toliet及換左條牛仔裙. 當我在toliet出黎時, 蕃薯藤質疑我有冇換衫, 我咪話換左條裙, 佢差點想掀起我條裙黎睇!!??變態架>_<我即刻打佢囉!!

我哋去完花園街同波特及蕃薯朋友買腳架之後, 蕃薯朋友走左, 我哋去左旺角搵左唱k的地方先, 發覺今晚唱k好貴, 在十點前埋單竟然要百二元, 食自助餐仲要加二十元!? 十點之後仲衰, 要成百四元, 又係食自助餐加二十元. 由於太貴的關係, 加上波特話有間餐廳食排餐都只係五十幾元. 最後我哋改變為食飯! 我即刻打電話比mandy, 佢話在九龍塘過黎, 由於間餐廳太隱蔽, 要波特去接佢黎; 而berry因為冇得唱k而唔黎.

其間winnie都有打電話比我, 問我玩得開唔開心, 同埋想要我今日d相, 我一定會比你, 放心~而且我都好肚餓, 我拿拿聲叫左個龍利雞排食, 點知蕃薯又想叫呢個, 原本佢暗示我叫第二個, 但佢又驚我食另一個三文魚唔好食, 又叫我叫返龍利, 玩野咩!?我已經餓到成個[謝]左, 唔好再玩啦...

食物終於都黎到, 果餐廳好鬼得意, 紅白湯一定有, 但排餐的麵包竟然係方包!?而且個排及意粉好得意, 係完完全全分開上, 而且仲好大份...

二塊雞排 + 一件龍利柳, 真係好好食, 雞又滑及鮮嫩; 龍利又軟身!

意粉分開上, 二件食物加埋已經夠抵啦, 真係平, 美, 正!

後來mandy終於黎到, 我有人同我傾計啦!!唔使成日聽住相機, 我哋向佢極力推薦呢個餐比佢食, 整到全枱人都食呢個餐! 我哋食完之後傾左陣計, 講返今日影相d野, 途中影緊十大中文金曲, 我哋可以全班一齊睇, 勁開心, 尤其係e神最後拿哂獎時, 狂唱四大天王, 張國榮, 譚校長之歌曲果度最好睇, 又唱又dance, 勁正! 最後在地下度彈返上黎, 餐廳上各位都大叫, 估唔到有這樣的演出!!!??

食完飯之後我和蕃薯又一齊坐小巴返屋企, 可能今日玩得太累了, 大家互相挨住對方, 手互相緊握住訓覺, 其實果陣我心想, 我自己會不會真係訓左覺, 過左自己屋企個站呢? 唔可以架, 我哋只係在埋一個月, 點可以這樣快去佢屋企過夜>_<唔知係咪真係天意, 架車在中途鄧左一鄧, 我即刻清醒左. 我望住蕃薯藤, 我又要落車...鳴....

好在返去我即刻在msn度上網, 希望可以拿返d相打blog. 又再一次証明我個決定冇錯, 除左得到阿駿及蕃薯藤比相我之外, 仲可以第一次享受十人會議, 連同學仔都話未試過, 真係好開心呢! 大家你一句, 我一句, 都睇唔切係邊個, 其後有d同學仔用手寫板寫字, 勁好笑, 但外觀就.....後來傾到越黎越夜, 同學相繼offline訓教, 我隨後都offline, 蕃薯藤見我off左, 佢也offline訓教.

期待聽日和eva, veron及蕉食飯都開心, 最好個管運雨唔好黎!!!!!勁唔想佢黎!

第二日測試 + 同berry, mandy食飯

在第二日測試之前發生左d小插曲 : 話說我有一條手錬, 其中有個公仔係一個bra, 琴日應該在港大牙醫醫院唔見左. 點知今朝mandy用msn通知我[你個bra在我枱面], 如果一個唔知頭唔知路的人聽到, 實笑死左囉!

講返個測試先, 琴日做的測試基本上唔錯, 都係做返同琴日相同的東西, 由於今日已經不用再講解會個測試之程序, 而且我也好順利完成, 只係用左gigi聲稱的最少時間 -四十五分鐘. 其實仲有一個原因令我做快d, 就係一陣約左berry去食佢朋友在果度工作間日本料理.

做完測試之後, gigi問我琴日和mandy琴晚去左邊度食飯, 佢想介紹在中環某間食越南食物的餐廳比我, 毎碗牛肉麵之類都係三十五元, 仲教埋我點去. 我呢個路痴鬼識去咩, 於是我叫埋gigi同我哋一齊去食, 佢話睇下星期有冇約先至答覆我哋, 因為佢有個朋友就黎走, 唔知邊日會同佢去食飯. 希望唔好係我哋果日啦~期待你比我之答覆^^

我和mandy即刻坐小巴去旺角食飯, 我哋約左佢去瓊華中心十一樓, 去到之後叫到berry, 仲叫左一碟什錦壽司等住我哋, 我仲食左件海膽, 勁正! 之後我哋問berry個朋友cathy有咩好食, 最後叫左一個火鍋及二款食物, 為大家介紹下~

首先當然要介紹呢個日本咖哩火鍋先, 聽cathy話, 呢個係個日本老闆把原本日本風味帶黎香港, 陣陣咖哩香味, 又唔太spicy, 好好味~而且仲有以下配料 :

連埋個火鍋一齊上, 分別有帶子, 尤魚, 雞肉, 以及我唔食的蝦.....不過d食料真係好新鮮^^

呢個係我叫的蛋包飯, 睇日劇見得多啦, 而家終於有得食. 主要食物有蕃茄炒雞飯及煎蛋, 黃色果部分全部都係蛋, 但其實麻麻, 可能係太多茄汁, d蕃茄味好似好假....

好似係豬頸肉簿餅之類, 但唔太好味, 忘記左lu....

除此之外, 我都仲選擇飲品, 我見到有三款飲品好似好好飲, 分別有士多啤梨奶昔, 芒果奶昔及芝麻布甸奶昔, 我明明選左芝麻布甸, 但又被另二隻吸引, 跟住佢哋二個以奶昔話我, 選定左(蕃薯藤)就算, 唔可再選擇其他及三心二意. 到最後我都係選擇返芝麻布甸, 係咪即係意味住我都會選擇返蕃薯藤呢? 放心啦, 我一定會選擇佢^^

都幾好飲呀, 芝麻又香又細滑, 而且仲有布甸的sweet, 二者配合得勁正~

食完飯之後, 我哋又各自回家. 返到屋企之後, 我打電話比阿光, 問佢去唔去聽日影相及去camp, 佢二個都唔去啦, 而且仲笑我聽日影相添, 話我一係掛住蕉在身, 比d猴子走我身旁, 唔好玩啦, 呢個角色都係比你; 另一個叫我扮香蕉, 你哋都明啦, 即係叫我穿哂黃色衫, 我咪笑佢邊有黃色鞋呀, 佢話穿米黃色, 二隻色差好遠啊, 於是佢叫我穿黑色做蕉柄, 呢條友真係激死(講笑果隻), 最後收左佢線!!之後mandy又打電話黎, 問我去唔去唱通宵k, 即係在果度訓教, sorry呀, 唱普通k會去, 通宵未必去啦, 因為我媽佢哋有時見我夜返, 都等我返屋企之後先訓, 唔想佢太擔心我....和mandy傾完電話之後, 蕃薯藤佢send個短訊及打電話比我, 叫我聽日唔好穿高鞋去, 原來佢仲記得我上次影燈飾件事嗎? 你不但好有記性, 而且仲好細心, 抵鍚~~佢仲叫我穿得美d去, 佢又想影我嗎=_="

無論如何, 今晚早d訓覺, 準備及期待聽日城門水塘影相之旅~~!!!