IVE 會有男仔認識嗎?

睇左書名果句, 唔好以為我想認識男仔! (係普通朋友,if係情人更好...?)只係睇網上論壇話有個男仔問IVE邊度會多D美女(溝), 我見到有好多人都話行政管理同設計會有好多識打扮的女仔. 死啦! 我之後會讀果科都算係設計, 會唔會好多女仔? 我估都係時裝同珠寶設計多D掛, 唔係我個廣告設計.

不過多唔多女仔或男仔都唔緊要, 最重要係可認識到更多朋友, 毎一個人都融洽; 同埋可實現自己的夢想~~!!(咪係做個美女的graphic designer)

講開男仔, 如果有以下果隊gazette是但一個型仔, 而佢又鍾意我就好...又發白日夢....同埋我都知在hk都幾難搵...

苦盡"金"來的星期四

今日又要出job啦!知唔係又要去葵興, 我在lunch時原本熄左燈, 伏在枱上訓教(我在果度自己一個人一間房工作), 點知個老闆個阿爸, 即係大老闆返左黎, 我慌忙讓座, 不過最黑仔的唔係冇得訓教,而係佢一直不停食煙, 仲要關埋門果隻. 我計過佢在短短二個鐘內食左五支煙, 而且見到隻手仲黑哂. 同埋我慘係成為二手煙受害者, 真係命都短幾年, 仲要佢用左部腦, 我唔可以工作, 真係激死.

以為放左工可脫離個"煙袋", 點知出面落大雨, 我又冇遮, 於是咪落湯雞由我返工果度去地鐵站, 但沿途放工的人竟冇人幫我, d人真係黑心! 雖然我明知落雨唔拿遮係我衰, 但唔至於冇人幫我. 呢件事令我記得在六年前,當時我仲返緊學, 在途中落大雨, 好似仲係紅色暴雨,我又係冇遮, 但果陣時有個幾後生的女人竟遮到我返學一半路程, 之後我仲可以返去工廠. 以前熱心幫助他人的人全部去哂邊? 而家d人學歷係高, 周街都係大學生; 而且又搵得多錢, 但佢哋的良心已冇哂. 換轉係我見到有人冇遮, 我一定會遮埋佢. 總之我都係比較懷念以前人人熱心助人的時侯...

不過皇天不負有心人, 我一返到屋企即刻爆左隻應援2, 仲拿左隱藏難關, 真係好鬼難玩, 毎首歌都要B級先至得. 不過令我最開心的係IVE竟收左我讀我一直都想讀的科 -數碼娛樂及科技的hi-dip!?其實呢個課程係廣告設計,電腦遊戲開發同電腦繪圖.好開心牙~~!!不過.....要在6月16-20日要報名!這樣我咪要特登去返我所讀的分校度辦入學手續!?都唔知呢樣好唔好??

聽日又要出job

唉~~!!在六點幾先知聽日又要出job, 好慘牙~~!!又唔可以同我d朋友傾計, 我會死架~~!!!

一場無端端的口舌之爭

今日edwin終於返左工, 本來我應該恭喜佢, 怎知我因為佢一直冇比相我的事而耿耿於懷, 於是佢hi我時便問佢- 為什麼次次隱瞞自己張相的原因. 佢就話自己有女友同想認識, 了解我先至比張相我睇, 仲有話外表不太緊要. 同埋話出黎見面先見到佢個樣. 試問一個唔比相我睇的人又點會同我出黎? 於是我用呢一點同佢講.

跟住佢就同我講, 話我係佢好朋友, 同埋我係個好女仔, 但唔知點解我有d嬲. 於是同佢講左好多難聽的說話, 話自己其實唔係個好女仔, 又話自己貪錢, 總之講到自己一文不值. 其實我一早知佢唔喜歡貪錢的女仔, 但我偏要激佢, 之後佢真係好嬲, 同我講佢自己唔想同貪錢的女仔再傾計. 我在那時更加嬲, 就話好女仔跟本冇人識欣賞, 可能男仔比較大量d, 佢反而問我為什麼話自己冇人欣賞.

之後佢off左line, 我覺悟自己講得太衰, 同想係咪因為我激得佢太嬲先至off? 其實我都唔想同你鬧交架, 但我又搵唔到原因去解釋, 難道我喜歡了他? 不會吧!我連佢聲音同外表都未見過, 怎會喜歡? 況且佢成日同我講驚女友誤會, 又叫我唔好愛上佢, 即係佢都唔like我. 從以上推斷我哋二個係冇可能. 我只係因為冇左個好友而傷心.....

好在佢後來on番line, 我便同佢道歉, 佢好似都原諒我, 太好人啦~~!!仲好關心我問返我why會講好女仔冇人欣賞, 仲同我講話唔埋有男仔鐘意我. 唉~~!!呢d只係佢推測, 加上又唔認識我d男仔朋友, 佢又點知? 仲話我第時一定會搵到個bf.在呢一刻, 我對頭先對佢差的事非常後悔, 佢不但冇嬲?仲反過來安慰我, 如果佢冇女友同鐘意我就好, 我一直都想搵呢類性格的bf. 我哋之後如常傾計, 希望呢件事冇破壞呢段友情......!!!

最近打機紀錄

最近公司忙到半死~~!! 所以我一放工, 在屋企多數打機. 鬼叫d朋友有d唔得閒, 又冇另一半同我過咩! 可能我呢一世都係遊戲機陪我....講下笑

我而家分別玩二隻game -psp的獅子戰爭同nds的應援2. 以下係我對d game的評語同進度. 獅子戰爭就玩到最後個章, 雖然未爆機, 但全部隱藏人拿哂. 也都係我第一次玩戰棋game, 所以對於我來說係勁難玩, 而且我又唔like升level, 所以狂game over, 但最後拿左ff7男主角 -cloud就狂升level, 我真係偏心~~(笑, 鬼叫型仔大哂)至於個男主角只有lv 50....其他人都同佢差唔多.....

第二隻係應援2, 頭果二個難度(氣輕同果敢的應援)都有爆機首歌, 而且呢隻game又好玩, 又多歌聽. 我較like"pop star", "believe",同埋爆機果首, 也係電車男尾果首曲

仲有今日edwin病左冇返工, 先祝佢快d好返, 聽日msn見!

預祝父親節快樂

琴日經過我,姑姐商量後, 就決定去黃大仙間富臨慶祝算. 至於不是阿爸決定嗎?其實佢就冇所謂, 因為佢一早已去左釣魚, 仲要好遲先返, 加上佢為人比較冇所謂,第時有好野食就得(比阿爸見到呢篇野驚比佢鬧死).

唔知各位朋友的家人有冇飲"特價茶"的習慣? 我哋一家就有, 所以晨早阿爸揸車出去.唉~!!同平時返工起身個時間差唔多, 無奈!不過算了, 為左平d都值得.

我姑姐一早去到搵埋位, 仲叫左好多正野食 -牛腸, 牛肉球, 肉餅飯..正呀! 跟住當然由主角阿爸話事, 佢仲叫左燒買, 蝦腸..叫下叫下, 五個人共食左十二碟野, 差唔多啦!仲好好味tim.大家可能會估, 叫這麼多食物實貴死我, 仲要係我請, 其實只係要$120到, 勁抵牙! 如果父親節果日食一定超過呢個價, 仲要有排等, 因為我哋以前都試過, 唔通仲唔信邪咩!

anyway, 餐茶的價錢只係其次, 最重要係阿爸食得開心, 同埋在呢度講句 :父親節快樂, 同埋買股再搵多d, 盡快還完呢間樓的債! 同時我都希望自己可搵多d, 比多d家用幫手供樓, 雖然數量不太多.....(死啦! 係咪講得太多私人野...!?)

希望下星期六可一同食飯

今日又要返工, 但呢個只係名義上, 實際上都係同朋友用msn傾計, 今日同蔡蔡, liz 傾計, 而且仲約好下星期六同成班朋友去食飯.

跟住我順便問埋liz下星期日去唔去石澳, 佢話果日父親節, 要同阿爸食飯, 唔去得. 死啦!最重要的父親節都唔記得, 真係不孝! 鬼咩, 只係公司野都做到我死, 所以唔記得都正常!? (比藉口比自己), 但都唔會影響到我去沙灘, 因為我決定聽日同阿爸預祝左先, 正日果日飲茶好貴, 又難搵位. 最多呢餐我請(^_^)

不過最重要都係問左d人下星期六去唔去食飯先, 但以我性格一定會唔記得. 唉~!惟有自己"執生"啦!