今朝如常坐地鐵返工, 見到個鬼佬及個女仔上車, 個女仔指左鬼佬所去的地點方式之後, 個女仔就走左. 後來個鬼佬走到我身邊問我路時, 我都覺得好詫異, 其後我都答左佢. 估唔到佢就問我而家去邊度, 又問我姓名, 我咪一五一十講比佢知, 後來我先知佢叫william, 係美國人及周圍去教英文, 呢次只黎香港旅行, 而家去中環申請visa. 但時間過得好快, 我要落車先, 佢同我握左幾次手, 仲話我好好人, 想問我拿個e-mail地址, 但我冇筆而唔可以比佢, 佢又講個e-mail地址, 但我冇記性, 又唔記得左, 呢件事就完左...其實個鬼佬好型, 而且又熱情及好人, 冇同聯絡方式又可惜左d...呢次都係第一次比鬼佬問路, 仲要讚我stylish~!!
由於f先生公司的老闆出去工幹未返, 所以可以同我在msn傾足成日, 當中講到佢話要在返學(上堂cs掉左呢個星期上堂)之前幫同學去鴨記買野, 問我去唔去, 我有得話唔去咩, 同樣係同一個理由 -因為鍾意佢! 最後我咪應允佢. 當中f先生仲話買完野之後, 要我拿住東西, 佢抱起我. 當時我在公司度差d開心到笑左出黎, 但要忍住, 因為係返工時間..佢突然彈左呢句野出黎, sweet死人啦!(>_<)
放左工之後, 我即刻去到地鐵站度搵佢, 我在鴨記睇聖誕燈飾, 佢原來去幫同學買攝影用品...這咪不算約會!?不過算啦, 由始至終我都未想過, 我哋又唔係真正情人. 大約買左二十分鐘, 我哋開始去返學, 在車上我太累, 挨在佢博頭, 佢又挨住我頭訓教...
結果我哋遲左成半個小時到返去, 呢堂係教畫人及動作, 完全蝕哂啦!我哋呢堂要在[伊沙貝拉]呢套戲之中抽取其中二幕, 畫出人物動作, 寫出鏡頭角度, 對白等資料, 呢個就叫storyboard. miss原本話要呢堂交, 但見到大家仲未做完, 惟有改在星期六交.
而且miss仲偷偷地把下一個seminar的時間拿出黎比我哋睇...真係痴線架! 我哋在星期一至五要返三日, 星期六5:00之後唔使返~~點得架, 如果我仲在呢間公司做, 在五月之後要幫客人出桃數報告及報稅, 點可以因為上堂而遲架? 不過好在我會在四月離開呢間公司, 所以對我問題不太大, 至慘係f先生, 佢為左呢次上堂而要公司就佢早走二日及星期六唔返工, 如果呢次時間表又落實, 佢一定好難再向公司交代呢~~佢一直為呢件事唔開心, 仲send sms及打電話比我, 我也向佢提出二個建議 : 一係再和老闆商討返工時間, 改為星期六補時, 一係要公司出信向IVE申請唔讀其中一科. 希望你最後可以同我...及同學仔一齊讀書及畢業啦!點解我會因為佢唔開心而唔開心呢?真係唔明白...
welcome to my world...
My model life since Nov 09~
My sweet life w/ bf joejoe since Dec 09^^
琴日又同f先生一齊坐地鐵返學, 間車好鬼死迫人, f先生佢用隻手整住我, 唔好被人迫到我, 當中佢隻手差d摸到我, 但最後都係冇摸到手, 真係激死!(自己心想). 仲有地鐵座位旁咪有d玻璃門之類的野, 佢比我挨住在度, 之後佢用佢隻手放在玻璃度, 個pose係點, 聰明的你哋大約想像到啦!冇錯, 呢d咪情人的動作, 今次我唔係白痴啦!
之後返到學校, 本來有個男同學嘉倫坐在我哋二個隔離, 但見到我哋二個一齊坐之後就即刻彈開, 使唔使呀? 跟住在果位度講開佢唔食藥, 我話不如我提佢食藥啦, 佢不知幾開心, 仲即刻答應添! 呢個時刻我先我上左當, 不過算啦! 後來佢在英文堂要oral, 佢不嬲都唔認真上堂, 我咪去mandy果邊, 點知佢欄住我, 仲話我丟下, 唔理佢啦! 真係大細路, 心軟的我惟有留底同佢傾計...
放左學之後, 我哋又開始msn, 講開佢病左, 我話[希望佢快d好返, 即使唔係一齊過聖誕節都好](竟然要個女仔講先, 真係呀....), 之後佢話聖誕果日可能得呢~吓!?即係咩意思呀? 人哋好想二個一齊過聖誕節才算...如果佢唔同我過就嬲死佢!!!其實佢要在平安或聖誕夜都要幫人影相, 佢真係黎唔到都冇計, 不過佢在12月26日和同學仔唱k一定會到, 這樣都好過冇....
今朝早如常和f先生sms, 仲要在度狂send, 如果我比人發現就死! 不過我唔係想講呢d無聊野, 或者哂幸福, 而係對於佢突然同我講出佢的煩惱, 我好開心佢終於對我講自己秘密, 仲叫我唔好講比其他人聽; 而我也把秘密講佢知, 至於係咩秘密, 哈哈~~對唔住啦, 就當係我哋二個之間的秘密, 唔可以講!
之後食飯時去日本yahoo上網, 見到今年紅白終於有名單啦, 但歌聲陣容令我太失望啦, 步姐及倖田來未實有份啦, 始終係二位阿姐, 不過佢哋呢年d歌就真係麻麻, 尤其係倖田來未加東方神起, 真係唔知佢唱咩架!!?仲有混血兒leah dizon, 我和f先生都覺得佢幾美, 但f先生爆左佢之前係av女優就....加上佢d歌真係麻麻....我惟一睇好的女歌手係大塚愛, 起碼佢d歌都有返d水準!
至於男歌手就...我都冇咩可評論, 因為自己多數聽女歌手多,除左有我唔太like的黑鬼樂隊EXILE(即係唱女王教室尾曲), 有d我至愛聽的樂隊, e.g. Bump of chicken, GReeeN都冇份, 好激氣呀(>_<)! 真係唔知睇唔睇好?
真係唔知痴咩線, 無端端評論咩鬼紅白呢? 都係努力建立和F先生之感情好過啦!
如果叫我背及讀書, 做會計, 做好公司全盤賬, 核數, 買股及睇股市. 呢d野我雖然唔算太熟, 但我一定認識.惟獨有一樣野我一定唔認識, 而且仲好遲鈍, 毎次都係我身邊好友提我先知, 從f先生鐘意我, 直至到而家, 都係一直有你哋提醒及支持, 多謝哂!
其實在星期日果篇咪打左f先生送我去坐車, 其實呢度有一樣野想補充返, 其實係佢建議送我去坐車果件事之中, 原來已經暗示左我哋之間係情侶關係, 唔怪之得f媽對住我笑啦!!!噢! 原來成件事只係我太遲鈍, 唔明白佢哋意思. 唉, 真係離譜得可以!
仲有我一直都好介意佢msn有句說話 : [星星在心中默默成長], 經蔡蔡解釋, 原來[星星]係指我, 我在佢生命之中照耀住佢, 令佢生命有光芒. 而後面果部一睇字面都知, 我在佢心目中的位置越來越重要. 我知道之後都覺得好sweet及開心, 點解我一直都唔知道呢? 唉~!!睇黎我真係個愛情白痴, 我要惡補下我呢d[愛情知識]先得!
首先要對唔住我班其中一位同學仔阿駿先, 佢一直都問我今日去唔去旺角cafe度溫書, 我最後都拒絕左佢, 因為佢哋果邊一來多人, 二來有漫畫這樣大的吸引力, 我一定唔會溫書, 所以最後去左去左f先生屋企度溫書....不過下次如果唔係因為溫書, 而係出去玩, 小女子一定奉陪到底!
好啦, 講返去佢屋企度溫書先, 其實都唔係發生好大件事, 只係我要同時忍受teddy及f先生二位病人, 其實都有d驚會傳染比我, 不過都唔驚得太多啦, 自己真係病左先算! 我哋休息左及食野之後, 就開始即刻溫書. 我自己一個問題不大, 大部分題目我都識做, 只係有d要問teddy老師. 至於f先生就由於平時唔聽書, 要teddy講多一次, 我也順便聽埋啦! 估唔到f先生領悟力都幾高, 佢應該係話頭醒尾果隻, 好快就學左五堂的內容.
最後我哋做一種數, 大約係分order 及disorder事件的出現選擇方式(permutations & combination), 其實可用計數機一次按到答案, 但我哋二個玩f先生, 叫佢跟住公式計數, 結果我哋咪快佢好多, 後來我都忍唔住同f先生講, 其實我哋係玩你!
仲欠左最後一個tutorial未溫, 由於太夜的關係, 仲有我哋一直都未食過野, 我哋去左食左特價粥, 個牛肉粥勁正, 可惜我唔食花生, 而我隻匙我食過, 但f先生竟然話至愛花生, 仲唔介意我[畢]比佢~!!?自己覺得好似有d怪...
食完飯之後, teddy自己坐輕鐵回家, f先生話送完佢媽去佢屋企樓下之後, 原本fantasy媽叫f先生唔係送佢, 但最後都送左佢媽, 之後送我去坐巴士返自己屋企. 我都係第一次比男仔送去坐車, 好開心, 可惜冇拖手呢~!!途中大吉利是講[咬]親腳點算, 佢話都會同我返去佢屋企, 但會分開二張床訓, 我睇都係唔好啦, 比你見到我驚人的訓教姿勢真係嚇親......跟住又講開在三聖村度,行路去佢屋企, 我點鬼識路,但又想慳錢, 於是佢話黎多d佢屋企, 我冇端百事去佢屋企做咩? 都係順其自然吧啦!
p.s. 估唔到我和fantasy媽都ok好傾, 講開街市d店主咩人都叫美女, 大家都笑起黎.仲有講話d舊衫等等點處理, 只係第二次見面都已經有野傾, 都ok啦!
究竟戀愛係開心, 幸福, 定係苦惱, 傷心呢?我相信呢d感覺毎一對情人都必定有, 但我和f先生又算係咩呢?我哋既唔係情人, 但點解我又有哂幾種感覺呢? 自己真係好想知道...
今日上cs堂時, 由於要播放電影做堂課, 遲遲都未整到, 所以同tracy, berry傾下計, 後來得知大家都冇抽, 又或者抽唔中二隻蝕本股 : 中外運及中重汽. 好在我哋大家都冇, 唔係實蝕到笑..我哋傾左一陣之後, 我見到f先生仲未返, 於是我好擔心佢, 一有人入課室便望一望. 直至之後佢問我在邊度, 想同我返學, 我都返左學啦, 仲要係準時果隻. 佢話因為自己買口罩, 但未買到, 於是我叫佢返學先!
最後都係唔可以播放套戲, 於是決定轉課室, 我就好緊張問其他同學課室號碼, 準備send短訊話比f先生知.....點知....我見到佢原來已經返黎, 佢又做咩唔叫我呀? 害到我在度狂打!??後來在夜晚我哋sms 對話之中得知, 原來佢已經企左在度望住我好耐, 因為見到我不停打sms個樣好可愛, 掛住望而唔記得叫我? <----呢個咩理由黎架!?
上完cs堂之後, 大家同學仔去左7-11食野, 我, mandy及berry在周圍影相, 返去課室都見唔到大家, 之後睇自己電話, f先生send左短訊比我, 問我去左邊度, 當我見到時, 佢已經同d同學仔返黎, 我走去佢度同佢講返自己行程. 到左小息時, 我肚餓去左買包零食, 點知連零食機都有[買一送一], 發達啦^^
小息之後就係present返之前份攝影功課, 好緊張呀! 最後阿sir都有讚我份功課都幾好, 而且拍攝角度都好得意, 但係最後果二張似格格不入, 以及提議我應該用近角度去影相, 我會留意的, 希望之後功課都會做好d^^
最後放左學, 我和mandy, berry, f先生, 駿及edwin一齊去食晚飯. 食完晚飯之後大家本來各散東西, 點知我勁黑仔, 八達通又冇錢, 又冇散銀, 於是咪走去[唱]錢, 點知竟然見到f先生(=_=). 真係唔知係咪個天整定啦, 原來佢已經send 短訊叫我留步, 但我冇睇到, 要去唱錢就遇到佢, 或者就係緣份啦!我哋一齊坐小巴, 二人個頭互相挨住大家, 感覺好舒服呢~期中講開溫書, 最後決定聽日同佢, teddy及阿銘去佢屋企溫書.....在深夜我和f先生在度sms, 雖然很累, 但係好sweet呢^^
星期三咪曾經講過間pk 美容院, 今日有新進展, 總部果邊的johnny打電話比我, 問我去做facial之情況, 我本來已經唔想再提, 但佢話係總部果邊要跟進, 於是我如實同佢講二次美容院關於預約之問題. 跟住佢話呢間美容院之前有勁多客人投訴, 話佢[hard sell]: 專叫客人買佢護膚品, 成日話自己d貨品搶手, 只剩下有少, 即使客人冇錢比也叫客人把自己所剩下d錢落住訂, 總之係要客人幫襯佢. 我唔知係咪冇幫佢買野而這樣對我, 我覺得好唔公平! 客人買唔買你貨品係佢哋自由, 我也唔介意你推銷, 但唔好迫人買. 有一次仲抵死, 我話自己都要打扮, 相信毎位女士都知道, 除左護膚品外, 衫及化妝品都係女人[必需品], 但d死人美容師竟叫我買哂護膚品!?? 痴線架!呢d係我的錢, 點用關你鬼事咩!
投訴左一論之後, johnny決定安排我去另外一間美容院做埋果8次facial, 至於地點係佐敦及元朗, 我當然選擇佐敦啦! 而且仲叫佢星期三之前辦好, 費時見到荃灣果班人!不過就算冇都好, 起碼自己投訴左, 個心都定d先啦, 簡直係大快人心^^
好啦, 講完美容院一事之後, 講返我和f先生先. 今日如常約左佢一齊返學, 呢個當然遲到啦! 我見到咳得好利害, 連把聲都沙埋. 叫佢去買支水飲, 但蒸餾水竟然賣哂, 惟有飲唔sweet的綠茶吧!
入左課室, 我就坐在佢隔離, 佢話驚自己惹到比其他人而帶口罩. 呢堂係tutorial, 又要去做堂課, 我自己就好專心去做, 而佢一係同人傾計, 一係就眼定定望住我, 我見到佢望我便問佢做咩望我, 因為自己周身唔自在, 佢話鍾意咪望! 吓!?到最後我都冇理會佢, 在度做堂課. 跟住佢又用我借比佢支筆篤我d手指, 我忍唔住又打佢; 我一早做完d題目挨在牆度訓較, 佢又叫我唔好這樣訓, 驚整親條頸....唉, 總之我就同mandy坐啦, 佢原來一直留返個位比我, 仲叫edwin唔好坐, sorry呀! mandy原諒我啦, 下次我一定同你坐返(>_<)
不過唔知點解, 雖然比f先生不停煩住, 但自己覺得好開心及幸福, 可能自小自己少人錫及重視, 所以當有人對自己好好時便覺得好開心. 但唔好開心得太早住, 我哋仲未正式一齊架, 都仲未係情人, 而家惟有暫時忍耐一下...