抒情小品!?應該算係掛?

其實愛情到底係咩呢? 直至而家我才能真正接觸過, 呢種感覺似遠若近, 觸摸不到, 既固定又似非固定, 一切只能用心去感受, 領會.....只要自己全心全意去愛佢, 真正內心了解佢及知道他實際需要便可以, 而且係不問回報, 不希望他對你付出的愛的比例完全和你相同, 而係你為佢付出幾多, 不問任何回報, 惟一要求的係那男友真心及只喜歡自己一個便足夠了.其實在要求男友為你付出之同時, 你自己又可為他付出幾多呢?....在這個過程中, 自己本身懂得愛自己, 保持自己心境純正及開朗, 存在一份不但對情人的愛, 還有對家人, 朋友, 甚至係大自然的愛, 用愛去擁抱一切.

夜欄人靜, 工作過後, 我無時無刻都想起你, 滿腦子盡是與你愉快度過之回憶, 雖是短暫, 卻是人生之中最美好, 難忘之回憶..希望與你度過毎一段人生, 一齊分享悲與喜, 分擔各人之痛苦及苦惱, 與其只有你苦惱, 倒不如二人在苦惱, 也許這一刻我未能幫助你, 但願能成為你最忠實, 對你不離不棄的聆聽者, 甚至成為你內心之支柱...相反地, 我也會毫不保留地向你分享一切, 你不用想盡方法去幫助我, 只要你寧靜地在我身旁, 支持, 鼓勵及安慰我已經足夠...

而家都係轉返channal先!!哇!? 好耐冇打過愛情散文, 真係難頂到暈...!?但其實唔係自己無聊, 而係有感而發, 講出自己的心情, 在blog上打出黎, 或者睇的人唔多, 但總算可抒發自己感情, 而家講左出黎個心都舒服d! 有時打下呢d抒發心情的文章都幾多, 但唔知下次係幾時呢?

同學仔見面之日

我和f先生做咩成日都要一齊出動架?連呢次約好同學仔打羽毛球都係...我哋約埋在旺角地鐵站等, 之後一齊去搵路, 行左好多路先至到我, 簡直係已經做左運動先至去啦!

我哋最後終於到左運動場, 但果度有二個室內運動場, 經f先生問左波特先生?之後, 我見到mandy已經企在門口出面等我啦, 多謝你啊~等我都補送返份聖誕禮物比你先, 咪走啊~!!最後我都送左其中一份禮物比好友啦, 好開心!跟住我和f先生咪落場打下波先, 點知比個管理員話一定要穿波鞋打, 最後f先生除左對鞋打, 同mandy一隊, 波特先生決定用雙拍, 而我呢...都係周圍影下相同打氣啦!呢張相其實好難影, 仲要影到f先生jump起左打羽毛球, 連波特先生都讚我有攝影天份~(其實只係撞彩...)

仲有無聊地影的羽毛球用具...弊啦, 果個拍其實係壁球!? 我影黎做咩呀?

好啦, 講返mandy果邊打波先....吓!?f先生在度做咩呀?冇眼睇囉, 大家自己睇下啦~ 好心佢就學下mandy及波特先生認真打波啦!!!
打完波之後, 我哋等各球員?換衫之後, 在門口出面等. 點知班男仔掛住玩相機, 我都冇興趣理佢哋, 後來我見到有個可愛的細佬男仔, 於是我走過去同佢玩下, 後來家姐都走埋過黎, 可能細佬男仔怕[生寶], 起初好怕走到我附近, 後來先跟住我周圍玩; 至於家姐呢, 就熱情好多囉, 佢做咩動作我都跟住做, 自己成個大細佬跟住佢哋玩....哈哈...好耐都冇試過這樣開心, 後來我問左麻麻, 佢話男仔就歲半, 家姐就四歲, 家姐好似叫ruby架; 而且仲知佢哋一家人一齊黎玩, 仲有媽媽, 姑姐添...真係想返我以前, 屋企人都好鍾意帶我及弟一齊去玩, 所以這種感覺好令人懷念...那時的我無憂無慮, 真係好開心...最後我幫佢哋二姐弟拍照, 佢哋真係好得意!佢哋最近終於跟屋企人走左, 好唔捨得佢哋呀(>_<)最後波特同我講, 叫我轉職做幼稚園教師!?唔係掛?不過我又幾鍾意佢哋, 同佢哋玩真係好開心, 可以忘記一切煩惱...不過比其他同學仔見到我個大細佬樣....!?似乎唔係太好..

跟住我哋成班同學一齊去食飯, tracy都會同埋我哋一齊, 好野!!我哋最後去到新世紀美食廣場食飯, 由於我, tracy及ling一早食左野, 可以三人share一個套餐, 雖然最後係唔好食...但見平就算啦!當中波特先生提議去f先生屋企打機. 唔好啦掛!?我唔想又去多次, 當然我冇講出黎...

好在最後都係去返唱k, 我哋唱happy hour, 毎位盛為75元...波特先生自告奮勇去附近幫同學仔買飲品, 而f先生在出面等佢. 我哋理你呀, 我哋成班入去坐住先~之後f先生竟然打電話問我, 我哋在邊間房唱k, 點解會問我架?是但啦! 呢間k房好在一樣野, 就係有獨立廁所, 勁正!

一開始有工作人員拿d禮物比我哋, 我貪得意全部帶哂在我頭度玩, 結果咪...都幾騎呢下!都唔知點解我鍾意埋d騎呢野, 仲要比人睇添!我哋途中當然唱k多, 而且仲點互相點左d大家唔認識的歌, 我當然點日文歌, 但f先生一定認識, 因我哋都like YUI, 波特先生點左首粵曲, 我哋真係投降囉~我至怕聽呢d歌, 仲有f先生點mika!?算啦, 你一定唱唔到...至於其他人就正常d, 阿駿唔使講, 一定點joey的歌; f先生一定點側田, 仲有男人ktv添!佢明明話唔認識唱, 點解會識唱架? 唱左我對側田的至愛歌曲! 其他同學仔都係唱舊歌多, 都唱得幾好聽!

至於我點左咩歌呢? 估唔到我點左男仔歌, 其中一首係陳柏宇的固執, 當去到呢首時, 我咪開始唱囉, 點知f先生話呢首歌好呀, 於是佢又唱埋一份. 弊啦!我哋大哂計啦, 成班同學仔出哂k房, 只剩下我和佢二人在度唱, 仲要一直唱到尾!? 之後先叫返佢哋返入黎, 一齊影左相之後. 我,f先生, 阿ling, 波特及及阿聯一齊走人時, winnie及阿光都黎左, 我哋全班黎個大合照, 我等波特send返比我啊, 因為張相我帶左副紅色閃光眼鏡, 而f先生起初較好相機準備影大合照, 跟住同學仔要佢在我隔離影相之餘, 仲要帶埋另一副藍色閃光眼鏡, 估唔到佢竟然二樣都做!?咪即係....默認我哋之間的關係嗎?(一睇都知邊個係我哋二個)

影完相之後, 我哋各散東西, 最後佢哋三個走左之後, 我和f先生又開始約會啦, 但我因為冇錢而要去地鐵站拿錢, 點知見到波特先生!?原來佢好聰明, 估到我哋一定會黎拿錢嗎? 好在冇比佢見到我橋住f先生隻手行街! 拿完錢, 傾左幾句之後, 我哋一齊去個三十幾元的晚餐, 唔係毎人三十, 而係總共三十..我哋真係寒酸, 不過只要在大家二個一齊食就得!

食完飯之後我哋去左朗豪坊行街, 我哋由上行返下去, 途中行過無印買左包格仔餅, 呢包格仔餅有d野, 一陣話比大家知, 我幫f先生袋住先, 點知佢話我會唔會吞左佢包格仔餅架!?鬼得閒偷你咩! 係都一d值錢物件. 我哋一直行, 行到一個叫白色公園, 見到有隻廘仔, 於是我又叫佢影張合照, 仲夾定動作, 要揸住廘仔隻耳, 其實係自己提議, 自己真係殘忍!

可惜張相暗左d, 不過有f先生執返咪得囉!行完朗豪坊之後, 我哋去坐小巴返屋企. 好啦, 我要講返包格仔餅先, 其實呢包餅呢....好, 而家講故仔先, 我哋把餅撕開少少, 又係二個人食一舊仔, 點知f先生突然講左句 [我唔信你把全部餅吞哂], 跟住佢用口黎測試下, 我估都唔使講比大家知咩事, 大家都估到啦! 竟然用包餅黎做藉口又kiss我!!!佢話好鍾意咬我, 其實係想kiss我架!???我問過佢, 點解你鍾意咬我多過拖我手, 佢話....因為我係怪物囉!?咩理由黎架? 我個樣似怪物咩!!??(怒)唔怪之得比我朋友話我哋係騎呢情侶!

祝大家聖誕快樂, 及約會一個

今日終於到聖誕節, 首先祝大家聖誕快樂, 身體健康及年年都美先~有拖拍就和自己情人sweet; 冇拖拍希望快d搵到自己另一半先~

其實未認識f先生之前, 我一係同女仔朋友過, 一係自己在屋企打機, 所以對聖誕節都冇抱有同情人一齊過的期望. 也唔知道聖誕期間, d情侶有咩好慶祝, 咪又係行街, 睇戲同食飯, 都係同平時一樣啦!但呢一年先令我知道, 原來聖誕拍拖果種感覺真係好唔同...

在平安夜, f先生話一早約好朋友去bar, 在我買完聖誕禮物時出左去, 佢話我比較純品, 唔想我去呢d地方, 所以冇叫我去....呢番說話都曾經有男仔同我講過, 而家我先知道原來自己係比男仔保護果類型嗎? 我一直以為自己係一個堅強的女仔, 原來最後只係比男仔保護...係自己唔夠堅強?定因為戀愛的關係而令自己成為個小女人?

踏入聖誕節十二點正, f先生打電話比我, 同我講聖誕快樂, 跟住同佢傾左一陣計. 之後我又訓覺, 佢話仲在間bar度, 要兩點幾先走得, 我心想 :[聽日約會都唔知幾多點開始啦!?]之後我都太眼訓而訓教. 但我訓教期間, 佢不停send短訊比我, 直至我半夜去洗手間, 竟然剛好兩點幾, 佢又打電話比我, 傾左一陣我又訓覺...唉...呢下真係冇教好訓!?

呢次約會分左三部分, 普通的睇戲, 行街食飯少不了, 仲有一樣騎呢野, 就係去佢屋企度打機? 仲有我早上打blog, 漏左sd 咭在屋企, 結果一張相都冇, 惟有等f先生send返比我(自己真係失敗!?)~~~仲有呢次我會首次毎部分會分顏色....
part 1 -睇戲篇 :

最後佢在中午三點幾先至起身, 我哋原定行game展, 但因為佢遲左起身, 改左去屯門, 仲要先去睇戲, 我於是臨急更衣及化妝去到屯門...由於太過趕時間, 連眼睛都未化妝, 當然佢幫我化啦! 而且佢仲遲到, 點解你次次都遲到架,先生? 之後我哋行去戲院, 果間戲院好鬼偏僻, 行左十五分鐘到先到. 不過都冇所謂啦, 鬼叫戲飛只係三十五元, 勁抵!

去到戲院買飛到入場睇戲時, 已經遲左十分鐘, 但我哋照入去睇, 唔係要等到7點幾...我哋本來想睇異獸戰2(邊有情侶會睇呢d?), 但最後選擇[魔間傳奇], 其實情侶睇呢d戲有似有d問題, 鬼叫我哋都鍾意睇咩!?呢次唔認騎呢都唔得啦....我哋起初把頭拍埋一齊睇, 後來f先生竟然攬住我, 我又攬住佢睇戲囉....原來呢種感覺係好舒服!

part 2-行街, 食飯篇 :

睇完戲都大約8點幾, 我哋去屯門市中心的美食廣場搵位食飯. 期間真係勁多人, 我哋好難先搵到位食飯. 由於我哋以慳錢為主, 我哋毎人都叫左個二十八元的套餐, 都幾抵食....食完飯之後, 我哋先睇化妝品, 因自己要買支尾筆. 我d頭髮係啡色, 所以去買返支啡色尾筆襯返! 我哋周圍行左一陣都冇買野, 之後我哋一路行, 一路講打機, 最後去左佢屋企打機啦....原來佢一直都有玩街機太鼓, 我估一定勁型~~好想去睇~

part 3-去佢屋企打機

上到佢屋企之後, 見到佢阿媽用針線連緊條purple的裙, 仲有黑色喱士, 真係好美, 可惜呢件係佢攝影功課的裙, 即係唔係我穿啦...好失望!!之後睇佢打機多, 因為佢玩龍珠格鬥, 都唔適合我玩, 我咪冇玩囉! 其實呢次好明顯係佢想同我打機多, 不過我冇理佢之麻, 哈哈~最後又玩下psp太鼓,我d功力真係弱左好多, 要返屋企玩返先!!!

最後我拿埋相機腳架, 用黎做攝影final project時要用, 趁而家咪在佢屋企拿埋黎用!在途中講到身高問題, 佢話自己有d女仔朋友有成180添!?至於其他女仔多數150-170都有, 仲話佢同170個d女仔行街時, 叫佢哋唔好穿高跟鞋, 因佢只有175!?哈哈~我終於知你身高啦! 佢話我唔止165, 應該話仲高d, 當然唔係啦, 因我堂妹168高過我...係男仔都鍾意女仔唔好高過佢,尤其係女友麻~好在佢都仲高過我^^

本來佢一向唔願意同人哋合照, 但佢在我坐車返屋企之前竟然願意同我影相!?不過由於我冇帶sd咭的關係, 佢就用佢自己果張幫我影, 張相都幾美, 但要等佢執左相之後先比我...

終於去到巴士車站, 那時已經11:50到, 我哋先發覺巴士全部尾班車已經冇哂~!?心想唔係真係在佢屋企過夜吧!?在等車途中, 佢叫我望後面, 跟住佢又錫左我....跟住我做咩攬住佢架!?自己傻左咩!!好在皇天不負有心人, 都有一架通宵小巴返屋企, 不過要成20元, 但唔緊要啦, 至緊要今日開心咪得!

去買禮物囉~

都話我哋老闆wilson勁好人啦, 收到二份勁正聖誕禮物之後, 佢仲比我哋放早, 放3:30!!正到暈啦, 今年勁好彩. 其實我都幾欣賞及尊敬呢位老闆, 佢教左我好多會計知識, 尤其係入賬方式, 佢從來唔會直接教我, 而係比d提示我, 要我自己思考下先去做, 或者呢個方法適合我, 而且可更容易學習; 加上佢會教姑姐炒窩輪, 仲驚姑姐到老唔夠錢用, 佢幫我姑姐炒股搵錢, 而且仲搵左好多錢.

我講個秘密你知, 在我未遇到f先生時, 我都有考慮過我第時個老公才能及性格似我老闆就好, 外表冷酷, 但其實好好人, 對惡勢力絕不低頭, 堅持自己理據撐落去; 又有會計才能及應變能力, 識理財及搵錢. 其實真係和f先生性格完全相反呢, 或許愛情就係這樣, 即使個男仔未必係你心目中要求, 甚至相反. 但係竟然都愛上佢, 真係奇妙!而家對我老闆的感覺呢~只係一個值得我尊敬的長背!

放左工之後, 我和mandy, eva, veron, 靜及f先生傾計, 而且我睇緊蔡之blog, 其他人的blog我一有時間一定會睇. 大約6:00到, 我開始去荃灣買禮物. 我走到街上先至後悔, 因為太多人啦, 下年我買禮物一定唔會選平安夜囉! 呢次我會送零食為主, 因為大家都係愛食物多, 好過買d[唔等駛]的物品!我先去零食物語選擇食物先 : 呢盒係我妹妹, 佢都幾like雞蛋布甸, 佢應該like呢盒吧!?

呢三盒choco係三位勁愛藍色之美女 : 蔡蔡, mandy及eva, 我特登搵藍色盒的零食比你哋架! 有d仲要係新出, 連我都未食過, 唔知好唔好食架!? 唔好食唔好怪我呀...(汗)

之後去左千色店, 買左盒瑞士choco比f先生, 如果f先生仲咳的話係會收返(笑), 但冇理由把以上所有禮物冇包裝過就送出去, 於是我去埋千色店買埋花紙...我去到一個包裝專櫃去選購花紙, 個女sales勁好人, 佢介紹不同花紙比我, 仲問我係咪送比男仔, 我咪答係囉!最後選擇左一張漸變藍色花紙及啡色帶. 當中個女sales問我個男友玩唔玩得時, 我都考慮左一陣, 其實佢係玩得, 但我最後答左唔係. 你哋可能會覺得奇, 點解個sales問埋呢d野, 因為個男仔玩得的話會用d鮮色的花紙, 如鮮橙及綠, 我自己都唔係好受得呢二隻色, 所以先至話f先生唔玩得之麻. 最後完成品如下 :真係激氣!?點解佢果份這樣美架!?但mandy你哋三個都唔輸蝕, 我都為你哋在包裝專櫃度搵左d藍色紙袋仔比你哋, 仲要毎個都唔同架!

我唔知d紙袋會比邊個架, 一於由我決定吧~哈哈~原來藍色野真係好鬼易搵, 但purple真係難左d, 所以我仲未搵到veron禮物而煩惱, 不過我哋遲d先見面, 但仲有機會搵下, 最後我一袋二袋拿住返屋企. 惟有先買住三個人份禮物先, 之後後補啦, 至於後補人士包括 : veron, 蕉, 靜...睇黎我都要大出血囉, 不過送比好友冇法啦, 只要佢哋收到禮物時開心及真係鍾意就已經足夠^^

呢個聖誕不太悶掛!?

除左聖誕節同f先生去拍拖外, 我平日會做d咩野呢?當然打機啦! 近排成日玩nds, 因為nds出左好多RPG遊戲, 而家玩緊[Tales of Innocence] :呢隻game真係幾好玩, 尤其係打交畫面值得一讚, 佢沿用走黎走去打交呢種方式之外, 在hp上面有一行bar, 就係越駁得hit多, 行bar會越來越滿, 最後就可三個角色用合作技, 可以駁到80 hit以上. 換言之即係駁hit先可以win, 即使我呢d懶升level的人, 總之level低到爆炸,都可以戰勝嘍囉及大佬

仲有毎次tales必有screen shot畫面, 即係毎個角色的對話, 但呢集冇太多好笑野. 而且呢個係增加角色好感度, 好感度越高, 電腦角色幫玩家回復機會越大.

至於我近排期待玩的game仲包括nds的ff4, 我都係而家先知, 真係失敗, 我都仲未玩完tales, 都係遲d先玩啦, 不過d畫面真係好美, 見到真係好想玩, 但好唔好玩要玩過先知...

至於psp都有一隻大作RPG出, 就係在12月27日出的[star ocean 1], 係我其中至愛的RPG之一, 故事以科幻為主. 呢隻之前已出, 現移植到psp, 都係期待作品之一 d畫面當然冇ff這樣好, 但都ok, 始終係同一間廠出品, 而且二部機的解像度差唔多,算係這樣吧!

個戰鬥畫面都保持住一貫特色, 有左下角攻擊距離及右上角角色位置, 不過我就唔liked人名在上面囉!都係在下面好d. 但有四個人用就好野~

畫面係唔美, 始終係移植吧!? 但只要好玩咪得囉!!

有呢三隻新game玩, 我估聖誕節不會太悶吧? ....哈哈~好耐冇講過打機啦!正呀!可惜f先生佢唔玩RPG, 真係哂呀! 不過我好多類型的遊戲都識玩, 都可以同佢玩其他..

各人節目...突然見面!?

今晚我要做冬, 本來我要去幫手, 原來我姑姐已經叫左我妹在星期五返佢屋企幫手, 所以我就可以免疫. 但其實可能返去幫手會更加好....因為呢一日成個下午我都冇咩好做, 最多幫手做好阿爸公司盤數, 聽下歌, 同人哋msn,又差唔多一日.

今日見到edwin, 由於出job, 加上佢平日忙碌的關係, 同佢少左傾計, 今日難得一見, 當然同佢傾計啦! 原來佢屋企一早做冬, 今日同女友去行街...你真係醒目啦, 一早做左冬, 唔使同人迫車麻~但我哋傾得唔太多, 傾左冇耐佢就出街

msn :除此之外, 我又同左幾個熟朋友傾計, 靜就今日約左在msn度認識一個27歲男仔一齊去工展會, 之後返去做冬; 而蔡蔡在放工之後去買菜, 在屋企整返幾尾, 唉...身為女仔的我唔識煮飯, 認真慚愧呢~仲有佢話公司網路問題會在12月27-1月8(暫定)冇得上網!?我少左個好友同我傾計...我有股衝動想殺左幫蔡辦公室安裝寬貧的和記!!!!!仲有f先生, 例牌遲起身, 我見佢又冇sms及msn, 於是整個sms比佢, 即使佢在msn度上左網, 都仲要訓教, 真係啊...

差唔多時間去我姑姐屋企食飯, 我爸突然返黎屋企同我講話去食飯, 我衫都未換, 好在我爸話先接我媽先, 之後再搵返我及阿恬(我弟婦), 我哋四人一齊去食飯. 點知黃大仙撞左車, 塞左車好耐, 都有半個鐘到, 好在f先生一直都有同我sms, 唔係真係會悶死~

返到去姑姐屋企, 姑姐比返代我取的老闆的禮物, 原來係一侖勁美的choco及.....1000元現金!?其實呢個現金用利是封入住, 我起初以為係100元, 點知覺得唔對路, 點解張銀紙後面多左個零, 先知道係1000元, 對於冇錢的我, 呢個簡直係好消息啦!最後我比左八百元比姑姐袋住先, 作為儲錢交學費, 而我又多二百元

好消息一浪接一浪, f先生佢在sms內突然講話我在食飯之後出黎見下面!?我勁開心呀, 當然願意啦!於是我在九點幾出門口, 再坐小巴去旺角搵佢. 其實我哋的約會地點都講左好耐, 起初深井, 呢個好啊, 近大家屋企; 後來f先生話同朋友去深水步買野, 呢個地點都唔錯, 我可以在爸送弟及弟婦返屋企時, 可以在附近落車; 但最後約實的地點係...咩話!?又係旺角!唔係掛!?原來佢突然買左部ps2, 點解你唔買wii呀!?我可以去佢屋企玩麻~算啦, 無論你話去邊度都會搵你. 但今日最大問題係我冇化妝, 因我本來想食完飯就返屋企!

最後我去銀行中心間大家樂度搵返佢, 佢同緊個朋友傾計. 佢呢位朋友都幾有錢, 除左有我一直都想買的ps3外, 全部遊戲都買正版, 而且仲有一部幾萬元的相機. 而且走時仲講左句 :[我驚部ps3會玩殘, 想買多一部]吓!?唔係掛?你買多部不如買部比我啦(笑)

後來同佢個朋友講再見後, 終於到我哋二個人行街啦^^佢今日同我去旺角中心睇衫, 我最後買左一件閃粉黑色衫, 呢件會在聖誕節同佢約會時所穿的衫, 等我返去襯下先. 本來想食dessert, 最後驚d店舖關門而坐小巴回家. 唔知點解我哋坐小巴個位特別邪, 毎次都係穿雙人位最後果行, 佢突然整個咀埋黎想鍚我, 我哋呢下算kiss嗎? 真係勁緊張呢(>_<)自己唔識kiss會唔會冇用左d呢? 我哋最後只見一個鐘, 真係好唔夠呢...惟有在聖誕節再見吧!!

終於脫苦海~

我拿拿聲做完果邊的工作, 唔知係咪咀咒呢? 我毎次都係五點幾先至做完, 都唔使再返去旺角啦~返左去咪又係放工!? 姑姐在電話中提及到個好老闆毎人送左一盒禮物, 好似係choco, 以及毎人一封利是, 雖然唔知幾多錢, 但對於冇錢的我黎講, 就極之重要呢~多謝哂老闆先^^姑姐話聽日做冬時拿返去麻麻屋企比我, 又一次唔該哂!!

今日見到隻死人八兩金又跟我穿差唔多衫, 仲要自己覺得懶美, 真係囉我命. 自己外表唔美都唔緊要, 有d自知之明比較好d囉! 我最後走時都有同其他人講再見, 除左佢之外, 係我特登的! 哈哈~我都就黎走, 見你都唔多過六日啦! 話鬼知佢!

仲有f先生今日只返半日, 大約在三時走, 佢落實左今日去買布及剪頭髮. 大約四點幾, 佢已經買完布, 仲同我sms添! 大佬呀!?我果陣就黎做完哂d野, 趁早離開地獄好過啦~不過我都係有同佢傾, 因為果度真係好鬼悶...期間問佢去左邊度剪頭髮, 佢原先有個朋友開的銅鑼灣髮型屋在聖誕前已經滿哂啦, 邊個叫你而家先即興話剪頭髮, 佢話想好型仔的過聖誕....咩理由黎架!? 之後佢話自己有d心郁, 想買部華錫手提電腦比自己做聖誕禮物!? 唔係掛?係都送份禮物比我啦~又或者買件情人飾物都好.....不過佢既然真係鍾意, 我都冇計啦, 因佢一直都話自己想要一部手提電腦, 可惜太貴, 而家有一部平平地仲唔買咩? 我就同佢講, 不如我哋考慮下聖誕時食d咩啦, 佢竟然話.....我哋食杯麵!?再唔係就煮個即食麵!? 吓!?這樣我哋聖誕節在邊度慶祝呀? 佢之後冇講到...我有d擔心添!

佢在六點幾send左個sms比我, 佢話已經剪完頭髮, 而且仲好短!?我好想即刻去睇佢個新look啊...好惜我個頭痛, 返左屋企休息, 佢知我頭痛都冇問候我. 我都有d失望囉, 訓下覺先好過...