又要上英文堂(哭)

今日終於要上返英文堂, 也係我在四科之中最唔想上的堂, 鬼叫真係好悶咩~~但我始終唔太鍾意遲到, 所以都係準時返學吧!

一入到課室, 只見到只有我一個女仔返左學校, 其他都係男仔, 我是但搵個位坐, 之後mandy先至返, 因我都坐得幾後下, 所以佢見唔到我.....嗚....最後演變成我周圍全部都係男仔, 只有我一個女仔的局面, 我寧願周圍全部係女仔. 不過呢樣都唔係重點, 而係又要做小組討論, 今次講的題目係用英文問題去問毎位同學對大家的第一個印象, 起初d人都係問鍾唔鍾意食野和訓教, 呢二樣自己當然鍾意啦, 點知有個男仔問左我一個問題 : 我係咪有好多個男友!!!!????唔係掛? 我個樣同性格似咩?我都被呢條題目嚇呆左, 好想講笑答佢我男友數目有如天上繁星一樣, 但到最後我都只係講句:[不是]

oral 終於完畢, miss 同我哋講呢科要做功課, 仲要上網去做, 在指定時間內交添! 哇~!!呢科不愧係[多媒體設計及課程], 連英文功課都要上網做, 呢樣先至勁!!

思想簡單

今日如常在屋企打機, 點知下午有一個好友打電話黎, 我哋一齊傾起計上黎. 講開佢之前有個男仔msn朋友性格..好似幾好, 而且之前剛和gf分手果個, 同我好友都幾好傾, 而且為佢而改變自己外觀. 但某日同個男仔msn, 先知道個男仔好重階級, 我指的係學歷. 以及女仔外表, 於是令我朋友失去同呢位先生傾計的興趣.

其實男仔重視女仔外表已經見唔少, 只要你係美女都會對你好d, 毎件事你不用問口, 會自動幫你, 呢d係好膚淺. 雖然講女仔見到型男都會發哂狂, 但程度都唔及男仔(以我所見,有d姣婆例外). 不過我明白, 鍾意睇型男索女不是問題, 可能毎個人都喜睇美的東西, 我見到型仔都會望多幾眼. 但要搵個型仔/美女拍拖就麻煩, 因佢哋太有異性緣, 吸引更多異性, 即使明白要互相信任, 心入面總是不可放心. 加上佢始終會老, 難道不再愛他嗎?

呢樣比較個人, 毎人對型男索女的標準唔同, 唔再講呢樣野. 但睇學歷, 階級而搵異性, 我對呢樣野有所保留. 而家呢個社會, 毎個人都睇名譽, 財富, 地位, 於是令到佢哋在選擇伴侶時也成為其中一項條件. 就好似我好友msn個男仔太重階級, 要求身邊的人和自己學歷等級相同, 我朋友只有大專學歷, 就話佢冇去進修, 總之講到佢非常傷心同失望. 加上佢近排有不愉快經歷, 令佢有少少尋死的傾向, 又冇人傾訴, 所以佢同我講真係好開心, 起碼感覺上自己被佢重視. 希望你可以振作, 忘記那個男仔吧, 重新過開心, 積極的新生活....忘記需要時間, 但更需要朋友的關懷...

對我黎講, 在錢方面或者會睇下, 但不太重, 只要足夠日常生活費用, 有返少少積蓄已經可以, 另一半型仔, 屋企有錢只係bonus. 只要真正喜歡自己, 對自己好, 呢樣先至最重要, 也係最真實, 而且歷久常新. 可惜在現在社會上, 真愛很少, 重視物質甚多, 毎人幾乎為錢而活,只為錢嫁比個有錢人, 甚至犧牲肉體去換取金錢..

人點解唔可以只為愛而生活? 即使有苦有喜都好, 對自己黎講係個好體驗.總比毎日只為物質生活, 金錢忙碌而開心吧?

[悶熱]星期日

今日終於叫可以休息返一陣, 加上而家上堂都冇咩功課做, 於是咪在屋企打下機. 但玩PSP隻FF7, 咪提啦!真係玩到眼火爆, D任務怪物唔係即死, 就係扣得超多HP, 即使有咩防即死裝備, HP及攻擊界限特破都死啦, 成日 game over, 認真冇隱!於是同我妹二人就另覓其他遊戲玩

最後搵到在之前出的psp game -FF1及FF2(又係FF, 真係唔怕死嗎?), 鬼叫自己鐘意玩FF咩!!??但我見到有一隻曾經在另一部手提遊戲機玩過, 另一隻d公仔就....太過美(反話), 於是放棄左呢二隻, 改玩一隻PS2 game, 都幾鬼好玩架, 就係幾出名的RPG :[tales of abyss]

戰鬥系統同所有[tales of]比較, 呢隻戰鬥系統係最好, 至於故事就....哈哈..就見人見智啦, 不過惟一比較like的係男主角竟然係另一位(都應該叫壞人吧? 但之後會幫好人)的複製人. if 大家冇玩過都可以試玩下, 老實講, 呢隻game我已經爆左二次機, 但都仲玩佢, 所以真係幾好玩~~

在呢一日只係玩呢隻遊戲, 有少少無聊....加上天氣又熱, 呢d咪真係叫做[悶熱]啦~~

上課的一天

今日又要上CS及攝影堂, 首先講左CS先, 呢一堂又要我哋在堂上做迷你遊戲, 所用的物料係 :膠紙, 較剪, 一個Ping Pung 及多張A4紙, 條件就係隻遊戲唔可以大過張紙, 於二個小時完成. 仲有一個好重要的條件, 就係自己作品必需有一張草圖, 否則會扣少少分數.

我哋呢組在上星期六整個書架外表, 而且又過左時間, 所以呢次吸取教訓, 唔好用太多時間討論, 因為太多意見, 唔知用邊個, 所以今次我哋先畫個草圖, 順便一齊討論. 我哋一開始已經想到彈珠機, 因為易整同好玩~~有D組員建議整用波在迷宮走動, 冇fall落洞穴去終點果隻game, 但最後被否決左, 整返彈珠機^^

最後我哋呢姐用左二個鐘多少少的時間完成左, 有同學仔和老師都讚幾美, 不過我哋係即刻完成之後影相, 所以張枱就非常亂.....仲要唔記得左寫遊戲玩法, 不過都應該唔使寫吧? 惟一要講下的係, 毎枝針的空白地方其實係有隻可愛的豬仔, 但係用鉛筆畫, 冇時間油顏色, 咪睇唔到, 不過呢次都幾滿意, 只係時間方面再快d就好!!

呢堂上完後到攝影堂, 除左要交上次堂上功課之外, 仲要聽佢攝影理論, 聽到我狂[放蚊], 可能自己真係對呢方面冇咩興趣, 之後要我哋用唔同焦距(即係d咩50mm-300mm)之類去影同一處地方, 結果影到....唉....都有d相叫做ok掛, 對於唔認識用半專業機影相的我, 真係要撞手神先至影到美相

(本來想整埋d相落黎呢度, 點知屋企部腦upload相片超慢, 改在星期二在公司upload, 不便之處, 敬請原諒!!!)

原諒....

今日返工上左蔡蔡個blog, 見到蔡蔡在blog上用一個身份"佢"黎同我講對唔住, 仲有一句令我印象好心刻, 就係 :有咩唔開心的事直接同佢講. 對了, 其實琴日我嬲都冇聽佢解釋, 可能佢有其他苦衷而唔講我知, 呢次係我自己太偏激, 太過情緒化, 令到好多朋友擔心和令大家唔開心, 所以要道歉的應該係我自己, 尤其要對我呢位最好的朋友講句[對唔住, 請原諒我!]

最後在msn度都表達大家對蔡蔡有bf的睇法及道歉之後, 起初大家都傾得好少野, 後來就似平常大傾特傾, 大家都傾到剪頭髮的問題, 我就想染髮及電捲, 蔡蔡就未清楚, 不過堅持唔會剪短, 我知架啦, 因為之前你同我講過, 同埋我一直未見過你短髮, 不過都唔使急啦, 髮型可慢慢考慮下, 費時第時剪得樣衰都唔知點補救好!

p.s. 先祝蔡蔡佢同bf幸福快樂, 白頭到老!同埋我都想睇下你bf個樣呀~!!仲有至重要呢樣 ---------->希望我哋以後感情都勁好, 唔好再嗌交, 總之永遠都係好友~~

女人錢真易搵

琴日在極之唔開心的心情之下去美容院做facial, 其實之前已經book左在呢日7:00開始, 但等左好似差唔多半個鐘先可以開始, 有d激氣!

一開始有個美容師同我做皮膚分析, 佢話我的皮膚勁乾, 加上勁多豆豆及塊面好污濁, 尤其係我眼果部分更加乾, 甚至出現烈紋. oh no~!!原來我的皮膚已差到呢個地步? 於是美容師把我之前個燕窩美白面膜轉左做豆豆, 補水全面護理, 真係慘~!!本來我想試燕窩的說!

美容師首先叫我換左佢哋件衫, 方便做美容, 果件衫仲要係low cut, 低到去個心口度, 然後訓在佢張床度. 哇!!果度d冷氣好鬼冷, 只有一張被蓋下!等左一陣終於開始個療程, 由於全程差唔多要合埋對眼, 所以有d療程唔太知道咩黎~!!首先係做左眼部mask, 目的係去紋同黑眼圈. 之後就做豆豆護理, 果d護膚品好過隱, 涼涼地, 但又好舒服, 仲有一個面膜好鬼厚同重, 感覺好似比一本大書壓住我個臉^^

期間當然我同美容師有傾計, 原來佢(聲稱以前d豆豆仲勁過我, 睇左西醫, 皮膚科醫生都冇用, 後來在呢度做facial先至冇事), 其實我知佢係向我sell野, 女仔總是貪美, 即使知道係假, 都會信以為真.不過最慘的係叫我換哂成批化妝品, 因為我其實係敏感及乾性皮膚, 尤其係冶豆豆系列, 因為呢d只會令皮膚更加乾

最後都在有少少唔願意的情況下join呢間美容院course同買佢護膚用品, 足足花左我幾千元, 真係好鬼肉痛! d錢儲左好耐, 真係唔捨得, 唔怪之得話女人錢易搵啦, 閒閒地都幾千元(哭)

好! 下次一於放哂d錢在儲蓄戶口或炒股, 第時睇間美容院點屈我錢~~!!仲要補充一句 :美容院不斷dum人比錢佢哋做咩皮膚護理, 又話出面d化妝品對自己皮膚點差, 要大家幫襯佢哋購買! 總之大家去幫襯呢d美容院時大家要小心, 同埋享受完好正的美容服務背後係貴到飛起!!!

突如其來的二件事件

在未講正題之前, 先發生左二件小事. 第一件事係我班同學susuki在我返工一開始就hi左我, 講真其實有少少奇怪, 因為佢平時有cool, 好少同人傾計,佢今日竟然搵我, 而且出奇地好傾, 後來先知佢原來而家都係做文員, 都係唔知點解會讀左IVE, 自己以前工作經驗等等, 總之慨括一句 :佢極之討厭做waiter, 因為要廚房及客人氣, 勁慘~~!!

第二件事係我返黎睇蔡蔡個blog先至知, 原來佢已經有男友! 本來我應該鄧佢開心, 但我突然回想起佢在msn同我講的一句:[佢有bf第一個同我講], 點解呢件大事我係唔知第幾個知, 仲要佢唔係親口同我講, 我只可在blog知道.

我哋唔係好好朋友嗎? 點解唔守我哋之間呢個約定, 於是我非常之憤怒, 在呢日冇同佢講過一句說話. 有人或者覺得無論係第幾個知都冇所謂, 但我覺得大家朋友之間的約定好重要, 而家呢件事我覺得自己有少少被背叛的感覺, 或者我太重視呢段友情........anyway, 但我又唔想破壞呢段友情, 於是我比自己一個冷靜期, 希望自己會原諒佢......