區議會投票日

蔡蔡近排這麼忙, 除左少左同我在msn傾計, 打blog及我哋二個都少左去行街買衫, 目的就係為左呢一日 -區議會投票日. 佢係其中一名議員鄭家富的辦公室工作, 在呢幾日幫佢哋阿頭去拉票, 做d宣傳工作, 成日都要加班, 做到非常辛苦呢~可惜個要同佢作對似的, 佢哋在分組工作時成日冇得同一組, 好在佢同可靠的阿lim一組, 都算好吧?

而家我先知原來舉行一個選舉, 背後附出好多人力物力. 可惜今日選舉百分比好少, 而我阿爸媽本身都有投開票, 自己又剛登記左做選民的三大情況下, 我決定跟佢哋二個一齊去投票^^

好在我哋屋村有村巴直達會場, 所以好快就可去到. 我哋三個跟隨指示入會場投票, 我哋選區得二位議員角逐, 我父母都睇好二號, 我就跟佢哋一樣. 其實呢次係我第一次投票, 特別緊張呢~比左身分證投票職員之後, 佢就比左個印仔及印有二位議員的咭仔我吸印. 投完票之後我哋三個坐返巴回家了~~!!

幾分鐘的投票, 已經動用左好多議員, 其員工的人力物力, 真係非常利害, 舉辦一個選舉真係唔容易. 我之後都會支持投票^^仲有過左今日之後, 蔡蔡終於自由啦! 我哋之後就去旺角行街, 一於狂買野! 不過只限於你, 因為我在呢個月補交左學費, 冇哂錢買衫啦(哭)

真相大白? 彼此確定心意嗎?

好少一日會打二篇文章, 但今日發生的事太多了, 而且又係二件獨立事件, 所以要分開打. 希望大家唔好介意, 抽少少時間黎睇下 :

我今日同靜msn, 講開唔知f先生有冇女友一事, 靜叫我不如直接問佢, 好過估下估下, 於是我也下定決心去問清楚. 但一定唔可以在同學仔面前問, 唔係一定會比佢哋笑, 所以我決定如果返學之前坐小巴時見到佢先去問吧!

我比預定返學時間早左15分鐘, 於是去葵涌廣場行下, 因自己都想買個袋及一d新衫, 但行左好耐都冇, 於是又返去小巴站坐車返學. 我上唔到架小巴, 惟有等下一架. 唔知呢d係咪真係整定我上唔到架小巴, 排左第一個位, 那時就見到fantasy啦! 唔係掛?難道個天都要我問清楚佢, 會唔會突然左d呀? 但佢全程同朋友傾電話, 我個心就一直心急, 心一直想[如果佢真係有女友點算呢? 第時我咪只好退出, 但我又真係鐘意佢, 我真會願意放手嗎?], 於是我越來越心急, 而且望住架小巴就黎到學校, 就更加緊張!

直至落左車之後, 我睇過周圍冇同學仔, 以及佢講完電話, 在我唔知問唔問我情況之下, 我口窒窒地問左佢有冇女友, 佢答話已經散左好耐, 仲問我問黎做咩? 天啊! 我點可答你因為鍾意你? 所以咪求其話驚之前我哋好多功課要交而忽略左女友...(真係爛)

去到IVE, 我先至記得今日係開放日, fantasy 叫我唔好去上堂住, 不如周圍睇下. 其實我正有此意, 於是大家周圍去睇. fantasy見到攝影堂個胡子伯伯及一部成三十幾萬的相機, 於是停左在果度傾計.而我呢~~當然係四周行下啦^^

呢條係在攝影地方果度見到架, 總共有三條龍, 我覺得佢哋實在太美啦, 於是影底左. 但影唔到條尾巴有d失敗呢..(汗)唉! 我d攝影技術真係差, 我第一個去睇的學系係工商服務及管理, 也都係好多朋友仔, 包括自己曾經讀過的系. 不過最吸引我的只有呢一部分 :
我估佢呢個會場其實係賣蒸餾水, 因為隨處可見到蒸餾水樽. 不過佢個主題係咩都唔重要, 我只喜歡佢呢個家居擺設, 因為佢背景及椅子都係紙版, 但又可以做得好真實, 而且整體仲好美添!

至於呢個賽車都有d興趣啦, 因我琴日返學時已經見到呢個賽車場, 但又講唔出點解會鍾意?

會場唔算太大, 在中間廣場之中有不同的同學仔唱歌, 好唔好聽就...見仁見智吧! 最後一站去到工程系去睇. 其實果度好多知識都好實用, 但比較悶d, 但我對其中一個地方好有興趣:

就係呢個~~智能互動玩具, 其實即係好似玩搖控車之類, 但只有我一個人又唔敢玩, 最後只好睇住人哋玩及影相^^


去哂所有地方睇野之後, 終於要去上堂啦, 我哋遲左半個鐘至返學, 但fantasy好似唔捨得部相機呢~之後我又同佢一齊坐, 而且佢又打我個頭和蝦我, 自己真係可憐...之後睇左同學仔的flip book, 大家都做得好美呢, 仲要塗埋顏色添, 同我果本黑白色, 冇背景的filp book 比起黎, 自己做得真係唔夠出色...anyway, 比大家睇下我作品的封面及底部先


影得好模糊呢, 希望大家睇到吧? 我哋上完堂之後, 大家一齊影左全班相, 跟住仲一齊去左開放日展覽攤位睇野. 我又要去多一次啦! 不過見到大家一齊玩得好開心, 就冇咩所謂啦^^跟住總共十人就去同mandy食飯, 慶祝佢受傷後第一日返學, 我哋去左青衣城....

在坐車之前, fantasy 唔知點解今日特別開心, 佢不斷同我改花名, 又叫咩肥婆, 怪物, 漢堡神偷(因近排成日穿間條衫, 鬼叫興咩), 總之不停激我, 甚至激到我追打佢, 可惜我穿左對二吋短boot, 唔夠佢追. 我聽到有d同學仔開始話我和fantasy係咪有d關係之類的事, 但因為和同學仔以為f先生有女友先至冇傳我哋, 係啦, 這樣想就好, 唔好話我哋, 哈哈~~

上左車之後, 佢仲坐我斜對面, 仲在個坐位度不停話我及打我個頭, 又講說話黎激我, 最後激到我唔再理佢, 佢又不停講笑令我哋笑, 佢講d人係咪當我死左, 我仲抵死講左句, 最多我燒衣及多d拜你, 你唔好黎搵我. (同埋唔好煩我) 但我最後都同佢傾計, 真係矛盾!

去到青衣城, 見到果度d聖誕怖置太美, 於是我又影相, 而且見fantasy成日蝦我, 我真係好嬲, 於是影埋佢, 用黎打小人都好!!!
途中經過時裝舖, 見到好多公仔穿住間條衫, 佢又話我啦. 仲話自己眼中只有間條, 真係人都顛啦!計我話顛果個係我就真. 同學仔又再話我哋, 似乎佢哋又誤會我哋啦, 第時如果知埋fantasy冇女友, 一定會話到我哋!

最後食完飯之後終於各自回家, 本來以為可以耳跟清淨, 返去又可以打機啦! 點知在11點幾, fantasy又打電話比我傾計, 當中佢有提及過自己的事, 原來佢和媽媽一齊住, 而且佢父母應該離左婚, 分開住. 而且從佢口中估佢應該真係唔鍾意佢自己爸爸, 聽到呢度我覺得佢好可憐, 佢失去左父愛, 而且在工作上(part-time攝影)上見到好多是非, 唔知佢以前係咪真係有d唔開心的經歷......跟住就講開獨生子, 而我就係屋企最大, 加上在朋友之中多數最大, 所以我成日都好似要照顧人, 佢就講話好想被我照顧. 我先唔會這麼易照顧男仔架!!

最後講到佢屋企, 原來都係個攝影工場, 佢媽媽會負責set好燈光, 背景等等. 總之我覺得佢哋二母子好利害呀(>_<)佢仲話幫我化妝影相, 我睇都係唔好, 費時我會核突到嚇親你. 結果我哋傾多成個鐘頭電話, 先至沖涼瞓. 當中我為左佢屋企唔愉快的經歷有d瞓唔到, 我自己真係這樣鐘意佢嗎?

mandy 終於返學了, 可喜可賀^^

話說mandy之前搵到份新工, 本來係一件值得開心的事, 因為佢一直都想搵到一份好工去搵錢交學費. 點知佢在第一日返工時, 佢整斷左腳趾尾的骨, 真係痛得要. 除左冇左份工之外, 而且仲要在屋企休息左一個星期, 就在上個星期, 佢就全個星期冇返學了, 在呢段時間我真悶透!

琴日早上和mandy在msn度傾計, 據知佢在今日會返學, 勁開心(>_<)! 而且佢在msn上及在blog上, 佢得知我和f先生的所謂情史, 佢都好關心及想親自睇下我而家的發展情況. ,可能我和佢發展得真係太過快, 而且日日精彩, 令佢覺得好似睇緊連續劇.

呢堂cs我遲左返黎, 因為今日IVE有開放日, 我就在返學果陣去左睇個d展覽, 加上仲有d特別事件...唉...總之勁複雜....不過見到你返學真係好開心, 在休息時更走去同你傾計, 放學又同你去食飯. 總之又係呢句, 好開心可在學校見到你^^

對唔住呀, mandy!!偷偷地影左你張相添! 因為我覺得你腳趾骨雖然傷左, 仲要撐住二支柺杖返學, 又要行好多梯級真係好辛苦, 好敬佩你可以努力地一級級樓梯, 一步步去行!在呢個情況之下都仲可以返學, 我真係覺得你好堅強! 換轉係我一定唔會返學, 仲要休息到好返先會返學(噢!!)

很少交流?愛情白痴?

今日又上數學堂, 我在公司對住d數字已經對到想嘔, 估唔到今日數學堂要上堂課, 認真囉哂命. 在小休時自己一個走左出去休息一下.....

fantasy 佢今日遲返, 冇同我一齊坐, 而且佢冇同我傾計及激我? 令我更加唔開心....於是我成日出出入入引佢注意. 而佢最多只係請我食左野. 加上我掛住整明天交的filp book, 冇時間同佢傾計, 甚至我在做學堂課時做filp book添! 鬼叫自己仲有成20頁未畫咩!

最後放學大家又各散東西啦! 我和佢始終冇傾過計, 點知佢突然摸我個頭, 整下我個[頭cool]添!但我都仲唔知發生咩事, 直至蔡蔡向我分析, 原來呢個行為只係情人之間先會做, 仲反問我一個普通男仔又點會突然摸我個頭呢? 我心想, 大家都仲未係情人, 點解要做情人之動作呢? 而且佢仲有女朋友的, 那就不要做這樣親切的行為啦!

而家暫時咩都唔好想, 做好filp book先算! 我在晚上十一點做酊成點幾先可以瞓, 對於唔慣捱夜的我辛苦極了, 唔知讀呢個課程, 仲有幾多晚要捱呢?

不要緊嗎?

今日我如常msn, 我見唔到f先生上網, 非常唔開心, 成個冇哂心機, 後來佢在十一點幾先至上網, 我竟然即刻hi佢(撞鬼咩? 自己做咩這樣熱情呀?),佢話自己病左, 上午在屋企休息先, 下午因為公司工作繁忙而要返工, 真係好慘呀, 睇黎你要休息多d啦!

但我返學時, 佢個樣完全唔似病, 而且仲成日激我, 佢自己就非常開心. 之後佢同我講一見到我就唔記得左自己病左. 我就講笑話你咪要見我多d. 佢也講想見我多d! 好心你病就唔好成晚上三點幾先瞓啦, 自己又病, 又用少左mask, d皮膚差哂, 早d休息吧啦!(死啦, 最後果句係咪似女友同佢講野呢?)

佢傾左一陣, 就去休息左一陣, 當我下午打blog時, 佢又突然hi我, 話佢想開個股票戶口買股票?係咪我講得股票多, 太好搵了, 而令佢又想買呢? 睇黎我又做左魔鬼啦!之後佢真係去左恒生開戶, 但又唔比佢開, 佢又打電話比我, 唉!聽日返學先同你傾, 今日要忙公司野, 唔得閒!

講開股票, 我在msn認識的大陸男仔朋友佢又突然hi我, 佢本身在遠洋地產工作, 而家去左方興地產, 原來呢二間公司有關係, 方興原來係遠洋個股東!真係大實派! 果然在果度工作唔同d, 而且佢用八萬元earn 左成五十萬,真係好勁呀!!不過有件事好奇怪, 就係突然問我有冇男友, 仲要唔講原因, 古古怪怪的, 真係唔知做咩!

不過最嬲的係...美容院果邊竟然話我冇約去做facial!!上次明明係個美容師同我填左留位紙, 以為留左位, 點知好耐都冇電話打比我!仲要我打電話去問先知我冇約, 好激氣呀!!於是我咪打電話去嘈佢哋, 佢哋話下星期會比返個約我, 呢次唔使我打電話去啦掛!總之唔使旨意我買佢d護膚品!!

這是愛情定錯覺?

在睇今日呢篇文章之前, 麻煩睇左琴日果篇先, 大家會易d明白, 為大家帶黎不便, 真係對唔住!!


mandy 琴日即刻在msn度同我傾計, 佢同我講我和f先生有d野, 大家這樣聰明, 都知有d咩野啦! 跟住mandy同我講 : [fantasy好似想追你啊!], 我聽完之後, 都黎唔切反應, [唔係掛!!??佢有個美女朋友, 做咩會這樣的?]我思考左三秒, 得出呢句對白....點解而家d男仔這樣架? 見一個愛一個, 所以話呢~愛情真係唔可靠!如果佢真心鍾意我, 飛左佢女友, 我一定會同佢在埋一齊. 如蔡蔡所講, 應該要對佢冷淡少少先, 呢招以退為進好高招!

但自己又唔爭氣, 雖然話對佢冷淡, 但轉頭又去同佢有傾有笑, 又被佢激, 所以話呢~做人真係賤格, 尤其係戀愛中的女仔真係好cheap, sorry, 我只係指我自己.....

而且自己又冇勇氣問佢女友之事, 更唔好講叫佢哋分手! 其實有好多野唔太明確, 例如佢係咪同女友關係差? 同女友吵架, 想搵個女仔激下佢?定係真心鍾意我? 一切一切都好夢幻, 同佢在埋一齊好似係實現唔到的願望...但我如果而家差隻腳埋去, 我一定會係第三者. 但我又真係唔想放過呢段情緣, 唔想好似同蕭生一樣無疾而終, 而家真係令我迷惑....我好似企在十字路口般, 唔知行去邊度, 呢種感覺好痛苦.....

其實我個心好想佢同女友關係唔好, 佢哋因為性格不合而分手, 而佢就可以正式同我一齊. 不過覺得呢個自己好黑心呀(>_<)

開心定唔開心?

今日又要出job, 但我在4:00幾完成所有工作, 而且今日又要返學, 我姑姐比我可以唔使返黎旺角, 即係可以早d放工返去工廠休息一下, 太好了!!講真,我都好耐未試過可以這樣輕鬆放工, 自由自在在街上行, 呢種感覺真係好舒服及開心...

我返到去工廠都成5:00幾,我真係好耐冇返過去, 見到果度建築物, 物件..有d懷念的感覺, 返到去我瞓左幾個字, 又要開始返學啦...嗚...

我坐小巴時, fantasy 突然打電話比我, 問我在邊度, 及想同我一齊返學. 哈哈~真係可惜呢, 我已經上左車啦, 鬼啋你!!

呢次係我生平之中第一次準時返到IVE, 仲要係第二個返到學校, 第一個就係波特先生, 佢睇本學英文的書, 有d內容如問個男仔對於個女仔有咩感覺...哈! 唔知佢睇呢本書做咩, 難道佢想認識女仔嗎?(笑)

本來我都好正常地聽書, 跟住fantasy 返左黎我就慘啦! 佢買左包彩虹糖, 佢叫我比隻手佢, 點知佢倒左成十幾粒比我!!?? 食過彩虹糖的人相信都知d糖會脫色, 結果我把全部糖倒進口中, sweet到我飛起(>_<)令我怕左彩虹糖, 跟住fantasy 仲要狂拿d糖, 又成日提住d糖, 但我又冇得報仇, 真係激死!

加上佢今日又同我撞衫, 咪係間條衫加背心, 結果比tracy 狂笑我哋, 真係激死! 真係唔知tracy 笑咩, 可能係覺得我哋好好笑掛? 但我唔係傻瓜...跟住fantasy 笑佢不如同阿駿穿返間條衫咪得, 不過大家都係講笑, 唔好介意!

上堂放左break之後我終於有得報仇啦! 哈哈~~就係佢比我用間尺打佢, 我當然大力打..但自己d力度唔太大, 佢始終唔痛, 有d激氣! 其實在break 途中佢買左支烏龍茶, 仲比我離口飲, 果支野真係好難飲, 哈哈~呢次佢抵死啦!

最近睇返最近個blog, 點解我成日打d內容關於佢架!好激氣! 鬼叫最近接觸得佢最多, 佢多數主動坐我隔離, 同我傾計, 不過同佢一齊有講有笑幾開心, 就算只係做朋友已經好好呢^^