義不容辭幫手!?戀愛係這樣嗎?

放完假之後, 我終於第一天返工, 我便寧願返工, 因為有得msn麻, 哈哈~今日f先生個老闆又唔在度, 佢又可以同我上網傾計啦! 因為講開我完成左cs功課, 要交比winnie佢哋做後期工作而講cs, 我比左自己上色其中幾格比佢睇, 佢睇完之後好唔開心, 因為見到我和阿光做得好認真, 我唔敢講我自己做得美唔美, 呢d係由其他人自己決定!

我教左佢一d上色技巧, 其實自己上色都唔係特別好, 仲話去教人添!但我一聽到f先生話佢哋果組做得好差, 我有一股衝動想幫佢, 一直問佢舊作品情況, 如係咪用木顏色油, 油得深唔深色? 希望可盡量幫佢補救. 但佢話之前作品不可補救, 惟有再畫. 之後我再問佢我是否可幫手, 佢都話唔使...

直到八點幾, f先生突然打電話比我, 問我在邊度, 我當時仲在公司hea緊. 佢竟然話過黎旺角買畫邊用黑筆? 我本來同佢講話我幫佢買, 之後會比返佢. 但佢堅持要過黎, 我哋就約左在八點三十五等...但係...我哋冇約到地點!?我哋最後要在人群之中搵返對方, 好在都搵到! 我哋即刻去中南買筆, 點知f先生又突然話買盒顏色筆玩下, 因為自己有興趣玩!?果盒筆都要成五十幾元, 那麼貴! 我叫佢用阿光盒顏色, 佢又唔願意(=_="")最後佢都買左一盒顏色筆及畫黑邊筆走

我問佢認識上色與否, 佢又唔認識, 於是我話去佢屋企教佢, 佢又話唔使, 驚我會好夜返屋企會冇飯食. 我話拿左佢d草稿返屋企幫佢畫, 佢話唔想我捱夜, 仲話自己做哂會開心d. 算啦, 輸比你啦, 希望你可完成!

在小巴上, 我哋終於唔係坐最後, 我哋冇kiss到. 不過終於拖左手, 互相挨住大家直至落車.....真係唔抵!見面得果好少時間, 但總好過冇得見面^^

同時也發現....戀愛, 真係令人盲目...竟然只想住點可幫到佢, 可以犧牲自己時間及心機...戀愛真恐怖呢~

好想見到...

自從boxing day之後, 幾日都冇見過佢, 好悶呀~本來想除夕見下佢, 但佢又在尖沙咀, 我哋又冇得見面. 今日佢又訓晏d, 成四點幾先至起身, 而且又冇咩理由去佢屋企...

唉~原來冇得見佢係這樣辛苦...惟有在屋企和佢sms吧!但始終都見唔到真人, 都係有d唔開心. 惟有希望快d返學吧!

冇心機打blog, 休息一下先....

大陸點存貨日

今日晨早出門口, 好鬼眼訓呀! 鬼咩! 成六點幾起身, 加上天氣又只有十幾度, 又冷又累, 不過算啦!我在呢年四月都走啦, 呢次係我最後出外工作, 都係同姑姐快快換左衫之後便坐小巴去旺角火車站吧!

我哋去到旺角火車站之後, 我哋去搵埋個客個男會計, 一齊坐車去羅湖, 在車途中大家都冇咩講, 可能大家都眼訓掛? 大家只拿左地鐵站附近拿份報紙各自各睇, 我睇睇下都挨左在姑姐博頭訓左覺....坐左大約一個鐘, 終於到左羅湖, 今次我終於記得我哋點存貨的地方, 係在東笎的長安, 我哋坐直通車, 之後再坐的士, 大約個幾鐘到, 在途中都係做同一個動作, 就係訓教....

終於到左個客間廠, 我和姑姐, 同埋客個會計, 經過廠內人員帶領, 我哋先成間廠行哂, 睇下有咩地方的存貨要點之後, 我和姑姐開始點存貨. 我哋由底層開始點, 毎點毎個地方, 都有成二至三個人跟住自己幫助盤點, 我真係覺得好鬼煩, 因為多數都可以自己一人完成. 講到呢度, 可能大家唔知咩係點存貨, 等我大約講下先 : 其實毎間公司的會計要把毎次出入貨都要入賬, 而我哋呢次去就係睇下個客有冇入漏貨, 點下貨品數量是否齊全.

呢次d人在點存貨時或者功夫唔夠足, 有時會見到有人簽漏名, 不過呢樣都算, 我仲見到有張點貨物紙所寫之數量與現貨不對, 我話左比我姑姐知, 我姑姐之後再計算總數, 好在總數冇錯, 只係寫錯數量, 但已經好似好大件事, 有成五至六個員工走黎睇, 我應該發現這錯處嗎? 好似好serious...

由於呢年存貨比往年少, 我哋在大約四點幾已經全部完成. 我姑姐見仲有時間, 我哋去羅湖商業城行左一陣, 唔知係咪d[人仔]貴左, 加上果度d價錢差唔多, 真係唔抵囉! 我哋在菜肉市場買左d餃子及小龍包, 都係五元六隻, 個餃子都仲ok, 起碼都仲有d好食; 但個小龍包外面個皮厚到死, 真係[包]黎!入面d肉又唁唔新鮮, 真係食一次夠哂!

最後我買左一條二十元黑色7分褲及一條手錬, 條錬好過隱, 係女性內衣及其他飾物. 起初我以為問姑姐借錢買, 後來先講我知係我幫姑姐做數時所搵的錢買, 總之買貴d!!
後來返左黎香港, 開返個電話, 第一樣野見到...f先生比左個短訊我, 內容話 :[kumi在大陸一定工作得好辛苦了....我今日都好忙....但..好掛住你tim], 我見到呢句, 我當時成個呆左, 係開心到呆左果隻, 黎唔切反應....我都係第一次收到呢類sms, 我即刻覆返佢.本來想同佢一齊渡過除夕, 但佢又同朋友去食飯, 不過佢話有時間會去搵我, 聽住先啦!我自己一個只好返屋企同屋企人打邊爐

直到十二點, 新年終於黎到, f先生在尖沙咀, 由於睇完幻彩詠香江, 尖咀塞滿哂人, 地鐵口又封鎖哂, 佢被迫行到旺角坐車返屋企, 佢返屋企途中我哋一直有傾電話, 雖然係斷斷續續, 但都非常開心....佢成二點幾先返屋企, 我好眼訓啦, 訓教先...

都叫完成cs功課

今日下午我哋三個約左一點在返琴日間cafe等, 我就一早去到, 但阿光及susuki未到, 於是我在果度睇住漫畫等佢哋二個黎. 我冇叫到飲品, 因為佢哋唔黎點算呀? 我銀包真係冇哂, 都係唔好講埋d羞家野...大約半個鐘, 佢哋二個終於黎到

阿光話夜晚要睇死亡筆記, 所以仲有d未畫完, 在cafe立即叫左食物之後再畫, 我就修補自己上色部分; 而susuki就畫住少少邊先. 後來佢哋工作完成哂, 只有我上色, 佢哋一個拿住部nds, 一個拿住ipod睇[茶煲阿四]. 呢二件事我都想做呀(>_<)不過佢哋願意陪我上色至到夜晚7點都好, 多謝你哋二位!而家比住我部分作品大家睇先 , 影得blur左d, 大家唔好介意....

呢五張都係叫做呢份功課之中好d果幾張, 全部26張由我一個人上色, 真係上色上到死左, 大約都用左十個鐘頭到, 估唔到自己好有恒心去完成!其實我都好討厭上色, 我寧願做畫果個囉! 而家令我對木顏色筆有d害怕添!

做完cs功課之後, 由於我明天要去大陸點存貨, 所以我去左姑姐度訓一晚. 姑姐仲煮左我至愛的烏冬, 好野~!!原本我想做埋cs, 點知六叔在屋企用左張枱做佢自己野, 在我冇得做功課的情況之下, 我惟有幫我姑姐做audit功課寫文章....好耐冇寫過英文, 寫到我嘔血, 不過為左姑姐就算啦!

途中我當然有和f先生sms啦, 話比佢知我因明天要早起身而早訓教, 點知佢竟然打電話比我, 叫我穿多d衫, 小心返大陸冷親, 我叫佢你都係啦, 而家開始冇咳, 唔好再冷親. 而且佢仲答應我星期六上完攝影堂之後會幫我做攝影功課, 其實佢第二日都要做佢自己果份攝影功課, 佢一定好辛苦架!佢仲講笑話我份功課係全班第二份至美, 第一份至美!?...當然係佢果份啦!不過我都希望佢唔好太辛苦啦, 都係星期六先至算啦!

同佢傾左二十分鐘電話之後, 佢叫我早d訓..但我又衰, 想睇埋[茶煲阿四]先至訓教...惟有睇下自己可否聽日早起身!???

開始做cs功課

今日同五位組員:阿光, 阿ling, ryan, winnie及susuki 去左做cs功課, 去左一間cafe 度商討cs最後一份功課 -storyboard. 等我講下呢樣係咩黎先, 其實佢係逐格畫返全個故事, 仲要上埋色....果然係個難度, 我哋最後定好毎個人在角色 :

阿光 : 畫畫超勁的佢當然畫果部分啦!不過唔該唔好見我和f先生sms而話我哋, 好嗎?努力d畫好過啦!

susuki :當阿光畫完及我做第二次修改之後, 佢負責用黑色類似marker畫邊, 對整幅畫都好重要架, 小心d!

winnie, 阿ling, 壞人 : 你哋負責後期工作吧! 你哋點整個storyboard話之你哋啦~

至於我呢? 哈哈~照以上的描述, 我做的當然係優差啦! 就係...上色及第二次修改阿光d畫囉!等阿光仲成日話我添!

可惜我哋用左成日時間都唔可以完成, 後期製作部d人可以等我哋完工, 我, 阿光及susuki要明天再約出黎做功課. 唉....真係慘呢...我再出黎工作冇咩問題, 但最弊我要用錢麻!!!!我呢個月已經冇錢啦, 真係唔知點死囉!好在之前有老闆比我果一千元, 當然我唔會用哂啦! 要用黎交學費架!惟有希望公司快d出糧比我....

終於拿返自己同學班相

在呢個月尾, 我終於有時間打blog及做自己野, 當我打blog時, 發覺自己有好多和同學仔的合照都冇, 在msn又見到波特先生, 於是咪同佢傾幾句, 同埋拿返d相囉, 而家放在呢度比大家睇下先~呢張係在上完cs堂, mandy在受傷之後第一日返學影...點解我會企在後排架?仲要比f先生整我牛角添!?(怒)

呢張係英文最後一堂影, 我真係幸福啦, 左擁mandy, 右擁tracy, 男人便不能做到呢...而且我困陣未同f先生正式在一齊, 原本同學仔叫我哋企埋一齊合照, 最後都冇一齊企到影相...但我有二美女在身邊, 算數啦!

最後拿左呢一張, 在boxing day大家齊人時影, 由於之前我和f先生在放假時已經約會左幾次, 所以都唔介意二個坐埋一齊合照啦, 仲帶住對騎呢眼鏡...

總之呢次真係辛苦哂波特先生, 我估應該冇漏掛? 至於影燈飾果張我已經問左f先生拿, 期待可再影多d合照^^我和波特先生講多謝之後, 佢竟然話我比佢影十張相(交功課)便算...!?咪玩啦! 我先唔會做你model呢, 因我呢份功課要影自己麻....

抒情小品!?應該算係掛?

其實愛情到底係咩呢? 直至而家我才能真正接觸過, 呢種感覺似遠若近, 觸摸不到, 既固定又似非固定, 一切只能用心去感受, 領會.....只要自己全心全意去愛佢, 真正內心了解佢及知道他實際需要便可以, 而且係不問回報, 不希望他對你付出的愛的比例完全和你相同, 而係你為佢付出幾多, 不問任何回報, 惟一要求的係那男友真心及只喜歡自己一個便足夠了.其實在要求男友為你付出之同時, 你自己又可為他付出幾多呢?....在這個過程中, 自己本身懂得愛自己, 保持自己心境純正及開朗, 存在一份不但對情人的愛, 還有對家人, 朋友, 甚至係大自然的愛, 用愛去擁抱一切.

夜欄人靜, 工作過後, 我無時無刻都想起你, 滿腦子盡是與你愉快度過之回憶, 雖是短暫, 卻是人生之中最美好, 難忘之回憶..希望與你度過毎一段人生, 一齊分享悲與喜, 分擔各人之痛苦及苦惱, 與其只有你苦惱, 倒不如二人在苦惱, 也許這一刻我未能幫助你, 但願能成為你最忠實, 對你不離不棄的聆聽者, 甚至成為你內心之支柱...相反地, 我也會毫不保留地向你分享一切, 你不用想盡方法去幫助我, 只要你寧靜地在我身旁, 支持, 鼓勵及安慰我已經足夠...

而家都係轉返channal先!!哇!? 好耐冇打過愛情散文, 真係難頂到暈...!?但其實唔係自己無聊, 而係有感而發, 講出自己的心情, 在blog上打出黎, 或者睇的人唔多, 但總算可抒發自己感情, 而家講左出黎個心都舒服d! 有時打下呢d抒發心情的文章都幾多, 但唔知下次係幾時呢?