恐怖的數學測驗

做完ＣＳ及攝影功課之後, 今日的數學測驗完全未溫過, 死啦! 呢次實死, 希望唔及格得黎有個譜, 唔好太低分就好......

所以我今日勁唔願意去上堂, 而且仲遲到左２０分鐘. 好在佢一開始就講書, 如果係測驗就真係死得! 佢又講ｄ好難明的數, 我也覺得自己開始唔係太跟得上, 但我都會努力! 教完書之後先生話會調個大少少的課室比我哋測驗－我哋毎個人都要隔位坐, 但比我哋睇住筆記測驗. 不過都死得啦, 對住筆記又唔識做咪又死!

測驗終於開始, 我一收到份試題, 我全個人都嚇呆左, 竟然要在一個鐘之內做哂7條數? 如果對課堂唔太熟咪真係死得? 結果我真係做唔哂, 欠左一條未做, 惟有希望之前果ｄ做得正確, 及全份試題合格就算. 先生收左試題之後, 我心想住:[我一直都冇溫過書，就算唔合格也應該！]黎安慰自己

之後ｄ同學仔好興同人對答案, 我也唔想聽啦! 其實對左都唔知自己對唔對, 仲對黎做咩鬼? 不過有個男同學講話驚自己拿唔到90分? 那時我真係有ｄ想打佢!不過算啦, 之後仲有第二次測驗,只要第時在第二次及期考努力返咪得. 呢科也令我想起讀audit時, 我測驗也只有30分, 不過最後都可以合格. 我本來自果件事之後, 都再冇機會再遇上, 點知呢一科都係這樣! 惟有而家再次努力, 好似audit這樣有奇蹟出現!

識得尊重他人嗎?

本來毎個星期六都有CS堂, 但上個星期取消左, 改左在今日補上返. 而我也被迫取消左去美容院做facial. 冇計啦, 都係上堂大哂, 間美容院點都會補返比我, 總之佢毎次都有美容記錄, 唔使自己憂心.

我都可以準時返到學校, 而且撞到mandy, 我哋一齊去搵課室, 因為今堂個課室和之前上堂的唔同. 但我哋二個搵左好耐都搵唔到, 直至見到miss, 我哋三個一齊入課室, 個miss仲講左句 : [上堂在果度訓教會好舒服?]我估我哋二個唔會掛, 這樣咪即係好唔尊重佢?

今日又係和另一組一齊上堂, 其實自己對佢哋印象麻麻. 之前同佢哋一齊上數學, 佢哋都已經好嘈, 令到我哋組同學仔聽唔到書, 當然呢次也是, 佢哋今次坐在最後面, 但講野聲浪已經大聲到前面都聽到, miss已經叫左佢哋安靜, 讓我哋組可以聽書, 但佢依然大聲, miss 及我哋組只好無奈接受. 我自己覺得, 佢哋唔聽書係佢哋的事, 點解要打擾我哋, 最後仲要默默忍受? 可能係我哋太過善良又好, 怕與人爭執都好.

但有一件事更加離譜, 真係好難令人忍受, 就係另一組有三個男同學在中途突然離去, 因為依照IVE的 rule, 同學在中途離去當做冇返學處理, 所以miss 一定要問佢哋姓名, 但佢哋都仲未答miss就走左, 令到miss勁嬲, 於是同第一組的同學講 : [如果佢哋班唔去問個三個同學叫咩名, 當全班同學冇返!]我都係第一次見到miss這樣惡, 令到全班靜哂, 之後另一班都即刻搵返果三個人, miss先再為第一班同學點名.

其實讀得夜校的, 我覺得應該比日校的同學年妃大, 以及出黎工作過, 無論思想, 態度等等應該比日校的人成熟. 但在呢件事件之中, 見到佢哋根本唔識點樣尊重人, 就有點兒那個吧~換轉佢哋教書, 見到同學毎個人都早走, 睇下佢哋有咩感覺? 我估佢哋除左讀呢個課程之外, 應該學下點樣去尊重人, 對返學及工作都好, 希望在下一年一齊上課, 佢哋待人態度會有明顯轉變!

攝影功課

今日放左工之後, 我就開始做份攝影功課, 再唔做就真係死得. 見唔到個同事, 唔知係咪太開心, 心情比較好, 而且仲即刻有idea添:

我想用在中環及九龍公園的相片串埋一個故事, 大約在講及一個天使, 佢不理會天堂的一個規定到凡間去睇下呢個世界, 佢又睇過世間的自然景色(九龍公園的花), 又去過最熱鬧的城市核心 -中環, 佢被一連串美麗景色吸引住, 最後唔願再返天堂的故事.

為左呢份功課, 我要上網找尋有關天使的畫作為背景及插圖, 有好多畫都好美, 真係花多眼亂, 唔知選擇邊張; 之後再post毎一張落去, 去串連呢個天使故事, 務求令個故事run得比較自然. 最後一頁係呢個故事的結局.

呢次係第一次個人做一份有關設計的功課, 由搵相, 把所有相片及故事串連真係好好玩, 全個功課可由自己決定, 唔使同其他組員決定, 真係好自由, 好開心. 即使其他人未必欣賞自己作品, 但自己會有一種好開心滿足的感覺. 係在讀會計時完全唔同 :只係一直努力求合格, 而且自己跟本冇興趣, 毎日都好痛苦, 但呢一科完全冇呢種感受, 而且仲好享受添!

請假做攝影功課

話說我有一份攝影功課, 要在呢個星期六交, 但懶惰的我一點也冇做過, 甚至連相片都未影, 於是我請左二個半鐘頭假早走, 和mandy去中環影相, 仲有可以唔使見到個扮後生同事, yeah!!

我照我哋約定時間, 在4:00於中環地鐵站等mandy, 佢由於要去見工面試而遲左10分鐘, 唔緊要啦!我哋相討去邊個地方影相, 我哋先去A出口出發, 去左附近地方影相先~都知道自己衰左, 要[某]在地下先至可影到全座大廈外表, 自己又穿左短裙, 差d走光添(>_<)

自己唔知點解like用斜角去影, 可能特別d掛? 其實係同我份功課有關..

其實影IFC時係借左天橋的欄杆去影, 想影到好似在window望出去的感覺.

有d名勝或者出名的地方當然唔少得, 一定要去影相. 首先係石板街, 加上就黎到[哈囉喂], 有好多萬勝節的頭飾及裝飾賣, 總之包羅萬有, 勁正!可惜我要做好份攝影功課, 唔得閒去問價和買返一件...

我哋由石版街一直行返出去, 去到episode, landmark...附近, 途中影左唔少相片, 我就算唔講在邊度影, 大家都會知道..

唔好彩地, 我部相機影完呢個景之後開始冇電, 自己又衰多樣野, 冇拿到後備電出黎, 所以最後用左mandy部機幫我影左幾張相, 之後佢應允我會用msn把相片send黎比我, 真係唔該哂! 後來影左中銀及滙豐, 那時已經係黃昏, 天色開始黑, 所以影出黎係好美, 我也幾滿意^^

影埋呢二個地方之後, 靜在附近工作, 加上在msn話佢知我要在中環影相, 所以想同我一齊去附近飲杯野, 我本來都想去, 但我仲要去難桂芳影相, 及靜要在8:00之前去keep fit, 所以最後都取消左.

我和mandy去到難桂芳, 呢次係第一次黎, 比我想像中唔係太美, 有好多酒吧, 鬼佬及鬼妹, 果度景物唔太美, 所以都冇影到相. 之後mandy約左bf在附近, 我也算叫做完成任務, 要為呢份功課[度橋]先!

眼睛活受罪

唔知大家有冇想過自己四十歲會變成點?
(1)係個漂亮, 睇落去唔老的女強人
(2)或者已經成為人婦, 在屋企照顧小孩
(3)定係一個平易近人, 深受大家歡迎的普通女人

當然我就想做第一及第三類人, 至於家庭主婦便考慮下先. 但我公司有個老女人大家又點認為呢?

我哋公司有個四十幾的同事, 讀到中五程度, 之後冇再去進修, 所以毎當其他人夜校進修, 得到大學及大專程度時, 唔知佢係咪眼紅人哋, 加上佢有多年工作經驗, 見到人哋做錯左野便會話人讀[屎片]. 仲有我哋公司前同事, 已經讀完澳洲會計學位, 考多二張paper可在香港做執業做會計師, 佢又眼紅人哋話都唔知佢有冇料考到. 你唔好話人哋啦, 人哋半工讀, 由證書讀到上學位, 付出唔少努力先可完成, 你自己唔讀就唔好話人!

除此之外, 佢仲出左名自大, 唔理他人感受...所以平時我暫時只見到佢多數同屋企人食飯, 就算前同事去畢業典禮都冇叫佢, 又或者我姑姐佢哋有咩事都唔會話比佢知.

除左妒忌其他人學歷比佢高之外, 仲有佢妒忌而家所有妹妹仔都穿得比她潮及美麗, 所以佢又跟妹妹仔一樣穿衣 : 一件黑色低胸緊身衫, 仲要低到連胸都見埋, 加上一條短牛仔裙及啡色boot, 一係就黑色連身超短裙, 仲要有埋條銀色皮帶, 加埋條閃銀六分褲, 勁難頂!!??

Help~~!!!佢已經唔係後生及美女, 做咩事要穿成這樣? 真係視覺污染, 提早[哈囉喂]. 唉!!想到毎日要對住而家呢個佢, 真係勁慘及頂唔順!過我都佩服佢一件事 : 有重大勇氣穿住件衫扮後生比人笑, 哈哈~

畢業典禮終於到啦^^

今日終於到左畢業典禮啦, 朝早趕頭趕命, 又要梳洗, 打扮一下和食早餐之後, 要趕快去上環地鐵站搵我幾位同學仔 -jovy及amy and 其他完全唔熟的同學一齊坐的士去hku 採排.

終於採排完左, 阿爸,媽, 妹及姑姐終於黎到啦, 見到佢哋黎左都好開心, 仲有我其中一隻至愛公仔 -史迪仔, 真係好開心, 事不宜遲,一齊影左相先~我和其中二位好同學, 成日幫我的Amy及Jovy. 但我好似遮住左amy隻公仔, sorry呀, amy(汗)

除左amy及jovy之外, 全部都唔認識架, 只係因為曾經同過一班, 又或者係jovy認識的同學仔先會一齊影相

左起 : 我阿爸, 媽, 中間那個樣衰的係我, 跟住我妹及姑姐. 只要有呢哋四個親人黎都已經好開心, 多謝哂黎我畢業典禮^^

哈哈~~姑姐, 比你過下隱先啦, 上次佢畢業典禮在文化中心舉行, 而且只有佢一個人畢業, 我哋仲未畢業, 係咪而定同朋友仔一齊畢業好開心呢?

影完相冇幾耐, 畢業典禮正式開始, 首先我哋畢業生要入左會場先, 跟住先到畢業生各位親朋友入座, 我一直另轉個頭, 睇下爸媽入左黎未, 最後佢哋坐左在最後一行. 點知見到禮堂仲有上排比人坐, 總之你哋遲d黎啦(講笑)

只見到禮堂都令我好緊張, 加上地面都幾線下, 驚住自己會成個線底左, 所以都好緊張.
等全部畢業生, 各家長入哂禮堂之後, 便開始奏國歌, 全部人需要站立, 等各位學系教授, 博士進場之後, 就開始頒獎. 首先係我哋會計部, 大約有130名畢業生, 到我上台時都有d緊張, 好在最後冇[線]親, 而且藍帶個博士講恭喜, 呢一刻真係好開心, 覺得自己一直的努力冇白費到. 最後落台時我爸仲幫我影左張相添,但都企左好耐先至影到呢張出黎, 但真係幾美(自己覺得)

在頒完所有獎之後, 個禮堂會開放三十分鐘比大家影相, 自己當然冇執輸, 一於同大家鬥搶, 搵d美的位置影左先算. 最後迫左好耐先至去到台上影相我哋一定在禮堂影完之後, 爸媽要返工廠工作, 我妹又跟住返去. 姑姐好有義氣等埋我的朋友黎先至走, 真係好多謝你. 在等我朋友途中, 我姑姐見到隻kuromi畢業公仔, 佢尖叫左起黎. 放心啦, 等你之後畢業, 真正帶四方帽, 一定會送比你, 就算冇點都會搵比你^^

之後蔡蔡打電話比我, 佢終於到左hku, 但hku真係太大, 我哋要睇座標, 先至搵到大家. 至於原定黎的mandy因為私事而唔黎得, 但唔緊要啦, 我反而擔心佢係咪真係好唔開心及唔開心的原因, 希望佢快d振作返, 開心d. 蔡蔡到左之後, 我的sony貓都到左, 你人又到, 心又到, 我點會唔開心呀?總之大家開心咪得, 一齊影返張相先~

之後veron, eva, 蕉都黎左, 我都有花, 跟住liz, 嘉華及寶妮都帶左我老公阿jack黎. 全部人及物件終於到齊, 事不宜遲, 大家快d一齊影相, 仲要影多d添, 首先在禮堂附近, 分別係通道, 噴水池旁及鐘樓附近影相:


在禮堂附近影完相之後, 跟住去左食下午茶, 大家多數飲杯野就ok, 因為佢哋多數食左野黎, 而寶妮及蔡蔡各叫左一個下午茶餐食, 我就...哈哈..我早上食左件蛋治之後都冇食過野, 所以我就叫左二個餐, 其中一杯飲品比左嘉華. 我見到佢哋全部人都望住我食二個餐, 鬼叫我肚餓咩, 冇計啦! 食完之後出發, 去何花池~當然又係去影相啦!

不過我哋做對中山先生石像做左樣極之不敬的事 :
其實係因為何花池附近冇位放物件, 惟有放在[佢]身上, 中山先生有紳士風度, 加上大人有大量, 應該會原諒我哋(同埋估佢夜晚訓教唔會搵我哋掛?)

可能自己唔習慣穿高跟鞋, 隻鞋頂住d腳趾勁痛, 趁veron及蕉去左library睇展覽時, 我就換返自己一早帶黎的boot, 換左之後隻腳舒服返哂, 之後再去影相. 我哋選擇在library出面條樓梯度影相. 但有好多人上上落落, 幾經辛苦先至影到幾張相. 而最後都去左hku門口影相, 影完相之後便各散東西 : 蕉及eva去銅鑼灣行街, veron都約左人在金鐘等, 我和蔡蔡及多數人返屋企. 我拿住三個大袋返屋企, 真係滿載而歸, 但真係重到飛起, 不過唔緊要啦, 呢d係各位親人及朋友之心意, 多多都同你哋拿^^

返到屋企即刻替花換左個花瓶先, 以及為我所有親友送比我的物品影返張相先~

在這個blog除左多謝蔡蔡, eva, veron, 蕉, liz, 寶妮及嘉華比面出席之外, 希望呢日唔會悶親佢哋. 仲有多謝未能出席的酸梅及嘉華, 佢哋都勁有心, 打電話問候一下我, 問我開唔開心之類, 我知你哋都有原因唔可以出席, 但唔緊要啦, 你哋打個電話黎已經好開心, 尤其係酸梅, 佢在工作時間打電話比我, 真係好感動, 多謝埋你哋二位.

仲有同學及朋友仔coco, 佢呢日原來上左大陸工作, 之後第二日都同我msn問候我及say sorry. 又係同上, 你打電話黎問候已經非常好, 多謝哂你, 期待你pass埋最後呢二科, 比我哋出席你的畢業典禮呢~

仲有仲有mandy, 佢原定呢日會黎, 但因為有事發生左而唔開心, 最後都冇黎到. 希望佢會開心及振作!

同蔡蔡行街 +畢業前準備

首先要同蔡蔡講句sorry先, 原定琴日去街買野的日子, 但因為做CS功課時, 有一位同學仔在今日唔得, 所以就改左星期六, 唔緊要, 總之最後完成任務就得啦(蔡買boot及短褲,我買黑色波波絲巾)

我哋首先去左花園街先, 睇蔡蔡二件目標物品先, 佢果然好快手, 在上次果間舖買左條黑色短褲, 跟住就試boot, 其實佢都睇中左幾對, 但由於價錢太貴, 竟然要成$180???這樣貴當然唔買啦!都係下次先算, 不過個款都幾美下, 其實都有d可惜....

至於我就去左旺中買我條絲巾, 我想買黑色好耐, 因為在其他店舖都見唔到有, 所以先至去旺中. 旺中的確係有, 但要成40元一條, 貴死人咩? 我見到其他店舖賣其他顏色都只係20元, 足足貴左成倍!!但鬼叫呢條係自己心頭好咩!惟有忍痛買左佢!

行到大約五時幾, 我同蔡蔡各自回家, 不過我今次唔係返深井, 而係返以前麻麻屋企 -慈雲山. 因為我姑姐會幫我剪陰, 搵定去畢業典禮的衫, 同埋會在當日化妝, 所以咪一定要返去一次. 姑姐煮左佢最拿手的烏冬做晚餐, 勁正!今次真係要多謝哂姑姐一直為我打點所有畢業典禮要用的物品, 你真係好錫我, 多謝哂

聽日係畢業典禮啦, 早d休息先, 同埋希望果日自己會比較美d~~